1. Καβά βιβλίος γραφίνελα ο Ιεχωβά σαρ βακερέλα ο εδάφιος Μαλαχίας 3:​16, ντα σο ισί γραμμέ λέστε;

 ΧΙΛΙΑΔΕΣ μπρεσά ακανά, ο Ιεχωβά γραφίνελα εκ ξεχωριστός βιβλίος. Ανταλέ βιβλιόστε ισί ναβά, ντα ο πρώτος ναβ ισί ι πρώτε πιστέ μαρτυράσκο, ι Αβελίσκο. * (Λουκ. 11:​50, 51) Κο μπρεσά σο νακχλέ, ο Ιεχωβά τσσουντάς γιαβερά-ντα ναβά κο βιβλίος, ντα αντιβές ισί οτθέ εκατομμύρια ναβά. Κι Αγία Γραφή, ανταβά βιβλίος βακέρντιβελα “βιβλίος οντουλένγκε σο τθερέλα-λεν ο Ιεχωβά πι γκοντιάτε”, “βιβλίος ι ζωγιάκο” ντα ρόλος ι ζωγιάκο. Ανταλέ μαθημάστε, κα βακεράς-λες “βιβλίος ι ζωγιάκο”.​—Διαβάνεν Μαλαχίας 3:​16· Αποκ. 3:5· 17:8.

2. Κάσκε ναβά ισί γραμμέ κο βιβλίος κι ζωγιάκο, ντα σαρ μπορίνελα αμαρό-ντα ναβ τι αβέλ οτθέ;

² Ανταβά ξεχωριστός βιβλίος τθερέλα αντρέ ο ναβά σαρέ οντουλένγκε σο ντένα λατρεία ι Ιεχωβάς νταριάσαρ, ή γιαβέρτουλους μπαρέ σεβασμόσαρ, ντα σο πακιάνα ότι λέσκο ναβ τθερέλα μπαρί αξία. Βον τθερένα ι ευκαιρία τι τζουβντιόν για πάντα. Αντιβές, αμαρό ναβ μπορίνελα τι γραφίντιβελ ανταλέ βιβλιόστε άμα τθεράσα εκ λατσσί φιλία ι Ιεχωβάσαρ αντράλ κατά λύτρος σο ντινάς λέσκο Τσσαβό, ο Ιησούς Χριστός. (Ιωάν. 3:​16, 36) Σαρέ μανγκάσα τι αβέλ αμαρό ναβ οντουλέ βιβλιόστε, είτε μπεκλεντίνασα τι τζουβντιάς κο ουρανός είτε κι πφουβ.

3, 4. (α) Κα τζουβντιάς για πάντα άμα αμαρό ναβ ισί ακανά γραμμέ κο βιβλίος κι ζωγιάκο; Εξηγίνεν. (β) Σο κα ντικχάς ανταλέ μαθημάστε ντα κο γιαβέρ;

 ³ Μανγκέλα τι βακερέλ ανταβά ότι σαρέ οντουλά σο λένγκο ναβ ισί γραμμέ ανταλέ βιβλιόστε σίγουρα κα τζουβντιόν για πάντα; Αρακχάσα ι απάντηση κο λάφια σο βακερντάς ο Ιεχωβά ι Μωυσίσκε σαρ ισί γραμμέ κο εδάφιος Έξοδος 32:​33: «Κον αμαρτιντάς κόντρα μάντε, λες κα νικαβάβ μι βιβλιόσταρ». Άρα, ο ναβά σο ισί ακανά γραμμέ ανταλέ βιβλιόστε μπορίνενα τι νικιόν, ή τι σβήντιβεν, σαρ τι γραφιντάας-λεν κι αρχή ο Ιεχωβά μολυβίσαρ. (Αποκ. 3:5) Πρέπει τι μαράς-αμέν για τι ατσσόλ αμαρό ναβ οντουλέ βιβλιόστε μέχρι τι γραφίντιβελ μελανίσαρ, σαρ τι βακεράας, σο ναστί σβήντιβελα.

⁴ Ισί λογικός τι πουτσάς μερικά πράγματα. Για παράδειγμας, σο σικλιαρέλα-αμέν η Γραφή οντουλένγκε σο λένγκε ναβά ισί γραμμέ κο βιβλίος κι ζωγιάκο ντα οντουλένγκε σο λένγκε ναβά νανέ γραμμέ οτθέ; Κάνα κα λεν ζωή για πάντα οντουλά σο λένγκε ναβά ατσσόνα κο βιβλίος; Σο κα αβέλ-πες οντουλέντζαρ σο μουλέ ντα να τθερένας ποτές ι ευκαιρία τι σικλιόν ι Ιεχωβάσκε; Αβέλα-πες τι γραφίντιβεν λένγκε ναβά οντουλέ βιβλιόστε; Ανταβά μάθημας ντα ο γιαβέρ κα ντεν ο απαντήσεις.

ΚΑΣΚΕ ΝΑΒΑ ΙΣΙ ΚΟ ΒΙΒΛΙΟΣ;

5, 6. (α) Καγιά ισί εκ ομάδα τζενένγκι σο λένγκε ναβά ισί γραμμέ κο βιβλίος κι ζωγιάκο σαρ αγαβάσα κατά εδάφιος Φιλιππησίους 4:​3; (β) Κάνα κα γραφίντιβεν λένγκε ναβά κο βιβλίος κι ζωγιάκο χωρίς τι σβήντιβεν;

⁵ Κάσκε ναβά γραφίντιβενα ανταλέ συμβολικέ βιβλιόστε; Για τι ντας ι απάντηση, κα ντικχάς παντς διαφορετικές ομάδες τζενένγκε. Ο ναβά μερικέ τζενένγκε ισί γραμμέ κο βιβλίος κι ζωγιάκο, αλλά ο ναβά γιαβερένγκε νανέ.

⁶ Κι πρώτη ομάδα ισί οντουλά σο τραμπίντιλε τι κυβερνίνεν γιεκ ι Ιησούσαρ κο ουρανός. Ισί ακανά λένγκε ναβά γραμμέ κο βιβλίος κι ζωγιάκο; Βα. Σαρ βακερντάς ο  απόστολος Παύλος πι συνεργατόνγκε κο Φίλιπποι, ο ναβά ι χρισμέ τζενένγκε, σο τραμπίντιλε για τι κυβερνίνεν γιεκ ι Ιησούσαρ, ισί ακανά κο βιβλίος κι ζωγιάκο. (Διαβάνεν Φιλιππησίους 4:3) Αλλά για τι ατσσικιαρέν πουμαρέ ναβά οντουλέ συμβολικέ βιβλιόστε, πρέπει τι ατσσόν πιστοί. Σοράν, κάνα κα τσσουβντιόλ λένγκε η τελευταία σφραγίδα, είτε πριν τι μερέν είτε πριν τι αρχίνελ η μπαρί στεναχώρια, λένγκε ναβά κα γραφίντιβεν οντουλέ βιβλιόστε χωρίς τι σβήντιβεν.​—Αποκ. 7:3.

7. Κάνα κα γραφίντιβεν κο βιβλίος κι ζωγιάκο χωρίς τι σβήντιβεν ο ναβά οντουλένγκε σο ισί κο μπαρό πλήθος κι γιαβερέ μπρακένγκο σαρ αγαβάσα κατά εδάφια Αποκάλυψη 7:​16, 17;

⁷ Κι δεύτερη ομάδα ισί ο μπαρό πλήθος ι γιαβερέ μπρακένγκο. Ισί ακανά λένγκε ναβά γραμμέ κο βιβλίος κι ζωγιάκο; Βα. Κα συνεχίνεν λένγκε ναβά τι αβέν κο βιβλίος κι ζωγιάκο σοράν κατά Αρμαγεδδώνας σο κα νακχέν τζουβντέ; Βα. (Αποκ. 7:​14) Ο Ιησούς βακερντάς ότι ανταλά μπρακέ, δηλαδή ο λατσσέ τζενέ, κα οδηγίντιβεν κι αιώνια ζωή. (Ματθ. 25:​46) Αλλά ανταλά τζενέ σο κα νακχέν τζουβντέ κατά Αρμαγεδδώνας να κα λεν αιώνια ζωή αζομάν. Λένγκε ναβά κα ατσσόν γραμμέ κο βιβλίος κι ζωγιάκο μολυβίσαρ, σαρ τι βακεράας. Κι Βασιλεία κι Χίλιε Μπρεσένγκι, ο Ιησούς «κα αρακχαβέλ-λεν ντα κα οδηγίνελ-λεν οτθέ σο τθάβντενα πανιά σο ντένα ζωή». Ο ναβά οντουλένγκε σο κα ντεν καν κο Χριστός, κα ατσσόν πιστοί κο Ιεχωβά ντα κα νακχέν ι τελευταία δοκιμασία, κα γραφίντιβεν κο βιβλίος κι ζωγιάκο χωρίς τι σβήντιβεν.​—Διαβάνεν Αποκάλυψη 7:​16, 17.

8. Κάσκε ναβά νανέ γραμμέ κο βιβλίος κι ζωγιάκο, ντα σο κα αβέλ-πες λέντζαρ;

⁸ Κι τρίτη ομάδα ισί ο μπουσνιά, σο κα καταστραφίντιβεν κο Αρμαγεδδώνας. Λένγκε ναβά νανέ κο βιβλίος κι ζωγιάκο. Ο Ιησούς βακερέλα ότι «κα καταστραφίντιβεν για πάντα». (Ματθ. 25:​46) Ι Ντεβλέσκε πνευμάσαρ, ο Παύλος βακερέλα αμένγκε ότι βον κα λεν ι τιμωρία τι καταστραφίντιβεν για πάντα. (2 Θεσ. 1:9· 2 Πέτρ. 2:9) Ανταβά κα αβέλ-πες οντουλένγκε-ντα σο αμαρτιντέ κόντρα κο άγιος πνεύμας. Βον ισί οντουλά σο τζανένας ι αλήθεια ντιπ λατσσές, αλλά τραμπιντέ τι τζαν κόντρα κο Ιεχωβά. Ούτε βον κα τζουβντιόν για πάντα, αλλά κα καταστραφίντιβεν για πάντα. Αγαντίντιβελα μπουτ λατσσές ότι να κα ιστίν κατά μεριπέ. (Ματθ. 12:​32· Μάρκ. 3:​28, 29· Εβρ. 6:​4-6) Ακανά, κα ντικχάς πο λατσσές ντούι γιαβερά ομάδες τζενένγκε σο κα τζουβντιόν πάλι κι πφουβ.

ΟΝΤΟΥΛΑ ΣΟ ΚΑ ΙΣΤΙΝ ΚΑΤΑ ΜΕΡΙΠΕ

9. Καλά ντούι ομάδες τζενένγκε κα ιστίν κατά μεριπέ σαρ σικαβέλα ο εδάφιος Πράξεις 24:​15, ντα καγιά διαφορά τθερέλα η εκ κατά γιαβέρ;

⁹ Η Γραφή βακερέλα ότι ισί ντούι ομάδες τζενένγκε σο κα ιστίν κατά μεριπέ ντα κα τθερέν ι ευκαιρία τι τζουβντιόν για πάντα κι πφουβ. Βον ισί “ο δίκαιοι” ντα «οντουλά σο νανέ» δίκαιοι. (Διαβάνεν Πράξεις 24:​15) “Ο δίκαιοι” ισί οντουλά σο υπηρετίνενας πιστά ι Ιεχωβάς καζόμ ισινέ τζουβντέ. Οκιά μπάνταρ, «οντουλά σο νανέ» δίκαιοι να υπηρετίνενας ι Ιεχωβάς. Ντα ο πο μπουτ φαρ κερένας πράγματα σο να ισινέ ιτς δίκαια. Αφού ο ντούι-ντα ομάδες κα ιστίν κατά μεριπέ, μπορίνασα τι βακεράς ότι λένγκε ναβά ισί γραμμέ κο βιβλίος κι ζωγιάκο; Για τι ντας ι απάντηση, κα ντικχάς ανταλά ομάδες εκ εκ.

10. Σόσκε κα ιστίν κατά μεριπέ “ο δίκαιοι”, ντα καβά προνόμιος κα λεν μερικοί λένταρ; (Ντικχέν ο θέμας-ντα «Ο Τζενέ σο Διαβάνενα Πουτσένα» σο ισί ανταλέ περιοδικόστε ντα σο τθερέλα τι κερέλ οντουλέντζαρ σο κα ιστίν κατά μεριπέ για τι τζουβντιόν κι πφουβ)

¹⁰ “Ο δίκαιοι” ισί η τέταρτη ομάδα. Πριν τι μερέν, λένγκε ναβά γραφίντιλεας κο βιβλίος κι ζωγιάκο. Αλλά κάνα μουλέ, νικίστιλε λένγκε  ναβά οντουλέ βιβλιόσταρ; Νάα, σόσκε ισί ατζέ «τζουβντέ» κι γκοντί κι Ιεχωβάσκι. Ο Ιεχωβά “νανέ Ντεβέλ μουλένγκο, αλλά τζουβντένγκο, επειδή λέσκε σαρέ ισί τζουβντέ”. (Λουκ. 20:​38) Ανταβά μανγκέλα τι βακερέλ ότι, κάνα ο δίκαιοι κα τζουβντιόν πάλι κι πφουβ, λένγκε ναβά κα αβέν γραμμέ κο βιβλίος κι ζωγιάκο, παρόλο σο κα αβέν «μολυβίσαρ». (Λουκ. 14:​14) Σίγουρα, μερικοί ανταλέ τζενένταρ κα λεν ο προνόμιος τι υπηρετίνεν σαρ «άρχοντες σαρί κι πφουβ».​—Ψαλμ. 45:16.

11. Σο κα χρειαζίντιβελ τι σικλιόν ο άδικοι για τι γραφίντιβεν λένγκε ναβά κο βιβλίος κι ζωγιάκο;

¹¹ Ντικχέν ακανά ι τελευταία ομάδα. Βον ισί «οντουλά σο νανέ» δίκαιοι. Να κερντέ δίκαια πράγματα πουμαρέ ζωγιάτε, μπέκιμ επειδή να τζανένας ι Ιεχωβάσκε νόμοι. Οτθάρ, λένγκε ναβά να γραφίντιλε κο βιβλίος κι ζωγιάκο. Αλλά κάνα ο Ντεβέλ κα τζουβντιαρέλ-λεν, κα ντελ-λεν ι ευκαιρία τι κερέν πράγματα για τι γραφίντιβεν τελικά λένγκε ναβά ανταλέ βιβλιόστε. Ανταλά άδικα τζενέ κα χρειαζίντιβεν μπουτ βοήθεια. Πριν τι μερέν, μερικοί λένταρ κερντέας μπουτ γκεραλέ ντα τζουνγκαλέ πράγματα. Οτθάρ, κα χρειαζίντιβελ τι σικλιόν σαρ τι τζουβντιόν αντικάς σαρ βακερένα ο δίκαιοι κανόνες ι Ιεχωβάσκε. Για τι αβέλ-πες ανταβά, η Βασιλεία ι Ντεβλέσκι κα κερέλ κουμάντος ο πο μπαρό πρόγραμμας σικλιαριμάσκο σο αβιλό-πες ποτές.

12. (α) Κον κα σικλιαρέλ οντουλέν σο νανέ δίκαιοι; (β) Σο κα αβέλ-πες οντουλέντζαρ σο να κα μανγκέν τι κερέν οντουλά σο κα σικλιόν;

¹² Κον κα σικλιαρέλ οντουλέν σο νανέ δίκαιοι; Ο μπαρό πλήθος ντα ο δίκαιοι σο κα ιστίν κατά μεριπέ. Για τι γραφίντιβεν ο ναβά ι άδικε τζενένγκε κο βιβλίος κι ζωγιάκο, κα χρειαζίντιβελ τι αβέν αμαλά ι Ιεχωβάσαρ ντα τι ντεν πουμαρό λάφι τι τζουβντιόν λέσκε. Ο Ιησούς Χριστός ντα ο χρισμέ σο κα υπηρετίνεν γιεκ λέσαρ σαρ κριτές κα τθερέν πουμαρέ γιακχά οπράλ σαρέ ανταλέ άδικε τζενέντε για τι ντικχέν σαρ κα τζαν. (Αποκ. 20:4) Οντουλά σο να κα μανγκέν τι λεν ανταγιά βοήθεια κα καταστραφίντιβεν, “ατζέ-ντα άμα ισί 100 μπρεσένγκε”. (Ησ. 65:​20) Ο Ιεχωβά ντα ο  Ιησούς ντικχένα ο γκιά ντα να κα μουκχέν καεκχές τι κερέλ ζιάνι κο νεβό ντουνιάς.​—Ησ. 11:9· 60:​18· 65:​25· Ιωάν. 2:25.

ΑΝΑΣΤΑΣΗ ΓΙΑ ΤΙ ΤΖΟΥΒΝΤΙΟΝ ΝΤΑ ΑΝΑΣΤΑΣΗ ΓΙΑ ΤΙ ΚΡΙΝΤΙΒΕΝ

13, 14. (α) Σαρ αγαβάας ανγκλέ ο λάφια ι Ιησούσκε σο ισί κο εδάφιος Ιωάννης 5:​29; (β) Σο πρέπει τι τθεράς αμαρέ γκοντιάτε για τι αγαβάς ανταλά λάφια;

¹³ Ο Ιησούς-ντα βακερντάς οντουλένγκε σο κα ιστίν κατά μεριπέ για τι τζουβντιόν ατθέ κι πφουβ. Για παράδειγμας, βακερντάς: «Αβέλα ο σαάτι σο κα ασουνέν λέσκι φωνή σαρέ οντουλά σο ισί κο μεζάρια ντα κα ιστίν​—κον κερντάς λατσσέ πράγματα κα αναστίντιβελ για τι τζουβντιόλ ντα κον κερντάς μπέτι πράγματα κα αναστίντιβελ για τι κρίντιβελ». (Ιωάν. 5:​28, 29) Σο μανγκέλας τι βακερέλ ο Ιησούς;

¹⁴ Ανγκλέ, αγαβάας ότι ο Ιησούς ανταλέ λαφίντζαρ βακερέλας οντουλένγκε σο κα κερέν ο τζενέ αφού κα ιστίν κατά μεριπέ, δηλαδή ότι μερικοί κα αβέν πάλι κι ζωή ντα σοράν κα κερέν λατσσέ πράγματα, ενώ γιαβερά κα αβέν πάλι κι ζωή ντα κα κερέν μπέτι πράγματα. Όμως, ντικχέν ότι ο Ιησούς να βακερέλα ότι οντουλά σο νικίστιλε κατά μεζάρια κα κερέν λατσσέ πράγματα ή κα κερέν μπέτι πράγματα. Αλλά βακερέλα οντουλένγκε σο “κερντέ λατσσέ πράγματα” ντα οντουλένγκε σο “κερντέ μπέτι πράγματα”. Ανταβά σικαβέλα ότι ανταλά πράγματα κερντέ-λεν πριν τι μερέν. Λογικός νανέ; Ο Ιεχωβά ντα ο Ιησούς να κα μουκχέν καεκχές τι κερέλ μπέτι πράγματα κο νεβό ντουνιάς. Ο άδικοι πρέπει τι κερντέ ανταλά μπέτι πράγματα πριν τι μερέν. Άρα, σο μανγκένας τι σικαβέν ο λάφια ι Ιησούσκε οντουλένγκε σο κα “αναστίντιβεν για τι τζουβντιόν” ντα οντουλένγκε σο κα “αναστίντιβεν για τι κρίντιβεν”;

15. Καλά τζενέ κα “αναστίντιβεν για τι τζουβντιόν”, ντα σόσκε;

¹⁵ Ο δίκαιοι, σο κερντέ λατσσέ πράγματα πριν τι μερέν, κα “αναστίντιβεν για τι τζουβντιόν” σόσκε λένγκε ναβά γραφίντιλεας ανγκλέ κο βιβλίος κι ζωγιάκο. Ανταβά μανγκέλα τι βακερέλ ότι η ανάσταση οντουλένγκι σο “κερντέ λατσσέ πράγματα”, σαρ βακερέλα ο εδάφιος Ιωάννης 5:​29, ισί η ίδια οντουλάσαρ σο κα τθερέν ο «δίκαιοι», σαρ βακερέλα ο εδάφιος Πράξεις 24:​15. Ανταβά ταιριάνελα ι λαφίντζαρ σο ισί κο εδάφιος Ρωμαίους 6:7: «Οντουβά σο μουλό νασλί λέσταρ η αμαρτία». Ο αμαρτίες σο κερντέ ανταλά δίκαια τζενέ συγχωρισάλε σοράν λένγκε μεριμάσταρ, αλλά η πίστη σο σικαντέ κο Ιεχωβά καζόμ ισινέ τζουβντέ να μπιστάρντιλι. (Εβρ. 6:​10) Σίγουρα, ανταλά δίκαια τζενέ σο κα ιστίν κατά μεριπέ κα χρειαζίντιβελ τι ατσσόν πιστοί για τι ατσσόν λένγκε ναβά κο βιβλίος κι ζωγιάκο.

16. Σο ισί η ανάσταση οντουλένγκι σο κα “αναστίντιβεν για τι κρίντιβεν”;

¹⁶ Σο κα αβέλ-πες οντουλέντζαρ σο κερντέ μπέτι πράγματα πριν τι μερέν; Παρόλο σο, κάνα μουλέ, συγχωρισάλε λένγκε αμαρτίες, να σικαντέ πίστη κο Ιεχωβά καζόμ ισινέ τζουβντέ. Λένγκε ναβά να γραφισάλε κο βιβλίος κι ζωγιάκο. Άρα, η ανάσταση οντουλένγκι σο “κερντέ μπέτι πράγματα” ισί η ίδια οντουλάσαρ σο κα τθερέν ο άδικοι, σαρ βακερέλα ο εδάφιος Πράξεις 24:​15. Βον κα “αναστίντιβεν για τι κρίντιβεν”. * Ανταγιά κρίση μανγκέλα τι βακερέλ ότι ο Ιησούς κα ντικχέλ σαρ κα τζαν ανταλά άδικα τζενέ. (Λουκ. 22:​30) Κα χρειαζίντιβελ τι νακχέλ βακίτι για τι σικάντιβελ άμα κα αβέν άξιοι τι γραφίντιβεν λένγκε ναβά κο βιβλίος κι ζωγιάκο. Σάντε άμα κα μουκχέν παλά-πουμέντε ο γκεραλέ πράγματα σο κερένας  ανγκλέ ντα κα ντεν πουμαρό λάφι κο Ιεχωβά τι τζουβντιόν λέσκε, κα γραφίντιβεν λένγκε ναβά κο βιβλίος κι ζωγιάκο.

17, 18. Σο κα χρειαζίντιβελ τι κερέν σαρέ οντουλά σο κα ιστίν κατά μεριπέ, ντα καλέ πραγματένγκε κα κρίντιβεν σαρ βακερένα ο εδάφια Αποκάλυψη 20:​12, 13;

¹⁷ Οντουλά σο κα ιστίν κατά μεριπέ, είτε ανγκλέ ισινέ δίκαιοι είτε να ισινέ, κα χρειαζίντιβελ τι ντεν καν κο νόμοι σο κα αβέν κο νεβέ ρόλοι, ή γιαβέρτουλους βιβλία. Ανταλά βιβλία κα πουτάρντιβεν καζόμ κα ατσσικιαρέν ο 1.000 μπρεσά. Ο απόστολος Ιωάννης βακερέλα σο ντικχλάς κι φαντασία: «Ντικχλόμ ι μουλέν, ι μπαρέν ντα ι χουρντέν, τι αβέν ανγκλάλ κο θρόνος, ντα πουτάρντιλε βιβλία. Ντα πουτάρντιλο γιαβέρ βιβλίος· οντουβά ισί ο βιβλίος ι ζωγιάκο. Ντα ο μουλέ κρίντιλε σαρ ισινέ γραμμέ κο βιβλία, οντουλένγκε σο κερντέ».​—Αποκ. 20:​12, 13.

¹⁸ Καλέ πραγματένγκε κα κρίντιβεν ο τζενέ σο κα ιστίν κατά μεριπέ; Ι πραγματένγκε σο κερντέ πριν τι μερέν; Νάα! Σαρ βακερντάμ, κάνα μουλέ, λένγκε πουρανέ αμαρτίες συγχωρισάλε. Άρα, ο πράγματα σο κερντέ, σαρ βακερέλα ο εδάφιος, να αβέλα-πες τι ισί οντουλά σο κερντέ πριν τι μερέν. Οκιά μπάνταρ, πρέπει τι ισί ο πράγματα σο κα κερέν σοράν κατά σικλιαριπέ σο κα λεν κο νεβό ντουνιάς. Ατζέ-ντα ο πιστά τζενέ σαρ ο Νώε, ο Σαμουήλ, ο Δαβίδ ντα ο Δανιήλ κα χρειαζίντιβελ τι σικλιόν ι Ιησού Χριστόσκε ντα τι σικαβέν πίστη λέσκε θυσιάτε. Άμα βον κα τθερέν αζόμ μπουτ τι σικλιόν, καζόμ πο μπουτ πρέπει τι σικλιόν ο άδικοι!

19. Σο κα αβέλ-πες οντουλέντζαρ σο να κα μανγκέν τι λεν ανταγιά μπουτ σουκάρ ευκαιρία;

¹⁹ Σο κα αβέλ-πες οντουλέντζαρ σο να κα μανγκέν τι λεν ανταγιά μπουτ σουκάρ ευκαιρία; Ο εδάφιος Αποκάλυψη 20:​15 βακερέλα αμένγκε: «Κον να ισινέ γραμμέ κο βιβλίος κι ζωγιάκο φουρτίντιλο κι λίμνη κι γιακάκι». Βα, κα καταστραφίντιβεν ντιπ ντα για πάντα. Άρα, καζόμ σημαντικός ισί τι κεράς ο πο λατσσό για τι γραφίντιβελ αμαρό ναβ κο βιβλίος κι ζωγιάκο ντα τι ατσσόλ οτθέ!

20. Καλά σουκάρ πράγματα κα αβέν-πες κι Βασιλεία κι Χίλιε Μπρεσένγκι; (Ντικχέν ι φωτογραφία κι ανγκλαϊνί σελίδα)

²⁰ Σο σουκάρ βακίτι κα αβέλ η Βασιλεία ι Χίλιε Μπρεσένγκι! Αζομάν κα αβέλ-πες ο πο μπαρό πρόγραμμας σικλιαριμάσκο σο αβιλό-πες ποτές ατθέ κι πφουβ. Αλλά αζομάν κα αβέλ-πες κάτι γιαβέρ-ντα. Κα ντικχίντιβελ σαρ κα τζαν εμ ο δίκαιοι εμ ο άδικοι. (Ησ. 26:9· Πράξ. 17:​31) Σαρ κα αβέλ-πες ανταβά πρόγραμμας σικλιαριμάσκο; Ο γιαβέρ μάθημας κα βοηθίνελ-αμέν τι αγαβάς ντα τι εκτιμίνας ανταβά σουκάρ πράγμας.