Άμα ανταβά ισινέ μπαγιά, σκεφτίνεν σαρ κα επηρεάντιβελας αμαρί ζωή. Για παράδειγμας, ο τσσαβό εκχέ πφραλέσκο μουνταρντάς-πες. Λέσκε νταντέσκο γκι πφαμπιλό. Σκεφτιντάς μήπως ο Ιεχωβά ντικχλάς ο μέλλον ντα αποφασιντάς ότι βοβ ντα λέσκι ρομνί μπορίνενας τι νταϊντίνεν ανταβά μεριπέ σο πφαμπαρντάς λένγκο γκι. Ανταλέ ντουνιάστε, μπουτ αμένταρ κα αντιμετωπίνας ασακέ δυσκολίες. Πρέπει, λοιπόν, τι πακιάς ότι ο Ιεχωβά αποφασίνελα σο-ντα νακχάσα αμαρέ ζωγιάτε;

Καζόμ κα συζητίνας ο εδάφιος 1 Κορινθίους 10:13, κα αγαβάς ότι η Αγία Γραφή να βακερέλα ότι ο Ιεχωβά τζανέλα πιο τζανγκλέ σο μπορίνασα τι νταϊντίνας ντα σοράν τραμπίνελα καλά δοκιμασίες κα νακχάς. Σόσκε μπορίνασα τι βακεράς-λες ανταβά; Κα ντικχάς σταρ πράγματα.

Πρώτον, ο Ιεχωβά ντινάς κο τζενέ ι ελευθερία τι τραμπίνεν σο κα κερέν πουμαρέ ζωγιάτε. Μανγκέλα τι αποφασίνας σο κα κεράς. (Δευτερονόμιο 30:19, 20· Ιησούς του Ναυή 24:15) Άμα λάσα αποφάσεις σο κερένα ι Ιεχωβάς τι χαιρίνελ, μπορίνασα τι αβάς σίγουροι ότι κα οδηγίνελ-αμέν λατσσές. (Παροιμίες 16:9) Αλλά άμα λάσα λάθος αποφάσεις, κα τθεράς μπέτι αποτελέσματα. (Γαλάτες 6:7) Άμα ο Ιεχωβά τραμπίνελας καλά δοκιμασίες κα νακχάας, κα αβάας μπαγιά ελεύθεροι τι αποφασίνας σο κα κεράς;

Δεύτερον, ο Ιεχωβά να αρακχαβέλα-αμέν σαρέ κατά πράγματα σο μπορεί τι αβέν. (Εκκλησιαστής 9:11) Εκ τζενό μπορεί τι παθίνελ εκ σοβαρός ατύχημας απλώς επειδή ισινέ σε λάθος τθαν κο λάθος σαάτι. Ο Ιησούς βακερντάς για εκ ατύχημας σο αβιλό ντα μουλέ 18 τζενέ, όταν πελό οπρά-λέντε εκ πύργος. Βακερντάς ξεκάθαρα ότι να ισινέ υπεύθυνος ο Ντεβέλ οντουλέσκε σο αβιλό-πες. (Λουκάς 13:1-5) Νανέ λογικός τι σκεφτίνας ότι, πριν τι αβέλ εκ ατύχημας, ο Ντεβέλ αποφασίνελα κον κα τζουβντιόλ ντα κον κα μερέλ.

Τρίτον, ο κάθε εκ αμένταρ πρέπει τι ατσσόλ πιστός κο Ιεχωβά. Ο Μπενγκ βακερντάς ότι ο υπηρέτες ι Ιεχωβάσκε υπηρετίνενα-Λες επειδή κερδίνενα πράγματα λέσταρ. Βακερντάς ότι να κα ατσσάας πιστοί κο Ιεχωβά άμα κα αντιμετωπίναας δοκιμασίες. (Ιώβ 1:9-11· 2:4· Αποκάλυψη 12:10) Άμα ο Ιεχωβά κα αρακχαβέλας-αμέν από μερικές δοκιμασίες, μπορεί τι σικάντιβελας ότι ο Μπενγκ τθερέλας δίκιος.

Τέταρτον, ο Ιεχωβά να τραμπίνελα τι τζανέλ πιο τζανγκλέ σαρέ οντουλά σο κα αβέν-πες αμένγκε. Σίγουρα ο Ιεχωβά, άμα μανγκέλα, μπορίνελα τι τζανέλ σο κα αβέλ ανγκλ’ αμέντε. (Ησαΐας 46:10) Αλλά η Γραφή σικαβέλα ότι να τραμπίνελα τι τζανέλ σαρέ ο πράγματα πριν τι αβέν-πες. (Γένεση 18:20, 21· 22:12) Ο Ιεχωβά ισί λατσσό ντα δίκαιος, οτθάρ να λέλα αμένταρ ι ελευθερία σο τθεράσα τι τραμπίνας σο κα κεράς.—Δευτερονόμιο 32:4· 2 Κορινθίους 3:17.

Άρα, σο μανγκέλας τι βακερέλ ο Παύλος όταν γραφιντάς ότι ο Ιεχωβά «να κα μουκχέλ-τουμέν τι δοκιμάντιβεν πιο μπουτ οντουλέσταρ σο μπορίνενα τι αντιχίνεν»; Ανταλέ λαφίντζαρ, ο Παύλος σικαντάς σο κερέλα ο Ιεχωβά, όχι πριν τι τθεράς ο δοκιμασίες, αλλά όταν τθεράσα-λεν. Άμα τθεράσα εμπιστοσύνη κο Ιεχωβά, βοβ κα βοηθίνελ-αμέν σο-ντα δοκιμασία κα νακχάς αμαρέ ζωγιάτε. (Ψαλμός 55:22) Ακανά κα ντικχάς ντούι πράγματα σο σικαβένα σόσκε μπορίνελας ο Παύλος τι βακερέλ-λες ανταβά.

Ο πρώτος πράγμας ισί ότι ο δοκιμασίες σο αντιμετωπίνασα “τθερένα-λεν γιαβερά-ντα τζενέ”. Καζόμ τζουβντιάσα κι Μπενγκέσκο ντουνιάς, σαρέ κα αντιμετωπίνας δύσκολα προβλήματα, ατζέ-ντα πράγματα σο κα πφαμπαρέν αμαρό γκι. Αλλά άμα τθεράσα εμπιστοσύνη κο Ιεχωβά, μπορίνασα τι αντιμετωπίνας ανταλά δοκιμασίες ντα τι ατσσάς πιστοί. (1 Πέτρου 5:8, 9) Πιο πριν κο κεφάλαιος ντες κι πρώτη επιστολή κο Κορινθίους, ο Παύλος γραφιντάς  για κάποιες δοκιμασίες σο τθερένας ο Ισραηλίτες κι έρημος. (1 Κορινθίους 10:6-11) Οντουλά σο τθερένας εμπιστοσύνη κο Ιεχωβά μπορίνενας τι νταϊντίνεν οντουλά δοκιμασίες. Αλλά μερικοί Ισραηλίτες να ασουντέ ι Ιεχωβάς. Να ατσσιλέ πιστοί επειδή να τθερένας λέστε εμπιστοσύνη.

Ο δεύτερος πράγμας ισί ότι «ο Ντεβέλ ισί πιστός». Σο μανγκέλα τι βακερέλ ανταβά; Κάνα διαβάνασα σαρ ο Ιεχωβά αρακχαβέλας πι υπηρετόν κατά πουρανέ μπρεσά, αγαβάσα ότι βοηθίνελα πιστά “οντουλέν σο μανγκένα-λες ντα οντουλέν σο κερένα λέσκε εντολές”. (Δευτερονόμιο 7:9) Σικλιάσα ότι ο Ιεχωβά πάντα κερέλα οντουλά σο βακερέλα. (Ιησούς του Ναυή 23:14) Μπορίνασα τι αβάς σίγουροι ότι (1) ο Ιεχωβά να κα μουκχέλ καέκ δοκιμασία τι αβέλ αζόμ δύσκολη σο να κα μπορίνας τι νταϊντίνας-λα ντα (2) ότι “κα σικαβέλ αμένγκε ο τρόπος για τι μπορίνας τι νταϊντίνας”.

Σαρ σικαβέλα ο Ιεχωβά ο τρόπος για τι μπορίνεν τι νταϊντίνεν ο τζενέ σο τθερένα λέστε εμπιστοσύνη; Σίγουρα μπορίνελα τι νασκιαρέλ αμένταρ εκ δοκιμασία. Ντεν-τουμέν γκοντί, όμως, ο λάφια ι Παυλόσκε: «[Ο Ιεχωβά] κα σικαβέλ . . . ο τρόπος για τι μπορίνεν τι νταϊντίνεν». Άρα, μπουτ φαρ ο τρόπος σο χρησιμοποιήνελα ο Ιεχωβά ισί τι ντελ-αμέν ζορ για τι μπορίνας τι ατσσάς πιστοί. Για τι ντικχάς σαρ κερέλα-λες ανταβά.

• Ο Ιεχωβά «ντέλα-αμέν παρηγοριά σαρέ κο στεναχώριες σο τθεράσα». (2 Κορινθίους 1:3, 4) Μπορίνελα τι χρησιμοποιήνελ ι Αγία Γραφή, πο άγιος πνεύμας ντα ο πιστός ντα φρόνιμος δούλος για τι κερέλ αμαρί γκοντί ντα αμαρό γκι τι ηρεμίνεν.—Ματθαίος 24:45· Ιωάννης 14:16· Ρωμαίους 15:4.

• Ο Ιεχωβά μπορίνελα τι χρησιμοποιήνελ πο άγιος πνεύμας για τι οδηγίνελ-αμέν. (Ιωάννης 14:26) Ο άγιος πνεύμας μπορίνελα τι βοηθίνελ-αμέν τι ντας-αμέν γκοντί ιστορίες ντα συμβουλές κατά Αγία Γραφή για τι μπορίνας τι λας σωστές αποφάσεις.

• Ο Ιεχωβά μπορίνελα τι χρησιμοποιήνελ πι αγγελόν για τι βοηθίνελ-αμέν.—Εβραίους 1:14.

• Ο Ιεχωβά μπορίνελα τι χρησιμοποιήνελ ι πφραλέν ντα ι πφενίν για τι βοηθίνελ-αμέν. Μπορίνενα τι ντεν-αμέν ζορ πουμαρέ λαφίντζαρ ντα οντουλέντζαρ σο κερένα.—Κολοσσαείς 4:11.

Σο σικλιλάμ οντουλένταρ σο γραφιντάς ο Παύλος κο εδάφιος 1 Κορινθίους 10:13; Ο Ιεχωβά να τραμπίνελα καλά δοκιμασίες αντιμετωπίνασα. Αλλά μπορίνασα τι αβάς σίγουροι ότι, άμα τθεράσα εμπιστοσύνη κο Ιεχωβά, κα μπορίνας τι νταϊντίνας κάθε δοκιμασία. Τζανάσα ότι ο Ιεχωβά κα σικαβέλ αμένγκε πάντα ο τρόπος για τι μπορίνας τι ατσσάς πιστοί λέστε.