1, 2. Σο αγαντάς εκ πφραλ πι νεαυτόσκε, ντα σο κερντάς;

Ο ΡΟΜΠΕΡΤ μπολντιλό κάνα ισινέ 15 μπρεσένγκο, αλλά η αλήθεια να ισινέ ο πιο σημαντικός πράγμας λέσκε ζωγιάτε. Βοβ βακερέλα: «Να κερντόμ ποτές κάτι γκεραλό, αλλά ο θέμας ισί ότι οντουλά σο κεράβας ισινέ από συνήθεια. Ντικχίντιβαβας πνευματικά ζουρανό, αφού τζάβας σαρέ κο συναθροίσεις ντα κεράβας βοηθητικός σκαπανικός κάποια μασεκά. Όμως, κάτι λειπίνελας».

² Ο Ρόμπερτ να αγαντάας σο να τζάλας λατσσές μέχρι σο παντρισάλο. Πι ρομνιάσαρ, μπάζιμα κερένας ερωτήσεις κατά Γραφή ο εκ κο γιαβέρ σαρ παιχνίδι. Η ρομνί λέσκι τζανέλας λατσσές ι Γραφή ντα απαντίνελας εύκολα κο ερωτήσεις. Ο Ρόμπερτ όμως μπουτ φαρ να τζανέλας ο απαντήσεις ντα λατζάλας. Βοβ βακερέλα: «Ντικχίντιβελας ότι να τζανάβας τίποτα. Σκεφτιντόμ: “Αφού πρέπει τι αβάβ ο σορό μι ρομνιάκο κο πνευματικά πράγματα, κάτι πρέπει τι κεράβ”». Ντα πράγματι κερντάς. Ο ίδιος εξηγίνελα: «Αρχισάλομ τι κεράβ πιο μπουτ προσωπική μελέτη ντα αγαντόμ μπαγιά ι αλήθεια, ντα ο πιο σημαντικός, πλησιαντόμ πιο μπουτ ι Ιεχωβάς».

3. (α) Σο σικλιάσα κατά Ρόμπερτ; (β) Καλά σημαντικά πράγματα κα ντικχάς ακανά;

³ Σικλιάσα σημαντικά πράγματα κατά Ρόμπερτ. Μπορεί τι  τζανάσα κάποια πράγματα κατά Γραφή ντα τι τζάσα συνέχεια κο συναθροίσεις ντα κο έργος, αλλά ανταβά να κερέλα-αμέν πνευματικά τζενέ. Ή μπορεί τι προσπαθιντάμ για τι αβάς πιο πνευματικά τζενέ, αλλά όταν ντικχάσα σαρ τζάσα, αγαβάσα ότι χρειαζίντιβελα τι τζας ατζέ πιο λατσσές. (Φιλιππησίους 3:​16) Ανταλέ μαθημάστε, κα απαντίνας τρινέ σημαντικέ ερωτησιέντε: (1) Σο κα βοηθίνελ-αμέν τι τζανάς αν ισινάμ πνευματικά τζενέ; (2) Σαρ μπορίνασα τι αβάς πιο ζουρανέ πνευματικά; (3) Σαρ βοηθίντιβασα αμαρέ ζωγιάτε άμα ισινάμ πνευματικά τζενέ;

4. Κάσκε ισί η συμβουλή σο διαβάνασα κο εδάφια Εφεσίους 4:​23, 24;

⁴ Όταν αρχισάλαμ τι υπηρετίνας ι Ντεβλές, κερντάμ αλλαγές σο επηρεαντέ σαρί αμαρί ζωή. Ανταβά να σταματισάλο όταν μπολντιλάμ. Η Αγία Γραφή βακερέλα αμένγκε: «Συνεχίνεν τι αλλάνεν ντα τι τθερέν εκ νεβό τρόπος σκέψης». (Εφεσίους 4:​23, 24) Να ισινάμ τέλειοι, οτθάρ πρέπει τι συνεχίνας τι κεράς αλλαγές. Ατζέ-ντα αν υπηρετιντάμ για μπουτ μπρεσά ι Ιεχωβάς, πρέπει τι ατσσικιαράς ζουρανί αμαρί φιλία λέσαρ.​—Φιλιππησίους 3:​12, 13.

5. Καλά ερωτήσεις κα βοηθίνεν-αμέν τι τζανάς αν ισινάμ πνευματικά τζενέ;

⁵ Είτε ισινάμ τερνέ είτε πφουρέ, πρέπει τι ντικχάς ο πράγματα αντικάς σαρ ισί ντα τι πουτσάς αμαρό νεαυτός: “Αγαβάβα ότι αβιλόμ πιο πνευματικός τζενό; Μοιάζαβα πιο μπουτ κο Χριστός; Σο σικαβέλα ο τρόπος σο συμπεριφερίντιβαβα κο συναθροίσεις; Σαρ σικαβένα μο συζητήσεις σο μανγκάβα μπαγιά μι ζωγιάτε; Σο αγαβάβα μι νεαυτόσκε κατά συνήθειες μελέτης σο τθεράβα, κατά τρόπος σο ιριαβάβα-μαν ντα λατσσαράβα-μαν ντα κατά τρόπος σο αντιδράναβα κάνα ντένα-μαν συμβουλή; Σο κεράβα όταν αβέλα εκ πειρασμός τι κεράβ κάτι κακός; Αβιλόμ ώριμος Χριστιανός;” (Εφεσίους 4:​13) Ανταλά ερωτήσεις μπορίνενα τι βοηθίνεν-αμέν τι αγαβάς καζόμ πνευματικά τζενέ ισινάμ.

6. Σο γιαβέρ μπορίνελα τι βοηθίνελ-αμέν τι τζανάς αν ισινάμ πνευματικά τζενέ;

⁶ Μπάζιμα, χρειαζίντιβασα ι βοήθεια ι γιαβερένγκι για τι αγαβάς αν ισινάμ πνευματικά τζενέ. Ο απόστολος Παύλος εξηγιντάς ότι ο τζενό σο τθερέλα πι γκοντιάτε ο σώμας να αγαβέλα ότι στεναχωρίνελα ι Ντεβλές ι τροπόσαρ σο τζουβντιόλα. Αλλά ο πνευματικός τζενό αγαβέλα σαρ ντικχέλα ο Ντεβέλ ο πράγματα. Τζανέλα ότι ο Ιεχωβά να μανγκέλα τι τζουβντιάς τροπόσαρ σο σικαβέλα ότι τθεράσα αμαρέ γκοντιάτε ο σώμας. (1 Κορινθίους 2:​14-16· 3:​1-3) Ο πρεσβύτεροι σο τθερένα ι γκοντί ι Χριστόσκι αγαβένα σουγκό άμα ο πφραλά αρχίνενα τι κερέν πράγματα σο σικαβένα ότι τθερένα πουμαρέ γκοντιάτε ο σώμας, ντα προσπαθίνενα τι βοηθίνεν-λεν. Αν ο πρεσβύτεροι κα προσπαθίνεν τι βοηθίνεν-αμέν, κα δεχτίνας λένγκι βοήθεια ντα κα κεράς ο αλλαγές σο χρειαζίντιβενα; Αν βα, κα σικαβάς ότι μανγκάσα μπαγιά τι  αβάς πιο ζουρανέ πνευματικά.​—Εκκλησιαστής 7:5, 9.

7. Σαρ τζανάσα ότι για τι αβέλ εκ τζενό πνευματικός να ερεσέλα σάντε τι τζανέλ σο βακερέλα η Γραφή;

⁷ Για τι αβάς πνευματικά τζενέ, να ερεσέλα σάντε τι τζανάς σο βακερέλα η Γραφή. Ο βασιλιάς Σολομών τζανέλας μπουτ πράγματα ι Ιεχωβάσκε, ντα μερικά λέσκε σοφέ λαφίνταρ ισί αντρέ κι Γραφή. Πιο σοράν όμως, λέσκι φιλία ι Ιεχωβάσαρ να ισινέ αζόμ ζουρανί ντα να ατσσιλό πιστός. (1 Βασιλέων 4:​29, 30· 11:​4-6) Άρα, άμα τζανάσα σο βακερέλα η Γραφή, σο γιαβέρ χρειαζίντιβασα; Χρειαζίντιβελα τι συνεχίνας τι κεράς πιο ζουρανί αμαρί πίστη. (Κολοσσαείς 2:6, 7) Σαρ κα κεράς-λες ανταβά;

8, 9. (α) Σο κα βοηθίνελ-αμέν τι κεράς πιο ζουρανί αμαρί πίστη; (β) Σόσκε διαβάνασα ντα σκεφτίνασα προσεκτικά; (Ντικχ ι φωτογραφία σο ισί κι αρχή)

⁸ Κο πρώτος αιώνας, ο Παύλος βακερντάς κο Χριστιανοί τι “προσπαθίνεν μπουτ για τι ερεσέν κο σημείος τι αβέν ώριμοι”. (Εβραίους 6:1) Σαρ μπορίνασα τι κεράς αμαρέ ντιβεσέντε ανταγιά συμβουλή; Εκ σημαντικός τρόπος ισί τι διαβάνας ο βιβλίος «Κρατήστε τον Εαυτό σας στην Αγάπη του Θεού». Ανταβά κα βοηθίνελ-τουμέν τι αγαβέν σαρ τι κερέν τουμαρέ ζωγιάτε ο αρχές ι Γραφιάκε. Αν διαβαντέν ήδη ανταβά βιβλίος, υπαρχίντιβενα γιαβερά-ντα εκδόσεις σο μπορίνενα τι διαβάνεν για τι βοηθίνεν-τουμέν τι κερέν τουμαρί πίστη πιο ζουρανί. (Κολοσσαείς 1:​23) Χρειαζίντιβελα επίσης τι σκεφτίνας λατσσές οντουλά σο σικλιάσα ντα τι μανγκάς κατά Ιεχωβά τι βοηθίνελ-αμέν τι κεράς-λεν αμαρέ ζωγιάτε.

⁹ Διαβάνασα ντα σκεφτίνασα προσεκτικά για τι μανγκάς ατζέ πιο μπουτ τι κεράς ι Ιεχωβάς τι χαιρίνελ ντα τι ντας-λες καν. (Ψαλμός 40:8· 119:​97) Πρέπει επίσης τι νασάς ντουρ σαρέ κατά πράγματα σο κα μπορίνενας τι τσσιναβέν αμαρί πνευματική πρόοδος.​—Τίτο 2:​11, 12.

10. Σο μπορίνενα τι κερέν ο τερνέ για τι αβέν πιο ζουρανέ πνευματικά;

¹⁰ Αν ισινέν τερνέ, τθερένα πνευματικούς στόχους; Εκ πφραλ σο υπηρετίνελα κο Μπέθελ συνήθως κερέλα λάφι ι τερνέντζαρ σο ισί τι μπολντιόν κο συνελεύσεις περιοχής ντα πουτσέλα-λεν σο πνευματικούς στόχους τθερένα. Μπορίνελα τι αγαβέλ  ότι μπουτ λένταρ σκεφτιντέ λατσσές σαρ μανγκένα τι υπηρετίνεν ι Ιεχωβάς κο μέλλον. Μερικοί τθερένα στόχος τι υπηρετίνεν ι Ιεχωβάς κι ολοχρόνια υπηρεσία ή τι τζαν οτθέ σο υπαρχίντιβελα πιο μπαρί ανάγκη τι βακέρντιβεν ο λατσσέ αμπέρια. Αλλά κάποια τερνέ να τζανένα σο τι απαντίνεν. Μήπως νιωθίνενα ότι να χρειαζίντιβελα τι τθερέν πνευματικούς στόχους; Αν ισινέν τερνέ, πουτσέν τουμαρό νεαυτός: “Μήπως τζάβα κο συναθροίσεις ντα κο έργος σάντε επειδή μανγκέλα-λες μο ντατ ντα μι ντάι; Ή μήπως τθεράβα προσωπική φιλία ι Ντεβλέσαρ;” Σίγουρα, σαρέ πρέπει τι τθεράς πνευματικούς στόχους είτε ισινάμ τερνέ είτε πφουρέ. Ανταλά στόχοι κα βοηθίνεν-αμέν τι αβάς πιο ζουρανέ πνευματικά.​—Εκκλησιαστής 12:1, 13.

11. (α) Σο πρέπει τι κεράς για τι αβάς πνευματικά τζενέ; (β) Κάσκο παράδειγμας σο ισί κι Γραφή μπορίνασα τι ακολουθίνας;

¹¹ Κάνα κα αγαβάς καλέ πραγματέντε μπορίνασα τι διορθώντιβας, πρέπει τι αρχίνας τι κεράς αλλαγές. Ανταβά ισί μπουτ σημαντικός σόσκε τθερέλα τι κερέλ αμαρέ ζωγιάσαρ. (Ρωμαίους 8:​6-8) Ο Ιεχωβά να μπεκλεντίνελα τι αβάς τέλειοι ντα ντέλα-αμέν πο άγιος πνεύμας για τι βοηθίνελ-αμέν. Πρέπει όμως τι συνεχίνας τι κεράς μπαρέ προσπάθειες. Ο πφραλ Τζον Μπαρ, σο ισινέ κο Κυβερνών Σώμας, σχολιαντάας ο εδάφιος Λουκάς 13:​24 ντα βακερντάας ότι μπουτ τζενέ ναστί τζάνα κατά στενή πόρτα σόσκε να προσπαθίνενα μπουτ τι αρακχέν ο αρχές ι Γραφιάκε ντα τι ακολουθίνεν-λεν. Πρέπει τι αβάς σαρ ο Ιακώβ, σο να σταματιντάς τι  ουσαρέλ εκχέ αγγελόσαρ μέχρι τι λελ εκ ευλογία. (Γένεση 32:​26-28) Παρόλο σο μπορεί τι απολαμβάνασα ι προσωπική μελέτη, δεν πρέπει τι μπεκλεντίνας ότι η Γραφή ισί σαρ εκ βιβλίος σο διαβάνασα-λες για τι νακχέλ σουκάρ αμαρό σαάτι. Μανγκέλα μπουτ μπουτί για τι αρακχάς ο πολύτιμες αλήθειες σο κα βοηθίνεν-αμέν.

12, 13. (α) Σο κα βοηθίνελ-αμέν τι “τθεράς ο ίδιος τρόπος σκέψης σο τθερέλας ο Χριστός”; (β) Σαρ βοηθίνελα-αμέν ο παράδειγμας ντα η συμβουλή ι Πετρόσκι; (γ) Σο μπορίνενα τι κερέν για τι αβέν πνευματικά ζουρανέ; (Ντικχ ο πλαίσιος « Σο Μπορίνενα τι Κερέν για τι Αβέν Πνευματικά Ζουρανέ»)

¹² Όταν προσπαθίνασα τι αβάς ζουρανέ πνευματικά, ο άγιος πνεύμας κα βοηθίνελ-αμέν τι αλλάνας ο τρόπος σο σκεφτίνασα. Σιγά σιγά, κα σικλιάς τι σκεφτίνας σαρ ο Χριστός. (Ρωμαίους 15:5) Ο άγιος πνεύμας κα βοηθίνελ-αμέν τι νασκιαράς ο λάθος πράγματα σο μανγκάσα ντα τι αρχίνας τι τθεράς ιδιότητες σο κερένα ι Ντεβλές τι χαιρίνελ. (Γαλάτες 5:​16, 22, 23) Αν αγαντάμ ότι τθεράσα αμαρέ γκοντιάτε ο υλικά πράγματα ή ο απολαύσεις, δεν πρέπει τι παρατίνας-λεν. Πρέπει τι συνεχίνας τι μανγκάς κατά Ιεχωβά άγιος πνεύμας για τι βοηθίνελ-αμέν τι τθεράς αμαρέ γκοντιάτε ο σωστά πράγματα. (Λουκάς 11:​13) Τι ντεν-τουμέν γκοντί τον απόστολο Πέτρο. Να σκεφτίνελας πάντα σαρ ο Χριστός. (Ματθαίος 16:​22, 23· Λουκάς 22:​34, 54-62· Γαλάτες 2:​11-14) Αλλά να παρατιντάς-λεν, ντα ο Ιεχωβά βοηθιντάς-λες. Σιγά σιγά, ο Πέτρος σικλιλό τι σκεφτίνελ σαρ ο Χριστός. Μπορίνασα αμέν-ντα τι κεράς ο ίδιος.

¹³ Ο Πέτρος σοράν βακερντάς συγκεκριμέ ιδιότητες σο κα βοηθίνεν-αμέν. (Διαβάνεν 2 Πέτρου 1:​5-8) Πρέπει τι προσπαθίνας μπουτ τι τθεράς εγκράτεια, υπομονή, σουκάρ αισθήματα αμαρέ πφραλένγκε ντα γιαβερά σουκάρ ιδιότητες. Κάθε ντιβές μπορίνασα τι πουτσάς αμαρό νεαυτός: “Καγιά ιδιότητα πρέπει τι προσπαθίναβ τι τθεράβ αντιβές για τι αβάβ πιο ζουρανό πνευματικά;”

14. Σαρ κα επηρεάντιβελ αμαρί ζωή άμα ισινάμ πνευματικά τζενέ;

¹⁴ Αν σκεφτίνασα σαρ ο Χριστός, ανταβά κα επηρεάνελ ο τρόπος σο συμπεριφερίντιβασα κι μπουτί ή κο σχολείος, ο λάφια σο βακεράσα ντα ο αποφάσεις σο λάσα κάθε ντιβές. Αμαρέ αποφάσεις κα σικαβέν ότι προσπαθίνασα τι μοιάζας κο Χριστός. Σαρ πνευματικά τζενέ, να μανγκάσα τίποτα τι χαλαβέλ αμαρί φιλία ι Ιεχωβάσαρ. Όταν αβέλα αμένγκε ο πειρασμός τι κεράς κάτι λάθος, αμαρί πνευματικότητα κα βοηθίνελ-αμέν τι τζας κόντρα κο πειρασμός. Πριν τι λας εκ απόφαση, κα ατσσάς ντα κα πουτσάς-αμέν: “Καλά αρχές ι Γραφιάκε μπορίνενα τι βοηθίνεν-μαν; Σο κα κερέλας ο Χριστός ανταλέ περιπτωσιάτε; Σο κα κερέλ ι Ιεχωβάς χαρούμενος;” Πρέπει τι σκεφτίνας συνέχεια ανταλέ τροπόσαρ. Για τι ντικχάς μερικές καταστάσεις σο μπορεί τι αβέν αμαρέ ζωγιάτε. Σε κάθε κατάσταση, κα ντικχάς εκ αρχή ι Γραφιάκι σο μπορίνελα τι βοηθίνελ-αμέν τι λας εκ σωστή απόφαση.

15, 16. Άμα κα σκεφτίνας σαρ ο Χριστός, σαρ κα βοηθίντιβας τι λας σωστές αποφάσεις σο τθερένα τι κερέν (α) ι παντριάσαρ; (β) ι αμαλέντζαρ;

¹⁵ Παντριά. Αρακχάσα ι αρχή ι Γραφιάκι κο εδάφια 2 Κορινθίους 6:​14, 15. (Διαβάνεν) Ο Παύλος σικαντάς ότι ο πνευματικά τζενέ να ντικχένα ο πράγματα σαρ ο τζενέ σο τθερένα πουμαρέ γκοντιάτε ο σώμας. Σαρ μπορίνελα ανταγιά αρχή τι βοηθίνελ-τουμέν τι τραμπίνεν κάσαρ κα παντρίνεν;

¹⁶ Αμαλά. Αρακχάσα ι αρχή ι Γραφιάκι κο εδάφιος 1 Κορινθίους 15:​33. (Διαβάνεν) Εκ πνευματικός τζενό να κερέλα αμαλέν  σο κα μπορίνενας τι τσσουβέν σε κίνδυνος λέσκι πίστη. Σκεφτίνεν σαρ μπορίνελα τι βοηθίνελ-τουμέν ανταγιά αρχή σε διαφορετικές καταστάσεις. Για παράδειγμας, σαρ μπορίνελα τι βοηθίνελ-τουμέν τι λεν αποφάσεις για το κοινωνικά δίκτυα; Σαρ κα βοηθίνελ-τουμέν τι αποφασίνεν αν κα κχελέν παιχνίδια κο Ίντερνετ τζενέντζαρ σο να τζανένα;

17-19. Άμα ισινέν πνευματικά τζενέ, σαρ βοηθίντιβενα (α) τι νασέν πραγματένταρ σο ισί άχρηστα; (β) τι τθερέν λατσσέ στόχους; (γ) όταν τθερένα διαφωνίες;

¹⁷ Πράγματα σο να μουκχένα-αμέν τι αβάς πνευματικά τζενέ. Αρακχάσα εκ σημαντική προειδοποίηση κο εδάφιος Εβραίους 6:1. (Διαβάνεν) Καλά ισί ο «μουλέ πράγματα» σο πρέπει τι τσσιναβάς τι κεράς; Ισί ο άχρηστα πράγματα σο να βοηθίνενα-αμέν τι αβάς πιο ζουρανέ πνευματικά. Ανταγιά προειδοποίηση ι μουλέ πραγματένγκε μπορίνελα τι βοηθίνελ-αμέν τι απαντίνας ερωτησιέντε σαρ ακαλά: “Ανταβά σο μανγκάβα τι κεράβ ισί λατσσό ή άχρηστος; Πρέπει τι νταβ μο λοβέ ανταλέ μπουτιάτε για τι νικαβάβ ατζέ πιο μπουτ λοβέ; Σόσκε δεν πρέπει τι υποστηρίναβ ι τζενέν σο προσπαθίνενα τι αλλάνεν ο πράγματα κο ντουνιάς;”

¹⁸ Πνευματικοί στόχοι. Κι Επί του Όρους Ομιλία, ο Ιησούς ντινάς-αμέν λατσσέ συμβουλές για το στόχοι. (Ματθαίος 6:​33) Ο πνευματικός τζενό τσσουβέλα ι Βασιλεία πρώτα πι ζωγιάτε. Ανταγιά αρχή κα βοηθίνελ-αμέν τι απαντίνας ακαλέ ερωτησιέντε: “Τι τζαβ κο πανεπιστήμιος αφού κα τελειώναβ ο σχολείος; Τι δεχτίναβ ανταγιά μπουτί;”

¹⁹ Διαφωνίες. Η συμβουλή σο ντινάς ο Παυλός κο Χριστιανοί κι Ρώμη βοηθίνελα-αμέν όταν τθεράσα διαφωνίες ι γιαβερέντζαρ. (Ρωμαίους 12:​18) Αμέν μοιάζασα κο Χριστός, οτθάρ προσπαθίνασα τι “τθεράς ειρήνη σαρέ ι τζενέντζαρ”. Σαρ αντιδράνασα όταν τθεράσα διαφωνίες ι γιαβερέντζαρ; Ισί αμένγκε δύσκολος τι δεχτίνας ι άποψη εκχέ γιαβερέσκι; Ή τζανένα ο γιαβερά ότι προσπαθίνασα τι κεράς ειρήνη;​—Ιακώβου 3:18.

20. Σόσκε μανγκένα τι κερέν πνευματική πρόοδος;

²⁰ Ανταλά παραδείγματα σικαβένα σαρ ο αρχές ι Γραφιάκε μπορίνενα τι βοηθίνεν-αμέν τι λας αποφάσεις σο σικαβένα ότι οδηγίντιβασα κατά πνεύμας ι Ντεβλέσκο. Αν ισινάμ πνευματικά τζενέ, κα τθεράς ευτυχία ντα ικανοποίηση αμαρέ ζωγιάτε. Ο Ρόμπερτ, σο βακερντάμ λέσκε κι αρχή, βακερέλα: «Όταν αρχισάλομ τι τθεράβ πραγματική φιλία ι Ιεχωβάσαρ, αβιλόμ πιο λατσσό μι ρομνιάσαρ ντα μι τσσαβέντζαρ. Νιωθίναβας πφερντό ντα ευτυχισμέ». Αν κεράσα ο πιο λατσσό σο μπορίνασα για τι κεράς πνευματική πρόοδος, κα απολαμβάνας μπουτ ευλογίες. Κα τθεράς πιο χαρούμενη ζωή ακανά ντα «ι πραγματική ζωή» κο μέλλον.​—1 Τιμόθεο 6:19.