1, 2. Αφού ο Ιησούς γκιλό κο ουρανός, σο μπορεί τι σκεφτίνενας ο απόστολοι;

Ο ΑΠΟΣΤΟΛΟΙ ι Ιησούσκε ισινέ κο Όρος των Ελαιών ντα ντικχένας ι Ιησούς, σο ισινέ λένγκο δάσκαλος ντα λένγκο αμάλ, τι νικλίλ κο ουρανός ντα τι γκεράντιβελ από εκ σύννεφος. (Πράξεις 1:9, 10) Για περίπου ντούι μπρεσά, ο Ιησούς σικλιαρέλας, ενθαρρύνελας ντα οδηγίνελας-λεν. Αλλά ακανά νασλόας. Σο κα κερένας;

² Πριν τι τζαλ κο ουρανός, ο Ιησούς βακερντάς πι μαθητένγκε: «Κα αβέν μο μάρτυρες κι Ιερουσαλήμ ντα σαρί κι Ιουδαία ντα κι Σαμάρεια, ατζέ-ντα κο τθαν σο ισί πιο ντουρ οπράλ κι πφουβ». (Πράξεις 1:8) Σαρ κα μπορίνενας τι ντεν πέρα οντουβά διορισμός; Ο Ιησούς ντινάς πο λάφι ότι ο άγιος πνεύμας ι Ντεβλέσκο κα βοηθίνελας-λεν. (Πράξεις 1:5) Αλλά κον κα οδηγίνελας-λεν ντα κα οργανώνελας ο έργος ι Ντεβλέσκο σαρό κο ντουνιάς; Ο απόστολοι τζανένας ότι ο Ιεχωβά χρησιμοποιηντάας τζενέν για τι οδηγίνεν ι Ισραηλιτέν κο παρελθόν. Οτθάρ, μπορεί τι σκεφτίνενας άμα κα τραμπίνελας ο Ιεχωβά εκχέ νεβέ τζενές για τι οδηγίνελ λέσκε λαός.

3. (α) Αφού ο Ιησούς γκιλό κο ουρανός, καγιά σημαντική απόφαση λιντέ ο πιστοί απόστολοι; (β) Καλά ερωτήσεις κα ντικχάς ανταλέ μαθημάστε;

 ³ Αφού νακχλέ μερικά ντιβεσά από αζομάν σο γκιλό ο Ιησούς κο ουρανός, λέσκε μαθητές ροντιντέ κι Γραφή, κερντέ προσευχή κο Ντεβέλ ντα τραμπιντέ τον Ματθία για τι αβέλ κι θέση του Ιούδα του Ισκαριώτη σο ισινέ ο 12ος απόστολος. (Πράξεις 1:15-26) Σόσκε ισινέ αζόμ σημαντικός λένγκε ντα ι Ιεχωβάσκε τι τραμπίνεν ατζέ εκχέ αποστολός; Ο μαθητές αγαντέας ότι ο απόστολοι έπρεπε τι αβέν 12. * (Ντικχ ι υποσημείωση.) Ο Ιησούς τραμπιντάας ι αποστολόν ντα σικλιαρντάς-λεν για τι τθερέν εκ μπουτ σημαντικός ρόλος κο λαός κι Ντεβλέσκο. Καβά ισινέ οντουβά ρόλος, ντα σαρ ο Ιεχωβά ντα ο Ιησούς ετοιμαντέ-λεν; Τθερένα κάποιοι ασακό ρόλος αμαρέ ντιβεσέντε; Ντα σαρ μπορίνασα “τι ντας-αμέν γκοντί οντουλέν σο τθερένα ι ευθύνη κι εκκλησία”, ντα πιο μπουτ οντουλέν σο ισί “ο πιστός ντα φρόνιμος δούλος”;—Εβραίους 13:7· Ματθαίος 24:45.

4. Σο ρόλος τθερένας ο απόστολοι ντα γιαβερά πρεσβύτεροι κι Ιερουσαλήμ;

⁴ Ο απόστολοι αρχισάλε τι οδηγίνεν ι Χριστιανική εκκλησία κι Πεντηκοστή του 33 Κ.Χ. Η Γραφή βακερέλα ότι «ο Πέτρος ιστίντιλο με τους έντεκα» ντα σικλιαρντάς μπουτέ τζενέν αλήθειες σο μπορίνενας τι σώνεν ζωές. (Πράξεις 2:14, 15) Μπουτ οντουλέ τζενένταρ αβιλέ Χριστιανοί. Σοράν, οντουλά νεβέ Χριστιανοί «ισινέ αφοσιωμέ κο λάφια σο σικλιαρένας ο απόστολοι». (Πράξεις 2:42) Ο απόστολοι ισινέ υπεύθυνοι τι κερέν κουμάντος ο λοβέ σο τθερέλας η εκκλησία. (Πράξεις 4:34, 35) Επίσης σικλιαρένας ντα προσευχίντιβενας ι Ντεβλέσκε λαόσκε. Βακερντέ: «Αμέν κα αβάς αφοσιωμέ κι προσευχή ντα κα σικλιαράς ο λάφια ι Ντεβλέσκε». (Πράξεις 6:4) Κάτι γιαβέρ σο κερένας ισινέ τι μπουτσσαβέν έμπειρους Χριστιανούς για τι τζαν νεβέ τθανέντε. (Πράξεις 8:14, 15) Σοράν, γιαβερά-ντα χρισμέ πρεσβύτεροι τθερένας ι ευθύνη κι εκκλησία γιεκ ι αποστολόντζαρ. Σαρ κυβερνών σώμας, ντένας οδηγίες σαρέ κο εκκλησίες.—Πράξεις 15:2.

5, 6. (α) Σαρ ντέλας δύναμη ο άγιος πνεύμας κο κυβερνών σώμας; (Ντικχ ι φωτογραφία σο ισί κι αρχή.) (β) Σαρ βοηθιντέ ο άγγελοι ο κυβερνών σώμας; (γ) Σαρ οδηγιντάς ο Λάφι ι Ντεβλέσκο ο κυβερνών σώμας;

⁵ Ο Χριστιανοί κο πρώτος αιώνας τζανένας ότι ο Ιεχωβά οδηγίνελας ο κυβερνών σώμας αντράλ κατά Ιησούς. Σαρ μπορίνενας τι αβέν σίγουροι ανταλέσκε; Πρώτον, ο άγιος πνεύμας ντέλας δύναμη κο κυβερνών σώμας. (Ιωάννης 16:13) Σαρέ ο χρισμέ Χριστιανοί λιντέ άγιος πνεύμας, αλλά οντουβά πνεύμας ντινάς πιο μπουτ δύναμη κο απόστολοι ντα κο πρεσβύτεροι κι Ιερουσαλήμ για τι κερέν πουμαρό ρόλος σαρ επίσκοποι. Για παράδειγμας, κο 49 Κ.Χ., ο άγιος πνεύμας οδηγιντάς ο κυβερνών σώμας τι λελ εκ απόφαση σο τθερέλας τι κερέλ με την περιτομή. Ο εκκλησίες ακολουθιντέ  ανταγιά οδηγία, ντα αντικάς «συνεχίνενας τι αβέν πιο σταθερές κι πίστη ντα τι αβγατίντιβεν κάθε ντιβές». (Πράξεις 16:4, 5) Κατά επιστολή σο μπουτσσάντιλι κο εκκλησίες για την περιτομή, μπορίνασα τι ντικχάς ότι ο κυβερνών σώμας τθερέλας ο πνεύμας ι Ντεβλέσκο ντα σικαβέλας ιδιότητες σαρ ισί η αγάπη ντα η πίστη.—Πράξεις 15:11, 25-29· Γαλάτες 5:22, 23.

⁶ Δεύτερον, ο άγγελοι βοηθιντέ ο κυβερνών σώμας. Για παράδειγμας, εκ άγγελος βακερντάς κο Κορνήλιος τι αρακχέλ τον απόστολο Πέτρο. Αφού ο Πέτρος κερντάς λάφι ι Ντεβλέσκε κο Κορνήλιος ντα λέσκε τζενέντε, λιντέ ο άγιος πνεύμας παρόλο σο οντουλά μουρσά να κερντέας περιτομή. Ο Κορνήλιος ισινέ ο πρώτος τζενό κατά γιαβερά τθεμά σο αβιλό Χριστιανός χωρίς τι κερέλ περιτομή. Όταν ο απόστολοι ντα γιαβερά πφραλά ασουντέ-λες ανταβά, δεχτιντέ ο θέλημας ι Ντεβλέσκο ντα καλωσοριντέ κι Χριστιανική εκκλησία τζενέν κατά γιαβερά τθεμά σο να κερντέας περιτομή. (Πράξεις 11:13-18) Ανταλέσταρ αγαβάσα ότι ο άγγελοι υποστηρίνενας ο έργος σο ισινέ υπεύθυνος λέσκε ο κυβερνών σώμας. (Πράξεις 5:19, 20) Τρίτον, ο Λάφι ι Ντεβλέσκο οδηγίνελας ο κυβερνών σώμας. Οντουλά τζενέ χρησιμοποιήνενας ι Γραφή εμ για τι βοηθίνελ-λεν τι λεν σημαντικές αποφάσεις οντουλέ πραγματένγκε σο έπρεπε τι πακιάν ο Χριστιανοί εμ για τι οδηγίνεν ο εκκλησίες.—Πράξεις 1:20-22· 15:15-20.

7. Σόσκε μπορίνασα τι βακεράς ότι ο Ιησούς οδηγίνελας ι πρώτε Χριστιανόν;

⁷ Παρόλο σο ο κυβερνών σώμας τθερέλας εξουσία αντρέ κι εκκλησία, ο τζενέ σο ισινέ κο κυβερνών σώμας αγαβένας ότι ο Ιησούς οδηγίνελας-λεν. Σαρ τζανάσα-λες ανταβά; Ο απόστολος Παύλος βακερντάς ότι ο Χριστός διοριντάς «μερικούς σαρ αποστόλους». Επίσης, βακερντάς ότι ο Χριστός ισί ο «σορό» ι εκκλησιάκο, δηλαδή οντουβά σο οδηγίνελα-λα. (Εφεσίους 4:11, 15) Ντα αντί τι λεν ο ναβ εκχέ αποστολόσκο, «ο μαθητές βακέρντιλε Χριστιανοί». (Πράξεις 11:26) Ο Παύλος τζανέλας ότι ισινέ σημαντικός τι ακολουθίνελ σο-ντα σικλιαρένας κατά Γραφή ο απόστολοι ντα γιαβερά μουρσά σο οδηγίνενας ι εκκλησία. Όμως ο Παύλος βακερντάς: «Μανγκάβα όμως τι τζανέν ότι ο σορό ι κάθε μουρσέσκο ισί ο Χριστός». Ανταβά σικαβέλας ότι ο Χριστός ισινέ ο σορό ι κάθε τζενέσκο κο κυβερνών σώμας-ντα. Σοράν ο Παύλος συνεχιντάς: «Ο σορό ι Χριστόσκο ισί ο Ντεβέλ». (1 Κορινθίους 11:2, 3) Ντικχίντιβελα ξεκάθαρα ότι ο Ιεχωβά διοριντάας πι Τσσαβές, ι Ιησούς Χριστός, τι οδηγίνελ ι εκκλησία.

8, 9. Καβά σημαντικός ρόλος τθερέλας ο πφραλ Ρώσσελ;

⁸ Κατά 1870, ο Κάρολος Τέηζ Ρώσσελ ντα μερικά αμαλά λέσκε αρχισάλε τι προσπαθίνεν τι ντεν λατρεία κο Ντεβέλ σαρ βακερέλας η Γραφή ντα τι βοηθίνεν γιαβερέν-ντα τι κερέν-λες ανταβά. Μανγκένας τι βοηθίνεν οντουλέν-ντα σο κερένας λάφι γιαβέρ τσσιπ. Οτθάρ, αβιλό-πες κο 1884 εκ σωματείος, η Φυλλαδική Εταιρία Σκοπιά της Σιών, ντα ο πφραλ Ρώσσελ αβιλό λάκο πρόεδρος. * (Ντικχ ι υποσημείωση.) Βοβ διαβαντάς μπουτ προσεκτικά ι Γραφή ντα να νταρέλας τι βακερέλ κο γιαβερά ότι νανέ αντρέ κι Γραφή οντουλά σο σικλιαρένας ο κχανγκιριά, σαρ για παράδειγμας η Τριάδα ντα ότι η ψυχή να μερέλα. Σικλιλό ότι ο Χριστός κα βουρτίνελας σαρ πνεύμας σο να ντικχίντιβελα  ντα ότι «ο βακίτια ι τθεμένγκε» κα τελειώνενας κο 1914. (Λουκάς 21:24) Ο πφραλ Ρώσσελ χρησιμοποιηντάς πο χρόνος, πο δυνάμεις ντα πο λοβέ για τι σικλιαρέλ ανταλά αλήθειες κο γιαβερά. Ισί ξεκάθαρος ότι ο Ιεχωβά ντα ο Ιησούς χρησιμοποιηντέ ι πφραλές Ρώσσελ για τι οδηγίνελ ι Ντεβλέσκε λαός οντουλέ σημαντικέ μπρεσέντε.

⁹ Ο πφραλ Ρώσσελ να μανγκέλας τι ταρτίνελ ι προσοχή ι τζενένγκι οπρά-πέστε. Κο 1896, γραφιντάς ότι βοβ ντα γιαβερά υπεύθυνα μουρσά να μανγκένας ιτς τι λεν δόξα. Να μανγκένας τι τθερέν ξεχωριστούς τίτλους ντα να μανγκένας καέκ ομάδα τι λελ λένγκο ναβ. Σοράν βοβ βακερντάς: «Ανταβά νανέ τζενέσκο έργος».

10. (α) Κάνα διοριντάς ο Ιησούς τον “πιστό ντα φρόνιμο δούλο”; (β) Εξηγίνεν σαρ αβιλό ξεκάθαρος ότι ο Κυβερνών Σώμας ισινέ διαφορετικός κατά Εταιρία Σκοπιά;

¹⁰ Τριν μπρεσά αφού μουλό ο πφραλ Ρώσσελ, κο 1919, ο Ιησούς διοριντάς τον “πιστό ντα φρόνιμο δούλο”. Σόσκε; Για τι ντελ πι μαθητέντε «χαμπέ αζομάν σο πρέπει τι ντελ-λες». (Ματθαίος 24:45) Ατζέ-ντα οντουλέ πρώτε μπρεσέντε, εκ χουρντί ομάδα χρισμέ πφραλένγκι, σο υπηρετίνενας κο κεντρικά γραφεία κο Μπρούκλιν κι Νέα Υόρκη, ντέλας πνευματικός χαμπέ κο μαθητές κι Ιησούσκε. Κατά 1940 αρχισάλι τι βακέρντιβελ η φράση «κυβερνών σώμας» κο έντυπα σο τθεράσα. Αζομάν, ο πφραλά πακιάνας ότι ο κυβερνών σώμας ισινέ οντουλά τζενέ σο ισινέ υπεύθυνοι κι Βιβλική και Φυλλαδική Εταιρία Σκοπιά. Όμως, κο 1971, αβιλό ξεκάθαρος ότι ο Κυβερνών Σώμας ισινέ διαφορετικός κατά Εταιρία Σκοπιά, σο ισινέ υπεύθυνη σάντε ι πραγματένγκε σο τθερένας τι κερέν με το νόμος. Από αζομάν, ο χρισμέ πφραλά κα μπορίνενας τι αβέν κο Κυβερνών Σώμας χωρίς τι αβέν κο συμβούλιος της Εταιρίας-ντα. Ο τελευταία μπρεσά, πφραλά κατά «γιαβερά μπρακέ» ισί υπεύθυνα κο συμβούλιος της εταιρίας ντα σε γιαβερά σωματεία σο χρησιμοποιήντιβενα κατά Ντεβλέσκο λαός. Αντικάς, ο Κυβερνών Σώμας μπορίνελα τι ντελ σαρί πι προσοχή για τι σικλιαρέλ ντα τι οδηγίνελ ι Ντεβλέσκε λαός κατά Αγία Γραφή. (Ιωάννης 10:16· Πράξεις 6:4) Η Σκοπιά 15 Ιουλίου 2013 εξηγίνελας ότι «ο πιστός ντα φρόνιμος δούλος» ισί εκ χουρντί ομάδα χρισμέ πφραλένγκι σο ισί αμένγκε ο Κυβερνών Σώμας.

11. Σαρ λέλα αποφάσεις ο Κυβερνών Σώμας;

¹¹ Ο πφραλά σο ισί κο Κυβερνών Σώμας λένα σημαντικές αποφάσεις όταν συναντίντιβενα σαρ εκ ομάδα κάθε εβδομάδα. Ανταλά συναντήσεις βοηθίνενα-λεν τι τθερέν λατσσί επικοινωνία ντα τι αβέν ενωμέ. (Παροιμίες 20:18) Καέκ πφραλ κατά Κυβερνών Σώμας νανέ πιο σημαντικός κατά γιαβερά, οτθάρ κάθε μπρες εκ διαφορετικός πφραλ τθερέλα ι ευθύνη τι οδηγίνελ ο συναντήσεις σο κερένα. (1 Πέτρου 5:1) Ο ίδιος αβέλα-πες κο σιοβ επιτροπές-ντα σο τθερέλα ο Κυβερνών Σώμας. Καέκ πφραλ κατά Κυβερνών Σώμας να νιωθίνελα ότι ισί ο αρχηγός πι πφραλένγκο. Ο κάθε εκ λένταρ ισί υπηρέτης-ντα, σαρ ισί ο γιαβερά  χρισμέ, ντα λέλα πνευματικός χαμπέ κατά πιστός δούλος ντα ακολουθίνελα λέσκε οδηγίες.

12. Καλέ ερωτησιέντε κα λας απαντήσεις πιο τελέ;

¹² Ο πφραλά σο ισί κο Κυβερνών Σώμας να βακερένα ότι ο Ντεβέλ κερέλα λέντζαρ λάφι ούτε βακερένα ότι να κερένα λάθη. Μπορεί τι κερέν λάθη όταν εξηγίνενα ι Γραφή ή όταν οδηγίνενα ι οργάνωση. Για παράδειγμας, ο Ευρετήριο Εκδόσεων Σκοπιάς τθερέλα εκ θέμας σο βακέρντιβελα «Διευκρίνιση Δοξασιών», ντα οτθέ αντρέ ισί εκ κατάλογος σο σικαβέλα σαρ, κατά 1870 μέχρι αντιβές, αγαντάμ πιο λατσσές ο πράγματα σο σικλιαρέλα η Γραφή. Ο Ιησούς να βακερέλα αμένγκε ότι ο πιστός ντα φρόνιμος δούλος σο κα διορίντιβελας λέσταρ κα ντέλας τέλειος πνευματικός χαμπέ. Άρα, σαρ μπορίνασα τι απαντίνας κι ερώτηση σο κερντάς ο Ιησούς: «Κον ισί άραγε ο πιστός ντα φρόνιμος δούλος;» (Ματθαίος 24:45) Καλά αποδείξεις σικαβένα ότι ο Κυβερνών Σώμας ισί ο πιστός  δούλος; Για τι ντικχάς οντουλά τριν πράγματα σο βοηθιντέ ι πφραλέν κατά κυβερνών σώμας κο ντιβεσά σο τζουβντιόνας ο απόστολοι.

13. Σαρ ο Κυβερνών Σώμας βοηθίντιβελα κατά άγιος πνεύμας;

¹³ Ο Κυβερνών Σώμας βοηθίντιβελα κατά άγιος πνεύμας. Ο Κυβερνών Σώμας βοηθίντιλο κατά άγιος πνεύμας για τι αγαβέλ ο αλήθειες κατά Γραφή σο ναστί αγαβένας-λεν πιο πριν ο τζενέ. Για παράδειγμας, σκεφτίνεν οντουβά κατάλογος κατά Ευρετήριο Εκδόσεων Σκοπιάς σο βακερντάμας. Καέκ τζενό να κα μπορίνελας τι αγαβέλ ντα τι εξηγίνελ κορκορό οντουλά “βαθιά πράγματα ι Ντεβλέσκε”! (Διαβάνεν 1 Κορινθίους 2:10) Ο Κυβερνών Σώμας αισθάνελα σαρ ο απόστολος Παύλος, σο γραφιντάς: «Ανταλά πράγματα βακεράσα-λεν, όχι λαφίντζαρ σο σικλιαρένα-λεν ο τζενέ με τη σοφία σο τθερένα, αλλά λαφίντζαρ σο σικλιαρέλα-λεν ο πνεύμας». (1 Κορινθίους 2:13) Αφού νακχλέ αζόμ μπουτ μπρεσά σο καέκ να σικλιαρέλας ι αλήθεια ντα καέκ να οδηγίνελας ξεκάθαρα ι τζενέν, σόσκε κατά 1919 αγαντάμ αζόμ μπουτ πράγματα κατά Γραφή; Ο μόνος λόγος ισί ότι ο Ντεβέλ χρησιμοποιηντάς πο άγιος πνεύμας για τι ντελ βοήθεια!

14. Σαρ βακερένα ο εδάφια Αποκάλυψη 14:6, 7, σαρ ο Κυβερνών Σώμας ντα ι Ντεβλέσκο λαός αντιβές βοηθίντιβενα κατά άγγελοι;

¹⁴ Ο Κυβερνών Σώμας βοηθίντιβελα κατά άγγελοι. Ο Κυβερνών Σώμας τθερέλα ι μπαρί ευθύνη τι οδηγίνελ πιο μπουτ από οχτώ εκατομμύρια τζενέν τι κερέν ο έργος ι Ντεβλέσκο σαρί κι πφουβ. Σόσκε ανταβά έργος τθερέλα αζόμ μπαρί επιτυχία; Εκ λόγος ισί ότι βοηθίνενα ο άγγελοι. (Διαβάνεν Αποκάλυψη 14:6, 7) Μπουτ φορές, ο άγγελοι οδηγιντέ ι πφραλέν εκχέ τζενέστε σο μόλις κερντάας προσευχή κο Ντεβέλ για τι βοηθίνελ-λες! * (Ντικχ ι υποσημείωση.) Ατζέ-ντα όταν υπαρχίντιβελα διωγμός, ο πφραλά βακερένα ο λατσσέ αμπέρια ντα σικλιαρένα ι τζενέν. Ανταβά-ντα αβέλα-πες μόνο με τη βοήθεια σο ντένα ο άγγελοι.

15. Σο διαφορά τθερέλα ο Κυβερνών Σώμας κατά παπάζια σο οδηγίνενα ι κχανγκιρίν; Βακερέν εκ παράδειγμας.

¹⁵ Ο Κυβερνών Σώμας οδηγίντιβελα κατά Ντεβλέσκο Λάφι. (Διαβάνεν Ιωάννης 17:17) Ντικχέν σο αβιλό-πες κο 1973. Η Σκοπιά 1 Σεπτεμβρίου πουτσλάς άμα «μπορίνενα τι μπολντιόν οντουλά τζενέ σο να τσσιναντέ ι συνήθεια τι πιν τσιγάρα». Η απάντηση ανταλέ ερωτησιάτε ισινέ όχι, ντα ισινέ βασισμέ κο συμβουλές σο τθερέλα η Γραφή! Η Σκοπιά σικαβέλας μπουτ εδάφια ντα εξηγίνελας σόσκε εκ τζενό σο να κα τσσιναβέλας ι τσιγάρα έπρεπε τι χαλ αποκοπή. (1 Κορινθίους 5:7· 2 Κορινθίους 7:1) Βακερντάς ότι οντουλά αυστηροί κανόνες να ισινέ τζενένταρ αλλά «κατά Ντεβέλ, σο κερέλα λάφι αντράλ πι Λαφίσταρ». Καέκ γιαβέρ θρησκεία να μανγκέλα αζόμ μπουτ τι στηρίντιβελ σαρέ κο πράγματα κο Λάφι κι Ντεβλέσκο, ατζέ-ντα όταν ανταβά μπορεί τι αβέλ μπουτ δύσκολος μερικέ τζενένγκε σο ισί οντουλέ θρησκειένταρ. Εκ βιβλίος για τη θρησκεία κο Ηνωμένες Πολιτείες βακερέλα: «Ο παπάζια σο οδηγίνενα ι κχανγκιρίν μπουτ φαρ αλλάνενα οντουλά σο σικλιαρένα για τι ταιριάνεν οντουλέντζαρ σο πακιάνα ντα μανγκένα ο πιο μπουτ τζενέ». Ο Κυβερνών Σώμας, όμως, να οδηγίντιβελα οντουλέ πραγματένταρ σο μανγκένα ο πιο μπουτ τζενέ. Αλλά οδηγίντιβελα κατά Ντεβλέσκο Λάφι, κάτι σο σικαβέλα ότι ο Ιεχωβά ισί οντουβά σο οδηγίνελα μπαγιά ι Ντεβλέσκε λαός αντιβές.

16. Σαρ μπορίνασα τι σικαβάς ότι ντάσα-αμέν γκοντί ο Κυβερνών Σώμας;

¹⁶ Διαβάνεν Εβραίους 13:7. Η Γραφή βακερέλα τι «ντεν-τουμέν γκοντί οντουλέν σο τθερένα ι ευθύνη κι εκκλησία». Εκ τρόπος για τι κεράς-λες ανταβά ισί τι προσευχίντιβας για το Κυβερνών Σώμας. (Εφεσίους 6:18) Βον τθερένα μπουτ ευθύνες, σαρ για παράδειγμας τι ντεν πνευματικός χαμπέ, τι ντικχέν σαρ τζάλα ο έργος ι Ντεβλέσκο σαρό κο ντουνιάς ντα τι αποφασίνεν σαρ τι χρησιμοποιήντιβεν ο συνεισφορές σο κερντιόνα κι οργάνωση. Οτθάρ, σίγουρα τθερένα ανάγκη τι προσευχίντιβας λένγκε συνέχεια!

17, 18. (α) Σαρ ακολουθίνασα ο οδηγίες σο ντέλα ο Κυβερνών Σώμας; (β) Σαρ αμαρό έργος υποστηρίνελα ο Κυβερνών Σώμας ντα ι Ιησούς;

¹⁷ Επίσης, μπορίνασα τι σικαβάς ότι ντάσα-αμέν γκοντί ο Κυβερνών Σώμας όταν ακολουθίνασα ο συμβουλές ντα ο οδηγίες σο ντέλα. Ο Κυβερνών Σώμας οδηγίνελα-αμέν αντράλ κατά έντυπα, κατά συναθροίσεις ντα κατά συνελεύσεις. Διορίνελα, επίσης, επισκόπους περιοχής, ντα βον διορίνενα πρεσβυτέρους. Όταν ο επίσκοποι περιοχής ντα ο πρεσβύτεροι ακολουθίνενα ακριβώς ο οδηγίες σο ντιντιόνα-λεν σικαβένα ότι ντένα-πες γκοντί ο Κυβερνών Σώμας. Ντα σαρέ σικαβάσα σεβασμός οντουλέσκε σο οδηγίνελα-αμέν, ι Ιησούσκε, όταν ντάσα καν ι τζενέν σο χρησιμοποιήνελα αντιβές.—Εβραίους 13:17.

¹⁸ Εκ γιαβέρ τρόπος σο μπορίνασα τι σικαβάς ότι ντάσα-αμέν γκοντί ο Κυβερνών Σώμας ισί τι κεράς ο πιο λατσσό σο μπορίνασα κο έργος κι Ντεβλέσκο. Ο εδάφιος Εβραίους 13:7 βακερέλα κο Χριστιανοί τι τθερέν ι πίστη ι τζενένγκι σο τθερένα ι ευθύνη αντρέ κι εκκλησία. Ο Κυβερνών Σώμας σικαβέλα μπουτ μπαρί πίστη επειδή βακερέλα αντράλ πι γκίσταρ ο λατσσέ αμπέρια ντα κερέλα γιαβερά-ντα πράγματα για τι αβέλ-πες ο έργος. Αμέν υποστηρίνασα οντουλέ πφραλέν κο μπουτ σημαντικός έργος σο κερένα; Άμα βοηθίνασα-λεν, κα νιωθίνας χαρούμενοι όταν κα ασουνάς ι Ιησούς τι βακερέλ αμένγκε: «Αφού κερντέν-λες ανταβά μι πφραλένγκε, ατζέ-ντα κο πιο χουρντό λένταρ, κερντέν-λες μάνγκε-ντα».—Ματθαίος 25:34-40.

19. Σόσκε ισινέν αποφασισμέ τι ακολουθίνεν Οντουλές σο οδηγίνελα-αμέν, ι Ιησούς;

¹⁹ Όταν ο Ιησούς βουρτισάλο κο ουρανός, να μουκχλάς πι μαθητέν κόρκορε. (Ματθαίος 28:20) Τζανέλας ότι ο άγιος πνεύμας, ο άγγελοι ντα ο Λάφι ι Ντεβλέσκο βοηθιντέ-λες τι οδηγίνελ ι λαός αζομάν σο ισινέ κι πφουβ. Βοβ ντέλα κο πιστός δούλος αντιβές ι ίδια βοήθεια. Ο Κυβερνών Σώμας συνεχίνελα τι “ακολουθίνελ ι Μπρακές”, ι Ιησούς, «κάι-ντα τζάλα». (Αποκάλυψη 14:4) Οτθάρ, όταν αμέν ακολουθίνασα ο οδηγίες σο ντέλα-αμέν ο Κυβερνών Σώμας, ακολουθίνασα Οντουλές σο οδηγίνελα-αμέν, ι Ιησούς. Ατζεχάνικ, βοβ κα οδηγίνελ-αμέν σε εκ ζωή σο ποτές να κα τελειώνελ. (Αποκάλυψη 7:14-17) Ντα καέκ τζενό, καέκ αρχηγός, να μπορίνελα τι ντελ ανταγιά υπόσχεση!