1. Σο κα κερέλ ατζεχάνικ ο Ιησούς;

 ΤΖΟΥΒΝΤΙΑΣΑ ντιβεσέντε σο κα ντικχάς μπαρέ αλλαγές! Ατζεχάνικ, ο Ιησούς κα κρίνελ σαρέ οντουλέν σο τζουβντιόνα κι πφουβ. Ο Ιησούς βακερντάς σο κα αβέλας-πες κο ντουνιάς πριν τι αρχίνελ λέσκι κρίση ντα ντινάς πι μαθητέντε εκ «σημάδι» σο κα σικαβέλας λέσκο βουρτιπέ ντα «ο τελευταία ντιβεσά ανταλέ ντουνιάσκε». (Ματθ. 24:3) Ανταγιά προφητεία γραφίντιλι κο κεφάλαια 24 ντα 25 κο Ματθαίος, αλλά εμ κο κεφάλαιος 13 κο Μάρκος ντα κο κεφάλαιος 21 κο Λουκάς.

 2. Σο κα ντικχάς ανταλέ μαθημάστε;

² Ο Ιησούς βακερντάς τριν ιστορίες για τι προειδοποιήνελ-αμέν ντα τι βοηθίνελ-αμέν τι αβάς έτοιμοι. Ανταλά ιστορίες ισί: ι μπρακένγκε ντα ι μπουσνίνγκε, ι γκοντιαβέρ ντα ι ντινιλέ τσσαΐνγκε ντα για το τάλαντα. Η κάθε εκ ιστορία κα βοηθίνελ-αμέν τι αγαβάς ότι ο Ιησούς κρίνελα ι κάθε τζενές αντράλ οντουλένταρ σο κερέλα. Ανταλέ μαθημάστε κα συζητίνας ανταλά τριν ιστορίες ντα κα ντικχάς σο μπορίνασα τι σικλιάς λένταρ. Ελάν τι αρχίνας με την πρώτη ιστορία ι μπρακένγκε ντα ι μπουσνίνγκε.

Ο ΜΠΡΑΚΕ ΝΤΑ Ο ΜΠΟΥΣΝΙΑ

 3. Κάνα κα κρίνελ ο Ιησούς ι τζενέν;

³ Κι ιστορία ι μπρακένγκι ντα ι μπουσνίνγκι, ο Ιησούς βακερντάς σαρ κα κρίντιβεν ο τζενέ σο τθερένας ι ευκαιρία τι ασουνέν ο λατσσέ αμπέρια ντα τι υποστηρίνεν λέσκε χρισμέ πφραλέν. (Ματθ. 25:31-46) Κι «μπαρί στεναχώρια», πριν τι αβέλ ο Αρμαγεδδώνας κα ξεχωρίντιβεν ο μπρακέ κατά μπουσνιά. (Ματθ. 24:21) Σαρ εκ τσομπάνης ξεχωρίνελα ι μπρακέν  κατά μπουσνιά, αντικάς ο Ιησούς-ντα κα ξεχωρίνελ οντουλέν σο στηρίνενα σαρέ πουμαρέ γκίσαρ ι χρισμέ πφραλέν, οντουλένταρ σο να στηρίνενα-λεν.

 4. Σαρ βακερένα ο εδάφια Ησαΐας 11:3, 4, σόσκε μπορίνασα τι αβάς σίγουροι ότι ο Ιησούς κα κρίνελ δίκαια ι τζενέν; (Ντικχέν ι φωτογραφία-ντα)

⁴ Ο προφητείες ι Γραφιάκε σικαβένα ότι ο Ιησούς, σο τσσουντάς-λες ο Ιεχωβά τι αβέλ Κριτής, κα κρίνελ δίκαια. (Διαβάνεν Ησαΐας 11:3, 4) Ντικχέλα οντουλά σο κερένα, οντουλά σο σκεφτίνενα ντα οντουλά σο βακερένα ο τζενέ. Επίσης ντικχέλα σαρ συμπεριφερίντιβενα πουμαρέ χρισμέ πφραλέντε. (Ματθ. 12:36, 37· 25:40) Ο Ιησούς κα τζανέλ κον υποστηρίνελα λέσκε χρισμέ πφραλέν ντα ο έργος σο κερένα. a Σικαβάσα ότι τθεράσα πίστη κάνα βοηθίνασα ι χρισμέ πφραλέν για τι βακέρντιβεν ο λατσσέ αμπέρια ντα κάνα ακολουθίνασα σαρέ αμαρέ γκίσαρ ο οδηγίες σο αβένα κατά πιστός ντα φρόνιμος δούλος. Ο τζενέ σο κερένα-λες ανταβά κα βακέρντιβεν «δίκαιοι» ντα κα μπορίνεν τι «τζουβντιόν για πάντα» κι πφουβ. (Ματθ. 25:46· Αποκ. 7:16, 17) Σο σουκάρ δώρος κα λεν σαρέ οντουλά σο ατσσικιαρένα σαστό πουμαρό γκι! Αν κα ατσσόν πιστοί κι μπαρί στεναχώρια ντα σοράν λάταρ, κα ατσσικιαρέν πουμαρέ ναβά «γραμμέ κο βιβλίος κι ζωγιάκο».​—Αποκ. 20:15.

 5. Σο σικλιάσα αντράλ κατά ιστορία ι μπρακένγκι ντα ι μπουσνίνγκι, ντα καλένγκε κερέλα λατσσιπέ;

⁵ Τι ατσσόν πιστοί ντα αφοσιωμέ. Η ιστορία ι Ιησούσκι ι μπακένγκι ντα ι μπουσνίνγκι κερέλα λάφι πο μπουτ οντουλένγκε σο τθερένα ι ελπίδα τι τζουβντιόν κι πφουβ. Βον σικαβένα πουμαρί πίστη, όχι σάντε κάνα βοηθίνενα ι πφραλέν ι Χριστόσκε τι κερέν ο έργος, αλλά εμ κάνα δεχτίνενα σαρέ πουμαρέ γκίσαρ ο τρόπος σο οδηγίνελα-λεν ανταγιά χουρντί ομάδα χρισμέ πφραλένγκι σο τραμπιντάς-λεν ο Ιησούς. (Ματθ. 24:45) Αλλά εμ οντουλά-ντα σο τθερένα ι ελπίδα τι τζαν κο ουρανός χρειαζίντιβενα τι ντεν προσοχή κι προειδοποίηση σο βακερέλα αμένγκε ανταγιά ιστορία. Σόσκε; Επειδή ο Ιησούς ντικχέλα σο κερένα, σο σκεφτίνενα ντα σο βακερένα. Πρέπει βον-ντα τι ατσσόν πιστοί. Επίσης, ο Ιησούς βακερντάς ντούι γιαβερά-ντα ιστορίες σο τθερένα συγκεκριμέ προειδοποιήσεις ι χρισμέ πφραλένγκε ντα πφενίνγκε. Αρακχάσα ανταλά ιστορίες εμ κο κεφάλαιος 25 κο Ματθαίος. Πο τελέ, κα ντικχάς ι ιστορία ι γκοντιαβέρ ντα ι ντινιλέ τσσαΐνγκε.

Ο ΓΚΟΝΤΙΑΒΕΡ ΝΤΑ Ο ΝΤΙΝΙΛΕ ΤΣΣΑΓΙΑ

 6. Σαρ σικάντιλε γκοντιαβέρ ο παντς τσσαγιά; (Ματθαίος 25:6-10)

⁶ Ανταλέ ιστοριάτε, ο Ιησούς κερντάς λάφι ντεσέ τσσαΐνγκε σο νικίστιλε για τι συναντίνεν ι τζαμουτρές. (Ματθ. 25:1-4) Σαρέ μανγκένας τι τζαν γιεκ ι τζαμουτρέσαρ λέσκε μπιαβέστε. Ο Ιησούς βακερντάς ότι παντς ανταλένταρ ισινέ «γκοντιαβέρ» ντα ι γιαβερέ παντζένγκε ότι ισινέ «ντινιλιά». Ο γκοντιαβέρ τσσαγιά ισινέ έτοιμες από πριν ντα τζανγκαντέ. Ισινέ έτοιμες τι μπεσέν ι τζαμουτρέσκε καζόμ κα χρειαζίντιβελας, ατζέ-ντα αν κα αβέλας μπουτ αρατί. Οτθάρ, αντέ λυχνάρια για τι τθερέν φως κο καρανίκι. Επίσης αντέ πο μπουτ λάδι σόσκε να τζανένας άμα κα αργίνελας ο τζαμουτρό. Ισινέ έτοιμες από πριν για τι ατσσικιαρέν πουμαρέ λυχνάρια πφαμπαρντέ. (Διαβάνεν Ματθαίος 25:6-10) Κάνα ο τζαμουτρό αβιλό, ο γκοντιαβέρ τσσαγιά γκιλέ γιεκ λέσαρ κο μπιαβ. Αντικάς-ντα, ο χρισμέ Χριστιανοί χρειαζίντιβενα τι ατσσόν τζανγκαντέ ντα πιστοί για τι σικάντιβεν έτοιμοι. Άμα  κα κερέν-λες ανταβά μέχρι τι αβέλ ο Χριστός κα αβέν γιεκ ι Τζαμουτρέσαρ, ι Ιησούσαρ, λέσκε Βασιλειάτε κο ουρανός. b (Αποκ. 7:1-3) Σο αβιλό όμως ι παντζέ ντινιλέ τσσαΐντζαρ;

 7. Σο παθισάλε ο παντς ντινιλέ τσσαγιά, ντα σόσκε;

⁷ Οκιά μπάνταρ, ο παντς ντινιλέ τσσαγιά να ισινέ έτοιμες κάνα αβιλό ο τζαμουτρό. Ο λυχνάρια λένγκε ισινέ έτοιμα τι μερέν, ντα βον να αντέας πο μπουτ λάδι. Κάνα σικλιλέ ότι ατζεχάνικ κα αβέλας ο τζαμουτρό, γκιλέ τι κινέν λάδι. Όταν ο τζαμουτρό αβιλό, να βουρτισάλεας. Αλλά «ο τσσαγιά σο ισινέ έτοιμες ντινέ λέσαρ αντρέ κο μπιαβ, ντα η πόρτα πφαντιλί». (Ματθ. 25:10) Πο σοράν, κάνα ο ντινιλέ τσσαγιά βουρτισάλε ντα μανγκένας τι ντεν αντρέ, ο τζαμουτρό βακερντάς λένγκε: «Να τζανάβα-τουμέν». (Ματθ. 25:11, 12) Ανταλά τσσαγιά να ισινέ έτοιμες από πριν για τι μπεκλεντίνεν ι τζαμουτρέσκε καζόμ κα χρειαζίντιβελας. Σο σικλιόνα ο χρισμέ λένταρ;

8, 9. Σο μπορίνενα τι σικλιόν ο χρισμέ πφραλά ντα πφενιά κατά ιστορία ι ντεσέ τσσαΐνγκι; (Ντικχέν ι φωτογραφία-ντα)

⁸ Τι αβέν έτοιμοι από πριν ντα τζανγκαντέ. Ανταλέ ιστοριάσαρ, ο Ιησούς να μανγκέλας τι βακερέλ ότι κα υπαρχίντιβενας ντούι ομάδες χρισμέ πφραλένγκε ντα πφενίνγκε. Δηλαδή εκ τανί σο κα αβέλας έτοιμη από πριν για τι νταϊντίνελ μέχρι κο τέλος ανταλέ ντουνιάσκο ντα εκ τανί σο να κα αβέλας. Οντουβά σο μανγκέλας τι σικαβέλ ισινέ σο κα αβέλας-πες ι χρισμέ πφραλέντζαρ ντα πφενίντζαρ άμα να ισινέ έτοιμοι από πριν για τι νταϊντίνεν πιστά μέχρι κο τέλος. Αν να κα αβένας έτοιμοι, να κα τζάνας κο ουρανός. (Ιωάν. 14:3, 4) Καζόμ μπουτ τζανγκαβέλα-αμέν ανταβά! Είτε τθεράσα ι ελπίδα τι τζας κο ουρανός είτε τι τζουβντιάς κι πφουβ, σαρέ πρέπει τι ντας μπουτ προσοχή κι προειδοποίηση σο τθερέλα η ιστορία ι ντεσέ τσσαΐνγκι. Ο κάθε εκ αμένταρ πρέπει τι ατσσόλ τζανγκαντό ντα τι αβέλ έτοιμος από πριν, έτοιμος τι νταϊντίνελ μέχρι κο τέλος.​—Ματθ. 24:13.

 ⁹ Αφού βακερντάς ι ιστορία ι ντεσέ τσσαΐνγκι για τι σικαβέλ καζόμ σημαντικός ισί τι αβάς έτοιμοι από πριν ντα τζανγκαντέ, ο Ιησούς βακερντάς ι ιστορία για το τάλαντα. Ανταγιά ιστορία σικαβέλα καζόμ σημαντικός ισί τι αβάς μπουτιαρνέ.

Ο ΤΑΛΑΝΤΑ

10. Σαρ σικάντιλε ότι ισινέ πιστοί ο ντούι δούλοι; (Ματθαίος 25:19-23)

¹⁰ Κι ιστορία για το τάλαντα, ο Ιησούς κερντάς λάφι ντουέ δουλόνγκε σο ισινέ πιστοί πουμαρέ κυριόστε ντα εκχέσκε σο να ισινέ. (Ματθ. 25:14-18) Ο ντούι δούλοι σικαντέ ότι ισινέ πιστοί ντα κερντέ μπουτ μπουτί για τι κερέν πο μπουτ ο λοβέ πουμαρέ κυριόσκε. Πριν τι τζαλ γιαβερέ τθεμέστε λένγκο κύριος, ντινάς-λεν κάποια τάλαντα, σο ισινέ μπουτ λοβέ. Ο ντούι πιστοί δούλοι ισινέ μπουτιαρνέ ντα χρησιμοποιηντέ γκοντιάσαρ οντουλά λοβέ. Καβά ισινέ ο αποτέλεσμας; Κάνα λένγκο κύριος βουρτισάλο, νικαντέας ντούι φαρ πο μπουτ. Λένγκο κύριος ισαρντάς-λεν ντα βακερντάς λένγκε τι ντεν «κι χαρά [πουμαρέ] κυριόσκι». (Διαβάνεν Ματθαίος 25:19-23) Αλλά σο κα βακεράς για το τρίτος δούλος; Σο κερντάς βοβ ι λοβέντζαρ σο ντινάας-λες λέσκο κύριος;

11. Σο αβιλό-πες ι “σοτέ” δουλόσαρ, ντα σόσκε;

¹¹ Ο τρίτος δούλος λιντάς εκ τάλαντος αλλά βοβ ισινέ «σοτό». Λέσκο κύριος μπεσέλας λέσταρ τι χρησιμοποιήνελ ο τάλαντος γκοντιάσαρ. Βοβ όμως πραχουντάς-λες κι πφουβ. Κάνα ο κύριος βουρτισάλο, ανταβά δούλος να τθερέλας τι ντελ-λες τίποτα πο μπουτ. Λέσκι συμπεριφορά να ισινέ λατσσί. Αντί τι μανγκέλ συγνώμη σο να κερντάς πο μπουτ ο λοβέ ι κυριόσκε, βακερντάς λέσκε ότι ισινέ «σουκέ γκίσκο». Ο κύριος να ισαρντάς ανταλέ δουλός. Επίσης, λιντέ λέσταρ ο τάλαντος ντα φουρτιντέ-λες αβρί κατά κχερ ι κυριόσκο.​—Ματθ. 25:24, 26-30.

12. Κας μανγκένα τι σικαβέν ο ντούι πιστοί δούλοι αμαρέ ντιβεσέντε;

¹² Ο ντούι πιστοί δούλοι μανγκένα τι σικαβέν ι πιστέ χρισμέ Χριστιανόν. Ο Κύριος, ο Ιησούς, καλίνελα-λεν τι “τσσουβέν-πες κι χαρά πουμαρέ κυριόσκι”. Τζάνα κο ουρανός,  κι πρώτη ανάσταση. (Ματθ. 25:21, 23· Αποκ. 20:5β) Οκιά μπάνταρ, ο μπέτι παράδειγμας ι σοτέ δουλόσκο ισί για τι προειδοποιήνελ ι χρισμέ πφραλέν ντα πφενίν. Σαρ;

13, 14. Σο σικλιόνα ο χρισμέ κατά ιστορία για το τάλαντα; (Ντικχέν ι φωτογραφία-ντα)

¹³ Τι αβέν μπουτιαρνέ ντα τι μαρέν-τουμέν. Σαρ κι ιστορία για το ντες τσσαγιά, αντικάς κι ιστορία-ντα για το τάλαντα ο Ιησούς να βακερντάας ότι ο χρισμέ κα αβένας σοτέ. Οντουβά σο μανγκέλας ισινέ τι σικαβέλ σο κα αβέλας-πες αν να κα κερένας πουμαρό έργος σαρέ πουμαρέ γκίσαρ. Ο αποτέλεσμας κα αβέλας μα τι αβέν σίγουροι ότι κα συνεχίνεν τι αβέν «καλεσμέ ντα τραμπιμέ», ντα να κα μπορίνενας τι τζαν κι βασιλεία κο ουρανός.​—2 Πέτρ. 1:10.

¹⁴ Ο ιστορίες ι Ιησούσκε για το ντες τσσαγιά ντα για το τάλαντα σικαβένα μπουτ λατσσές ότι σαρέ ο χρισμέ Χριστιανοί πρέπει τι αβέν έτοιμοι από πριν ντα τζανγκαντέ. Επίσης πρέπει τι αβέν μπουτιαρνέ ντα τι μαρέν-πες. Αλλά βακερντάς ο Ιησούς κάποια γιαβέρ-ντα προειδοποίηση ι χρισμέ πφραλένγκε ντα πφενίνγκε; Βα! Μπορίνασα τι αρακχάς ανταγιά προειδοποίηση κο λάφια σο βακερντάς κο εδάφια Ματθαίος 24:40, 41.

ΚΑΛΑ ΚΑ “ΛΙΝΤΙΟΝ”;

15, 16. Σαρ σικαβένα ο εδάφια Ματθαίος 24:40, 41 ότι ο χρισμέ πρέπει τι αβέν τζανγκαντέ;

¹⁵ Πριν τι βακερέλ ο τριν ιστορίες, ο Ιησούς κερντάς λάφι για εκ τελευταία φαρ σο κα κρίντιβενας ο χρισμέ πφραλά ντα πφενιά, ντα κα σικάντιβελας κον κερέλας ο γκι ι Ντεβλέσκο. Κερντάς λάφι ντουέ μουρσένγκε σο κερένας μπουτί κο χωράφι ντα ντουέ τζουβλίνγκε σο κερένας μπουτί κο ντριμένι. Κο ντούι-ντα περιπτώσεις, ντικχίντιβελα ότι οντουλά ντούι τζενέ κερένας ι ίδια μπουτί, αλλά ο Ιησούς βακερντάς ότι «ο εκ κα λιντιόλ ντα ο γιαβέρ να κα λιντιόλ». (Διαβάνεν Ματθαίος 24:40, 41) Σοράν βακερντάς πι μαθητένγκε: «Οντουλέσκε, τι αβέν τζανγκαντέ, σόσκε να τζανένα καβά ντιβές αβέλα τουμαρό Κύριος». (Ματθ. 24:42) Ο Ιησούς βακερντάς κάτι ασακό κάνα τελειωσάλο ι ιστορία ι ντεσέ τσσαΐνγκι. (Ματθ. 25:13) Τθερένα σχέση ανταλά λάφια ο εκ ι γιαβερέσαρ; Σαρ ντικχίντιβελα βα. Σάντε ο αληθινοί, πιστοί χρισμέ πφραλά ντα πφενιά κα “λιντιόν”, δηλαδή κα αβέν γιεκ ι Ιησούσαρ κι Βασιλεία κο ουρανός.​—Ιωάν. 14:3.

¹⁶ Τι ατσσόν τζανγκαντέ. Ο χρισμέ σο να κα ατσσόν πνευματικά τζανγκαντέ να κα γκιντίντιβεν γιεκ ι “τραμπιμέ τζενέντζαρ”. (Ματθ. 24:31) Αλλά οντουλά-ντα σο τθερένα ι ελπίδα τι τζουβντιόν για πάντα κι πφουβ, βον-ντα πρέπει τι αβέν τζανγκαντέ ντα τι ατσσόν πιστοί.

17. Σόσκε δεν πρέπει τι ανησυχίνας άμα ο Ιεχωβά τραμπίνελα τι χρίνελ τζενέν αμαρέ ντιβεσέντε;

¹⁷ Τζανάσα ι Ιεχωβάς λατσσές, οτθάρ τθεράσα μπέσα κο τρόπος σο κρίνελα. Να ανησυχίνασα άμα ο Ιεχωβά τραμπίνελα τι χρίνελ κάποιε πιστέν αμαρέ ντιβεσέντε. c Ανέν τουμαρέ γκοντιάτε σο βακερντάς ο Ιησούς για το εργάτες σο αρχισάλε τι κερέν μπουτί ο 11ος σαάτι κι ιστορία σο βακερντάς για το χωράφι ι ρεζέντζαρ. (Ματθ. 20:1-16) Οντουλέν σο καλιντέ-λεν τι κερέν μπουτί κο χωράφι ι ρεζέντζαρ πο σοράν αντρέ κο ντιβές, λιντέ ο ίδια λοβέ οντουλέντζαρ σο αρχισάλε τι κερέν μπουτί πο τζανγκλέ. Αντικάς-ντα, κάνα-ντα τι καλίνελ ο Ιεχωβά ι χρισμέν, κα τζαν κο ουρανός άμα κα ατσσόν πιστοί.

ΤΙ ΝΤΕΝ ΠΡΟΣΟΧΗ ΚΟ ΠΡΟΕΙΔΟΠΟΙΗΣΕΙΣ

18, 19. Σο σικλιλάμ ντα καλά προειδοποιήσεις λιντάμ;

¹⁸ Σο ντικχλάμ; Οντουλένγκε σο τθερένα ι  ελπίδα τι τζουβντιόν για πάντα κι πφουβ, η ιστορία ι μπρακένγκι ντα ι μπουσνίνγκι σικαβέλα καζόμ σημαντικός ισί τι ατσσόν πιστοί ντα αφοσιωμέ κο Ιεχωβά. Πρέπει τι κερέν-λες ανταβά εμ ακανά αλλά εμ κάνα κα αβέλ η μπαρί στεναχώρια. Αζομάν, ο πιστοί κα κρίντιβεν άξιοι κατά Ιησούς ντα αντικάς «κα τζουβντιόν για πάντα».​—Ματθ. 25:46.

¹⁹ Επίσης ντικχλάμ ντούι ιστορίες σο ντένα προειδοποιήσεις κο χρισμέ. Κι ιστορία σο βακερντάς ο Ιησούς ι γκοντιαβέρ ντα ι ντινιλέ τσσαΐνγκε, παντς λένταρ σικάντιλε γκοντιαβέρ. Ισινέ έτοιμες από πριν ντα τζανγκαντέ, έτοιμες τι μπεσέν ι τζαμουτρέσκε καζόμ κα χρειαζίντιβελας. Αλλά ο ντινιλέ τσσαγιά να ισινέ έτοιμες. Οτθάρ, ο τζαμουτρό να μουκχλάς-λεν τι ντεν αντρέ λέσκε μπιαβέστε. Πρέπει αμέν-ντα τι αβάς έτοιμοι από πριν για τι μπεσάς καζόμ κα χρειαζίντιβελ μέχρι ο Ιησούς τι ανέλ ο τέλος ανταλέ ντουνιάσκο. Επίσης, κι ιστορία σο βακερντάς ο Ιησούς για το τάλαντα, κερντάμ λάφι ι ντουέ πιστέ δουλόνγκε σο ισινέ μπουτιαρνέ ντα μαρένας-πες. Κερντέ λατσσί μπουτί πουμαρέ κυριόσκε ντα λένγκο κύριος ατσσιλό ευχαριστιμέ λέντζαρ. Όμως, ι σοτέ δουλός παλντιντάς-λες. Σο σικλιάσα; Πρέπει τι μαράς-αμέν κο έργος κι Ιεχωβάσκο μέχρι κο τέλος. Επίσης, ντικχλάμ ότι ο χρισμέ πρέπει τι ατσσόν τζανγκαντέ για τι “λιντιόν” κατά Ιησούς κο ουρανός. Βον μπεσένα σαρ σαρ τι “γκιντίντιβεν” πασέ κο Ιησούς κο ουρανός. Μετά κατά Αρμαγεδδώνας, κα αβέν η μπορί ι Ιησούσκι κο μπιαβ ι Μπρακέσκο.​—2 Θεσ. 2:1· Αποκ. 19:9.

20. Σο κα κερέλ ο Ιεχωβά οντουλένγκε σο ντένα προσοχή κο προειδοποιήσεις λέσκε;

²⁰ Παρόλο σο ο βακίτι σο κα κρίνελ ο Ιησούς ισί πασέ, να χρειαζίντιβελα τι νταράς. Άμα κα ατσσάς πιστοί, αμαρό λατσσό ντατ σο ισί κο ουρανός κα ντελ-αμέν ι «ζορ σο ισί πο μπαρί αμαρέ ζοριάταρ» για τι “μπορίνας . . . τι ατσσάς ανγκλάλ κο Τσσαβό κι τζενέσκο”. (2 Κορ. 4:7· Λουκ. 21:36) Είτε τθεράσα ι ελπίδα τι τζας κο ουρανός είτε τι τζουβντιάς κι πφουβ, κα κεράς ο γκι αμαρέ Νταντέσκο άμα κα ντας προσοχή κο προειδοποιήσεις σο λάσα κατά ιστορίες σο βακερντάς ο Ιησούς. Επειδή ο Ιεχωβά σικαντάς αμένγκε λατσσιπέ σο να αξίναας-λες, αμαρέ ναβά κα «αβέν γραμμέ κο βιβλίος» ι ζωγιάκο.​—Δαν. 12:1· Αποκ. 3:5.