1. Σο έπρεπε τι κερέλ εκ τζενό για τι τζαλ κο βασιλιάς κι Περσιάκο;

ΒΑΚΕΡΕΝ ότι τζουβντιόνα κι Περσία 2.500 μπρεσά πιο τζανγκλέ. Μανγκένα τι κερέν λάφι ι βασιλιάσαρ, οτθάρ τζάνα κο Σούσα, κι πόλη σο μπεσέλα ο βασιλιάς. Να κα νακχέλας τουμαρέ γκοντιάταρ τι τζαν λέστε άμα να κα βακερέλας-λες τουμένγκε βοβ. Άμα κα κερένας-λες ανταβά, μπορεί τι μερένας!​—Εσθήρ 4:11.

2. Σαρ μανγκέλα ο Ιεχωβά τι νιωθίνας κάνα τζάσα πασέ λέστε;

² Ισινάμ πφερντέ εκτίμηση σο ο Ιεχωβά νανέ σαρ οντουβά Πέρσης βασιλιάς! Παρόλο σο ισί μπουτ πιο ζουρανό ντα σημαντικός σαρέ κατά τζενέ σο κυβερνίνενα, πουτρέλα αμένγκε πι αγκάλι κάνα-ντα τι τζας λέσκε. Μανγκέλα τι τζας πασέ λέστε χωρίς τι λατζάς. Για παράδειγμας, παρόλο σο ο Ιεχωβά ισί Οντουβά σο κερντάς-αμέν, ο πιο Ζουρανό ντα ο πιο Μπαρό Κύριος, μανγκέλα τι βακεράς λέσκε «Ντάντε», εκ λάφι σο σικαβέλα ότι ισινάμ πασέ λέστε. (Ματθ. 6:9) Καζόμ πφερντιόλα αμαρό γκι σο ο Ιεχωβά μανγκέλα τι νιωθίνας-λες αζόμ πασέ αμέντε!

3. Σόσκε ισί σωστός τι βακεράς ι Ιεχωβάσκε «Ντάντε», ντα σο κα ντικχάς ανταλέ μαθημάστε;

³ Ισί σωστός τι βακεράς ι Ιεχωβάσκε «Ντάντε», σόσκε βοβ ντέλα-αμέν ι ζωή. (Ψαλμ. 36:9) Ισί αμαρό Ντατ, οτθάρ πρέπει τι ντας-λες καν. Κάνα κεράσα σο μανγκέλα αμένταρ, τθεράσα μπουτ σουκάρ ευλογίες. (Εβρ. 12:9) Εκ ανταλένταρ ισί ότι κα τζουβντιάς για πάντα, είτε κο ουρανός είτε κι πφουβ. Αλλά τθεράσα λατσσέ πράγματα ακανά-ντα. Ανταλέ μαθημάστε κα ντικχάς σαρ σικαβέλα ο Ιεχωβά ότι ισί λατσσό Ντατ ακανά ντα σόσκε ισινάμ σίγουροι ότι να κα μουκχέλ-αμέν ποτές.  Πρώτα όμως, κα ντικχάς σόσκε ισινάμ σίγουροι ότι αμαρό Ντατ μανγκέλα-αμέν αντράλ πι γκίσταρ ντα πφαμπόλα αμένγκε.

4. Σόσκε ισί δύσκολος μερικέ τζενένγκε τι ντικχέν ι Ιεχωβάς σαρ Ντατ;

⁴ Ισί δύσκολος τουμένγκε τι ντικχέν ι Ντεβλές σαρ Ντατ; Μερικοί μπορεί τι νιωθίνενα ότι ανγκλάλ κο Ιεχωβά ισί μπουτ χουρντέ ντα να τθερένα αξία. Να πακιάνα σαρέ πουμαρέ γκίσαρ ότι ο Ντεβέλ, ο πιο Ζουρανό, πφαμπόλα λένγκε. Αλλά αμαρό λατσσό Ντατ να μανγκέλα τι νιωθίνας αντικάς. Ντινάς-αμέν ι ζωή ντα μανγκέλα τι αβάς λέσκε αμαλά. Ο απόστολος Παύλος βακερντάς-λες ανταβά, ντα σοράν ντινάς κο τζενέ κι Αθήνα τι αγαβέν ότι ο Ιεχωβά «νανέ ντουρ αμένταρ». (Πράξ. 17:​24-29) Ο Ντεβέλ μανγκέλα ο κάθε εκ αμένταρ τι τζαλ πασέ λέστε σαρ εκ τσσαβό σο νικιόλα λέσταρ τι τζαλ πι νταντέστε σο μανγκέλα-λες ντα πφαμπόλα λέσκε.

5. Σο σικλιάσα εκχέ πφενιάταρ;

⁵ Γιαβερένγκε μπορεί τι ισί δύσκολος τι ντικχέν ι Ιεχωβάς σαρ Ντατ σόσκε λένγκο ντατ σικαβέλας λένγκε μπουτ χάνικ ή ατζέ-ντα ιτς αγάπη ντα λατσσιπέ. Ντικχέν σο βακερντάς εκ πφεν: «Μο ντατ ντουκχαβέλας-μαν μπουτ πι λαφίντζαρ. Κάνα αρχισάλομ τι σικλιάβ σο βακερέλα η Γραφή, ισινέ μάνγκε δύσκολος τι νιωθίναβ πασέ εκχέ Νταντέστε σο ισί κο ουρανός. Αλλά κάνα σικλιλόμ ι Ιεχωβάς, σαρέ αλλαξάλε». Νιωθίνενα τουμέν-ντα αντικάς; Άμα βα, τι αβέν σίγουροι ότι, καζόμ τζάλα, κα μπορίνεν τουμέν-ντα τι ντικχέν ότι ο Ιεχωβά ισί ο πιο λατσσό Ντατ.

6. Σο κερντάς ο Ιεχωβά για τι βοηθίνελ-αμέν τι ντικχάς-λες σαρ λατσσό Ντατ σαρ βακερέλα ο εδάφιος Ματθαίος 11:27;

⁶ Για τι βοηθίνελ-αμέν ο Ιεχωβά τι ντικχάς-λες σαρ λατσσό Ντατ, κερντάς τι γραφίντιβεν κι Αγία Γραφή οντουλά σο βακερντάς ντα κερντάς ο Ιησούς. (Διαβάνεν Ματθαίος 11:​27) Ο Ιησούς μοιάζελας αζόμ μπουτ πι Νταντέστε σο βακερντάς: «Οντουβά σο τθερέλα ντικχλό μαν τθερέλα ντικχλό ι Νταντές-ντα». (Ιωάν. 14:9) Ο Ιησούς βακερέλας μπουτ φαρ ότι ο Ιεχωβά ισί σαρ εκ τανό Ντατ. Σάντε κο σταρ Ευαγγέλια, βακερντάς ο λάφι «Ντατ» πιο μπουτ από 160 φαρ κάνα κερέλας λάφι ι Ιεχωβάσκε. Σόσκε κερέλας αζόμ μπουτ λάφι ι Ιεχωβάσκε; Εκ λόγος ισινέ για τι αγαβέν ο τζενέ ότι ο Ιεχωβά ισί λατσσό Ντατ.​—Ιωάν. 17:​25, 26.

7. Σο σικλιάσα ι Ιεχωβάσκε οντουλένταρ σο κερέλας πι Τσσαβέσκε;

⁷ Ανέν τουμαρέ γκοντιάτε σο σικλιάσα ι Ιεχωβάσκε οντουλένταρ σο κερέλας πι Τσσαβέσκε, κο Ιησούς. Ο Ιεχωβά πάντα ασουνέλας ι Ιησούσκε προσευχές. Ντα να ασουνέλας σάντε, αλλά απαντίνελας-ντα. (Ιωάν. 11:​41, 42) Σο-ντα δυσκολίες τι νακχέλας ο Ιησούς, αγαβέλας ότι λέσκο Ντατ μανγκέλας-λες ντα ισινέ πασέ λέστε.​—Λουκ. 22:​42, 43.

8. Σαρ ντέλας ο Ιεχωβά κο Ιησούς οντουλά σο χρειαζίντιβελας;

⁸ Ο Ιησούς σικαντάς ότι ο Ιεχωβά ισινέ Οντουβά σο ντινάς-λες ζωή ντα Οντουβά σο ατσσικιαρέλας-λες τζουβντό κάνα βακερντάς: «Με τζουβντιάβα σόσκε ο Ντατ ντέλα-μαν ζωή». (Ιωάν. 6:​57) Ο Ιησούς ντέλας σαρί πι μπέσα πι Νταντέστε, ντα ο Ιεχωβά ντέλας-λες οντουλά σο χρειαζίντιβελας για τι τζουβντιόλ. Αλλά ο πιο σημαντικός ισινέ ότι βοηθίνελας-λες τι ατσσόλ πασέ λέστε.​—Ματθ. 4:4.

9. Σαρ σικαντάς ο Ιεχωβά ι Ιησούσκε ότι ισινέ εκ λατσσό Ντατ σο πφαμπόλας λέσκε;

⁹ Σαρ λατσσό Ντατ, ο Ιεχωβά σικαβέλας πι Τσσαβέσκε ότι ισινέ πασέ λέστε. (Ματθ. 26:​53· Ιωάν. 8:​16) Παρόλο σο ο Ιεχωβά να αρακχαβέλας ι Ιησούς σαρέ κατά πράγματα σο κα μπορίνενας τι κερέν λέσκε ζιάνι, βοηθίνελας-λες τι νταϊντίνελ κο δοκιμασίες. Ο Ιησούς τζανέλας ότι σο-ντα ζιάνι τι αβέλας λέσκε κα ατσσικιαρέλας χάνικ. (Εβρ. 12:2)  Ο Ιεχωβά για τι σικαβέλ ότι πφαμπόλας λέσκε ασουνέλας-λες, ντέλας-λες σο-ντα χρειαζίντιβελας, σικλιαρέλας-λες ντα ισινέ πασέ λέστε. (Ιωάν. 5:​20· 8:​28) Ακανά κα ντικχάς σαρ σικαβέλα αμαρό Ντατ ο Ιεχωβά ότι πφαμπόλα αμένγκε-ντα.

10. Σαρ σικαβέλα ο Ιεχωβά ότι μανγκέλα-αμέν σαρ βακερένα ο εδάφια Ψαλμός 66:​19, 20;

¹⁰ Ο Ιεχωβά ασουνέλα αμαρέ προσευχές. (Διαβάνεν Ψαλμός 66:​19, 20) Να τσσουβέλα όρια αμαρέ προσευχιέντε· βακερέλα αμένγκε μα τι τσσιναβάς τι κεράς προσευχή. (1 Θεσ. 5:​17) Μπορίνασα τι τζας πασέ αμαρέ Ντεβλέστε με σεβασμός κάνα-ντα τι αβέλ ντα κάι-ντα τι αβάς. Ποτές να τθερέλα αζόμ μπουτ πράγματα τι κερέλ σο ναστί κα ασουνέλ-αμέν. Ισί οτθέ κάθε φαρ ντα τθερέλα πο κανά αμαρέ λαφίντε. Κάνα αγαβάσα ότι ο Ιεχωβά ασουνέλα αμαρέ προσευχές, ταρτίντιβασα λέστε. Ο ψαλμωδός βακερντάς: «Μανγκάβα ι Ιεχωβάς σόσκε ασουνέλα-μαν».​—Ψαλμ. 116:1.

11. Σαρ απαντίνελα ο Ιεχωβά αμαρέ προσευχιέντε;

¹¹ Αμαρό Ντατ να ασουνέλα σάντε αμαρέ προσευχές αλλά ντέλα απάντηση-ντα λέντε. Ο απόστολος Ιωάννης ντέλα-αμέν ακαγιά σιγουριά: «Σο-ντα τι μανγκάς λέσταρ ντα συμφωνίνελα οντουλέσαρ σο μανγκέλα [ο Ντεβέλ], βοβ ασουνέλα-αμέν». (1 Ιωάν. 5:​14, 15) Ο Ιεχωβά μπορεί μα τι απαντίνελ αμαρέ προσευχιέντε αντικάς σαρ μανγκάσα αμέν. Τζανέλα καβά ισί ο πιο λατσσό αμένγκε, οντουλέσκε ισί φαρ σο λέσκι απάντηση ισί «νάα» ή μανγκέλα αμένταρ τι μπεκλεντίνας.​—2 Κορ. 12:​7-9.

12, 13. Σο κερέλα αμαρό Ντατ ο Ιεχωβά για τι ντελ-αμέν οντουλά σο χρειαζίντιβασα;

¹² Ο Ιεχωβά ντέλα-αμέν οντουλά σο χρειαζίντιβασα. Κερέλα βοβ-ντα οντουβά σο μανγκέλα κατά γιαβερά νταντά. (1 Τιμ. 5:8) Ντέλα πι τσσαβέντε οντουλά σο χρειαζίντιβενα για τι τζουβντιόν. Να μανγκέλα τι τσσουβάς αμαρέ γκίστε ι χαμάσκε, ι σεΐνγκε ή άμα κα τθεράς κάι τι μπεσάς. (Ματθ. 6:​32, 33· 7:​11) Σαρ λατσσό ντατ, ο Ιεχωβά τθερέλα κερντό πράγματα για τι ντελ-αμέν σαρέ οντουλά σο χρειαζίντιβασα κο ντιβεσά σο κα αβέν.

¹³ Ο πιο σημαντικός ισί ότι ο Ιεχωβά ντέλα-αμέν σο-ντα χρειαζίντιβασα για τι αβάς λέσκε αμαλά. Αντράλ πι Λαφίσταρ βακερέλα αμένγκε κον ισί, σο μανγκέλα τι κερέλ, σόσκε κερντάς-αμέν ντα σο κα αβέλ-πες ανγκλ’ αμέντε. Τθερέλας πο γιακχά οπρ’ αμέντε κάνα σικλιάας ι αλήθεια, ντα τσσουντάς αμαρέ νταντές, αμαρέ νταγιά ή εκχέ γιαβερέ πφραλές για τι σικλιαρέλ-αμέν κον ισί. Ντα ατζέκ ατζέκ λάσα ι βοήθεια σο ντένα λατσσιμάσαρ ο πρεσβύτεροι ντα γιαβερά πφραλά ντα πφενιά σο τθερένα ζουρανί πίστη. Επίσης, αντράλ κατά σικλιαριπέ σο λάσα κο συναθροίσεις γιεκ αμαρέ πφραλέντζαρ, ο Ιεχωβά σικαβέλα αμένγκε σο τι κεράς. Ανταλέ πραγματέντζαρ αλλά γιαβερέντζαρ-ντα, σικαβέλα ότι πφαμπόλα σαρέ αμένγκε σαρ εκ Ντατ.​—Ψαλμ. 32:8.

14. Σόσκε σικλιαρέλα-αμέν ο Ιεχωβά, ντα σαρ κερέλα-λες ανταβά;

¹⁴ Ο Ιεχωβά σικλιαρέλα-αμέν. Αμέν να ισινάμ τέλειοι σαρ ο Ιησούς. Οτθάρ για τι σικλιαρέλ-αμέν, αμαρό λατσσό Ντατ διορθώνελα-αμέν κάνα χρειαζίντιβελα. Λέσκο Λάφι βακερέλα αμένγκε: «Οντουλέν σο μανγκέλα ο Ιεχωβά διορθώνελα-λεν». (Εβρ. 12:6, 7) Ο Ιεχωβά διορθώνελα-αμέν μπουτέ τροπόντζαρ. Για παράδειγμας, μπορεί τι κερέλ-λες ανταβά αντράλ οντουλένταρ σο διαβάνασα λέσκε Λαφίστε ή ασουνάσα κο συναθροίσεις. Ή αντράλ κατά πρεσβύτεροι μπορεί τι λας ι βοήθεια σο χρειαζίντιβασα. Σαρ-ντα τι διορθώνελ-αμέν ο Ιεχωβά, πάντα κερέλα-λες ανταβά σόσκε μανγκέλα-αμέν.​—Ιερ. 30:11.

15. Σο κερέλα ο Ιεχωβά για τι αρακχαβέλ-αμέν;

¹⁵ Ο Ιεχωβά ισί πασέ αμέντε κο δοκιμασίες.  Σαρ εκ Ντατ σο πφαμπόλα πι τσσαβένγκε ισί πασέ λέντε κο δύσκολα ντιβεσά, αντικάς αμαρό Ντατ-ντα ο Ιεχωβά ισί πασέ αμέντε κο δοκιμασίες. Πι άγιε πνευμάσαρ αρακχαβέλα-αμέν κατά πράγματα σο μπορεί τι χαλαβέν ι φιλία σο τθεράσα λέσαρ. (Λουκ. 11:​13) Ο Ιεχωβά αρακχαβέλα-αμέν κάνα χασαράσα αμαρί ζορ ντα τθεράσα πφανγκό γκι. Για παράδειγμας, βακερέλα ότι κα ντελ-αμέν εκ μπουτ σουκάρ ζωή. Ανταλά σο μπεκλεντίνασα βοηθίνενα-αμέν τι νταϊντίνας κο δυσκολίες. Ανέν τουμαρέ γκοντιάτε ακαβά: Σο-ντα μπέτι πράγμας τι αβέλ αμένγκε, αμαρό λατσσό Ντατ κα νασκιαρέλ-λες. Καγιά-ντα δοκιμασία τι νακχάσα κα ατσσικιαρέλ χάνικ, αλλά οντουλά σο ντέλα-αμέν ο Ιεχωβά κα ατσσόν για πάντα.​—2 Κορ. 4:​16-18.

16. Σο αβιλό-πες κάνα ο Αδάμ να ντινάς καν πι λατσσέ Νταντές;

¹⁶ Κα αγαβάς ότι ο Ιεχωβά μανγκέλα-αμέν άμα κα ανάς αμαρέ γκοντιάτε οντουλά σο κερντάς κάνα ο Αδάμ να ντινάς-λες καν. Κάνα κερντάς-λες ανταβά, βοβ νικίστιλο κατά ευτυχισμέ φαμιλί ι Ιεχωβάσκι ντα λέσκε τσσαβέ να κα αβένας οντουλέ φαμιλιάτε. (Ρωμ. 5:​12· 7:​14) Αλλά ο Ιεχωβά κερντάς κάτι για τι βοηθίνελ.

17. Σο κερντάς ο Ιεχωβά κάνα ο Αδάμ να ντινάς-λες καν;

¹⁷ Ο Ιεχωβά αντάς τιμωρία κο Αδάμ, αλλά ντινάς πο λάφι ότι λέσκε τσσαβέ, σο να μπιάντιλεας ατζέ, κα βουρτίνενας Λέσκε φαμιλιάτε άμα κα ντένας καν. (Γέν. 3:​15· Ρωμ. 8:​20, 21) Ο Ιεχωβά κερντάς τι αβέλ-πες ανταβά αντράλ κατά θυσία πι αγαπημέ Τσσαβέσκι, ι Ιησούσκι. Κάνα ντινάς πι Τσσαβές αμένγκε, σικαντάς καζόμ μπουτ μανγκέλα-αμέν.​—Ιωάν. 3:16.

18. Σόσκε ισινάμ σίγουροι ότι ο Ιεχωβά μανγκέλα τι αβάς λέσκε τσσαβέ ατζέ-ντα άμα νασλάμ λέσκε ντρομέσταρ;

¹⁸ Παρόλο σο ισινάμ ατελείς, ο Ιεχωβά μανγκέλα-αμέν αντρέ πι φαμιλιάτε ντα ποτές να ντικχέλα-αμέν σαρ πφαριπέ. Μπορεί  τι πφανγκάς λέσκο γκι ή τι νασάς χάνικ λέσκε ντρομέσταρ, αλλά βοβ πάντα μπεσέλα τι βουρτίνας λέστε. Ο Ιησούς σικαντάς καζόμ πφαμπόλα ο Ιεχωβά πι τσσαβένγκε κάνα βακερντάς ι ιστορία ι τσσαβέσκι σο χασάρντιλο. (Λουκ. 15:​11-32) Ο ντατ οντουλέ ιστοριάτε ποτές να τσσιναντάς τι πακιάλ ότι λέσκο τσσαβό κα βουρτίνελας. Κάνα ο τσσαβό βουρτισάλο κχερέ, ο ντατ πουταρντάς λέσκε πι τατί αγκάλι. Άμα νασλάμ κατά Ιεχωβάσκο ντρομ αλλά μετανιωσάλαμ, μπορίνασα τι αβάς σίγουροι ότι αμαρό λατσσό Ντατ ισί έτοιμος τι λελ-αμέν πι αγκαλιάτε ντα μανγκέλα αντράλ πι γκίσταρ τι κερέλ-λες ανταβά.

19. Σαρ κα λατσσαρέλ ο Ιεχωβά ο ζιάνι σο κερντάς ο Αδάμ;

¹⁹ Αμαρό Ντατ κα λατσσαρέλ σαρό ο ζιάνι σο κερντάς ο Αδάμ. Κάνα ο Αδάμ να ντινάς καν, ο Ιεχωβά μανγκλάς τι τραμπίνελ 144.000 τζενέν για τι αβέν λέσκε τσσαβέ αλλά εμ βασιλιάδες ντα ιερείς οπρέ ι Ιησούσαρ. Ο Ιησούς ντα οντουλά σο κα κυβερνίνεν λέσαρ κα βοηθίνεν ι τζενέν σο ντένα καν τι αβέν τέλειοι κο νεβό ντουνιάς. Σοράν, κα νακχέν εκ τελευταία δοκιμασία σο κα σικαβέλ άμα ντένα καν, ντα ο Ντεβέλ κα ντελ-λεν ζωή για πάντα. Αζομάν κα αβέλ αμαρέ Νταντέσκο γκι σο κα ντικχέλ ι πφουβ πφερντί πι τέλειε τσσαβέντζαρ. Σο σουκάρ κα αβέλ οντουβά βακίτι!

20. Σαρ σικαντάς ο Ιεχωβά ότι μανγκέλα-αμέν αντράλ πι γκίσταρ, ντα σο κα ντικχάς κο γιαβέρ μάθημας;

²⁰ Ο Ιεχωβά σικαντάς ότι μανγκέλα-αμέν αντράλ πι γκίσταρ. Βοβ ισί ο πιο λατσσό Ντατ. Ασουνέλα αμαρέ προσευχές ντα ντέλα-αμέν σο-ντα χρειαζίντιβασα εμ για τι τζουβντιάς εμ για τι ατσσάς λέσκε αμαλά. Σικλιαρέλα-αμέν ντα ισί πασέ αμέντε. Ντα κα κερέλ μπουτ σουκάρ πράγματα αμένγκε. Καζόμ σουκάρ ισί σο τζανάσα ότι αμαρό Ντατ μανγκέλα-αμέν ντα πφαμπόλα αμένγκε! Κο γιαβέρ μάθημας κα ντικχάς σαρ κα σικαβάς, σαρ τσσαβέ λέσκε, ότι μανγκάσα-λες.