1. Σο μπορεί τι πουτσέν-αμέν κι μπουτί ή κο σχολείος;

 ΣΑΡ νιωθίνενα κάνα εκ τζενό σο κερένα λέσαρ μπουτί ή εκ συμμαθητής τουμαρό πουτσέλα-τουμέν σο πακιάνα; Μήπως αγχώντιβενα; Ανταβά αβέλα-πες κο πο μπουτ τζενέ αμένταρ. Αλλά εκ ασακί ερώτηση κα βοηθίνελας-αμέν τι αγαβάς σο σκεφτίνελα ή σο πακιάλα εκ τζενό ντα τι ντελ-αμέν ι ευκαιρία τι βακεράς λέσκε ο λατσσέ αμπέρια. Μερικές φορές όμως, εκ τζενό μπορεί τι πουτσέλ κάτι για τι αρακχέλ ευκαιρία τι χαλ-πες αμέντζαρ. Ανταβά να κερέλα αμένγκε εντύπωση, σόσκε μερικοί ασουντέ λάθος πράγματα οντουλένγκε σο πακιάσα. (Πράξ. 28:22) Επίσης, τζουβντιάσα «κο τελευταία ντιβεσά», εκχέ βακιτίστε σο μπουτ τζενέ “τθερένα σορό”, ή ατζέ-ντα ισί «άγριοι».​—2 Τιμ. 3:1, 3.

2. Σόσκε ισί λατσσό τι τθεράς πραότητα;

² Μπέκιμ σκεφτίνενα: “Σαρ μπορίναβα τι αβάβ ήρεμος ντα τι κεράβ λάφι σουκάρ τροπόσαρ κάνα εκ τζενό μανγκέλα τι χαλ-πες μάντζαρ οντουλένγκε σο πακιάβα;” Σο μπορίνελα τι βοηθίνελ-τουμέν; Εκχέ λαφίσαρ, η πραότητα. Ο τζενό σο ισί πράος, ή κοβλέ γκίσκο, να νευριάνελα εύκολα, αλλά μπορίνελα τι κερέλ κουμάντος πο νεαυτός κάνα ο γιαβερά μανγκένα τι χαν-πες λέσαρ ή κάνα νανέ σίγουρος σαρ τι απαντίνελ. (Παρ. 16:32) Όμως, μπέκιμ τι νιωθίνενα ότι ανταβά ισί πο εύκολος τι βακεράς-λες παρά τι κεράς-λες. Σαρ μπορίνενα τι τθερέν πο μπουτ πραότητα; Σαρ μπορίνενα τι απαντίνεν με πραότητα κάνα κάποιος μανγκέλα τι χαλ-πες τουμέντζαρ οντουλένγκε σο πακιάνα; Άμα τθερένα τσσαβέν, σαρ μπορίνενα τι βοηθίνεν-λεν τι σικλιόν τι υπερασπίνεν με πραότητα οντουλά σο πακιάνα; Για τι ντικχάς.

3. Σόσκε μπορίνασα τι βακεράς ότι η πραότητα σικαβέλα ότι εκ τζενό ισί ζουρανό, ντα όχι μπίζουρανο; (2 Τιμόθεο 2:24, 25)

³ Η πραότητα σικαβέλα καζόμ ζουρανό ισί εκ τζενό, όχι καζόμ μπίζουρανο ισί. Εκ τζενό πρέπει τι αβέλ ζουρανό αντρέ πέστε για  τι ατσσόλ ήρεμος κάνα νακχέλα εκ δυσκολία. Η πραότητα ισί αντρέ κο “καρπός κι πνευμάσκο”. (Γαλ. 5:22, 23) Μπάζιμα, ο πουρανό μπαλαμανό λάφι πραΰτης βακερένας-λες εκχέ άγριε γκραστέσκε σο ηρεμισάλο. Ανέν τουμαρέ γκοντιάτε εκχέ άγριε γκραστές σο ηρεμίνελα. Ισί ήρεμος παρόλο σο συνεχίνελα τι αβέλ ζουρανό. Αμέν, σαρ μπορίνασα τι τθεράς πο μπουτ πραότητα ντα κι ίδια στιγμή τι αβάς ζουρανέ; Ανταβά να μπορίνασα τι κεράς-λες κορκορέ. Ο μυστικός ισί τι προσευχίντιβας κο Ντεβέλ τι ντελ-αμέν άγιος πνεύμας, ντα τι μανγκάς λέσταρ τι βοηθίνελ-αμέν τι τθεράς ανταγιά σουκάρ ιδιότητα. Υπαρχίντιβενα μπουτ τζενέ σο σικλιλέ τι τθερέν πραότητα. Μπουτ Μάρτυρες απαντιντέ με πραότητα οντουλέντε σο τζάνας λέντζαρ κόντρα. Ντα ανταβά βοηθιντάς γιαβερέν τι τθερέν πο λατσσί άποψη ι Μαρτυρένγκε. (Διαβάνεν 2 Τιμόθεο 2:24, 25) Σαρ μπορίνενα τι κερέν ι πραότητα εκ κατά πο σημαντικά χαρακτηριστικά σο τθερένα;

4. Σο μπορίνασα τι σικλιάς για την πραότητα κατά παράδειγμας του Ισαάκ;

⁴ Η Γραφή τθερέλα μπουτ ιστορίες σο σικαβένα καζόμ σημαντική ισί η πραότητα. Ντικχέν ο παράδειγμας του Ισαάκ. Κάνα γκιλό τι μπεσέλ κο Γέραρα, σο ισινέ εκ τθεμ ι Φιλισταιόνγκο, λέσκε ντουσμάνια σο ζηλίνενας-λες πφαντέ ο χανινγκά σο χαντζουντέας ο υπηρέτες λέσκε νταντέσκε. Αντίς τι χαλ-πες για το δικαιώματα σο τθερέλας, ο Ισαάκ γκιλό πι φαμιλιάσαρ γιαβερτθέ ντα χαντζουντάς γιαβερά χανινγκά. (Γέν. 26:12-18) Αλλά ο Φιλισταίοι βακερντέ ότι οντουλέ τθανέστε-ντα ο πανί ισινέ λένγκο. Παρόλο σο νακχλάς σαρέ ανταλά, ο Ισαάκ σικαντάς ειρήνη. (Γέν. 26:19-25) Σο βοηθιντάς-λες τι τθερέλ πραότητα ατζέ-ντα κάνα ο γιαβερά ντικχίντιβενας αποφασισμέ τι χαν-πες λέσαρ; Σίγουρα ντικχλάς καζόμ λατσσό παράδειγμας ισινέ λέσκο ντατ ντα λέσκι ντάι, ντα σικλιλό μπουτ κατά Αβραάμ σο ισινέ ειρηνικός τζενό ντα κατά Σάρρα σο τθερέλας «ήσυχος ντα ήρεμος πνεύμας».​—1 Πέτρ. 3:4-6· Γέν. 21:22-34.

5. Καβά παράδειγμας σικαβέλα ότι ο νταντά ντα ο νταγιά μπορίνενα τι σικλιαρέν πουμαρέ τσσαβέν καζόμ αξία τθερέλα η πραότητα;

⁵ Νταντάλεν ντα νταγιάλεν, τι αβέν σίγουροι ότι τουμέν-ντα μπορίνενα τι σικλιαρέν τουμαρέ τσσαβέν καζόμ αξία τθερέλα η πραότητα. Ντικχέν σο αβιλό-πες κο Μαξάνς σο ισί 17 μπρεσένγκο. Τθερέλας τι κερέλ χολιαμέ τζενέντζαρ κο σχολείος ντα κο έργος. Λέσκο ντατ ντα λέσκι ντάι βοηθιντέ-λες με υπομονή τι τθερέλ πραότητα. Βον βακερένα: «Ο Μαξάνς αγαντάς ότι, κάνα μανγκένα τι χαν-πες λέσαρ, χρειαζίντιβελα πο μπουτ ζορ για τι ατσσικιαρέλ-πες παρά για τι κερέλ κάτι χολιάσαρ ή βίαιε τροπόσαρ». Ο Μαξάνς κερντάς ι πραότητα εκ κατά πο σημαντικά χαρακτηριστικά σο τθερέλα.

6. Σαρ κα βοηθίνελ-αμέν η προσευχή τι σικαβάς πο μπουτ πραότητα;

⁶ Σο μπορίνασα τι κεράς κάνα κάποιος μανγκέλα τι χαλ-πες αμέντζαρ, κάνα για παράδειγμας κάποιος μελιαρέλα ο ναβ αμαρέ Ντεβλέσκο ή λέλα κοροϊδία οντουλά σο βακερέλα η Γραφή; Πρέπει τι μανγκάς κατά Ιεχωβά τι ντελ-αμέν πο πνεύμας ντα πι σοφία για τι απαντίνας με πραότητα. Σο αβέλα-πες άμα πο σοράν αγαβάσα ότι να απαντιντάμ λατσσέ τροπόσαρ; Μπορίνασα τι κεράς προσευχή ανταλέσκε μπουτ φαρ ντα τι σκεφτίνας σαρ μπορίνασα τι τζας-λεν πο λατσσές ι γιαβέρ φαρ. Ο Ιεχωβά κα ντελ-αμέν πο άγιος πνεύμας για τι μπορίνας τι κεράς κουμάντος αμαρέ νεύρα ντα τι σικαβάς πραότητα.

7. Σόσκε κα κεράς πο εύκολα κουμάντος αμαρέ λάφια ντα ο τρόπος σο αντιδράνασα άμα κα σικλιάς αβριάλ κάποια εδάφια; (Παροιμίες 15:1, 18)

⁷ Κάποια εδάφια μπορίνενα τι βοηθίνεν-αμέν τι κεράς κουμάντος αμαρέ λάφια κάνα νακχάσα δυσκολίες. Ο πνεύμας ι Ντεβλέσκο μπορίνελα τι ανέλ αμαρέ γκοντιάτε ανταλά εδάφια. (Ιωάν. 14:26) Για παράδειγμας, ο αρχές σο αρακχάσα κο Παροιμίες μπορίνενα τι βοηθίνεν-αμέν τι τθεράς πραότητα, τι αβάς κοβλέ γκίσκε. (Διαβάνεν Παροιμίες 15:1, 18) Ανταβά βιβλίος ι Γραφιάκο σικαβέλα επίσης αμένγκε σόσκε ισί  λατσσό τι ατσσικιαράς αμαρό νεαυτός κάνα ο πράγματα ισί δύσκολα.​—Παρ. 10:19· 17:27· 21:23· 25:15.

8. Σόσκε ισί λατσσό τι σκεφτίνας σο κερντάς εκχέ τζενές τι μανγκέλ τι χαλ-πες αμέντζαρ οντουλένγκε σο πακιάσα;

⁸ Κάτι γιαβέρ σο μπορίνελα τι βοηθίνελ-αμέν ισί τι αγαβάς σαρ ισί μπαγιά ο πράγματα. (Παρ. 19:11) Ο τζενό σο αγαβέλα σαρ ισί μπαγιά ο πράγματα, ατσσικιαρέλα-πες κάνα ο γιαβερά μανγκένα τι χαν-πες λέσαρ οντουλένγκε σο πακιάλα. Μπουτ φαρ, κάνα ο τζενέ πουτσένα-αμέν κάτι, να βακερένα αμένγκε ο λόγος-ντα σο πουτσένα. Για παράδειγμας, εκ τζενό μπέκιμ τι κερέλ εκ ερώτηση επειδή ανησυχίνελα εκχέ πραγμάσκε σο αμέν να τζανάσα. Οτθάρ, πριν τι απαντίνας, ισί λατσσό τι αγαβάς ότι μπέκιμ να τζανάσα σο κερντάς εκχέ τζενές τι πουτσέλ-αμέν ανταβά πράγμας.​—Παρ. 16:23.

9. Σαρ σικαντάς ο Γεδεών ότι αγαβέλας σαρ ισινέ μπαγιά ο πράγματα ντα ότι ισινέ πράος;

⁹ Σκεφτίνεν σαρ απαντιντάς ο Γεδεών κο μουρσά σο τθερέλας ο Εφραΐμ. Βον πουτσλέ-λες χολιάσαρ σόσκε να βακερντάας λένγκε πο τζανγκλέ τι τζαν λέσαρ κάνα γκιλό τι κερέλ τζένγκι ι ντουσμανίντζαρ κο Ισραήλ. Ισινέ ανταβά ο πραγματικός λόγος σο ισινέ αζόμ χολιαμέ; Μήπως ισινέ μπαρικανέ ντα νιωσάλε ότι ο Γεδεών προσβαλιντάς-λεν σο να βακερντάς λένγκε τι τζαν λέσαρ; Σο-ντα τι αβιλό-πες, ο  Γεδεών αγαντάς σαρ ισινέ μπαγιά ο πράγματα. Προσπαθιντάς τι αγαβέλ σόσκε ισινέ αζόμ χολιαμέ ντα απαντιντάς λένγκε με πραότητα. Καβά ισινέ ο αποτέλεσμας; Η Γραφή βακερέλα αμένγκε ότι, «κάνα κερντάς λάφι αντικάς, βον ηρεμισάλε».​—Κριτ. 8:1-3.

10. Σο κα βοηθίνελ-αμέν τι σικλιάς σαρ τι απαντίνας κο τζενέ σο πουτσένα-αμέν σόσκε πακιάσα κάτι; (1 Πέτρου 3:15)

¹⁰ Μπέκιμ εκ τζενό κι μπουτί ή εκ συμμαθητής πουτσέλα-αμέν σόσκε τζουβντιάσα αντικάς σαρ βακερένα ο κανόνες ι Γραφιάκε. Κα υπερασπίνας οντουλά σο πακιάσα ι πο λατσσέ τροπόσαρ. Όμως, κα σεβάνας ι άποψη ι τζενέσκι σο κερέλα αμένγκε ι ερώτηση. (Διαβάνεν 1 Πέτρου 3:15) Οτθάρ, αντίς τι σκεφτίνας ότι κερέλα αμένγκε εκ ερώτηση για τι τζαλ αμέντζαρ κόντρα, τι σκεφτίνας ότι λέσκι ερώτηση κα βοηθίνελ-αμέν τι αγαβάς σο μανγκέλα τι σικλιόλ. Καβά-ντα τι αβέλ ο λόγος σο πουτσέλα-αμέν εκ τζενό κάτι, πρέπει τι απαντίνας ήρεμε ντα λατσσέ τροπόσαρ. Αμαρί απάντηση μπέκιμ τι κερέλ-λες τι σκεφτίνελ πάλι πι άποψη. Ατζέ-ντα άμα ντικχίντιβελα ότι να σικαβέλα σεβασμός ή ότι λέλα κοροϊδία, αμέν μανγκάσα πάντα τι απαντίνας λατσσιμάσαρ.​—Ρωμ. 12:17.

11, 12. (α) Σο κα μπορίναας τι σκεφτίνας πριν τι απαντίνας εκχέ δύσκολε ερωτησιάτε; (Ντικχέν ι φωτογραφία-ντα) (β) Σικαβέν εκχέ παραδειγμάσαρ σαρ η ερώτηση εκχέ τζενέσκι μπέκιμ τι πουτρέλ ο ντρομ για τι ασταράς συζήτηση.

¹¹ Για παράδειγμας, άμα εκ τζενό κι μπουτί πουτσέλα-τουμέν σόσκε να κεράσα γενέθλια, σκεφτίνεν: Μήπως μανγκέλα τι σικλιόλ άμα αβέλα-πες τι διασκεδάνας; Μήπως νιωθίνελα ότι αμαρί συμπεριφορά να κα βοηθίνελ ι τζενέν κι μπουτί τι αβέν γιεκ σαρ ομάδα; Κι αρχή, μπέκιμ κα μπορίνας τι ισαράς-λες σο πφαμπόλα ι γιαβερένγκε κι μπουτί ντα σοράν τι βακεράς λέσκε ότι αμέν-ντα μανγκάσα τι κεράς μπουτί εκχέ τθανέστε σο σαρέ κα νακχέν σουκάρ. Ανταβά μπέκιμ τι πουτρέλ ο ντρομ για τι συζητίνας πο άνετα σο βακερέλα η Γραφή για το γενέθλια.

¹² Κα μπορίναας τι κεράς κάτι ασακό κάνα κάποιος κερέλα αμένγκε γιαβερά δύσκολες ερωτήσεις. Εκ συμμαθητής μπέκιμ τι βακερέλ τουμένγκε ότι ο Μάρτυρες ι Ιεχωβάσκε πρέπει τι αλλάνεν άποψη οντουλένγκε σο τζάνα μουρσά μουρσέντζαρ ντα τζουβλιά τζουβλίντζαρ. Μήπως βακερέλα-λες ανταβά επειδή να αγαντάς σο ακριβώς πακιάνα ο Μάρτυρες ι Ιεχωβάσκε ανταλέ τζενένγκε; Μήπως κάποιος λέσκε αμαλένταρ ή λέσκε τζενένταρ τζάλα μουρσέντζαρ ή μήπως κάποια τζάλα τζουβλίντζαρ; Μήπως αμντίνελα ότι να μανγκάσα ι τζενέν σο τζουβντιόνα αντικάς; Μπέκιμ κα χρειαζίντιβελ τι βακεράς λέσκε ότι μανγκάσα σαρέ ι τζενέν ντα ότι σεβάνασα ο δικαίωμας σο τθερέλα ο κάθε εκ τι τραμπίνελ σο κα κερέλ. b (1 Πέτρ. 2:17) Σοράν, μπέκιμ κα μπορίνας τι εξηγίνας λέσκε ο λατσσιπέ σο κερένα σαρέ κο τζενέ ο πάκι κανόνες ι Γραφιάκε.

13. Σαρ μπορίνενα τι βοηθίνεν εκχέ τζενές σο βακερέλα ότι ισί ντινιλιπέ τι πακιάλ κάποιος κο Ντεβέλ;

¹³ Κάνα κάποιος επιμίνελα κο απόψεις σο τθερέλα, δεν πρέπει τι σιγκιαράς τι αμντίνας ότι τζανάσα σο πακιάλα. (Τίτο 3:2) Για παράδειγμας, σο αβέλα-πες άμα κάποιος συμμαθητής βακερέλα τουμένγκε ότι ισί ντινιλιπέ τι πακιάλ κάποιος κο Ντεβέλ; Πρέπει άραγες τι αμντίνεν ότι πακιάλα σαρέ πι γκίσαρ κι εξέλιξη ντα ότι τζανέλα μπουτ πράγματα λάκε; Κι πραγματικότητα, μπέκιμ μα τι σκεφτιντάς μπουτ λατσσές ανταβά θέμας. Αντίς τι τζαν λέσαρ κόντρα για την εξέλιξη, μπορίνενα τι βακερέν λέσκε κάτι σο κα τσσουβέλ-λες σε σκέψεις πο σοράν. Μπέκιμ μπορίνενα τι σικαβέν λέσκε κάτι σο κερέλα λάφι για τη δημιουργία κο ιστότοπος jw.org. Πο σοράν, μπέκιμ κα μανγκέλ τι συζητίνελ αμέντζαρ εκχέ θεμάσκε σο διαβαντάς ή εκχέ βιντεόσκε σο αρακχλάς οτθέ. Εκ απάντηση πφερντί σεβασμός μπορεί  μπαγιά τι τσσίντελ-λες τι σκεφτίνελ πάλι πι άποψη.

14. Σαρ χρησιμοποιηντάς ο Νιλ αμαρό ιστότοπος για τι βοηθίνελ εκχές πι συμμαθητένταρ τι αλλάνελ πι άποψη ι Ιεχωβάσκε Μαρτυρένγκε;

¹⁴ Εκ τερνό, ο Νιλ, χρησιμοποιηντάς αμαρό ιστότοπος για τι σικαβέλ ότι οντουλά σο πακιάνα μερικοί ι Ιεχωβάσκε Μαρτυρένγκε νανέ μπαγιά. Βοβ βακερέλα: «Εκ συμμαθητής βακερέλας μάνγκε μπουτ φαρ ότι να πακιάβα κι επιστήμη επειδή βασίντιβαβα εκχέ βιβλιόστε σο ισί πφερντό μασάλια ντα όχι οντουλέντε σο ντικχάσα τι αβέν-πες». Κάνα ανταβά συμμαθητής να μουκχλάς τον Νιλ τι εξηγίνελ σο πακιάλα, ο Νιλ βακερντάς λέσκε τι τζαλ κι ενότητα «Επιστήμη και Αγία Γραφή» κο ιστότοπος jw.org. Πο σοράν, ο Νιλ αγαντάς ότι λέσκο συμμαθητής μάλλον διαβαντάς κάτι κατά ιστότοπος ντα μανγκέλας τι συζητίνελ λέσαρ κατάρ αβιλί η ζωή. Μπέκιμ τουμέν-ντα κα τθερέν ασακέ αποτελέσματα.

15. Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι απαντίνεν κοβλέ γκίσαρ κάνα λένγκε συμμαθητές μανγκένα τι χαν-πες λέντζαρ οντουλένγκε σο πακιάνα;

¹⁵ Ο νταντά ντα ο νταγιά μπορίνενα τι σικλιαρέν λατσσές πουμαρέ τσσαβέν σαρ τι απαντίνεν κοβλέ γκίσαρ κάνα κάποιος μανγκέλα τι χαλ-πες λέντζαρ οντουλένγκε σο πακιάνα. (Ιακ. 3:13) Μερικά νταντά ντα νταγιά κερένα πρόβες κι φαμιλιάκι λατρεία. Διαβάνενα πραγματένγκε σο μπέκιμ τι αβέν-πες κο σχολείος, συζητίνενα ντα κερένα πρόβες σαρ μπορίνενα τι απαντίνεν. Επίσης, σικλιαρένα πουμαρέ τσσαβέν σαρ τι κερέν λάφι κοβλέ γκίσαρ ντα σουκάρ τροπόσαρ.​—Ντικχέν ο πλαίσιος « Ο Πρόβες Μπορίνενα τι Βοηθίνεν Τουμαρί Φαμιλί».

16, 17. Σαρ μπορίνενα ο πρόβες τι βοηθίνεν ι τερνέν;

¹⁶ Ο πρόβες μπορίνενα τι βοηθίνεν ι Χριστιανόν τι αρακχέν λατσσέ απαντήσεις ντα τι κερέν πουμαρό νεαυτός σίγουρος ότι οντουλά σο πακιάνα ισί μπαγιά. Η σειρά θεματέντζαρ «Οι Νεαροί  Ρωτούν» κο ιστότοπος jw.org τθερέλα φύλλα εργασίας ι τερνένγκε. Ανταλά ισί κερντέ για τι βοηθίνεν ι τερνέν τι αβέν πο σίγουροι οντουλένγκε σο πακιάνα ντα τι ετοιμάνεν απαντήσεις πουμαρέ λαφίντζαρ. Κάνα σαρί η φαμιλί σικλιαρέλα-πες κατά σειρά ανταγιά, μπορίνασα σαρέ τι σικλιάς σαρ τι υπερασπίνας αμαρί πίστη κοβλέ γκίσαρ ντα σουκάρ τροπόσαρ.

¹⁷ Εκ τερνό, ο Μάθιου, εξηγίνελα σαρ βοηθιντέ-λες ο πρόβες. Κι φαμιλιάκι λατρεία, ο Μάθιου, λέσκο ντατ ντα λέσκι ντάι ρόντενα θεματένγκε σο μπέκιμ τι συζητίντιβεν κι τάξη. Βοβ βακερέλα: «Σκεφτίνασα σο ερωτήσεις μπέκιμ τι πουτσέν-μαν ντα, σοράν κατά ροντιπέ σο κερντάμ, κεράσα πρόβες σαρ κα απαντίναας-λεν. Κάνα τθεράβα ξεκάθαρα μι γκοντιάτε σόσκε πακιάβα κάτι, νιωθίναβα σιγουριά ντα ισί μάνγκε πο εύκολος τι σικαβάβ πραότητα κο γιαβερά».

18. Σο τθερέλα μπαρί αξία, σαρ βακερέλα ο εδάφιος Κολοσσαείς 4:6;

¹⁸ Ατζέ-ντα άμα κα εξηγίνας κάτι λατσσέ τροπόσαρ, να κα μανγκέν σαρέ τι δεχτίνεν οντουλά σο βακεράσα. Αλλά άμα κα κεράς λάφι χωρίς τι ανάς σε δύσκολη θέση ι γιαβερέν ντα με πραότητα, ανταβά μπορεί τι βοηθίνελ. (Διαβάνεν Κολοσσαείς 4:6) Κάνα εξηγίνασα εκχέ τζενέστε σο πακιάσα, ισί σαρ τι φουρτίνας εκ μπάλα. Μπορίνασα τι φουρτίνας-λα σιγά σιγά ή φοράσαρ. Κάνα φουρτίνασα-λα σιγά σιγά, ο γιαβέρ τζενό μπέκιμ τι ασταρέλ-λα ντα τι συνεχίνελ τι κχελέλ πέσκε αμέντζαρ ι μπαλάσαρ. Κάτι ασακό αβέλα-πες κάνα κεράσα λάφι χωρίς τι ανάς σε δύσκολη θέση ι γιαβερέν ντα με πραότητα. Αζομάν, ο τζενέ μπορεί τι μανγκέν τι ασουνέν-αμέν ντα τι συνεχίνεν ι συζήτηση. Σίγουρα, άμα κάποιος μανγκέλα τι κερέλ καβγκάς αμέντζαρ ή τι πρασάλ οντουλά σο πακιάσα, να ισινάμ υποχρεωμέ τι συνεχίνας τι απαντίνας λέσκε. (Παρ. 26:4) Αλλά χάνικ τζενέ κα αβέν αντικάς. Κάποια τζενέ​—μπέκιμ μπουτ​—κα ασουνέν.

19. Σο πρέπει τι τσσίντελ-αμέν τι σικαβάς πραότητα κάνα υπερασπίνασα οντουλά σο πακιάσα;

¹⁹ Σίγουρα, βοηθίντιβασα μπουτ κάνα σικλιάσα τι σικαβάς πο μπουτ πραότητα. Τι προσευχίντιβεν κο Ιεχωβά για τι ντελ-τουμέν ζορ τι σικαβέν πραότητα κάνα απαντίνενα κο δύσκολες ερωτήσεις ή κάνα ο γιαβερά κρίνενα-τουμέν άδικα. Ντεν-τουμέν γκοντί ότι, άμα κα σικαβέν πραότητα, να κα ερεσέν κο σημείος τι κερέν καβγκάς εκχέ τζενέσαρ, ατζέ-ντα άμα τθερένα διαφορετική άποψη. Άμα κα απαντίνεν με πραότητα ντα σεβασμός, κάποιοι μπέκιμ κα αλλάνεν πουμαρί άποψη αμένγκε ντα για το αλήθειες ι Γραφιάκε. Τι αβέν «πάντα έτοιμοι τι υπερασπίνεν» οντουλά σο πακιάνα. «Τι κερέν-λες όμως ανταβά κοβλέ γκίσαρ ντα με μπουτ σεβασμός». (1 Πέτρ. 3:15) Κάνα σικαβένα πραότητα, ισινέν ζουρανέ!