1, 2. (α) Σο αβέλας-πες κι Ιουδαία κάνα ο απόστολος Παύλος μπουτσσαντάς κο Εβραίοι ο γράμμας σο γραφιντάς; (β) Σόσκε ισινέ αζόμ σημαντικός λένγκε αζομάν ανταβά γράμμας;

 Ο ΕΒΡΑΙΟΙ Χριστιανοί σο τζουβντιόνας κι Ιερουσαλήμ ντα κι Ιουδαία τθερένας μπαρέ προβλήματα για μπουτ μπρεσά σοράν κατά μεριπέ ι Ιησούσκο. Χάνικ σοράν αφού κερντιλί η Χριστιανική κχανγκιρί τθερένας μπαρό διωγμός. (Πράξ. 8:1) Σοραντάν, περίπου 20 μπρεσά πο σοράν, ο μαθητές ι Χριστόσκε νακχένας δύσκολα επειδή υπαρχίντιβελας μποκχ ντα τσοροριπέ. (Πράξ. 11:27-30) Όμως, περίπου κο 61 Σ.Κ.Χ. (Σοράν Κατά Χριστός), ο Χριστιανοί να τθερένας αζόμ μπουτ διωγμός σαρ κα τθερένας κο μπρεσά σο κα αβένας. Αζομάν λιντέ εκ γράμμας κατά Παύλος σο γραφιντάς-λες με τη βοήθεια ι άγιε πνευμάσκι ντα κα βοηθίνελας-λεν μπουτ.

² Ο γράμμας σο μπουτσσαντάς ο Παύλος κο Εβραίοι ισινέ μπουτ σημαντικός λένγκε αζομάν επειδή ατζεχάνικ κα τζάνας λέντζαρ πο μπαρί κόντρα. Ο Παύλος ντινάς-λεν συμβουλές σο κα βοηθίνενας-λεν τι νταϊντίνεν ι στενοχώρια σο κα τθερένας ατζεχάνικ. Η καταστροφή της Ιερουσαλήμ, σο βακερντάας ο Ιησούς ότι κα αβέλας, ισινέ μπουτ πασέ. (Λουκ. 21:20) Ισί μπαγιά ότι ούτε ο Παύλος ούτε ο Χριστιανοί κι Ιουδαία τζανένας κάνα ακριβώς κα αβέλας-πες. Όμως οντουλά Χριστιανοί μπορίνενας τι χρησιμοποιήνεν ο χρόνος σο ατσσόλας-λεν για τι ετοιμάντιβεν από πριν. Κα κερένας-λες ανταβά άμα κα μπαριαρένας πουμαρέ ιδιότητες σαρ ισί η πίστη ντα η υπομονή σο τθερένας.​—Εβρ. 10:25· 12:1, 2.

 3. Σόσκε πρέπει ο Χριστιανοί αντιβές τι ντεν μπαρί προσοχή κο γράμμας σο μπουτσσάντιλο κο Εβραίοι;

³ Ατζεχάνικ αμέν κα αντιμετωπίνας εκ στενοχώρια μπουτ  πο μπαρί οντουλάταρ σο τζουβντιλέ ο Εβραίοι Χριστιανοί. (Ματθ. 24:21· Αποκ. 16:14, 16) Οτθάρ ελάν τι ντικχάς κάποιες συμβουλές σο ντινάς ο Ιεχωβά οντουλέ Χριστιανόντε σο κα μπορίνεν τι βοηθίνεν εμ αμέν.

«ΤΙ ΜΑΡΑΣ-ΑΜΕΝ ΓΙΑ ΤΙ ΕΡΕΣΑΣ ΚΟ ΣΗΜΕΙΟΣ ΤΙ ΑΒΑΣ ΩΡΙΜΟΙ»

 4. Σο δυσκολίες τθερένας ο Ιουδαίοι σο αβιλέας Χριστιανοί; (Ντικχέν ι φωτογραφία-ντα)

⁴ Ο Ιουδαίοι σο αβιλέας Χριστιανοί κερντέας μπαρέ αλλαγές ντα ανταβά να ισινέ εύκολος. Για μπουτ μπρεσά η Ιερουσαλήμ ισινέ εκ μπουτ σημαντικός τθαν. Ο βασιλιάς σο τραμπίνελας ο Ιεχωβά κερέλας κουμάντος οντουτθάρ, ντα ο τζενέ σο μανγκένας τι ντεν λατρεία κο Ιεχωβά κερένας-λες ανταβά κατά ναός κι Ιερουσαλήμ. Σαρέ ο πιστοί Ιουδαίοι ντένας καν κο Μωσαϊκός Νόμος ντα κο κανόνες σο βακερένας λένγκε παπάζια αζομάν. Τθερένας κανόνες, σο βακερένας λένγκε σο τι χαν, τι κερέν περιτομή ντα σαρ τι συμπεριφερίντιβεν κο τζενέ σο ισινέ γιαβερέ τθεμένταρ. Αλλά μετά κατά μεριπέ ι Ιησούσκο ο Ιεχωβά να δεχτίνελας ο θυσίες σο αβένας-πες κο ναός. Οτθάρ να ισινέ εύκολος ι Ιουδαιόνγκε σο αβιλέας Χριστιανοί τι αλλάνεν ο τρόπος σο ντένας λατρεία. (Εβρ. 10:1, 4, 10) Ατζέ-ντα ώριμοι Χριστιανοί, σαρ ο απόστολος Πέτρος ισινέ λένγκε δύσκολος τι κερέν κάποιες αλλαγές ανταλένταρ. (Πράξ. 10:9-14· Γαλ. 2:11-14) Επίσης ιτιρί κατά νεβό τρόπος σο ντένας λατρεία ι Ντεβλές, ο παπάζια αζομάν τζάνας κόντρα οντουλέ Χριστιανόντζαρ.

 5. Καλέ πραγμάσταρ έπρεπε τι αρακχαβέν-πες ο Χριστιανοί;

⁵ Ο Χριστιανοί κι Ιουδαία τθερένας διωγμός από ντούι ομάδες. Κι εκ ομάδα ισινέ ο παπάζια αζομάν σο ντικχένας ι Χριστιανόν σαρ αποστάτες. Κι γιαβέρ ομάδα ισινέ μερικά τζενέ κι κχανγκιρί σο βακερένας ότι ισινέ Χριστιανοί αλλά συνεχίνενας τι ντεν καν κο Μωσαϊκός Νόμος. Μπορεί τι κερένας-λες ανταβά επειδή μανγκένας τι γλιτώνεν ο διωγμός. (Γαλ. 6:12) Σο κα βοηθίνελας ι πιστέ Χριστιανόν τι ατσσόν αφοσιωμέ κι αλήθεια;

 6. Σο βακερντάς ο Παύλος τι κερέν ο πφραλά ντα ο πφενιά; (Εβραίους 5:14–6:1)

 ⁶ Κο γράμμας σο μπουτσσαντάς κο Εβραίοι ο Παύλος βακερντάς πι πφραλένγκε ντα πι πφενίνγκε τι διαβάνεν μπουτ λατσσές ι Γραφή ντα τι σκεφτίνεν-λα προσεκτικά. (Διαβάνεν Εβραίους 5:14–6:1) Ο Παύλος χρησιμοποιηντάς εδάφια κατά Εβραϊκές Γραφές ντα εξηγιντάς σόσκε ο τρόπος σο ντένας λατρεία ο Χριστιανοί ι Ιεχωβάς ισινέ μπουτ πο λατσσό κατά τρόπος σο ντένας λατρεία ο Ιουδαίοι ι Ντεβλές. a Ο Παύλος βακερντάς κο Χριστιανοί τι μπαριαρέν πουμαρί γνώση ντα τι αγαβέν ατζέ πο λατσσές ι αλήθεια σο ισί κι Γραφή. Αν κα κερένας-λες ανταβά κα αγαβένας ο λάθος πράγματα σο σικλιαρένας ο γιαβερά ντα αντικάς μα κα δεχτίνενας-λεν.

 7. Καλά ισί μερικές δυσκολίες σο αντιμετωπίνασα αντιβές;

⁷ Σαρ ο Εβραίοι Χριστιανοί αντικάς αμέν-ντα αντιβές ασουνάσα πράγματα σο τζάνα κόντρα κο δίκαιοι κανόνες κι Ιεχωβάσκε. Μερικά τζενέ βακερένα ότι ο Μάρτυρες ι Ιεχωβάσκε ισί λάθος ντα μπουτ αυστηροί επειδή ντένα καν κο κανόνες σο τθερέλα η Γραφή για το σεξ. Καζόμ τζάλα, ο τρόπος σο σκεφτίνενα ο τζενέ νασέλα ατζέ πο ντουρ κατά τρόπος σο σκεφτίνελα ο Ιεχωβά. (Παρ. 17:15) Οτθάρ ισί σημαντικός τι αγαβάς ο λάθος τρόπος σκέψης ντα μα τι δεχτίνας-λες. Να κα μουκχάς καεκχέ τζενές τι κερέλ-αμέν τι χασαράς αμαρό θάρρος ντα τι σταματίνας τι υπηρετίνας ι Ιεχωβάς.—Εβρ. 13:9.

 8. Σαρ μπορίνασα τι μαράς-αμέν για τι ερεσάς κο σημείος τι αβάς ώριμοι;

⁸ Ο Παύλος βακερντάς κο Εβραίοι τι μαρέν-πες για τι ερεσέν κο σημείος τι αβέν ώριμοι ντα ανταβά πρέπει τι κεράς-λες αμέν-ντα. Σαρ μπορίνασα τι καταφερίνας-λες; Πρέπει τι διαβάνας μπουτ λατσσές ι Αγία Γραφή για τι σικλιάς πο λατσσές ι Ιεχωβάς ντα τι αγαβάς πο λατσσές ο τρόπος σο σκεφτίνελα. Ανταβά πρέπει τι συνεχίνας τι κεράς-λες σοράν κατά μπολντιπέ αμαρό-ντα. Καζόμ-ντα μπρεσά τι αβάς κι αλήθεια σαρέ πρέπει τι διαβάνας ντα τι σικλιαράς-αμέν κατά Λάφι ι Ντεβλέσκο. (Ψαλμ. 1:2) Χρειαζίντιβελα τι τθεράς εκ λατσσό πρόγραμμας για τι σικλιαράς-αμέν κατά Αγία Γραφή. Αν κα κεράς-λες ανταβά κα βοηθίνελ-αμέν τι μπαριαράς εκ ιδιότητα σο κερντάς λάκε λάφι ο Παύλος κο γράμμας σο μπουτσσαντάς κο Εβραίοι. Ανταγιά ιδιότητα ισί η πίστη.​—Εβρ. 11:1, 6.

“ΤΘΕΡΑΣΑ ΠΙΣΤΗ ΓΙΑ ΤΙ ΑΤΣΣΑΣ ΤΖΟΥΒΝΤΕ”

 9. Σόσκε ο Χριστιανοί χρειαζίντιβενας μπαρί πίστη;

⁹ Ο Εβραίοι Χριστιανοί κα χρειαζίντιβενας μπαρί πίστη για τι ατσσόν τζουβντέ κατά στεναχώρια σο κα αβέλας κι Ιουδαία. (Εβρ. 10:37-39) Ο Ιησούς βακερντάας πι μαθητέντε τι νασέν κο βεσά κάνα κα ντικχένας ι Ιερουσαλήμ τι αβέλ πφαντί ντονταλάι στρατόντζαρ. Ανταβά έπρεπε τι κερέν-λες σαρέ ο Χριστιανοί είτε τζουβντιόνας αντρέ κι πόλη ανταγιά είτε αβριάλ. (Λουκ. 21:20-24) Αζομάν κάνα εκ στρατός κερέλας επίθεση εκχέ λαόστε, κανονικά ο τζενέ τζάνας σε εκ πόλη σαρ κι Ιερουσαλήμ για τι αρακχαβέν-πες επειδή τθερέλας ντονταλάι ντουβάρια. Να ισινέ λογικός τι τζαλ κάποιος κο βεσά ντα για τι κερέλ-λες εκ τζενό κα χρειαζίντιβελας μπαρί πίστη.

10. Σαρ κα βοηθίνελας η ζουρανί πίστη ι Χριστιανόν; (Εβραίους 13:17)

¹⁰ Ο Εβραίοι Χριστιανοί κα χρειαζίντιβελας επίσης τι ντεν μπέσα οντουλέντε σο χρησιμοποιήνελας ο Ιησούς για τι οδηγίνελ ι κχανγκιρί. Οντουλά σο οδηγίνενας ι κχανγκιρί μάλλον ντινέ συγκεκριμέ οδηγίες για τι βοηθίνεν ι πφραλέν τι αγαβέν κάνα τι νασέν ντα σαρ τι κερέν-λες ανταβά. (Διαβάνεν Εβραίους 13:17) Ο απόστολος Παύλος βακερντάς πι πφραλένγκε  ντα πι πφενίνγκε “τι ασουνέν οντουλέν σο οδηγίνενας-λεν”. Ανταβά να μανγκέλα τι βακερέλ ότι έπρεπε τι ασουνέν ι πρεσβυτερόν με το ζόρι αλλά επειδή ντένας μπέσα κο πρεσβύτεροι. Άρα ο Εβραίοι Χριστιανοί χρειαζίντιβελας τι σικλιόν τι ντεν μπέσα οντουλέν σο οδηγίνενας ι κχανγκιρί πριν τι αβέλ η στεναχώρια. Αν ο Χριστιανοί κα ντένας καν κο πρεσβύτεροι κάνα ο πράγματα τζάνας λατσσές, κα αβέλας λένγκε πο εύκολος τι ντεν-λεν καν κάνα κα αβένας ο δυσκολίες.

11. Σόσκε ισί σημαντικός ο Χριστιανοί αντιβές τι τθερέν ζουρανί πίστη;

¹¹ Σαρ οντουλά σο λιντέ ο γράμμας ι Παυλόσκο, αμέν-ντα αντιβές χρειαζίντιβασα πίστη. Τζουβντιάσα ντιβεσέντε σο ο πο μπουτ τζενέ να πακιάνα ότι κα αβέλ ο τέλος ανταλέ ντουνιάσκο. Μπουτ λένταρ ατζέ-ντα πρασάνα-αμέν σο πακιάσα-λες αμέν ανταβά. (2 Πέτρ. 3:3, 4) Επίσης, παρόλο σο η Γραφή βακερέλα μπουτ κατά πράγματα σο κα αβέν κι μπαρί στεναχώρια, υπαρχίντιβενα μπουτ γιαβερά σο να τζανάσα-λεν. Χρειαζίντιβελα τι τθεράς ζουρανί πίστη ότι ο τέλος ανταλέ ντουνιάσκο κα αβέλ ακριβώς αζομάν σο πρέπει ντα ότι ο Ιεχωβά κα φροντίνελ-αμέν.—Αββακ. 2:3.

12. Σο κα βοηθίνελ-αμέν τι νακχάς τζουβντέ κατά μπαρί στεναχώρια;

¹² Επίσης πρέπει τι μπαριαράς αμαρί πίστη οντουλέστε σο χρησιμοποιήνελα ο Ιεχωβά αντιβές για τι οδηγίνελ-αμέν​—κο «πιστός ντα γκοντιαβέρ δούλος». (Ματθ. 24:45) Κάνα κα αρχίνελ η μπαρί στεναχώρια, μπορεί τι λας οδηγίες σο κα σώνεν αμαρί ζωή, σαρ μάλλον λιντέ ο Εβραίοι Χριστιανοί όταν αβιλέ ο Ρωμαίοι. Ακανά ισί ο καιρός για τι μπαριαράς αμαρί εμπιστοσύνη ντα αμαρί σιγουριά κο τρόπος σο οδηγίνενα-αμέν οντουλά σο τθερένα ευθύνες κι οργάνωση κι Ιεχωβάσκι. Να μπορίνασα τι μπεκλεντίνας ότι κα ακολουθίνας λένγκε οδηγίες με σιγουριά κι μπαρί στεναχώρια αν δυσκολίντιβασα τι ακολουθίνας-λεν ακανά.

13. Σόσκε ισινέ μπουτ λατσσί η συμβουλή κο εδάφιος Εβραίους 13:5;

¹³ Καζόμ μπεκλεντίνενας ο ντιβές σο κα νασέν, ο Εβραίοι Χριστιανοί χρειαζίντιβενας επίσης τι ατσσικιαρέν πουμαρί ζωή απλή ντα μα τι “μανγκέν μπουτ ο λοβέ”. (Διαβάνεν Εβραίους 13:5) Μερικοί λένταρ, ιτιρί οντουλένταρ σο νακχλέ, τζανένας σαρ ισινέ η μποκχ ντα ο τσοροριπέ. (Εβρ. 10:32-34) Παρόλο σο κάποτε νταϊντίνενας με υπομονή ο δυσκολίες χάρη ι λατσσέ αμπερίνγκε, μερικοί μπορεί τι αρχισάλε τι σκεφτίνεν σαρ τι νικαβέν πο μπουτ λοβέ για τι αρακχαβέν-πες κατά επίθεση ντα κατά τσοροριπέ. Αλλά καζόμ-ντα λοβέ τι τθερένας, να κα αρακχαβένας-λεν κατά καταστροφή σο κα αβέλας. (Ιακ. 5:3) Ισί αλήθεια ότι ο τζενέ σο μανγκένας μπουτ πουμαρέ πράγματα μάλλον κα δυσκολίντιβενας πο μπουτ τι νασέν ντα τι μουκχέν παλάλ πουμαρό κχερ ντα σαρέ οντουλά σο τθερένας.

14. Σαρ μπορίνελα η ζουρανί πίστη τι επηρεάνελ ο αποφάσεις σο λάσα ντα τθερένα τι κερέν ι πραγματέντζαρ σο τθεράσα;

¹⁴ Άμα τθεράσα ζουρανί πίστη ότι ο Ιεχωβά ατζεχάνικ κα καταστραφίνελ ανταλέ πφιρνέ ντουνιάς, ανταβά κα βοηθίνελ-αμέν μα τι σκεφτίνας ότι ο λοβέ ή αμαρέ πράγματα ισί ο πο σημαντικά αμένγκε. Κάνα κα αβέλ η μπαρί στεναχώρια, ο τζενέ «κα φουρτίνεν πουμαρό ασήμι κο ντρομά» επειδή κα αγαβέν ότι «ούτε λένγκο ασήμι ούτε λένγκο χρυσάφι κα μπορίνελ τι σώνελ-λεν κο ντιβές σο κα αβέλ η μπαρί χολί ι Ιεχωβάσκι». (Ιεζ. 7:19) Αντίς τι σκεφτίνας συνέχεια σαρ κα νικαβάς πο μπουτ λοβέ, χρειαζίντιβελα τι λας αποφάσεις σο κα βοηθίνεν-αμέν τι φροντίνας αμαρό νεαυτός ντα αμαρί φαμιλί αλλά εμ τι υπηρετίνας ι Ιεχωβάς. Να κα αβέλας γκοντιαβέρ τι χαλαβάς πο μπουτ λοβέ απ’ ό,τι τθεράσα ή τι ντας μπουτ αμαρέ σαατίσταρ για τι φροντίνας ο πράγματα σο τθεράσα. Επίσης κα προσοχίνας για μα τι τθεράς μπουτ αγάπη αμαρέ πραγματένγκε. (Ματθ. 6:19, 24)  Καζόμ μπεκλεντίνασα τι αβέλ ο τέλος ανταλέ ντουνιάσκο κα χρειαζίντιβελ τι τραμπίνας αν κα ντας μπέσα κο Ιεχωβά ή αμαρέ πραγματέντε.

«ΤΘΕΡΕΝΑ ΑΝΑΓΚΗ Ι ΥΠΟΜΟΝΗ»

15. Σόσκε ο Εβραίοι Χριστιανοί χρειαζίντιβενας μπαρί υπομονή;

¹⁵ Ο Χριστιανοί κι Ιουδαία χρειαζίντιβενας τι υπηρετίνεν με υπομονή ι Ιεχωβάς επειδή καζόμ τζάνας ο πράγματα κα αβένας χειρότερα. (Εβρ. 10:36) Παρόλο σο μερικοί Εβραίοι Χριστιανοί νακχλέας μπαρό διωγμός, μπουτ γιαβερά αβιλέας Χριστιανοί ντιβεσέντε σο να υπαρχίντιβελας διωγμός. Οτθάρ ο Παύλος βακερντάς λένγκε τι αβέν προετοιμασμέ για πο μπουτ διωγμός ντα τι αβέν έτοιμοι ατζέ-ντα τι μερέν για τι ατσσόν πιστοί, σαρ κερντάς ο Ιησούς. (Εβρ. 12:4) Μπουτ Ιουδαίοι χολιάνενας ντα τζάνας μπαρί κόντρα ι τζενέντζαρ σο αβένας Χριστιανοί. Χάνικ μπρεσά πο πριν κάνα ο Παύλος αβιλόας κι Ιερουσαλήμ για τι βακερέλ ο λατσσέ αμπέρια εκ ομάδα τζενένγκι κερντάς λέσκε επίθεση. Πο μπουτ από 40 Ιουδαίοι “χαλέ σοβέλ μα τι τσσουβέν πουμαρέ μόστε ούτε χαμπέ ούτε πανί μέχρι τι μουνταρέν ι Παυλός”. (Πράξ. 22:22· 23:12-14) Παρόλο σο ο τζενέ μισίνενας-λεν ντα τζάνας λέντζαρ κόντρα, ο Χριστιανοί έπρεπε τι συνεχίνεν τι γκιντίντιβεν γιεκ κο συναθροίσεις για τι ντεν λατρεία, τι βακερέν ο λατσσέ αμπέρια ντα τι ατσσικιαρέν ζουρανί πουμαρί πίστη.

16. Σαρ βοηθίνελα-αμέν ο γράμμας σο μπουτσσάντιλο κο Εβραίοι τι ντικχάς ο λατσσίματα σο αβένα κατά δοκιμασίες; (Εβραίους 12:7)

¹⁶ Σο κα βοηθίνελας ι Χριστιανόν σο ισινέ Εβραίοι τι νταϊντίνεν ο διωγμός σο τθερένας; Ο Παύλος μανγκέλας τι βοηθίνελ ι Χριστιανόν τι ντικχέν ο λατσσίματα σο τθερένας κάνα νταϊντίνενας ο δοκιμασίες. Οτθάρ εξηγιντάς λένγκε ότι κάνα εκ Χριστιανός νταϊντίνελα εκ δοκιμασία, ο Ντεβέλ μπορεί χρησιμοποιήνελ-λα για τι σικλιαρέλ-λες. (Διαβάνεν Εβραίους 12:7) Ανταγιά εκπαίδευση μπορίνελα τι βοηθίνελ εκχέ τζενές τι τθερέλ ή τι μπαριαρέλ ιδιότητες σο κερένα ο γκι ι Ιεχωβάσκο. Άμα οντουλά Εβραίοι Χριστιανοί κα τθερένας πουμαρί γκοντί κο λατσσέ αποτελέσματα σο αβένας  κατά δοκιμασίες, κα αβέλας λένγκε πο εύκολος τι κερέν υπομονή.​—Εβρ. 12:11.

17. Σαρ βακερντάς ο Παύλος, σαρ μπορίνελα κάποιος τι νταϊντίνελ ο διωγμός;

¹⁷ Ο Παύλος βακερντάς κο Εβραίοι Χριστιανοί τι τθερέν θάρρος ντα μα τι κερέν παλάλ κάνα τθερένας δοκιμασίες. Βοβ μπορίνελας τι γραφίνελ λένγκε κάτι ασακό. Πριν τι αβέλας Χριστιανός βοβ τζάλας κόντρα κο Χριστιανοί ντα ντικχλάας καζόμ δύσκολος ισινέ λένγκε ανταβά. Επίσης τζανέλας σαρ τι νταϊντίνελ ο διωγμός. Σαρ τζανάσα γκιλέ λέσαρ κόντρα μπουτέ τροπόντζαρ από αζομάν σο αβιλό Χριστιανός. (2 Κορ. 11:23-25) Άρα μπορίνελας τι κερέλ λάφι με σιγουριά ντα τι βακερέλ σο έπρεπε τι κερέλ κάποιος για τι νταϊντίνελ. Αντάς κι γκοντί οντουλέ Χριστιανόνγκι ότι κάνα τθερένας δυσκολίες δεν έπρεπε τι στηρίντιβεν πουμαρέ νεαυτόστε, αλλά κο Ιεχωβά. Ο Παύλος μπορίνελας τι βακερέλ με θάρρος: «Ο Ιεχωβά ισί μο βοηθός· να κα νταράβ».​—Εβρ. 13:6.

18. Καγιά σιγουριά σο τθεράσα για το μέλλον κα βοηθίνελ-αμέν τι νταϊντίνας ο διωγμός;

¹⁸ Μερικά πφραλά τθερένα διωγμός ακανά. Εκ τρόπος σο μπορίνασα τι σικαβάς λένγκε αγάπη ισί κάνα προσευχίντιβασα λένγκε ντα μερικές φορές μπορίνασα τι βοηθίνας-λεν κάνα ντάσα-λεν οντουλά σο χρειαζίντιβενα. (Εβρ. 10:33) Όμως, η Γραφή βακερέλα ξεκάθαρα ότι «κα τζαν κόντρα σαρέ οντουλέ τζενέντζαρ-ντα σο μανγκένα τι αβέν αφοσιωμέ κο Ντεβέλ ντα τζουβντιόνα σαρ μανγκέλα ο Χριστός Ιησούς». (2 Τιμ. 3:12) Άρα, σαρέ χρειαζίντιβελα τι προετοιμάντιβας ανταλέ πραγματένγκε σο κα αβέν ατζεχάνικ. Τι συνεχίνας τι ντας σαρί αμαρί μπέσα κο Ιεχωβά ντα τι αβάς σίγουροι ότι βοβ κα βοηθίνελ-αμέν τι νταϊντίνας καγιά-ντα δοκιμασία μπορεί τι τθεράς. Κο σωστός καιρός κα ανέλ λοκχιπέ σαρέ πι πιστέ υπηρετόντε.​—2 Θεσ. 1:7, 8.

19. Καλά πράγματα κα βοηθίνεν-αμέν τι προετοιμάντιβας για τη μπαρί στεναχώρια; (Ντικχέν ι φωτογραφία-ντα)

¹⁹ Σίγουρα ο γράμμας σο μπουτσσαντάς ο Παύλος κο Εβραίοι βοηθιντάς ι πρώτε Χριστιανόν τι προετοιμάντιβεν για τη στεναχώρια σο κα αβέλας-πες. Ο Παύλος βακερντάς πι πφραλένγκε τι διαβάνεν προσεκτικά ο Λάφι ι Ντεβλέσκο ντα τι αγαβέν-λες πο λατσσές. Αν κα κερένας-λες ανταβά, κα βοηθίντιβενας τι αγαβέν ντα μα τι δεχτίνεν ο λάφια σο κα μπορίνενας τι κερέν ζιάνι κι πίστη λένγκι. Βακερντάς λένγκε τι κερέν πο ζουρανί πουμαρί πίστη ντα αντικάς τι ακολουθίνεν αμέσως ο οδηγίες σο ντέλας ο Ιησούς ντα ο τζενέ σο οδηγίνενας ι κχανγκιρί. Βοηθιντάς επίσης ι Χριστιανόν τι μπαριαρέν πουμαρί υπομονή ντα τι ντικχέν ο λατσσίματα σο αβένα αντράλ κατά δοκιμασίες. Έπρεπε τι ντικχέν ανταλά δοκιμασίες σαρ ευκαιρία για τι σικλιαρέλ-λεν λένγκο λατσσό Ντατ. Μακάρι τι κεράς αμέν-ντα ανταλά συμβουλές σο αβένα κατά Ντεβέλ. Αντικάς κα μπορίνας τι νταϊντίνας πιστά μέχρι κο τέλος.​—Εβρ. 3:14.