1-3. (α) Σο κα βοηθίνελ-αμέν τι ατσσάς πιστοί κο Ντεβέλ ανταλέ τελευταίε ντιβεσέντε; (β) Σο κα σικλιάς ανταλέ μαθημάστε;

ΑΝΤΙΒΕΣ τζουβντιάσα πασέ κο τέλος κι τελευταίε ντιβεσένγκο. Ντικχάσα ι πφιρνέ τζενέν τι αβέν ατζέ πιο μπουτ. Συνεχίνενα τι “μπαριόν σαρ ο τσαριά”. (Ψαλμός 92:7) Οτθάρ, να κερέλα αμένγκε εντύπωση σο μπουτ τζενέ να δεχτίνενα οντουβά σο ισί σωστός ι Ντεβλέσκε. Ο Παύλος βακερντάς κο Χριστιανοί: «Τι αβέν σαρ χουρντέ τσσαβέ κο πράγματα σο τθερένα τι κερέν ι γκεραλιμάσαρ», αλλά «τι μπαριαρέν τουμαρί ικανότητα τι αγαβέν». (1 Κορινθίους 14:​20) Σαρ μπορίνασα τι κεράς-λες ανταβά;

² Η απάντηση ισί κο εδάφιος ανταλέ μαθημάσκο, σο βακερέλα: «Οντουλά σο ρόντενα ι Ιεχωβάσκε αγαβένα σαρέ ο πράγματα». (Παροιμίες 28:5) Ανταβά μανγκέλα τι βακερέλ ότι αγαβένα σο-ντα χρειαζίντιβελα τι αγαβέν για τι κερέν ι Ιεχωβάς χαρούμενος. Ντα ο εδάφια Παροιμίες 2:7, 9 σικλιαρένα-αμέν  ότι ο Ιεχωβά ντέλα σοφία οντουλέντε σο κερένα ο σωστός. Οτθάρ, βον μπορίνενα τι “αγαβέν σο ισί δίκαιος, σωστός ντα λατσσό, σαρό ο ντρομ ι λατσσιμάσκο”.

³ Ο Νώε, ο Δανιήλ ντα ο Ιώβ τθερένας ανταγιά σοφία ι Ντεβλέσκι. (Ιεζεκιήλ 14:​14) Ο ίδιος αβέλα-πες αντιβές-ντα ι Ντεβλέσκε λαόσαρ. Τουμέν, όμως, τθερένα ι Ντεβλέσκι σοφία; Για τι “αγαβέν σαρέ ο πράγματα” σο χρειαζίντιβελα, ντα αντικάς τι κερέν ι Ιεχωβάς χαρούμενος, πρέπει τι τζανέν-λες λατσσές. Οτθάρ ανταλέ μαθημάστε, κα σικλιάς (1) σαρ γνωριντέ ι Ντεβλές ο Νώε, ο Δανιήλ ντα ο Ιώβ, (2) σαρ βοηθισάλε ανταλέσταρ ντα (3) σαρ μπορίνασα τι τθεράς ι πίστη σο τθερένας βον.

4. Σαρ γνωριντάς ο Νώε ι Ιεχωβάς, ντα σαρ βοηθισάλο σο γνωριντάς-λες λατσσές;

⁴ Σαρ γνωριντάς ο Νώε ι Ιεχωβάς; Οτθάρ μπερί σο ο Αδάμ ντα η Εύα αρχισάλε τι κερέν τσσαβέν, ο τζενέ σικλιόνας ι Ιεχωβάσκε τρινέ τροπόντζαρ: κατά δημιουργία, κατά γιαβερά πιστοί υπηρέτες ι Ντεβλέσκε ντα κατά λατσσέ αποτελέσματα σο τθερένας κάνα ντένας-λες καν. (Ησαΐας 48:​18) Καζόμ παρατηρίνελας ι δημιουργία, ο Νώε κα μπορίνελας τι ντικχέλ αποδείξεις ότι ο Ντεβέλ υπαρχίντιβελα αλλά κα σικλιόλας ο ιδιότητες-ντα ι Ντεβλέσκε. Οτθάρ, ο Νώε κα μπορίνελας τι αγαβέλ ότι ο Ιεχωβά ισί ζουρανό ντα ότι ισί ο μόνος αληθινός Ντεβέλ. (Ρωμαίους 1:​20) Αντικάς, ο Νώε να πακιάλας σάντε ότι ο Ντεβέλ υπαρχίντιβελα, αλλά τθερέλας ζουρανί πίστη-ντα λέστε.

5. Σαρ σικλιλό ο Νώε σο σκοπός τθερέλας ο Ντεβέλ ι τζενένγκε;

⁵ Η Αγία Γραφή βακερέλα ότι «η πίστη αβέλα κατά πράγματα σο ασουνέλα εκ τζενό». Ανταβά μανγκέλα τι βακερέλ ότι οντουλά σο ασουνάσα κατά γιαβερά μπορίνενα τι βοηθίνεν-αμέν τι τθεράς πίστη. (Ρωμαίους 10:​17) Ο Νώε σίγουρα ασουντάς ι Ιεχωβάσκε πι τζενένταρ. Λέσκο ντατ, ο Λάμεχ, τθερέλας πίστη κο Ντεβέλ ντα μπιάντιλοας πριν τι μερέλ ο Αδάμ. (Ντικχ ι φωτογραφία σο ισί κι αρχή) Λέσκο πάππους ισινέ ο Μαθουσάλα, ντα λέσκε νταντέσκο προπάππους ισινέ ο Ιάρεδ, σο μουλό 366 μπρεσά αφού μπιάντιλο ο Νώε. * (Ντικχ ι υποσημείωση) (Λουκάς 3:​36, 37) Μάλλον οντουλά μουρσά ντα λένγκε ρομνιά σικλιαρντέ ι Νωές ότι ο Ιεχωβά κερντάς ι τζενέν ντα ότι μανγκέλας τι κερέν τσσαβέν, τι πφερέν ι πφουβ ντα τι υπηρετίνεν-Λες. Ο Νώε σικλιλόας επίσης ότι ο Αδάμ ντα η Εύα να ασουντέας ι Ιεχωβάς ντα μπορίνελας τι ντικχέλ ο μπέτι αποτελέσματα σο αβιλέ ιτιρί ανταλέσταρ. (Γένεση 1:​28· 3:​16-19, 24) Ο Νώε μανγκέλας οντουλά σο σικλιόλας ντα ανταβά κερντάς-λες τι υπηρετίνελ ι Ιεχωβάς.​—Γένεση 6:9.

6, 7. Σαρ η ελπίδα μπαριαρντάς ι Νωέσκι πίστη;

⁶ Η ελπίδα κερέλα πιο ζουρανί ι πίστη. Σκεφτίνεν σαρ μπαριλί η πίστη ι Νωέσκι κάνα σικλιλό ότι λέσκο ναβ, σο μανγκέλα τι βακερέλ «Ξεκούραση» ή «Παρηγοριά», ντέλας ελπίδα. (Γένεση 5:​29, υποσημείωση) Ο Λάμεχ, ι Ιεχωβάσκε πνευμάσαρ, βακερντάς:  «[Μο τσσαβό, ο Νώε] κα ανέλ αμένγκε παρηγοριά ι σκληρέ μπουτιάκε σο κερένα ντουκχάσαρ αμαρέ βαστά, επειδή ο Ιεχωβά ντινάς αρμανιά ι πφουβ». Άρα, ο Νώε τθερέλας ελπίδα ότι ο Ντεβέλ κα λατσσαρέλας ο πράγματα. Σαρ ο Άβελ ντα ο Ενώχ, πακιάλας ότι εκ «προσάγγονος» κα ντέλας ι σαπές κο σορό.​—Γένεση 3:15.

⁷ Ο Νώε να αγαβέλας ντιπ ι υπόσχεση ι Ντεβλέσκι σο ισί κο εδάφιος Γένεση 3:​15, αλλά αγαβέλας ότι ντέλας ελπίδα για το μέλλον. Ανταγιά προφητεία ταιριάνελα ι λαφίντζαρ σο βακερντάας ο Ενώχ, ότι ο Ιεχωβά κα καταστραφίνελας ι πφιρνέν. (Ιούδα 14, 15) Σίγουρα, ο λάφια σο βακερέλας ο Ενώχ, σο κα νικιόν μπαγιά κο Αρμαγεδδώνας με τρόπος σο να ξαναβιλό-πες ποτές, πρέπει τι μπαριαρντέ ι πίστη ντα ι ελπίδα ι Νωέσκι!

8. Σαρ αρακχαντάς-πες ο Νώε επειδή τζανέλας λατσσές ι Ντεβλές;

⁸ Σαρ βοηθισάλο ο Νώε επειδή τζανέλας λατσσές ι Ντεβλές; Ο Νώε σικλιλό ι Ιεχωβάσκε ντα ανταβά βοηθιντάς-λες τι τθερέλ πίστη ντα ι Ντεβλέσκι σοφία. Ανταβά αρακχαντάς-λες για μα τι κερέλ κάτι σο κα στεναχωρίνελας ι Ιεχωβάς. Για παράδειγμας, ο Νώε μανγκέλας τι αβέλ ι Ντεβλέσκο αμάλ, οτθάρ να ισινέ αμάλ οντουλένγκο σο να τθερένας πίστη κο Ιεχωβά ντα να ντένας-Λες σημασία. Ο Νώε να χουχάντιλο κατά δαίμονες σο αβιλέας κι πφουβ, σαρ χουχάντιλεας ο γιαβερά τζενέ. Ο τζενέ εντυπωσιασάλεας κατά ζουρανέ δαίμονες ντα μπορεί τι προσπαθιντέ τι ντεν-λεν λατρεία. (Γένεση 6:​1-4, 9) Επίσης, ο Νώε τζανέλας ότι ο Ιεχωβά μανγκέλας ο τζενέ τι τθερέν τσσαβέν ντα τι πφερέν ι πφουβ. (Γένεση 1:​27, 28) Άρα, κάνα ο δαίμονες λιντέ ρομνίν ντα κερντέ τσσαβέν λέντζαρ, ο Νώε τζανέλας ότι ανταβά ισινέ λάθος. Ανταβά σικάντιλο ατζέ πιο μπουτ κάνα οντουλά τσσαβέ αβιλέ πιο μπαρέ ντα πιο ζουρανέ σαρέ κατά γιαβερά τσσαβέ. Τελικά, ο Ιεχωβά βακερντάς κο Νώε ότι κα ανέλας εκ κατακλυσμός για τι καταστραφίνελ σαρέ ι πφιρνέ τζενέν. Επειδή ο Νώε τθερέλας πίστη κι προειδοποίηση κι Ιεχωβάσκι, κερντάς ι κιβωτός ντα βοβ ντα λέσκι φαμιλί σωσάλε.​—Εβραίους 11:7.

9, 10. Σαρ μπορίνασα τι τθεράς πίστη σαρ οντιά σο τθερέλας ο Νώε;

⁹ Σαρ μπορίνασα τι τθεράς πίστη σαρ οντιά σο τθερέλας ο Νώε; Ισί σημαντικός τι διαβάνας προσεκτικά ο Λάφι ι Ντεβλέσκο, τι μανγκάς οντουλά σο σικλιάσα ντα τι χρησιμοποιήνας-λεν για τι κεράς αλλαγές ντα λατσσέ επιλογές αμαρέ ζωγιάτε. (1 Πέτρου 1:​13-15) Αζομάν, η πίστη ντα ι Ντεβλέσκι σοφία κα αρακχαβέν-αμέν κατά Μπενγκέσκε σχέδια ντα ανταλέ ντουνιάσταρ. (2 Κορινθίους 2:​11) Μπουτ τζενέ κο ντουνιάς μανγκένα ι βία ντα ο λουμνικανέ πράγματα ντα ακολουθίνενα πουμαρέ λάθος επιθυμίες. (1 Ιωάννη 2:​15, 16) Να ντένα σημασία κο πράγματα σο σικαβένα ότι ισινάμ πασέ κο τέλος ανταλέ πφιρνέ ντουνιάσκο. Άμα να τθεράσα ζουρανί πίστη, κα μπορίναας τι αρχίνας τι σκεφτίνας αμέν-ντα αντικάς. Μα μπιστρέν ότι κάνα ο Ιησούς συγκριντάς αμαρέ ντιβεσά ι ντιβεσέντζαρ σο τζουβντιόλας ο Νώε, να βακερντάς για τη βία ή ι λουμνικανέ πραγματένγκε, αλλά ότι υπαρχίντιβελα ο  κίνδυνος τι ταρτίντιβελ αμαρί προσοχή ντα τι τσσιναβάς τι υπηρετίνας ι Ντεβλές.​—Διαβάνεν Ματθαίος 24:​36-39.

¹⁰ Πουτσέν τουμαρό νεαυτός: “Σικαβέλα ο τρόπος σο τζουβντιάβα ότι τζανάβα μπαγιά ι Ιεχωβάς; Κερέλα-μαν μι πίστη τι κεράβ οντουβά σο βακερέλα ο Ιεχωβά ότι ισί σωστός ντα τι σικλιαράβ γιαβερέν-ντα σο μανγκέλα λένταρ ο Ντεβέλ;” Ο απαντήσεις σο κα ντεν ανταλέ ερωτησιέντε κα βοηθίνεν-τουμέν τι σικλιόν άμα τουμέν-ντα πφιρένα ι αληθινέ Ντεβλέσαρ σαρ ο Νώε.

11. (α) Αφού ο τερνό Δανιήλ τθερέλας αγάπη ι Ντεβλέσκε, σο σικλιαρέλα-αμέν ανταβά λέσκε νταντέσκε ντα νταγιάκε; (β) Καλά ιδιότητες σο τθερέλας ο Δανιήλ κα μανγκένας τι τθερέν;

¹¹ Σαρ γνωριντάς ο Δανιήλ ι Ιεχωβάς; Ο Δανιήλ πρέπει τι σικλιλό πι νταντέσταρ ντα πι νταγιάταρ τι μανγκέλ ι Ιεχωβάς ντα λέσκο Λάφι. Ντα ο Δανιήλ κερντάς-λες ανταβά σαρί πι ζωή. Ατζέ-ντα πι πφουριματέντε, συνεχίνελας τι διαβάνελ προσεκτικά ι Γραφή. (Δανιήλ 9:1, 2) Ο Δανιήλ τζανέλας ι Ιεχωβάς μπουτ λατσσές. Ντα τζανέλας σαρέ οντουλά σο κερντάας ο Ιεχωβά ι Ισραηλιτένγκε. Ντικχάσα-λες ανταβά κι ταπεινή προσευχή σο κερντάς αντράλ πι γκίσταρ κο εδάφια Δανιήλ 9:​3-19. Διαβάνεν ανταγιά προσευχή ντα σκεφτίνεν-λα προσεκτικά. Πουτσέν τουμαρό νεαυτός: “Σο σικλιαρέλα-μαν ανταγιά προσευχή για τον Δανιήλ;”

12-14. (α) Σαρ σικαντάς ο Δανιήλ ότι τθερέλας ι Ντεβλέσκι σοφία; (β) Σαρ ευλογισάλο ο Δανιήλ επειδή τθερέλας θάρρος ντα ισινέ αφοσιωμέ κο Ιεχωβά;

¹² Σαρ βοηθισάλο ο Δανιήλ επειδή τζανέλας λατσσές ι Ντεβλές; Να ισινέ εύκολος εκχέ πιστέ Ιουδαιόσκε τι υπηρετίνελ ι Ντεβλές κι Βαβυλώνα σο ισινέ πφερντί ψεύτικε ντεβλέντζαρ. Για παράδειγμας, ο Ιεχωβά βακερντάς κο Ιουδαίοι: «Τι μανγκέν τι τθερέλ ειρήνη η πόλη σο κερντόμ-τουμέν τι τζαν». (Ιερεμίας 29:7) Επίσης, ντινάς-λεν ι εντολή τι ντεν λατρεία σάντε λες σαρέ πουμαρέ γκίσαρ. (Έξοδος 34:​14) Σαρ κα μπορίνελας ο Δανιήλ τι ντελ καν κο ντούι-ντα εντολές; Ι Ντεβλέσκι σοφία βοηθιντάς-λες τι τζανέλ ότι έπρεπε πρώτα τι ντελ καν κο Ιεχωβά ντα σοράν κο τζενέ σο κυβερνίνενας. Εκατοντάδες μπρεσά πιο σοράν, ο Ιησούς σικλιαρντάς ι ίδια αρχή.​—Λουκάς 20:25.

¹³ Σκεφτίνεν σο κερντάς ο Δανιήλ κάνα νικίστιλο εκ νόμος σο βακερέλας ότι, για 30 ντιβεσά, καέκ να κα μπορίνελας τι προσευχίντιβελ εκχέ ντεβλέστε ή τζενέστε, αλλά σάντε κο βασιλιάς. (Διαβάνεν Δανιήλ 6:​7-10) Ο Δανιήλ κα μπορίνελας τι αρακχέλ δικαιολογίες ντα τι βακερέλ: “Τριάντα ντιβές ισί σάντε”. Αλλά να μουκχλάς ι τζενένγκο νόμος τι αβέλ πιο σημαντικός κατά Ντεβλέσκι λατρεία. Ο Δανιήλ κα μπορίνελας τι τζαλ τι προσευχίντιβελ κο Ιεχωβά εκχέ τθανέστε σο να ντικχέλας-λες καέκ. Αλλά τζανέλας ότι ανγκλέ μπουτ τζενέ ντικχένας-λες τι προσευχίντιβελ κάθε ντιβές. Οτθάρ, παρόλο σο ανταβά ισινέ επικίνδυνος, ο Δανιήλ συνεχιντάς τι προσευχίντιβελ οτθέ σο μπορίνενας τι ντικχέν-λες ο τζενέ, σόσκε να μανγκέλας τι αμντίνεν ότι τσσιναντάας τι υπηρετίνελ ι Ιεχωβάς.

¹⁴ Ο Ιεχωβά ευλογιντάς τον Δανιήλ σόσκε τθερέλας θάρρος ντα ισινέ αφοσιωμέ. Κερντάς εκ θαύμας ντα σωντάς-λες κατά λιοντάρια. Οτθάρ, ο τζενέ σαρί κι Μηδοπερσική Αυτοκρατορία σικλιλέ ι Ιεχωβάσκε!​—Δανιήλ 6:​25-27.

15. Σαρ μπορίνασα τι τθεράς πίστη σαρ οντιά σο τθερέλας ο Δανιήλ;

¹⁵ Σαρ μπορίνασα τι τθεράς πίστη σαρ  οντιά σο τθερέλας ο Δανιήλ; Για τι τθεράς ζουρανί πίστη, να ερεσέλα σάντε τι διαβάνας ο Λάφι ι Ντεβλέσκο. Χρειαζίντιβελα τι αγαβάς-λες. (Ματθαίος 13:​23) Μανγκάσα τι τζανάς σαρ σκεφτίνελα ντα σαρ αισθάντιβελα ο Ιεχωβά διάφορε πραγματένγκε. Οτθάρ, πρέπει τι σκεφτίνας λατσσές οντουλά σο διαβάνασα. Επίσης, ισί σημαντικός τι προσευχίντιβας συχνά, ντα ειδικά κάνα τθεράσα δυσκολίες. Μπορίνασα τι τθεράς πίστη ότι ο Ιεχωβά κα ντελ-αμέν αντράλ πι γκίσταρ ι σοφία ντα ι ζορ σο μανγκάσα λέσταρ.​—Ιακώβου 1:5.

16, 17. Σαρ γνωριντάς ο Ιώβ ι Ιεχωβάς;

¹⁶ Σαρ γνωριντάς ο Ιώβ ι Ιεχωβάς; Ο Ιώβ να ισινέ Ισραηλίτης. Αλλά ο Αβραάμ, ο Ισαάκ ντα ο Ιακώβ περένας λέσαρ τζενέ, ντα ο Ιεχωβά σικλιαρντάας-λεν πέσκε ντα ι σκοπόσκε σο τθερέλας ι τζενένγκε. Να τζανάσα σαρ, αλλά ο Ιώβ-ντα σικλιλό μπουτ ανταλέ σημαντικέ πραγματένταρ. (Ιώβ 23:​12) Βοβ βακερντάς κο Ιεχωβά: «Μο  κανά ασουντέ τούκε». (Ιώβ 42:5) Ντα ο ίδιος ο Ιεχωβά σικαντάς ότι οντουλά σο βακερέλας ο Ιώβ λέσκε κο γιαβερά ισινέ μπαγιά.​—Ιώβ 42:7, 8.

¹⁷ Επίσης, ο Ιώβ σικλιλό ο ιδιότητες ι Ιεχωβάσκε καζόμ ντικχέλας ι δημιουργία. (Ιώβ 12:​7-9, 13) Εμ ο Ελιού εμ ο Ιεχωβά βακερντέ παραδείγματα κατά δημιουργία για τι σικαβέν κο Ιώβ καζόμ χουρντέ ισί ο τζενέ ανγκλάλ κο Ντεβέλ. (Ιώβ 37:​14· 38:​1-4) Ο λάφια ι Ιεχωβάσκε επηρεαντέ τον Ιώβ ντα κερντέ-λες τι βακερέλ ταπεινά κο Ντεβέλ: «Ακανά τζανάβα ότι μπορίνεσα τι κερές σαρέ ο πράγματα ντα ότι τίποτα οντουλένταρ σο τθερέσα τι γκοντιάτε νανέ δύσκολος τούκε». Ντα σοράν βακερντάς: «Μετανιώναβα τσικάσαρ ντα πραχόσαρ».​—Ιώβ 42:2, 6.

18, 19. Σαρ σικαντάς ο Ιώβ ότι τζανέλας μπαγιά ι Ιεχωβάς;

¹⁸ Σαρ βοηθισάλο ο Ιώβ επειδή τζανέλας λατσσές ι Ντεβλές; Ο Ιώβ αγαβέλας μπουτ λατσσές ο αρχές ι Ντεβλέσκε. Τζανέλας μπαγιά ι Ιεχωβάς ντα ανταβά τσσίντελας-λες τι κερέλ ο σωστός. Για παράδειγμας, ο Ιώβ τζανέλας ότι ναστί βακερέλας ότι μανγκέλας ι Ντεβλές άμα να σικαβέλας λατσσιπέ ι γιαβερένγκε. (Ιώβ 6:​14) Να σκεφτίνελας ότι ισινέ πιο λατσσό κατά γιαβερά, αλλά συμπεριφερίντιβελας λένγκε σαρ τι ισινέ λέσκι φαμιλί, είτε ισινέ χουλανέ είτε τσορορέ. Ο Ιώβ βακερντάς: «Οντουβά σο κερντάς-μαν μι νταγιάκε περέστε να κερντάς λεν-ντα;» (Ιώβ 31:​13-22) Ατζέ-ντα κάνα ο Ιώβ ισινέ χουλανό ντα τθερέλας εξουσία, να αβιλό μπαρικανό ντα να σκεφτίνελας ότι ο γιαβερά να ισινέ αζόμ σημαντικοί καζόμ ισινέ βοβ. Ανταβά ισί μπουτ διαφορετικός κατά τρόπος σο συμπεριφερίντιβενα μπουτ τζενέ σο ισί χουλανέ ντα τθερένα εξουσία.

¹⁹ Ο Ιώβ να μανγκέλας τίποτα, ούτε ο υλικά πράγματα, τι αβέλ πιο σημαντικός λέσκε κατά Ιεχωβά. Τζανέλας ότι άμα κα αβέλας-πες ανταβά, κα μουκχέλας «ι αληθινέ Ντεβλές σο ισί οπρέ». (Διαβάνεν Ιώβ 31:​24-28) Επίσης, ο Ιώβ πακιάλας ότι ο μπιαβ ισί εκ μπουτ σημαντική υπόσχεση σο ντέλα εκ μουρς ντα εκ τζουβέλ ο εκ κο γιαβέρ. Κερντάας ατζέ-ντα συμφωνία πι νεαυτόσαρ ότι να κα ντικχέλας πφιρνικανές εκχέ τζουβλιά. (Ιώβ 31:1) Ανταβά κερέλα αμένγκε εντύπωση, σόσκε αζομάν ο Ιεχωβά μουκχέλας ι μουρσέν τι λεν μπουτέ ρομνίν. Οτθάρ, ο Ιώβ κα μπορίνελας τι τθερέλ ατζ’ εκχέ ρομνιά άμα μανγκέλας. Αλλά βοβ πρέπει τι τζανέλας ότι ο πρώτος μπιαβ, σο κερντάς-λες ο Ιεχωβά, αβιλό εκχέ μουρσέσαρ ντα εκχέ τζουβλιάσαρ, ντα ο Ιώβ τραμπιντάς τι τζουβντιόλ αντικάς. * (Ντικχ ι υποσημείωση) (Γένεση 2:​18, 24) Περίπου 1.600 μπρεσά πιο σοράν, ο Ιησούς σικλιαρντάς ι τζενέν ι ίδια αρχή, ότι εκ μουρς ή εκ τζουβέλ μπορίνενα τι αβέν παντριμέ εκχέ τζενέσαρ ντα ότι σάντε λέσαρ μπορίνενα τι σοβέν.​—Ματθαίος 5:​28· 19:4, 5.

20. Σαρ βοηθίντιβασα τι τραμπίνας σωστέ αμαλέν ντα διασκέδαση άμα τζανάσα λατσσές ι Ιεχωβάς ντα λέσκε κανόνες;

²⁰ Σαρ μπορίνασα τι τθεράς πίστη σαρ οντιά σο τθερέλας ο Ιώβ; Πάλι, πρέπει τι τζανάς λατσσές ι Ιεχωβάς ντα τι μουκχάς ανταγιά γνώση τι επηρεάνελ σαρέ οντουλά σο κεράσα. Για παράδειγμας, η Γραφή βακερέλα ότι ο Ιεχωβά «μισίνελα σαρέ οντουλέν σο μανγκένα ι βία» ντα ότι δεν πρέπει τι κεράς παρέα τζενέντζαρ σο γκεραβένα ι αλήθεια. (Διαβάνεν Ψαλμός 11:5· 26:4) Ακανά πουτσέν-τουμέν: “Σο σικλιάβα ανταλέ ντουέ εδαφιόνταρ για το τρόπος σο σκεφτίνελα ο Ιεχωβά; Σαρ πρέπει  τι βοηθίνελ-μαν ανταβά τι αγαβάβ καλά πράγματα ισί ο πιο σημαντικά μι ζωγιάτε; Σαρ πρέπει τι βοηθίνελ-μαν τι χρησιμοποιήναβ ο Ίντερνετ σωστά, τι τραμπίναβ λατσσέ αμαλέν ντα λατσσί διασκέδαση;” Τουμαρέ απαντήσεις κα βοηθίνεν-τουμέν τι αγαβέν καζόμ λατσσές τζανένα ι Ιεχωβάς. Να μανγκάσα τι επηρεάντιβας ανταλέ πφιρνέ ντουνιάσταρ. Οτθάρ, πρέπει τι γυμνάνας ι “ικανότητα τι αγαβάς”, δηλαδή τι σικλιάς τι ξεχωρίνας σο ισί σωστός ντα σο ισί λάθος, κάνα τθεράσα σοφία ντα κάνα να τθεράσα.​—Εβραίους 5:​14· Εφεσίους 5:15.

21. Σο κα βοηθίνελ-αμέν τι “αγαβάς σαρέ ο πράγματα” σο χρειαζίντιβελα τι τζανάς για τι κεράς ι Ιεχωβάς χαρούμενος;

²¹ Ο Νώε, ο Δανιήλ ντα ο Ιώβ κερντέ σο νακχέλας λένγκε βαστέσταρ για τι γνωρίνεν λατσσές ι Ιεχωβάς, ντα οτθάρ βοβ βοηθιντάς-λεν τι “αγαβέν σαρέ ο πράγματα” σο χρειαζίντιβελας τι αγαβέν για τι κερέν-λες χαρούμενος. Λένγκο παράδειγμας σικαβέλα ότι, όταν κεράσα ο πράγματα αντικάς σαρ μανγκέλα ο Ιεχωβά, τθεράσα επιτυχία κι ζωή. (Ψαλμός 1:​1-3) Οτθάρ, πουτσέν-τουμέν: “Τζανάβα με ι Ιεχωβάς αζόμ λατσσές καζόμ τζανέλας-λες ο Νώε, ο Δανιήλ ντα ο Ιώβ;” Η αλήθεια ισί ότι αντιβές μπορίνασα τι τζανάς ι Ιεχωβάς ατζέ πιο λατσσές οντουλέ πιστέ μουρσένταρ σόσκε σικλιαρντάς-αμέν πιο μπουτ πράγματα πέσκε. (Παροιμίες 4:​18) Οτθάρ, τι διαβάνεν προσεκτικά ι Γραφή. Τι σκεφτίνεν λατσσές οντουλά σο διαβάνενα. Ντα τι προσευχίντιβεν για άγιος πνεύμας. Αντικάς, ανταβά πφιρνό ντουνιάς να κα επηρεάνελ-τουμέν. Αλλά κα τθερέν ι Ντεβλέσκι σοφία ντα κα πλησιάνεν ατζέ πιο μπουτ τουμαρέ ουράνιε Νταντές.​—Παροιμίες 2:​4-7.