Κο εδάφιος 1 Κορινθίους 15:8, ο Παύλος βακερντάς: «[Κο τέλος] σικαντάς-πες μάνγκε-ντα, σαρ εκχέ χουρντέστε σο μπιάντιλο πο τζανγκλέ πι σαατίσταρ». Ατθέ, ο Παύλος κερέλας λάφι ι εμπειριάκε σο τθερέλας κάνα ντικχλάς εκχέ φαντασιάτε ι Ιησούς κο ουρανός. Σο μανγκέλα τι βακερέλ ότι «μπιάντιλο πο τζανγκλέ πι σαατίσταρ»; Ανγκλέ, εξηγιντάμας ότι ισινέ σαρ τι ντιντιλίας-λες η τιμή τι μπιάντιβελ, ή γιαβέρσοϊ τι αναστίντιβελ, πνευματικέ ζωγιάτε πο τζανγκλέ πι σαατίσταρ, μπουτ μπρεσά πριν τι αβέλ-πες ασακί ανάσταση. Όμως, σοράν μπουτ ροντιμάσταρ ντικχίντιλο ότι ισί ανάγκη τι αλλάνας ο τρόπος σο εξηγίνασα ανταβά εδάφιος.

Άρα, σο μανγκέλας τι βακερέλ ο Παύλος κάνα βακερντάς ότι «μπιάντιλο πο τζανγκλέ πι σαατίσταρ»; Μπέκιμ ανταβά τι τθερέλα διάφορες σημασίες.

Λέσκι αλλαγή ισινέ απότομη ντα δύσκολη εμπειρία λέσκε. Κάνα εκ μαξίμι μπιάντιβελα πο τζανγκλέ πι σαατίσταρ ο πο μπουτ φαρ ανταβά αβέλα-πες ξαφνικά. Καζόμ ο Σαύλος (σο σοράν σικλιλέ-λες σαρέ σαρ Παύλος) τζάλας κι Δαμασκός για τι τζαλ κόντρα ι Χριστιανόντζαρ οτθέ, να μπεκλεντίνελας ότι κα ντικχέλ εκχέ φαντασιάτε ι αναστημέ Ιησούς. Η αλλαγή ι Παυλόσκι ισινέ αζόμ ξαφνική εμ λέσκε εμ ι Χριστιανόνγκε σο μανγκέλας τι τσσιντικιαρέλ μπουτ οντουλέ τθεμέστε. Επίσης, ανταβά σο νακχλάς ισινέ μπουτ δύσκολος ντα ατσσιλό κορορό.​—Πράξ. 9:​1-9, 17-19.

Λέσκι αλλαγή αβιλί-πες «οτθέ σο καέκ να μπεκλεντίνελας-λες». Ο πουρανό μπαλαμανό λάφι ἔκτρωμα σο μεταφράντιβελα «μπιάντιλο πο τζανγκλέ πι σαατίσταρ» μπορίνελα επίσης τι μεταφράντιβελ «να μπιάντιλο πι βακιτίστε». Η Βίβλος της Ιερουσαλήμ (The Jerusalem Bible) βακερέλα-λες αντικάς: «Ισινέ σαρ τι μπιάντιλομ κάνα καέκ να μπεκλεντίνελας-λες». Κο βακίτι σο αλλαξάλο ο Παύλος, ο Ιησούς βουρτισάλοας ήδη κο ουρανός. Ο Παύλος να ντικχλάς ι αναστημέ Ιησούς πριν τι τζαλ κο ουρανός, σαρ ντικχλέ-λες οντουλά σο κερέλας λένγκε λάφι κο γιαβερά εδάφια. (1 Κορ. 15:​4-8) Κάνα ο Ιησούς σικαντάς-πες ι Παυλόσκε, ντινάς-λες ι ευκαιρία τι ντικχέλ-λες σοράν κατά ανάσταση λέσκι, παρόλο σο ανταβά ντικχίντιβελα ότι αβιλό-πες «οτθέ σο καέκ να μπεκλεντίνελας-λες».

Κερέλας λάφι πι νεαυτόσκε με ταπεινότητα. Σαρ βακερένα μερικά σπουδαγμέ τζενέ, ο λάφι σο χρησιμοποιήνελα ατθέ ο Παύλος ασούντιβελα σαρ μα τι ντέλας-πες αξία. Άμα τθερέλας πι γκοντιάτε ανταβά ο Παύλος, αγαβέλας ότι να αξίνελας ο προνόμιος σο ντιντιλόας-λες. Ντα σοράν βακερντάς: «Με ισινόμ ο πο χουρντό κατά απόστολοι ντα να ισινόμ άξιος τι βακέρντιβαβ απόστολος, επειδή γκιλόμ κόντρα κι κχανγκιρί κι Ντεβλέσκι. Αλλά ι Ντεβλέσκε λατσσιμάσαρ σο να αξίναβα-λες ισινόμ οντουβά σο ισινόμ».​—1 Κορ. 15:9, 10.

Άρα, ντικχίντιβελα ότι ο Παύλος μπέκιμ τι βακερέλας ι ξαφνικέ ντα απότομε τροπόσκε σο σικαντάς-πες ο Ιησούς λέσκε, ότι αλλαξάλο οτθέ σο να μπεκλεντίνελας-λες καέκ ή μανγκέλας τι βακερέλ ότι να ισινέ πνευματικά άξιος τι ντικχέλ ανταγιά φαντασία. Σο-ντα τι μανγκέλας τι βακερέλ, ο Παύλος ντικχέλας πολύτιμη ανταγιά εμπειρία. Κερντάς-λες ντιπ σίγουρος ότι ο Ιησούς αναστισάλο κατά μουλέ. Άκ’ σόσκε κερέλας λάφι μπουτ φαρ ανταλέσκε σο ντικχλάς κάνα βακερέλας κο γιαβερά ότι ο Ιησούς αναστισάλο.​—Πράξ. 22:​6-11· 26:​13-18.