Ντικχέν σαρ απαντίνελα η Αγία Γραφή ανταλέ ερωτησιέντε.

Ο εδάφιος Πράξεις 24:​15 βακερέλα αμένγκε ότι κα «τζουβντιόν πάλι εμ οντουλά σο ισί δίκαιοι εμ οντουλά σο νανέ». Ο δίκαιοι ισί οντουλά σο πριν τι μερέν ντένας καν κο Ντεβέλ, οτθάρ λένγκε ναβά ισί γραμμέ κο βιβλίος κι ζωγιάκο. (Μαλ. 3:​16) Αντρέ κο άδικοι ισί οντουλά σο μουλέ χωρίς τι τθερέν μπουτ ευκαιρίες τι σικλιόν ι Ιεχωβάσκε, οντουλέσκε λένγκε ναβά νανέ γραμμέ κο βιβλίος κι ζωγιάκο.

Ο εδάφια Ιωάννης 5:​28, 29 κερένα λάφι ι ίδιε ντουέ ομαδένγκε σο ισί κο εδάφιος-ντα Πράξεις 24:​15. Ο Ιησούς βακερέλα ότι «κον κερντάς λατσσέ πράγματα κα αναστίντιβελ για τι τζουβντιόλ», ντα «κον κερντάς μπέτι πράγματα κα αναστίντιβελ για τι κρίντιβελ». Ο δίκαιοι κερντέ λατσσέ πράγματα πριν τι μερέν. Κα αναστίντιβεν για τι τζουβντιόν επειδή λένγκε ναβά ατσσόνα γραμμέ κο βιβλίος κι ζωγιάκο. Όμως, ο άδικοι κερντέ μπέτι πράγματα πριν τι μερέν. Βον κα αναστίντιβεν για τι κρίντιβεν. Λένγκε ναβά νανέ ατζέ γραμμέ κο βιβλίος κι ζωγιάκο ντα βον κα νακχέν εκ βακίτι σο κα κρίντιβεν, ή γιαβέρτουλους κα εξετάντιβεν για τι ντικχίντιβελ σαρ κα τζαν. Οντουβά βακίτι, κα τθερέν ι ευκαιρία τι σικλιόν ι Ιεχωβάσκε ντα τι κερέν πράγματα για τι γραφίντιβεν λένγκε ναβά κο βιβλίος κι ζωγιάκο.

Ο εδάφια Αποκάλυψη 20:​12, 13 βακερένα ότι σαρέ οντουλά σο κα αναστίντιβεν πρέπει τι ντεν καν οντουλέντε σο “ισί γραμμέ κο βιβλία”, δηλαδή κο νεβέ νόμους σο κα τθεράς κο νεβό ντουνιάς. Ο Ιεχωβά κα καταστραφίνελ οντουλέν σο να ντένα καν.​—Ησ. 65:20.

Ο εδάφιος Δανιήλ 12:2 βακερέλα ότι μερικοί οντουλένταρ σο σοβένα ο σοϊπέ ι μεριμάσκο κα τζανγκάντιβεν «για τι τζουβντιόν για πάντα ντα γιαβερά για τι λατζάντιβεν ντα για τι κερντιόν πέρα για πάντα». Ανταβά εδάφιος κερέλα λάφι για το αποτέλεσμας σο κα τθερέν ο αναστημέ​—ή κα «τζουβντιόν για πάντα» ή κα «κερντιόν πέρα για πάντα». Άρα, κάνα κα μπιτίνεν ο 1.000 μπρεσά μερικοί κα λεν ζωή για πάντα, ενώ γιαβερά κα καταστραφίντιβεν για πάντα.​—Αποκ. 20:​15· 21:3, 4.

Ανέν τουμαρέ γκοντιάτε ακαβά παράδειγμας: Ο ντούι ομάδες σο κα αναστήντιβεν ισί σαρ ο τζενέ σο μανγκένα τι τζουβντιόν εκχέ γιαβερέ τθεμέστε. Ο δίκαιοι μοιάζενα οντουλέντζαρ σο λένα βίζα μπουτιάκι ή άδεια παραμονής, ντα αντικάς μπορίνενα τι τθερέν μερικά δικαιώματα ντα ελευθερία. Οκιά μπάνταρ, ο άδικοι μοιάζενα τζενέντζαρ σο μπεσένα γιαβερέ τθεμέστε ντα μπέκιμ λένα άδεια παραμονής ή βίζα επισκέπτη για χάνικ βακίτι. Ανταλά τζενέ σο τζουβντιόνα εκχέ γιαβερέ τθεμέστε πρέπει τι σικαβέν ότι σεβάνενα ντα ντένα καν κο νόμοι οντουλέ τθεμέσκε για τι συνεχίνεν τι τζουβντιόν οτθέ. Αντικάς, ο άδικοι αναστημέ-ντα κα χρειαζίντιβελ τι ντεν καν κο νόμοι κι Ιεχωβάσκε ντα τι σικαβέν ότι ισί δίκαιοι για τι ατσσόν κο Παράδεισος. Ντα σο-ντα βίζα τι λένα ο τζενέ κάνα τζάνα εκχέ γιαβερέ τθεμέστε, μερικοί λένταρ τελικά μπορεί τι λεν υπηκοότητα ενώ γιαβερά μπέκιμ τι παλντίντιβεν. Η τελική απόφαση κα βασίντιβελ οντουλέντε σο κα σικαβέν ντα κα κερέν κο νεβό τθεμ. Αντικάς-ντα, η τελευταία απόφαση σαρέ οντουλένγκε σο κα αναστίντιβεν κα βασίντιβελ κι πίστη σο κα σικαβέν ντα οντουλέντε σο κα κερέν κο νεβό ντουνιάς.

Ο Ιεχωβά νανέ σάντε Ντεβέλ σο αγαβέλα αμαρί ντουκχ, αλλά Ντεβέλ-ντα σο σικαβέλα δικαιοσύνη ντα να ξεχωρίνελα ι τζενέν. (Δευτ. 32:4· Ψαλμ. 33:5) Κα σικαβέλ πο μανγκιπέ κάνα κα αναστίνελ εμ οντουλέν σο ισί δίκαιοι εμ οντουλέν σο νανέ. Αλλά κα μπεκλεντίνελ σαριλένταρ τι ντεν καν κο κανόνες λέσκε σο τθερένα τι κερέν οντουλέσαρ σο ισί σωστός ντα λάθος. Κα μουκχέλ τι τζουβντιόν κο νεβό ντουνιάς σάντε οντουλά σο μανγκένα-λες ντα ντένα καν κο κανόνες λέσκε.