1, 2. Σόσκε κερέλα αμένγκε λατσσιπέ τι σικλιαράς-αμέν κατά ιστορία του Σαμψών;

 ΣΟ ΑΒΕΛΑ τουμαρέ γκοντιάτε κάνα ασουνένα ο ναβ Σαμψών; Μάλλον αβέλα τουμαρέ γκοντιάτε εκ τζενό με μπουτ μπαρί ζορ. Ανταβά ισί μπαγιά. Αλλά ο Σαμψών λιντάς εκ μπέτι απόφαση σο τθερέλας μπέτι αποτελέσματα. Όμως ο Ιεχωβά ντικχλάς σαρέ οντουλά σο κερντάς ο Σαμψών για τι υπηρετίνελ-λες. Ντα ο Ντεβέλ κανονιντάς τι υπαρχίντιβελ κι Γραφή ο πιστός παράδειγμας του Σαμψών αμαρέ λατσσιμάσκε.

² Ο Ιεχωβά χρησιμοποιηντάς τον Σαμψών για τι κερέλ μπαρέ πράγματα για τι βοηθίνελ ι λαός σο τραμπιντάας, τον Ισραήλ. Μπουτ μπρεσά σοράν κατά μεριπέ του Σαμψών, ο Ιεχωβά πι πνευμάσαρ κερντάς ι απόστολε Παυλός τι γραφίνελ ο ναβ του Σαμψών σε μερικά εδάφια σο ισινέ ο ναβά γιαβερέ μουρσένγκε-ντα σο σικαντέ μπαρί πίστη. (Εβρ. 11:​32-34) Ο παράδειγμας του Σαμψών μπορίνελα τι ντελ-αμέν ζορ. Βοβ στηρίντιβελας κο Ιεχωβά ατζέ-ντα κο δυσκολίες. Για τι ντικχάς σαρ μπορίνασα τι λας ζορ ντα τι σικλιάς γιαβερά-ντα σημαντικά πράγματα λέσκε παραδειγμάσταρ.

3. Καβά διορισμός λιντάς ο Σαμψών;

³ Κάνα μπιάντιλο ο Σαμψών, ο Φιλισταίοι κερένας κουμάντος ι Ισραηλιτέν ντα ζορισκιαρένας-λεν. (Κριτ. 13:1) Επειδή κερένας κουμάντος σκληρέ τροπόσαρ, ο Ισραηλίτες τθερένας μπαρέ βάσανα. Ο Ιεχωβά τραμπιντάς τον Σαμψών για τι «αρχίνελ τι σώνελ ι Ισραηλιτέν κατά βας ι Φιλισταιόνγκο». (Κριτ. 13:5) Σο δύσκολος διορισμός! Για τι ντελ πέρα ανταβά μπουτ  δύσκολος διορισμός, ο Σαμψών έπρεπε τι στηρίντιβελ κο Ιεχωβά.

4. Σαρ βοηθιντάς ο Ιεχωβά τον Σαμψών τι ελευθερώντιβελ κατά Φιλισταίοι; (Κριτές 15:​14-16)

⁴ Ντικχέν σαρ ο Σαμψών ντινάς μπέσα κο Ιεχωβά ντα σαρ στηριντάς-λες ο Ντεβέλ. Εκχέ περιπτωσιάτε, ο στρατός ι Φιλισταιόνγκο αβιλό κι Λεχί, σο μάλλον ισινέ κο Ιούδας, για τι ασταρέλ τον Σαμψών. Ο Ιουδαίοι νταρασάλε, οτθάρ αποφασιντέ τι ντεν τον Σαμψών πουμαρέ ντουσμανίντε. Ο ίδιος ο λαός του Σαμψών πφαντάς-λες σικίς ντουέ νεβέ σολέντζαρ ντα αντάς-λες κο Φιλισταίοι. (Κριτ. 15:​9-13) Όμως, «ο πνεύμας ι Ιεχωβάσκο ντινάς-λες ζορ», ντα ελευθερωσάλο κατά σολέ. Σοράν, «αρακχλάς ο τσαμούγαλος εκχέ χχερέσκο», λιντάς-λες ντα λέσαρ μουνταρντάς 1.000 Φιλισταιόν!​—Διαβάνεν Κριτές 15:​14⁠-16.

5. Σαρ σικαντάς ο Σαμψών ότι στηρίντιβελας κο Ιεχωβά;

⁵ Σόσκε χρησιμοποιηντάς ο Σαμψών ο τσαμούγαλος εκχέ χχερέσκο; Αφού να ισινέ κανονικός όπλος! Σίγουρα, ο Σαμψών τζανέλας ότι η επιτυχία αβέλας κατά Ιεχωβά, όχι κατά όπλος σο κα χρησιμοποιήνελας. Ανταβά πιστός τζενό χρησιμοποιηντάς σο τθερέλας ανγκλά-πέστε οντιά στιγμή για τι κερέλ οντουβά σο μανγκέλας ο Ιεχωβά. Ντικχίντιβελα ξεκάθαρα ότι, επειδή στηριντάς-πες κο Ιεχωβά, ευλογίντιλο με μπαρί επιτυχία.

6. Σο σικλιάσα κατά Σαμψών κάνα τθεράσα εκ διορισμός;

⁶ Ο Ιεχωβά κα ντελ αμέν-ντα ι ζορ για τι κεράς αμαρέ διορισμοί, ατζέ-ντα οντουλά σο ισί αμένγκε σαρ εκ βες. Ο Ιεχωβά μπορίνελα τι κερέλ-λες ανταβά εκχέ τροπόσαρ σο μπέκιμ κα μουκχέλ-αμέν πουταρντέ μόσαρ. Τι αβέν σίγουροι ότι ο Ιεχωβά, σο ντινάς ζορ κο Σαμψών, κα βοηθίνελ τουμέν-ντα τι κερέν οντουβά σο μανγκέλα άμα κα στηρίντιβεν Λέστε για βοήθεια.​—Παρ. 16:3.

7. Καβά παράδειγμας σικαβέλα καζόμ σημαντικός ισί τι μπεκλεντίνας κατά Ιεχωβά τι οδηγίνελ-αμέν;

⁷ Μπουτ πφραλά ντα πφενιά σο κερένα μπουτί κι οικοδόμηση ντένα μπέσα κο Ιεχωβά. Ανγκλέ, ο πο μπουτ φαρ, ο πφραλά ισινέ οντουλά σο σχεδιάνενας ντα χτίνενας ο Αίθουσες Βασιλείας ντα γιαβερά κτίρια. Πο σοράν  όμως, επειδή αβγατίντιβελας ο λαός ι Ιεχωβάσκο, έπρεπε τι αβέλ εκ αλλαγή. Ο υπεύθυνα πφραλά μανγκλέ κατά Ιεχωβά τι οδηγίνελ-λεν ντα δοκιμαντέ νεβέ τρόπους, σαρ ισί τι κινέν κτίρια ντα τι λατσσαρέν-λεν. «Κι αρχή, μερικοί δυσκολίντιβενας τι δεχτίνεν ανταβά νεβό τρόπος», βακερέλα ο Ρόμπερτ, σο ο τελευταία μπρεσά κερντάς μπουτί για τι λατσσαρέλ μπουτ αμαρέ κτιριόνταρ σαρό κο ντουνιάς. Ο ίδιος συνεχίνελα: «Ισινέ κάτι μπουτ διαφορετικός οντουλέσταρ σο κεράας για μπουτ μπρεσά. Αλλά ο πφραλά ισινέ έτοιμοι τι κερέν αλλαγές, ντα ισί ξεκάθαρος ότι ο Ιεχωβά ευλογίνελα ανταλά αλλαγές». Ανταβά ισί σάντε εκ παράδειγμας σο σικαβέλα σαρ ο Ιεχωβά οδηγίνελα πι υπηρετόν για τι κερέν οντουβά σο μανγκέλα. Μπάζιμα, σαρέ ισί λατσσό τι πουτσάς-αμέν: “Μανγκάβα με τι οδηγίνελ-μαν ο Ιεχωβά ντα ισινόμ έτοιμος τι κεράβ αλλαγές για τι υπηρετίναβ-λες ι πο λατσσέ τροπόσαρ;”

8. Σο κερντάς ο Σαμψών εκχέ περιπτωσιάτε σο μουλό πανίσκε;

⁸ Μπέκιμ διαβαντέν γιαβερέ-ντα εντυπωσιακέ πραγματένγκε σο κερντάς ο Σαμψών. Μουνταρντάς κορκορό εκχέ λιονταρίς ντα πο σοράν 30 μουρσέν κι Ασκαλών, κι πόλη κι Φιλισταιόνγκι. (Κριτ. 14:5, 6, 19) Ο Σαμψών τζανέλας ότι να κα μπορίνελας ποτές τι κερέλ ανταλά πράγματα χωρίς τι τθερέλ ι βοήθεια ι Ιεχωβάσκι. Ανταβά ντικχίντιλο ξεκάθαρα εκχέ περιπτωσιάτε σο μουλό πανίσκε επειδή μουνταρντάς 1.000 Φιλισταιόν. Σο κερντάς; Αντίς τι βασίντιβελ πι νεαυτόστε για τι αρακχέλ πανί, ντινάς βίκος ι Ιεχωβάς για τι βοηθίνελ-λες.​—Κριτ. 15:18.

9. Σο κερντάς ο Ιεχωβά κάνα ο Σαμψών ντινάς-λες βίκος για βοήθεια; (Κριτές 15:19)

⁹ Ο Ιεχωβά απαντιντάς κάνα ο Σαμψών ντινάς-λες βίκος για βοήθεια, ντα εκχέ θαυμάσαρ κερντάς τι νικιόλ πανί κατά πφουβ. Κάνα ο Σαμψών πιλάς πανί, «αρχισάλο τι τθερέλ πάλι ζορ ντα βοβ λιντάς οπρά-πέστε». (Διαβάνεν Κριτές 15:​19) Ντικχίντιβελα ότι οντουβά τθαν σο νικαντάς πανί υπαρχίντιβελας μπουτ μπρεσά πο σοράν, κάνα ο προφήτης Σαμουήλ γραφιντάς ι Ντεβλέσκε πνευμάσαρ ο βιβλίος Κριτές. Οντουβά πανί σο τθάβντελας μπέκιμ ανέλας κι γκοντί κι Ισραηλιτένγκι σο ντικχένας-λες ότι ο πιστά τζενέ σο ντένας λατρεία κο Ιεχωβά μπορίνενας τι στηρίντιβεν λέστε κάνα τθερένας ανάγκη.

10. Σο πρέπει τι κεράς για τι λας ι βοήθεια ι Ιεχωβάσκι; (Ντικχέν ι φωτογραφία-ντα)

¹⁰ Πρέπει τι στηρίντιβας αμέν-ντα κο Ιεχωβά για βοήθεια, σο-ντα ταλέντα ή ικανότητες τι τθεράσα ή σο-ντα πράγματα τι κερντάμ κι υπηρεσία λέσκι. Πρέπει τι αγαβάς με ταπεινότητα ότι η αληθινή επιτυχία αβέλα σάντε κάνα στηρίντιβασα κο Ιεχωβά. Σαρ ο Σαμψών λιντάς ζορ κάνα πιλάς ο πανί σο ντινάς-λες ο Ιεχωβά, αντικάς αμέν-ντα κα αβάς ζουρανέ πνευματικά άμα χρησιμοποιήνασα σαρέ οντουλά σο ντέλα-αμέν ο Ιεχωβά.​—Ματθ. 11:28.

11. Σαρ μπορίνασα τι βοηθίντιβας καζόμ πο μπουτ αβέλα-πες κατά Ιεχωβά; Βακερέν εκ παράδειγμας.

¹¹ Ντικχέν ο παράδειγμας του Αλεξέι, εκχέ πφραλέσκο κι Ρωσία, σο νακχέλα μπαρό διωγμός. Σο βοηθιντάς-λες τι ατσσόλ ζουρανό παρόλο σο νακχέλα μπαρέ δυσκολίες; Γιεκ πι ρομνιάσαρ, τσσουντέ εκ λατσσό πνευματικός πρόγραμμας. Βοβ βακερέλα: «Προσπαθίναβα τι διαβάναβ κάθε ντιβές ι Γραφή ντα τι σικλιαράβ-μαν λάταρ. Κάθε πρωί, συζητίναβα μι ρομνιάσαρ ο εδάφιος ι ντιβεσέσκο ντα προσευχίντιβασα γιεκ κο Ιεχωβά». Σο σικλιαρέλα-αμέν ανταβά; Αντίς τι βασίντιβας αμαρέ νεαυτόστε, πρέπει τι στηρίντιβας κο Ιεχωβά. Σαρ; Πρέπει τι ασχολίντιβας μπουτ φαρ πραγματέντζαρ σο κερένα πο ζουρανί αμαρί πίστη, σαρ  ισί τι διαβάνας ι Γραφή κάθε ντιβές, τι προσευχίντιβας, τι τζας κο συναθροίσεις ντα τι κεράς έργος. Αζομάν, ο Ιεχωβά κα ευλογίνελ μπουτ αμαρέ προσπάθειες σο κεράσα για τι υπηρετίνας-λες. Ντινάς ζορ κο Σαμψών ντα σίγουρα μπορίνελα τι ντελ ζορ αμέν-ντα.

12. Καγιά μπέτι απόφαση λιντάς ο Σαμψών, ντα σόσκε ανταγιά περίπτωση ισινέ διαφορετική;

¹² Ο Σαμψών ισινέ ατελής σαρ αμέν, οτθάρ μπάζιμα λέλας λάθος αποφάσεις. Ειδικά εκ απόφαση σο λιντάς τθερέλας μπουτ μπέτι αποτελέσματα. Αφού ο Σαμψών υπηρετιντάς σαρ κριτής για κάποια μπρεσά, «τσσουντάς μεράκι εκχέ τζουβλιάκε, σο βακερένας λάκε Δαλιδά, κι κοιλάδα Σωρήκ». (Κριτ. 16:4) Ανγκλέ, ο Σαμψών νισανλισάλοας εκχέ Φιλισταιάσαρ, αλλά ανταβά «ισινέ κατά Ιεχωβά», σο «ρόντελας ευκαιρία για τι τζαλ κόντρα ι Φιλισταιόντζαρ». Σοράν, ο Σαμψών μπεσλό κο κχερ εκχέ λουμνιάκο κι Γάζα, σο ισινέ εκ τθεμ ι Φιλισταιόνγκο. Οντουλέ περιπτωσιάτε, ο Ντεβέλ ντινάς κο Σαμψών ι ζορ τι νικαβέλ ο μπαρέ πόρτες σο τθερέλας ο τθεμ ντα τι ακχαρέλ-λεν γιαβερτθέ. Οτθάρ, ο τθεμ αβιλό μπίζουρανο. (Κριτ. 14:​1-4· 16:​1-3) Όμως, ντικχίντιβελα ότι η Δαλιδά ισινέ Ισραηλίτισσα, όχι Φιλισταία. Οτθάρ, οντιά περίπτωση ισινέ διαφορετική σόσκε ο Σαμψών κερντάς σο πακιάλας βοβ ότι ισί σωστός.

13. Κατέ οδηγιντάς πφιρνιμάσαρ η Δαλιδά τον Σαμψών;

¹³ Η Δαλιδά λιντάς μπερεκέτι λοβέ κατά Φιλισταίοι για τι προδώνελ τον Σαμψών. Ισινέ άραγε βοβ αζόμ αμάκι, αζόμ μπαρέ μερακίστε, σο ναστί αγαντάς σο μανγκέλας τι κερέλ η Δαλιδά; Σαρ-ντα τι αβένας ο πράγματα, η Δαλιδά πιένελας συνέχεια τον Σαμψών για τι βακερέλ λάκε σόσκε ισινέ αζόμ ζουρανό, ντα τελικά βοβ κερντάς λάκο χατίρι. Δυστυχώς, ο λάθος του  Σαμψών κερντάς-λες τι χασαρέλ εμ πι ζορ εμ ι ευλογία ι Ιεχωβάσκι για κάποιο βακίτι.​—Κριτ. 16:​16-20.

14. Καλά αποτελέσματα τθερέλας ο Σαμψών επειδή ντινάς μπέσα κι Δαλιδά;

¹⁴ Ο Σαμψών τθερέλας μπέτι αποτελέσματα επειδή ντινάς μπέσα κι Δαλιδά ντα όχι κο Ιεχωβά. Ο Φιλισταίοι λιντέ-λες σαρ αιχμάλωτος ντα κοριαρντέ-λες. Τσσουντέ-λες κι φυλακή κι Γάζα, σο ανγκλέ λιντάας ο μπαρέ πόρτες σο τθερέλας ο τθεμ. Κερντέ-λες δούλος σο μουτσαρέλας γκιβά. Σοράν, λατζάντιλο κάνα ο Φιλισταίοι γκιντίντιλε για εκ γιορτή. Κερντέ εκ μπαρί θυσία πουμαρέ ψεύτικε ντεβλέσκε, για τον Δαγών, επειδή πακιάνας ότι βοβ ντινάας τον Σαμψών λένγκε βαστέντε. Αντέ τον Σαμψών κατά φυλακή για “τι διασκεδάνελ-λεν”​—για τι ασάν πέσκε λέσαρ.​—Κριτ. 16:​21-25.

15. Σαρ σικαντάς ο Σαμψών ότι στηρίντιβελας πάλι κο Ιεχωβά; (Κριτές 16:​28-30) (Ντικχέν ι φωτογραφία κι ανγκλαϊνί σελίδα)

¹⁵ Ο Σαμψών κερντάας εκ σοβαρός λάθος αλλά να τσσιναντάς τι κερέλ ο θέλημας ι Ιεχωβάσκο. Ροντιντάς εκ ευκαιρία για τι κερέλ ο διορισμός σο ντινάς-λες ο Ντεβέλ, δηλαδή τι τζαλ κόντρα ι Φιλισταιόντζαρ. (Διαβάνεν Κριτές 16:28-30) Μολιντάς ι Ιεχωβάς τι βοηθίνελ-λες “τι λελ εκδίκηση κατά Φιλισταίοι”. Ο αληθινός Ντεβέλ απαντιντάς κο Σαμψών ντα ντινάς-λες πάλι ι ζορ σο τθερέλας ανγκλέ αντράλ εκχέ θαυμάσταρ. Οτθάρ, ο Σαμψών οντουλέ περιπτωσιάτε μουνταρντάς πο μπουτ Φιλισταιόν από κάθε γιαβέρ φαρ.

16. Σο σικλιάσα κατά λάθος του Σαμψών;

¹⁶ Παρόλο σο ο Σαμψών να γλιτωντάς ο μπέτι αποτελέσματα κατά λάθος σο κερντάς, να τσσιναντάς τι κερέλ ο θέλημας ι Ιεχωβάσκο. Ατζέ-ντα άμα κα κεράς εκ λάθος ντα κα χρειαζίντιβας διόρθωση ή κα χασαράς εκ προνόμιος, δεν πρέπει τι τσσιναβάς τι κεράς ο θέλημας ι Ιεχωβάσκο. Τι ντεν-τουμέν γκοντί ότι ι Ιεχωβάσκε συνεχίνενα τι αβέν σημαντικοί. (Ψαλμ. 103:​8-10) Παρόλο σο κεράσα λάθη, μπορίνασα τι αβάς χρήσιμοι κο Ιεχωβά, σαρ ισινέ ο Σαμψών.

17, 18. Σόσκε ντέλα-τουμέν ζορ ο παράδειγμας του Μάικλ; (Ντικχέν ι φωτογραφία-ντα)

¹⁷ Ντικχέν ο παράδειγμας εκχέ τερνέ πφραλέσκο σο βακερένα λέσκε Μάικλ. Κερέλας μπουτ πράγματα ι Ιεχωβάσκε καζόμ υπηρετίνελας σαρ διακονικός υπηρέτης ντα τακτικός σκαπανέας. Δυστυχώς όμως κερντάς εκ λάθος, ντα αντικάς χασαρντάς πο προνόμια αντρέ κι κχανγκιρί. Ο Μάικλ βακερέλα: «Μέχρι οντιά στιγμή, σαρέ τζάνας λατσσές κο πράγματα σο  κεράβας ι Ιεχωβάσκε. Όμως ξαφνικά ισινέ σαρ τι ντινόμας σε εκ ντουβάρι. Ποτές να σκεφτιντόμ ότι ο Ιεχωβά κα μουκχέλας-μαν, αλλά νακχέλας μι γκοντιάταρ άμα μι φιλία λέσαρ κα αβέλας ποτές πάλι ίδια ή αν κα μπορίναβας ποτές τι υπηρετίναβ κι κχανγκιρί σαρ πριν».

¹⁸ Ο Μάικλ αξίνελα ισαριπέ σόσκε να τσσιναντάς τι κερέλ ο θέλημας ι Ιεχωβάσκο. Βοβ βακερέλα: «Τθεράβας μο γιακχά κι φιλία σο τθεράβα ι Ιεχωβάσαρ, πουτράβας λέσκε μο γκι αντράλ κατά προσευχή, σικλιαράβας-μαν κάθε ντιβές κατά Γραφή ντα σκεφτίναβας λατσσές οντουλά σο διαβάναβας». Καζόμ νακχέλας ο βακίτι, ο Μάικλ λιντάς πάλι πο προνόμια. Ακανά υπηρετίνελα σαρ πρεσβύτερος ντα τακτικός σκαπανέας. Βοβ βακερέλα: «Η στήριξη ντα η ζορ σο λιντόμ, ειδικά κατά πρεσβύτεροι, βοηθιντάς-μαν τι αγαβάβ ότι ο Ιεχωβά μανγκέλα-μαν. Μπορίναβα πάλι τι υπηρετίναβ κι κχανγκιρί με πάκι συνείδηση. Ανταβά σο νακχλόμ σικλιαρντάς-μαν ότι ο Ιεχωβά συγχωρίνελα σαρέ οντουλέν σο μετανιώνενα μπαγιά». Μπορίνασα τι αβάς σίγουροι ότι ο Ιεχωβά κα χρησιμοποιήνελ ντα κα ευλογίνελ εμ αμέν, ατζέ-ντα άμα κερντάμ λάθη. Πρέπει όμως τι κεράς σο νακχέλα αμαρέ βαστέσταρ για τι διορθώνας αμαρέ λάθη ντα τι συνεχίνας τι στηρίντιβας λέστε.​—Ψαλμ. 86:5· Παρ. 28:13.

19. Σαρ ντινάς-τουμέν ζορ ο παράδειγμας του Σαμψών;

¹⁹ Ανταλέ μαθημάστε, ντικχλάμ μερικά σουκάρ πράγματα κατά ζωή του Σαμψών. Να ισινέ τέλειος, αλλά να τσσιναντάς τι κερέλ προσπάθειες για τι υπηρετίνελ ι Ιεχωβάς ατζέ-ντα σοράν κατά λάθος σο κερντάς με τη Δαλιδά. Ντα ι Ιεχωβάσκε συνεχίνελας τι αβέλ σημαντικός, οτθάρ χρησιμοποιηντάς-λες πάλι εκχέ ξεχωριστέ τροπόσαρ. Ι Ιεχωβάσκε συνεχίνελας τι αβέλ τζενό σο τθερέλας μπαρί πίστη, ντα κανονιντάς τι γραφίντιβελ ο ναβ του Σαμψών κο κεφάλαιος 11 κατά Εβραίους, σο ισί ο ναβά γιαβερέ πιστέ τζενένγκε-ντα. Σο μπαρί ζορ λάσα σο τζανάσα ότι υπηρετίνασα εκχέ αζόμ μπουτ λατσσέ Νταντές σο ισί κο ουρανός, ντα μανγκέλα μπουτ τι ντελ-αμέν ζορ, ειδικά κάνα ισινάμ μπίζουρανε! Οτθάρ, σαρ ο Σαμψών, τι μολίνας ι Ιεχωβάς: «Τθερ-μαν τι γκοντιάτε, σε παρακαλώ, ντα ντε-μαν ζορ».​—Κριτ. 16:28.