1, 2. (α) Σόσκε μπουτ τζενέ αντιβές δυσκολίντιβενα τι ντεν μπέσα οντουλένγκε σο τθερένα εξουσία; (β) Σο κα ντικχάς ανταλέ μαθημάστε;

 ΜΠΟΥΤ τζενέ αντιβές δυσκολίντιβενα τι ντεν μπέσα εκχέ τζενέσκε σο τθερέλα εξουσία, κον-ντα τι αβέλ ανταβά. Οντουλά τζενέ ντικχλέ ότι ο νόμοι ντα ο κυβερνήσεις μπουτ φαρ αρακχαβένα ι χουλανέν ντα οντουλέν σο τθερένα ζορ πουμαρέ βαστέντε ντα να σικαβένα δικαιοσύνη κο τσορορέ. Άκ’ σόσκε η Γραφή βακερέλα: «Ο τζενέ ανένα προβλήματα κο γιαβερά επειδή κυβερνίνενα-λεν». (Εκκλ. 8:9) Μερικά παπάζια κερένα γκεραλέ πράγματα. Ιτιρί ανταλέσταρ, ισί τζενέ σο τσσιναντέ τι ντεν μπέσα κο Ντεβέλ. Οτθάρ, κάνα εκ τζενό μανγκέλα τι σικλιαράς-λες κατά Γραφή, πρέπει τι βοηθίνας-λες τι ντελ μπέσα εμ κο Ιεχωβά εμ κο τζενέ σο τραμπιντάς ο Ντεβέλ για τι κερέν κουμάντος λέσκε λαός ατθέ κι πφουβ.

² Όμως, να χρειαζίντιβελα τι σικλιόν τι ντεν μπέσα κο Ιεχωβά ντα κι οργάνωση λέσκι σάντε οντουλά σο ακανά σικλιόνα κατά Γραφή. Ατζέ-ντα άμα ισινάμ μπουτ μπρεσά κι αλήθεια δεν πρέπει τι μπιστράς ποτές ότι ο τρόπος σο κερέλα ο Ιεχωβά ο πράγματα ισί πάντα ο πο λατσσό. Μπάζιμα, αβένα-πες πράγματα σο μπέκιμ να κα αβέλ εύκολος τι ντας μπέσα κο Ιεχωβά. Ανταλέ μαθημάστε, κα ντικχάς τριν ανταλέ πραγματένταρ: (1) κάνα διαβάνασα μερικές ιστορίες κατά Γραφή, (2) κάνα η οργάνωση ι Ιεχωβάσκι βακερέλα αμένγκε σο τι κεράς ντα (3) κάνα κα νακχάς δυσκολίες κο ντιβεσά σο κα αβέν.

3. Σόσκε κα μπορίνελας μα τι αβέλ εύκολος τι ντας μπέσα κο Ιεχωβά κάνα διαβάνασα μερικές ιστορίες ι Γραφιάκε;

 ³ Καζόμ διαβάνασα ο Λάφι ι Ντεβλέσκο, μπέκιμ πουτσάσα σόσκε ο Ιεχωβά κερντάς συγκεκριμέ πράγματα μερικέ τζενένγκε ντα σόσκε λιντάς μερικές αποφάσεις. Για παράδειγμας, κο βιβλίος Αριθμοί, διαβάνασα ότι ο Ιεχωβά βακερντάς τι μουνταρέν εκχέ Ισραηλιτής σόσκε γκίντελας καστά κο Σάββατος. Κο βιβλίος 2 Σαμουήλ, σικλιάσα ότι, μπουτ μπρεσά πο σοράν, ο Ιεχωβά συγχωριντάς ι Δαβιδίς σο λιντάς εκχέ γιαβερέσκε ρομνιά ντα μουνταρντάς. (Αριθ. 15:​32, 35· 2 Σαμ. 12:9, 13) Μπέκιμ πουτσάσα: “Σόσκε ο Ιεχωβά συγχωριντάς ι Δαβιδίς σο μουνταρντάς ντα λιντάς εκχέ γιαβερέσκε ρομνιά αλλά βακερντάς τι μερέλ οντουβά Ισραηλίτης εκχέ αμαρτιάκε σο ντικχίντιβελα πο χουρντί;” Για τι απαντίνας ανταλέ ερωτησιάτε, κα ντικχάς τριν πράγματα σο ισί λατσσό τι τθεράς αμαρέ γκοντιάτε καζόμ διαβάνασα ι Γραφή.

4. Σαρ μπαριαρένα αμαρί μπέσα κο αποφάσεις κι Ιεχωβάσκε ο εδάφια Γένεση 18:​20, 21 ντα Δευτερονόμιο 10:17;

⁴ Η Γραφή να βακερέλα αμένγκε πάντα σαρέ οντουλά σο τθερένα τι κερέν εκχέ ιστοριάσαρ. Για παράδειγμας, τζανάσα ότι ο Δαβίδ μετανιωσάλο μπαγιά οντουλένγκε σο κερντάς. (Ψαλμ. 51:​2-4) Αλλά οντουβά μουρς, σο να κερντάς ο νόμος ι Σαββατόσκο, σο τζενό ισινέ; Πφανγκιλό λέσκο γκι οντουλέσκε σο κερντάς; Μήπως γιαβερά-ντα φαρ να ντινάας καν κο Ιεχωβά; Μήπως ντινέας-λες τεμπί γιαβερά-ντα φαρ αλλά βοβ να τσσουντάς σημασία ή ατζέ-ντα να μανγκλάς ιτς τι ασουνέλ; Η Γραφή να βακερέλα. Όμως, μπορίνασα τι αβάς σίγουροι ακαλέσκε: “Νανέ αδικία οπράλ κο Ιεχωβά”. (Δευτ. 32:4) Μπουτ φαρ, ο τζενέ νικαβένα γκεραλέ αποφάσεις σόσκε ασουνένα λάφια σο πφιρντιλέ, λάθος απόψεις σο τθερένα ο τζενέ γιαβερένγκε ή γιαβερά πράγματα. Αλλά ο Ιεχωβά νανέ σαρ ο τζενέ. Κάνα λέλα εκ απόφαση, ντικχέλα σαρέ ο πράγματα σο τθερένα τι κερέν λάσαρ. (Διαβάνεν Γένεση 18:​20, 21· Δευτερονόμιο 10:​17) Καζόμ πο μπουτ σικλιάσα ι Ιεχωβάς ντα λέσκε κανόνες αζόμ πο μπουτ κα μπαριαράς αμαρί μπέσα κο αποφάσεις σο λέλα. Ατζέ-ντα άμα τθεράσα ερωτήσεις εκχέ ιστοριάκε σο ισί κι Γραφή σο ναστί απαντίνασα-λεν ακανά, οντουλά σο τζανάσα αμαρέ Ντεβλέσκε ερεσένα για τι αβάς σίγουροι ότι «ισί δίκαιος σαρέ πι ντρομέντε».​—Ψαλμ. 145:17.

5. Σαρ αμαρί ατέλεια να μουκχέλα-αμέν τι ντικχάς σο ισί μπαγιά δικαιοσύνη; (Ντικχέν ο πλαίσιος-ντα « Η Ατέλεια να Μουκχέλα-αμέν τι Ντικχάς σο ισί Μπαγιά Δικαιοσύνη»)

 ⁵ Αμαρί ατέλεια να μουκχέλα-αμέν τι ντικχάς σο ισί μπαγιά δικαιοσύνη. Ο Ντεβέλ κερντάς-αμέν τι μοιάζας λέστε, οτθάρ μανγκάσα μπουτ τι ντικχάς τι σικάντιβελ δικαιοσύνη κο τζενέ. (Γέν. 1:​26) Αλλά αμαρί ατέλεια μπέκιμ τι κερέλ-αμέν τι νικαβάς λάθος συμπεράσματα, ατζέ-ντα άμα αμντίνασα ότι τζανάσα σο-ντα μανγκλιόλα-πες. Ντεν-τουμέν γκοντί, για παράδειγμας, καζόμ μπέτι αβιλό ι Ιωνάσκε κάνα ο Ιεχωβά βακερντάς ότι κα τζιτζίνελας ι Νινευιτένγκε. (Ιωνάς 3:​10–4:1) Αλλά σκεφτίνεν σο αβιλό-πες. Σωσάλε πο μπουτ από 120.000 Νινευίτες σο μετανιωσάλε! Οντουβά σο μανγκέλας διόρθωση ισινέ ο Ιωνάς, όχι ο Ιεχωβά.

6. Σόσκε νανέ υποχρεωμέ ο Ιεχωβά τι ντελ-αμέν λογαριασμός οντουλένγκε σο κερέλα;

⁶ Ο Ιεχωβά νανέ υποχρεωμέ τι βακερέλ κο τζενέ σόσκε τραμπίνελα τι κερέλ εκ σέι. Ισί μπαγιά ότι κο πουρανέ μπρεσά μουκχλάας πι υπηρετόν τι βακερέν σαρ ντικχένας ο αποφάσεις σο λιντάας ή τθερέλας πι γκοντιάτε τι λελ. (Γέν. 18:​25· Ιωνάς 4:2, 3) Ντα ισινέ φαρ σο ντέλας-λεν τι αγαβέν σόσκε λιντάας εκ απόφαση. (Ιωνάς 4:​10, 11) Όμως, ο Ιεχωβά νανέ υποχρεωμέ τι βακερέλ αμένγκε σόσκε κερέλα οντουλά σο κερέλα. Βοβ κερντάς-αμέν, οτθάρ να τθερέλα ανάγκη τι πουτσέλ-αμέν οντουλένγκε σο κερντάς ή οντουλένγκε σο τθερέλα πι γκοντιάτε τι κερέλ.​—Ησ. 40:​13, 14· 55:9.

7. Καγιά δυσκολία μπέκιμ τθεράσα, ντα σόσκε;

⁷ Σίγουρα, πακιάσα σαρέ αμαρέ γκίσαρ ότι ο Ιεχωβά κερέλα πάντα ο σωστός. Αλλά μπέκιμ δυσκολίντιβασα τι ντας μπέσα ι τζενένγκε σο τραμπιντάς ο Ντεβέλ τι κερέν κουμάντος λέσκε λαός. Μπέκιμ να ισινάμ σίγουροι άμα οντουλά τζενέ κερένα οντουβά σο βακερέλα λένγκε ο Ιεχωβά ντα όχι οντουβά σο μανγκένα βον. Τζενέ κο πουρανέ-ντα μπρεσά κα μπορίνενας μα τι αβέν σίγουροι ανταλέσκε. Ντεν-τουμέν γκοντί ο παραδείγματα σο ντικχλάμ κι  παράγραφος 3. Εκ Ισραηλίτης σο ισινέ τζενέ οντουλέ μουρσέσαρ σο να κερντάς ο νόμος ι Σαββατόσκο κα μπορίνελας μα τι αβέλας σίγουρος άμα ο Μωυσής μπαγιά πουτσλάας ι Ιεχωβάς πριν τι βακερέλ τι μουνταρέν οντουλέ μουρσές. Ντα κάνα η ρομνί ι Ουριάσκι ι Χετταιόσκι γκιλί ι Δαβιδίσαρ, εκ αμάλ ι Ουριάσκο κα μπορίνελας τι βακερέλ ότι ο Δαβίδ γλιτωντάς ο μεριπέ σο έπρεπε τι λελ σόσκε σαρ βασιλιάς τθερέλας ζορ πι βαστέντε. Για τι βακεράς-λες χάνικ λαφίντζαρ, ναστί βακεράσα ότι ντάσα μπέσα κο Ιεχωβά άμα να ντάσα μπέσα κο τζενέ σο βοβ τσσουντάς τι κερέν κουμάντος λέσκε λαός ατθέ κι πφουβ​—κο τζενέ σο ο Ιεχωβά-ντα ντέλα μπέσα.

8. Σαρ μοιάζελα οντουβά σο βακέρντιβελα κο εδάφια Πράξεις 16:4, 5 οντουλέντζαρ σο κερέλα η Χριστιανική κχανγκιρί αντιβές;

⁸ Αντιβές, ο Ιεχωβά σικαβέλα πι υπηρετόνγκε ατθέ κι πφουβ σο τι κερέν αντράλ κατά «πιστός ντα φρόνιμος δούλος». (Ματθ. 24:​45) Σαρ ο κυβερνών σώμας ι πρώτε Χριστιανόνγκο, αντικάς ανταβά δούλος-ντα ντικχέλα ι Ντεβλέσκε λαός σαρί κι πφουβ ντα σικαβέλα ι πρεσβυτερόνγκε σο τι κερέν. (Διαβάνεν Πράξεις 16:4, 5) Σοράν, ο πρεσβύτεροι κερένα αντρέ κι κχανγκιρί οντουλά σο βακέρντιβενα λένγκε. Αμέν σικαβάσα ότι ντάσα μπέσα οντουλένγκε σο κερέλα ο Ιεχωβά κάνα ντάσα καν κο λάφια σο βακερέλα η οργάνωση ντα ο πρεσβύτεροι.

9. Κάνα μπέκιμ δυσκολίντιβασα τι κεράς οντουβά σο βακερένα ο πρεσβύτεροι, ντα σόσκε;

⁹ Μπάζιμα, μπορεί τι δυσκολίντιβασα τι κεράς οντουλά σο βακερένα αμένγκε ο πρεσβύτεροι. Για παράδειγμας, ο τελευταία μπρεσά, μπουτ κχανγκιριά αβιλέ γιεκ γιαβερέντζαρ ντα οτθάρ μερικά κχανγκιριά γκιλέ γιαβερέ περιοχιάτε. Ισινέ φαρ σο ο πρεσβύτεροι μανγκλέ κατά πφραλά τι τζαν εκχέ γιαβερέ κχανγκιριάτε  για τι αβέν πο πφερντέ ο Αίθουσες Βασιλείας. Άμα μανγκλέ αμένταρ τι τζας εκχέ νεβέ κχανγκιριάτε, μπέκιμ τι αβέλ πφαρό αμένγκε τι μουκχάς αμαρέ αμαλέν ντα αμαρέ τζενέν. Μήπως ο Ντεβέλ βακερέλα κο πρεσβύτεροι κατέ τι μπουτσσαβέν ι κάθε πφραλές; Νάα. Ντα ανταβά μπέκιμ δυσκολίνελα-αμέν τι κεράς σο βακερένα αμένγκε. Αλλά ο Ιεχωβά ντέλα μπέσα ι πρεσβυτερόνγκε για τι λεν ασακέ αποφάσεις, ντα πρέπει αμέν-ντα τι ντας λένγκε μπέσα. *

10. Σόσκε πρέπει τι κεράς οντουβά σο βακερένα αμένγκε ο πρεσβύτεροι σαρ σικαβέλα ο εδάφιος Εβραίους 13:17;

¹⁰ Σόσκε πρέπει τι κεράς οντουβά σο βακερένα αμένγκε ο πρεσβύτεροι ατζέ-ντα άμα να μπεϊντίνασα-λες; Σόσκε αντικάς βοηθίνασα τι ατσσόλ γιεκ ο λαός ι Ντεβλέσκο. (Εφεσ. 4:2, 3) Ο κχανγκιριά τζάνα λατσσές κάνα σαρέ ισί ταπεινοί ντα κερένα οντουλά σο βακερένα ο πρεσβύτεροι. (Διαβάνεν Εβραίους 13:​17) Ντα ο πο σημαντικός ισί ότι κάνα κεράσα οντουβά σο βακερένα αμένγκε ο τζενέ σο ο Ιεχωβά ντέλα λένγκε μπέσα, αζομάν σικαβάσα ότι ντάσα μπέσα λέσκε-ντα.​—Πράξ. 20:28.

11. Σο κα βοηθίνελ-αμέν τι μπαριαράς αμαρί μπέσα οντουλέντε σο βακερένα αμένγκε ο πρεσβύτεροι τι κεράς;

¹¹ Κα μπαριαράς αμαρί μπέσα οντουλέντε σο βακερένα αμένγκε ο πρεσβύτεροι τι κεράς άμα ντάσα-αμέν γκοντί ότι βον μανγκένα άγιος πνεύμας κατά Ντεβέλ κάνα κερένα λάφι πραγματένγκε σο τθερένα τι κερέν ι κχανγκιριάσαρ. Ρόντενα μπουτ λατσσές ο αρχές ι Γραφιάκε ντα ντικχένα ο οδηγίες σο ντέλα η οργάνωση ι Ιεχωβάσκι. Μανγκένα σαρέ πουμαρέ γκίσαρ τι κερέν ι Ιεχωβάσκο γκι ντα τι αρακχαβέν λέσκε λαός καζόμ πο λατσσές αβέλα-πες. Ανταλά πιστά μουρσά τζανένα ότι κα ντεν λογαριασμός κο Ντεβέλ οντουλένγκε σο κερένα λέσκε λαόστε. (1 Πέτρ. 5:2, 3) Σκεφτίνεν ακαβά: Εκχέ ντουνιάστε σο ισί τρουγιμέ ιτιρί κατά φυλές, κατά θρησκεία ντα κατά πολιτικά, οντουλά σο ισί κο λαός κι Ιεχωβάσκο ισί σαρέ γιεκ ντα ντένα λατρεία σάντε κο αληθινός Ντεβέλ. Ανταβά ναστί κα αβέλας-πες άμα ο Ιεχωβά να ευλογίνελας πι οργάνωση!

12. Καλά πράγματα πρέπει τι ντικχέν ο πρεσβύτεροι για τι αγαβέν άμα εκ τζενό μετανιωσάλο;

¹² Ο Ιεχωβά ντινάς κο πρεσβύτεροι ι μπουτ μπαρί ευθύνη τι ατσσικιαρέν ι κχανγκιρί πάκι. Άμα εκ Χριστιανός κερντάς εκ μπαρί αμαρτία, ο Ιεχωβά μανγκέλα κατά πρεσβύτεροι τι ντικχέν άμα αβέλα-πες οντουβά τζενό τι ατσσόλ κι κχανγκιρί. Εκ κατά πράγματα σο μανγκένα τι αγαβέν ισί άμα μπαγιά πφανγκιλό ι τζενέσκο γκι οντουλέσκε σο κερντάς. Μπέκιμ βακερέλα ότι μετανιωσάλο, αλλά μισίνελα μπαγιά οντουβά σο κερντάς; Μανγκέλα σαρέ πι γκίσαρ μα τι κερέλ πάλι οντιά αμαρτία; Άμα ο γκεραλέ αμαλά γκερντέ-λες κι αμαρτία, μανγκέλα τι τσσιναβέλ οντουλέ αμαλένταρ; Κάνα ο πρεσβύτεροι ντικχένα οντουλά σο αβιλέ-πες, κερένα προσευχή, ρόντενα αντρέ κι Γραφή ντα μανγκένα τι αγαβέν σαρ ντικχέλα ο τζενό πι αμαρτία. Σοράν, ο πρεσβύτεροι ντικχένα άμα ο τζενό αβέλα-πες τι ατσσόλ κι κχανγκιρί. Ισί φαρ σο πρέπει τι χαλ αποκοπή.​—1 Κορ. 5:​11-13.

13. Σο μπορεί τι χάλα-αμέν άμα εκ αμάλ αμαρό ή εκ αμαρέ τζενένταρ χαλάς αποκοπή;

¹³ Κάνα μπορεί τι αβέλ αμένγκε πφαρό τι ντας καν κο πρεσβύτεροι; Άμα ο τζενό σο χαλάς αποκοπή νανέ λατσσό αμάλ αμαρό ή να ισινάμ τζενέ λέσαρ, μπέκιμ μα τι αβέλ αμένγκε πφαρί η απόφαση ι πρεσβυτερόνγκι. Αλλά βακερέν ότι ο τζενό σο χαλάς αποκοπή ισί αμαρό αμάλ. Μπέκιμ χάλα-αμέν οντουβά σο αβιλό-πες ντα πουτσάσα άμα ο πρεσβύτεροι ροντιντέ σαρέ ο πράγματα ή άμα η απόφαση σο λιντέ ισινέ οντιά σο κα λέλας ο Ιεχωβά. Σο κα βοηθίνελ-αμέν τι ντικχάς ι απόφαση αντικάς σαρ μανγκέλα ο Ιεχωβά;

14. Σο κα βοηθίνελ-αμέν άμα ο πρεσβύτεροι αποφασιντέ τι χαλ αποκοπή εκ αμαρέ αμαλένταρ ή εκ αμαρέ τζενένταρ;

 ¹⁴ Ισί λατσσό τι ντας-αμέν γκοντί ότι ο Ιεχωβά ισί οντουβά σο βακερντάς τι χαν αποκοπή οντουλά σο να μετανιώνενα ντα ότι η αποκοπή κερέλα λατσσιπέ κι κχανγκιρί, ντα μπέκιμ τι κερέλ λατσσιπέ κο τζενό-ντα σο αμαρτιντάς. Άμα κα μουκχάας εκχέ τζενές σο να μετανιωσάλο τι ατσσόλ κι κχανγκιρί, οντουβά τζενό μπορεί τι κερέλ ζιάνι. (Γαλ. 5:9) Ντα μπορεί μα τι αγαβέλ καζόμ μπαρί ισινέ λέσκι αμαρτία ντα μα τι μανγκέλ μπουτ τι αλλάνελ οντουλά σο τθερέλα πι γκοντιάτε ντα οντουλά σο κερέλα για τι αβέλ πάλι αμάλ ι Ιεχωβάσκο. (Εκκλ. 8:​11) Μπορίνασα τι αβάς σίγουροι ότι ο πρεσβύτεροι αγαβένα καζόμ μπαρί ευθύνη τθερένα κάνα αποφασίνενα άμα εκ τζενό πρέπει τι χαλ αποκοπή. Βον τζανένα ότι σαρ ο κριτές κο πουρανό Ισραήλ, «να κρίνενα εκχέ τζενέσκε, αλλά ι Ιεχωβάσκε».​—2 Χρον. 19:6, 7.

15. Σόσκε πρέπει ακανά τι ντας μπέσα οντουλέντε σο βακερέλα αμένγκε ο Ιεχωβά τι κεράς πο μπουτ σαρέ κατά γιαβερά μπρεσά;

¹⁵ Καζόμ ερεσέλα ο τέλος ανταλέ ντουνιάσκο, πρέπει τι ντας μπέσα οντουλέντε σο κερέλα ο Ιεχωβά πο μπουτ σαρέ κατά γιαβερά μπρεσά. Σόσκε; Κι μπαρί στεναχώρια, μπέκιμ τι βακέρντιβελ αμένγκε τι κεράς πράγματα σο να αγαβάσα-λεν, σο πακιάσα ότι ναστί αβένα-πες ή ότι νανέ γκοντιαβέρ. Σίγουρα, ο Ιεχωβά να κα κερέλ λάφι κο κάθε εκ αμένταρ. Μπεκλεντίνασα ότι κα βακερέλ αμένγκε σο τι κεράς αντράλ οντουλέ τζενένταρ σο τραμπιντάς για τι κερέν κουμάντος λέσκε λαός. Αζομάν να κα αβέλ βακίτι μα τι αβάς σίγουροι ι λαφίνγκε σο βακέρντιβενα αμένγκε. Ντα να κα αβέλ βακίτι τι πουτσάς: “Αβένα μπαγιά ανταλά λάφια κατά Ιεχωβά ή μπέκιμ ο πφραλά βακερένα αμένγκε σο τθερένα βον πουμαρέ γκοντιάτε;” Σο κα κερέν τουμέν οντουλέ μπουτ σημαντικέ βακιτίστε; Η απάντηση μπέκιμ τι ντικχίντιβελ οντουλένταρ σο κερένα ακανά. Άμα ντένα μπέσα κο λάφια σο βακέρντιβενα αμένγκε αντιβές τι κεράς ντα ντένα καν αντράλ τουμαρέ γκίσταρ, ισί πο σίγουρος ότι κα κερέν ο ίδιος κι μπαρί στεναχώρια.​—Λουκ. 16:10.

16. Σόσκε μπέκιμ τι αβέλ πφαρό τι ντας μπέσα κο αποφάσεις κι Ιεχωβάσκε κο ντιβεσά σο κα αβέν;

¹⁶ Ισί λατσσό τι σκεφτίνας κάτι γιαβέρ-ντα σο τθερέλα τι κερέλ ανταλέσαρ: ο αποφάσεις σο κα λελ ο Ιεχωβά κο τέλος ανταλέ ντουνιάσκο. Ακανά, μπεκλεντίνασα ότι μπουτ τζενέ σο να υπηρετίνενα ι Ιεχωβάς, ντα αντρέ ανταλέντε εμ αμαρέ τζενέ, κα σικλιόν λέσκε καζόμ ισί ατζέ βακίτι. Αλλά κο Αρμαγεδδώνας, ο Ιεχωβά αντράλ κατά Ιησούς, κα αποφασίνελ σο κα αβέλ-πες λέντζαρ. (Ματθ. 25:​31-33· 2 Θεσ. 1:​7-9) Να κα αβέλ αμαρέ βαστέντε τι αποφασίνας κάσκε κα τζιτζίνελ ο Ιεχωβά ντα κάσκε να κα  τζιτζίνελ. (Ματθ. 25:​34, 41, 46) Κα ντας μπέσα κο αποφάσεις κι Ιεχωβάσκε ή κα κερέν-αμέν τι περάς; Αγαβάσα μπουτ λατσσές ότι πρέπει τι μπαριαράς αμαρί μπέσα κο Ιεχωβά ακανά για τι μπορίνας τι ντας λέσκε μπέσα σαρέ αμαρέ γκίσαρ κο ντιβεσά σο κα αβέν.

17. Σο λατσσίματα κα ανέν αμένγκε ο αποφάσεις ι Ιεχωβάσκε σοράν κατά τέλος ανταλέ ντουνιάσκο;

¹⁷ Ανέν τουμαρέ γκοντιάτε σο σουκάρ κα αβέλ κο νεβό ντουνιάς κι Ντεβλέσκο κάνα κα ντικχάς ο λατσσέ πράγματα σο αβιλέ κατά αποφάσεις ι Ιεχωβάσκε. Η ψεύτικη θρησκεία να κα αβέλ ούτε ι μπίτσαλε γιακχάκο ντουνιάς ντα ο κυβερνήσεις σο ζορισκιαρένα ι τζενέν ντα αντέ λένγκε μπουτ ντουκχ σαρέ ανταλά μπρεσά. Να κα αβέν νασφαλίματα, πφουρίματα, ντα να κα μερέν αμαρέ αγαπημέ τζενέ. Ο Μπενγκ ντα λέσκε δαίμονες κα πφαντιόν χίλια μπρεσά. Ο μπέτι πράγματα σο αβιλέ επειδή γκιλέ κόντρα κο Ντεβέλ κα χασάρντιβεν. (Αποκ. 20:2, 3) Αζομάν, κα αβάς πφερντέ εκτίμηση σο ντινάμ μπέσα οντουλέντε σο κερέλα ο Ιεχωβά!

18. Σο σικλιάσα κατά παράδειγμας ι Ισραηλιτένγκο σο ισί γραμμέ κο εδάφια Αριθμοί 11:​4-6 ντα 21:5;

¹⁸ Κα μπορίνελας κο νεβό ντουνιάς κι Ντεβλέσκο τι αβέν-πες πράγματα σο να κα αβέλ εύκολος τι ντας μπέσα οντουλέντε σο κερέλα ο Ιεχωβά; Ανέν τουμαρέ γκοντιάτε σο αβιλό-πες κάνα ο Ισραηλίτες ελευθερωσάλε κατά σκλαβιά κι Αίγυπτος. Χάνικ πο σοράν αρχισάλε τι γκρινιάνεν σόσκε να τθερένας ο λατσσέ χαμπίματα σο χάνας οτθέ ντα βακερένας ότι ο μάννα σο ντέλας-λεν ο Ιεχωβά ισινέ τζουνγκαλό μαντρό. (Διαβάνεν Αριθμοί 11:​4-6· 21:5) Κα μπορίναας αμέν-ντα τι σκεφτίνας αντικάς σοράν κατά μπαρί στεναχώρια; Να τζανάσα καζόμ μπουτί κα κεράς για τι αβέλ πάκι η πφουβ κατά καταστροφή ντα σοράν χάνικ χάνικ τι αβέλ παράδεισος. Ντικχίντιβελα ότι κα τθεράς μπουτ μπουτί τι κεράς, ντα ο πράγματα μπέκιμ μα τι αβέν εύκολα κι αρχή. Κα γκρινιάνας ι πραγματένγκε σο κα ντελ-αμέν ο Ιεχωβά αζομάν; Εκ πράγμας ισί σίγουρος: Καζόμ πο μπουτ εκτιμίνασα οντουλά σο ντέλα-αμέν ο Ιεχωβά ακανά, αζόμ πο σίγουρος κα αβέλ ότι κα εκτιμίνας-λεν αζομάν-ντα.

19. Σαρ κα βακερένας χάνικ λαφίντζαρ ο σημαντικά σημεία ανταλέ μαθημάσκε;

¹⁹ Οντουλά σο κερέλα ο Ιεχωβά ισί πάντα σωστά. Πρέπει τι αβάς σίγουροι ανταλέσκε. Ντα πρέπει τι ντας μπέσα οντουλένγκε σο ο Ιεχωβά ντέλα μπέσα ντα κερένα σο βακερέλα. Μα μπιστρέν ποτές ο λάφια σο βακερντάς ο Ιεχωβά αντράλ πι προφητίσταρ κατά Ησαΐας: «Ατσσόν ήρεμοι ντα σικαβέν εμπιστοσύνη​—ανταβά κα αβέλ τουμαρί ζορ».​—Ησ. 30:15.