1. Σαρ νιωσάλο ο Πέτρος κάνα αγαντάς ότι ασταρντάς ματσσέν αντράλ εκχέ θαυμάσταρ;

 Ο ΠΕΤΡΟΣ γκιλό τι ασταρέλ σαρί ι ιράτ ματσσέν αλλά να ασταρντάς τίποτα. Ο Ιησούς βακερντάς λέσκε κάτι σο μουκχλάς-λες πουταρντέ μόσαρ: «Τζα κο μασκάρ κι ντεριάβ ντα φουρτίνεν τουμαρέ δίχτυα για τι ασταρέν ματσσέν». (Λουκ. 5:4) Ο Πέτρος να ισινέ σίγουρος ότι κα ασταρέλας ματσσέν, αλλά κερντάς οντουλά σο βακερντάς λέσκε ο Ιησούς. Ο δίχτυα αρχισάλε τι πφαράντιβεν κατά βάρος ι ματσσένγκο. Κάνα αγαντέ ότι μόλις ντικχλέας εκ θαύμας, ο Πέτρος ντα οντουλά σο κερένας μπουτί γιεκ λέσαρ, «σαστισάλε». Ο Πέτρος βακερντάς νταριάσαρ: «Νας μάνταρ, Κύριε, σόσκε ισινόμ αμαρτωλός τζενό». (Λουκ. 5:6-9) Ντικχίντιβελα ότι ο Πέτρος να νιωθίνελας άξιος ατζέ-ντα τι αβέλ γιεκ ι Ιησούσαρ.

2. Σόσκε ισί λατσσό τι ντικχάς ο παράδειγμας ι Πετρόσκο;

² Ο Πέτρος τθερέλας δίκιος​—ισινέ «αμαρτωλός τζενό». Η Γραφή σικαβέλα ότι μπάζιμα βακερέλας ντα κερέλας πράγματα σο μετανιώνελας σοράν. Νιωθίνενα τουμέν-ντα σαρ ο Πέτρος; Μήπως υπαρχίντιβελα κάτι κο χαρακτήρας τουμαρό σο μαρένα-τουμέν τι διορθώνεν; Ή μήπως μαρένα-τουμέν μπουτ μπρεσά για τι νακχαβέν εκ αδυναμία; Άμα βα, λέσκο παράδειγμας μπορίνελα τι ντελ-τουμέν κουράγιος. Σαρ; Σκεφτίνεν ακαβά: Ο Ιεχωβά κα μπορίνελας τι κανονίνελ μα τι γραφίντιβεν ο λάθη ι Πετρόσκε κι Γραφή. Όμως, κανονιντάς τι γραφίντιβεν για τι σικλιάς αμέν λένταρ. (2 Τιμ. 3:16, 17) Άμα κα σικλιάς ανταλέ τζενέσκε, σο τθερέλας αδυναμίες ντα αισθήματα σαρ αμαρέ, κα αγαβάς ότι ο Ιεχωβά να μπεκλεντίνελα αμένταρ τι αβάς τέλειοι. Οντουβά σο μανγκέλα ισί μα τι παρατίνας-λεν​—τι συνεχίνας τι μαράς-αμέν​—παρόλο σο τθεράσα αδυναμίες.

3. Σόσκε δεν πρέπει τι παρατίνας-λεν;

³ Σόσκε ισί μπουτ σημαντικός μα τι παρατίνας-λεν; Επειδή κάνα κεράσα πρόβα σε κάτι, αβάσα πο λατσσέ. Για παράδειγμας, κάποιος μπορεί τι κερέλ μπουτ μπρεσά προσπάθεια για τι σικλιόλ  τι κχελέλ κιθάρα. Σαρέ ανταλά μπρεσά, μπορεί τι κερέλ χιλιάδες φάλτσα κι κιθάρα, αλλά άμα κα συνεχίνελ τι κερέλ πρόβες, κα αβέλ πο λατσσό. Ατζέ-ντα όμως άμα κα αβέλ εκ μπουτ λατσσό μουσικός, μπάζιμα μπέκιμ τι κερέλ εκ λάθος. Όμως, να παρατίνελα-λεν. Συνεχίνελα τι μαρέλ-πες για τι αβέλ πο λατσσό μουσικός. Αντικάς αμέν-ντα, ατζέ-ντα άμα πακιάσα ότι νακχαντάμ εκ αδυναμία, μπορεί τι αβέλ εκ στιγμή σο κα περάς πάλι. Αλλά συνεχίνασα τι μαράς-αμέν για τι πετυχίνας αμαρό στόχος. Σαρέ βακεράσα ή κεράσα πράγματα σο μετανιώνασα σοράν. Όμως, άμα να κα παρατίνας-λεν, ο Ιεχωβά κα βοηθίνελ-αμέν τι κεράς συνέχεια πρόοδος. (1 Πέτρ. 5:10) Για τι ντικχάς ο παράδειγμας ι Πετρόσκο, σο μαρέλας-πες ντα να παρατίνελας-λεν. Παρόλο σο κερντάς λάθη, ο Ιησούς μανγκέλας-λες. Ανταβά μπορίνελα τι τσσίντελ-αμέν τι συνεχίνας τι υπηρετίνας ι Ιεχωβάς.

4. Σαρ διαβάνασα κο εδάφια Λουκάς 5:5-10, σο τζενό βακερντάς ο Πέτρος ότι ισινέ, αλλά σαρ ηρεμιντάς-λες ο Ιησούς;

⁴ Η Γραφή να εξηγίνελα σόσκε ο Πέτρος βακερντάς ότι ισινέ «αμαρτωλός τζενό» ή καλά αμαρτίες αντάς πι γκοντιάτε. (Διαβάνεν Λουκάς 5:5-10) Αλλά μπέκιμ τι κερντάας κάποια σοβαρά λάθη. Ο Ιησούς αγαντάς λέσκι νταρ. Ο Πέτρος μπέκιμ τθερέλας ανταγιά νταρ σόσκε νιωθίνελας ότι να αξίνελας. Αλλά ο Ιησούς τζανέλας ότι ο Πέτρος μπορίνελας τι ατσσόλ πιστός. Οτθάρ, βακερντάς λέσκε λατσσιμάσαρ: «Μα ντάρα». Η μπέσα σο ντινάς ο Πέτρος κο Ιησούς αλλαντάς σαρί ι ζωή ι Πετρόσκι. Σοράν, ο Πέτρος, ντα λέσκο πφραλ, ο Ανδρέας, μουκχλέ πουμαρί μπουτί, σο ισινέ τι ασταρέν ματσσέν, ντα ακολουθιντέ ι Ιησούς κο έργος σο κερέλας. Ανταγιά απόφαση αντάς λένγκε μπαρέ ευλογίες.​—Μάρκ. 1:16-18.

5. Σαρ ευλογισάλο ο Πέτρος επειδή νακχαντάς ο μπέτι αισθήματα σο νιωθίνελας πι νεαυτόσκε ντα ακολουθιντάς ι Ιησούς;

⁵ Ο Πέτρος νακχλάς μπουτ σουκάρ πράγματα επειδή ακολουθιντάς ι Χριστός. Ντικχλάς ι Ιησούς τι κερέλ λατσσές ι νασφαλέν, τι νικαβέλ δαιμονέν, ατζέ-ντα τι τζουβντιαρέλ ι μουλέν. b (Ματθ. 8:14-17· Μάρκ. 5:37, 41, 42) Ο Πέτρος ντικχλάς επίσης εκ φαντασία σο σικαβέλας ι Ιησούς σαρ βασιλιάς κι Βασιλεία κι Ντεβλέσκι. Ο Πέτρος να μπισταρντάς ποτές ανταγιά φαντασία. (Μάρκ. 9:1-8· 2 Πέτρ. 1:16-18) Ντικχλάς πράγματα σο ποτές να νακχλέας λέσκε γκοντιάταρ. Καζόμ χαρούμενος πρέπει τι ισινέ σο να μουκχλάς ο μπέτι αισθήματα σο νιωθίνελας πι νεαυτόσκε τι κερέν-λες τι χασαρέλ ανταλά ευλογίες!

6. Νακχαντάς σουγκό ο Πέτρος πο αδυναμίες; Εξηγίνεν.

 ⁶ Παρόλο σο ο Πέτρος ντικχλάς ντα ασουντάς σαρέ ανταλά πράγματα, συνεχίνελας τι μαρέλ-πες με το αδυναμίες σο τθερέλας. Σκεφτίνεν μερικά παραδείγματα. Κάνα ο Ιησούς εξηγιντάς κο Πέτρος ότι αβιλό κι πφουβ για τι τσσιντικιαρέν-λες μπουτ πράγματα ντα τι μουνταρέν-λες, σαρ βακερένας ο προφητείες ι Γραφιάκε, ο Πέτρος διορθωντάς-λες. (Μάρκ. 8:31-33) Μπουτ φαρ, ο Πέτρος ντα ο γιαβερά απόστολοι χάνας-πες κον λένταρ ισινέ ο πο μπαρό. (Μάρκ. 9:33, 34) Ι τελευταία ιράτ πριν τι μερέλ ο Ιησούς, ο Πέτρος, χωρίς τι σκεφτίνελ-λες, τσσιντάς ο καν εκχέ τζενέσκο. (Ιωάν. 18:10) Ι ίδια οντιά ιράτ, νταρασάλο αζόμ μπουτ σο βακερντάς τριν φαρ ότι να τζανέλας πι αμαλές, ι Ιησούς. (Μάρκ. 14:66-72) Ανταβά κερντάς ι Πετρός τι ροβέλ γκίσαρ.​—Ματθ. 26:75.

7. Καγιά ευκαιρία ντιντιλί κο Πέτρος αφού αναστισάλο ο Ιησούς;

⁷ Ι Ιησούσκε συνεχίνελας τι αβέλ πολύτιμος λέσκο απόστολος σο χασαρντάας σαρί πι ζορ. Αφού αναστισάλο, ο Ιησούς ντινάς κο Πέτρος ι ευκαιρία τι σικαβέλ ότι ατζέκ μανγκέλας-λες. Ο Ιησούς καλιντάς ι Πετρός τι υπηρετίνελ ταπεινά σαρ τσομπάνης λέσκε μπρακένγκο. (Ιωάν. 21:15-17) Ο Πέτρος δεχτιντάς ι πρόσκληση. Οτθάρ, κι Πεντηκοστή, ισινέ κι Ιερουσαλήμ ντα ισινέ κατά πρώτα τζενέ σο αβιλέ χρισμέ ι άγιε πνευμάσαρ.

8. Καβά σοβαρός λάθος κερντάς ο Πέτρος κι Αντιόχεια;

⁸ Ατζέ-ντα κάνα αβιλό χρισμέ Χριστιανός, ο Πέτρος μαρέλας-πες με το αδυναμίες σο τθερέλας. Κο 36 Κ.Χ., ισινέ ανγκλάλ κάνα λιντάς ο άγιος πνεύμας ο Κορνήλιος, σο ισινέ κατά γιαβερά τθεμά ντα να κερντάας περιτομή. Ανταβά σικαντάς ξεκάθαρα ότι «ο Ντεβέλ να ξεχωρίνελα ι τζενέν» ντα ότι ο τζενέ κατά γιαβερά τθεμά μπορίνενας τι αβέν κι Χριστιανική κχανγκιρί. (Πράξ. 10:34, 44, 45) Σοράν ανταλέσταρ, ο Πέτρος νιωθίνελας άνετα τι χαλ γιεκ ι τζενέντζαρ σο ισινέ κατά γιαβερά τθεμά, κάτι σο ανγκλέ να κα κερέλας-λες με τίποτα. (Γαλ. 2:12) Όμως, μερικοί Ιουδαίοι Χριστιανοί πακιάνας ότι ο Ιουδαίοι ντα ο τζενέ κατά γιαβερά τθεμά δεν έπρεπε τι χαν γιεκ. Κάνα μερικά τζενέ σο τθερένας ανταγιά άποψη αβιλέ κι Αντιόχεια, ο Πέτρος τσσιναντάς τι χαλ γιεκ πι πφραλέντζαρ σο ισινέ κατά γιαβερά τθεμά, μάλλον επειδή νταρέλας μα τι προσβαλίνελ ι Χριστιανόν σο ισινέ Ιουδαίοι. Ο απόστολος Παύλος ντικχλάς ότι κι περίπτωση οντιά, ο Πέτρος ισινέ υποκριτής ντα διορθωντάς-λες ανγκλάλ σαριλέντε. (Γαλ. 2:13, 14) Παρόλο σο κερντάς ανταβά λάθος, ο Πέτρος να παρατιντάς-λεν. Σο βοηθιντάς-λες;

9. Σαρ αγαβάσα κατά εδάφια Ιωάννης 6:68, 69 ότι ο Πέτρος ισινέ αφοσιωμέ;

⁹ Ο Πέτρος ισινέ αφοσιωμέ. Να μουκχλάς τίποτα τι κερέλ-λες τι παρατίνελ-λεν σαρέ για πάντα. Σικαντάς πι αφοσίωση εκχέ περιπτωσιάτε σο ο Ιησούς βακερντάς κάτι σο λέσκε μαθητές να αγαντέ. (Διαβάνεν Ιωάννης 6:68, 69) Χωρίς τι μπεκλεντίνεν για τι εξηγίνελ λένγκε ο Ιησούς ντα χωρίς τι πουτσέν-λες σο μανγκέλας τι βακερέλ, μπουτ μαθητές τσσιναντέ τι ακολουθίνεν ι Ιησούς. Αλλά ο Πέτρος να κερντάς-λες ανταβά. Αγαντάς ότι σάντε ο Ιησούς τθερέλας «λάφια σο ντένα αιώνια ζωή».

10. Σαρ ντινάς μπέσα ο Ιησούς κο Πέτρος; (Ντικχέν ι φωτογραφία-ντα)

¹⁰ Ο Ιησούς να κερντάς πέρα ι Πετρός. Ι τελευταία ιράτ σο ισινέ κι πφουβ, ο Ιησούς τζανέλας ότι ο Πέτρος ντα ο γιαβερά απόστολοι να κα ατσσόνας πασέ λέστε. Αλλά βακερντάς ι Πετρόσκε ότι ισινέ σίγουρος λέσκε ότι κα βουρτίνελας ντα κα ατσσόλας πιστός. (Λουκ. 22:31, 32) Ο Ιησούς αγαβέλας ότι «ο τζενό μανγκέλα τι κερέλ ο λατσσιπέ, αλλά ο σώμας ισί μπίζουρανο». (Μάρκ. 14:38) Οτθάρ, ατζέ-ντα κάνα ο Πέτρος βακερντάς ότι να τζανέλας-λες, ι Ιησούσκε συνεχίνελας τι αβέλ πολύτιμος. Ο αναστημέ Ιησούς  σικαντάς-πες κο Πέτρος, μάλλον κάνα ο Πέτρος ισινέ κορκορό. (Μάρκ. 16:7· Λουκ. 24:34· 1 Κορ. 15:5) Σκεφτίνεν καζόμ ζορ πρέπει τι ντινάς ανταβά ι Πετρός, σο ισινέ πφανγκέ γκίσκο!

11. Σο κερντάς ο Ιησούς για τι ντελ κο Πέτρος ι σιγουριά ότι ο Ιεχωβά κα στηρίνελας-λες;

¹¹ Ο Ιησούς ντινάς κο Πέτρος ι σιγουριά ότι ο Ιεχωβά κα στηρίνελας-λες. Ο αναστημέ Ιησούς κερντάς ατζέκ εκ φαρ ο ίδιος θαύμας ντα κερντάς τι ασταρέν πάλι ματσσέν ο Πέτρος ντα ο απόστολοι σο ισινέ λέσαρ. (Ιωάν. 21:4-6) Ανταβά θαύμας ντινάς κο Πέτρος ι σιγουριά ότι ο Ιεχωβά μπορίνελας τι ντελ-λες πάντα ο αναγκαία. Μπέκιμ ο απόστολος αντάς πι γκοντιάτε ο λάφια ι Ιησούσκε ότι ο Ιεχωβά κα ντελ ο αναγκαία κο τζενέ σο “συνεχίνενα τι μανγκέν πρώτα ι Βασιλεία”. (Ματθ. 6:33) Σαρέ ανταλά βοηθιντέ ι Πετρός τι τσσουβέλ πρώτα πι ζωγιάτε ο έργος ντα όχι ι μπουτί σο τθερέλας τι ασταρέλ ματσσέν. Ντινάς μαρτυρία μπίνταρανες κι Πεντηκοστή κο 33 Κ.Χ., ντα βοηθιντάς χιλιάδες τζενέν τι δεχτίνεν ο λατσσέ αμπέρια. (Πράξ. 2:14, 37-41) Σοράν, βοηθιντάς ι Σαμαρειτέν ντα ι τζενέν κατά γιαβερά τθεμά τι δεχτίνεν ι Χριστός. (Πράξ. 8:14-17· 10:44-48) Ο Ιεχωβά σίγουρα χρησιμοποιηντάς μπουτ ι Πετρός για τι ανέλ κι κχανγκιρί σαβέ τι μανγκές τζενέν.

12. Σαρ μπορίνελα τι βοηθίνελ-αμέν ο παράδειγμας ι Πετρόσκο άμα μαράσα-αμέν με εκ αδυναμία μπουτ μπρεσά;

¹² Ο Ιεχωβά μπορίνελα τι βοηθίνελ-αμέν μα τι παρατίνας-λεν. Μπέκιμ χρειαζίντιβελα μπαρί προσπάθεια για τι συνεχίνας, ειδικά άμα μαράσα-αμέν με εκ αδυναμία μπουτ μπρεσά. Μπάζιμα, αμαρέ αδυναμίες ντικχίντιβενα πο δύσκολες οντουλένταρ σο νακχέλας ο Πέτρος. Αλλά ο Ιεχωβά μπορίνελα τι ντελ-αμέν ι ζορ σο χρειαζίντιβασα για μα τι παρατίνας-λεν. (Ψαλμ. 94:17-19) Για παράδειγμας, εκ πφραλ τζάλας μουρσέντζαρ για μπουτ μπρεσά πριν τι γνωρίνελ ι αλήθεια. Αλλαντάς σαρί πι ζωή ντα αρχισάλο τι τζουβντιόλ αντικάς σαρ βακερέλα η Γραφή. Όμως, μπάζιμα αβέλας λέσκε πάλι τι κερέλ ανταβά λάθος πράγμας. Σο βοηθιντάς-λες μα τι παρατίνελ-λεν; Βοβ εξηγίνελα: «Ο Ιεχωβά ντέλα-αμέν ζορ». Σοράν βακερέλα: «Με τη βοήθεια σο ντέλα-αμέν ο πνεύμας ι Ιεχωβάσκο ..., σικλιλόμ ότι αβέλα-πες τι [συνεχίνας τι] πφιράς κο ντρομ κι αληθειάκο . . . Ο Ιεχωβά μπορισάλο τι χρησιμοποιήνελ-μαν, ντα παρόλο σο τθεράβα αζόμ μπουτ ελαττώματα, ντέλα-μαν συνέχεια ζορ».

13. Σαρ μπορίνασα τι μοιάζας κο Πέτρος, σαρ διαβάνασα κο εδάφια Πράξεις 4:13, 29, 31; (Ντικχέν ι φωτογραφία-ντα)

¹³ Σαρ ντικχλάμ, ο Πέτρος νταρασάλο κατά τζενέ πο μπουτ από εκ φαρ. Αλλά κάνα  προσευχισάλο για τι αβέλ μπίνταρανο, μπορισάλο τι σικαβέλ θάρρος. (Διαβάνεν Πράξεις 4:​13, 29, 31) Μπορίνασα αμέν-ντα τι νικίνας αμαρί νταρ. Ντικχέν σο αβιλό-πες κο Χορστ, εκχέ τερνέ πφραλέστε σο τζουβντιόλας κι ναζιστική Γερμανία. Κο σχολείος, πιένενας-λες αζόμ μπουτ σο, πο μπουτ από εκ φαρ, βακερντάς: «Χάιλ Χίτλερ!», σο μανγκέλα τι βακερέλ: «Ο Χίτλερ κα σώνελ-αμέν!» Αντίς λέσκο ντατ ντα λέσκι ντάι τι ντεν λέσκε βίκος, προσευχισάλε λέσαρ ντα μανγκλέ κατά Ιεχωβά τι ντελ-λες θάρρος. Χάρη κι βοήθεια σο λιντάς πι νταντέσταρ ντα πι νταγιάταρ, ντα επειδή ντέλας μπέσα κο Ιεχωβά, ο Χορστ τελικά αρακχλάς ι ζορ τι ατσσόλ σταθερός. Πο σοράν, βακερντάς: «Ο Ιεχωβά ποτές να παρατιντάς-μαν». c

14. Σαρ μπορίνενα ο λατσσέ τσομπάνια τι ντεν ζορ οντουλέντε σο νιωθίνενα ότι να τθερένα ζορ;

¹⁴ Ι Ιεχωβάσκε ντα ι Ιησούσκε συνεχίνασα τι αβάς πολύτιμοι. Αφού ο Πέτρος βακερντάς ότι να τζανέλας ι Χριστός, έπρεπε τι λελ εκ σημαντική απόφαση. Κα παρατίνελας-λεν ή κα συνεχίνελας τι αβέλ μαθητής ι Χριστόσκο; Ο Ιησούς μολιντάας ι Ιεχωβάς μα τι χασάρντιβελ η πίστη ι Πετρόσκι. Βακερντάς ι Πετρόσκε ανταλέ προσευχιάκε ντα ντινάς-λες ι σιγουριά ότι ο Πέτρος πο σοράν κα μπορίνελας τι ντελ ζορ πι πφραλέν. (Λουκ. 22:31, 32) Καζόμ ζορ πρέπει τι λιντάς ο Πέτρος κάνα αντάς πι γκοντιάτε ο λάφια ι Ιησούσκε! Κάνα πρέπει τι λας εκ σημαντική απόφαση αμαρέ ζωγιάτε, ο Ιεχωβά μπορίνελα τι χρησιμοποιήνελ λατσσέ τσομπανίν για τι ντεν-αμέν ι ζορ σο χρειαζίντιβασα για τι ατσσάς πιστοί. (Εφεσ. 4:8, 11) Ο Πολ, εκ πφραλ σο ισί μπουτ μπρεσά πρεσβύτερος, προσπαθίνελα τι ντελ ανταγιά παρηγοριά. Κάνα κάποιοι νιωθίνενα ότι ισί έτοιμοι τι παρατίνεν-λεν, βακερέλα λένγκε τι ανέν πουμαρέ γκοντιάτε σαρ ταρτιντάς-λεν ο Ιεχωβά κι αλήθεια. Σοράν, ντέλα-λεν ι σιγουριά ότι, χάρη κι αφοσιωμέ αγάπη κι Ιεχωβάσκι, πάντα κα  αβέν πολύτιμοι Λέσκε. Ο Πολ βακερέλα: «Ντικχλόμ μπουτέ τζενέν σο χασαρντέ σαρί πουμαρί ζορ μα τι παρατίνεν-λεν επειδή ο Ιεχωβά βοηθίνελας-λεν».

15. Σαρ σικαβέλα ο παράδειγμας ι Πετρόσκο ντα του Χορστ καζόμ μπαγιά ισί ο λάφια ι εδαφιόσκε Ματθαίος 6:33;

¹⁵ Ο Ιεχωβά ντέλας κο Πέτρος ντα κο γιαβερά απόστολοι σαρέ ο αναγκαία πράγματα. Ο ίδιος κα κερέλ αμέντζαρ-ντα άμα κα τσσουβάς ο έργος πρώτα αμαρέ ζωγιάτε. (Ματθ. 6:33) Σοράν κατά Δεύτερος Παγκόσμιος Πόλεμος, ο Χορστ σκεφτίνελας τι κερέλ σκαπανικός. Ισινέ όμως μπουτ τσορορό ντα να ισινέ σίγουρος άμα κα μπορίνελας εμ τι τθερέλ ο αναγκαία εμ τι κερέλ ο σκαπανικός. Σο κα κερέλας; Αποφασιντάς τι δοκιμάνελ ι Ιεχωβάς. Οτθάρ, σαρί ι εβδομάδα σο τθερένας ι επισκοπός, νικιόλας κο έργος. Κάνα μπιτισάλι η εβδομάδα, σαστισάλο σο ο επίσκοπος περιοχής ντινάς-λες εκ φάκελος αλλά να βακερντάς λέσκε κάσταρ ισινέ. Ο φάκελος τθερέλας μπερεκέτι λοβέ για τι μπορίνελ τι κερέλ πο έργος σαρ σκαπανέας μπερεκέτι μασεκά. Ανταβά δώρος ντινάς κο Χορστ ι σιγουριά ότι ο Ιεχωβά κα στηρίνελας-λες. Από αζομάν, τσσουβέλας ι Βασιλεία πρώτα πι ζωγιάτε.​—Μαλ. 3:10.

16. Σόσκε ισί λατσσό τι ντας προσοχή κο παράδειγμας κι Πετρόσκο ντα κο επιστολές λέσκε;

¹⁶ Καζόμ μπουτ πρέπει τι χαιρισάλο ο Πέτρος σο ο Ιησούς να νασλόας λέσταρ, παρόλο σο κάποτε ο Πέτρος μανγκλάας-λες λέσταρ ανταβά! Ο Χριστός συνεχιντάς τι σικλιαρέλ ι Πετρός για τι αβέλ πιστός απόστολος ντα λατσσό παράδειγμας ι Χριστιανόνγκε. Ντα σικλιάσα μπουτ σημαντικά πράγματα κατά σικλιαριπέ σο ντινάς ο Ιησούς κο Πέτρος. Ο Πέτρος γραφιντάς μερικά κατά πράγματα σο σικλιλό, ντα γιαβερά πράγματα, κο ντούι επιστολές σο μπουτσσαντάς κο κχανγκιριά κο πρώτος αιώνας. Ο γιαβέρ μάθημας κα ανέλ αμαρέ γκοντιάτε μερικά πράγματα κατά επιστολές ανταλά ντα κα σικαβέλ αμένγκε σαρ μπορίνασα τι κεράς-λεν αντιβές.