1. Χάνικ πριν τι μερέλ, σο κερντάς ο απόστολος Πέτρος ι Ντεβλέσκε πνευμάσαρ;

 Ο ΑΠΟΣΤΟΛΟΣ ΠΕΤΡΟΣ τζανέλας ότι μπουτ σουγκό κα μερέλας. Σαρέ ανταλά μπρεσά σο υπηρετιντάς πιστά ι Ιεχωβάς, πφιρντάς ι Ιησούσαρ, αρχισάλο τι κερέλ έργος οντουλέντε σο να ισινέ Ιουδαίοι ντα ισινέ κο κυβερνών σώμας. Αλλά λέσκι υπηρεσία να μπιτισάλιας. Πασέ κο 62 μέχρι κο 64 Κ.Χ., γραφιντάς ι Ντεβλέσκε πνευμάσαρ ντούι επιστολές​—ο βιβλία ι Γραφιάκε Πρώτη ντα Δεύτερη Πέτρου. Ο Πέτρος τθερέλας ι ελπίδα ότι οντουλά επιστολές κα βοηθίνενας ι Χριστιανόν σοράν λέσκε μεριμάσταρ.—2 Πέτρ. 1:12-15.

2. Σόσκε τθερένας ανάγκη ο Χριστιανοί ο επιστολές ι Πετρόσκε;

² Ο Πέτρος γραφιντάς πο επιστολές εκχέ βακιτίστε σο λέσκε πφραλά “ισινέας στεναχωριμέ επειδή τθερένας σαβέ τι μανγκές προβλήματα”. (1 Πέτρ. 1:6) Πφιρνέ τζενέ προσπαθίνενας τι κερέν ι Χριστιανόν κι κχανγκιρί τι πακιάν ψεύτικα λάφια ντα τι κερέν μπίλατζανε πράγματα. (2 Πέτρ. 2:1, 2, 14) Ο Χριστιανοί σο τζουβντιόνας κι Ιερουσαλήμ κα ντικχένας μπουτ σουγκό «ο τέλος σαρέ ι πραγματένγκο», δηλαδή ι καταστροφή οντουλέ τθεμέσκι ντα λέσκε ναόσκι κατά στρατός ι Ρωμαιόνγκο. (1 Πέτρ. 4:7) Σίγουρα, ο επιστολές ι Πετρόσκε βοηθιντέ ι Χριστιανόν τι αγαβέν σαρ κα μπορίνενας τι νταϊντίνεν ο δοκιμασίες σο νακχένας αζομάν, ντα τι προετοιμάντιβεν οντουλένγκε σο κα νακχένας κο μέλλον. b

3. Σόσκε πρέπει τι σικλιαράς-αμέν κατά ντούι επιστολές ι Πετρόσκε;

³ Παρόλο σο ο Πέτρος γραφιντάς πο επιστολές κο Χριστιανοί σο τζουβντιόνας κο πρώτος αιώνας, ο Ιεχωβά κανονιντάς τι αβέν ανταλά επιστολές αντρέ Λέσκε Λαφίστε. Οτθάρ, αμέν αντιβές  μπορίνασα τι βοηθίντιβας κατά επιστολές ανταλά. (Ρωμ. 15:4) Επειδή τζουβντιάσα εκχέ ντουνιάστε σο κερέλα μπίλατζανε πράγματα, νακχάσα αμέν-ντα δοκιμασίες σο μπέκιμ δυσκολίνενα-αμέν τι υπηρετίνας ι Ιεχωβάς. Επίσης, ατζεχάνικ κα νακχάς εκ στεναχώρια πο μπαρί κατά καταστροφή σο αβιλί κι Ιερουσαλήμ ντα κο ναός σο τθερέλας. Ο ντούι επιστολές ι Πετρόσκε ανένα αμαρέ γκοντιάτε κάποια σημαντικά πράγματα. Ανταλά κα βοηθίνεν-αμέν τι συνεχίνας τι μπεκλεντίνας ι Ιεχωβάσκε ντιβεσέσκε, τι νικίνας ι νταρ κατά τζενέ ντα τι μανγκάς μπουτ ο εκ ι γιαβερές. Ανταλά πράγματα κα βοηθίνεν ι πρεσβυτερόν-ντα τι αγαβέν σαρ τι αρακχαβέν λατσσές ι Ντεβλέσκε μπρακέν.

4. Σαρ σικαβένα ο εδάφια 2 Πέτρου 3:3, 4, σο κα μπορίνελας τι κερέλ αμαρί πίστη τι αβέλ μπίζουρανι;

⁴ Τθεράσα ντονταλάι αμένταρ τζενέν σο να πακιάνα ο προφητείες ι Γραφιάκε. Ο τζενέ σο τζάνα αμέντζαρ κόντρα μπέκιμ πρασάνα-αμέν σόσκε ισί μπουτ μπρεσά σο μπεκλεντίνασα σαρ σαρ τι αβέλ ο τέλος. Ισί τζενέ σο βακερένα ότι ο τέλος να κα αβέλ ποτές. (Διαβάνεν 2 Πέτρου 3:3, 4) Άμα κα ασουνάς ασακέ λάφια εκχέ τζενέσταρ κο έργος, κι μπουτί ή κι φαμιλί, ανταβά μπέκιμ τι κερέλ αμαρί πίστη τι αβέλ μπίζουρανι. Ο Πέτρος σικαντάς σο μπορίνελα τι βοηθίνελ-αμέν.

5. Σο κα βοηθίνελ-αμέν τι μπεκλεντίνας με υπομονή τι αβέλ ο τέλος; (2 Πέτρου 3:8, 9)

⁵ Μερικοί μπέκιμ αμντίνενα ότι ο Ιεχωβά αργίνελα τι ανέλ ο τέλος ανταλέ πφιρνέ ντουνιάσκο. Ο λάφια ι Πετρόσκε μπορίνενα τι βοηθίνεν-αμέν σόσκε ανένα αμαρέ γκοντιάτε ότι ο τρόπος σο ντικχέλα ο Ιεχωβά ο χρόνος ισί μπουτ διαφορετικός κατά τρόπος ι τζενένγκο. (Διαβάνεν 2 Πέτρου 3:8, 9) Ι Ιεχωβάσκε, χίλια μπρεσά ισί σαρ εκ ντιβές. Ο Ιεχωβά κερέλα υπομονή ντα να μανγκέλα τι καταστραφίντιβελ καέκ. Κάνα όμως κα αβέλ λέσκο ντιβές, ανταβά ντουνιάς κα αβέλ καταστροφή. Σο μπαρό προνόμιος τθεράσα τι χρησιμοποιήνας ο χρόνος σο ατσσόλα για τι ντας μαρτυρία τζενέντε σαρέ κατά τθεμά!

6. Σαρ “τθεράσα συνέχεια αμαρέ γκοντιάτε” ο ντιβές ι Ιεχωβάσκο; (2 Πέτρου 3:11, 12)

⁶ Ο Πέτρος βακερέλα αμένγκε “τι τθεράς συνέχεια αμαρέ γκοντιάτε” ο ντιβές ι Ιεχωβάσκο. (Διαβάνεν 2 Πέτρου 3:11, 12) Σαρ; Πρέπει τι σκεφτίνας λατσσές​—κάθε ντιβές, άμα αβέλα-πες—ο ευλογίες ι νεβέ ντουνιάσκε. Σκεφτίνεν σαρ κα αβέλ τι υπαρχίντιβελ παντού καθαρός οξυγόνος, τι χαν χαμπίματα σο κα κερέν τουμένγκε λατσσιπέ, τι καλωσορίνεν τουμαρέ αγαπημέ τζενέν καζόμ κα αναστίντιβεν ντα τι σικλιαρέν τζενέν σο τζουβντιλέ πριν από μπουτ αιώνες σαρ νικίστιλε μπαγιά ο προφητείες ι Γραφιάκε. Άμα κα σκεφτίνεν λατσσές ανταλά πράγματα, ανταβά κα βοηθίνελ-τουμέν εμ τι συνεχίνεν τι μπεκλεντίνεν σαρ σαρ ανταλέ βακιτίσκε εμ τι αβέν σίγουροι ότι τζουβντιάσα κο τελευταία ντιβεσά. “Επειδή τζανάσα ήδη ανταλά πράγματα” σο κα αβέν-πες ανγκλ’ αμέντε, ο τζενέ σο σικλιαρένα ψεύτικα λάφια “να κα χουχαβέν-αμέν”.​—2 Πέτρ. 3:17.

7. Σο μπορίνελα τι κερέλ αμένγκε η νταρ κατά τζενέ;

⁷ Καζόμ τθεράσα συνέχεια αμαρέ γκοντιάτε ο ντιβές ι Ιεχωβάσκο, μανγκάσα τι βακεράς ο λατσσέ αμπέρια κο γιαβερά. Όμως, μπέκιμ ισί φαρ σο σακιντίνασα τι κεράς λάφι. Σόσκε; Μπέκιμ τι νταράσα κατά τζενέ. Ανταβά αβιλό-πες κο Πέτρος. Ι ιράτ σο δικάνενας ι Ιησούς, ο Πέτρος να τθερέλας ο θάρρος τι βακερέλ ότι ισινέ μαθητής ι Ιησούσκο, ντα βακερντάς μπουτ φαρ ατζέ-ντα ότι να τζανέλας-λες. (Ματθ. 26:69-75) Όμως, ο ίδιος απόστολος μπορισάλο τι βακερέλ πο σοράν με σιγουριά:  «Μα νταρέν οντουλέσταρ σο νταρένα βον ούτε τι ανησυχίνεν». (1 Πέτρ. 3:14) Ο λάφια ι Πετρόσκε ντένα-αμέν ι σιγουριά ότι μπορίνασα τι νικίνας ι νταρ κατά τζενέ.

8. Σο μπορίνελα τι βοηθίνελ-αμέν τι νικίνας ι νταρ κατά τζενέ; (1 Πέτρου 3:15)

⁸ Σο μπορίνελα τι βοηθίνελ-αμέν τι νικίνας ι νταρ κατά τζενέ; Ο Πέτρος βακερέλα αμένγκε: «Δεχτίνεν τουμαρέ γκίστε ότι ο Χριστός ισί Κύριος ντα ότι ισί άγιος». (Διαβάνεν 1 Πέτρου 3:​15) Κεράσα-λες ανταβά κάνα σκεφτίνασα λατσσές ι θέση ντα ι εξουσία σο τθερέλα αμαρό Κύριος ντα Βασιλιάς, ο Χριστός Ιησούς. Άμα σακιντίνενα ή νταρένα κάνα τθερένα εκ ευκαιρία τι μουτθαβέν κο γιαβερά ο λατσσέ αμπέρια, ντεν-τουμέν γκοντί αμαρέ Βασιλιάς. Τι ανέν τουμαρέ γκοντιάτε ι Ιησούς τι κερέλ κουμάντος κο ουρανός καζόμ τθερέλα ντονταλάι πέσταρ εκατομμύρια αγγελόν. Ντεν-τουμέν γκοντί ότι ντιντιλί λέστε «σαρί η εξουσία κο ουρανός ντα κι πφουβ» ντα ότι κα αβέλ «τουμέντζαρ σαρέ ο ντιβεσά μέχρι κο τέλος ανταλέ ντουνιάσκο». (Ματθ. 28:18-20) Ο Πέτρος βακερέλα αμένγκε τι αβάς «πάντα έτοιμοι» τι υπερασπίνας αμαρί πίστη. Κα μανγκένας τι ντεν μαρτυρία κι μπουτί, κο σχολείος ή κάπου γιαβερτθέ; Σκεφτίνεν πο τζανγκλέ κάνα κα μπορίνενας τι κερέν-λες ανταβά ντα σοράν προετοιμάνεν τουμαρέ λάφια. Κερέν προσευχή για θάρρος, ντα τι αβέν σίγουροι ότι ο Ιεχωβά κα βοηθίνελ-τουμέν τι νικίνεν ι νταρ κατά τζενέ.​—Πράξ. 4:29.

9. Κάνα να σικαντάς αγάπη ο Πέτρος; (Ντικχέν ι φωτογραφία-ντα)

⁹ Ο Πέτρος σικλιλό σαρ τι σικαβέλ αγάπη. Ισινέ οτθέ κάνα ο Ιησούς βακερντάς: «Ντάβα-τουμέν εκ νεβί εντολή, τι μανγκέν ο εκ ι γιαβερές· σαρ μανγκλόμ-τουμέν με, τι μανγκέν τουμέν-ντα ο εκ ι γιαβερές». (Ιωάν. 13:34) Όμως, πο σοράν ο Πέτρος να μανγκλάς τι χαλ πι πφραλέντζαρ ντα πι πφενίντζαρ σο να ισινέ Ιουδαίοι σόσκε νταρέλας κατά Ιουδαίοι Χριστιανοί. Ο απόστολος Παύλος βακερντάς ότι ο Πέτρος «προσποιήνελας-πες», δηλαδή ότι ανταβά ισινέ υποκρισία. (Γαλ. 2:11-14) Ο Πέτρος δεχτιντάς οντιά διόρθωση ντα σικλιλό λάταρ. Ντα κο ντούι-ντα επιστολές λέσκε βακερέλα ότι πρέπει, όχι σάντε τι νιωθίνας αγάπη αμαρέ πφραλένγκε ντα πφενίνγκε, αλλά εμ τι σικαβάς ανταγιά αγάπη.

10. Σο βοηθίνελα-αμέν τι “πφαμπάς μπαγιά αμαρέ πφραλένγκε”; Εξηγίνεν. (1 Πέτρου 1:22)

¹⁰ Ο Πέτρος βακερέλα ότι πρέπει τι “πφαμπάς μπαγιά αμαρέ πφραλένγκε”. (Διαβάνεν 1 Πέτρου 1:​22) Κάνα “ντάσα καν κι αλήθεια”, μανγκάσα τι πφαμπάς λένγκε. Ανταγιά αλήθεια σικλιαρέλα-αμέν επίσης ότι «ο Ντεβέλ να ξεχωρίνελα ι τζενέν». (Πράξ. 10:34, 35) Ναστί ντάσα καν κι εντολή κι Ιησούσκι σο βακερέλα ι μανγκιμάσκε άμα σικαβάσα αγάπη μερικέ τζενέντε κι κχανγκιρί αλλά γιαβερέντε να σικαβάσα. Μπέκιμ τι νιωθίνας πο πασέ μερικέ πφραλέντζαρ ενώ γιαβερέντζαρ όχι αζόμ μπουτ, σαρ ο Ιησούς-ντα. (Ιωάν. 13:23· 20:2) Αλλά ο Πέτρος ανέλα αμαρέ γκοντιάτε ότι πρέπει τι μαράς-αμέν για τι “πφαμπάς” σαρέ αμαρέ πφραλένγκε ντα πφενίνγκε, τι αβάς πο πασέ σαρ εκ φαμιλί.​—1 Πέτρ. 2:17.

11. Σο μανγκέλα τι βακερέλ τι “μανγκάς μπουτ ι γιαβερέν αντράλ αμαρέ γκίσταρ”;

¹¹ Ο Πέτρος βακερντάς αμένγκε τι “μανγκάς μπουτ ο εκ ι γιαβερές αντράλ αμαρέ γκίσταρ”. Ακατέ ο λάφι «μπουτ» μανγκέλα τι βακερέλ τι μανγκάς εκχέ τζενές ατζέ-ντα άμα ισί δύσκολος τι κεράς-λες ανταβά. Για παράδειγμας, σο αβέλα-πες άμα εκ πφραλ προσβαλιντάς-αμέν ή πφανγκλάς αμαρό γκι; Μπέκιμ οντουβά σο νικιόλα αμένταρ ισί τι κεράς λέσκε αμέν-ντα ο ίδια αντίς τι σικαβάς αγάπη. Όμως, ο Πέτρος σικλιλό κατά Ιησούς ότι ο Ντεβέλ να μπεϊντίνελα-λες ανταβά. (Ιωάν. 18:10, 11) Ο Πέτρος γραφιντάς: «Μα κερέν κακός οντουλένγκε σο κερένα τουμένγκε κακός ή μα προσβαλίνεν οντουλέν σο προσβαλίνενα-τουμέν, αλλά ευλογίνεν-λεν». (1 Πέτρ. 3:9) Κάνα μανγκένα μπουτ ι γιαβερέν, κα σικαβέν λένγκε λατσσιπέ ντα κα σκεφτίνεν-λεν, ατζέ-ντα οντουλέν σο μπέκιμ ντουκχαντέ-τουμέν.

12. (α) Σο γιαβέρ κα κεράς άμα μανγκάσα μπουτ ι γιαβερέν; (β) Σο πρέπει τι προσπαθίνεν τι κερέν, σαρ σικαβέλα ο βίντεος Να Προφυλάσσετε το Πολύτιμο Δώρο της Ενότητας;

¹² Κι πρώτη κατά επιστολές λέσκε, ο Πέτρος βακερντάς ο λάφι «τι μανγκέν μπουτ ο εκ ι γιαβερές». Ανταγιά αγάπη ιτσσαρέλα, όχι σάντε χάνικ αμαρτίες, αλλά «μπουτ αμαρτίες». (1 Πέτρ. 4:8) Μπέκιμ ο Πέτρος ντινάς-πες γκοντί ότι, μπουτ μπρεσά πο τζανγκλέ, ο Ιησούς σικλιαρντάας-λες τι συγχωρίνελ. Αζομάν, ο Πέτρος μπέκιμ πακιάλας ότι ντέλας αντράλ πι γκίσταρ κάνα βακερντάς ότι κα συγχωρίνελας πι πφραλές «μέχρι 7 φαρ». Αλλά ο Ιησούς σικλιαρντάς εμ λες εμ αμέν ότι πρέπει τι συγχωρίνας “μέχρι 77” φαρ, δηλαδή μα τι τσσουβάς όρια. (Ματθ. 18:21, 22) Άμα ισί τουμένγκε δύσκολος τι κερέν ανταγιά συμβουλή, μα χασαρέν τουμαρί ζορ! Σαρέ ο ατελείς υπηρέτες ι Ιεχωβάσκε δυσκολίντιβενα μπάζιμα τι συγχωρίνεν. Ο σημαντικός ακανά ισί τι κερέν σο νακχέλα τουμαρέ βαστέσταρ για τι συγχωρίνεν τουμαρέ πφραλές ντα τι κερέν ειρήνη λέσαρ. c

13. Σόσκε μπέκιμ τι αβέλ δύσκολος ι πρεσβυτερόνγκε τι αρακχαβέν πουμαρέ πφραλέν ντα πφενίν;

¹³ Σίγουρα ο Πέτρος να μπισταρντάς ποτές οντουβά σο βακερντάς λέσκε ο Ιησούς κάνα αναστισάλο: «Αράκχαβ μι μπρακορέν». (Ιωάν. 21:16) Άμα ισινέν πρεσβύτερος, τζανένα ότι ανταλά οδηγίες ισί τουμένγκε-ντα. Όμως, μπορεί τι αβέλ δύσκολος εκχέ πρεσβυτερόσκε τι αρακχέλ σαάτι ανταλέ σημαντικέ διορισμόσκε. Ο πρεσβύτεροι πρέπει πρώτα τι αρακχαβέν πουμαρί φαμιλί ντα τι αβέν σίγουροι ότι τθερένα ο αναγκαία, ότι σαρέ νιωθίνενα ότι μανγκένα-λεν ντα ότι ισί πασέ κο Ιεχωβά. Επίσης, ντένα λατσσό παράδειγμας καζόμ τζάνα κο έργος ντα καζόμ προετοιμάντιβενα ντα κερένα ο διορισμοί κο συναθροίσεις ντα κο συνελεύσεις. Μερικοί επίσης τθερένα ευθύνες σόσκε ισί κι Επιτροπή Προσέγγισης Νοσοκομείων ή τθερένα διορισμούς κατά Τοπικό Τμήμα Σχεδιασμού/Οικοδόμησης. Ο πρεσβύτεροι τθερένα μπαγιά μπουτ πράγματα τι κερέν!

14. Σο μπορίνελα τι τσσίντελ ι πρεσβυτερόν τι αρακχαβέν ι μπρακέν; (1 Πέτρου 5:1-4)

¹⁴ Ο Πέτρος βακερντάς κο γιαβερά πρεσβύτεροι: «Τι αρακχαβέν ντα τι σικλιαρέν ι Ντεβλέσκε μπρακέν». (Διαβάνεν 1 Πέτρου 5:1-4) Άμα ισινέν πρεσβύτερος, τζανάσα ότι μανγκένα τουμαρέ πφραλέν ντα πφενίν ντα μανγκένα τι αρακχαβέν-λεν ντα τι σικλιαρέν-λεν. Όμως, μπέκιμ μπάζιμα νιωθίνενα ότι τθερένα αζόμ μπουτ τι κερέν ή ισινέν αζόμ κχινέ σο ναστί κερένα ανταβά διορισμός. Σο μπορίνενα τι κερέν; Βακερέν κο Ιεχωβά οντουλά σο ανησυχίνενα-τουμέν. Ο Πέτρος γραφιντάς: «Άμα εκ τζενό υπηρετίνελα, τι στηρίντιβελ κι ζορ σο ντέλα ο Ντεβέλ». (1 Πέτρ. 4:11) Τουμαρέ πφραλά ντα πφενιά μπέκιμ νακχένα προβλήματα σο να αβέλα-πες τι νασέν ντιπ ανταλέ ντουνιάστε. Αλλά ντεν-τουμέν γκοντί ότι «ο αρχηγός ι τσομπανίγκο», ο Ιησούς Χριστός, μπορίνελα τι βοηθίνελ-λεν πο λατσσές τουμένταρ. Μπορίνελα τι κερέλ-λες ανταβά εμ αντιβές εμ κο νεβό ντουνιάς. Ο Ντεβέλ μανγκέλα κατά πρεσβύτεροι απλώς τι μανγκέν πουμαρέ πφραλέν ντα πφενίν, τι αρακχαβέν-λεν ντα τι αβέν «λατσσέ παραδείγματα ι μπρακένγκε».

15. Σαρ αρακχαβέλα εκ πρεσβύτερος ι μπρακέν; (Ντικχέν ι φωτογραφία-ντα)

¹⁵ Εκ πφραλ σο ισί πρεσβύτερος μπουτ μπρεσά, ο Γουίλιαμ, αγαβέλα καζόμ σημαντικός ισί τι αρακχαβέλ ι μπρακέν. Κάνα αρχισάλο ο Κορωνοϊός, βοβ ντα ο γιαβερά πρεσβύτεροι κερένας ο πο λατσσό για τι κερέν λάφι ι κάθε  τζενέσαρ πουμαρέ ομιλόσταρ κάθε εβδομάδα. Ο Γουίλιαμ βακερέλα σόσκε: «Μπουτ πφραλά ισινέ κχερέ κορκορέ, ντα λένγκι γκοντί μπορίνελας τι τζαλ μπουτ εύκολα πραγματέντε σο πφανγκένα λένγκο γκι». Κάνα εκ πφραλ τσσίντελα προβλήματα, ο Γουίλιαμ ασουνέλα προσεκτικά για τι αγαβέλ καλά ισί λέσκε ανάγκες ντα λέσκε ανησυχίες. Σοράν, αρακχέλα συγκεκριμέ θέματα, μπουτ φαρ βίντεα αμαρέ ιστοτοπόσταρ, για τι βοηθίνελ-λες. Βοβ βακερέλα: «Ακανά, πο μπουτ σαρέ κατά γιαβερά μπρεσά, ισί ανάγκη τι αρακχαβάς ι μπρακέν. Κεράσα μπαρί προσπάθεια για τι βοηθίνας τζενέν τι σικλιόν ι Ιεχωβάσκε. Χρειαζίντιβελα τι κεράς ι ίδια προσπάθεια εμ για τι αρακχαβάς ι πφραλέν, τι βοηθίνας ι Ιεχωβάσκε μπρακέν τι ατσσόν κι αλήθεια».

16. Σαρ μπορίνασα τι κεράς οντουλά σο σικλιλάμ κατά επιστολές ι Πετρόσκε;

¹⁶ Ντικχλάμ σάντε χάνικ πράγματα σο σικλιάσα κατά ντούι επιστολές ι Πετρόσκε. Μπέκιμ ντικχλέν κάτι σο κα μανγκένας τι αλλάνεν. Για παράδειγμας, μήπως κα μανγκένας τι σκεφτίνεν πο μπουτ φαρ ο ευλογίες ι νεβέ ντουνιάσκε; Μήπως τσσουντέν στόχος τι ντεν μαρτυρία κι μπουτί, κο σχολείος ή κάπου γιαβερτθέ; Ντικχένα τρόπους σο κα μπορίνενας τι σικαβέν ατζέ πο μπουτ ότι μανγκένα μπουτ τουμαρέ πφραλέν ντα πφενίν; Πρεσβύτεροι, ισινέν αποφασισμέ τι αρακχαβέν ι Ιεχωβάσκε μπρακέν αντράλ τουμαρέ γκίσταρ; Βακερέν ι αλήθεια τουμαρέ νεαυτόστε ντα αγαβέν σο κα μπορίνενας τι κερέν πο λατσσές. Αλλά μα χασαρέν τουμαρί ζορ. «Ο Κύριος σικαβέλα λατσσιπέ» ντα κα βοηθίνελ-τουμέν τι αβέν πο λατσσέ. (1 Πέτρ. 2:3) Ο Πέτρος βακερέλα αμένγκε: «Ο Ντεβέλ . . . κα τελειώνελ τουμαρό σικλιαριπέ. Βοβ κα κερέλ-τουμέν τι αβέν σταθεροί, κα κερέλ-τουμέν ζουρανέ, κα τσσουβέλ τουμένγκε ζουρανέ θεμέλια».​—1 Πέτρ. 5:10.

17. Άμα να τσσιναβάσα τι προσπαθίνας ντα μουκχάσα ι Ιεχωβάς τι σικλιαρέλ-αμέν, καβά κα αβέλ ο αποτέλεσμας;

¹⁷ Ο Πέτρος κάποτε νιωσάλο ότι να αξίνελας τι αβέλ ι Ιησούσαρ. (Λουκ. 5:8) Αλλά επειδή ο Ιεχωβά ντα ο Ιησούς βοηθιντέ-λες μανγκιμάσαρ, να τσσιναντάς τι ακολουθίνελ πιστά ι Ιησούς. Αντικάς, ο Ιεχωβά μουκχλάς ι Πετρός τι τσσουβέλ-πες «κι Βασιλεία αμαρέ Κυριόσκι ντα Οντουλέσκι σο σώνελα-αμέν, ι Ιησού Χριστόσκι». (2 Πέτρ. 1:11) Σο μπαρί ευλογία! Άμα να τσσιναβένα τι προσπαθίνεν, σαρ ο Πέτρος ντα μουκχένα ι Ιεχωβάς τι σικλιαρέλ-τουμέν, κα λεν τουμέν-ντα ι αιώνια ζωή. Κα “ερεσέν κο στόχος της πίστης σο τθερένα, τι σώντιβεν”.​—1 Πέτρ. 1:9.