1, 2. (α) Σο μουτθαντάς αμένγκε ο Ιεχωβά; (β) Καγιά υπόσχεση αρακχάσα κο εδάφια Ησαΐας 46:10, 11 ντα 55:11;

Ο ΠΡΩΤΕΣ λέξεις κι Αγία Γραφή βακερένα εκ απλός αλλά μπουτ σημαντικός λάφι: «Κι αρχή ο Ντεβέλ κερντάς ο ουρανός ντα ι πφουβ». (Γένεση 1:1) Τθεράσα ντικχλό σάντε χάνικ πράγματα σαρέ οντουλένταρ σο κερντάς ο Ντεβέλ κο σύμπαν ντα αγαβάσα μπουτ χάνικ πράγματα για το διάστημας, το φως, τη βαρύτητα ντα γιαβερέ ασακέ πραγματένγκε. (Εκκλησιαστής 3:11) Όμως, ο Ιεχωβά μουτθαντάς αμένγκε ο σκοπός σο τθερέλα ι πφουβιάκε ντα ι τζενένγκε. Κερντάς ι τζενέν τι μοιάζεν Λέστε ντα μανγκέλας τι απολαμβάνεν ι ζωή κι πφουβ. (Γένεση 1:26) Βον κα αβένας ο τσσαβέ λέσκε ντα βοβ κα αβέλας ο Ντατ λένγκο.

² Κο τρίτος κεφάλαιος κι Γένεση, σικλιάσα ότι ο σκοπός ι Ιεχωβάσκο αρακχλάς μερικά εμπόδια. (Γένεση 3:1-7) Αλλά να υπαρχίντιβελα καέκ πρόβλημας σο ναστί λύνελα-λες ο Ιεχωβά. Καέκ ναστί εμποδίνελα-λες. (Ησαΐας 46:10, 11· 55:11) Μπορίνασα τι αβάς σίγουροι ότι ο σκοπός σο τθερέλας κι αρχή ο Ιεχωβά κα αβέλ ακριβώς πι σαατίστε!

3. (α) Καλά σημαντικές αλήθειες βοηθίνενα-αμέν τι αγαβάς οντουβά σο βακερέλα η Γραφή; (β) Σόσκε κα συζητίνας ακανά ανταλά αλήθειες; (γ) Καλά ερωτήσεις κα ντικχάς;

 ³ Σίγουρα, τζανάσα καβά ισί ο σκοπός ι Ντεβλέσκο ι πφουβιάκε ντα ι τζενένγκε ντα ο ρόλος σο τθερέλα ο Ιησούς ανταλέ σκοπόστε. Ανταλά ισί μπουτ σημαντικές αλήθειες κατά Γραφή ντα μπορεί τι ισινέ ο πρώτες αλήθειες σο σικλιλάμας όταν αρχισάλαμ τι διαβάνας ο Λάφι ι Ντεβλέσκο. Ακανά μανγκάσα τι βοηθίνας γιαβερέν-ντα τι σικλιόν ανταλά μπουτ σημαντικές αλήθειες. Κάθε μπρες ανταλέ ντιβεσέντε, τθεράσα εκ λατσσί ευκαιρία τι κεράς-λες ανταβά όταν καλίνασα τζενέν κι Ανάμνηση για τι ντεν-πες γκοντί ο μεριπέ ι Χριστόσκο. (Λουκάς 22:19, 20) Άμα βον κα αβέν κι Ανάμνηση, κα σικλιόν πιο μπουτ πράγματα για το σουκάρ σκοπός ι Ντεβλέσκο. Οτθάρ, ακανά ισί ο καιρός τι σκεφτίνας σο ερωτήσεις μπορίνασα τι κεράς ι τζενένγκε για τι ενθαρρύνας-λεν τι αβέν. Ανταλέ μαθημάστε, κα ντικχάς τριν ερωτήσεις: Καβά ισί ο σκοπός ι Ντεβλέσκο ι πφουβιάκε ντα ι τζενένγκε; Σο να γκιλό λατσσές; Ντα σόσκε η θυσία ι Ιησούσκι ισί ο κλειδίς σο πουτρέλα ι πόρτα για τι αβέλ ο σκοπός ι Ντεβλέσκο;

4. Σαρ η δημιουργία “κερέλα λάφι για τη δόξα ι Ντεβλέσκι”;

⁴ Ο Ιεχωβά ισί ο Δημιουργός σο αξίνελα αμαρί εκτίμηση ντα αμαρό σεβασμός. Σο-ντα κερντάς ισί μπουτ λατσσό. (Γένεση 1:31· Ιερεμίας 10:12) Σο μπορίνασα τι σικλιάς κάνα ντικχάσα ότι ο πράγματα σο κερντάς ισί μπουτ σουκάρ ντα τσσουντάς-λεν εκχέ σειράτε; Σικλιάσα ότι σαρέ ο πράγματα σο κερντάς ο Ιεχωβά, κατά πιο χουρντό μέχρι κο πιο μπαρό, ισί αμαρέ λατσσιμάσκε. Επίσης, σαρ νιωθίνενα όταν ντικχένα ο τσεργανιά σο ισί κο ουρανός ή εκχέ χουρντέ μαξιμίς ή ο κχαμ αζομάν σο περέλα; Μπεϊντίνασα ανταλά πράγματα επειδή ο Ιεχωβά κερντάς-αμέν με την ικανότητα τι αγαβάς σο ισί σουκάρ.—Διαβάνεν Ψαλμός 19:1· 104:24.

5. Σο κερντάς ο Ιεχωβά για τι μπορίνεν σαρέ ο πράγματα κο σύμπαν τι τθερέν λατσσί συνεργασία;

⁵ Ο Ιεχωβά τσσουντάς όρια σαρί κι δημιουργία. Τσσουντάς νόμους κι φύση ντα κερντάς ηθικούς-ντα νόμους. Τσσουντάς ανταλά νόμους για τι μπορίνεν σαρέ ο πράγματα κο σύμπαν τι τθερέν λατσσί συνεργασία. (Ψαλμός 19:7-9) Σαρέ ο πράγματα κο σύμπαν τθερένα συγκεκριμέ θέση ντα κερένα συγκεκριμέ πράγματα. Για παράδειγμας, ο νόμος της βαρύτητας ατσσικιαρέλα ι ατμόσφαιρα πασέ κι πφουβ ντα επηρεάνελα ο ντεριαβά ντα ο παλίρροιες. Να κα μπορίναας τι τζουβντιάς άμα να κα τθεράας ι βαρύτητα. Ο όρια σο τσσουντάς ο Ιεχωβά κι φύση τθερένα σαρ αποτέλεσμας τι αβέν σαρέ ο πράγματα σε εκ σειράς κο σύμπαν. Ανταβά σικαβέλα ότι τθερέλα εκ σκοπός ι πφουβιάκε ντα ι τζενένγκε. Κο έργος σο κεράσα, μπορίνασα τι βοηθίνας ι γιαβερέν τι γνωρίνεν Οντουλές σο κερντάς ο σουκάρ σύμπαν.—Αποκάλυψη 4:11.

6, 7. Καλά ισί μερικά δώρα σο ντινάς ο Ιεχωβά κο Αδάμ ντα κι Εύα;

⁶ Ο σκοπός σο τθερέλας ο Ιεχωβά ι τζενένγκε ισινέ τι τζουβντιόν για πάντα κι πφουβ. (Γένεση 1:28· Ψαλμός 37:29) Ισί γενναιόδωρος, οτθάρ ντινάς κο Αδάμ ντα κι Εύα μπουτ ντα σουκάρ δώρα. (Διαβάνεν Ιακώβου 1:17) Ο Ιεχωβά ντινάς-λεν εμ ι ελευθερία τι τραμπίνεν σο κα κερέν εμ ι ικανότητα τι σκεφτίνεν λογικά, τι μανγκέν ντα τι απολαμβάνεν φιλίες. Ο Δημιουργός κερέλας λάφι κο Αδάμ ντα σικλιαρέλας-λες  σαρ τι κερέλ ο λατσσιπέ. Ο Αδάμ σικλιόλας επίσης σαρ τι φροντίνελ πο νεαυτός, ο ζώα ντα ι πφουβ. (Γένεση 2:15-17, 19, 20) Ο Ιεχωβά ντινάς κο Αδάμ ντα κι Εύα ι ικανότητα τι χαν, τι ασταρέν, τι ντικχέν, τι ασουνέν ντα τι ασουνγκέν ο λατσσέ πράγματα σο κερντάς λένγκε. Αντικάς κα μπορίνενας τι απολαμβάνεν ι ζωή κι πφουβ, πουμαρέ σουκάρ κχερέστε. Ο Αδάμ ντα η Εύα τθερένας μπουτ πράγματα τι κερέν σο ανένας λένγκε χαρά. Ντα κα μπορίνενας τι σικλιόν ντα τι αρακχέν νεβέ πράγματα για πάντα.

⁷ Σο γιαβέρ έπρεπε τι αβέλ-πες για τι αβέλ ο σκοπός ι Ντεβλέσκο; Ο Ιεχωβά ντινάς κο Αδάμ ντα κι Εύα ι ικανότητα τι κερέν τέλειε τσσαβέν. Ντα λένγκε τσσαβέ κα κερένας βον-ντα τσσαβέν, μέχρι τι πφερντιόλας τζενέντζαρ σαρί η πφουβ. Ο Ιεχωβά μανγκέλας ο νταντά ντα ο νταγιά τι μανγκέν πουμαρέ τσσαβέν, σαρ μανγκέλας βοβ πι πρώτε τέλειε τσσαβέν σο ισινέ κι πφουβ, τον Αδάμ ντα την Εύα. Ντινάς κο τζενέ ι πφουβ ντα σαρέ ο σουκάρ πράγματα σο ισί λάτε. Η πφουβ κα αβέλας ο κχερ λένγκο ντα κα μπεσένας για πάντα οτθέ.—Ψαλμός 115:16.

8. Σόσκε ο Ντεβέλ ντινάς κο Αδάμ ντα κι Εύα ο νόμος σο ισινέ κο εδάφια Γένεση 2:16, 17;

⁸ Ο πράγματα να αβιλέ-πες αμέσως σαρ μανγκέλας-λεν ο Ιεχωβά. Σο αβιλό-πες; Ο Ιεχωβά ντινάς κο Αδάμ ντα κι Εύα εκ απλός νόμος για τι τζανέν ο όρια σο τθερέλας λένγκι ελευθερία. Βακερντάς: «Σαρέ κατά δέντρα σο ισί κο κήπος μπορίνεσα τι χας μέχρι τι τσαλιός. Αλλά κατά δέντρος σο ντέλα γνώση οντουλέσκε σο ισί λατσσό ντα οντουλέσκε σο ισί κακός δεν πρέπει τι χας, σόσκε οντουβά ντιβές σο κα χας λέσταρ σίγουρα κα μερές». (Γένεση 2:16, 17) Να ισινέ δύσκολος λένγκε τι αγαβέν ανταβά νόμος. Ντα να κα αβέλας δύσκολος τι ντεν καν, από τη στιγμή σο τθερένας μπερεκέτι λατσσό χαμπέ κο κήπος.

9, 10. (α) Καλέ πραγμάσκε κατηγοριντάς ο Σατανάς ι Ιεχωβάς; (β) Σο αποφασιντάς τι κερέλ ο Αδάμ ντα η Εύα; (Ντικχ ι φωτογραφία σο ισί κι αρχή.)

⁹ Ο Σατανάς ο Διάβολος χρησιμοποιηντάς εκχέ σαπές για τι χουχαβέλ ι Ευά ντα τι κερέλ-λα μα τι ντελ καν πι Νταντές, ι Ιεχωβάς. (Διαβάνεν Γένεση 3:1-5· Αποκάλυψη 12:9) Ο Σατανάς μανγκέλας τι σικαβέλ ότι να ισινέ σωστός μα τι μπορίνεν ο Αδάμ ντα η Εύα, σο ισινέ τσσαβέ ι Ντεβλέσκε, τι χαν “από κάθε δέντρος σο ισινέ κο κήπος”. Ισινέ σαρ τι βακερέλας: “Δηλαδή να μπορίνενα τι κερέν οντουβά σο μανγκένα;” Σοράν, βακερντάς κι Εύα: «Σίγουρα να κα μερέν». Ανταβά ισινέ ψέμας. Πιο σοράν, προσπαθιντάς τι κερέλ-λα τι πακιάλ ότι να χρειαζίντιβελα τι ασουνέλ ι Ντεβλές. Ο Σατανάς βακερντάς: «Ο Ντεβέλ τζανέλα ότι, οντουβά ντιβές σο κα χαν ανταλέσταρ, σίγουρα τουμαρέ γιακχά κα πουτάρντιβεν». Ο Σατανάς βακερέλας ότι ο Ιεχωβά να μανγκέλας τι χαν ο φρούτος επειδή οντουβά κα κερέλας-λεν τι σικλιόν κάτι ξεχωριστός. Τελικά, ντινάς-λεν ακαγιά ψεύτικη υπόσχεση: «Κα αβέν σαρ ο Ντεβέλ, ντα κα τζανέν εμ ο λατσσιπέ εμ ο γκεραλιπέ».

¹⁰ Ο Αδάμ ντα η Εύα έπρεπε τι αποφασίνεν σο κα κερένας. Κα ντένας καν ι Ντεβλές ή κα ασουνένας ι σαπές; Δυστυχώς αποφασιντέ μα τι ντεν καν ι Ντεβλές. Να μανγκλέ τι αβέλ λένγκο Ντατ ο Ιεχωβά ντα υποστηριντέ ι Μπενγκές. Ακανά ισινέ κορκορέ ντα ο Ιεχωβά να αρακχαβέλας-λεν.—Γένεση 3:6-13.

11. Σόσκε έπρεπε ο Ιεχωβά τι κερέλ κάτι για την αμαρτία του Αδάμ ντα της Εύας;

¹¹ Όταν ο Αδάμ ντα η Εύα να ασουντέ ο νόμος ι Ντεβλέσκο, τσσιναντέ τι αβέν  τέλειοι. Επίσης αβιλέ λέσκε ντουσμάνια, επειδή ο Ντεβέλ μισίνελα ο πφιρνιπέ. Λέσκε «γιακχά ισί μπουτ πάκι σο ναστί ντικχένα ο πφιρνιπέ». (Αββακούμ 1:13) Άμα ο Ιεχωβά να κερντάας τίποτα για την αμαρτία σο κερντάς ο Αδάμ ντα η Εύα, η ειρήνη ντα η ενότητα σαρέ οντουλένγκι σο τζουβντιόνα, εμ κο ουρανός εμ κι πφουβ, μπορεί τι χασάρντιβενας. Εμ ο άγγελοι εμ ο τζενέ κα σκεφτίνενας αν κα μπορίνενας τι ντεν μπέσα λέσκε λαφίστε. Αλλά ο Ιεχωβά ισί σταθερός κο νόμους σο τσσουβέλα. Πάντα ακολουθίνελα-λεν. (Ψαλμός 119:142) Παρόλο σο ο Αδάμ ντα η Εύα ισινέ ελεύθεροι τι τραμπίνεν σο κα κερέν, να κα μπορίνενας τι νασέν κατά μπέτι αποτελέσματα σο κα αβένας επειδή γκιλέ κόντρα κο Ιεχωβά. Οτθάρ, μουλέ ντα βουρτισάλε κι τσικ.—Γένεση 3:19.

12. Σο αβιλό-πες κο τσσαβέ του Αδάμ;

¹² Όταν ο Αδάμ ντα η Εύα χαλέ κατά φρούτος, ο Ιεχωβά να μπορίνελας τι μουκχέλ-λεν τι συνεχίνεν τι αβέν λέσκε φαμιλιάτε. Παλντιντάς-λεν κατά κήπος της Εδέμ, ντα να κα μπορίνενας τι βουρτίνεν ποτές οτθέ. (Γένεση 3:23, 24) Ο Ιεχωβά κερντάς τι αρακχέν ανγκλά-πουμέντε ο αποτελέσματα σο κα αβένας κατά λάθος απόφαση σο λιντέ. (Διαβάνεν Δευτερονόμιο 32:4, 5) Αντικάς, να μπορίνενας τι τθερέν τέλεια ο ιδιότητες ι Ιεχωβάσκε. Ο Αδάμ χασαρντάς εκ μπουτ σουκάρ μέλλον, όχι σάντε πι νεαυτόσκε, αλλά πι τσσαβένγκε-ντα. Ακανά μπορίνελας τι ντελ πι τσσαβέντε σάντε ι ατέλεια, ι αμαρτία ντα ο μεριπέ. (Ρωμαίους 5:12) Ο Αδάμ λιντάς λένταρ ι ευκαιρία τι τζουβντιόν για πάντα. Ο Αδάμ ντα η Εύα να κα μπορίνενας ποτές τι τθερέν τέλειε τσσαβέν, ντα οντουλά τσσαβέ να κα μπορίνενας τι κερέν τέλειε τσσαβέν. Αφού ο Μπενγκ κερντάς τον Αδάμ ντα την Εύα τι τζαν κόντρα κο Ντεβέλ, οτθάρ μπερί προσπαθίνελα τι επηρεάνελ σαρέ ι τζενέν τι κερέν ο ίδιος.—Ιωάννης 8:44.

13. Σο μανγκέλα ο Ιεχωβά ι τζενένγκε;

¹³ Ο Ιεχωβά συνεχίνελας τι μανγκέλ ι τζενέν. Παρόλο σο ο Αδάμ ντα η Εύα μουκχλέ-λες, συνεχίνελας τι μανγκέλ τι τθερέλ εκ λατσσί σχέση ι τζενέντζαρ. Ντα να μανγκέλας τι μερέλ καέκ λένταρ. (2 Πέτρου 3:9) Οτθάρ, ο Ντεβέλ αμέσως κανονιντάς ο πράγματα για τι μπορίνεν τι αβέν πάλι ο τζενέ αμαλά λέσαρ. Σαρ κα μπορίνελας τι κερέλ-λες ανταβά χωρίς τι τζαλ κόντρα κο νόμους σο τσσουντάς; Για τι ντικχάς.

14. (α) Σαρ βακερέλα ο εδάφιος Ιωάννης 3:16, σο κερντάς ο Ντεβέλ για τι σώνελ ι τζενέν κατά αμαρτία ντα κατά μεριπέ; (β) Καγιά ερώτηση κα μπορίναας τι συζητίνας ι τζενέντζαρ;

¹⁴ Διαβάνεν Ιωάννης 3:16. Μπουτ τζενέ οντουλένταρ σο καλίνασα κι Ανάμνηση μπορεί τι τζανένα ανταβά εδάφιος. Αλλά σαρ η θυσία σο κερντάς ο Ιησούς μπορίνελα τι ανέλ ζωή για πάντα; Τθεράσα ι ευκαιρία τι βοηθίνας ι τζενέν τι αγαβέν ι απάντηση ανταλέ ερωτησιάτε όταν καλίνασα-λεν κι Ανάμνηση, όταν ισινάμ λέντζαρ οτθέ ντα όταν τζάσα λένγκε πιο σοράν. Καζόμ αγαβένα ι σημασία σο τθερέλα ο λύτρος, αζόμ  πιο λατσσές κα αγαβέν καζόμ μπουτ μανγκέλα ο Ιεχωβά ι τζενέν ντα καζόμ σοφός ισί. Σο κα μπορίναας τι βακεράς λένγκε για το λύτρος;

15. Σαρ ξεχωρίνελας ο Ιησούς κατά Αδάμ;

¹⁵ Ο Ιεχωβά ντινάς εκχέ τέλειε τζενές σο κα μπορίνελας τι ντελ πι ζωή σαρ λύτρος. Οντουβά τέλειος τζενό κα χρειαζίντιβελας τι αβέλ πιστός κο Ιεχωβά. Έπρεπε τι μανγκέλ πι γκίσαρ τι ντελ πι ζωή ι τζενένγκε. (Ρωμαίους 5:17-19) Ο Ιεχωβά αντάς κατά ουρανός κι πφουβ ι ζωή ι Ιησούσκι, οντουλέσκι σο κερντάς πρώτα σαριλένταρ. (Ιωάννης 1:14) Αντικάς ο Ιησούς αβιλό εκ τέλειος τζενό, σαρ ισινέ ο Αδάμ. Όμως ο Ιησούς να κερντάς οντουβά σο κερντάς ο Αδάμ, αλλά κερντάς οντουβά σο μανγκέλας ο Ιεχωβά εκχέ τέλειε τζενέσταρ. Ατζέ-ντα όταν τθερέλας ο πιο μπαρέ δοκιμασίες, πάντα ντέλας καν κο νόμους κι Ντεβλέσκε.

16. Σόσκε ο λύτρος ισί αζόμ σημαντικός δώρος;

¹⁶ Πι μεριμάσαρ σαρ τέλειος τζενό, ο Ιησούς μπορίνελας τι σώνελ ι τζενέν κατά αμαρτία ντα κατά μεριπέ. Βοβ ισινέ ακριβώς οντουβά σο έπρεπε τι αβέλ ο Αδάμ. Ο Ιησούς ισινέ εκ τέλειος τζενό, σο ατσσόλας πιστός ντα ασουνέλας ι Ντεβλές σαρέ κο πράγματα. (1 Τιμόθεο 2:6) Μουλό αμένγκε, ντα η θυσία λέσκι ντέλα σαρέ κο μουρσά, κο τζουβλιά ντα κο τσσαβέ ι ευκαιρία τι τζουβντιόν για πάντα. (Ματθαίος 20:28) Ο λύτρος ισί ο κλειδίς σο πουτρέλα ι πόρτα για τι αβέλ ο σκοπός ι Ντεβλέσκο.—2 Κορινθίους 1:19, 20.

17. Καγιά ευκαιρία τθεράσα επειδή ντιντιλό-αμέν ο λύτρος;

¹⁷ Ο Ιεχωβά κερντάς εκ μπουτ μπαρί θυσία για τι ντελ ο λύτρος. (1 Πέτρου 1:19)  Βοβ εκτιμίνελα-αμέν αζόμ μπουτ σο ντινάς αντράλ πι γκίσταρ πι μοναδικέ Τσσαβές τι μερέλ αμένγκε. (1 Ιωάννη 4:9, 10) Κα μπορίναας τι βακεράς ότι ο Ιησούς αβιλό αμαρό ντατ αντί για τον Αδάμ. (1 Κορινθίους 15:45) Ο Ιησούς ντινάς-αμέν ι ευκαιρία, όχι σάντε τι τζουβντιάς για πάντα, αλλά τι βουρτίνας εκ ντιβές πάλι αντρέ κι φαμιλί κι Ντεβλέσκι. Επειδή ντιντιλό ο λύτρος, ο τζενέ κα αβέν τέλειοι ντα ο Ιεχωβά κα μπορίνελ τι δεχτίνελ-λεν πάλι πι φαμιλιάτε χωρίς τι τζαλ κόντρα κο νόμους σο τσσουντάς. Σκεφτίνεν καζόμ σουκάρ κα αβέλ όταν σαρέ ο τζενέ σο ισί πιστοί κο Ιεχωβά κα αβέν τέλειοι! Τελικά, σαρέ οντουλά σο κα τζουβντιόν κο ουρανός ντα κι πφουβ κα αβέν ενωμέ σαρ εκ φαμιλί. Κα αβάς σαρέ τσσαβέ ι Ντεβλέσκε.—Ρωμαίους 8:21.

18. Κάνα κα αβέλ ο Ιεχωβά «τα πάντα σαριλένγκε»;

¹⁸ Παρόλο σο ο Αδάμ ντα η Εύα μουκχλέ ι Ιεχωβάς, βοβ να σταματιντάς τι μανγκέλ ι τζενέν, ντα ντινάς ο λύτρος. Ντα παρόλο σο ισινάμ ατελείς, ο Σατανάς να μπορίνελα τι εμποδίνελ-αμέν τι αβάς πιστοί κο Ιεχωβά. Επειδή ο Ιεχωβά ντινάς-αμέν ο λύτρος, κα βοηθίνελ-αμέν τι αβάς δίκαιοι σαρέ κο πράγματα. Σκεφτίνεν σαρ κα αβέλ η ζωή όταν σαρέ οντουλά σο «δεχτίνενα ι Τσσαβές ντα τθερένα πίστη λέστε» κα τθερέν ζωή για πάντα! (Ιωάννης 6:40) Αμαρό αγαπημέ ντα σοφός Ντατ κα κερέλ πο σκοπός ντα κα βοηθίνελ ι τζενέν τι αβέν τέλειοι. Αζομάν ο Ιεχωβά κα αβέλ «τα πάντα σαριλένγκε».—1 Κορινθίους 15:28.

19. (α) Όταν εκτιμίνασα ι αξία σο τθερέλα ο λύτρος, σο μανγκάσα τι κεράς; (Ντικχ ο πλαίσιος « Τι Συνεχίνας τι Ρόντας Οντουλένγκε σο Ισί Άξιοι».) (β) Σο κα ντικχάς κο γιαβέρ μάθημας;

¹⁹ Αμαρί εκτίμηση για το λύτρος, σο ισί εκ μπαρό δώρος κατά Ντεβέλ, πρέπει τι κερέλ-αμέν τι μανγκάς τι βακεράς-λες γιαβερένγκε-ντα. Ο τζενέ πρέπει τι σικλιόν ότι ο Ιεχωβά ντινάς ο λύτρος για τι τθερέν σαρέ ι ευκαιρία τι τζουβντιόν για πάντα. Όμως ο λύτρος κερέλα ατζέ πιο μπουτ πράγματα. Ντέλα απάντηση κο ψέματα σο βακερντάς ο Σατανάς κο κήπος της Εδέμ. Κο γιαβέρ μάθημας κα ντικχάς σαρ κερέλα-λες ανταβά.