Μπιάντιλομ κο 1934. Μο ντατ ντα μι ντάι αβιλέ κατά Ελβετία κο Τίμινς, σε εκ πόλη κο Οντάριο κο Καναδάς σο ο τζενέ οτθέ ισινέ ανθρακωρύχοι. Πασέ κο 1939, μι ντάι αρχισάλι τι διαβάνελ ι Σκοπιά ντα τι τζαλ κο συναθροίσεις σο κερένας ο Μάρτυρες ι Ιεχωβάσκε. Λέλας πέσαρ μαν ντα μι σιοβέ πφραλέν. Μπουτ σουγκό αβιλί Μάρτυρας ι Ιεχωβάσκι.

Μο ντατ να χαιρισάλο ιτς ανταλέσαρ, αλλά μι ντάι μανγκέλας ι αλήθεια ντα ισινέ αποφασισμέ τι ατσσόλ σταθερή. Ντα ατσσιλί σταθερή ατζέ-ντα κάνα η κυβέρνηση κο Καναδάς τσσιναντάς ο έργος ι Ιεχωβάσκε Μαρτυρένγκο πασέ κο 1940. Μι ντάι πάντα σικαβέλας μι νταντέσκε λατσσιπέ ντα σεβασμός, παρόλο σο βοβ κερέλας λάκε λάφι μπουτ μπέτι. Ο λατσσό παράδειγμας λάκο βοηθιντάς μαν ντα μι πφραλέν τι δεχτίνας ι αλήθεια. Σιγά σιγά, μο ντατ κοβλιλό ντα συμπεριφερίντιβελας αμένγκε πο λατσσές.

Κο 1950 κο νιλάι, γκιλόμ κι Συνέλευση «Αύξηση της Θεοκρατίας» κι Νέα Υόρκη. Οτθέ ντικχλόμ πφραλέν ντα πφενίν σαρό κατά ντουνιάς ντα ασουντόμ μπουτ σουκάρ εμπειρίες πφραλένταρ σο νακχλέ ι Σχολή Γαλαάδ! Ανταβά τσσιντιντάς-μαν τι κεράβ πο μπουτ κο έργος ντα μανγκλόμ ατζέ πο μπουτ τι αρχίναβ ι ολοχρόνια υπηρεσία. Κάνα βουρτισάλομ κχερέ, κερντόμ αίτηση για τακτικός σκαπανικός. Ο Μπέθελ σο ισινέ κο Καναδάς μπουτσσαντάς μάνγκε εκ επιστολή σο βακερέλας μάνγκε ότι έπρεπε πρώτα τι μπολντιάβ. Ντα αντικάς, μπολντιλόμ 1η Οκτωβρίου 1950. Εκ μάσεκ πο σοράν αρχισάλομ ο τακτικός σκαπανικός. Μο πρώτος διορισμός ισινέ κι χουρντί πόλη Καπουσκάσινγκ, σο ισινέ μπουτ ντουρ οτθάρ σο μπεσάβας.

Κο 1951 κι άνοιξη, ο Μπέθελ μανγκλάς κατά πφραλά σο κερένας λάφι γαλλικά τι σκεφτίνεν  άμα κα μπορίνενας τι τζαν τι μπεσέν κο Κεμπέκ, σο οτθέ ο τζενέ κερένας λάφι γαλλικά. Ισινέ μπαρί ανάγκη οτθέ. Με χουρντιαρέλα κεράβας λάφι εμ γαλλικά εμ αγγλικά, οτθάρ μανγκλόμ τι τζαβ ντα μπουτσσαντέ-μαν κι Ρουάν. Να τζανάβας καεκχές οτθέ. Ντινέας-μαν σάντε εκ διεύθυνση, σαρ βακερντόμ πο οπρέ. Τελικά σαρέ γκιλέ λατσσές. Ο Μαρσέλ ντα με αβιλάμ λατσσέ αμαλά ντα μπεϊντιντόμ ι υπηρεσία κο Κεμπέκ ο επόμενα σταρ μπρεσά, ντα σοράν αβιλόμ ειδικός σκαπανέας.

Ισινόμας ατζέ κο Κεμπέκ κάνα λιντόμ ι πρόσκληση τι νακχάβ ι τάξη 26 κι Σχολή Γαλαάδ κο Σάουθ Λάνσινγκ κι Νέα Υόρκη. Η σχολή μπιτισάλι 12 Φεβρουαρίου 1956 ντα διορισάλομ κι Γκάνα, b σο ισί κι Δυτική Αφρική. Αλλά πριν τι τζαβ οτθέ έπρεπε τι βουρτίναβ κο Καναδάς για «χάνικ εβδομάδες» μέχρι τι λατσσαράβ ο χαρτιά σο χρειαζίντιβενας.

Τελικά, αντί για χάνικ εβδομάδες, μπεσλόμ εφτά μασεκά κο Τορόντο οντουλέ χαρτίνγκε. Οντουβά βακίτι, φιλοξενιντάς-μαν η φαμιλί Κριπς, ντα γνωριντόμ λένγκε τσσαγιά, ι Σιλά. Μανγκλάμ ο εκ ι γιαβερές, ντα οτθέ σο ισινόμας έτοιμος τι κεράβ λάκε πρόταση γάμου, νικίστιλε μο χαρτιά. Η Σίλα ντα με κερντάμ προσευχή ντα λιντάμ ι απόφαση τι τζαβ μι διορισμόστε. Αλλά κα γραφίναας γράμματα ο εκ κο γιαβέρ για τι ντικχάς άμα ντα κάνα κα μπορίναας τι παντρίνας κο μέλλον. Να ισινέ εύκολη απόφαση, αλλά σοράν σικάντιλο ότι ισινέ σωστή.

Αφού κερντόμ ταξίδι για εκ μάσεκ με τρένο, καράβι ντα αεροπλάνο, ερεσλόμ επιτέλους κι Άκρα, σο ισί κι Γκάνα. Οτθέ αβιλόμ επίσκοπος περιφερείας. Έπρεπε τι κεράβ ταξίδια σαρί κι Γκάνα, κι Ακτή Ελεφαντοστού σο ισινέ οτθέ πασέ ντα κι Τογκολάνδη (αντιβές βακέρντιβελα Τόγκο). Ο πο μπουτ καιρός, κεράβας ταξίδια κορκορό με εκ τζιπ σο ντινάς-μαν ο Μπέθελ. Μπεϊντίναβας μπουτ ανταβά διορισμός!

 Κο σαββατοκύριακα, υπηρετίναβας κο συνελεύσεις περιοχής. Να τθεράας αίθουσες για συνελεύσεις. Ανταλέσκε, ο πφραλά λατσσαρένας σκεπές από καλάμια ντα ιτσσαρένας-λεν με κλαδιά κατά φοίνικες για τι αρακχάντιβας κατά κχαμ σο πφαμπαρέλας. Επειδή να ισινέ ψυγεία, ο πφραλά τθερένας οτθέ τζουβντέ ζώα ντα τσσινένας-λεν για τι χαν οντουλά σο αβιλέας κι συνέλευση.

Κο συνελεύσεις οντουλά, αβένας μερικά πράγματα σο κερένας-αμέν τι ασάς. Εκ φαρ σο εκ γιαβέρ ιεραπόστολος, ο Χερμπ Τζένινγκς, c κερέλας εκ ομιλία, εκ μοσχάρι νασλό οτθάρ σο ισινέ πφαντό ντα αρχισάλο τι τθάβντελ αντρέ κο τζενέ. Ο Χερμπ τσσιναντάς τι κερέλ λάφι ντα ο ζώος να τζανέλας σο τι κερέλ. Αλλά σταρ ζουρανέ πφραλά μπορισάλε τι ασταρέν-λες ντα τι πφάντεν-λες, καζόμ ο τζενέ μαρένας παλαμάκια.

Αντρέ κι εβδομάδα πριν ντα σοράν κατά συνελεύσεις, σικαβάβας κο γκαβά σο ισινέ ντονταλάι αμαρό σιναμάς Η Κοινωνία του Νέου Κόσμου εν Δράσει. Για τι σικαβάβ-λες, ιμπλαβάβας εκ παρνό σεντόνι σε ντούι καστά ή ντούι δέντρα. Ο τζενέ χαιρίνενας μπουτ! Ο πο μπουτ να τθερένας ντικχλό ποτές σιναμάς. Κάνα ντικχένας κο σιναμάς τζενέν τι μπολντιόν, κερένας μπουτ παλαμάκια. Οντουλά σο ντικχένας οντουβά σιναμάς αγαβένας ότι μπαγιά ισινάμ εκ ενωμέ οργάνωση σαρί κι πφουβ.

Αφού νακχλέ πασέ ντούι μπρεσά σο ισινόμας κι Αφρική, τθεράβας ι σουκάρ ευκαιρία τι τζαβ κι διεθνή συνέλευση σο αβιλί-πες κο 1958 κι Νέα Υόρκη. Ισινόμας μπουτ χαρούμενος σο ντικχάβας πάλι ι Σιλά. Βόι αβιλίας κατά Κεμπέκ, σο οτθέ υπηρετίνελας σαρ ειδική σκαπάνισσα. Σαρό ανταβά βακίτι γραφίναας γράμματα ο εκ κο γιαβέρ, αλλά ακανά σο ισινάμας πάλι γιεκ, βακερντόμ λάκε άμα μανγκέλα τι παντρίνας, ντα βόι μανγκλάς. Μπουτσσαντόμ εκ γράμμας κο πφραλ Νορ d ντα πουτσλόμ-λες άμα κα μπορίνελας η Σίλα τι νακχέλ ι Γαλαάδ ντα τι αβέλ μάντζαρ κι Αφρική. Βοβ βακερντάς βα, ντα τελικά η Σίλα αβιλί κι Γκάνα. Παντρισάλαμ κι Άκρα, 3 Οκτωβρίου 1959. Αγαντάμ ότι ο Ιεχωβά ευλογιντάς-αμέν επειδή τσσουντάμ-λες κι πρώτη θέση αμαρέ ζωγιάτε.

Κο 1961, λιντάμ διορισμός τι τζας κο Καμερούν. Μανγκλέ μάνταρ τι βοηθίναβ τι αβέλ εκ  νεβό Μπέθελ, οτθάρ τθεράβας μπουτ μπουτί τι κεράβ. Ντα σαρ νεβό υπηρέτης τμήματος, τθεράβας μπουτ τι σικλιάβ. Κο 1965, σικλιλάμ ότι η Σίλα ισινέ κχαμνί. Για τι βακεράβ ι αλήθεια, ισινέ δύσκολος αμένγκε τι πακιάς ότι κα αβάας ντατ ντα ντάι. Αλλά οτθέ σο αρχισάλαμ τι κανονίνας σαρ κα βουρτίναας κο Καναδάς ντα ισινάμας μπουτ χαρούμενοι, αβιλό κάτι μπουτ μπέτι.

Η Σίλα χασαρντάς ι μαξιμίς. Ο γιατρός βακερντάς αμένγκε ότι αμαρό μαξίμι ισινέ μουρς. Ανταβά αβιλό-πες πριν 50 ντα πο μπουτ μπρεσά, αλλά αμέν ποτές να μπισταρντάμ-λες. Αν-ντα ισινέ πφανγκό αμαρό γκι, ατσσιλάμ αμαρέ διορισμόστε κι Αφρική επειδή μανγκάας-λες μπουτ.

Κο Καμερούν, τζάνας μπαρί κόντρα κο πφραλά επειδή ατσσόνας ουδέτεροι κο πολιτικά. Ο πράγματα ισινέ πο δύσκολα κάνα αβένας ο εκλογές. Κάτι σο νταράας ότι κα αβέλ, αβιλό κο 13 Μαΐου 1970. Τσσινάντιλο επίσημα ο έργος ι Ιεχωβάσκε Μαρτυρένγκο. Η κυβέρνηση λιντάς αμαρέ μπουτ σουκάρ ντα νεβέ κτίρια του Μπέθελ, σο γκιλάμας τι μπεσάς οτθέ πριν από παντς μασεκά. Αντρέ σε εκ εβδομάδα νασκιαρντέ κατά τθεμ σαρέ ι ιεραποστολόν​—εμ μαν ντα ι Σιλά. Να ισινέ εύκολος αμένγκε τι μουκχάς αμαρέ πφραλέν ντα πφενίν. Μανγκάας-λεν μπουτ ντα ανησυχίναας σαρ κα ντένας-λεν πέρα κο ντιβεσά σο κα αβένας.

Ο γιαβερά σιοβ μασεκά νακχλάμ-λεν κο Μπέθελ κι Γαλλία. Οτθέ συνεχίναβας τι κεράβ ο πο λατσσό σο μπορίναβας ι πφραλένγκε κο Καμερούν. Κο Δεκέμβριος κο 1970, διορισάλαμ κο Μπέθελ σο ισινέ κι Νιγηρία, σο βοηθίνελας τι αβέλ-πες ο έργος κο Καμερούν. Ο πφραλά ντα ο πφενιά κι Νιγηρία δεχτιντέ-αμέν χαράσαρ, ντα αμέν μπεϊντιντάμ αμαρό έργος οτθέ για μερικά μπρεσά.

Κο 1973, έπρεπε τι λας εκ μπουτ δύσκολη απόφαση. Η Σίλα τθερέλας μπαρέ προβλήματα υγείας. Καζόμ ισινάμας κι Νέα Υόρκη για εκ συνέλευση, χασαρντάς σαρί πι ζορ ντα βακερντάς μάνγκε: «Να νταϊντίναβα γιαβέρ! Συνέχεια ισινόμ κχινί ντα νασφαλί». Υπηρετιντάς γιεκ μάντζαρ κι Δυτική Αφρική πο μπουτ από 14 μπρεσά. Ισινόμας μπουτ περήφανος οντουλένγκε σο κερντάας κο έργος, αλλά έπρεπε τι κεράς μερικές αλλαγές. Αφού κερντάμ λάφι ντα μπουτ ζουρανέ προσευχές, λιντάμ ι απόφαση τι βουρτίνας κο Καναδάς, για τι αρακχαβάς πο λατσσές ι υγεία λάκι. Τι μουκχάς αμαρό ιεραποστολικός διορισμός ντα ι ολοχρόνια υπηρεσία ισινέ σίγουρα η πο δύσκολη απόφαση σο έπρεπε τι λας ποτές.

Κάνα γκιλάμ κο Καναδάς, ασταρντόμ μπουτί εκχέ αμαλέστε, σο μπικινέλας αυτοκίνητα σε εκ χουρντί πόλη πασέ κο Τορόντο. Νοικιαντάμ εκ κχερ, κιντάμ μεταχειρισμέ πράγματα ι κχερέσκε ντα αντικάς κερντάμ εκ νεβί αρχή οτθέ χωρίς τι χρωστάνας. Μανγκάας τι τθεράς εκ απλή ζωή, για τι μπορίνας εκ ντιβές τι αρχίνας πάλι ι ολοχρόνια υπηρεσία άμα κα αβέλας-πες. Σαστισάλαμ κάνα ντικχλάμ ότι ανταβά αβιλό-πες πο τζανγκλέ από αζομάν σο μπεσάας.

Κάθε Σάββατος αρχισάλομ τι τζαβ σαρ εθελοντής κι νεβί Αίθουσα Συνελεύσεων σο χτίντιβελας κο Νόρβαλ σο ισινέ κο Οντάριο. Πο σοράν,  μανγκλέ μάνταρ τι υπηρετίναβ σαρ επίσκοπος κι Αίθουσα Συνελεύσεων. Η Σίλα αβιλίας πο λατσσές, ντα ντικχλάμ ότι κα μπορίνελας τι κερέλ ανταβά νεβό διορισμός. Οτθάρ, γκιλάμ τι μπεσάς κο διαμέρισμας σο ισινέ κι Αίθουσα Συνελεύσεων κο Ιούνιος κο μπρες 1974. Ισινάμας πφερντέ χαρά σο αρχίναας πάλι ι ολοχρόνια υπηρεσία!

Τθεράας μπαρί χαρά σο καζόμ τζάλας η Σίλα αβέλας ατζέ πο λατσσές. Ντούι μπρεσά πο σοράν, μπορισάλαμ τι δεχτίνας εκ διορισμός κο έργος περιοχής. Η περιοχή ισινέ κι Μανιτόμπα, εκ τθαν κο Καναδάς σο κερέλας μπουτ σιλ. Όμως, νακχάας μπουτ λατσσές ι πφραλέντζαρ οτθέ. Σικλιλάμ ότι να τθερέλα σημασία κατέ υπηρετίνασα​—ο σημαντικός ισί τι συνεχίνας τι υπηρετίνας ι Ιεχωβάς κατέ-ντα τι αβάς.

Κο 1978, σοράν μερικέ μπρεσένταρ κο έργος περιοχής, καλιντέ-αμέν τι υπηρετίνας κο Μπέθελ σο ισινέ κο Καναδάς. Σοράν από χάνικ, λιντόμ εκ δύσκολος αλλά σημαντικός σικλιαριπέ. Διορισάλομ τι κεράβ εκ ομιλία σο ατσσικιαρέλας μιάμιση ώρα κο γαλλικά σε εκ ειδική συνάθροιση κο Μόντρεαλ. Δυστυχώς, μι ομιλία να ταρτίνελας ι προσοχή ι πφραλένγκι σο ισινέ οτθέ, ντα εκ πφραλ κατά Τμήμας Υπηρεσίας ντινάς-μαν συμβουλή. Για τι βακεράβ ι αλήθεια, έπρεπε τι τζανάβ από αζομάν ανταβά σο τζανάβα ακανά, ότι να ισινόμ ο πο λατσσό ομιλητής. Όμως, να μπεϊντιντόμ ι συμβουλή σο λιντόμ. Αμαρί συζήτηση να γκιλί λατσσές. Νιωσάλομ ότι ο πφραλ κριντάς-μαν σκληρά ντα να ισαρντάς-μαν. Κερντόμ ο λάθος τι ντικχάβ ο τρόπος σο ντιντιλί η συμβουλή ντα σαρ νιωσάλομ ι τζενέσκε σο ντινάς-λα.

Χάνικ ντιβεσά πο σοράν, εκ πφραλ κατά Επιτροπή του Τμήματος κερντάς μάνγκε λάφι οντουλέσκε σο αβιλόας-πες. Βακερντόμ ότι να δεχτιντόμας ι συμβουλή λατσσιμάσαρ ντα μανγκλόμ συγνώμη. Σοράν κερντόμ λάφι ι πφραλέσαρ σο ντινάας-μαν ι συμβουλή ντα μανγκλόμ λέσταρ συγνώμη, ντα βοβ λατσσιμάσαρ συγχωριντάς-μαν. Ανταβά σο αβιλό-πες σικλιαρντάς-μαν καζόμ σημαντικός ισί τι αβάβ ταπεινός ντα να κα μπιστράβ-λες ποτές. (Παρ. 16:​18) Τθεράβα κερντό μπουτ προσευχές κο Ιεχωβά ανταλέσκε ντα ισινόμ αποφασισμέ τι δεχτίναβ λατσσιμάσαρ σο-ντα συμβουλή ντιντιόλα-μαν.

Ισινόμ κο Μπέθελ σο ισί κο Καναδάς πο μπουτ από 40 μπρεσά, ντα κατά 1985, τθεράβα ο προνόμιος τι υπηρετίναβ κι Επιτροπή του Τμήματος. Κο Φεβρουάριος κο 2021, μι αγαπημέ ρομνί, η Σίλα μουλί. Σικλιντίναβα λάκε μπουτ ντα τθεράβα μπερεκέτι προβλήματα υγείας. Αλλά τθεράβα αζόμ μπουτ τι κεράβ κι υπηρεσία κι Ιεχωβάσκι σο ισινόμ ευτυχισμέ ντα “να αγαβάβα σαρ νακχένα ο ντιβεσά”. (Εκκλ. 5:​20) Αν-ντα μι ζωγιάτε τθεράβας δυσκολίες, ο πράγματα σο ντένας-μαν χαρά ισινέ πο μπουτ. Τθεράβα ντικχλό μπουτ ευλογίες επειδή τσσουβάβας ι Ιεχωβάς κι πρώτη θέση μι ζωγιάτε ντα επειδή νακχαντόμ 70 μπρεσά κι ολοχρόνια υπηρεσία. Προσευχίντιβαβα αμαρέ τερνέ πφραλά ντα πφενιά τι συνεχίνεν βον-ντα τι τσσουβέν ι Ιεχωβάς κι πρώτη θέση, σόσκε ισινόμ σίγουρος ότι βον-ντα κα τθερέν εκ σουκάρ ζωή πφερντί ευλογίες σο αβέλα-πες τι τθεράς-λα σάντε κάνα υπηρετίνασα ι Ιεχωβάς.