1. Σαρ μπορεί τι ντιντιόλ-αμέν εκ συμβουλή, ντα σόσκε σαρέ χρειαζίντιβασα-λα;

 ΣΑΡΕ χρειαζίντιβασα συμβουλές καέκ φαρ. Μπάζιμα, μπορεί τι τζας αμέν εκχέ τζενέστε σο σεβάνασα ντα τι μανγκάς λέσταρ συμβουλή. Γιαβερά φαρ, εκ πφραλ σο πφαμπόλα αμένγκε μπέκιμ τι αβέλ ντα τι βακερέλ αμένγκε ότι αντικάς σαρ τζάσα κα κεράς εκ λάθος σο κα μετανιώνας. (Γαλ. 6:1) Ή μπέκιμ εκ τζενό τι αβέλ τι ντελ-αμέν συμβουλή για τι διορθώντιβας σόσκε κερντάμ εκ μπαρό λάθος. Σαρ-ντα τι ντιντιόλ-αμέν εκ συμβουλή, πρέπει τι ασουνάς-λα. Ανταβά κερέλα αμένγκε λατσσιπέ ντα μπορίνελα τι σώνελ αμαρί ζωή!​—Παρ. 6:23.

2. Σόσκε πρέπει τι ασουνάς συμβουλή σαρ βακερέλα ο εδάφιος Παροιμίες 12:15;

² Ο εδάφιος ανταλέ μαθημάσκο βακερέλα αμένγκε τι “ασουνάς ο λάφια οντουλένγκε σο ισί γκοντιαβέρ”. (Παρ. 22:​17) Καέκ τζενό να τζανέλα-λεν σαρέ. Πάντα ισί εκ γιαβέρ σο τζανέλα ή νακχλάς πο μπουτ πράγματα αμένταρ. (Διαβάνεν Παροιμίες 12:​15) Οτθάρ, κάνα ασουνάσα συμβουλή σικαβάσα ότι ισινάμ ταπεινοί. Σικαβάσα ότι αγαβάσα αμαρέ όρια. Αγαβάσα ότι χρειαζίντιβασα βοήθεια για τι κεράς οντουλά σο μανγκάσα. Ο γκοντιαβέρ βασιλιάς Σολομών γραφιντάς ι Ντεβλέσκε πνευμάσαρ: «[Η επιτυχία αβέλα] κάνα μπουτ τζενέ σο τθερένα σοφία βακερένα πουμαρέ απόψεις ο εκ κο γιαβέρ».​—Παρ. 15:22.

3. Καλέ τροπόντζαρ μπέκιμ τι λας εκ συμβουλή;

³ Ισί ντούι τρόποι για τι λας εκ συμβουλή. Εκ τανό ισί κάνα διαβάνασα κάτι κι Γραφή ή κο έντυπα σο κα κερέλ-αμέν τι ατσσάς ντα τι σκεφτίνας οντουλά σο κεράσα ντα κα τσσίντελ-αμέν τι διορθώνας-λεν. (Εβρ. 4:​12) Εκ γιαβέρ ισί κάνα εκ πρεσβύτερος ή εκ γιαβέρ γκοντιαβέρ πφραλ μπέκιμ τι βακερέλ αμένγκε κάτι σο  πρέπει τι αλλάνας. Άμα εκ τζενό μανγκέλα-αμέν αζόμ μπουτ για τι ντελ-αμέν εκ συμβουλή αντράλ κατά Γραφή, αμέν πρέπει τι ασουνάς λέσκι συμβουλή ντα τι μαράς-αμέν τι κεράς-λα για τι σικαβάς λέσκε αντικάς αμαρί εκτίμηση.

4. Σο δεν πρέπει τι κεράς κάνα ντιντιόλα-αμέν εκ συμβουλή σαρ βακερέλα ο εδάφιος Εκκλησιαστής 7:9;

⁴ Μπέκιμ τι αβέλ αμένγκε μπουτ δύσκολος τι ασουνάς ντα τι κεράς ι συμβουλή σο κα ντελ-αμέν εκ τζενό. Μπέκιμ ατζέ-ντα τι χολιάνας. Σόσκε; Παρόλο σο να τθεράσα πρόβλημας τι βακεράς ότι ισινάμ ατελείς, μπορεί τι αβέλ αμένγκε δύσκολος τι ντας καν κάνα εκ τζενό βακερέλα αμένγκε εκ λάθος σο κερντάμ. (Διαβάνεν Εκκλησιαστής 7:9) Μπορεί τι αρακχάς δικαιολογίες. Μπέκιμ πακιάσα ότι να τσσιντιντάς-λες ο μανγκιπέ τι ντελ-αμέν συμβουλή ή τι χολιάνας για το τρόπος σο ντινάς-αμέν ι συμβουλή. Μπορεί ατζέ-ντα τι αρακχάς λάθη κο τζενό σο ντινάς-αμέν ι συμβουλή ντα τι σκεφτίνας: “Να λατζάλα σο ντινάς-μαν συμβουλή; Ισί βοβ πο λατσσό μάνταρ;” Ντα άμα να μπεϊντίνασα ι συμβουλή σο ντιντιόλα-αμέν, μπορεί μα τι ασουνάς-λα ή τι ρόντας εκχέ γιαβεράκε σο μπεϊντίνασα πο μπουτ.

5. Σο κα ντικχάς ανταλέ μαθημάστε;

⁵ Ανταλέ μαθημάστε, κα ντικχάς παραδείγματα τζενένγκε κατά Γραφή σο να ασουντέ ι συμβουλή σο ντιντιλί-λεν ντα τζενένγκε σο ασουντέ. Ντα κα σικλιάς σο κα βοηθίνελ-αμέν τι ασουνάς εκ συμβουλή ντα τι ντικχάς λατσσιπέ λάταρ.

6. Σο σικλιάσα οντουλέσταρ σο κερντάς ο βασιλιάς Ροβοάμ κάνα ντιντιλί-λες εκ συμβουλή;

⁶ Για τι ντικχάς σο κερντάς ο Ροβοάμ. Κάνα ο Ροβοάμ αβιλό βασιλιάς κο Ισραήλ, ο λαός γκιλό λέσκε ντα μανγκλάς λέσταρ ακαβά: Μα τι τσσουβέλ οπρά-λέντε αζόμ πφαριπέ σαρ τσσουντάας λέσκο ντατ ο Σολομών. Ο Ροβοάμ γκιλό κο πρεσβύτεροι κο Ισραήλ για τι αποφασίνελ σο κα βακερέλας κο λαός. Ανταβά σο κερντάς ισινέ μπουτ λατσσό. Ο πρεσβύτεροι βακερντέ κο Ροβοάμ ότι ο λαός κα τσσίντελας πάντα λέσταρ άμα κα κερέλας οντουβά σο μανγκλέας. (1 Βασ. 12:​3-7) Ντικχίντιβελα όμως ότι ο Ροβοάμ να μπεϊντιντάς ανταγιά συμβουλή, ντα γκιλό τι πουτσέλ ι μουρσέν σο μπαριλόας λέντζαρ. Οντουλά μουρσά ντικχίντιβελα ότι ισινέ πο μπουτ από 40 μπρεσένγκε, ντα μάλλον νακχλέας κάποια πράγματα πουμαρέ ζωγιάτε. (2 Χρον. 12:​13) Ανταγιά φαρ όμως, να ντινέ-λες λατσσί συμβουλή. Βακερντέ λέσκε τι τσσουβέλ πο μπουτ πφαριπέ κο λαός. (1 Βασ. 12:​8-11) Ο Ροβοάμ τθερέλας ανγκλά-πέστε ντούι διαφορετικά πράγματα τι τραμπίνελ. Κα μπορίνελας τι κερέλ προσευχή κο Ιεχωβά ντα τι πουτσέλ-λες καγιά συμβουλή τι κερέλ. Αντίς όμως τι κερέλ-λες ανταβά, τραμπιντάς τι ασουνέλ ι συμβουλή σο μπεϊντιντάς πο μπουτ ντα ασουντάς ι πο τερνέ μουρσέν. Ανταλέσαρ σο τραμπιντάς, κερντάς ζιάνι εμ πέσκε εμ ι λαόσκε. Μπέκιμ μα τι ντιντιόλ-αμέν πάντα ι συμβουλή σο μανγκάσα τι ασουνάς. Όμως, άμα ισί κατά Ντεβλέσκο Λάφι, πρέπει τι ασουνάς-λα.

7. Σο σικλιάσα κατά βασιλιάς Οζίας;

⁷ Ο βασιλιάς Οζίας να ασουντάς ι συμβουλή σο ντιντιλί-λες. Τσσουντάς-πες εκχέ τθανέστε κι Ιεχωβάσκο ναός σο μπορίνενας τι τσσουβέν-πες σάντε ο ιερείς ντα μανγκέλας τι πφαμπαρέλ θυμίαμας. Ο ιερείς ι Ιεχωβάσκε βακερντέ λέσκε: «Νανέ σωστός, Οζία, τι πφαμπαρές τούι θυμίαμας ι Ιεχωβάσκε! Σάντε ο ιερείς πρέπει τι πφαμπαρέν θυμίαμας». Σο κερντάς ο Οζίας; Άμα κα ασουνέλας ι συμβουλή ντα κα νασέλας σουγκό κατά ναός, ο Ιεχωβά μπέκιμ τι συγχωρίνελας-λες. Αντίς τι κερέλ ανταβά όμως, «ο Οζίας . . . χολιασάλο». Σόσκε να ασουντάς ι συμβουλή; Μπέκιμ τι πακιάλας ότι, σαρ βασιλιάς, τθερέλας ο δικαίωμας τι κερέλ σο μανγκέλας. Αλλά ο Ιεχωβά να πακιάλας-λες ανταβά. Επειδή ισινέ μπαρικανό ο Οζίας, ο  Ιεχωβά κερντάς-λες τι νικαβέλ λέπρα, ντα ο Οζίας «ατσσιλό λεπρός μέχρι ο ντιβές σο μουλό». (2 Χρον. 26:​16-21) Οντουβά σο αβιλό-πες κο Οζίας σικλιαρέλα-αμέν ότι, κον-ντα τι ισινάμ, άμα να ασουνάσα ο συμβουλές σο ισί αντράλ κατά Γραφή, ο Ιεχωβά κα τσσιναβέλ τι αβέλ αμέντζαρ.

8. Σο κερντάς ο Ιώβ κάνα ντιντιλί-λες συμβουλή;

⁸ Εκτός ανταλέ γκεραλέ παραδειγματένταρ σο ντικχλάμ πο οπρέ, η Αγία Γραφή τθερέλα λατσσέ-ντα παραδείγματα τζενένγκε σο ευλογισάλε επειδή ασουντέ ι συμβουλή σο ντιντιλί-λεν. Εκ παράδειγμας ισί ο Ιώβ. Παρόλο σο μανγκέλας ι Ντεβλές ντα μανγκέλας τι κερέλ λέσκο γκι, να ισινέ τέλειος. Κάνα νακχλάς μπαρέ δοκιμασίες, βακερντάς κάποια λάθος πράγματα. Οτθάρ, ντιντιλί-λες ξεκάθαρη συμβουλή, εμ κατά Ελιού εμ κατά Ιεχωβά. Σο κερντάς; Ασουντάς ι συμβουλή ντα βακερντάς: «Να τζανάβας μπαγιά σο αβέλας-πες, αλλά κερντόμ λάφι . . . Λάβα παλάλ οντουλά σο βακερντόμ ντα μετανιώναβα τσικάσαρ ντα πραχόσαρ». Ο Ιεχωβά ευλογιντάς ι Ιωβίς σόσκε ισινέ ταπεινός.​—Ιώβ 42:​3-6, 12-17.

9. Σο κερντάς ο Μωυσής κάνα ντιντιλί-λες συμβουλή, ντα σόσκε ισί λατσσό παράδειγμας αμένγκε;

⁹ Ο Μωυσής ισί λατσσό παράδειγμας τζενέσκο σο ασουντάς ι διόρθωση σοράν εκχέ μπαρέ λαθόσταρ σο κερντάς. Εκ φαρ, χολιασάλο μπουτ ντα να σικαντάς σεβασμός ι Ιεχωβάσκε. Οντουλέσκε, χασαρντάς ο προνόμιος τι νακχέλ κο Υποσχεμέ Τθεμ. (Αριθ. 20:​1-13) Κάνα ο Μωυσής βακερντάς ι Ιεχωβάσκε ότι πφανγκιλόας μπουτ λέσκο γκι ιτιρί ανταλέσταρ, ο Ιεχωβά βακερντάς λέσκε: «Μα βάκερ μάνγκε ατζέκ φαρ ανταλέσκε». (Δευτ. 3:​23-27) Ο Μωυσής να πφερντιλό κερκιπέ αντρέ πι γκίστε. Οκιά μπάνταρ, ντινάς καν κο Ιεχωβά, ντα ο Ιεχωβά συνεχιντάς τι τθερέλ-λες αρχηγός ι Ισραηλιτένγκο. (Δευτ. 4:1) Εμ ο Ιώβ εμ ο Μωυσής ντινέ-αμέν λατσσό παράδειγμας σόσκε ασουντέ ο συμβουλές. Ο Ιώβ διορθωντάς πι άποψη. Να αρακχέλας δικαιολογίες. Ο Μωυσής ατσσιλό πιστός ατζέ-ντα κάνα χασαρντάς εκ προνόμιος σο ισινέ μπουτ σημαντικός λέσκε ντα αντικάς σικαντάς ότι ασουντάς ι συμβουλή ι Ιεχωβάσκι.

10. (α) Σο σικαβένα ο εδάφια Παροιμίες 4:​10-13 ι λατσσιματένγκε σο ντικχάσα κάνα ασουνάσα συμβουλή; (β) Σαρ ντικχλέ μερικά τζενέ ο συμβουλές σο λιντέ;

¹⁰ Ντικχάσα λατσσιπέ κάνα μοιάζασα πιστέ τζενέντε σαρ ο Ιώβ ντα ο Μωυσής. (Διαβάνεν Παροιμίες 4:​10-13) Μπουτ αμαρέ πφραλένταρ ντα πφενίνταρ κερντέ-λες ανταβά. Ντικχέν σο βακερέλα εκ πφραλ, ο Εμανουέλ, σο τζουβντιόλα κο Κονγκό: «Μερικά πφραλά κι κχανγκιρί σο ισί ζουρανέ κι πίστη ντικχλέ ότι αντικάς σαρ τζάβας μι φιλία ι Ιεχωβάσαρ κα χαλάντιβελας. Οτθάρ, μανγκλέ τι βοηθίνεν-μαν. Με κερντόμ οντουβά σο βακερντέ μάνγκε, ντα ανταβά βοηθιντάς-μαν τι νασάβ μπουτέ προβληματένταρ». * Εκ σκαπάνισσα κο Καναδάς, η Μέγκαν, βακερέλα ότι ο συμβουλές σο λιντάς να ισινέ πάντα οντουβά σο μανγκέλας τι ασουνέλ, αλλά ισινέ οντουβά σο χρειαζίντιβελας τι ασουνέλ. Εκ πφραλ κατά Κροατία, ο Μάρκο, βακερέλα: «Χασαρντόμ εκ προνόμιος, αλλά κάνα ντάβα-μαν γκοντί οντουλά σο αβιλέ-πες, αγαβάβα ότι η συμβουλή σο λιντόμ βοηθιντάς-μαν τι κεράβ ζουρανί μι φιλία ι Ιεχωβάσαρ».

11. Καλά λάφια σο βακερντάς ο πφραλ Κλάιν σικαβένα ότι ισί λατσσό τι ασουνάς συμβουλή;

¹¹ Εκ γιαβέρ παράδειγμας τζενέσκο σο ντικχλάς λατσσιπέ κάνα ασουντάς συμβουλή ισινέ ο πφραλ Καρλ Κλάιν σο υπηρετιντάς κο Κυβερνών Σώμας. Πι ιστοριάτε, ο πφραλ Κλάιν βακερέλα ότι εκ φαρ λέσκο λατσσό αμάλ, ο Ιωσήφ Ρόδερφορντ, ντινάς-λες ζουρανί συμβουλή. Ο πφραλ Κλάιν βακερντάς ότι κι αρχή να μπεϊντιντάς ι συμβουλή. Βακερντάς: «Ι γιαβέρ  φαρ σο ντικχλάς-μαν [ο πφραλ Ρόδερφορντ], βακερντάς ασαμάσαρ: “Γεια σου, Καρλ!” Αλλά με ισινόμας ατζέ χολιαμέ, οτθάρ χαιρετιντόμ-λες αντράλ μι μόσταρ. Βοβ βακερντάς: “Τθερ τι γκοντί, Καρλ! Ο Μπενγκ κουλαντίνελα-τουτ!” Σακιντιντός, βακερντόμ: “Να τθεράβα τίποτα, πφραλ Ρόδερφορντ”. Αλλά βοβ τζανέλας πο λατσσές, οτθάρ βακερντάς πάλι: “Εντάξει, τθερ όμως τούι τι γκοντί. Ο Μπενγκ κουλαντίνελα-τουτ”. Καζόμ δίκιος τθερέλας! Κάνα ασταράσα χολί εκχέ πφραλέσκε, ντα ατζέ πο μπουτ επειδή βακερντάς κάτι σο τθερέλας ο δικαίωμας τι βακερέλ . . . να αρακχαβάσα-αμέν ντα μουκχάσα αμαρό νεαυτός κο παγίδες κι Μπενγκέσκε». * (Εφεσ. 4:​25-27) Ο πφραλ Κλάιν ασουντάς ι συμβουλή σο ντινάς-λες ο πφραλ Ρόδερφορντ, ντα βον ο ντούι ατσσιλέ λατσσέ αμαλά.

12. Σαρ βοηθίνελα-αμέν η ταπεινότητα τι ασουνάς συμβουλή; (Ψαλμός 141:5)

¹² Σο κα βοηθίνελ-αμέν τι ασουνάς συμβουλή; Πρέπει τι αβάς ταπεινοί ντα τι ντας-αμέν γκοντί καζόμ ατελείς ισινάμ ντα καζόμ ντινιλικανέ πράγματα μπορεί τι κεράσα μπάζιμα. Σαρ ντικχλάμ, ο Ιώβ τθερέλας λάθος άποψη. Σοράν όμως, αλλαντάς οντουλά σο σκεφτίνελας ντα ο Ιεχωβά ευλογιντάς-λες ανταλέσκε. Σόσκε; Σόσκε ο Ιώβ ισινέ ταπεινός. Σικαντάς πι ταπεινότητα κάνα ασουντάς ι συμβουλή σο ντινάς-λες ο Ελιού, παρόλο σο ο Ελιού ισινέ μπουτ πο τερνό λέσταρ. (Ιώβ 32:6, 7) Η ταπεινότητα κα βοηθίνελ αμέν-ντα τι κεράς ο συμβουλές σο λάσα, ατζέ-ντα κάνα πακιάσα ότι να κερντάμ κάτι για τι ντιντιόλ-αμέν συμβουλή ή κάνα οντουβά σο ντέλα-αμέν ι συμβουλή ισί πο τερνό αμένταρ. Εκ πρεσβύτερος κο Καναδάς βακερέλα: «Αμέν να ντικχάσα αμαρό νεαυτός σαρ ντικχένα-λες ο γιαβερά, οτθάρ σαρ κα αβάς πο λατσσέ άμα καέκ να ντινάς-αμέν συμβουλή;» Σαρέ χρειαζίντιβελα τι σικαβάς πο μπουτ αμαρέ ζωγιάτε ο καρπός ι πνευμάσκο ντα τι αβάς πο λατσσέ κο έργος.​—Διαβάνεν Ψαλμός 141:5.

13. Σαρ πρέπει τι ντικχάς ο συμβουλές σο λάσα;

¹³ Ντικχέν ότι η συμβουλή σικαβέλα καζόμ μανγκέλα-τουμέν ο Ντεβέλ. Ο Ιεχωβά μανγκέλα ο πο λατσσό αμένγκε. (Παρ. 4:​20-22) Κάνα ντέλα-αμέν συμβουλή αντράλ πι Λαφίσταρ, αντράλ κατά έντυπα ή εκχέ τζενέσταρ σο τθερέλα ζουρανί πίστη, σικαβέλα αμένγκε καζόμ μανγκέλα-αμέν. Ο εδάφια Εβραίους 12:9, 10 βακερένα ότι «διορθώνελα-αμέν αμαρέ λατσσιμάσκε».

14. Καλέ πραγμάστε πρέπει τι τσσουβάς σημασία κάνα λάσα εκ συμβουλή;

¹⁴ Τσσουβέν σημασία κι συμβουλή, ντα όχι κο τρόπος σο ντιντιόλα. Ισί φαρ σο αμντίνασα ότι εκ συμβουλή να ντιντιλί-αμέν ι πο λατσσέ τροπόσαρ. Σίγουρα, σαρέ οντουλά σο ντένα συμβουλή πρέπει τι κερέν ο πο λατσσό για μα τι  αβέλ πφαρό ι γιαβερέ τζενέσκε τι ντελ καν. * (Γαλ. 6:1) Αλλά κάνα αμέν λάσα συμβουλή ισί λατσσό τι τσσουβάς σημασία λάτε, ατζέ-ντα άμα πακιάσα ότι κα μπορίνελας τι ντιντιόλ πο λατσσέ τροπόσαρ. Κα αβέλας λατσσό τι πουτσάς: “Ατζέ-ντα άμα να μπεϊντίναβα ο τρόπος σο ντιντιλί-μαν η συμβουλή, ισί κάτι σο μπορίναβα τι σικλιάβ λάταρ; Μπορίναβα μα τι τσσουβάβ σημασία κο λάθη κι τζενέσκε σο ντινάς ι συμβουλή ντα τι βοηθίντιβαβ κατά συμβουλή σο ντινάς-μαν;” Κα αβάς γκοντιαβέρ άμα αρακχάσα τρόπος τι βοηθίντιβας σαρέ κατά συμβουλές σο λάσα.​—Παρ. 15:31.

15. Σόσκε πρέπει τι μανγκάς συμβουλή κατά γιαβερά;

¹⁵ Η Γραφή βακερέλα αμένγκε τι μανγκάς συμβουλή. Ο εδάφιος Παροιμίες 13:​10 βακερέλα: «Η σοφία ισί οντουλέντζαρ σο μανγκένα συμβουλή ο εκ κατά γιαβέρ». Καζόμ μπαγιά ισί ανταβά! Οντουλά σο μανγκένα συμβουλή αντίς τι μπεκλεντίνεν τι αβέλ λένγκε ο γιαβέρ τζενό, μπουτ φαρ ισί πο γκοντιαβέρ οντουλένταρ σο να μανγκένα συμβουλή. Οτθάρ, μα μπεσέν κατά γιαβερά τι αβέν τι ντεν-τουμέν συμβουλή βον. Τζαν τουμέν τι μανγκέν-λα λένταρ.

16. Καλέ περιπτωσιέντε κα μπορίναας τι μανγκάς συμβουλή;

¹⁶ Κάνα κα μπορίναας τι μανγκάς συμβουλή αμαρέ πφραλένταρ ντα πφενίνταρ; Ντικχέν ακαλά περιπτώσεις. (1) Εκ πφεν βακερέλα γιαβερένγκε σο τζανένα τι σικλιαρέν πο λατσσές λάταρ τι αβέν λάσαρ εκχέ μελετιάτε ντα σοράν μανγκέλα λένταρ συμβουλές για τι σικλιαρέλ βόι-ντα πο λατσσές. (2) Εκ μπίπαντριμε πφεν μανγκέλα τι κινέλ εκ παντελόνι, οτθάρ μανγκέλα εκχέ γκοντιαβέρ πφενιάταρ τι βακερέλ λάκε μπαγιά σαρ ντικχέλα οντουβά σο τραμπιντάς. (3) Εκ πφραλ κα κερέλ πι πρώτη δημόσια ομιλία. Μανγκέλα εκχέ πφραλέσταρ σο κερέλα μπρεσά ομιλίες τι ασουνέλ λέσκι ομιλία λατσσές ντα τι ντελ-λες συμβουλές για τι αβέλ πο λατσσό. Ατζέ-ντα εκ πφραλ σο κερέλα ομιλίες μπουτ μπρεσά κα αβέλας λατσσό τι μανγκέλ ασακέ συμβουλές γιαβερέ πφραλένταρ, σο βον-ντα κερένα ομιλίες μπουτ μπρεσά, ντα σοράν τι κερέλ ο συμβουλές σο κα λελ.

17. Σαρ κα ντικχάς λατσσιπέ κατά συμβουλές σο λάσα;

¹⁷ Κο ντιβεσά ντα κο μασεκά σο κα αβέν, σαρέ κα λας συμβουλή, είτε εκχέ τζενέσταρ είτε αντράλ κατά Γραφή ντα κατά έντυπα. Κάνα κα αβέλ-πες ανταβά, ντεν-τουμέν γκοντί οντουλά σο σικλιλάμ ανταλέ μαθημάστε. Ατσσόν ταπεινοί. Τσσουβέν σημασία κι συμβουλή, όχι κο τρόπος σο κα ντιντιόλ. Ντα κερέν ο συμβουλές σο κα λεν. Καέκ αμένταρ να μπιάντιβελα γκοντιαβέρ. Αλλά άμα “ασουνάσα συμβουλή ντα μανγκάσα ι διόρθωση”, ο Λάφι ι Ντεβλέσκο βακερέλα ότι κα “αβάς γκοντιαβέρ”.​—Παρ. 19:20.