1, 2. (α) Σόσκε ενθαρρύνελα-αμέν ο παράδειγμας σο μουκχλάς ο Νώε, ο Δανιήλ ντα ο Ιώβ; (β) Σαρ ισινέ ο πράγματα κάνα ο Ιεζεκιήλ γραφιντάς ο λάφια σο ισί κο εδάφιος Ιεζεκιήλ 14:14;

ΜΗΠΩΣ νακχένα δυσκολίες επειδή ισινέν νασφαλέ, τθερένα οικονομικά προβλήματα ή διωγμός; Μήπως μερικές φορές ισί τουμένγκε δύσκολος τι ατσσόν χαρούμενοι κι υπηρεσία κι Ιεχωβάσκι; Αν βα, ο παράδειγμας σο μουκχλάς ο Νώε, ο Δανιήλ ντα ο Ιώβ κα ενθαρρύνελ-τουμέν. Ανταλά μουρσά ισινέ ατελείς ντα τθερένας μπουτ δυσκολίες σο μοιάζενα αμαρέντζαρ. Μπάζιμα, ατζέ-ντα η ζωή λένγκι ισινέ σε κίνδυνος. Όμως, ατσσιλέ αφοσιωμέ κο Ιεχωβά, ντα λέσκε γιακχίντε ισινέ λατσσέ παραδείγματα επειδή τθερένας πίστη ντα ντένας καν.​—Διαβάνεν Ιεζεκιήλ 14:​12-14.

² Ο Ιεζεκιήλ γραφιντάς ο λάφια σο ισί κο εδάφιος ανταλέ μαθημάσκο κι Βαβυλωνία κο μπρες 612 Π.Κ.Χ. * (Ντικχ ι υποσημείωση) (Ιεζεκιήλ 1:1· 8:1) Ανταβά αβιλό-πες χάνικ μπρεσά  πριν τι καταστραφίντιβελ η Ιερουσαλήμ κο μπρες 607 Π.Κ.Χ. Σάντε χάνικ τζενέ κι Ιερουσαλήμ σωσάλε επειδή ισινέ πιστοί ντα ντένας καν σαρ ο Νώε, ο Δανιήλ ντα ο Ιώβ. (Ιεζεκιήλ 9:​1-5) Ο Ιερεμίας, ο Βαρούχ, ο Αβδέ-μέλεχ ντα ο Ρηχαβίτες ισινέ κάποιοι ανταλένταρ.

3. Σο κα σικλιάς ανταλέ μαθημάστε;

³ Αντιβές-ντα, σάντε οντουλά σο ισί δίκαιοι κι Ιεχωβάσκε γιακχά, τζενέ σαρ ο Νώε, ο Δανιήλ ντα ο Ιώβ, κα σώντιβεν όταν κα αβέλ ο τέλος ανταλέ πφιρνέ ντουνιάσκο. (Αποκάλυψη 7:9, 14) Για τι σικλιάς σόσκε ο Ιεχωβά χρησιμοποιηντάς ο παράδειγμας ανταλέ τρινέ μουρσένγκο σο κερντέ ο σωστός λέσκε γιακχίντε. Κα ντικχάς (1) ο δυσκολίες σο τθερέλας ο κάθε εκ λένταρ ντα (2) σαρ μπορίνασα αμέν τι τθεράς πίστη ντα τι ντας καν σαρ βον.

4, 5. Καλά ισινέ μερικές δυσκολίες σο τθερέλας ο Νώε, ντα σο κερέλα αμένγκε εντύπωση λέσκε περιπτωσιάτε;

⁴ Καλά ισινέ μερικές δυσκολίες σο τθερέλας ο Νώε; Αζομάν σο τζουβντιόλας ο προπάππους ι Νωέσκο, ο Ενώχ, ο τζενέ ισινέ μπουτ πφιρνέ. Βακερένας μπουτ “μπέτι πράγματα” ι Ιεχωβάσκε. (Ιούδα 14, 15) Ο ντουνιάς, καζόμ τζάλας, αβέλας ατζέ πιο βίαιος. Ντα κο ντιβεσά σο τζουβντιόλας ο Νώε η πφουβ «ισινέ πφερντί βία». Πφιρνέ άγγελοι αβιλέ κι πφουβ, κερντέ πέσκε τζενένγκε σώματα ντα παντρισάλε τζουβλίντζαρ. Ο τσσαβέ λένγκε ισινέ άγριοι ντα χάνας-πες. (Γένεση 6:​2-4, 11, 12) Αλλά σαρέ μπορίνενας τι ντικχέν ότι ο Νώε ξεχωρίνελας. Η Αγία Γραφή βακερέλα ότι «ο Νώε κερδιντάς ι ευλογία ι Ιεχωβάσκι». Να μοιάζελας κο γιαβερά τζενέ, αλλά κερέλας ο σωστός. «Ο Νώε πφιρντάς ι αληθινέ Ντεβλέσαρ».​—Γένεση 6:8, 9.

⁵ Σο σικλιάσα ι Νωέσκε ανταλέ λαφίνταρ; Πρώτον, σκεφτίνεν καζόμ καιρός υπηρετίνελας ο Νώε πιστά ι Ιεχωβάς οντουλέ πφιρνέ ντουνιάστε πριν τι αβέλ ο Κατακλυσμός. Να κερντάς-λες ανταβά σάντε 70 ή 80 μπρεσά, αλλά σχεδόν 600 μπρεσά! (Γένεση 7:​11) Δεύτερον, ντεν-τουμέν γκοντί ότι αζομάν να ισινέ εκκλησία για τι βοηθίνελ-λες ντα τι στηρίνελ-λες σαρ τθεράσα αμέν αντιβές. Ντα μάλλον ατζέ-ντα ο πφραλά ντα ο πφενιά λέσκε να στηριντέ-λες. *​—Ντικχ ι υποσημείωση.

6. Σαρ σικαντάς ο Νώε μπαρό θάρρος;

⁶ Ο Νώε να πακιάλας ότι ερεσέλας σάντε τι αβέλ λατσσό τζενό. Χωρίς τι νταρέλ, βακερέλας κο γιαβερά ότι πακιάλας κο Ιεχωβά. Κι Γραφή διαβάνασα ότι «βακερέλας για το δίκαια πράγματα ι Ντεβλέσκε». (2 Πέτρου 2:5) Ο απόστολος Παύλος βακερντάς: «Με την πίστη σο τθερέλας [ο Νώε] σικαντάς ότι οντουβά ντουνιάς αξίνελας τι καταστραφίντιβελ». (Εβραίους 11:7) Σίγουρα, ο τζενέ πρασάνας-λες ντα προσπαθίνενας τι τσσιναβέν-λες. Μπορεί ατζέ-ντα τι βακερένας ότι κα κερένας λέσκε κακός. Αλλά ο Νώε να νταρέλας κατά τζενέ. (Παροιμίες 29:​25) Τθερέλας πίστη, οτθάρ ο Ιεχωβά ντινάς-λες θάρρος. Ντα ο Ιεχωβά ντέλα ο ίδιος θάρρος σαρέ πι πιστέ υπηρετόντε αντιβές.

7. Καλά δυσκολίες τθερέλας ο Νώε όταν κερέλας ι κιβωτός;

⁷ Ο Νώε ισινέας πιστός κο Ιεχωβά πιο μπουτ από 500 μπρεσά κάνα ο Ιεχωβά βακερντάς λέσκε τι κερέλ εκ μπαρί κιβωτός.  Ανταγιά κιβωτός κα χρησιμοποιήντιβελας για τι σώντιβεν μερικά τζενέ ντα ζώα κατά Κατακλυσμός. (Γένεση 5:​32· 6:​14) Πρέπει τι ισινέ μπουτ δύσκολος τι κερέλ ο Νώε ανταγιά μπαρί κιβωτός. Ντα σίγουρα τζανέλας ότι ο τζενέ κα πρασάνας-λες ατζέ πιο μπουτ ντα κα κερένας λέσκι ζωή μπουτ δύσκολη. Όμως, ο Νώε ισινέ πιστός ντα ντέλας καν κο Ιεχωβά. «Κερντάς ακριβώς αντικάς».​—Γένεση 6:22.

8. Σαρ σικαντάς ο Νώε εμπιστοσύνη κο Ιεχωβά για τι ανέλ ο αναγκαία πι φαμιλιάκε;

⁸ Ο Νώε τθερέλας ατζέκ εκ δυσκολία. Έπρεπε τι ανέλ ο αναγκαία πι ρομνιάκε ντα πι τσσαβένγκε. Πριν κατά Κατακλυσμός, ο τζενέ έπρεπε τι μαρέν-πες μπουτ για τι καλλιεργίνεν ι πφουβ. Ο Νώε-ντα έπρεπε τι κερέλ ο ίδιος. (Γένεση 5:​28, 29) Όμως, να μουκχλάς ο ανάγκες πι φαμιλιάκε τι αβέν η πιο μπαρί ανησυχία λέσκι. Πάντα ο πιο σημαντικός πράγμας λέσκε ζωγιάτε ισινέ τι υπηρετίνελ ι Ιεχωβάς. Παρόλο σο ο Νώε κερέλας ι κιβωτός ίσως για 40 ή 50 μπρεσά, ατσσιλό αφοσιωμέ κο Ιεχωβά. Ντα κερντάς-λες ανταβά ατζέ 350 μπρεσά αφού τελειωσάλο ο Κατακλυσμός. (Γένεση 9:​28) Ο Νώε ισινέ εκ μπουτ λατσσό παράδειγμας επειδή σικαβέλας πίστη ντα ντέλας καν!

9, 10. (α) Σαρ μπορίνασα τι τθεράς ι πίστη σο τθερέλας ο Νώε ντα τι ντας καν σαρ βοβ; (β) Αν ισινέν αποφασισμέ τι ντεν καν κο νόμοι κι Ντεβλέσκε, καλέ πραγμάσκε μπορίνενα τι αβέν σίγουροι;

⁹ Σαρ μπορίνασα τι τθεράς ι πίστη σο τθερέλας ο Νώε ντα τι ντας καν σαρ βοβ; Κεράσα-λες ανταβά όταν υποστηρίνασα οντουβά σο ισί σωστός ι Ιεχωβάσκε, όταν να κεράσα ο πράγματα σο κερέλα ι Μπενγκέσκο ντουνιάς ντα όταν τσσουβάσα ι Ιεχωβάς πρώτα αμαρέ ζωγιάτε. (Ματθαίος 6:​33· Ιωάννης 15:​19) Σίγουρα, επειδή τζουβντιάσα αντικάς, ο τζενέ να συμπαθίνενα-αμέν. Για παράδειγμας, επειδή ισινάμ αποφασισμέ τι ντας καν κο νόμοι κι Ντεβλέσκε για το σεξ ντα ι μπιαβέσκε, ο τζενέ μπορεί τι κατηγορίνενα-αμέν κι τηλεόραση ντα κο Ίντερνετ. (Διαβάνεν Μαλαχίας 3:​17, 18) Σαρ ο Νώε, αντικάς αμέν-ντα να νταράσα κατά τζενέ. Νταράσα κατά Ιεχωβά, δηλαδή τθεράσα μπαρό σεβασμός λέσκε ντα να μανγκάσα τι στεναχωρίνας-λες. Τζανάσα ότι σάντε Βοβ μπορίνελα τι ντελ-αμέν αιώνια ζωή.​—Λουκάς 12:4, 5.

¹⁰ Πουτσέν τουμαρό νεαυτός: “Κα συνεχίναβ τι κεράβ ο σωστός κο γιακχά κι Ντεβλέσκε, ατζέ-ντα όταν ο γιαβερά πρασάνα-μαν ή κατηγορίνενα-μαν; Τθεράβα εμπιστοσύνη κο Ιεχωβά ότι κα φροντίνελ μι φαμιλί ατζέ-ντα κάνα ισί δύσκολος τι νικαβάβ ο αναγκαία;” Αν τθερένα εμπιστοσύνη κο Ιεχωβά ντα ντένα-λες καν σαρ ο Νώε, μπορίνενα τι αβέν σίγουροι ότι ο Ιεχωβά κα φροντίνελ-τουμέν.​—Φιλιππησίους 4:6, 7.

11. Καλά μπαρέ δυσκολίες τθερέλας ο Δανιήλ ντα ο τριν αμαλά λέσκε κι Βαβυλώνα; (Ντικχ ι φωτογραφία σο ισί κι αρχή)

¹¹ Καλά ισινέ μερικές δυσκολίες σο τθερέλας ο Δανιήλ; Ο Δανιήλ αναγκασάλο τι τζουβντιόλ κι Βαβυλώνα, εκ ξένη πόλη σο ισινέ πφερντί ψεύτικε ντεβλέντζαρ ντα μπενγκαλέ πραγματέντζαρ. Ο τζενέ οτθέ να συμπαθίνενας ι Ιουδαιόν ντα πρασάνας εμ λεν εμ λένγκε Ντεβλές, ι Ιεχωβάς. (Ψαλμός 137:1, 3) Ανταβά πρέπει τι πληγώνελας μπουτ τον Δανιήλ ντα ι γιαβερέ Ιουδαιόν σο μανγκένας ι Ιεχωβάς! Επίσης, μπουτ τζενέ παρατηρίνενας με προσοχή σο κερέλας ο Δανιήλ ντα  λέσκε τριν αμαλά, ο Ανανίας, ο Μισαήλ ντα ο Αζαρίας, επειδή κα λένας εκπαίδευση για τι υπηρετίνεν ι βασιλιάς κι Βαβυλώνα. Μπεκλεντίνενας λένταρ τι χαν κατά βασιλιάσκε χαμπίματα, σο μερικά ανταλένταρ ισινέ πράγματα σο να μανγκέλας ο Ιεχωβά τι χαλ λέσκο λαός. Αλλά ο Δανιήλ να “μαγαριντάς-πες κατά βασιλιάσκε χαμπίματα”.​—Δανιήλ 1:​5-8, 14-17.

12. (α) Σο τζενό ισινέ ο Δανιήλ; (β) Σαρ ντικχέλας ο Ιεχωβά τον Δανιήλ;

¹² Ο Δανιήλ τθερέλας ατζέκ εκ δυσκολία, σο κι αρχή μπορεί μα τι ντικχίντιβελας αζόμ δύσκολη. Τθερέλας μπουτ ικανότητες, οτθάρ ο βασιλιάς ντινάς-λες ειδικά προνόμια. (Δανιήλ 1:​19, 20) Αλλά ο Δανιήλ να αβιλό μπαρικανό ούτε σκεφτίνελας ότι λέσκι άποψη ισινέ πάντα σωστή. Ατσσιλό ταπεινός ντα αγαβέλας πο όρια. Πάντα βακερέλας ότι χάρη κο Ιεχωβά αβιλόας επιτυχιμέ. (Δανιήλ 2:​30) Σκεφτίνεν: Ο Ιεχωβά βακερντάς ότι ο Δανιήλ ισινέ λατσσό παράδειγμας σαρ ισινέ ο Νώε ντα ο Ιώβ. Αζομάν, ο Δανιήλ ισινέ τερνό, αλλά ο Νώε ντα ο Ιώβ μουλέας πριν μπουτ μπρεσά ντα υπηρετιντέας πιστά ι Ιεχωβάς σαρέ πουμαρέ ζωγιάτε. Ο Ιεχωβά μπαγιά τθερέλας εμπιστοσύνη κο Δανιήλ! Ντα να κερντάς λάθος, επειδή ο Δανιήλ ατσσιλό πιστός ντα ντέλας καν ι Ντεβλές σαρί πι ζωή. Όταν ο Δανιήλ ισινέ περίπου 100 μπρεσένγκο, ο άγγελος ι Ντεβλέσκο βακερντάς λέσκε ακαλά σουκάρ λάφια: «Δανιήλ, . . . ισινάν μπουτ αγαπητός τζενό».​—Δανιήλ 10:11.

13. Σόσκε μπορεί ο Ιεχωβά τι βοηθιντάς τον Δανιήλ τι λελ εκ σημαντική θέση;

¹³ Επειδή ο Ιεχωβά ευλογιντάς-λες, ο Δανιήλ λιντάς σημαντική θέση, πρώτα κι Βαβυλωνιακή Αυτοκρατορία ντα σοράν κι Μηδοπερσική Αυτοκρατορία. (Δανιήλ 1:​21· 6:1, 2) Μπορεί ο Ιεχωβά τι καθοδηγιντάς ο πράγματα για τι λελ ο Δανιήλ ανταγιά σημαντική θέση ντα αντικάς τι βοηθίνελ πι λαός, σαρ κερντάς ο Ιωσήφ κι Αίγυπτος ντα η Εσθήρ ντα ο Μαραδοχαίος κι Περσία. * (Ντικχ ι υποσημείωση) (Δανιήλ 2:​48) Μπορίνενα τι σκεφτίνεν σαρ νιωθίνελας ο Ιεζεκιήλ ντα ο γιαβερά Ιουδαίοι αιχμάλωτοι όταν ντικχλέ σαρ ο Ιεχωβά χρησιμοποιήνελας τον Δανιήλ για τι βοηθίνελ-λεν; Ανταβά πρέπει τι ενθαρρυντάς-λεν μπουτ!

14, 15. (α) Σαρ μοιάζενα αμαρέ ντιβεσά ι ντιβεσέντζαρ σο τζουβντιόλας ο Δανιήλ; (β) Σο μπορίνενα τι σικλιόν ο νταντά ντα ο νταγιά αντιβές κατά ντατ ντα κατά ντάι του Δανιήλ;

 ¹⁴ Σαρ μπορίνασα τι τθεράς ι πίστη σο τθερέλας ο Δανιήλ ντα τι ντας καν σαρ βοβ; Ο ντουνιάς σο τζουβντιάσα αντιβές ισί πφερντό λουμνικανέ πραγματέντζαρ ντα ψεύτικε θρησκειέντζαρ. Ο τζενέ επηρεάντιβενα κατά Μπαρί Βαβυλώνα, δηλαδή σαρέ κατά ψεύτικες θρησκείες ι ντουνιάσκε, σο βακέρντιβελα κι Γραφή «κχερ ι δαιμονένγκο». (Αποκάλυψη 18:2) Αλλά αμέν ισινάμ σαρ ξένοι ανταλέ ντουνιάστε. Οτθάρ, ο τζενέ ντικχένα ότι ισινάμ μπουτ διαφορετικοί ντα μπορεί τι πρασάνα-αμέν. (Μάρκος 13:​13) Όμως, σαρ ο Δανιήλ, τι πλησιάνας αμέν-ντα ι Ιεχωβάς, αμαρέ Ντεβλές. Άμα ισινάμ ταπεινοί, τθεράσα εμπιστοσύνη κο Ιεχωβά ντα ντάσα-λες καν, κα αβάς αμέν-ντα πολύτιμοι λέσκε γιακχίντε.​—Αγγαίος 2:7.

¹⁵ Ο νταντά ντα ο νταγιά μπορίνενα τι σικλιόν σημαντικά πράγματα κατά ντατ ντα κατά ντάι του Δανιήλ. Όταν ο Δανιήλ ισινέ χουρντό κο Ιούδας, ο πιο μπουτ τζενέ ισινέ μπουτ πφιρνέ. Όμως, βοβ σικλιλό τι μανγκέλ ι Ιεχωβάς. Μήπως ανταβά αβιλό-πες τυχαία; Όχι. Λέσκο ντατ ντα λέσκι ντάι πρέπει τι σικλιαρντέ-λες ι Ιεχωβάσκε. (Παροιμίες 22:6) Ατζέ-ντα ο ναβ Δανιήλ, σο μανγκέλα τι βακερέλ «Μο Κριτής Ισί ο Ντεβέλ», σικαβέλα ότι λέσκο ντατ ντα λέσκι ντάι μανγκένας ι Ιεχωβάς. (Δανιήλ 1:6, υποσημείωση) Οτθάρ, νταντάλεν ντα νταγιάλεν, τι τθερέν υπομονή όταν σικλιαρένα τουμαρέ τσσαβέν ι Ιεχωβάσκε. Μα τι τσσιναβέν τι προσπαθίνεν. (Εφεσίους 6:4) Τι προσευχίντιβεν γιεκ λέντζαρ. Τι προσευχίντιβεν λένγκε. Τι κερέν ο πιο λατσσό σο μπορίνενα για τι σικλιαρέν-λεν τι μανγκέν οντουβά σο ισί σωστός ι Ιεχωβάσκε, ντα ο Ιεχωβά κα πφερέλ-τουμέν ευλογίες.​—Ψαλμός 37:5.

16, 17. Καλά δυσκολίες τθερέλας ο Ιώβ (α) όταν ισινέ χουλανό ντα σεβάνενας-λες; (β) όταν ταλαιπωρίντιβελας;

¹⁶ Καλά ισινέ μερικές δυσκολίες σο τθερέλας ο Ιώβ; Ο πράγματα λέσκε ζωγιάτε αλλαξάλε μπουτ. Ο Ιώβ ισινέ «ο πιο σημαντικός σαρέ κατά τζενέ σο μπεσένας κι Ανατολή». (Ιώβ 1:3) Ισινέ μπουτ χουλανό, ντα μπουτ τζενέ τζανένας-λες ντα σεβάνενας-λες. (Ιώβ 29:​7-16) Όμως, ο Ιώβ να αμντίνελας ότι ισινέ πιο λατσσό κατά γιαβερά ούτε νιωθίνελας ότι να τθερέλας ανάγκη ι Ντεβλές. Τζανάσα-λες ανταβά επειδή ο Ιεχωβά βακερντάς ότι ισί “λέσκο υπηρέτης” ντα ότι «ισί δίκαιος ντα σωστός τζενό [σο] νταρέλα κατά Ντεβέλ ντα νασέλα ντουρ κάθε μπέτι πραγμάσταρ».​—Ιώβ 1:8.

¹⁷ Ξαφνικά, όμως, η ζωή του Ιώβ αλλαξάλι μπουτ. Χασαρντάς τα πάντα ντα ισινέ αζόμ στεναχωριμέ σο μανγκέλας τι μερέλ. Αντιβές, τζανάσα ότι ο Μπενγκ αντάς ο προβλήματα κο Ιώβ. Βακερντάς ότι ο Ιώβ υπηρετίνελας ι Ιεχωβάς σάντε από συμφέρον. (Διαβάνεν Ιώβ 1:9, 10) O Ιεχωβά να μουκχλάς τι νακχέλ αντικάς ανταβά. Σο κα κερέλας για τι σικαβέλ ότι ο Μπενγκ ισί εκ πφιρνό ψεύτης; Ντινάς κο Ιώβ ι ευκαιρία τι σικαβέλ ότι ισινέ αφοσιωμέ κο Ντεβέλ ντα ότι υπηρετίνελας-λες από αγάπη.

18. (α) Σο κερέλα τουμένγκε εντύπωση κο Ιώβ; (β) Σο σικλιάσα ι Ιεχωβάσκε κατά τρόπος σο συμπεριφερισάλο κο Ιώβ;

¹⁸ Μπαρέ χολιάσαρ, ο Μπενγκ αντάς παλάλ γιαβερέστε προβλήματα κο Ιώβ ντα κερντάς-λες τι πακιάλ ότι αβένας κατά Ντεβέλ. (Ιώβ 1:​13-21) Σοράν, τριν μουρσά σο βακερένας ότι ισινέ αμαλά του Ιώβ πληγωντέ-λες πουμαρέ λαφίντζαρ. Βακερντέ ότι ισινέ γκεραλό ντα ότι ο Ντεβέλ τιμωρίνελας-λες. (Ιώβ 2:​11· 22:1, 5-10)  Όμως, ο Ιώβ ατσσιλό αφοσιωμέ κο Ιεχωβά. Ισί μπαγιά ότι ο Ιώβ βακερντάς μπάζιμα πράγματα χωρίς τι σκεφτίνελ-λεν. (Ιώβ 6:​1-3) Αλλά ο Ιεχωβά αγαντάς ότι ο Ιώβ κερντάς-λες ανταβά επειδή ισινέ πληγωμέ ντα στεναχωριμέ. Ο Ιεχωβά ντικχλάς ότι ο Ιώβ ποτές να μουκχλάς-λες, ατζέ-ντα όταν ο Μπενγκ γκιλό κόντρα κο Ιώβ ντα προσβαλιντάς-λες παλάλ γιαβερέστε. Αφού τελειωσάλε ανταλά μπαρέ δοκιμασίες, ο Ιεχωβά ντινάς κο Ιώβ ντούι φαρ πιο μπουτ οντουλένταρ σο τθερέλας ντα ατζέ 140 μπρεσά. (Ιακώβου 5:​11) Σαρέ οντουλά μπρεσά, ο Ιώβ συνεχιντάς τι υπηρετίνελ ι Ντεβλές σαρέ πι γκίσαρ. Σαρ τζανάσα-λες ανταβά; Ο εδάφιος Ιεζεκιήλ 14:​14, σο ισί ο εδάφιος ανταλέ μαθημάσκο, γραφισάλο εκατοντάδες μπρεσά αφού μουλό ο Ιώβ.

19, 20. (α) Σαρ μπορίνασα τι τθεράς ι πίστη σο τθερέλας ο Ιώβ ντα τι ντας καν σαρ βοβ; (β) Σαρ μπορίνασα τι τζιτζίνας ι γιαβερένγκε σαρ ο Ιεχωβά;

¹⁹ Σαρ μπορίνασα τι τθεράς ι πίστη σο τθερέλας ο Ιώβ ντα τι ντας καν σαρ βοβ; Σο-ντα τι νακχάσα, μανγκάσα πάντα τι αβάς σίγουροι ότι τσσουβάσα ι Ιεχωβάς πρώτα αμαρέ ζωγιάτε. Μανγκάσα τι σικαβάς λέσκε εμπιστοσύνη σαρέ κο πράγματα ντα τι ντας-λες καν αντράλ αμαρέ γκίσταρ. Κι πραγματικότητα, αμέν τθεράσα ατζέ πιο μπουτ λόγους κατά Ιώβ τι κεράς-λες ανταβά. Σκεφτίνεν σο τζανάσα αντιβές. Τζανάσα μπουτ πράγματα ι Μπενγκέσκε ντα οντουλένγκε σο κερέλα. (2 Κορινθίους 2:​11) Χάρη κι Γραφή, ντα ειδικά κο βιβλίος Ιώβ, τζανάσα σόσκε ο Ντεβέλ μουκχέλα ο βάσανα. Κατά προφητεία του Δανιήλ, τζανάσα ότι η Βασιλεία ι Ντεβλέσκι ισί εκ πραγματική κυβέρνηση σο τθερέλα Βασιλιάς ι Ιησού Χριστός. (Δανιήλ 7:​13, 14) Ντα τζανάσα ότι ανταγιά Βασιλεία ατζεχάνικ κα κυβερνίνελ σαρί ι πφουβ ντα κα σταματίνελ σαρέ ο βάσανα.

²⁰ Ανταλένταρ σο νακχλάς ο Ιώβ σικλιάσα επίσης τι τζιτζίνας αμαρέ πφραλένγκε σο τθερένα προβλήματα. Σαρ ο Ιώβ, μπορεί βον-ντα τι βακερέν πράγματα χωρίς τι σκεφτίνεν-λεν. (Εκκλησιαστής 7:7) Αλλά δεν πρέπει τι κρίνας-λεν ή τι κατηγορίνας-λεν. Πρέπει τι προσπαθίνας τι αγαβάς-λεν. Αντικάς, κα μοιάζας αμαρέ Νταντέστε, κο Ιεχωβά, σο σικαβέλα αγάπη ντα έλεος.​—Ψαλμός 103:8.

21. Σαρ ο λάφια σο ισί κο εδάφιος 1 Πέτρου 5:​10 ανένα αμαρέ γκοντιάτε οντουλά σο νακχλάς ο Νώε, ο Δανιήλ ντα ο Ιώβ;

²¹ Ο Νώε, ο Δανιήλ ντα ο Ιώβ τζουβντιλέ διαφορετικέ μπρεσέντε ντα νακχλέ διαφορετικά πράγματα. Όμως, ο τριν-ντα νταϊντιντέ πουμαρέ δυσκολίες. Λένγκε ιστορίες ανένα αμαρέ γκοντιάτε ο λάφια σο βακερντάς ο απόστολος Πέτρος: «Αφού . . . κα νακχέν δυσκολίες για χάνικ, ο Ντεβέλ σο λέσταρ αβέλα ο λατσσιπέ σο να αξίνασα-λες, . . . κα τελειώνελ τουμαρό σικλιαριπέ. Βοβ κα κερέλ-τουμέν τι αβέν σταθεροί, κα κερέλ-τουμέν ζουρανέ, κα τσσουβέλ τουμένγκε ζουρανέ θεμέλια».​—1 Πέτρου 5:10.

22. Σο κα σικλιάς κο γιαβέρ μάθημας;

²² Ο λάφια σο ισί κο εδάφιος 1 Πέτρου 5:​10 νικιόνα μπαγιά κι Ντεβλέσκο λαός-ντα αντιβές. Ο Ιεχωβά ντέλα-αμέν ι σιγουριά ότι κα κερέλ πι υπηρετόν τι αβέν σταθεροί ντα ζουρανέ. Σαρέ μανγκάσα ο Ιεχωβά τι κερέλ-αμέν ζουρανέ, ντα μανγκάσα τι ατσσάς σταθεροί ντα πιστοί λέστε. Οτθάρ μανγκάσα τι τθεράς πίστη ντα τι ντας καν σαρ ο Νώε, ο Δανιήλ ντα ο Ιώβ. Κο γιαβέρ μάθημας, κα σικλιάς ότι ανταλά τζενέ μπορίνενας τι ατσσόν πιστοί κο Ιεχωβά επειδή τζανένας-λες μπαγιά. Κι πραγματικότητα, μπορίνενας τι “αγαβέν σαρέ ο πράγματα” σο μανγκέλας βοβ λένταρ. (Παροιμίες 28:5) Αμέν-ντα μπορίνασα τι κεράς ο ίδιος.