1. Καλά πράγματα μπορεί τι επηρεάνεν ο τρόπος σο εκ μουρς συμπεριφερίντιβελα πι ρομνιάκε ντα πι τσσαβένγκε;

ΣΟ ΜΑΝΓΚΕΛΑ τι βακερέλ τουμένγκε τι τθερέλ εκ τζενό εξουσία, για παράδειγμας τι αβέλ ο σορό εκχέ φαμιλιάκο; Μερικά μουρσά συμπεριφερίντιβενα μπέτι πουμαρέ ρομνιάκε ντα πουμαρέ τσσαβένγκε σόσκε μουκχένα ι κουλτούρα ή ο τρόπος σο μπαριλέ βον τι επηρεάνελ-λεν. Ντικχέν σο βακερέλα η Γιανίτα, εκ πφεν σο τζουβντιόλα κι Ευρώπη: «Οτθέ σο μπεσάβα με, ο τζενέ πακιάνα ότι ο τζουβλιά ισί πιο τελέ κατά μουρσά ντα ότι πρέπει τι ντικχέν-λεν σαρ υπηρέτριες». Ο Λουκ, εκ πφραλ σο τζουβντιόλα κο Ηνωμένες Πολιτείες, βακερέλα: «Μερικά νταντά βακερένα πουμαρέ τσσαβένγκε ότι κάνα κερένα λάφι ο μουρσά, ο τζουβλιά πρέπει τι πφάντεν πουμαρό μούι ντα ότι η άποψη ι τζουβλίνγκι να τθερέλα αξία». Όμως, ο Ιεχωβά να μανγκέλα ο μουρσά τι συμπεριφερίντιβεν πουμαρέ ρομνίνγκε αντικάς. (Ντικχέν Μάρκος 7:​13) Οτθάρ, σαρ μπορίνελα εκ μουρς τι σικλιόλ τι αβέλ εκ λατσσό σορό αντρέ πι φαμιλιάτε;

2. Σο πρέπει τι τζανέλ ο σορό ι φαμιλιάκο, ντα σόσκε;

² Για τι αβέλ εκ μουρς λατσσό σορό αντρέ πι φαμιλιάτε, πρέπει πρώτα τι αγαβέλ σο μανγκέλα λέσταρ ο Ιεχωβά. Πρέπει επίσης τι τζανέλ σόσκε ο Ιεχωβά τσσουβέλα γιαβερέν-ντα τι κερέν κουμάντος, ντα σαρ μπορίνελα τι μοιάζελ κο Ιεχωβά ντα κο Ιησούς. Σόσκε ισί σημαντικός εκ μουρς τι σικλιόλ ανταλά πράγματα; Επειδή ο Ιεχωβά ντινάς κο σορέ κι φαμιλίνγκε εξουσία ντα μανγκέλα λένταρ τι χρησιμοποιήνεν-λα σωστά.​—Λουκ. 12:​48β.

3. Σαρ κερντάς ο Ιεχωβά τι αβέλ οργανωμέ λέσκι φαμιλί κο ουρανός ντα κι πφουβ σαρ βακερέλα ο εδάφιος 1 Κορινθίους 11:​3;

³ Διαβάνεν 1 Κορινθίους 11:3. Ανταβά εδάφιος σικαβέλα σαρ ο Ιεχωβά κερντάς τι αβέλ οργανωμέ λέσκι φαμιλί κο ουρανός  ντα κι πφουβ. Επειδή ισί ο σορό, τθερέλα σαρί ι εξουσία. Ντινάς εξουσία γιαβερέντε-ντα, αλλά βον κα ντεν λογαριασμός κο Ιεχωβά για το τρόπος σο χρησιμοποιήνενα πουμαρί εξουσία. (Ρωμ. 14:​10· Εφεσ. 3:​14, 15) Ο Ιεχωβά ντινάς ι Ιησούς εξουσία οπράλ κι κχανγκιρί, αλλά ο Ιησούς ντέλα λογαριασμός κο Ιεχωβά για το τρόπος σο συμπεριφερίντιβελα αμένγκε. (1 Κορ. 15:​27) Επίσης, ο Ιεχωβά ντινάς κο μουρς εξουσία οπράλ πι ρομνιάτε ντα πι τσσαβέντε. Αλλά ο μουρς κα ντελ λογαριασμός εμ κο Ιεχωβά εμ κο Ιησούς για το τρόπος σο συμπεριφερίντιβελα πι φαμιλιάκε.​—1 Πέτρ. 3:7.

4. Καγιά εξουσία τθερέλα ο Ιεχωβά ντα ο Ιησούς;

⁴ Επειδή ο Ιεχωβά ισί ο Σορό ι φαμιλιάκο σο τθερέλα κο ουρανός ντα κι πφουβ, τθερέλα ι εξουσία τι τσσουβέλ κανόνες σο βακερένα σαρ πρέπει τι συμπεριφερίντιβεν λέσκε τσσαβέ ντα τθερέλα ο δικαίωμας τι διορθώνελ οντουλέν σο να ντένα καν κο κανόνες ανταλά. (Ησ. 33:​22) Ο Ιησούς, σο ισί ο σορό ι κχανγκιριάκο, τθερέλα βοβ-ντα ο δικαίωμας τι τσσουβέλ κανόνες ντα τι διορθώνελ οντουλέν σο να ντένα καν κο κανόνες ανταλά.​—Γαλ. 6:2· Κολ. 1:​18-20.

5. Καγιά εξουσία τθερέλα ο σορό εκχέ Χριστιανικέ φαμιλιάκο, αλλά καλά όρια τθερέλα ανταγιά εξουσία;

⁵ Σαρ ο Ιεχωβά ντα ο Ιησούς, αντικάς ο σορό εκχέ Χριστιανικέ φαμιλιάκο-ντα τθερέλα εξουσία τι λελ αποφάσεις πι φαμιλιάκε. (Ρωμ. 7:2· Εφεσ. 6:4) Όμως, λέσκι εξουσία τθερέλα όρια. Για παράδειγμας, λέσκε κανόνες πρέπει τι βασίντιβεν κο αρχές σο ισί κο Λάφι κι Ντεβλέσκο. (Παρ. 3:5, 6) Ο σορό εκχέ φαμιλιάκο να τθερέλα ο δικαίωμας τι βακερέλ γιαβερένγκε σο νανέ λέσκε φαμιλιάταρ σο τι κερέν. (Ρωμ. 14:4) Άμα λέσκε τσσαβέ ντα τσσαγιά κα νασέν κατά κχερ κάνα κα μπαριόν, να τσσιναβένα τι σεβάνεν-λες, αλλά να κερέλα-λεν κουμάντος βοβ.​—Ματθ. 19:5.

6. Σόσκε τσσουβέλα ο Ιεχωβά γιαβερέν-ντα τι κερέν κουμάντος;

⁶ Ο Ιεχωβά τσσουβέλα γιαβερέν-ντα τι κερέν κουμάντος σόσκε μανγκέλα πι φαμιλί. Ανταβά ισί δώρος λέσταρ σόσκε αντικάς ο Ιεχωβά βοηθίνελα πι φαμιλί τι τθερέλ ειρήνη ντα τι αβέλ οργανωμέ. (1 Κορ. 14:​33, 40) Άμα να κα τζανένας κον κερέλα κουμάντος, οντουλά σο ισί αντρέ κι φαμιλί κι Ιεχωβάσκι να κα αβένας οργανωμέ ντα κα αβένας δυστυχισμέ. Καέκ να κα τζανέλας κον πρέπει τι λελ ο αποφάσεις ντα κον πρέπει τι κερέλ κουμάντος για τι αβέν-πες ανταλά αποφάσεις.

7. Σαρ σικαβένα ο εδάφια Εφεσίους 5:​25, 28 ότι ο Ιεχωβά να μανγκέλας ο μουρσά τι συμπεριφερίντιβεν μπέτι κο τζουβλιά;

⁷ Άμα ισί λατσσό τι κερέν κουμάντος ο μουρσά αντρέ κι φαμιλί, σόσκε αζόμ μπουτ τζουβλιά αντιβές νιωθίνενα ότι λένγκο ρομ συμπεριφερίντιβελα λένγκε μπέτι ντα ζορισκιαρέλα-λεν; Ανταβά αβέλα-πες επειδή μπουτ μουρσά να ντένα καν κο κανόνες σο τσσουντάς ο Ιεχωβά ι φαμιλιάκε ντα τραμπίνενα τι κερέν οντουλά σο ισί σικλέ τι κερέν ο τζενέ οτθέ σο μπεσένα. Ή μπορεί τι νταπένα πουμαρέ ρομνίν σάντε για τι κερέν πουμαρό γκι. Για παράδειγμας, εκ μουρς μπορεί τι συμπεριφερίντιβελα μπέτι πι ρομνιάκε για τι νιωθίνελ ότι ισί πιο σημαντικός ή για τι σικαβέλ ι γιαβερένγκε ότι ισί «μουρς». Μπορεί τι σκεφτίνελα ότι ναστί κερέλα πι ρομνιά τι μανγκέλ-λες ζορίσαρ, αλλά ότι μπορίνελα τι κερέλ-λα τι νταρέλ λέσταρ. Ντα μπορεί τι χρησιμοποιήνελ ανταγιά νταρ για τι τθερέλ-λα πι βαστέστε. * Αλλά εκ ασακό μουρς να σικαβέλα κο τζουβλιά ο σεβασμός  σο αξίνενα ντα αντικάς τζάλα κόντρα οντουλέστε σο μανγκέλα ο Ιεχωβά.​—Διαβάνεν Εφεσίους 5:​25, 28.

8. Σαρ κα σικλιόλ εκ μουρς τι αβέλ εκ λατσσό σορό πι φαμιλιάτε;

⁸ Εκ μουρς κα σικλιόλ σαρ τι αβέλ εκ λατσσό σορό αντρέ πι φαμιλιάτε κατά τρόπος σο κερέλα κουμάντος ο Ιεχωβά ντα ο Ιησούς. Σκεφτίνεν σάντε ντούι κατά ιδιότητες σο σικαβέλα ο Ιεχωβά ντα ο Ιησούς, ντα ντικχέν σαρ μπορίνελα ο σορό ι φαμιλιάκο τι σικαβέλ-λεν πι ρομνιάκε ντα πι τσσαβένγκε.

9. Σαρ σικαβέλα ταπεινότητα ο Ιεχωβά;

⁹ Ταπεινότητα. Ο Ιεχωβά ισί πιο γκοντιαβέρ σαριλένταρ, αλλά ασουνέλα οντουλά σο τθερένα τι βακερέν λέσκε υπηρέτες. (Γέν. 18:​23, 24, 32) Μουκχλάς οντουλέν σο κερέλα-λεν κουμάντος τι βακερέν σο τθερένας πουμαρέ γκοντιάτε. (1 Βασ. 22:​19-22) Ο Ιεχωβά ισί τέλειος, αλλά να μπεκλεντίνελα αμένταρ τι αβάς τέλειοι. Οκιά μπάνταρ, βοηθίνελα ι ατελείς τζενέν σο υπηρετίνενα-λες τι τθερέν επιτυχία. (Ψαλμ. 113:6, 7) Ντα η Γραφή βακερέλα ότι ο Ιεχωβά ισί «βοηθός». (Ψαλμ. 27:9· Εβρ. 13:6) Ο βασιλιάς Δαβίδ αγαντάς ότι χάρη κι ταπεινότητα κι Ιεχωβάσκι μπορίνελας τι κερέλ σαρέ ο μπουτιά σο ντιντιλέας-λες.​—2 Σαμ. 22:36.

10. Σαρ σικαβέλας ταπεινότητα ο Ιησούς;

¹⁰ Ντικχέν ο παράδειγμας ι Ιησούσκο. Παρόλο σο ισινέ Κύριος πι μαθητένγκο, τθοντάς λένγκε πιντρέ. Σόσκε ο Ιεχωβά τσσουντάς ανταγιά ιστορία αντρέ κι Γραφή; Για τι σικαβέλ κι φαμιλίνγκε σορέ​—ντα γιαβερένγκε—​σο τι κερέν. Ο Ιησούς βακερντάς: «Μουκχλόμ ο παράδειγμας τουμένγκε ντα αντικάς, σαρ κερντόμ με τουμένγκε, τι κερέν τουμέν-ντα». (Ιωάν. 13:​12-17) Παρόλο σο τθερέλας μπαρί εξουσία, ο Ιησούς να μπεκλεντίνελας κατά γιαβερά τι υπηρετίνεν-λες. Αλλά βοβ υπηρετίνελας ι γιαβερέν.​—Ματθ. 20:28.

11. Σο μπορίνελα τι σικλιόλ ο σορό ι φαμιλιάκο για την ταπεινότητα κατά Ιεχωβά ντα κατά Ιησούς;

¹¹ Σο σικλιάσα αμέν. Ο σορό ι φαμιλιάκο μπορίνελα τι σικαβέλ ταπεινότητα μπουτέ τροπόντζαρ. Για παράδειγμας, να μπεκλεντίνελα πι ρομνιάταρ ντα πι τσσαβένταρ τι αβέν τέλειοι. Ασουνέλα-λεν ατζέ-ντα κάνα να συμφωνίνελα λέντζαρ. Η Μάρλι, σο τζουβντιόλα κο Ηνωμένες Πολιτείες, βακερέλα: «Μο ρομ ντα με μπάζιμα να τθεράσα ο  ίδιες απόψεις. Αλλά νιωθίναβα ότι εκτιμίνελα-μαν ντα σεβάνελα-μαν σόσκε πουτσέλα τι σικλιόλ μι άποψη ντα σκεφτίνελα-λα προσεκτικά πριν τι λελ εκ απόφαση». Επίσης, εκ ταπεινός μουρς μανγκέλα τι κερέλ μπουτιά αντρέ κο κχερ, ατζέ-ντα άμα ο γιαβερά βακερένα ότι ανταλά μπουτιά ισί τζουβλικανέ. Ανταβά νανέ πάντα εύκολος. Σόσκε; Εκ πφεν, σο βακερένα λάκε Ρέιτσελ, βακερέλα: «Μι τθεμέστε, άμα εκ μουρς βοηθίνελα πι ρομνιά τι τθοβέλ ο τσαρέ ή τι καθαρίνελ ο κχερ, αμαρέ γείτονες ντα αμαρέ τζενέ κα βακερέν ότι νανέ “μουρς” ντα ότι ναστί κερέλα κουμάντος πι ρομνιά». Άμα μπουτ τζενέ σκεφτίνενα αντικάς οτθέ σο μπεσένα τουμέν-ντα, ανέν τουμαρέ γκοντιάτε ότι ο Ιησούς τθοντάς ο πιντρέ πι μαθητένγκε, παρόλο σο ανταγιά μπουτί κερένας-λα δούλοι. Εκ λατσσό σορό ι φαμιλιάκο να μανγκέλα τι κερέλ ι γιαβερέν τι σκεφτίνεν ότι ισί ζουρανό ή σημαντικός, αλλά μανγκέλα λέσκι ρομνί ντα λέσκε τσσαβέ τι νιωθίνεν λατσσές. Εκτός κατά ταπεινότητα, καγιά γιαβέρ ιδιότητα πρέπει τι τθερέλ εκ λατσσό σορό ι φαμιλιάκο;

12. Σο κερέλα ο Ιεχωβά ντα ο Ιησούς επειδή μανγκένα-αμέν;

¹² Αγάπη. Σο-ντα κερέλα ο Ιεχωβά κερέλα-λες από αγάπη. (1 Ιωάν. 4:7, 8) Σικαβέλα αντράλ κατά Αγία Γραφή ντα κατά οργάνωση σο τθερέλα ότι μανγκέλα-αμέν ντα μανγκέλα τι αβάς λέσαρ αμαλά. Βακερέλα αμένγκε ότι μανγκέλα-αμέν ντα αντικάς νιωθίνασα ότι πφαμπόλα αμένγκε. Ντα σο κερέλα οντουλένγκε σο χρειαζίντιβασα για τι τζουβντιάς; Ο Ιεχωβά «ντέλα-αμέν αντράλ πι γκίσταρ σαρέ ο πράγματα σο απολαμβάνασα». (1 Τιμ. 6:​17) Κάνα κεράσα λάθη, διορθώνελα-αμέν, αλλά να τσσιναβέλα τι μανγκέλ-αμέν. Η αγάπη τσσιντιντάς ι Ιεχωβάς τι ντελ ο λύτρος. Ο Ιησούς-ντα μανγκέλα-αμέν αζόμ μπουτ σο ντινάς πι ζωή αμένγκε. (Ιωάν. 3:​16· 15:​13) Τίποτα ναστί τσσιναβέλα ι Ιεχωβάς ντα ι Ιησούς τι μανγκέν οντουλέν σο ισί αφοσιωμέ λέντε.​—Ιωάν. 13:1· Ρωμ. 8:​35, 38, 39.

13. Σόσκε ισί σημαντικός τι σικαβέλ ο σορό ι φαμιλιάκο ότι μανγκέλα πι φαμιλί; (Ντικχέν ο πλαίσιος-ντα « Σαρ Μπορίνελα ο Νεβό Τζαμουτρό τι Κερδίνελ ο Σεβασμός πι Ρομνιάκο;»)

¹³ Σο σικλιάσα αμέν. Σο-ντα κερέλα ο σορό ι φαμιλιάκο πρέπει τι κερέλ-λες από  αγάπη. Σόσκε ισί αζόμ σημαντικός ανταβά; Ο απόστολος Ιωάννης ντέλα ι απάντηση: «Οντουβά σο να μανγκέλα πι πφραλές [ή πι φαμιλί], σο ντικχλάς-λες, ναστί μπορίνελα τι μανγκέλ ι Ντεβλές, σο να ντικχλάς-λες». (1 Ιωάν. 4:​11, 20) Εκ μουρς σο μανγκέλα πι φαμιλί ντα μανγκέλα τι μοιάζελ κο Ιεχωβά ντα κο Ιησούς κα βοηθίνελ πι φαμιλί τι αβέλ πασέ κο Ιεχωβά, κα σικαβέλ ότι πφαμπόλα λάκε ντα κα ανέλ λάκε ο αναγκαία. (1 Τιμ. 5:8) Κα σικλιαρέλ ντα κα διορθώνελ πι τσσαβέν. Ντα κα σικλιόλ τι λελ αποφάσεις σο ντένα δόξα ι Ιεχωβάς ντα βοηθίνενα λέσκι φαμιλί. Κα ντικχάς ο κάθε εκ ανταλέ πραγματένταρ ντα σαρ μπορίνελα ο σορό ι φαμιλιάκο τι μοιάζελ κο Ιεχωβά ντα κο Ιησούς.

14. Σο κερέλα ο σορό ι φαμιλιάκο για τι βοηθίνελ πι φαμιλί τι αβέλ πασέ κο Ιεχωβά;

¹⁴ Τι βοηθίνελ πι φαμιλί τι αβέλ πασέ κο Ιεχωβά. Ο Ιησούς σικαντάς ότι μοιάζελας πι Νταντέστε σόσκε μανγκέλας τι βοηθίνελ πι μαθητέν τι ατσσικιαρέν ζουρανί πουμαρί πίστη. (Ματθ. 5:3, 6· Μάρκ. 6:​34) Αντικάς, ι τζενέσκε-ντα σο ισί ο σορό ι φαμιλιάκο ο πιο σημαντικός ισί τι βοηθίνελ πι φαμιλί τι αβέλ πασέ κο Ιεχωβά. (Δευτ. 6:​6-9) Κερέλα-λες ανταβά κάνα ισί σίγουρος ότι βοβ ντα λέσκι φαμιλί διαβάνενα ι Ντεβλέσκο Λάφι ντα σικλιαρένα-πες λέσταρ, τζάνα κο συναθροίσεις, βακερένα ο λατσσέ αμπέρια ντα ατσσόνα λατσσέ αμαλά ι Ιεχωβάσαρ.

15. Σαρ μπορίνελα ο σορό ι φαμιλιάκο τι σικαβέλ ότι πφαμπόλα πι φαμιλιάκε;

¹⁵ Τι σικαβέλ ότι πφαμπόλα πι φαμιλιάκε. Ο Ιεχωβά βακερντάς ανγκλάλ σαριλέντε ότι μανγκέλας ι Ιησούς. (Ματθ. 3:​17) Ο Ιησούς σικαβέλας μπουτ φαρ ότι μανγκέλας πι μαθητέν, εμ οντουλέντζαρ σο κερέλας εμ οντουλέντζαρ σο βακερέλας. Βον-ντα βακερένας λέσκε ότι μανγκένας-λες. (Ιωάν. 15:9, 12, 13· 21:​16) Ο σορό ι φαμιλιάκο μπορίνελα τι σικαβέλ ότι μανγκέλα πι ρομνιά ντα πι τσσαβέν οντουλέντζαρ σο κερέλα, για παράδειγμας κάνα σικλιαρέλα-πες λέντζαρ κατά Γραφή. Πρέπει επίσης τι βακερέλ λένγκε ότι μανγκέλα-λεν ντα εκτιμίνελα-λεν ντα, κάνα ανταβά ισί λατσσό, τι ισαρέλ-λεν ανγκλάλ κο γιαβερά.​—Παρ. 31:​28, 29.

16. Σο γιαβέρ πρέπει τι κερέλ ο σορό ι φαμιλιάκο, ντα σο πρέπει τι προσοχίνελ;

¹⁶ Τι ανέλ ο αναγκαία πι φαμιλιάκε. Ο Ιεχωβά ντέλας κο Ισραηλίτες οντουλά σο τθερένας ανάγκη, ατζέ-ντα κάνα βον να ντένας-λες καν. (Δευτ. 2:7· 29:5) Αντιβές-ντα ντέλα-αμέν ο αναγκαία. (Ματθ. 6:​31-33· 7:​11) Επίσης, ο Ιησούς παρβαρέλας οντουλέν σο τζάνας παλά-λέστε. (Ματθ. 14:​17-20) Ντα κερέλας λατσσές ι νασφαλέν. (Ματθ. 4:​24) Για τι κερέλ ι Ιεχωβάσκο γκι, ο σορό ι φαμιλιάκο πρέπει τι ανέλ ο αναγκαία πι φαμιλιάκε. Όμως, πρέπει τι προσοχίνελ. Δεν πρέπει τι χαλαβέλ αζόμ μπουτ σαάτι ντα ζορ πι μπουτιάτε, σόσκε αντικάς να κα βοηθίνελ πι φαμιλί τι αβέλ πασέ κο Ιεχωβά ντα να κα σικαβέλ ότι πφαμπόλα πι φαμιλιάκε.

17. Σαρ σικλιαρέλα ντα διορθώνελα-αμέν ο Ιεχωβά ντα ο Ιησούς;

 ¹⁷ Τι σικλιαρέλ. Ο Ιεχωβά σικλιαρέλα-αμέν ντα διορθώνελα-αμέν αμαρέ λατσσιμάσκε. (Εβρ. 12:​7-9) Σαρ λέσκο Ντατ, αντικάς ο Ιησούς-ντα σικλιαρέλα λατσσιμάσαρ οντουλέν σο κερέλα-λεν κουμάντος. (Ιωάν. 15:​14, 15) Διορθώνελα-λεν αλλά σικαβέλα λατσσιπέ-ντα. (Ματθ. 20:​24-28) Αγαβέλα ότι ισινάμ ατελείς ντα μπουτ φαρ κεράσα λάθη.​—Ματθ. 26:41.

18. Σο ντέλα-πες γκοντί εκ λατσσό σορό ι φαμιλιάκο;

¹⁸ Ο σορό ι φαμιλιάκο σο μοιάζελα κο Ιεχωβά ντα κο Ιησούς ντέλα-πες γκοντί ότι λέσκι ρομνί ντα λέσκε τσσαβέ νανέ τέλειοι. Να “χολιάνελα” λένγκε. (Κολ. 3:​19) Αλλά κερέλα οντουβά σο βακερέλα κο εδάφιος Γαλάτες 6:1 ντα προσπαθίνελα τι διορθώνελ-λεν «κοβλέ γκίσαρ», επειδή να μπιστρέλα ότι βοβ-ντα ισί ατελής. Σαρ ο Ιησούς, αγαβέλα ότι ο πιο λατσσό τρόπος για τι σικλιαρέλ ισί πι παραδειγμάσαρ.​—1 Πέτρ. 2:21.

19, 20. Σαρ κα μοιάζελ κο Ιεχωβά ντα κο Ιησούς ο σορό ι φαμιλιάκο κάνα λέλα αποφάσεις;

¹⁹ Τι λελ αποφάσεις σο βοηθίνενα λέσκι φαμιλί. Ο Ιεχωβά λέλα αποφάσεις σο ισί ι γιαβερένγκε λατσσιμάσκε. Για παράδειγμας, τραμπιντάς τι κερέλ ι ζωή, όχι για τι κερέλ λατσσιπέ πέσκε, αλλά για τι χαιρίνας αμέν-ντα ι ζωή. Καέκ ναστί τσσουβέλας-λες ζορίσαρ τι ντελ πι Τσσαβές για τι ιτσσαρέλ αμαρέ αμαρτίες. Κερντάς-λες ανταβά σόσκε μανγκέλας τι βοηθίνελ-αμέν. Ο Ιησούς-ντα λέλας αποφάσεις σο ανένας λατσσιπέ ι γιαβερένγκε. (Ρωμ. 15:3) Για παράδειγμας, εκ φαρ σο ισινέ κχινό, σικλιαρντάς μπουτέ τζενέν αντίς τι τζαλ τι ξεκουράντιβελ.​—Μάρκ. 6:​31-34.

²⁰ Ο λατσσό σορό ι φαμιλιάκο τζανέλα ότι εκ κατά πιο δύσκολα πράγματα σο πρέπει τι κερέλ ισί τι λελ γκοντιαβέρ αποφάσεις πι φαμιλιάκε, ντα ανταβά ισί μπουτ σημαντικός λέσκε. Τσσουβέλα πι γκοντί τι κχελέλ για τι λελ εκ απόφαση ντα να ντικχέλα σάντε σο νιωθίνελα οντιά στιγμή. Μουκχέλα ι Ιεχωβάς τι σικλιαρέλ-λες. * (Παρ. 2:6, 7) Αντικάς, κα σκεφτίνελ ι γιαβερένγκο λατσσιπέ, όχι πιρό.​—Φιλιπ. 2:4.

21. Σο κα ντικχάς κο γιαβέρ μάθημας;

²¹ Ο Ιεχωβά ντινάς κο σορέ κι φαμιλίνγκε εκ δύσκολη μπουτί ντα μπεσέλα λένταρ τι κερέν ο πιο λατσσό. Αλλά άμα εκ μουρς μαρέλα-πες τι μοιάζελ κο Ιεχωβά ντα κο Ιησούς, κα αβέλ λατσσό σορό πι φαμιλιάκε. Ντα άμα λέσκι ρομνί κερέλα βόι-ντα ι μπουτί σο ντινάς-λα ο Ιεχωβά, κα αβέν ο ντούι-ντα μπουτ χαρούμενοι. Σαρ πρέπει τι ντικχέλ η ρομνί ι ευθύνη σο τθερέλα λάκο ρομ τι αβέλ ο σορό ι φαμιλιάκο, ντα καλά δυσκολίες τθερέλα βόι; Κα ντικχάς ο απαντήσεις κο γιαβέρ μάθημας.