1. Καβά ισί εκ λόγος σο ισί ενωμέ η φαμιλί ι Ιεχωβάσκι;

ΧΑΙΡΙΝΑΣΑ σο ισινάμ αντρέ κι φαμιλί κι Ιεχωβάσκι. Σόσκε ισί αμαρί φαμιλί αζόμ ειρηνική ντα ενωμέ; Εκ λόγος ισί ότι σαρέ κεράσα σο νακχέλα αμαρέ βαστέσταρ για τι σεβάνας ο τρόπος σο οργανωντάς ο Ιεχωβά πι φαμιλί κο ουρανός ντα κι πφουβ. Ντα καζόμ πιο μπουτ πράγματα σικλιάσα ανταλέσκε αζόμ πιο ενωμέ κα αβάς.

2. Καλέ ερωτησιέντε κα απαντίνας ανταλέ μαθημάστε;

² Ανταλέ μαθημάστε, κα ντικχάς κον τθερέλα εξουσία αντρέ κι κχανγκιρί. Ντα κα απαντίνας ακαλέ ερωτησιέντε: Καγιά μπουτί τθερένα ο πφενιά κι κχανγκιρί; Ισί ο κάθε πφραλ σορό ι κάθε πφενιάκο; Ισί η εξουσία σο τθερένα ο πρεσβύτεροι οπράλ κο πφραλά ντα κο πφενιά ίδια οντουλάσαρ σο τθερένα ο σορέ ι φαμιλίνγκε οπράλ πουμαρέ ρομνιάτε ντα πουμαρέ τσσαβέντε; Πρώτα, κα βακεράς σαρ πρέπει τι ντικχάς ι πφενίν.

3. Σαρ κα μπαριαράς αμαρί εκτίμηση οντουλένγκε σο κερένα αμαρέ πφενιά;

³ Εκτιμίνασα αμαρέ πφενίν σο μαρένα-πες για τι φροντίνεν πουμαρί φαμιλί, τι βακερέν ο λατσσέ αμπέρια ντα τι βοηθίνεν ι γιαβερέν κι κχανγκιρί. Κα μπαριαράς αμαρί εκτίμηση λένγκε άμα κα σκεφτίνας σαρ ντικχέλα-λεν ο Ιεχωβά ντα ο Ιησούς. Επίσης, κα βοηθίντιβας κατά τρόπος σο συμπεριφερίντιβελας ο απόστολος Παύλος ι τζουβλίνγκε.

4. Σαρ σικαβέλα η Αγία Γραφή ότι ι Ιεχωβάσκε εμ ο τζουβλιά εμ ο μουρσά τθερένα ι ίδια αξία;

 ⁴ Η Αγία Γραφή σικαβέλα ότι ι Ιεχωβάσκε εμ ο τζουβλιά εμ ο μουρσά τθερένα ι ίδια αξία. Για παράδειγμας, βακερέλα ότι, κο μπρεσά κι αποστολόνγκε, ο Ιεχωβά ντινάς άγιος πνεύμας εμ μουρσέντε εμ τζουβλίντε για τι κερέν θαύματα, σαρ ισί τι κερέν λάφι διάφορε τσσιμπέντε. (Πράξ. 2:​1-4, 15-18) Εμ μουρσά εμ τζουβλιά τραμπίντιλε ι άγιε πνευμάσαρ ντα κα κυβερνίνεν γιεκ ι Χριστόσαρ. (Γαλ. 3:​26-29) Εμ μουρσά εμ τζουβλιά κα τζουβντιόν για πάντα κι πφουβ. (Αποκ. 7:9, 10, 13-15) Επίσης, εμ μουρσά εμ τζουβλιά βακερένα ντα σικλιαρένα ο λατσσέ αμπέρια. (Ματθ. 28:​19, 20) Για παράδειγμας, ο βιβλίος Πράξεις κερέλα λάφι εκχέ πφενιάκε σο βακερένας λάκε Πρίσκιλλα. Βόι γιεκ πι ρομέσαρ, σο βακερένας λέσκε Ακύλα, εξηγιντέ πιο λατσσές ι αλήθεια κο Απολλώς, σο ισινέ μπουτ μορφωμέ.​—Πράξ. 18:​24-26.

5. Σαρ σικαβένα ο εδάφια Λουκάς 10:​38, 39, 42 ότι ο Ιησούς σεβάνελας ι τζουβλίν;

⁵ Ο Ιησούς σεβάνελας ι τζουβλίν. Να μοιάζελας κο Φαρισαίοι σο πακιάνας ότι ο τζουβλιά ισινέ πιο τελέ κατά μουρσά. Βον να κερένας λάφι ι τζουβλίντζαρ ανγκλάλ κο γιαβερά ντα ποτές να κα συζητίνενας λέντζαρ κατά Γραφή. Οκιά μπάνταρ, ο Ιησούς συζητίνελας σημαντικές αλήθειες εμ τζουβλίντζαρ εμ μουρσέντζαρ. * (Διαβάνεν Λουκάς 10:​38, 39, 42) Ντα μουκχέλας ι τζουβλίν τι τζαν παλά-λέστε κο έργος σο κερέλας. (Λουκ. 8:​1-3) Ντινάς-λεν ατζέ-ντα ο προνόμιος τι βακερέν κο απόστολοι ότι ιστίντιλοας κατά μουλέ.​—Ιωάν. 20:​16-18.

6. Σαρ σικαβέλας ο απόστολος Παύλος ότι σεβάνελας ι τζουβλίν;

⁶ Ο απόστολος Παύλος βακερντάς κο Τιμόθεος τι σεβάνελ ι τζουβλίν. Βακερντάς λέσκε τι ντικχέλ «ι πιο πφουρίν σαρ νταγιά» ντα «ι πιο τερνέν σαρ πφενιά». (1 Τιμ. 5:1, 2) Ο Παύλος βοηθιντάς μπουτ ι Τιμοθεός τι τθερέλ ζουρανί πίστη, αλλά αγαβέλας ότι η ντάι ντα η μπάμπα ι Τιμοθεόσκι ισινέ ο πρώτες σο σικλιαρντέ-λες «ο άγια βιβλία». (2 Τιμ. 1:5· 3:​14, 15) Κάνα γραφιντάς ι επιστολή Ρωμαίους, ο Παύλος μπουτσσαντάς σελιάμι συγκεκριμέ πφενίνγκε. Ο Παύλος, όχι σάντε ντικχέλας ο έργος σο κερένας ανταλά πφενιά, αλλά βακερέλας-ντα καζόμ εκτιμίνελας ανταλέ πφενίν.​—Ρωμ. 16:​1-4, 6, 12· Φιλιπ. 4:3.

7. Καλά ερωτήσεις κα ντικχάς ακανά;

⁷ Σαρ ντικχλάμ πιο οπρέ, η Γραφή να βακερέλα ότι ο πφενιά ισί πιο τελέ κατά πφραλά. Αμαρέ πφενιά σο σικαβένα αγάπη ντα ντένα πουμαρέ βαστένταρ ισί μπουτ σημαντικές ι κχανγκιριάκε ντα ο πρεσβύτεροι χρειαζίντιβενα λένγκι βοήθεια για τι αβέλ ειρήνη ντα ενότητα κι κχανγκιρί. Αλλά πρέπει τι απαντίνας μερικέ ερωτησιέντε. Για παράδειγμας: Σόσκε ο Ιεχωβά βακερέλα ότι μπάζιμα ο τζουβλιά πρέπει τι ιτσσαρέν πουμαρό σορό; Αφού σάντε πφραλά αβένα πρεσβύτεροι ντα διακονικοί υπηρέτες, μήπως ανταβά μανγκέλα τι βακερέλ ότι ο κάθε πφραλ ισί σορό ι κάθε πφενιάκο κι κχανγκιρί;

8. Βακερέλα ο εδάφιος Εφεσίους 5:​23 ότι κάθε πφραλ ισί σορό κάθε πφενιάκο; Εξηγίνεν.

⁸ Η απάντηση ισί νάα! Εκ πφραλ νανέ σορό ι κάθε πφενιάκο κι κχανγκιρί. Ο Χριστός ισί. (Διαβάνεν Εφεσίους 5:​23) Κι φαμιλί, ο ρομ τθερέλα εξουσία οπράλ πι ρομνιάτε. Εκ μπολντό τσσαβό νανέ ο σορό πι νταγιάκο. (Εφεσ. 6:1, 2) Κι κχανγκιρί, η εξουσία σο τθερένα ο πρεσβύτεροι οπράλ κο πφενιά ντα κο πφραλά τθερέλα όρια. (1 Θεσ. 5:​12· Εβρ. 13:​17) Ο μπίπαντριμε  πφενιά σο να τζουβντιόνα πουμαρέ νταντέσαρ ντα πουμαρέ νταγιάσαρ να τσσιναβένα τι σεβάνεν πουμαρέ νταντές, πουμαρέ νταγιά ντα ι πρεσβυτερόν. Όμως, σαρ ο μουρσά κι κχανγκιρί, αντικάς βον-ντα τθερένα σάντε εκ σορό, ι Ιησούς.

9. Σόσκε πρέπει μπάζιμα ο πφενιά τι ιτσσαρέν πουμαρό σορό;

⁹ Ισί μπαγιά όμως ότι ο Ιεχωβά ντινάς κο μουρσά ι ευθύνη τι κερέν κουμάντος κι κχανγκιρί, αλλά να ντινάς ασακί ευθύνη κο τζουβλιά. (1 Τιμ. 2:​12) Σόσκε; Για το ίδιος λόγος σο τσσουντάς ι Ιησούς τι αβέλ σορό ι μουρσέσκο​—για τι ατσσικιαρέλ οργανωμέ πι φαμιλί. Άμα εκ πφεν χρειαζίντιβελα τι κερέλ κάτι σο κανονικά κερέλα-λες εκ πφραλ, ο Ιεχωβά βακερέλα ότι πρέπει τι ιτσσαρέλ πο σορό. * (1 Κορ. 11:​4-7) Ο Ιεχωβά μανγκέλα-λες ανταβά κατά πφενιά, όχι για τι κερέλ-λεν τι νιωθίνεν ότι να τθερένα αξία, αλλά για τι σικαβέν σεβασμός οντουλένγκε σο ο Ιεχωβά τσσουντάς τι κερέν κουμάντος. Ακανά κα απαντίνας ακαλέ ερωτησιάτε: Καζόμ εξουσία τθερένα ο σορέ ι φαμιλίνγκε ντα ο πρεσβύτεροι;

10. Σόσκε μπορεί εκ πρεσβύτερος μπάζιμα τι μανγκέλ τι τσσουβέλ κανόνες κι κχανγκιρί;

¹⁰ Ο πρεσβύτεροι μανγκένα ι Χριστός ντα μανγκένα ι “μπρακέν-ντα” σο ο Ιεχωβά ντα ο Ιησούς βακερντάς λένγκε τι αρακχαβέν. (Ιωάν. 21:​15-17) Επειδή εκ πρεσβύτερος πφαμπόλα ι κχανγκιριάκε, μπορεί τι σκεφτίνελ ότι ισί σαρ ντατ ι πφραλένγκε ντα ι πφενίνγκε κι κχανγκιρί. Μπορεί τι βακερέλ ότι, αφού ο σορό κι φαμιλί τθερέλα ο δικαίωμας τι τσσουβέλ κανόνες για τι αρακχαβέλ πι φαμιλί, εκ πρεσβύτερος-ντα μπορίνελα τι τσσουβέλ κανόνες σο πακιάλα  ότι κα αρακχαβέν ι Ντεβλέσκε μπρακέν. Ντα μερικά πφραλά ντα πφενιά μπορεί τι βακερέν κο πρεσβύτεροι τι κερέν-λες ανταβά κάνα μανγκένα λένταρ τι λεν λένγκε βον αποφάσεις. Αλλά τθερένα ο πρεσβύτεροι κι κχανγκιρί ι ίδια εξουσία οντουλάσαρ σο τθερένα ο σορέ ι φαμιλίνγκε;

11. Καλέ πραγματέντε μοιάζελα η μπουτί σο τθερένα ο σορέ ι φαμιλίνγκε οντουλάσαρ σο τθερένα ο πρεσβύτεροι;

¹¹ Ο απόστολος Παύλος βακερντάς ότι η μπουτί σο τθερένα ο σορέ ι φαμιλίνγκε μοιάζελα χάνικ οντουλάσαρ σο τθερένα ο πρεσβύτεροι. (1 Τιμ. 3:4, 5) Για παράδειγμας, ο Ιεχωβά μανγκέλα σαρέ αντρέ κι φαμιλί τι ντεν καν κο σορό κι φαμιλιάκο. (Κολ. 3:​20) Ντα μανγκέλα σαρέ κι κχανγκιρί τι ντεν καν κο πρεσβύτεροι. Ο Ιεχωβά μπεκλεντίνελα κατά σορέ ι φαμιλίνγκε ντα κατά πρεσβύτεροι τι σικλιαρέν ι γιαβερέν τι μανγκέν ι Ιεχωβάς. Εμ ο πρεσβύτεροι εμ ο σορέ ι φαμιλίνγκε πρέπει τι σικαβέν ότι πφαμπόνα λένγκε. Ντα σαρ λατσσέ σορέ ι φαμιλίνγκε, ο πρεσβύτεροι βοηθίνενα οντουλέν σο ισί κι κχανγκιρί κάνα τθερένα προβλήματα. (Ιακ. 2:​15-17) Κάτι γιαβέρ σο μπεκλεντίνελα ο Ιεχωβά κατά πρεσβύτεροι ντα κατά σορέ ι φαμιλίνγκε ισί τι «ακολουθίνεν σάντε ο πράγματα σο ισί γραμμέ» κι Αγία Γραφή ντα τι βοηθίνεν  ι γιαβερέν τι ντεν καν κο κανόνες λέσκε.​—1 Κορ. 4:6.

12, 13. Σο διαφορά τθερέλα η εξουσία σο τθερέλα ο σορό ι φαμιλιάκο κατά εξουσία σο τθερέλα εκ πρεσβύτερος σαρ σικαβέλα ο εδάφιος Ρωμαίους 7:2;

¹² Όμως, η μπουτί σο τθερένα ο πρεσβύτεροι τθερέλα μερικές σημαντικές διαφορές οντουλάταρ σο τθερένα ο σορέ ι φαμιλίνγκε. Για παράδειγμας, ο Ιεχωβά ντινάς κο πρεσβύτεροι ι ευθύνη τι πάλντεν κατά κχανγκιρί οντουλέν σο κερένα αμαρτία ντα να μετανιώνενα.​—1 Κορ. 5:​11-13.

¹³ Οκιά μπάνταρ, ο Ιεχωβά ντινάς κο σορέ κι φαμιλίνγκε εξουσία σο να ντινάς κο πρεσβύτεροι. Για παράδειγμας, ντινάς κο σορό κι φαμιλιάκο ι εξουσία τι τσσουβέλ κανόνες πι φαμιλιάτε ντα τι διορθώνελ οντουλέν σο να ντένα καν κο κανόνες ανταλά. (Διαβάνεν Ρωμαίους 7:2) Φιρειπείν, ο σορό ι φαμιλιάκο τθερέλα ο δικαίωμας τι αποφασίνελ σο σαάτι πρέπει τι βουρτίνεν ο τσσαβέ αρατί. Ντα τθερέλα ι εξουσία τι διορθώνελ πι τσσαβέν άμα να ντένα-λες καν. (Εφεσ. 6:1) Σίγουρα, εκ λατσσό σορό ι φαμιλιάκο κερέλα λάφι πι ρομνιάσαρ πριν τι τσσουβέλ κανόνες ι φαμιλιάκε, επειδή βον ο ντούι ισί «εκ σώμας». *​—Ματθ. 19:6.

14. (α) Σόσκε ο Ιεχωβά τραμπιντάς ι Ιησούς τι αβέλ σορό ι κχανγκιριάκο σαρ βακερέλα ο εδάφιος Μάρκος 10:​45; (β) Καγιά μπουτί τθερέλα ο Κυβερνών Σώμας; (Ντικχέν ο πλαίσιος « Η Μπουτί σο Τθερέλα ο Κυβερνών Σώμας»)

¹⁴ Αντράλ κατά λύτρος, ο Ιεχωβά κιντάς ι ζωή κάθε εκχέσκι κι κχανγκιρί. (Διαβάνεν Μάρκος 10:​45· Πράξ. 20:​28· 1 Κορ. 15:​21, 22) Οτθάρ, ο Ντεβέλ τραμπιντάς τι αβέλ ο Ιησούς, σο ντινάς πι ζωή σαρ λύτρος,  σορό ι κχανγκιριάκο. Άκ’ σόσκε ο Ιησούς τθερέλα ι εξουσία εμ τι τσσουβέλ κανόνες σο βακερένα σο πρέπει τι κερέν ο τζενέ, ο φαμιλιά ντα σαρέ κι κχανγκιρί εμ τι διορθώνελ οντουλέν σο να ντένα καν κο κανόνες ανταλά. (Γαλ. 6:2) Αλλά ο Ιησούς να τσσουβέλα σάντε κανόνες. Παρβαρέλα ντα αρακχαβέλα ι κάθε εκχές αμένταρ.​—Εφεσ. 5:29.

15, 16. Σο σικλιόνα οντουλένταρ σο βακερέλα η πφεν Μάρλι ντα ο πφραλ Μπέντζαμιν;

¹⁵ Ο πφενιά σικαβένα ότι σεβάνενα ι Χριστός κάνα ντένα καν ι μουρσέν σο τραμπιντάς βοβ. Μπουτ πφενιά νιωθίνενα σαρ η Μάρλι, εκ πφεν σο τζουβντιόλα κο Ηνωμένες Πολιτείες: Βόι βακερέλα: «Οντουλά σο κεράβα σαρ ρομνί ντα σαρ πφεν κι κχανγκιρί ισί μάνγκε σημαντικά. Πρέπει συνέχεια τι μαράβ-μαν τι σεβάναβ οντουλέν σο ο Ιεχωβά τσσουβέλα τι κερέν κουμάντος. Αλλά μο ρομ ντα ο πφραλά κι κχανγκιρί κερένα-λες μάνγκε πιο εύκολος ανταβά σόσκε σεβάνενα-μαν ντα βακερένα μάνγκε καζόμ εκτιμίνενα οντουλά σο κεράβα».

¹⁶ Ο πφραλά σικαβένα ότι αγαβένα σαρ οργανωντάς ο Ιεχωβά πι φαμιλί κάνα σεβάνενα ντα εκτιμίνενα ι πφενίν. Ο Μπέντζαμιν, εκ πφραλ σο τζουβντιόλα κι Αγγλία, βακερέλα: «Σικλιλόμ μπουτ πράγματα κατά απαντήσεις σο ντένα ο πφενιά κο συναθροίσεις ντα κατά ιδέες σο βακερένα για τι σικλιαράς-αμέν κατά Γραφή ντα για τι αβέλ-πες πιο λατσσές ο έργος. Πακιάβα ότι οντουλά σο κερένα ισί μπουτ πολύτιμα».

17. Σόσκε πρέπει τι σεβάνας ο τρόπος σο ο Ιεχωβά οργανωντάς πι φαμιλί;

¹⁷ Κάνα σαρέ κι κχανγκιρί​—μουρσά, τζουβλιά, σορέ ι φαμιλίνγκε ντα πρεσβύτεροι—​αγαβένα ντα σεβάνενα ο τρόπος σο ο Ιεχωβά οργανωντάς πι φαμιλί, η κχανγκιρί τθερέλα ειρήνη. Ντα ο πιο σημαντικός, ντάσα δόξα αμαρέ Νταντές, ι Ιεχωβάς, σο μανγκέλα-αμέν μπουτ.​—Ψαλμ. 150:6.