1, 2. Σο κερέλα ι Ντεβλέσκε υπηρετόν ευτυχισμέ; (Ιακώβου 1:22-25)

 Ο ΙΕΧΩΒΑ ντα λέσκο αγαπημέ Τσσαβό μανγκένα τι αβάς ευτυχισμέ. Ο τζενό σο γραφιντάς ο εδάφιος Ψαλμός 119:2 βακερέλα: «Ευτυχισμέ ισί οντουλά σο κερένα λέσκε λάφια, οντουλά σο ρόντενα λέσκε σαρέ πουμαρέ γκίσαρ». Ο Ιησούς βακερντάς-λες ανταβά ι λαφίντζαρ: «Ευτυχισμέ ισί οντουλά σο ασουνένα ο λάφι ι Ντεβλέσκο ντα κερένα-λες!»—Λουκ. 11:28.

² Ο λαός ι Ιεχωβάσκο ισί ευτυχισμέ. Σόσκε; Υπαρχίντιβενα μπουτ λόγοι, ντα σίγουρα εκ λόγος ισί ότι διαβάνασα κάθε ντιβές ο Λάφι ι Ντεβλέσκο ντα προσπαθίνασα τι κεράς σο-ντα σικλιάσα.—Διαβάνεν Ιακώβου 1:22-25.

 3. Σαρ βοηθίντιβασα κάνα κεράσα οντουλά σο βακερέλα κο Λάφι κι Ντεβλέσκο;

³ Υπαρχίντιβενα μπουτ τρόποι σο κα βοηθίνεν-αμέν κάνα “κεράσα ο λάφια ι Ντεβλέσκε”. Τζανάσα ότι ανταβά ισί εκ σημαντικός βήμας για τι κεράς ι Ιεχωβάσκο γκι. Κάνα κεράσα-λες ανταβά νιωθίνασα ευτυχισμέ. (Εκκλ. 12:13) Καζόμ κεράσα οντουλά σο διαβάνασα κατά Λάφι ι Ντεβλέσκο, ισινάμ πο λατσσές αμαρέ φαμιλιάσαρ ντα κεράσα πο ζουρανέ φιλίες αμαρέ πφραλέντζαρ. Μπέκιμ τουμέν-ντα νιωθίνενα-λες ανταβά. Επίσης να τθεράσα ο προβλήματα σο τθερένα οντουλά σο να ντένα καν κο Ιεχωβά. Σίγουρα πακιάσα αμέν-ντα οντουβά σο βακερντάς ο βασιλιάς Δαβίδ. Αφού βακερντάς εκ γκιλί για το νόμος, ντα οντουλένγκε σο μανγκέλα ο Ιεχωβά κατά τζενέ ντα για το αποφάσεις ι Ιεχωβάσκε πφαντάς-λα ακαλέ λαφίντζαρ: «Κον κερέλα-λεν κα τθερέλ μπαρέ ευλογίες».—Ψαλμ. 19:7-11.

 4. Σόσκε νανέ πάντα εύκολος τι κεράς ο λάφια ι Ντεβλέσκε;

⁴ Για τι βακεράς όμως ι αλήθεια, νανέ πάντα εύκολος τι κεράς ο λάφια ι Ντεβλέσκε. Τθεράσα μπουτ πράγματα τι κεράς. Οτθάρ, πρέπει τι ξεχωρίνας χρόνος για τι διαβάνας ντα τι σικλιαράς-αμέν κατά Γραφή ντα αντικάς τι αγαβάς σο μανγκέλα ο Ιεχωβά τι κεράς. Ελάν τι ντικχάς λοιπόν μερικά πράγματα σο κα βοηθίνεν-αμέν τι διαβάνας ι Γραφή κάθε ντιβές.  Επίσης κα ντικχάς σο κα βοηθίνελ-αμέν τι σκεφτίνας οντουλά σο διαβάνασα ντα κα αρακχάς τρόπους για τι κεράς οντουλά σο σικλιάσα.

ΤΙ ΞΕΧΩΡΙΝΕΝ ΧΡΟΝΟΣ ΓΙΑ ΤΙ ΔΙΑΒΑΝΕΝ Ο ΛΑΦΙ Ι ΝΤΕΒΛΕΣΚΟ

 5. Καλά πράγματα λένα αμαρό σαάτι;

⁵ Αμέν ο υπηρέτες ι Ιεχωβάσκε, τθεράσα μπουτ πράγματα τι κεράς. Τθεράσα μπουτ πράγματα σο ισί μπουτ σημαντικά αμένγκε. Για παράδειγμας, ο πο μπουτ αμένταρ χρειαζίντιβελα τι κεράς μπουτί για τι ντας ο αναγκαία αμαρέ τζενέντε ντα τι φροντίνας αμαρό νεαυτός. (1 Τιμ. 5:8) Μπουτ αμένταρ αρακχαβάσα αμαρέ τζενέν σο ισί νασφαλέ ή πφουρέ. Ντα σαρέ αμέν χρειαζίντιβελα τι αρακχαβάς αμαρί υγεία ντα ισί κάτι σο χρειαζίντιβελα χρόνος. Εκτός ανταλένταρ, τθεράσα επίσης μπουτ σημαντικά πράγματα τι κεράς αμαρέ κχανγκιριάτε. Εκ μπουτ σημαντική ευθύνη ισί τι κεράς ο έργος αντράλ αμαρέ γκίσταρ. Παρόλο σο τθερένα αζόμ ευθύνες, σαρ μπορίνενα τι αρακχέν χρόνος για τι διαβάνεν ι Γραφή κάθε ντιβές, τι σκεφτίνεν λατσσές οντουλά σο διαβάνενα ντα τι κερέν-λεν τουμαρέ ζωγιάτε;

 6. Σαρ μπορίνενα τι αβέν σίγουροι ότι κα διαβάνεν ι Αγία Γραφή; (Ντικχέν ι φωτογραφία-ντα)

⁶ Κάνα διαβάνασα ι Αγία Γραφή ανταβά ισί εκ κατά «πο σημαντικά πράγματα» σο κεράσα αμέν ο Χριστιανοί. Άρα ισί σημαντικός τι τσσουβάς-λες πρώτα αμαρέ ζωγιάτε. (Φιλιπ. 1:10) Ο πρώτος Ψαλμός βακερέλα ι ευτυχισμέ τζενέσκε: «Αρακχέλα χαρά κο νόμος κι Ιεχωβάσκο ντα Λέσκο νόμος διαβάνελα ντα ανέλα πι γκοντιάτε ντισάρα ντα ιράτ». (Ψαλμ. 1:1, 2) Άρα ντικχίντιβελα μπουτ λατσσές ότι πρέπει τι ξεχωρίνας χρόνος για τι διαβάνας ι Γραφή. Καβά ισί ο πο λατσσό σαάτι; Ι κάθε τζενέσκε ισί διαφορετικός. Αλλά για τι βακεράς-λες απλέ λαφίντζαρ, ο πο λατσσό σαάτι ισί ανταβά σο κα μουκχέλ-τουμέν τι κερέν-λες ανταβά κάθε ντιβές. Εκ πφραλ, ο Βίκτορ, βακερέλα: «Μπεϊντίναβα τι διαβάναβ ι Γραφή πρωί. Ατζέ-ντα άμα να μπεϊντίναβα τι ιστιάβ νωρίς το πρωί, ανταβά σαάτι να υπαρχίντιβενα μπουτ πράγματα για τι λεν μι  προσοχή. Τθεράβα καθαρή γκοντί ντα ισινόμ πο συγκεντρωμέ». Μήπως ανταβά κα αβέλας πο λατσσό τουμένγκε-ντα; Πουτσέν τουμαρό νεαυτός: “Καβά ισί ο πο λατσσό σαάτι μάνγκε για τι διαβάναβ ι Γραφή;”

ΤΙ ΣΚΕΦΤΙΝΕΝ ΟΝΤΟΥΛΑ ΣΟ ΔΙΑΒΑΝΕΝΑ

7, 8. Σο κα μπορίνελας τι κερέλ-αμέν μα τι βοηθίντιβας ντιπ οντουλένταρ σο διαβάνασα; Βακερέν εκ παράδειγμας.

⁷ Η αλήθεια όμως ισί ότι μπάζιμα μπορεί τι διαβάνας μπουτ πράγματα χωρίς όμως τι αγαβάς-λεν πραγματικά. Αβιλό-πες τουμένγκε ποτές τι διαβάνεν κάτι ντα σοράν από χάνικ τι μπιστρέν σο διαβαντέν; Σαριλένγκε αβιλό-πες. Δυστυχώς ανταβά μπορεί τι αβέλ-πες κάνα διαβάνασα ι Γραφή-ντα. Μπέκιμ τσσουντάμ στόχος τι διαβάνας μπερεκέτι εδάφια κάθε ντιβές. Ανταβά ισί μπουτ λατσσό. Πρέπει τι τσσουβάς στόχους ντα τι κεράς μπουτί για τι πετυχίνας-λεν. (1 Κορ. 9:26) Όμως να ερεσέλα σάντε τι διαβάνας ι Γραφή. Πρέπει τι κεράς πο μπουτ πράγματα για τι βοηθίντιβας λάταρ.

⁸ Σκεφτίνεν ακαβά παράδειγμας: Ο φυτά χρειαζίντιβενα πανί για μα τι μαραγκιάνεν. Αλλά άμα κα περέλ μπουτ μπρισίμ αντρέ σε χάνικ σαάτι κα πλημμυρίνεν. Σοράν άμα κα ντελ γιαβέρ-ντα μπρισίμ να κα κερέλ καέκ λατσσιπέ. Ισί πο λατσσό κάνα ο μπρισίμ περέλα χάνικ χάνικ επειδή αντικάς ο πανί κα τζαλ αντρέ κο φυτός ντα ανταβά κα βοηθίνελ-λες τι μπαριόλ. Αντικάς αμέν-ντα δεν πρέπει τι σιγκιαράς κάνα διαβάνασα ι Γραφή, δηλαδή τι τζας αζόμ σουγκό σο να κα μπορίνας τι αγαβάς ντα τι ντας-αμέν γκοντί οντουλά σο διαβάνασα.—Ιακ. 1:24.

 9. Σο πρέπει τι κεράς άμα σιγκιαράσα κάνα διαβάνασα ι Γραφή;

⁹ Αβιλό-πες τουμένγκε καέκ φαρ τι σιγκιαρέν κάνα διαβάνενα ι Γραφή; Σο πρέπει τι κερέν; Γουλιαρέν ταχύτητα. Προσπαθίνεν τι σκεφτίνεν οντουλά σο διαβάνενα ακανά ή σο διαβαντέν πριν από χάνικ. Μπέκιμ τι αποφασίνεν τι σικλιαρέν-τουμέν πο μπουτ σαάτι για τι τθερέν χρόνος-ντα τι κερέν ασακέ σκέψεις. Ή μπορεί τι τραμπίνεν τι διαβάνεν πο χάνικ εδάφια ντα κο χρόνος σο ατσσόλα-τουμέν τι σκεφτίνεν οντουλά σο διαβαντέν. «Κάθε φαρ  σο διαβάναβα ι Γραφή, διαβάναβα εκ χουρντό κομμάτι, μπέκιμ σάντε εκ κεφάλαιος», βακερέλα ο Βίκτορ. «Επειδή διαβάναβα νωρίς το πρωί, μπορίναβα τι σκεφτίναβ σαρό ο ντιβές οντουλά σο διαβαντόμ». Μπορίνενα τι διαβάνεν καζόμ εδάφια μανγκένα τουμέν, αλλά ο πο σημαντικός ισί τι διαβάνεν χωρίς τι σιγκιαρέν για τι μπορίνεν τι σκεφτίνεν οντουλά σο διαβαντέν.—Ψαλμ. 119:97· ντικχέν ο πλαίσιος « Ερωτήσεις για τι Σκεφτίνας».

10. Βακερέν εκ παράδειγμας για τι σικαβέν σαρ κα μπορίνενας τι κερέν οντουλά σο σικλιόνα. (1 Θεσσαλονικείς 5:17, 18)

¹⁰ Να τθερέλα σημασία κάνα διαβάνενα ι Γραφή ντα καζόμ σαάτι διαβάνενα. Οντουβά σο τθερέλα σημασία ισί τι αρακχέν τρόπους για τι κερέν οντουλά σο διαβάνενα. Καζόμ διαβάνενα εκ κομμάτι κατά Λάφι ι Ντεβλέσκο πουτσέν-τουμέν: “Σαρ μπορίναβα τι κεράβ-λες ανταβά ακανά ή κο μέλλον;” Για παράδειγμας, βακερέν ότι τθερένα τι διαβάνεν ο εδάφια 1 Θεσσαλονικείς 5:17, 18. (Διαβάνεν) Κάνα κα διαβάνεν ανταλά ντούι εδάφια, κα μπορίνενας τι σταματίνεν ντα τι σκεφτίνεν άμα προσευχίντιβενα συχνά ντα αντράλ τουμαρέ γκίσταρ. Επίσης κα μπορίνενας τι σκεφτίνεν μερικά πράγματα σο εκτιμίνενα. Μπορεί τι αποφασίνεν τι βακερέν ευχαριστώ κο Ιεχωβά για τριν συγκεκριμέ πράγματα. Άμα κα ντεν ατζέ-ντα χάνικ τουμαρέ σαατίσταρ για τι ντεν προσοχή οντουλέντε σο διαβαντέν κατά Γραφή, ανταβά κα βοηθίνελ-τουμέν τι αγαβέν ο Λάφι ι Ντεβλέσκο ντα τι κερέν οντουλά σο βακερέλα. Σκεφτίνεν καζόμ μπουτ κα βοηθίντιβεν άμα κα κερέν-λες ανταβά κάθε ντιβές με το γιαβερά-ντα κομμάτια ι Γραφιάκε σο διαβάνενα! Καζόμ νακχέλα ο καιρός κα αβέν πο λατσσέ υπηρέτες ι Ιεχωβάσκε. Σο μπορίνενα τι κερέν όμως άμα κα αγαβέν ότι ο πράγματα σο πρέπει τι αλλάνεν τουμαρέ νεαυτόστε ισί μπουτ;

ΤΙ ΤΣΣΟΥΒΕΝ ΛΟΓΙΚΟΥΣ ΣΤΟΧΟΥΣ

11. Σόσκε μπορεί μπάζιμα τι νιωθίνεν ότι χασαρένα τουμαρί ζορ; Βακερέν εκ παράδειγμας.

¹¹ Καζόμ διαβάνενα ι Γραφή ντα ρόντενα τρόπους για τι κερέν οντουλά σο βακερέλα, μπορεί μπάζιμα τι νιωθίνεν ότι χασαρένα τουμαρί ζορ. Σκεφτίνεν ακαβά: Αντιβές ο εδάφια σο διαβάνενα βακερένα μα τι ξεχωρίνας ι τζενέν. (Ιακ. 2:1-8) Αγαβένα ότι χρειαζίντιβελα τι κερέν κάποιες αλλαγές κο τρόπος σο συμπεριφερίντιβενα κο γιαβερά, οτθάρ αποφασίνενα τι κερέν-λεν. Ανταβά ισί μπουτ λατσσό! Οκουβά ντιβές διαβάνενα εκ κομμάτι κατά Γραφή σο σικαβέλα καζόμ σημαντικός ισί τι κερέν κουμάντος τουμαρί τσσιπ. (Ιακ. 3:1-12) Ντικχένα ότι μπάζιμα βακερένα πράγματα σο ανένα ι γιαβερέν σε δύσκολη θέση ή κερένα-λεν τι χασαρέν πουμαρί ζορ. Οτθάρ αποφασίνενα τι ντεν ζορ κο γιαβερά κάνα κερένα λέντζαρ λάφι. Ο γιαβέρ  ντιβές τθερένα τι διαβάνεν εκ κομμάτι σο βακερέλα μα τι αβάς αμαλά ι ντουνιάσαρ. (Ιακ. 4:4-12) Αγαβένα ότι χρειαζίντιβελα τι τραμπίνεν πο προσεκτικά τουμαρί διασκέδαση. Αφού νακχλέ σταρ ντιβές, μάλλον αγαντέν ότι ισί μπουτ μπουτ δύσκολος τι κερέν σαρέ ανταλά.

12. Σόσκε δεν πρέπει τι χασαρέν τουμαρί ζορ άμα καζόμ διαβάνενα ι Γραφή αγαβένα ότι χρειαζίντιβελα τι κερέν αλλαγές; (Ντικχέν ι υποσημείωση-ντα)

¹² Άμα χρειαζίντιβελα τι κερέν μπερεκέτι αλλαγές, μα χασαρέν τουμαρί ζορ. Ανταβά σικαβέλα ότι τθερένα λατσσό γκι. Ο τζενό σο ισί ταπεινός κάνα διαβάνελα ι Γραφή τθερέλα πι γκοντιάτε τι ντικχέλ κατέ χρειαζίντιβελα τι κερέλ αλλαγές. a Ντεν-τουμέν γκοντί επίσης ότι χρειαζίντιβελα τι κεράς συνέχεια προσπάθεια για τι ιριάς «ο νεβό χαρακτήρας». (Κολ. 3:10) Σο κα βοηθίνελ-τουμέν τι συνεχίνεν τι κερέν οντουλά σο βακερέλα ο Λάφι ι Ντεβλέσκο;

13. Καβά ισί εκ λατσσό τρόπος τι κερέν οντουλά σο σικλιλέν; (Ντικχέν ι φωτογραφία-ντα)

¹³ Αντίς τι προσπαθίνεν τι κερέν σαρέ οντουλά σο σικλιλέν αμέσως, ισί πο λατσσές τι τραμπίνεν εκ ή ντούι ανταλένταρ. (Παρ. 11:2) Κα μπορίνενας τι δοκιμάνεν ακαβά: Κερέν εκ κατάλογος ι πραγματέντζαρ σο χρειαζίντιβενα τι αλλάνεν ντα σοράν τραμπίνεν πρώτα εκ ή ντούι πράγματα, ντα μουκχέν ο γιαβερά τι κερέν-λεν πο σοράν. Κατάρ κα αρχίνεν όμως;

14. Καλά στόχους μπορίνενα τι τσσουβέν κι αρχή;

¹⁴ Μπορεί τι αποφασίνεν τι αρχίνεν με εκ στόχος σο ισί τουμένγκε πο εύκολος τι κερέν-λες. Ή μπορεί τι τραμπίνεν εκ στόχος εκχέ πραγμάσκε σο να τζάνα-λεν αζόμ λατσσές. Κάνα κα αποφασίνεν τουμαρό στόχος, ρόντεν  ανταλέσκε κο έντυπα αμαρέ. Μπορίνενα τι χρησιμοποιήνεν ο Ευρετήριο Εκδόσεων Σκοπιάς ή ο Οδηγός Έρευνας για τους Μάρτυρες του Ιεχωβά. Προσευχίντιβεν για το στόχος σο τσσουντέν, ντα μανγκέν κατά Ιεχωβά τι κερέλ-τουμέν «εμ τι μανγκέν εμ τι τθερέν ι ζορ τι κερέν πράγματα». (Φιλιπ. 2:13) Σοράν κερέν οντουλά σο σικλιλέν. Κάνα ντικχένα ότι μπορισάλεν τι κερέν εκ αλλαγή, ή τι μπαριαρέν εκ ιδιότητα ανταβά κα ντελ-τουμέν ζορ τι συνεχίνεν τι τσσουβέν στόχους. Ντα μάλλον κα αβέλ τουμένγκε πο εύκολος τι κερέν γιαβερά-ντα αλλαγές.

ΜΟΥΚΧΕΝ Ο ΛΑΦΙ Ι ΝΤΕΒΛΕΣΚΟ “ΤΙ ΕΠΗΡΕΑΝΕΛ-ΤΟΥΜΕΝ”

15. Καγιά διαφορά τθερέλα ο λαός ι Ιεχωβάσκο κατά τζενέ σο διαβάνενα ι Αγία Γραφή; (1 Θεσσαλονικείς 2:13)

¹⁵ Μερικά τζενέ διαβαντέ ι Γραφή μπουτ φαρ. Αλλά πακιάνα μπαγιά κι Γραφή; Κερντέ οντουλά σο βακερέλα ντα μουκχλέ-λα τι επηρεάνελ ο τρόπος σο τζουβντιόνα; Νάα. Ο πο μπουτ τζενέ να κερένα οντουλά σο βακερέλα η Αγία Γραφή. Σο μπαρί διαφορά τθερένα κατά λαός ι Ιεχωβάσκο! Σαρ ο πρώτοι Χριστιανοί, αντικάς αμέν-ντα δεχτίνασα ι Αγία Γραφή «σαρ ισί μπαγιά, σαρ ο λάφι ι Ντεβλέσκο». Σοράν, προσπαθίνασα τι σικαβάς ότι επηρεάνελα αμαρί ζωή.—Διαβάνεν 1 Θεσσαλονικείς 2:13.

16. Σο κα βοηθίνελ-αμέν τι κεράς οντουλά σο βακερέλα ο Λάφι ι Ντεβλέσκο;

¹⁶ Νανέ πάντα εύκολος τι διαβάνας ντα τι κεράς οντουλά σο βακερέλα ο Λάφι ι Ντεβλέσκο. Μπορεί τι δυσκολίντιβασα τι αρακχάς χρόνος για τι διαβάνας. Ή μπορεί τι διαβάνασα μπουτ σουγκό, ντα αντικάς μα τι σκεφτίνας οντουλά σο διαβαντάμ. Ή μπορεί τι νιωθίνας ότι χασαράσα αμαρί ζορ, κάνα σκεφτίνασα σαρέ ο πράγματα σο πρέπει τι αλλάνας. Καβά-ντα εμπόδιος τι τθερένα, σίγουρα μπορίνενα τι νακχαβέν-λες, σόσκε τθερένα ι βοήθεια ι Ιεχωβάσκι. Τι αβάς αποφασισμέ τι δεχτίνας λέσκι βοήθεια. Ντα μα τι αβάς τζενέ σο ασουνένα ντα μπιστρένα, αλλά τζενέ σο κερένα οντουλά σο βακερέλα ο Λάφι ι Ντεβλέσκο. Σίγουρα καζόμ πο μπουτ διαβάνασα ι Ντεβλέσκο Λάφι ντα κεράσα-λες αμαρέ ζωγιάτε, αζόμ πο ευτυχισμέ κα αβάς.—Ιακ. 1:25.