1. Καγιά δυσκολία νακχλέ ο Ιωάς, ο Οζίας ντα ο Ιωσίας;

 ΣΚΕΦΤΙΝΕΝ τι αβένας βασιλιάς κο λαός κι Ντεβλέσκο σε μπουτ χουρντί ηλικία! Σαρ κα χρησιμοποιήνενας τουμαρί ζορ ντα τουμαρί εξουσία; Η Γραφή κερέλα λάφι μερικέ τερνέ τσσαβένγκε σο αβιλέ βασιλιάδες κο Ιούδας. Για παράδειγμας, ο Ιωάς ισινέ σάντε 7 μπρεσένγκο, ο Οζίας 16 ντα ο Ιωσίας 8. Ανταβά πρέπει τι αβέλας μπουτ δύσκολος! Αλλά παρόλο σο να ισινέ εύκολος, ο Ιεχωβά ντα ο γιαβερά βοηθίνενας-λεν τι κερέν λατσσέ πράγματα.

2. Σόσκε ισί λατσσό τι σικλιάς για τον Ιωάς, τον Οζία ντα τον Ιωσία;

² Αμέν να ισινάμ βασιλιάδες ντα βασίλισσες, αλλά μπορίνασα τι σικλιάς μπουτ σημαντικά πράγματα κατά Ιωάς, κατά Οζίας ντα κατά Ιωσίας. Λιντέ εμ λατσσέ εμ μπέτι αποφάσεις. Λένγκε παραδειγμάσταρ, κα ντικχάς σόσκε ισί σημαντικός τι τραμπίνας λατσσέ αμαλέν, τι ατσσάς ταπεινοί ντα τι ρόντας ι Ιεχωβάσκε.

3. Σαρ ο Ιωδαέ βοηθιντάς τον Ιωάς, σο ισινέ βασιλιάς, τι λελ γκοντιαβέρ αποφάσεις;

³ Τι λεν γκοντιαβέρ αποφάσεις σαρ ο Ιωάς. Κάνα ο βασιλιάς Ιωάς ισινέ τερνό, λέσκο ντατ μουλό, ντα ο αρχιερέας Ιωδαέ μπαριαρντάς-λες σαρ πο τσσαβό ντα σικλιαρντάς-λες ι Ιεχωβάσκε. Ο Ιωάς ισινέ γκοντιαβέρ επειδή ασουντάς ο συμβουλές σο ντινάς-λες ο Ιωδαέ. Ο Ιωάς δεχτιντάς οντουβά σικλιαριπέ ντα λιντάς ι γκοντιαβέρ απόφαση τι ανέλ ι πάκι λατρεία ντα τι υπηρετίνελ ι Ιεχωβάς. Κανονιντάς ατζέ-ντα τι κερντιόλ ο ναός ι Ιεχωβάσκο.​—2 Χρον. 24:1, 2, 4, 13, 14.

4. Σαρ βοηθίντιβασα κάνα ντάσα καν κο εντολές κι Ιεχωβάσκε; (Παροιμίες 2:1, 10-12)

⁴ Άμα τουμαρό ντατ ντα τουμαρί ντάι ή κάποιος γιαβέρ σικλιαρέλα-τουμέν τι μανγκέν ι Ιεχωβάς ντα τι τζουβντιόν αντικάς σαρ βακερένα λέσκε κανόνες, κερέλα τουμένγκε εκ μπουτ σουκάρ δώρος. (Διαβάνεν Παροιμίες 2:1, 10-12) Τουμαρό ντατ ντα τουμαρί ντάι σικλιαρένα-τουμέν μπουτέ τροπόντζαρ.  Εκ πφεν, η Κάτια, ντέλα-πες γκοντί σαρ βοηθίνελας-λα λάκο ντατ τι λελ λατσσέ αποφάσεις. Κάθε ντιβές σο γκερέλας-λα κο σχολείος, συζητίνελας λάσαρ ο εδάφιος ι ντιβεσέσκο. Η Κάτια βακερέλα: «Οντουλά συζητήσεις βοηθίνενας-μαν τι κεράβ ο σωστός κάνα τθεράβας προβλήματα αντρέ κο ντιβές». Τουμαρό ντατ ντα τουμαρί ντάι μπέκιμ τι τσσουβέν τουμένγκε κανόνες σο βασίντιβενα κι Γραφή. Αλλά τουμέν μπέκιμ τι νιωθίνεν ότι οντουλά κανόνες να μουκχένα-τουμέν τι κερέν ο πράγματα σο μπεϊντίνενα. Σο κα βοηθίνελ-τουμέν τι ντεν καν τουμαρέ νταντές ντα τουμαρέ νταγιά; Εκ γιαβέρ πφεν, η Αναστασία, ντέλα-πες γκοντί ότι λάκο ντατ ντα λάκι ντάι ντένας πουμαρέ σαατίσταρ για τι εξηγίνεν λάκε σόσκε τσσουβένας μερικούς κανόνες. Βόι βακερέλα: «Ανταβά βοηθιντάς-μαν τι αγαβάβ ότι να τσσουβένας μάνγκε ανταλά κανόνες για τι κερέν-μαν κουμάντος, αλλά για τι αρακχαβέν-μαν επειδή μανγκένα-μαν».

5. Σαρ οντουλά σο κερένα κα επηρεάνεν εμ τουμαρέ νταντές ντα τουμαρέ νταγιά εμ ι Ιεχωβάς; (Παροιμίες 22:6· 23:15, 24, 25)

⁵ Τουμαρό ντατ ντα τουμαρί ντάι κα αβέν χαρούμενοι άμα κα ασουνέν ο συμβουλές σο ντένα-τουμέν κατά Γραφή. Αλλά ο πο σημαντικός ισί ότι κα ανέν χαρά κο γκι κι Ντεβλέσκο ντα τουμαρί φιλία λέσαρ κα αβέλ πο ζουρανί. (Διαβάνεν Παροιμίες 22:6· 23:15, 24, 25) Νανέ ανταβά εκ σημαντικός λόγος τι ακολουθίνεν ο παράδειγμας σο μουκχλάς τουμένγκε ο Ιωάς κάνα ισινέ τερνό;

6. Καλέ τζενένγκε συμβουλές αρχισάλο τι ασουνέλ ο Ιωάς, ντα καλά ισινέ ο αποτελέσματα; (2 Χρονικών 24:17, 18)

⁶ Σικλιόν κατά μπέτι αποφάσεις του Ιωάς. Σοράν κατά μεριπέ του Ιωδαέ, ο Ιωάς να τραμπιντάς λατσσέ αμαλέν. (Διαβάνεν 2 Χρονικών 24:17, 18) Αποφασιντάς τι ασουνέλ ο συμβουλές σο ντινέ-λες ο άρχοντες κο Ιούδας σο να μανγκένας ι Ιεχωβάς. Ο πο λογικός κα αβέλας ο Ιωάς τι ατσσόλ ντουρ οντουλέ τζενένταρ σο κερένας μπέτι πράγματα. (Παρ. 1:10) Βοβ όμως αποφασιντάς τι ασουνέλ ι τζενέν σο κερένας-πες χάι λέσκε αμαλά. Ντα κάνα λέσκο ξάδελφος, ο Ζαχαρίας, προσπαθιντάς τι διορθώνελ-λες, ο Ιωάς ντινάς εντολή τι μουνταρέν-λες. (2 Χρον. 24:20, 21· Ματθ. 23:35) Σο μπέτι ντα ντινιλικανό πράγμας! Κι αρχή, ο Ιωάς τζάλας-λεν λατσσές πι ζωγιάτε, αλλά δυστυχώς πο σοράν αβιλό αποστάτης ντα δολοφόνος. Τελικά, μουνταρντέ-λες ο ίδιοι ο υπηρέτες λέσκε. (2 Χρον. 24:22-25) Καζόμ διαφορετική κα αβέλας λέσκι ζωή άμα κα συνεχίνελας τι ντελ καν ι Ιεχωβάς ντα οντουλέν σο μανγκένας ι Ντεβλές! Σο σικλιόνα λέσκε παραδειγμάσταρ;

7. Σο αμαλέν πρέπει τι τραμπίνεν; (Ντικχέν ι φωτογραφία-ντα)

 ⁷ Κάτι σο σικλιάσα κατά μπέτι απόφαση σο λιντάς ο Ιωάς ισί ότι πρέπει τι τραμπίνας αμαλέν σο κα βοηθίνεν-αμέν​—αμαλέν σο μανγκένα ι Ιεχωβάς ντα μανγκένα τι ανέν λέσκε χαρά. Να χρειαζίντιβελα τι κεράς παρέα σάντε τζενέντζαρ σο ισί αμαρέ ηλικιάτε. Ντεν-τουμέν γκοντί ότι ο Ιωάς ισινέ μπουτ πο τερνό κατά Ιωδαέ, πι αμαλέσταρ. Κάνα τραμπίνενα αμαλέν, σκεφτίνεν: “Βοηθίνενα-μαν τι κεράβ πο ζουρανί μι πίστη κο Ιεχωβά; Τσσίντενα-μαν μο αμαλά τι τζουβντιάβ αντικάς σαρ βακερένα ο κανόνες ι Ντεβλέσκε; Κερένα λάφι ι Ιεχωβάσκε ντα για το σουκάρ αλήθειες λέσκε; Σεβάνενα ο κανόνες ι Ντεβλέσκε; Βακερένα μάνγκε σάντε οντουβά σο μανγκάβα τι ασουνάβ ή τθερένα ο θάρρος τι διορθώνεν-μαν άμα κα κεράβ εκ λάθος;” (Παρ. 27:5, 6, 17) Για τι βακεράς ο πράγματα ξεκάθαρα, άμα τουμαρέ αμαλά να μανγκένα ι Ιεχωβάς, να τθερένα-λεν ανάγκη. Αλλά άμα τθερένα αμαλέν σο μανγκένα ι Ιεχωβάς, ατσσόν πασέ λέντε​—κα βοηθίνεν-τουμέν!​—Παρ. 13:20.

8. Άμα χρησιμοποιήνασα ο κοινωνικά δίκτυα, σο πρέπει τι τθεράς αμαρέ γκοντιάτε;

⁸ Ο κοινωνικά δίκτυα μπέκιμ τι ισί εκ μπουτ λατσσό τρόπος για τι κεράς λάφι αμαρέ τζενέντζαρ ντα αμαρέ αμαλέντζαρ. Όμως, μπουτ τζενέ χρησιμοποιήνενα-λεν για τι κερέν εντύπωση κο γιαβερά, κάνα βάντενα φωτογραφίες ντα βίντεα σο σικαβένα σο κιντέ ή σο κερντέ. Άμα χρησιμοποιήνενα ο κοινωνικά δίκτυα, σκεφτίνεν: “Μήπως οντουβά σο μανγκάβα ισί τι ταρτίναβ ι προσοχή οπρά-μάντε; Σο μανγκάβα τι πετυχίναβ​—τι νταβ ζορ ι γιαβερέν ή τι σικαβάβ-μαν; Μήπως μουκχάβα οντουλέν σο χρησιμοποιήνενα ο κοινωνικά δίκτυα τι επηρεάνεν ο τρόπος σο σκεφτίναβα; Μήπως κερένα-μαν τι κεράβ λάφι μπέτι τροπόσαρ; Ή μήπως τσσίντενα-μαν μα τι κεράβ λατσσέ πράγματα;” Ο πφραλ Νάθαν Νορ, σο υπηρετιντάς κο Κυβερνών Σώμας, ντινάς ακαγιά συμβουλή: «Μα προσπαθίνεν τι κερέν ο γκι ι τζενένγκο. Κα ερεσέν κο σημείος μα τι κερέν καεκχέσκο. Τι κερέν ο γκι ι Ιεχωβάσκο ντα αζομάν κα κερέν ο γκι σαρέ οντουλένγκο σο μανγκένα ι Ιεχωβάς».

9. Σο βοηθιντάς ο Ιεχωβά τον Οζία τι κερέλ; (2 Χρονικών 26:1-5)

⁹ Τι λεν λατσσέ αποφάσεις σαρ ο Οζίας. Κάνα ισινέ τερνό, ο βασιλιάς Οζίας ισινέ ταπεινός. Σικλιλό «τι νταρέλ κατά αληθινός Ντεβέλ». Τζουβντιλό 68 μπρεσά, ντα ο Ιεχωβά ευλογίνελας-λες ο πο μπουτ μπρεσά σο τζουβντιλό. (Διαβάνεν 2 Χρονικών 26:1-5) Ο Οζίας νικιντάς μπουτέν πι ντουσμανίνταρ ντα κανονιντάς τι ατσσόλ αρακχαντί η Ιερουσαλήμ. (2 Χρον. 26:6-15) Ο Οζίας σίγουρα χαιρίνελας σαρέ οντουλένγκε σο βοηθιντάς-λες ο Ντεβέλ τι κερέλ.​—Εκκλ. 3:12, 13.

10. Σαρ γκιλέ ο πράγματα κι ζωή του Οζία;

¹⁰ Σικλιόν κατά μπέτι αποφάσεις του Οζία. Ο βασιλιάς Οζίας σικλιλόας τι ντελ εντολές κο γιαβερά ντα βον τι κερέν-λεν. Μήπως ανταβά κερντάς-λες τι αμντίνελ ότι μπορίνελας τι κερέλ σο μανγκέλας; Εκ ντιβές, ο Οζίας λιντάς ι απόφαση τι τσσουβέλ-πες κο ναός κι Ιεχωβάσκο ντα, μπαρικανέ τροπόσαρ, προσπαθιντάς τι πφαμπαρέλ θυμίαμας κο θυσιαστήριος, κάτι σο ο βασιλιάδες να τθερένας ο δικαίωμας τι κερέν. (2 Χρον. 26:16-18) Ο αρχιερέας Αζαρίας προσπαθιντάς τι διορθώνελ-λες, αλλά ο Οζίας χολιασάλο μπουτ. Δυστυχώς, ο Οζίας καταστραφιντάς σαρέ οντουλά σο κερντάς ανταλά μπρεσά για τι ατσσόλ πιστός, ντα ο Ιεχωβά τιμωριντάς-λες με λέπρα. (2 Χρον. 26:19-21) Καζόμ διαφορετική κα αβέλας λέσκι ζωή άμα κα ατσσόλας ταπεινός!

11. Καλά πράγματα μπορεί τι σικαβέν άμα ισινάμ ταπεινοί; (Ντικχέν ι φωτογραφία-ντα)

¹¹ Κάνα ο Οζίας αβιλό ζουρανό, τσσιναντάς τι σικαβέλ εκτίμηση κο Ιεχωβά σαρέ ι λατσσέ πραγματένγκε σο κερντάας Βοβ λέσκε. Σο σικλιάσα  αμέν; Πρέπει τι ανάς αμαρέ γκοντιάτε ότι ο ευλογίες ντα ο προνόμια σο τθεράσα αβένα κατά Ιεχωβά. Αντίς τι ισαράς-αμέν οντουλένγκε σο κερντάμ, πρέπει τι ντας κο Ιεχωβά ι δόξα οντουλένγκε σο μπορίνασα τι κεράς. b (1 Κορ. 4:7) Πρέπει τι αγαβάς ταπεινά ότι ισινάμ ατελείς ντα χρειαζίντιβασα διόρθωση. Εκ πφραλ σο ισί περίπου 60 μπρεσένγκο, γραφιντάς: «Σικλιλόμ μα τι πακιάβ ότι ισινόμ μπουτ σημαντικός. Κάνα ο γιαβερά διορθώνενα-μαν σόσκε μπάζιμα κεράβα λάθη σαρ τι αβάβας εκ χουρντό μαξίμι, προσπαθίναβα τι ιστιάβ πάλι ντα τι συνεχίναβ τι τζαβ ανγκλάλ». Άμα νταράσα κατά Ιεχωβά ντα ατσσάσα ταπεινοί, ο πράγματα αμαρέ ζωγιάτε κα τζαν λατσσές.​—Παρ. 22:4.

12. Κάνα ισινέ τερνό, σαρ ρόντελας ο Ιωσίας ι Ιεχωβάσκε; (2 Χρονικών 34:1-3)

¹² Τι λεν γκοντιαβέρ αποφάσεις σαρ ο Ιωσίας. Ο Ιωσίας ισινέ τερνό κάνα αρχισάλο τι ρόντελ ι Ιεχωβάσκε. Μανγκέλας τι σικλιόλ ι Ιεχωβάσκε ντα τι κερέλ Λέσκο θέλημας. Όμως, η ζωή να ισινέ εύκολη οντουλέ τερνέ βασιλιάσκε. Έπρεπε τι τσσίντελ κατά πάκι λατρεία εκχέ βακιτίστε σο ο πο μπουτ τζενέ ντένας λατρεία ψεύτικε ντεβλέντε. Ντα ισινέ μπίνταρανο! Πριν τι αβέλ 20 μπρεσένγκο, ο Ιωσίας αρχισάλο τι καθαρίνελ ο λαός κατά ψεύτικη λατρεία.​—Διαβάνεν 2 Χρονικών 34:1-3.

13. Σαρ κα αλλάνελ τουμαρί ζωή κάνα κα αφιερώντιβεν κο Ιεχωβά;

¹³ Ατζέ-ντα άμα ισινέν μπουτ τερνέ, μπορίνενα τι αποφασίνεν τι μοιάζεν κο Ιωσίας άμα κα ρόντεν ι Ιεχωβάσκε ντα κα σικλιόν τι εκτιμίνεν Λέσκε ιδιότητες. Ανταβά κα τσσίντελ-τουμέν τι αφιερώντιβεν λέστε. Σαρ κα επηρεάνελ ανταβά τουμαρί ζωή; Ο Λουκ, σο μπολντιλό κάνα ισινέ 14 μπρεσένγκο, βακερέλα: «Από ακανά, κα τσσουβάβ ι υπηρεσία ι Ιεχωβάσκι πρώτη μι ζωγιάτε, ντα κα προσπαθίναβ τι κεράβ λέσκο γκι». (Μάρκ. 12:30) Καζόμ μπουτ κα ευλογίντιβεν τουμέν-ντα άμα μανγκένα τι κερέν ο ίδιος!

14. Βακερέν σαρ μερικά τερνέ μοιάζενα κο βασιλιάς Ιωσίας.

¹⁴ Καλά δυσκολίες μπορεί τι νακχέν σαρ τερνέ υπηρέτες ι Ιεχωβάσκε; Ο Γιόχαν, σο μπολντιλό κάνα ισινέ 12 μπρεσένγκο, βακερέλα ότι λέσκε συμμαθητές προσπαθίνενα τι πιένεν-λες τι πιλ ηλεκτρονική τσιγάρα. Για τι αρακχέλ ι ζορ τι τζαλ κόντρα ανταλέστε, ο Γιόχαν ανέλα πι γκοντιάτε ότι η ηλεκτρονική τσιγάρα κα μπορίνελας  τι κερέλ ζιάνι εμ λέσκε υγειάτε εμ κι φιλία σο τθερέλα ι Ιεχωβάσαρ. Η Ρέιτσελ, σο μπολντιλί κάνα ισινέ 14 μπρεσένγκι, εξηγίνελα σο βοηθίνελα-λα τι νακχαβέλ ο δυσκολίες σο τθερέλα κο σχολείος. Σαρ βακερέλα: «Προσπαθίναβα τι ρόνταβ πραγματένγκε σο ανένα μι γκοντιάτε ι Γραφή ντα ι Ιεχωβάς. Για παράδειγμας, κάνα ισινόμ κι τάξη ντα τθεράσα ιστορία, μπορεί τι ασουνάβ κάτι σο κα ανέλ μι γκοντιάτε εκ ιστορία κατά Γραφή ή εκ προφητεία. Ή μπάζιμα κάνα κεράβα λάφι εκχέ τζενέσαρ κο σχολείος, εκ λάφι σο κα βακερέλ μπορεί τι ανέλ μι γκοντιάτε εκ εδάφιος σο μπορίναβα τι βακεράβ λέσκε». Τουμέν μπέκιμ μα τι τθερέν ο ίδιες δυσκολίες οντουλέντζαρ σο τθερέλας ο βασιλιάς Ιωσίας, αλλά μπορίνενα τι αβέν καζόμ γκοντιαβέρ ντα αφοσιωμέ ισινέ βοβ. Καζόμ προσπαθίνενα τι ντεν πέρα ο δυσκολίες σο νακχένα ακανά, προετοιμάντιβενα για τι νακχαβέν γιαβερά δυσκολίες σο ισί ανγκλά-τουμέντε.

15. Σο βοηθιντάς τον Ιωσία τι υπηρετίνελ ι Ιεχωβάς πιστά; (2 Χρονικών 34:14, 18-21)

¹⁵ Κάνα ισινέ 26 μπρεσένγκο, ο βασιλιάς Ιωσίας αρχισάλο τι λατσσαρέλ ο ναός. Καζόμ αβέλας-πες ανταγιά μπουτί, αρακχλέ «ο βιβλίος σο τθερέλας αντρέ ο Νόμος ι Ιεχωβάσκο σο ντιντιλόας αντράλ κατά Μωυσής». Κάνα ο βασιλιάς ασουντάς ο λάφια οντουλέ βιβλιόσκε, κερντάς αμέσως αλλαγές για τι ντελ καν κο λάφια σο ισινέ γραμμέ οτθέ. (Διαβάνεν 2 Χρονικών 34:14, 18-21) Κα μανγκένας τι διαβάνεν μπουτ φαρ ι Γραφή; Άμα προσπαθίνενα ήδη τι κερέν-λες ανταβά, σαρ τζάνα-λεν; Σημειώνενα εδάφια σο κα μπορίνενας τι βοηθίνεν-τουμέν; Ο Λουκ, σο βακερντάμ λέσκε πο τζανγκλέ, γραφίνελα εκχέ τετραδιόστε ο σημεία σο αρακχέλα. Μήπως κα βοηθίνελας τουμέν-ντα κάτι ασακό τι ντεν-τουμέν γκοντί εδάφια ή σημεία σο μπεϊντίνενα; Καζόμ πο μπουτ σικλιόνα ντα μανγκένα ι Γραφή, αζόμ πο μπουτ κα μανγκέν τι υπηρετίνεν ι Ιεχωβάς. Ντα σαρ ο Λάφι ι Ντεβλέσκο βοηθιντάς ι βασιλιάς Ιωσίας τι κερέλ ο σωστός, κα βοηθίνελ τουμέν-ντα.

16. Σόσκε κερντάς ο Ιωσίας εκ σοβαρός λάθος, ντα σο σικλιάσα αμέν;

¹⁶ Σικλιόν κατά μπέτι απόφαση του Ιωσία.  Κάνα ο Ιωσίας ισινέ περίπου 39 μπρεσένγκο, κερντάς εκ λάθος σο γκερντάς-λες κο μεριπέ. Αντίς τι πουτσέλ ι Ιεχωβάς σο τι κερέλ, ντινάς μπέσα πι νεαυτόστε. (2 Χρον. 35:20-25) Σο σικλιαρέλα-αμέν ανταβά; Καζόμ μπρεσένγκε-ντα τι αβάς ή καζόμ βακίτι-ντα τι κεράς μελέτη κατά Γραφή, πρέπει τι συνεχίνας τι ρόντας ι Ιεχωβάσκε. Ανταβά μανγκέλα τι βακερέλ ότι πρέπει τι προσευχίντιβας μπουτ φαρ για τι οδηγίνελ-αμέν ο Ιεχωβά, τι σικλιαράς-αμέν λέσκε Λαφίσταρ ντα τι ασουνάς ο συμβουλές κατά γκοντιαβέρ Χριστιανοί. Ανταβά κα βοηθίνελ-αμέν μα τι κεράς μπαρέ λάθη ντα τι αβάς ευτυχισμέ.​—Ιακ. 1:25.

17. Καλά σημαντικά πράγματα σικλιάσα κατά ιστορίες ι τρινέ βασιλιαδένγκε κο Ιούδας;

¹⁷ Κάνα ισινέν τερνέ, μπορίνενα τι κερέν μπουτ σουκάρ πράγματα. Ο ιστορίες για τον Ιωάς, τον Οζία ντα τον Ιωσία σικαβένα ότι ο τερνέ μπορίνενα τι λεν γκοντιαβέρ αποφάσεις ντα τι κερέν πράγματα σο ανένα χαρά κι Ιεχωβάσκο γκι. Ισί μπαγιά ότι οντουλά τερνέ κερντέ λάθη σο αντέ λένγκε μπέτι αποτελέσματα. Άμα όμως τουμέν κα κερέν ο λατσσέ πράγματα σο κερντέ οντουλά βασιλιάδες ντα να κα κερέν ο ίδια λάθη λέντζαρ, μπορίνενα τι τζαν-λεν λατσσές τουμαρέ ζωγιάτε.

18. Καλά παραδείγματα κατά Γραφή σικαβένα ότι ο πράγματα τουμαρέ ζωγιάτε μπορίνενα τι τζαν λατσσές; (Ντικχέν ι φωτογραφία-ντα)

¹⁸ Η Γραφή τθερέλα ιστορίες γιαβερέ-ντα τερνένγκε σο αβιλέ πασέ κο Ιεχωβά, κερντέ λέσκο γκι ντα ντικχλέ ο πράγματα πουμαρέ ζωγιάτε τι τζαν λατσσές. Εκ λένταρ ισινέ ο Δαβίδ. Κάνα ισινέ τερνό, τραμπιντάς τι τσσίντελ κατά Ντεβέλ ντα πο σοράν αβιλό πιστός βασιλιάς. Ισί μπαγιά ότι μπάζιμα κερέλας λάθη, αλλά τθερέλας ι ευλογία ι Ιεχωβάσκι. (1 Βασ. 3:6· 9:4, 5· 14:8) Κάνα σικλιαρένα-τουμέν κατά ιστορία ι Δαβιδίσκι, λέσκο παράδειγμας κα ντελ-τουμέν ζορ για τι υπηρετίνεν ι Ιεχωβάς πιστά. Ή εκ γιαβέρ επιλογή ισί τι σικλιαρέν-τουμέν κατά παράδειγμας σο μουκχλάς ο Μάρκος ή ο Τιμόθεος. Κα ντικχέν ότι υπηρετιντέ ι Ιεχωβάς από αζομάν σο ισινέ τερνέ ντα συνεχιντέ τι τθερέν ι Ντεβλέσκι ευλογία. Ο πράγματα λένγκε ζωγιάτε γκιλέ μπουτ λατσσές.

19. Σαρ μπορίνενα τι τζαν ο πράγματα τουμαρέ ζωγιάτε;

¹⁹ Ο τρόπος σο χρησιμοποιήνενα τουμαρί ζωή ακανά κα επηρεάνελ σαρ κα τζαν ο πράγματα τουμαρέ ζωγιάτε κο μέλλον. Άμα ντένα μπέσα κο Ιεχωβά ντα όχι οντουλέστε σο αγαβένα τουμέν, βοβ κα οδηγίνελ τουμαρέ βήματα. (Παρ. 20:24) Μπορίνενα τι τθερέν εκ ευτυχισμέ ζωή πφερντί ευλογίες. Μα μπιστρέν ότι ι Ιεχωβάσκε ισί πολύτιμος σο-ντα κερένα λέσκε. Ο πο λατσσό τρόπος τι χρησιμοποιήνεν τουμαρί ζωή ισί τι υπηρετίνεν αμαρέ λατσσέ Νταντές σο ισί κο ουρανός!