1. Καλά λατσσέ πράγματα μπορίνασα τι τθεράς επειδή ντιντιλό ο λύτρος;

Η ΘΥΣΙΑ σο κερντάς ο Ιησούς Χριστός, τι ντελ πι ζωή σαρ λύτρος, ανέλα μπουτ ευλογίες. Για παράδειγμας, ο λύτρος πουτρέλα ι πόρτα σαρέ κο τσσαβέ του Αδάμ σο μανγκένα ι δικαιοσύνη τι αβέν κο μέλλον αντρέ κι φαμιλί κι Ντεβλέσκι. Εκ γιαβέρ ευλογία ισί ότι τθεράσα ι ευκαιρία τι τζουβντιάς για πάντα ευτυχισμέ. Όμως ατζέ πιο σημαντικός ισί ακαβά: Ο λύτρος τθερέλα τι κερέλ μπαρέ πραγματέντζαρ σο επηρεάνενα σαρέ οντουλέν σο τζουβντιόνα κο ουρανός ντα κι πφουβ.—Εβραίους 1:8, 9.

2. (α) Καλέ σημαντικέ πραγματένγκε κο ουρανός ντα κι πφουβ προσευχισάλο ο Ιησούς; (Ντικχ ι φωτογραφία σο ισί κι αρχή.) (β) Σο κα ντικχάς ανταλέ μαθημάστε;

² Περίπου ντούι μπρεσά πριν τι μερέλ ο Ιησούς, σικλιαρντάς πι μαθητέν τι προσευχίντιβεν: «Ντάντε σο ισινάν κο ουρανός, τι αγιάντιβελ το ναβ. Τι αβέλ τι βασιλεία. Τι αβέλ οντουβά σο μανγκέσα, σαρ αβέλα-πες κο ουρανός, αντικάς τι αβέλ-πες οπράλ κι πφουβ-ντα». (Ματθαίος 6:9, 10) Ανταλέ μαθημάστε κα ντικχάς σαρ ο λύτρος βοηθίνελα τι αγιάντιβελ ο ναβ ι Ιεχωβάσκο, τι κυβερνίνελ η Βασιλεία ι Ντεβλέσκι ντα τι αβέλ-πες οντουβά σο μανγκέλα ο Ντεβέλ.

3. Σο σικαβέλα ο ναβ ι Ιεχωβάσκο; Σαρ προσπαθιντάς ο Σατανάς τι μελιαρέλ ι Ιεχωβάσκο ναβ;

³ Πρώτα ο Ιησούς προσευχισάλο τι αγιάντιβελ ι Ιεχωβάσκο ναβ, δηλαδή τι σεβάνεν-λες σαρέ. Ο ναβ ι Ιεχωβάσκο σικαβέλα κον ισί ο Ιεχωβά, σαρί ι προσωπικότητα λέσκι. Ισί ο πιο ζουρανό ντα ο πιο δίκαιος σαρό κο σύμπαν. Ο Ιησούς επίσης βακερντάς λέσκε: «Άγιε Ντάντε». (Ιωάννης 17:11) Επειδή ο Ιεχωβά ισί άγιος, σαρέ ο πράγματα σο κερέλα ντα σαρέ ο νόμοι σο τσσουβέλα ισί άγιοι. Όμως κι Εδέμ, ο Σατανάς βακερντάς με εκ πφιρνικανό τρόπος ότι ο Ντεβέλ να τθερέλα ο δικαίωμας τι τσσουβέλ νόμους κο τζενέ. Βακερντάς ψέματα ντα προσπαθιντάς τι μελιαρέλ ι Ιεχωβάσκο ναβ.—Γένεση 3:1-5.

4. Σο κερντάς ο Ιησούς για τι αγιάντιβελ ο ναβ ι Ντεβλέσκο;

⁴ Οκιά μπάνταρ, ο Ιησούς μανγκέλας μπαγιά ο ναβ ι Ιεχωβάσκο ντα κερντάς σο νακχέλας λέσκε βαστέσταρ για τι αγιάνελ-λες. (Ιωάννης 17:25, 26) Σαρ κερντάς-λες ανταβά; Οντουλέντζαρ σο κερέλας ντα σικλιαρέλας, ο Ιησούς βοηθιντάς ι γιαβερέν τι ντικχέν ότι ο νόμοι ι Ιεχωβάσκε ισί σωστοί ντα ότι σαρέ ο πράγματα σο μανγκέλα αμένταρ ισί αμαρέ λατσσιμάσκε. (Διαβάνεν Ψαλμός 40:8-10) Ατζέ-ντα όταν ο Σατανάς αντάς λέσκε εκ μπουτ μπέτι μεριπέ, ο Ιησούς ατσσιλό πιστός. Σικαντάς ότι εκ τέλειος τζενό μπορίνελα τι ντελ καν ι Ιεχωβάς σαρέ κο πράγματα.

5. Σο μπορίνασα τι κεράς για τι αγιάντιβελ ο ναβ ι Ντεβλέσκο;

⁵ Σαρ μπορίνασα τι σικαβάς ότι μανγκάσα ο ναβ ι Ιεχωβάσκο; Οντουλέντζαρ σο κεράσα. Ο Ιεχωβά ντέλα-αμέν ι εντολή τι αβάς άγιοι. (Διαβάνεν 1 Πέτρου 1:15, 16) Ανταβά μανγκέλα τι βακερέλ ότι ντάσα λατρεία σάντε λέστε ντα ασουνάσα-λες αντράλ αμαρέ γκίσταρ. Ατζέ-ντα όταν τθεράσα διωγμός, κεράσα ο πιο λατσσό σο μπορίνασα για τι τζουβντιάς αντικάς σαρ σικλιαρέλα-αμέν ο Ιεχωβά. Όταν κεράσα αμαρέ ζωγιάτε ο νόμους ι Ιεχωβάσκε, δοξάνασα λέσκο ναβ. (Ματθαίος 5:14-16) Σικαβάσα ότι λέσκε νόμοι ισί λατσσέ ντα ότι ο Μπενγκ ισί ψεύτης. Να ισινάμ τέλειοι, οντουλέσκε κα κεράς λάθη. Όταν όμως κεράσα λάθη, μετανιώνασα ντα κεράσα ο πιο λατσσό σο μπορίνασα για τι σταματίνας τι κεράς πράγματα σο μελιαρένα ι Ιεχωβάσκο ναβ.—Ψαλμός 79:9.

6. Σόσκε μπορίνασα τι αβάς δίκαιοι κι Ιεχωβάσκε γιακχά, παρόλο σο ισινάμ ατελείς;

⁶ Είτε ισινάμ χρισμέ είτε κατά “γιαβερά μπρακέ”, ο Ιεχωβά συγχωρίνελα αμαρέ αμαρτίες άμα πακιάσα κο λύτρος. Δεχτίνελα οντουλέν σο αφιερώνενα πουμαρό νεαυτός λέστε ντα μουκχέλα-λεν τι ντεν-λες λατρεία. Λέσκε γιακχίντε, αβένα δίκαιοι εμ ο χρισμέ Χριστιανοί σο αβένα λέσκε τσσαβέ, εμ ο “γιαβερά μπρακέ” σο αβένα λέσκε αμαλά. (Ιωάννης 10:16· Ρωμαίους 5:1, 2· Ιακώβου 2:21-25) Οτθάρ, ατζέ-ντα ακανά, επειδή τθεράσα ο λύτρος, μπορίνασα τι τθεράς εκ λατσσί φιλία αμαρέ Νταντέσαρ ντα τι αγιάνας λέσκο ναβ.

7. Καλά ευλογίες κα αβέν επειδή ντιντιλό ο λύτρος;

⁷ Κι προσευχή σο κερντάς, ο Ιησούς βακερντάς: «Τι αβέλ τι βασιλεία». Σαρ επηρεάνελα ο λύτρος ι Βασιλεία ι Ντεβλέσκι; Κι Βασιλεία κι Ντεβλέσκι, δηλαδή κι κυβέρνηση κι Ντεβλέσκι, κυβερνίνελα ο Ιησούς ντα ο 144.000, σο τραμπιντάς-λεν ο Ντεβέλ κατά τζενέ. Επειδή ντιντιλό ο λύτρος, οντουλά τζενέ μπορίνενα τι αναστίντιβεν κο ουρανός. (Αποκάλυψη 5:9, 10· 14:1) Κα αβέν βασιλιάδες ντα ιερείς ντα κα κυβερνίνεν ι πφουβ ι Ιησούσαρ για χίλια μπρεσά. Οντουλά μπρεσά, ο Ιεχωβά κα χρησιμοποιήνελ ι Βασιλεία για τι κερέλ ι πφουβ παράδεισος ντα για τι βοηθίνελ σαρέ ι τζενέν  τι αβέν τέλειοι. Ο υπηρέτες ι Ιεχωβάσκε κο ουρανός ντα κι πφουβ κα αβέν επιτέλους εκ φαμιλί. (Αποκάλυψη 5:13· 20:6) Ο Ιησούς κα καταστραφίνελ ι Μπενγκές ντα κα νασκιαρέλ σαρέ ο προβλήματα σο αντάς.—Γένεση 3:15.

8. (α) Σαρ βοηθιντάς ο Ιησούς πι μαθητέν τι αγαβέν καζόμ σημαντική ισί η Βασιλεία ι Ντεβλέσκι; (β) Σαρ υποστηρίνασα ι Βασιλεία αμαρέ ντιβεσέντε;

⁸ Ο Ιησούς βοηθιντάς πι μαθητέν τι αγαβέν καζόμ σημαντική ισί η Βασιλεία ι Ντεβλέσκι. Σαρ; Αφού μπολντιλό, ο Ιησούς αμέσως αρχισάλο τι βακερέλ «ο λατσσέ αμπέρια για τη Βασιλεία ι Ντεβλέσκι» κατέ-ντα τι τζάλας. (Λουκάς 4:43) Επίσης, βακερντάς πι μαθητένγκε τι αβέν λέσκε μάρτυρες «ατζέ-ντα κο τθαν σο ισί πιο ντουρ οπράλ κι πφουβ». (Πράξεις 1:6-8) Αμαρέ ντιβεσέντε, επειδή βακέρντιβενα ο λατσσέ αμπέρια για τη Βασιλεία, ο τζενέ τθερένα ι ευκαιρία τι σικλιόν για το λύτρος ντα τι υποστηρίνεν ι Βασιλεία ι Ντεβλέσκι. Αμέν σικαβάσα ότι υποστηρίνασα πιστά ι Βασιλεία όταν βοηθίνασα ι χρισμέ Χριστιανόν τι βακερέν σαρό κο ντουνιάς ο λατσσέ αμπέρια.—Ματθαίος 24:14· 25:40.

9. Σόσκε μπορίνασα τι αβάς σίγουροι ότι ο Ιεχωβά κα κερέλ ο σκοπός σο τθερέλας ι τζενένγκε;

⁹ Σο μανγκέλας τι βακερέλ ο Ιησούς όταν βακερντάς πιο σοράν: «Τι αβέλ οντουβά σο μανγκέσα»; Όταν ο Ιεχωβά βακερέλα ότι κάτι κα αβέλ-πες, σίγουρα κα αβέλ-πες. (Ησαΐας 55:11) Ο Μπενγκ να κα μπορίνελας τι εμποδίνελ ι Ιεχωβάς. Σο ισινέ οντουβά σο μανγκέλας ο Ιεχωβά ι πφουβιάκε; Μανγκέλας τι πφερντιόλ η πφουβ ι τέλειε τσσαβέντζαρ του Αδάμ ντα της Εύας. (Γένεση 1:28) Άμα ο Αδάμ ντα η Εύα μουλέας χωρίς τι κερέν τσσαβέν, ο σκοπός σο τθερέλας ο Ντεβέλ τι πφερντιόλ η πφουβ λένγκε τσσαβέντζαρ να κα αβέλας. Οτθάρ, ο Ιεχωβά μουκχλάς-λεν τι κερέν τσσαβέν. Ο λύτρος ντέλα σαρέ οντουλέντε σο τθερένα πίστη ι ευκαιρία τι αβέν τέλειοι ντα τι τζουβντιόν για πάντα. Ο Ιεχωβά μανγκέλα ι τζενέν ντα μανγκέλα αμένταρ τι τθεράς ι λατσσί ζωή σο τθερέλας πι γκοντιάτε αμένγκε.

10. Σο λατσσιπέ κερέλα ο λύτρος κο τζενέ σο μουλέ;

¹⁰ Σο κα αβέλ-πες ι μπουτέ τζενέντζαρ σο μουλέ χωρίς τι τθερέν ποτές ι ευκαιρία τι σικλιόν ι Ιεχωβάς; Ο Ιεχωβά να μανγκέλα τι μερέν ο τζενέ, αλλά τι τζουβντιόν. Οτθάρ, κα ανέλ πάλι κι ζωή οντουλέν σο μουλέ. Επειδή ντιντιλό ο λύτρος, μπορίνενα τι αβέν πάλι κι ζωή. Σοράν, κα τθερέν ι ευκαιρία τι σικλιόν ι Ιεχωβάσκε ντα τι τζουβντιόν για πάντα. (Πράξεις 24:15) Ο Ιεχωβά ισί Οντουβά σο ντέλα ι ζωή. Όταν ο Ιεχωβά κα τζουβντιαρέλ οντουλέν σο μουλέ, κα αβέλ λένγκο Ντατ. (Ψαλμός 36:9) Κι προσευχή σο κερντάς, ο Ιησούς βακερντάς ότι ο Ιεχωβά ισί “αμαρό Ντατ σο ισί κο ουρανός”. (Ματθαίος 6:9) Ο Ιεχωβά ντινάς κο Ιησούς εκ μπουτ σημαντικός ρόλος για τι αβέλ η ανάσταση ι μουλένγκι. Ο Ιησούς βακερντάς: «Με ισινόμ η ανάσταση ντα η ζωή».—Ιωάννης 6:40, 44· 11:25.

11. Σο ισί οντουβά σο μανγκέλα ο Ντεβέλ για το «μπαρό πλήθος»;

¹¹ Επίσης ο Ιησούς βακερντάς: «Κον κερέλα οντουβά σο μανγκέλα ο Ντεβέλ, ισί μο πφραλ ντα μι πφεν ντα μι ντάι». (Μάρκος 3:35) Ο Ντεβέλ μανγκέλα τι ντεν-λες λατρεία τζενέ σαρέ κατά τθεμά, κατά φυλές ντα κατά τσσιμπά. Βον ισί «εκ μπαρό πλήθος, σο να μπορίνελας καέκ τζενό τι γκινέλ-λες». Πακιάνα κο λύτρος ντα μανγκένα τι ντεν καν ι Ντεβλές. Δοξάνενα-λες ντα βακερένα: «Σωσάλαμ αμαρέ Ντεβλέσταρ, σο μπεσέλα κο θρόνος, ντα κατά Μπρακό».—Αποκάλυψη 7:9, 10.

12. Κατά προσευχή σο κερντάς ο Ιησούς, σο σικλιάσα για το σκοπός σο τθερέλα ο Ιεχωβά ι τζενένγκε;

 ¹² Κατά προσευχή σο κερντάς ο Ιησούς, σικλιλάμ μπουτ πράγματα ι Ιεχωβάσκε ντα για το σκοπός σο τθερέλα ι τζενένγκε. Πρώτον, πρέπει τι κεράς ο πιο λατσσό σο μπορίνασα για τι αγιάνας ι Ιεχωβάσκο ναβ ντα τι δοξάνας-λες. (Ησαΐας 8:13) Ο λύτρος σο ντινάς ο Ιησούς, σο ντέλα-αμέν ι ευκαιρία τι σώντιβας, δοξάνελα ι Ντεβλέσκο ναβ-ντα. Κι πραγματικότητα, ο ναβ ι Ιησούσκο μανγκέλα τι βακερέλ «Ο Ιεχωβά Ισί Οντουβά σο Σώνελα». Δεύτερον, ο Ιεχωβά κα χρησιμοποιήνελ πι Βασιλεία για τι ανέλ κο τζενέ σο ντένα-λες καν σαρέ ο λατσσέ πράγματα σο αβένα κατά λύτρος. Ντα τρίτον, ισινάμ σίγουροι ότι οντουβά σο μανγκέλα ο Ιεχωβά κα αβέλ-πες επειδή καέκ να μπορίνελα τι εμποδίνελ-λες.—Ψαλμός 135:6· Ησαΐας 46:9, 10.

13. Σόσκε μπολντιάσα;

¹³ Εκ σημαντικός τρόπος σο σικαβάσα αμαρί εκτίμηση για το λύτρος ισί τι αφιερώνας αμαρί ζωή κο Ιεχωβά ντα τι μπολντιάς. Αντικάς σικαβάσα ότι πακιάσα κο λύτρος ντα ότι «ισινάμ ι Ιεχωβάσκε». (Ρωμαίους 14:8) Όταν μπολντιάσα, μανγκάσα κατά Ιεχωβά τι ντελ-αμέν «λατσσί συνείδηση». (1 Πέτρου 3:21) Για τι απαντίνελ οντουλέστε σο μανγκάσα λέσταρ, ο Ιεχωβά ανέλα αμένγκε ευλογίες αντράλ κατά λύτρος. Ντα ισινάμ μπουτ σίγουροι ότι κα ντελ-αμέν σαρέ οντουλά σο βακερντάς.—Ρωμαίους 8:32.

14. Σόσκε ντέλα-αμέν ο Ιεχωβά ι εντολή τι μανγκάς ι γιαβερέν;

¹⁴ Σο-ντα κερέλα ο Ιεχωβά, κερέλα-λες επειδή τθερέλα αγάπη. Μανγκέλα λέσκε υπηρέτες τι μοιάζεν λέστε ντα τι μανγκέν ο εκ ι γιαβερές. (1 Ιωάννη 4:8-11) Όταν μανγκάσα ι τζενέν, σικαβάσα ότι μανγκάσα τι αβάς «τσσαβέ [αμαρέ] Νταντέσκε σο ισί κο ουρανός». (Ματθαίος 5:43-48) Η πρώτη ντα πιο μπαρί εντολή ισί τι μανγκάς ι Ιεχωβάς ντα η δεύτερη τι μανγκάς ι γιαβερέν. (Ματθαίος 22:37-40) Εκ τρόπος για τι σικαβάς ότι μανγκάσα ι τζενέν ισί τι σικλιαράς-λεν ο λατσσέ αμπέρια για τη Βασιλεία ι Ντεβλέσκι. Άμα ντάσα καν κι εντολή σο ντέλα ο Ιεχωβά τι μανγκάς ι γιαβερέν, ειδικά αμαρέ πφραλέν, αμαρί αγάπη λέσκε “κα αβέλ τέλεια”.—1 Ιωάννη 4:12, 20.

15. (α) Καλά ευλογίες λάσα ακανά κατά Ιεχωβά; (β) Καλά ευλογίες κα λας κο μέλλον;

¹⁵ Ο Ιεχωβά βακερέλα ότι, επειδή τθεράσα πίστη κο λύτρος, αμαρέ αμαρτίες “εξαφανίντιβενα”. Βοβ μπορίνελα τι συγχωρίνελ σαρέ αμαρέ αμαρτίες. (Διαβάνεν Πράξεις 3:19-21) Σαρ ντικχλάμ πιο πριν, επειδή ντιντιλό ο λύτρος, ο Ιεχωβά μπορίνελα τι λελ πέσκε μερικέ τζενέν για τι αβέν λέσκε τσσαβέ κο ουρανός. Οντουλά ισί ο χρισμέ. (Ρωμαίους 8:15-17) Ο Ντεβέλ καλίνελα οντουλέν σο ισί κατά «γιαβερά μπρακέ» τι αβέν αντρέ λέσκε φαμιλιάτε ατθέ κι πφουβ. Αφού κα αβέν τέλειοι, κα δοκιμάντιβεν για εκ τελευταία φορά. Άμα κα ατσσόν πιστοί κο Ιεχωβά, κα αβέν βον-ντα λέσκε τσσαβέ. (Ρωμαίους 8:20, 21· Αποκάλυψη 20:7-9) Ο Ιεχωβά πάντα κα μανγκέλ σαρέ πι τσσαβέν. Ο λύτρος κα συνεχίνελ τι ανέλ για πάντα ευλογίες. (Εβραίους 9:12) Ο Ιεχωβά ντινάς-αμέν ανταβά δώρος σο τθερέλα μπαρί αξία ντα καέκ να μπορίνελα τι λελ-λες αμένταρ.

16. Σαρ βοηθίνελα-αμέν ο λύτρος τι ελευθερώντιβας;

¹⁶ Άμα κα μετανιώνας μπαγιά αμαρέ αμαρτιένγκε, ο Διάβολος να κα μπορίνελ τι κερέλ τίποτα σο κα εμποδίνελ-αμέν τι αβάς τελικά αντρέ κι φαμιλί κι Ιεχωβάσκι. Ο Ιησούς μουλό «εκ φαρ για πάντα». Ο λύτρος ντιντιλό ντα ανταβά να αλλάνελα. (Εβραίους 9:24-26) Ο Αδάμ ντινάς-αμέν ο μεριπέ, αλλά η θυσία ι Ιησούσκι κα ντελ-αμέν ζωή για πάντα. Ο λύτρος μπορίνελα τι ελευθερώνελ-αμέν κατά Μπενγκέσκο ντουνιάς ντα τι βοηθίνελ-αμέν μα τι νταράς κατά μεριπέ.—Εβραίους 2:14, 15.

17. Σο σημασία τθερέλα τουμένγκε η αγάπη ι Ιεχωβάσκι;

¹⁷ Ο υποσχέσεις ι Ντεβλέσκε πάντα κα νικιόν μπαγιά. Σαρ ισί ο νόμοι σο τσσουντάς ο Ιεχωβά κι φύση, σο να αλλάνενα ποτές, αντικάς ο Ιεχωβά-ντα να κα αλλάνελ ποτές. Βοβ ποτές να κα μουκχέλ-αμέν. (Μαλαχίας 3:6) Ο Ιεχωβά να ντέλα-αμέν σάντε ο δώρος ι ζωγιάκο αλλά ατζέ πιο μπουτ πράγματα. Ντέλα-αμέν πι αγάπη. «Αμέν σικλιλάμ ντα πακιαντάμ ι αγάπη σο τθερέλα αμένγκε ο Ντεβέλ. Ο Ντεβέλ ισί αγάπη». (1 Ιωάννη 4:16) Λέσκε υποσχέσεις πάντα νικιόνα μπαγιά. Ατζεχάνικ, η πφουβ κα αβέλ εκ μπουτ σουκάρ παράδεισος. Σαρέ οντουλά σο κα τζουβντιόν κα μοιάζεν κο Ιεχωβά ντα κα μανγκέν ο εκ ι γιαβερές. Αζομάν σαρέ λέσκε υπηρέτες κο ουρανός ντα κι πφουβ κα βακερέν: «Η ευλογία ντα η δόξα ντα η σοφία ντα η ευχαριστία ντα η τιμή ντα η ζορ ισί αμαρέ Ντεβλέσκε για πάντα. Αμήν».—Αποκάλυψη 7:12.