1. Σαρ μπορίνασα τι αγαβάς ότι εκ τζενό ισί μπεσαλής;

 Ο ΜΠΕΣΑΛΗΣ τζενό μαρέλα-πες τι ατσσικιαρέλ πο λάφι ντα βακερέλα ι αλήθεια. (Ψαλμ. 15:4) Ο γιαβερά τζανένα ότι μπορίνενα τι ντεν λέσκε μπέσα. Μανγκάσα αμαρέ πφραλά ντα πφενιά τι ντικχέν ότι ισινάμ αμέν-ντα μπεσαλήδες. Σο μπορίνασα τι κεράς για τι ντεν αμένγκε μπέσα;

2. Σαρ μπορίνασα τι σικαβάς ότι ισινάμ μπεσαλήδες;

² Ναστί μανγκάσα κατά γιαβερά τι ντεν αμένγκε ζορίσαρ μπέσα. Η μπέσα κερδίντιβελα. Βακέρντιλο ότι η μπέσα ισί σαρ ο λοβέ. Κερδίντιβελα δύσκολα, χασάρντιβελα εύκολα. Σίγουρα, ο Ιεχωβά κερδιντάς αμαρί μπέσα. Ποτές να κα ντελ-αμέν λόγος τι χασαράς αμαρί μπέσα λέστε σόσκε, «σο-ντα κερέλα, μπορίνασα τι ντας λέσκε μπέσα». (Ψαλμ. 33:4) Ντα μπεκλεντίνελα αμένταρ τι μοιάζας λέστε. (Εφεσ. 5:1) Ακανά, κα ντικχάς ο παράδειγμας χάνικ πιστέ υπηρετόνγκο σο μοιάζενας πουμαρέ Νταντέστε, κο Ιεχωβά, ντα σικαντέ ότι ισινέ μπεσαλήδες. Σοράν, κα ντικχάς παντς ιδιότητες σο κα βοηθίνεν-αμέν τι αβάς μπεσαλήδες.

3, 4. Σαρ σικαντάς ο προφήτης Δανιήλ ότι ισινέ μπεσαλής, ντα σο κερέλα-αμέν ανταβά τι πουτσάς-αμέν;

³ Ο προφήτης Δανιήλ ισινέ εκ μπουτ λατσσό παράδειγμας μπεσαλή τζενέσκο. Παρόλο σο ο Βαβυλώνιοι λιντέας-λες αιχμάλωτος, βοβ μπουτ σουγκό σικαντάς ότι ισινέ εκ μπεσαλής τζενό. Ο τζενέ ντένας λέσκε ατζέ πο μπουτ μπέσα κάνα, ι Ιεχωβάσκε βοηθειάσαρ, εξηγιντάς ο σουνέ ι Ναβουχοδονοσοράσκε σο ισινέ βασιλιάς κι Βαβυλώνα. Εκ φαρ, ο Δανιήλ έπρεπε τι βακερέλ κο βασιλιάς ότι ο Ιεχωβά ισινέ στεναχωριμέ λέσαρ​—λάφια σο εκ  βασιλιάς να κα χαιρίνελας τι ασουνέλ. Έπρεπε τι αβέλ μπίνταρανο, σόσκε ο Ναβουχοδονόσορας τθερέλας βίαιος χαρακτήρας! (Δαν. 2:​12· 4:​20-22, 25) Σοράν μπουτέ μπρεσένταρ, ο Δανιήλ σικαντάς πάλι ότι ισινέ μπεσαλής κάνα εξηγιντάς ντιπ ο περίεργα λάφια σο γραφίντιλε εκχέ ντουβαρίστε κο παλάτι κι Βαβυλώνα. (Δαν. 5:5, 25-29) Σοράν, ο Δαρείος ο Μήδος ντα ο αξιωματικοί λέσκε ντικχλέ βον-ντα καζόμ λατσσό ισινέ ο Δανιήλ. Αγαντέ ότι ο Δανιήλ «ισινέ μπεσαλής» ντα ναστί κατηγορίντιβελας ότι «να κερέλας λατσσές πι μπουτί ούτε ότι να ισινέ τίμιος». (Δαν. 6:3, 4) Βα, ατζέ-ντα ο αρχηγοί σο ντένας λατρεία ψεύτικε ντεβλέντε αγαβένας ότι ανταβά πιστός υπηρέτης ι Ιεχωβάσκο ισινέ μπεσαλής!

⁴ Καζόμ τθεράσα ο παράδειγμας ι Δανιηλίσκο αμαρέ γκοντιάτε, τι πουτσάς-αμέν: “Σο ναβ τθεράβα με οντουλέντε σο νανέ Μάρτυρες ι Ιεχωβάσκε; Τθεράβα ναβ τζενέσκο σο κερέλα πο ευθύνες ντα ισί μπεσαλής;” Σόσκε ισί λατσσό τι απαντίνας ανταλέ ερωτησιέντε; Επειδή, κάνα ισινάμ μπεσαλήδες, δοξάνασα ι Ιεχωβάς.

5. Σόσκε ι Ανανιάς τζανένας-λες σαρέ σαρ μπεσαλής τζενό;

⁵ Κο 455 Π.Κ.Χ., αφού ο κυβερνήτης Νεεμίας κερντάς πάλι ο βουτσσέ ντουβάρια κι Ιερουσαλήμ, ροντιντάς μπεσαλή μουρσένγκε σο κα αρακχαβένας ι πόλη. Αντρέ οντουλέντε σο τραμπιντάς ο Νεεμίας ισινέ ο Ανανίας, ο διοικητής ι Φρουριόσκο. Η Αγία Γραφή βακερέλα ότι ο Ανανίας «ισινέ μπουτ μπεσαλής τζενό ντα νταρέλας κατά αληθινός Ντεβέλ πο μπουτ μπουτέ γιαβερένταρ». (Νεεμ. 7:2) Επειδή μανγκέλας ι Ιεχωβάς ντα νταρέλας μα τι πφανγκέλ λέσκο  γκι, ο Ανανίας λέλας σοβαρά σο-ντα διορισμός ντιντιόλας-λες. Ανταλά ιδιότητες κα βοηθίνεν αμέν-ντα τι αβάς μπεσαλήδες κι υπηρεσία σο ντάσα κο Ντεβέλ.

6. Σαρ σικαντάς ο Τυχικός ότι ισινέ μπεσαλής αμάλ ι απόστολε Παυλόσκο;

⁶ Ντικχέν ο παράδειγμας ι Τυχικόσκο, εκχέ πφραλέσκο σο ντέλας λέσκε μπέσα ο απόστολος Παύλος. Κάνα ο Παύλος ισινέ πφαντό πι κχερέστε, ντέλας μπέσα κο Τυχικός ντα βακερντάς ότι ισινέ πιστός διάκονος. (Εφεσ. 6:​21, 22) Ο Παύλος ντινάς λέσκε μπέσα, όχι σάντε για τι γκερέλ ο επιστολές κο πφραλά κι Έφεσος ντα κο Κολοσσές, αλλά εμ για τι ντελ-λεν ζορ ντα τι κοβλιαρέλ λένγκι ντουκχ. Ο Τυχικός ανέλα αμαρέ γκοντιάτε ι πιστέ, μπεσαλή μουρσέν σο φροντίνενα αμαρέ πνευματικές ανάγκες αντιβές.​—Κολ. 4:​7-9.

7. Σαρ σικλιόνα τουμέν τι αβέν μπεσαλήδες κατά πρεσβύτεροι ντα κατά διακονικοί υπηρέτες σο ισί τουμαρέ κχανγκιριάτε;

⁷ Αντιβές, εκτιμίνασα μπουτ ι μπεσαλή πρεσβυτερόν ντα διακονικέ υπηρετόν. Σαρ ο Δανιήλ, ο Ανανίας ντα ο Τυχικός, αντικάς βον-ντα λένα κο σοβαρά πουμαρέ ευθύνες. Για παράδειγμας, κάνα τζάσα κι συνάθροιση σο αβέλα-πες αντρέ κι εβδομάδα, ισινάμ σίγουροι ότι διορισάλε τζενέ για τι αβέν-πες σαρέ ο μέρη ι προγραμμάσκε. Ο πρεσβύτεροι ισί πφερντέ εκτίμηση κάνα ο πφραλά ντα ο πφενιά σο λένα εκ διορισμός ι συναθροισιάκε προετοιμάντιβενα ντα κερένα πουμαρέ μέρη! Σκεφτίνεν ακαβά παράδειγμας: Να σακιντίνασα τι καλίνας ι τζενέν σο κεράσα-λεν μελέτη κι συνάθροιση σο αβέλας-πες κο σαββατοκύριακος επειδή νταράσα ότι ο υπεύθυνος πφραλ μπισταρντάς τι κανονίνελ τι αβέλ-πες η δημόσια ομιλία. Ντα ισινάμ σίγουροι ότι κα τθεράς ο έντυπα σο χρειαζίντιβασα ι εργόσκε. Ανταλά πιστά πφραλά φροντίνενα-αμέν λατσσές, ντα ευχαριστίνασα ι Ιεχωβάς λένγκε! Σαρ μπορίνασα όμως τι σικαβάς ότι ισινάμ αμέν μπεσαλήδες;

8. Καγιά ισορροπία πρέπει τι τθεράς κάνα σικαβάσα ότι πφαμπάσα ι γιαβερένγκε; (Παροιμίες 11:13)

⁸ Μανγκάσα αμαρέ πφραλέν ντα πφενίν ντα πφαμπάσα λένγκε. Αλλά πρέπει τι τθεράς ισορροπία ντα μα τι ανακατούντιβας λένγκε ζωγιάτε. Μερικοί Χριστιανοί κο πρώτος αιώνας “κερένας κουτσομπολιός, ανακατούντιβενας κι γιαβερένγκε μπουτιά ντα κερένας λάφι πραγματένγκε σο δεν έπρεπε”. (1 Τιμ. 5:​13) Σίγουρα, να μανγκάσα τι αβάς σαρ λέντε. Αλλά βακερέν χάι ότι εκ τζενό μουτθαβέλα αμένγκε κάτι ντα βακερέλα αμένγκε μα τι μουτθαβάς-λες καεκχέσκε. Για παράδειγμας, εκ πφεν μπέκιμ τι βακερέλ αμένγκε εκχέ νασφαλιμάσκε σο τθερέλα ή εκχέ γιαβερέ δοκιμασιάκε σο νακχέλα, ντα μανγκέλα αμένταρ μα τι μουτθαβάς-λες γιαβερτθέ. Πρέπει τι σεβάνας ανταβά σο μανγκλάς. * (Διαβάνεν Παροιμίες 11:​13) Ακανά κα ντικχάς καλέ γιαβερέ περιπτωσιέντε ισί σημαντικός μα τι μουτθαβάς μερικά πράγματα.

9. Σαρ μπορίνελα τι σικαβέλ ο κάθε τζενό αντρέ κι φαμιλί ότι ισί μπεσαλής;

⁹ Κι φαμιλί. Κάθε τζενό κι φαμιλί τθερέλα ι ευθύνη μα τι μουτθαβέλ κάποια πράγματα σο αβένα-πες αντρέ κι φαμιλί. Για παράδειγμας, εκ Χριστιανή μπέκιμ τι τθερέλα εκ χούι σο ανέλα ασαπέ λάκε ρομέσκε. Κα αβέλας σωστός βοβ τι κερέλ λάφι ανταλέσκε γιαβερέντζαρ, ντα αντικάς τι ανέλ σε δύσκολη θέση πι ρομνιά; Σίγουρα νάα! Μανγκέλα πι ρομνιά ντα ποτές να κα μανγκέλας τι πφανγκέλ λάκο γκι. (Εφεσ. 5:​33) Ο τερνέ μανγκένα τι σικαβέν λένγκε ο γιαβερά σεβασμός. Ο νταντά ντα ο νταγιά πρέπει τι αγαβέν-λες ανταβά. Ποτές δεν  πρέπει τι μουτθαβέν ο λάθη πουμαρέ τσσαβένγκε κο γιαβερά ντα αντικάς τι κερέν-λεν τι λατζάν. (Κολ. 3:​21) Ο τσσαβέ χρειαζίντιβελα τι αβέν λογικοί ντα μα τι μουτθαβέν κο γιαβερά πράγματα σο κα μπορίνενας τι ανέν σε δύσκολη θέση λένγκι φαμιλί. (Δευτ. 5:​16) Κάνα κάθε τζενό κερέλα πο μέρος για μα τι μουτθάντιβεν οντουλά σο αβένα-πες κι φαμιλί, αβένα πο πασέ σαρ φαμιλί.

10. Σο μανγκέλα τι βακερέλ τι αβέλ κάποιος πραγματικός αμάλ;

¹⁰ Κο αμαλά. Αμαρέ ζωγιάτε, ισί φαρ σο νιωθίνασα ότι τθεράσα ι ανάγκη τι βακεράς εκχέ λατσσέ αμαλέστε σαρ νιωθίνασα μπαγιά. Μπάζιμ, ανταβά μπέκιμ τι αβέλ δύσκολος. Μπέκιμ μα τι αβέλ εύκολος αμένγκε τι βακεράς εκχέ τζενέσκε οντουλά σο τθεράσα ντιπ αντρέ αμαρέ γκοντιάτε, ντα κα πφανγκιόλας μπουτ αμαρό γκι άμα σικλιλάμας σοράν ότι αμαρό αμάλ μουτθαντάς οντουλά σο βακερντάμ λέσκε γιαβερέντε. Οκιά μπάνταρ, εκτιμίνασα σο τθεράσα αμαλέν σο μπορίνασα τι βακεράς λένγκε οντουλά σο νιωθίνασα ντα τζανάσα ότι να κα μουτθαβέν-λεν! Βον ισί “πραγματικά αμαλά”.​—Διαβάνεν Παροιμίες 17:17.

11. (α) Σαρ σικαβένα ο πρεσβύτεροι ντα λένγκε ρομνιά ότι ισί μπεσαλήδες; (β) Σο σικλιαρέλα-αμέν ο παράδειγμας εκχέ πρεσβυτερόσκο σο να μουτθαβέλα πράγματα σο τθερένα τι κερέν ι κχανγκιριάσαρ ντα σοράν νακχέλα σαάτι πι φαμιλιάσαρ; (Ντικχέν ι φωτογραφία)

¹¹ Κι κχανγκιρί. Ο πρεσβύτεροι σο τθερένα ναβ ότι να μουτθαβένα οντουλά σο βακέρντιβενα λένγκε ισί ι πφραλένγκε «τθαν σο αρακχαβέλα κατά μπαρμπάλ». (Ησ. 32:2) Τζανάσα ότι μπορίνασα τι πουτράς λένγκε αμαρό γκι, σίγουροι ότι να κα μουτθαβέν οντουλά σο κα βακεράς λένγκε. Να ζορισκιαράσα-λεν τι βακερέν αμένγκε πράγματα σο δεν πρέπει τι μουτθάντιβεν. Επίσης, εκτιμίνασα μπουτ ι πρεσβυτερόνγκε ρομνίν επειδή να προσπαθίνενα τι σικλιόν πουμαρέ ρομέσταρ πράγματα σο τθερένα τι κερέν ι γιαβερέντζαρ. Κάνα εκ πρεσβύτερος να μουτθαβέλα πι ρομνιάκε ο πράγματα σο τθερένα τι κερέν ι πφραλέντζαρ ντα ι πφενίντζαρ, ανταβά ισί ευλογία. Η ρομνί εκχέ πρεσβυτερόσκι, βακερντάς: «Ισινόμ πφερντί  εκτίμηση σο μο ρομ να βακερέλα μάνγκε τίποτα ι τζενένγκε σο χρειαζίντιβενα βοήθεια κατά πρεσβύτεροι, να βακερέλα μάνγκε ούτε λένγκε ναβά. Εκτιμίναβα σο να πφερέλα-μαν προβληματέντζαρ σο ναστί κεράβα τίποτα λένγκε. Αντικάς μπορίναβα τι κεράβ παρέα σαριλέντζαρ κι κχανγκιρί χωρίς τι νιωθίναβ μπέτι. Ντα ισινόμ σίγουρη ότι, κάνα βακεράβα λέσκε σαρ νιωθίναβα ή πουτράβα λέσκε μο προβλήματα, να μουτθαβέλα ανταλά-ντα γιαβερτθέ». Σίγουρα, σαρέ μανγκάσα τι τθεράς ο ναβ μπεσαλή τζενέσκο. Καλά ιδιότητες κα βοηθίνεν-αμέν τι πετυχίνας ανταβά στόχος; Για τι ντικχάς παντς ανταλένταρ.

12. Σόσκε μπορίνασα τι βακεράς ότι η μπέσα βασίντιβελα κο μανγκιπέ; Βακερέν εκ παράδειγμας.

¹² Η μπέσα βασίντιβελα κο μανγκιπέ. Ο Ιησούς βακερντάς ότι ο ντούι πο μπαρέ εντολές ισί τι μανγκάς ι Ιεχωβάς ντα τι μανγκάς ι τζενέν σο ισί πασέ αμέντε. (Ματθ. 22:​37-39) Μανγκάσα ι Ιεχωβάς ντα οτθάρ μανγκάσα τι μοιάζας λέστε σο ισί μπεσαλής. Για παράδειγμας, αμαρό μανγκιπέ ι πφραλένγκε ντα ι πφενίνγκε τσσίντελα-αμέν μα τι μουτθαβάς οντουλά σο βακερένα αμένγκε πουμένγκε. Ποτές δεν πρέπει τι μουτθαβάς κάτι σο κα κερέλας λένγκε ζιάνι, κα ανέλας λένγκε λατζ ή κα ντουκχαβέλας λένγκο γκι.​—Ιωάν. 15:12.

13. Σαρ βοηθίνελα-αμέν η ταπεινότητα τι αβάς μπεσαλήδες;

¹³ Η ταπεινότητα βοηθίνελα-αμέν τι αβάς μπεσαλήδες. Ο ταπεινός Χριστιανός να προσπαθίνελα τι αβέλ ο πρώτος σο κα μουτθαβέλ κο γιαβερά εκ πράγμας για τι κερέλ λένγκε εντύπωση. (Φιλιπ. 2:3) Να προσπαθίνελα τι κερέλ ι γιαβερέν τι αμντίνεν ότι βοβ τζανέλα σημαντικά πράγματα σο ναστί μουτθαβέλα-λεν. Επίσης, αμαρί ταπεινότητα να μουκχέλα-αμέν τι πφιραβάς γιαβερέντε λάφια σο νικαντάμ αμαρέ γκοντιάταρ ντα σο να βακέρντιβενα κι Γραφή ή κο έντυπα.

14. Άμα τθεράσα εκ γκι σο αγαβέλα, σαρ βοηθίνελα-αμέν ανταβά τι αβάς μπεσαλήδες;

¹⁴ Ο Χριστιανός σο τθερέλα εκ γκι σο αγαβέλα τζανέλα κάνα ισί «βακίτι μα τι κερέλ λάφι» ντα κάνα ισί «βακίτι τι κερέλ λάφι». (Εκκλ. 3:7) Μερικέ τθεμέντε βακερένα ακαβά: «Κάνα κερέσα λάφι ισί σαρ ασήμι, αλλά κάνα να κερέσα λάφι ισί σαρ χρυσός». Γιαβερέ λαφίντζαρ, μπάζιμα ισί πο λατσσό μα τι κεράς λάφι παρά τι κεράς. Μπουτ σωστά ο εδάφιος Παροιμίες 11:​12 ντέλα ακαγιά συμβουλή: «Ο τζενό σο λέσκο γκι αγαβέλα μπαγιά να κερέλα λάφι». Σκεφτίνεν εκ παράδειγμας. Εκχέ πφραλέσκε, σο ισί μπουτ μπρεσά πρεσβύτερος, μπουτ φαρ ο γιαβερά κχανγκιριά βακερένα λέσκε τι τζαλ τι βοηθίνελ εκχέ δύσκολε προβλημάστε σο τθερένα. Οπράλ ανταλέστε, εκ γιαβέρ πρεσβύτερος λέσκε κχανγκιριάταρ, βακερντάς: «Πάντα προσοχίνελα μα τι μουτθαβέλ ο προβλήματα σο τθερένα ο γιαβερά κχανγκιριά». Επειδή λέσκο γκι αγαβέλα, ανταβά πρεσβύτερος κερδιντάς ο σεβασμός ι πφραλένγκο σο υπηρετίνενα λέσαρ κο πρεσβυτέριος. Ισί σίγουροι ότι να κα μουτθαβέλ γιαβερέντε οντουλά σο βακερένα.

15. Σικαβέν εκχέ παραδειγμάσαρ σαρ μπορίνασα τι κερδίνας ι μπέσα ι γιαβερένγκι άμα ισινάμ τίμιοι.

¹⁵ Κάτι γιαβέρ σο χρειαζίντιβελα άμα μανγκάσα τι αβάς μπεσαλήδες ισί τι αβάς τίμιοι. Ντάσα μπέσα εκχέ τίμιε τζενέσκε επειδή τζανάσα ότι κα βακερέλ αμένγκε πάντα ι αλήθεια. (Εφεσ. 4:​25· Εβρ. 13:​18) Για παράδειγμας, βακερέν χάι ότι μανγκένα τι αβέν πο λατσσέ κάνα σικλιαρένα. Οτθάρ, μανγκένα εκχέ τζενέσταρ τι ασουνέλ εκ ομιλία τουμαρί ντα τι ντελ-τουμέν λατσσέ συμβουλές σο κα βοηθίνεν-τουμέν τι αβέν πο λατσσέ. Κάσκε κα ντένας μπέσα για τι βακερέλ τουμένγκε μπαγιά πι συμβουλή; Εκχέσκε σο βακερέλα τουμένγκε οντουβά σο μανγκένα τι ασουνέν ή εκχέσκε σο βακερέλα τουμένγκε  λατσσιμάσαρ ι αλήθεια; Η απάντηση ισί ξεκάθαρη. Η Αγία Γραφή βακερέλα: «Η διόρθωση σο ντιντιόλα ανγκλάλ κο γιαβερά ισί πο λατσσί κατά γκεραντό μανγκιπέ. Ο πληγές εκχέ αμαλέσταρ σικαβένα ότι ισί πιστός». (Παρ. 27:5, 6) Παρόλο σο κι αρχή μπέκιμ μα τι μπεϊντίνας οντουλά σο κα βακερέλ εκ αμάλ, καζόμ κα νακχέλ ο βακίτι κα κερέν αμένγκε λατσσιπέ.

16. Σαρ σικαβέλα ο εδάφιος Παροιμίες 10:​19 ι ανάγκη σο τθεράσα για εγκράτεια;

¹⁶ Η εγκράτεια ισί σημαντική για τι κερδίνας ι μπέσα ι γιαβερένγκι. Ανταγιά ιδιότητα βοηθίνελα-αμέν τι κεράς κουμάντος αμαρέ βουστά κάνα τζάσα κο πειρασμός τι μουτθαβάς κάτι σο βακέρντιλο αμένγκε. (Διαβάνεν Παροιμίες 10:​19) Μπέκιμ αμαρί εγκράτεια τι δοκιμάντιβελ κάνα χρησιμοποιήνασα ο κοινωνικά δίκτυα. Άμα να προσοχίνασα, κα μπορίναας χωρίς τι μανγκάς τι μουτθαβάς μπουτέ τζενέντε πράγματα σο δεν πρέπει. Ντινάμ ντα κερντάμ-λες ανταβά, ναστί κα κεράς κουμάντος σαρ κα χρησιμοποιήντιβεν ή καζόμ ζιάνι κα κερέν. Επίσης, η εγκράτεια βοηθίνελα-αμέν μα τι κεράς λάφι κάνα οντουλά σο τζάνα αμέντζαρ κόντρα προσπαθίνενα τι λεν αμαρό μούι για τι μουτθαβάς λένγκε πράγματα σο κα μπορίνενας τι τσσουβέν σε κίνδυνος αμαρέ πφραλέν ντα πφενίν. Ανταβά μπέκιμ τι αβέλ-πες άμα ο ασκέρια κα κερέν-αμέν ανάκριση εκχέ τθεμέστε σο να μουκχένα τι αβέλ-πες αμαρό έργος ή τσσιναντέ-λες. Μπορίνασα τι κεράς ι συμβουλή τι “ατσσικιαράς αμαρό μούι πφαντό” ανταλέ ντα γιαβερέ περιπτωσιέντε. (Ψαλμ. 39:1) Πρέπει τι αβάς μπεσαλήδες αμαρέ φαμιλιάσαρ, αμαρέ αμαλέντζαρ, ι πφραλέντζαρ κι κχανγκιρί ντα σαρέ ι γιαβερέντζαρ. Ντα για τι αβάς μπεσαλήδες, χρειαζίντιβασα εγκράτεια.

17. Σο μπορίνασα τι κεράς για τι βοηθίνας τι υπαρχίντιβελ μπέσα κι κχανγκιρί;

¹⁷ Ισινάμ πφερντέ εκτίμηση ι Ιεχωβάσκε σο αντάς-αμέν πασέ πφραλέντε ντα πφενίντε σο μανγκένα-αμέν ντα ισί μπεσαλήδες! Σαρέ τθεράσα ι ευθύνη τι κερδίνας ι μπέσα αμαρέ πφραλένγκι. Καζόμ προσπαθίνελα ο κάθε εκ αμένταρ τι σικαβέλ μανγκιπέ, τι αβέλ ταπεινός, τι αγαβέλ ο γκι ι γιαβερένγκο, τι αβέλ τίμιος ντα τι σικαβέλ εγκράτεια, βοηθίνασα τι υπαρχίντιβελ κι κχανγκιρί μπέσα. Πρέπει τι συνεχίνας τι μαράς-αμέν για τι σικαβάς ότι ισινάμ μπεσαλήδες. Μανγκάσα τι μοιάζας αμαρέ Ντεβλέστε, κο Ιεχωβά, ντα μα τι τσσιναβάς τι σικαβάς ότι ισινάμ μπεσαλήδες.