Ο ΤΖΕΝΕ μανγκένα τι αβέν χαρούμενοι. Αλλά ανταλέ τελευταίε ντιβεσέντε, σαρέ αντιμετωπίνενα προβλήματα σο ισί «δύσκολα ντα επικίνδυνα». (2 Τιμόθεο 3:1) Μερικοί χασαρένα πουμαρί χαρά επειδή αντιμετωπίνενα αδικίες, νασφαλίματα, χασαρένα πουμαρί μπουτί, ή μερέλα κάποιος σο μανγκένα. Γιαβερά χασαρένα πουμαρί χαρά επειδή αβέλα-πες κάτι γιαβέρ σο ανέλα λένγκε ανησυχία ή στεναχώρια. Ατζέ-ντα ο πιστοί δούλοι ι Ιεχωβάσκε μπορεί τι χασαρέν πουμαρό κουράγιος ντα σιγά σιγά μα τι αβέν χαρούμενοι. Άμα αισθάντιβενα τουμέν-ντα αντικάς, σαρ μπορίνενα τι αρακχέν πάλι τουμαρί χαρά;

Για τι απαντίνας κο ερώτημας ανταλέστε, πρέπει πρώτα τι αγαβάς σο ισί πραγματική χαρά ντα σαρ κάποια τζενέ ατσσιλέ χαρούμενοι ατζέ-ντα όταν τθερένας δυσκολίες. Σοράν, κα ντικχάς σαρ μπορίνασα τι ατσσικιαράς ντα τι μπαριαράς αμαρί χαρά.

Δεν πρέπει τι μπερδίνας ι χαρά με το κέφι ή με τη λατσσί διάθεση. Για παράδειγμας, εκ ματό τζενό μπορεί τι ασάλα μπουτ. Αλλά όταν νερνιόλα, να ασάλα, ντα μπορεί τι σκεφτίνελα πάλι ο μπουτ προβλήματα σο τθερέλα. Λέσκι λατσσί διάθεση ασταρντάς σάντε χάνικ ντα να ισινέ πραγματική χαρά.​—Παροιμίες 14:13.

Οκιά μπάνταρ, η χαρά ισί εκ ζουρανό συναίσθημας σο τθεράσα αμαρέ γκίστε όταν λάσα ή μπεκλεντίνασα κάτι λατσσό. Όταν τθεράσα χαρά ισινάμ χαρούμενοι είτε τζάνα αμένγκε λατσσές ο πράγματα είτε όχι. (1 Θεσσαλονικείς 1:6) Μάλιστα, μπορεί τι ισινάμ στεναχωριμέ για εκ πράγμας αλλά τι συνεχίνας τι τθεράς χαρά. Για παράδειγμας, ο απόστολοι χαλέ νταπ επειδή κερένας λάφι ι Ιησούσκε. Όμως, «νασλέ κατά Σάνχεδριν χαρούμενοι επειδή ισινέ άξιοι τι ταλαιπωρίντιβεν λέσκε ναβέσκε». (Πράξεις 5:​41) Να ισινέ χαρούμενοι επειδή χαλέ νταπ, αλλά επειδή μπορισάλε τι ατσσόν πιστοί κο Ντεβέλ.

Η χαρά νανέ κάτι σο ντιντιόλα αμέντε όταν μπιάντιβασα ή κάτι σο λάσα αυτόματα. Σόσκε βακεράσα-λες ανταβά; Επειδή η αληθινή χαρά ισί εκ ιδιότητα κατά καρπός του πνεύματος ι Ντεβλέσκο. Ο άγιος πνεύμας ι Ντεβλέσκο βοηθίνελα-αμέν τι ιριάς «ο νεβό χαρακτήρας», σο τθερέλα τι κερέλ με τη χαρά-ντα. (Εφεσίους 4:​24· Γαλάτες 5:​22) Ντα όταν τθεράσα χαρά, κα αβέλ πιο εύκολος τι νικαβάς-λεν πέρα με το δυσκολίες.

Ο Ιεχωβά μανγκέλας τι ντικχέλ τι αβέν-πες λατσσέ πράγματα κι πφουβ, όχι σαρέ ανταλά μπέτι πράγματα σο ντικχάσα αντιβές. Όμως, παρόλο σο ο τζενέ κερένα μπέτι πράγματα, ο Ιεχωβά να χασαρέλα πι χαρά. Η Γραφή βακερέλα: «Ζορ ντα χαρά υπαρχίντιβενα οτθέ σο μπεσέλα». (1 Χρονικών 16:​27) Επίσης, ο λατσσέ πράγματα σο κερένα ο υπηρέτες ι Ιεχωβάσκε ντένα-λες χαρά.​—Παροιμίες 27:11.

Αμέν προσπαθίνασα τι μοιάζας κο Ιεχωβά, ή τι αβάς σαρ λέστε, κάνα να χασαράσα αμαρί χαρά άμα ο πράγματα να τζάνα αμένγκε σαρ κα μανγκάας. Αντίς τι ανησυχίνας, μπορίνασα τι σκεφτίνας ο λατσσέ πράγματα σο τθεράσα ακανά ντα τι μπεκλεντίνας με υπομονή για το πιο λατσσέ σο κα αβέν κο μέλλον. *​—Ντικχ ι υποσημείωση.

 Υπαρχίντιβενα μπουτ παραδείγματα τζενένγκε κι Γραφή σο ατσσιλέ χαρούμενοι παρόλο σο τθερένας μπουτ προβλήματα. Ο Αβραάμ, ατσσιλό χαρούμενος ατζέ-ντα όταν ισινέ σε κίνδυνος λέσκι ζωή ή όταν ο γιαβερά τζενέ ανένας λέσκε προβλήματα. (Γένεση 12:​10-20· 14:​8-16· 16:4, 5· 20:​1-18· 21:8, 9) Σαρ κερντάς-λες ανταβά; Σκεφτίνελας ι ελπίδα τι τζουβντιόλ κο νεβό ντουνιάς αζομάν σο κα κερέλ κουμάντος η Μεσσιανική Βασιλεία. (Γένεση 22:​15-18· Εβραίους 11:​10) Ο Ιησούς βακερντάς: «Ο Αβραάμ τουμαρό ντατ χαιρισάλο σο κα ντικχέλας μο ντιβές». (Ιωάννης 8:​56) Αμέν μοιάζασα κο Αβραάμ όταν συνεχίνασα τι κεράς σκέψεις για τη χαρά σο κα τθεράς ανγκλ’ αμέντε.​—Ρωμαίους 8:21.

Επίσης, ο Παύλος αλλά εμ ο Σίλας τθερένας ζουρανί πίστη ντα ατσσιλέ χαρούμενοι παρόλο σο νακχλέ μπουτ δυσκολίες. Για παράδειγμας, αφού χαλέ μπουτ νταπ ντα τσσουντέ-λεν κι φυλακή, «προσευχίντιβενας ντα δοξάνενας ι Ντεβλές γκιλίντζαρ». (Πράξεις 16:​23-25) Μπορισάλε τι αντιχίνεν επειδή συνεχίνενας τι σκεφτίνεν ο υποσχέσεις ι Ντεβλέσκε για το μέλλον. Επίσης, τθερένας χαρά σόσκε τζανένας ότι ταλαιπωρισάλε επειδή ακολουθίνενας ι Χριστός. Αμέν μπορίνασα τι μοιάζας κο Παύλος ντα κο Σίλας όταν ντάσα-αμέν γκοντί ο λατσσέ αποτελέσματα σο αβένα όταν υπηρετίνασα ι Ντεβλές πιστά.​—Φιλιππησίους 1:​12-14.

Αντιβές-ντα, πφραλά σαρό κατά ντουνιάς ντένα-αμέν εκ μπουτ σουκάρ παράδειγμας επειδή ατσσιλέ χαρούμενοι παρόλο σο τθερένας δυσκολίες. Φιρειπείν, κο Νοέμβριος κο 2013, ο μπαρό τυφώνας Χαϊγιάν σο αβιλό-πες κο Φιλιππίνες καταστραφιντάς πιο μπουτ από 1.000 κχερά φαμιλίνγκε σο ισινέ Μάρτυρες. Ο Τζορτζ, σο καταστραφισάλο λέσκο κχερ κι πόλη Τακλόμπαν, βακερντάς: «Παρόλο σο νακχλάμ σαρέ ανταλά, ο πφραλά ισί ευτυχισμέ. Να τθεράβα λάφια για τι μπορίναβ τι εξηγίναβ καζόμ χαρούμενοι ισινάμ». Άμα σκεφτίνασα σαρέ οντουλά πράγματα σο κερντάς αμένγκε ο Ιεχωβά ντα συνεχίνασα τι εκτιμίνας-λες, κα μπορίνας τι ατσσάς χαρούμενοι ατζέ-ντα όταν κα νακχάς μπαρέ δυσκολίες. Καλά γιαβερά πράγματα σο ντέλα-αμέν ο Ιεχωβά ανένα αμένγκε χαρά;

Πιο μπαρί χαρά σαριλένταρ ανέλα αμένγκε η σχέση σο τθεράσα ι Ιεχωβάσαρ. Τζανάσα Οντουλές σο κερέλα κουμάντος σαρό ο σύμπαν. Βοβ ισί αμαρό Ντατ, αμαρό Ντεβέλ ντα αμαρό Αμάλ!​—Ψαλμός 71:​17, 18.

Επίσης, εκτιμίνασα ο δώρος ι ζωγιάκο σο ντινάς-αμέν ο Ιεχωβά ντα ι ικανότητα σο τθεράσα τι απολαμβάνας-λα. (Εκκλησιαστής 3:​12, 13) Επειδή ταρτιντάς-αμέν πασέ πέστε, αγαβάσα σο σκοπός τθερέλα αμένγκε ντα τζανάσα σαρ τι τζουβντιάς. (Κολοσσαείς 1:9, 10) Όμως, ο πιο μπουτ τζενέ να αγαβένα καβά ισί ο σκοπός ι ζωγιάκο. Για τι σικαβέλ ανταγιά διαφορά, ο Παύλος γραφιντάς: «“Γιακχ να ντικχλάς ντα καν να ασουντάς ούτε τζενέσκο γκι αγαντάς ανταλά σο ετοιμαντάς ο Ντεβέλ οντουλένγκε σο μανγκένα-λες”. Σόσκε αμέντε σικαντάς-λεν ο Ντεβέλ πι πνευμάσαρ». (1 Κορινθίους 2:9, 10) Τθεράσα μπαρί χαρά επειδή αγαβάσα ο θέλημας ντα ο σκοπός ι Ιεχωβάσκο.

Ο Ιεχωβά κερντάς ατζέ πιο μπουτ αμένγκε. Κερντάς κάτι για τι μπορίνεν τι συγχωρίντιβεν αμαρέ αμαρτίες. (1 Ιωάννη 2:​12) Ντέλα-αμέν ι ελπίδα τι τζουβντιάς κο νεβό ντουνιάς, σο κα αβέλ μπουτ σουγκό. (Ρωμαίους 12:​12) Ατζέ-ντα ακανά, ο Ιεχωβά ντέλα-αμέν μπουτέ αμαλέν σο γιεκ λέντζαρ ντάσα-λες δόξα. (Ψαλμός 133:1) Αρακχαβέλα-αμέν επίσης κατά Μπενγκ ντα λέσκε δαιμονένταρ. (Ψαλμός 91:​11) Άμα συνεχίνασα τι σκεφτίνας ανταλά μπουτ σουκάρ πράγματα σο ντινάς-αμέν ο Ιεχωβά, κα τθεράς πιο μπουτ χαρά.​—Φιλιππησίους 4:4.

Μπορίνελα άραγε εκ Χριστιανός σο ισί ήδη χαρούμενος τι μπαριαρέλ πι χαρά; Ο Ιησούς βακερντάς: «Βακερντόμ-λεν τουμένγκε ανταλά για τι αβέλ μι χαρά αντρά-τουμέντε ντα τουμαρί χαρά τι αβέλ πφερντί». (Ιωάννης 15:​11) Ανταβά σικαβέλα ότι αμαρί χαρά μπορίνελα πάντα τι μπαριόλ. Μπορίνασα τι μοιασκιαράς αμαρί χαρά με γιακ. Άμα μανγκάσα τι πφαμπόλ πιο μπουτ εκ γιακ πρέπει τι τσσουβάς γιαβερά-ντα καστά. Ντεν-τουμέν γκοντί: Ο άγιος πνεύμας βοηθίνελα-αμέν τι τθεράς χαρά. Άρα, άμα μανγκάσα τι μπαριόλ αμαρί χαρά,  πρέπει τι συνεχίνας τι μανγκάς ι Ντεβλέσκο πνεύμας αντράλ κατά προσευχή. Πρέπει επίσης τι συνεχίνας τι σκεφτίνας οντουλά σο διαβάνασα κατά Γραφή επειδή ισί γραμμέ κατά άγιος πνεύμας.​—Ψαλμός 1:1, 2· Λουκάς 11:13.

Κάτι γιαβέρ σο κα ντελ-αμέν πιο μπουτ χαρά ισί τι συνεχίνας τι κεράς πράγματα σο ντένα χαρά κο Ιεχωβά. (Ψαλμός 35:​27· 112:1) Σόσκε; Η Γραφή βακερέλα ότι δημιουργισάλαμ για “τι νταράς κατά αληθινός Ντεβέλ ντα τι κεράς ο εντολές λέσκε, σόσκε ανταγιά ισί σαρί η υποχρέωση ι τζενέσκι”. (Εκκλησιαστής 12:​13) Δημιουργισάλαμ για τι κεράς οντουβά σο μανγκέλα ο Ντεβέλ. Οτθάρ, κάνα υπηρετίνασα ι Ιεχωβάς, κα χαιρίνας πραγματικά αμαρί ζωή. *​—Ντικχ ι υποσημείωση.

Καζόμ μπαριαράσα αμαρί χαρά, κα τθεράς γιαβερά-ντα λατσσέ αποτελέσματα. Για παράδειγμας, ο Ιεχωβά κα χαιρίνελ ατζέ πιο μπουτ αμέντζαρ καζόμ υπηρετίνασα-λες χαράσαρ παρόλο σο μπορεί τι τθεράς προβλήματα. (Δευτερονόμιο 16:​15· 1 Θεσσαλονικείς 5:​16-18) Επίσης, αφού τθεράσα αληθινή χαρά, να κα πακιάς ότι ο μπουτ υλικά πράγματα ισί ο πιο σημαντικός κι ζωή. Οκιά μπάνταρ, κα προσπαθίνας τι κεράς ατζέ πιο μπαρέ θυσίες για τη Βασιλεία ι Ντεβλέσκι. (Ματθαίος 13:​44) Ντα όταν ντικχάσα ο λατσσέ αποτελέσματα σο τθεράσα επειδή κεράσα πιο μπουτ πράγματα ι Ιεχωβάσκε, αμαρί χαρά κα μπαριόλ, κα νιωθίνας λατσσές αμαρέ νεαυτόσαρ ντα κα κεράς ι γιαβερέν πιο χαρούμενους.​—Πράξεις 20:​35· Φιλιππησίους 1:​3-5.

Επίσης, καζόμ πιο χαρούμενοι νιωθίνασα, αζόμ πιο λατσσί υγεία κα τθεράς. Η Γραφή βακερέλα: «Ο χαρούμενος γκι ισί λατσσό φάρμακος». (Παροιμίες 17:​22) Εκ ερευνητής σο σπουδαντάς κο Πανεπιστήμιος της Νεμπράσκα κο Ηνωμένες Πολιτείες πραγματένγκε σο τθερένα τι κερέν με την υγεία, βακερντάς κάτι σο συμφωνίνελα ι Γραφιάσαρ: «Άμα ισινέν ευτυχισμέ ντα ικανοποιημέ τουμαρέ ζωγιάσαρ ακανά, τθερένα πιο μπουτ ελπίδες τι τθερέν λατσσί υγεία κο μέλλον».

Οτθάρ, παρόλο σο τζουβντιάσα ντιβεσέντε σο ανένα αμένγκε πίεση, μπορίνασα τι τθεράς αληθινή χαρά όταν λάσα ο άγιος πνεύμας αντράλ κατά προσευχή ντα όταν διαβάνασα ντα σκεφτίνασα ο Λάφι ι Ντεβλέσκο. Επίσης, αμαρί χαρά μπαριόλα όταν σκεφτίνασα ο μπουτ ντα λατσσέ πράγματα σο ντέλα-αμέν ο Ιεχωβά ακανά, όταν μοιάζασα γιαβερέ πιστέ τζενέντε ντα όταν προσπαθίνασα τι κεράς οντουβά σο μανγκέλα ο Ντεβέλ. Αζομάν κα μπορίνας τι νιωθίνας ο λάφια σο ισί κο εδάφιος Ψαλμός 64:​10, σο βακερέλα: «Ο δίκαιος κα χαιρίνελ ι πραγματέντζαρ σο τθερένα τι κερέν ι Ιεχωβάσαρ».