1, 2. Σαρ πρέπει τι ντικχάς ο δοκιμασίες σαρ βακερέλα ο εδάφιος Ματθαίος 5:11;

Ο ΙΗΣΟΥΣ ντινάς πο λάφι πι μαθητέντε ότι κα αβένας μπαγιά ευτυχισμέ. Βακερντάς λένγκε ότι κα νακχένας δοκιμασίες-ντα. (Ματθ. 10:​22, 23· Λουκ. 6:​20-23) Χαιρίνασα σο ισινάμ μαθητές ι Χριστόσκε. Αλλά σαρ νιωθίνασα άμα αμαρί φαμιλί ή η κυβέρνηση κα τζαλ αμέντζαρ κόντρα ή άμα ο τζενέ σο κεράσα λέντζαρ μπουτί ή αμαρέ συμμαθητές μανγκένα τι κεράς κάτι λάθος; Αγαβάσα ότι κάτι ασακό μπορεί τι κερέλ-αμέν τι νταράς.

² Ο πιο μπουτ τζενέ να χαιρίνενα κάνα τζάνα λέντζαρ κόντρα. Όμως, ακριβώς ανταβά βακερέλα αμένγκε ο Λάφι ι Ντεβλέσκο τι κεράς. Για παράδειγμας, ο μαθητής Ιάκωβος γραφιντάς ότι αντίς τι τσσουβάς αμαρέ γκίστε κάνα νακχάσα εκ δοκιμασία, πρέπει τι χαιρίνας κάνα αβέλα-πες ανταβά. (Ιακ. 1:2, 12) Ο Ιησούς-ντα βακερντάς ότι πρέπει τι αβάς χαρούμενοι ατζέ-ντα κάνα τζάνα αμέντζαρ κόντρα. (Διαβάνεν Ματθαίος 5:​11) Σαρ μπορίνασα τι ατσσικιαράς αμαρί χαρά παρόλο σο νακχάσα δοκιμασίες; Κα σικλιάς μπουτ πράγματα κατά επιστολή σο γραφιντάς ο Ιάκωβος κο πρώτοι Χριστιανοί. Πρώτα όμως για τι ντικχάς σο δυσκολίες νακχένας οντουλά Χριστιανοί.

3. Σο αβιλό-πες χάνικ καιρός αφού ο Ιάκωβος αβιλό μαθητής ι Ιησούσκο;

³ Χάνικ καιρός αφού ο Ιάκωβος, σο ισινέ μιλαδέλφια ι Ιησούσαρ, αβιλό μαθητής, γκιλέ κόντρα κο Χριστιανοί σο ισινέ κι Ιερουσαλήμ. (Πράξ. 1:​14· 5:​17, 18) Ντα κάνα μουνταρντέ ι Στεφανός, μπουτ Χριστιανοί νασλέ κατά πόλη για τι αρακχαβέν-πες ντα «τρουγισάλε κι Ιουδαία ντα κι Σαμάρεια», ντα ερεσλέ μέχρι κι Κύπρος ντα κι Αντιόχεια. (Πράξ. 7:​58–8:1· 11:​19) Ο μαθητές νακχλέ μπουτ προβλήματα. Όμως, βον βακερένας  ο λατσσέ αμπέρια αντράλ πουμαρέ γκίσταρ κάι-ντα τι τζάνας, ντα κερένας κχανγκιριά διάφορε τθανέντε κι Ρωμαϊκή Αυτοκρατορία. (1 Πέτρ. 1:1) Αλλά κα τθερένας ατζέ πιο μπουτ δυσκολίες.

4. Καλά γιαβερά δοκιμασίες έπρεπε τι νταϊντίνεν ο πρώτοι Χριστιανοί;

⁴ Ο πρώτοι Χριστιανοί νταϊντιντέ μπουτ ντα σαβέ τι μανγκές δοκιμασίες. Για παράδειγμας, πασέ κο 50 Κ.Χ., ο Ρωμαίος αυτοκράτορας Κλαύδιος βακερντάς σαρέ κο Ιουδαίοι τι νασέν κατά Ρώμη. Οτθάρ, ο Ιουδαίοι σο αβιλέας Χριστιανοί έπρεπε τι μουκχέν πουμαρέ κχερά ντα τι μπεσέν γιαβερτθέ. (Πράξ. 18:​1-3) Πασέ κο 61 Κ.Χ., ο απόστολος Παύλος γραφιντάς ότι ο τζενέ πρασαντέας ι Χριστιανόν ανγκλάλ γιαβερέ τζενέντε, τσσουντέας-λεν κι φυλακή ντα τσορντέας λένγκε πράγματα. (Εβρ. 10:​32-34) Ντα σαρ ο γιαβερά τζενέ, αντικάς ο Χριστιανοί-ντα μαρένας-πες ι τσοροριμάσαρ ντα ι νασφαλιματέντζαρ.​—Ρωμ. 15:​26· Φιλιπ. 2:​25-27.

5. Καλέ ερωτησιέντε κα απαντίνας;

⁵ Κάνα ο Ιάκωβος γραφιντάς πι επιστολή, πριν κατά 62 Κ.Χ., τζανέλας μπουτ λατσσές ο δοκιμασίες σο νακχένας ο πφραλά ντα ο πφενιά. Ο Ιεχωβά ντινάς-λες πο πνεύμας τι γραφίνελ οντουλέ Χριστιανόνγκε συμβουλές σο κα βοηθίνενας-λεν τι ατσσικιαρέν πουμαρί χαρά ατζέ-ντα κάνα τθερένας δοκιμασίες. Κα ντικχάς ι επιστολή σο γραφιντάς ο Ιάκωβος για τι αρακχάς ο απαντήσεις ακαλέ ερωτησιέντε: Σο ισί η χαρά σο γραφιντάς ο Ιάκωβος; Σο κα κερέλας εκχέ Χριστιανός τι χασαρέλ-λα; Ντα σαρ βοηθίνελα-αμέν η σοφία, η πίστη ντα ο θάρρος τι ατσσικιαράς αμαρί χαρά κάνα νακχάσα σαβέ τι μανγκές δοκιμασίες;

6. Σόσκε μπορίνελα εκ Χριστιανός τι αβέλ χαρούμενος κάνα νακχέλα δοκιμασίες σαρ βακερένα ο εδάφια Λουκάς 6:​22, 23;

⁶ Ο τζενέ μπορεί τι πακιάνα ότι κα αβέν  ευτυχισμέ σάντε άμα τθερένα λατσσί υγεία, μπουτ λοβέ ντα ειρήνη πουμαρέ φαμιλιάτε. Αλλά η χαρά σο γραφιντάς ο Ιάκωβος ισί αντρέ κο καρπός κι Ντεβλέσκε πνευμάσκο ντα να τθερέλα τι κερέλ οντουλέντζαρ σο αβένα-πες κι ζωή εκχέ τζενέσκι. (Γαλ. 5:​22) Ο Χριστιανός αρακχέλα χαρά, δηλαδή ισί μπαγιά ευτυχισμέ, κάνα τζανέλα ότι κερέλα ι Ιεχωβάσκο γκι ντα ακολουθίνελα ο παράδειγμας ι Ιησούσκο. (Διαβάνεν Λουκάς 6:​22, 23· Κολ. 1:​10, 11) Αμαρί χαρά ισί σαρ εκ γιακ αντρέ εκχέ φαναρίστε. Η γιακ ισί αρακχαντί ντα να μερέλα παρόλο σο κερέλα μπαρμπάλ ή ντέλα μπρισίμ. Αμέν-ντα ισινάμ χαρούμενοι σο-ντα τι αβέλ-πες αμαρέ ζωγιάτε. Να χασαράσα αμαρί χαρά κάνα νασφάλιβασα ή να τθεράσα μπουτ λοβέ. Ντα ατσσάσα χαρούμενοι ατζέ-ντα κάνα πρασάλα-αμέν ή τζάλα αμέντζαρ κόντρα αμαρί φαμιλί ή γιαβερά. Αμαρί χαρά μπαριόλα κάθε φαρ σο αμαρέ ντουσμάνια προσπαθίνενα τι κερέν-αμέν τι χασαράς-λα. Ο δοκιμασίες σο νακχάσα οντουλένγκε σο πακιάσα σικαβένα ότι ισινάμ αληθινοί μαθητές ι Χριστόσκε. (Ματθ. 10:​22· 24:9· Ιωάν. 15:​20) Άκ’ σόσκε ο Ιάκωβος γραφιντάς: «Τι τθερέν μπουτ χαρά, πφραλάλεν, κάνα νακχένα σαβέ τι μανγκές δοκιμασίες».​—Ιακ. 1:2.

7, 8. Σαρ βοηθίνενα ο δοκιμασίες αμαρί πίστη;

⁷ Ο Ιάκωβος βακερέλα εκ γιαβέρ-ντα λόγος σο ο Χριστιανοί ισί χαρούμενοι σο νακχένα μπαρέ δοκιμασίες. Βακερέλα: «Κάνα η πίστη ατσσόλα ζουρανί κο προβλήματα ανέλα υπομονή». (Ιακ. 1:3) Μπορίνασα τι βακεράς ότι ο δοκιμασίες ισί σαρ εκ γιακ σο πφαμπαράσα για τι κεράς εκ ατσάλινος σπαθίς. Κάνα ο σπαθίς τατιόλα ντα σοράν σουρντιόλα, ο ατσάλι αβέλα πιο ζουρανό. Αντικάς κάνα νακχάσα δοκιμασίες-ντα, αμαρί πίστη αβέλα πιο ζουρανί. Άκ’ σόσκε ο Ιάκωβος γραφιντάς: «Μουκχέν . . . ι υπομονή τι σικλιαρέλ-τουμέν λατσσές, για τι αβέν σαστέ ντα υγιείς σαρέ κο πράγματα». (Ιακ. 1:4) Κάνα ντικχάσα ότι ο δοκιμασίες κερένα πιο ζουρανί αμαρί πίστη, μπορίνασα τι νταϊντίνας-λεν χαράσαρ.

⁸ Κι επιστολή σο γραφιντάς ο Ιάκωβος, βακερντάς μερικά πράγματα-ντα σο κα μπορίνενας τι κερέν-αμέν τι χασαράς αμαρί χαρά. Καλά ισί ανταλά προβλήματα, ντα σαρ μπορίνασα τι ντας-λεν πέρα;

9. Σόσκε πρέπει τι αβάς γκοντιαβέρ;

⁹ Ο πρόβλημας: Να τζανάσα σο τι κεράς. Κάνα νακχάσα εκ δοκιμασία, πρέπει τι μανγκάς κατά Ιεχωβά τι βοηθίνελ-αμέν για τι κεράς πράγματα σο κα κερέν λέσκο γκι, σο κα βοηθίνεν αμαρέ πφραλέν ντα αμαρέ πφενίν ντα σο κα κερέν-αμέν τι ατσσάς πιστοί κο Ιεχωβά. (Ιερ. 10:​23) Πρέπει τι αβάς γκοντιαβέρ για τι τζανάς σο τι κεράς ντα σο τι βακεράς οντουλένγκε σο τζάνα αμέντζαρ κόντρα. Άμα να τζανάσα σο τι κεράς, μπέκιμ τι νιωθίνασα ότι να τθεράσα ζορ ντα κα μπορίναας τι χασαράς σουγκό αμαρί χαρά.

10. Σο πρέπει τι κεράς για τι τθεράς σοφία σαρ βακερέλα ο εδάφιος Ιακώβου 1:5;

 ¹⁰ Σο τι κερέν: Μανγκέν κατά Ιεχωβά τι κερέλ-τουμέν γκοντιαβέρ. Για τι νταϊντίνας αμαρέ δοκιμασίες χαράσαρ, πρέπει πρώτα τι κεράς προσευχή κο Ιεχωβά ντα τι μανγκάς λέσταρ τι ντελ-αμέν ι σοφία σο χρειαζίντιβελα για τι λας λατσσέ αποφάσεις. (Διαβάνεν Ιακώβου 1:5) Σο πρέπει τι κεράς άμα νιωθίνασα ότι ο Ιεχωβά να απαντίνελα αμέσως αμαρέ προσευχιάτε; Ο Ιάκωβος βακερέλα ότι πρέπει τι μανγκάς συνέχεια σοφία κατά Ντεβέλ. Ο Ιεχωβά να τθερέλα πρόβλημας άμα κεράσα-λες συνέχεια ανταβά. Να κα χολιάνελ αμένγκε. Αμαρό Ντατ, ο Ιεχωβά “ντέλα αντράλ πι γκίσταρ” κάνα προσευχίντιβασα τι ντελ-αμέν σοφία για τι νταϊντίνας αμαρέ δοκιμασίες. (Ψαλμ. 25:​12, 13) Ντικχέλα αμαρέ δοκιμασίες, πφαμπόλα αμένγκε ντα μανγκέλα τι βοηθίνελ-αμέν. Σίγουρα, ανταβά ισί εκ λόγος για τι χαιρίνας! Σαρ όμως ντέλα ο Ιεχωβά σοφία;

11. Σο γιαβέρ πρέπει τι κεράς για τι τθεράς σοφία;

¹¹ Ο Ιεχωβά ντέλα-αμέν σοφία αντράλ πι Λαφίσταρ. (Παρ. 2:6) Για τι τθεράς ανταγιά σοφία, πρέπει τι σικλιαράς-αμέν κατά Λάφι ι Ντεβλέσκο ντα κατά εκδόσεις αμαρέ. Αλλά να ερεσέλα σάντε τι σικλιάς πράγματα. Πρέπει τι κεράς οντουβά σο βακερέλα αμένγκε ο Ντεβέλ τι κεράς. Ο Ιάκωβος γραφιντάς: «Τι κερέν ο λάφια ι Ντεβλέσκε ντα μα τι ασουνέν-λεν σάντε». (Ιακ. 1:​22) Κάνα κεράσα ο συμβουλές ι Ντεβλέσκε, αβάσα πιο ειρηνικοί, λογικοί ντα σικαβάσα έλεος ι γιαβερένγκε. (Ιακ. 3:​17) Ανταλά ιδιότητες βοηθίνενα-αμέν τι νακχαβάς σαβέ τι μανγκές δοκιμασίες χωρίς τι χασαράς αμαρί χαρά.

12. Σόσκε ισί σημαντικός τι τζανάς λατσσές ι Γραφή;

¹² Ο Λάφι ι Ντεβλέσκο ισί σαρ ανιάς. Βοηθίνελα-αμέν τι ντικχάς σο πρέπει τι κεράς πιο λατσσές ντα σαρ μπορίνασα τι κεράς-λες. (Ιακ. 1:​23-25) Για παράδειγμας, καζόμ σικλιαράσα-αμέν κατά Λάφι ι Ντεβλέσκο, μπορεί τι αγαβάς ότι να κεράσα λατσσές  κουμάντος αμαρέ νεύρα. Ι Ιεχωβάσκε βοηθειάσαρ σικλιάσα σαρ τι αβάς κοβλέ γκίσκε κάνα τθεράσα τι κεράς τζενέντζαρ ή προβληματέντζαρ σο κα μπορίνενας τι κερέν-αμέν τι νευριάνας. Ο κοβλό γκι βοηθίνελα-αμέν τι αντιμετωπίνας πιο λατσσές αμαρέ προβλήματα. Μπορίνασα τι σκεφτίνας πιο λατσσές ντα τι λας πιο λατσσέ αποφάσεις. (Ιακ. 3:​13) Καζόμ σημαντικός ισί τι τζανάς λατσσές ι Γραφή!

13. Σόσκε πρέπει τι σικλιάς κατά παραδείγματα σο ισί κι Γραφή;

¹³ Μπάζιμα, σικλιάσα σο δεν πρέπει τι κεράς σάντε αφού κερντάμ εκ λάθος. Αλλά ανταβά ισί ο δύσκολος τρόπος για τι σικλιάς. Εκ πιο λατσσό τρόπος για τι αβάς πιο γκοντιαβέρ ισί τι σικλιάς κατά λατσσέ ντα κατά λάθος πράγματα σο κερντέ ο γιαβερά. Άκ’ σόσκε ο Ιάκωβος βακερέλα αμένγκε τι σικλιάς κατά παραδείγματα σο ισί κι Γραφή σαρ ισί ο Αβραάμ, η Ραάβ, ο Ιώβ ντα ο Ηλίας. (Ιακ. 2:​21-26· 5:​10, 11, 17, 18) Οντουλά πιστοί υπηρέτες ι Ιεχωβάσκε νταϊντιντέ δοκιμασίες σο κα μπορίνενας τι κερέν-λεν τι χασαρέν πουμαρί χαρά. Η υπομονή σο σικαντέ σικλιαρέλα-αμέν ότι ι Ιεχωβάσκε βοηθειάσαρ μπορίνασα αμέν-ντα τι κεράς-λες ανταβά.

14, 15. Σόσκε πρέπει τι κεράς κάτι άμα να ισινάμ σίγουροι οντουλένγκε σο πακιάσα;

¹⁴ Ο πρόβλημας: Να ισινάμ σίγουροι οντουλένγκε σο πακιάσα. Μπάζιμα, μπορεί τι ισί αμένγκε δύσκολος τι αγαβάς κάτι κατά Λάφι ι Ντεβλέσκο. Ή μπορεί ο Ιεχωβά μα τι απαντίνελα αμαρέ προσευχιέντε αντικάς σαρ μπεκλεντίναας. Ανταβά μπορεί τι κερέλ-αμέν τι χασαράς αμαρί σιγουριά οντουλένγκε σο πακιάσα. Άμα να κα κεράς κάτι ανταλέσκε, αμαρί πίστη κα χασαρέλ πι ζορ ντα κα κεράς ζιάνι κι φιλία σο τθεράσα ι Ιεχωβάσαρ. (Ιακ. 1:7, 8) Κα μπορίναας ατζέ-ντα τι χασαράς αμαρί ελπίδα οντουλένγκε σο μπεκλεντίνασα.

¹⁵ Ο απόστολος Παύλος βακερντάς ότι αμαρί ελπίδα ισί σαρ εκ άγκυρα. (Εβρ. 6:​19) Η άγκυρα ατσσικιαρέλα σταθερός ο καράβι κι φουρτούνα ντα να μουκχέλα-λες τι περέλ κο βράχια. Άμα όμως κα πφανγκιόλ ι τζαντζίρ σο ατσσικιαρέλα ο καράβι, η άγκυρα κα αβέλ άχρηστη. Σαρ η σκουριά χαλαβέλα ι τζαντζίρ εκχέ αγκυράκι, αντικάς ο πράγματα-ντα σο κερένα-αμέν μα τι αβάς σίγουροι οντουλένγκε σο πακιάσα χαλαβένα αμαρί πίστη. Ντα κάνα τθεράσα προβλήματα, κα μπορίναας μα τι αβάς σίγουροι ότι ο Ιεχωβά κα κερέλ πο λάφι τι νικιόλ μπαγιά. Άμα κα χασαράς αμαρί πίστη, κα χασαράς αμαρί ελπίδα-ντα. Ο Ιάκωβος βακερέλα ότι «οντουβά σο τθερέλα αμφιβολίες ισί σαρ ι ντεριαβάκε κύματα σο λέλα-λεν ι μπαρμπάλ ντα τζάνα ακατάρ ντα οκουτάρ». (Ιακ. 1:6) Ο τζενό σο νιωθίνελα αντικάς να κα τθερέλ ιτς χαρά!

16. Σο πρέπει τι κεράς άμα να ισινάμ σίγουροι οντουλένγκε σο πακιάσα;

¹⁶ Σο τι κερέν: Ντεν-λεν πέρα ι πραγματέντζαρ σο κερένα-τουμέν μα τι αβέν σίγουροι ντα μπαριαρέν τουμαρί πίστη. Μα τι αβέν ντουέ γκοντιέντζαρ. Κο ντιβεσά σο τζουβντιόλας ο προφήτης Ηλίας, ο λαός ι Ιεχωβάσκο ισινέ ντουέ γκοντιέντζαρ. Ο Ηλίας βακερντάς λένγκε: «Μέχρι κάνα κα τθερέν ντούι διαφορετικές απόψεις ντα να κα αποφασίνεν; Άμα ισί ο Ιεχωβά ο αληθινός Ντεβέλ, ακολουθίνεν λες· αλλά άμα ισί ο Βάαλ, ακολουθίνεν οντουλές!» (1 Βασ. 18:​21) Ανταβά ισί αμένγκε-ντα. Πρέπει τι ρόντας για τι σικαβάς αμαρέ νεαυτόσκε ότι ο Ιεχωβά ισί ο αληθινός Ντεβέλ, ότι η Αγία Γραφή ισί λέσκο Λάφι ντα ότι ο Μάρτυρες ι Ιεχωβάσκε ισί λέσκο λαός. (1 Θεσ. 5:​21) Ανταλέ τροπόσαρ, κα νασκιαράς αμαρέ γκοντιάταρ ο πράγματα σο κερένα-αμέν μα τι αβάς σίγουροι ντα κα μπαριαράς αμαρί πίστη. Άμα χρειαζίντιβασα βοήθεια ανταλέσκε, μπορίνασα τι τζας κο πρεσβύτεροι. Πρέπει τι κεράς κάτι σουγκό άμα μανγκάσα τι ατσσικιαράς αμαρί χαρά κι υπηρεσία κι Ιεχωβάσκι!

17. Σο κα αβέλ-πες άμα χασαρντάμ αμαρό θάρρος;

 ¹⁷ Ο πρόβλημας: Χασαράσα αμαρό κουράγιος. Ο Λάφι ι Ντεβλέσκο βακερέλα: «Άμα χασαρντάν το κουράγιος κο ντιβές σο ισινάν στεναχωριμέ, να κα τθερές μπουτ ζορ». (Παρ. 24:​10) Άμα χασαρντέν τουμαρό κουράγιος, κα χασαρέν σουγκό τουμαρί χαρά-ντα.

18. Σο μανγκέλα τι βακερέλ τι νταϊντίνας;

¹⁸ Σο τι κερέν: Μανγκέν κατά Ιεχωβά τι ντελ-τουμέν ο θάρρος τι νταϊντίνεν. Χρειαζίντιβασα θάρρος για τι νταϊντίνας ο δοκιμασίες. (Ιακ. 5:​11) Ο πουρανό μπαλαμανό λάφι σο γραφιντάς ο Ιάκωβος ντα μεταφράντιβελα «νταϊντίναβα» μανγκέλα τι σικαβέλ εκχέ τζενές σο ατσσόλα σταθερός πι θεσιάτε. Ανταβά μπέκιμ ανέλα αμαρέ γκοντιάτε εκχέ στρατιωτής σο ατσσόλα μπίνταρανες ανγκλάλ πι ντουσμανίντε ντα να νασέλα ατζέ-ντα κάνα τσσουβένα-λεν λέσαρ σαρέ πουμαρέ ζοριάσαρ.

19. Σο σικλιάσα κατά παράδειγμας σο μουκχλάς ο απόστολος Παύλος;

¹⁹ Ο απόστολος Παύλος μουκχλάς αμένγκε εκ μπουτ λατσσό παράδειγμας για τι σικαβάς θάρρος ντα τι νταϊντίνας. Μπάζιμα, νιωθίνελας ότι ισινέ μπίζουρανο. Αλλά νταϊντίνελας επειδή μανγκέλας κατά Ιεχωβά τι ντελ-λες ι ζορ σο χρειαζίντιβελας. (2 Κορ. 12:​8-10· Φιλιπ. 4:​13) Αμέν-ντα μπορίνασα τι τθεράς ασακί ζορ ντα θάρρος άμα αγαβάσα ταπεινά ότι χρειαζίντιβασα ι βοήθεια ι Ιεχωβάσκι.​—Ιακ. 4:10.

20, 21. Καλέ πραγμάσκε μπορίνασα τι αβάς σίγουροι;

²⁰ Μπορίνασα τι αβάς σίγουροι ότι ο δοκιμασίες σο νακχάσα νανέ τιμωρία κατά Ιεχωβά. Ο Ιάκωβος βακερέλα αμένγκε: «Καέκ κάνα νακχέλα εκ πρόβλημας μα τι βακερέλ: “Κατά Ντεβέλ δοκιμάντιβαβα”. Σόσκε ο Ντεβέλ ναστί δοκιμάντιβελα μπέτι πραγματέντζαρ ούτε δοκιμάνελα καεκχές». (Ιακ. 1:​13) Κάνα ισινάμ σίγουροι ανταλέσκε, αβάσα πιο πασέ αμαρέ Νταντέστε, κο Ιεχωβά.​—Ιακ. 4:8.

²¹ Ο Ιεχωβά «να αλλάνελα». (Ιακ. 1:​17) Βοηθιντάς ι πρώτε Χριστιανόν κο δοκιμασίες σο νακχένας ντα ανταβά κα κερέλ αμέντζαρ-ντα αντιβές. Τι μανγκέν αντράλ τουμαρέ γκίσταρ κατά Ιεχωβά τι τθερέν σοφία, πίστη ντα θάρρος. Βοβ κα απαντίνελ τουμαρέ προσευχιέντε. Αντικάς, κα αβέν σίγουροι ότι κα βοηθίνελ-τουμέν τι ατσσικιαρέν τουμαρί χαρά κάνα νακχένα δοκιμασίες!