Ο ΝΟΜΟΣ μουκχέλας ι Ισραηλιτέν τι ντεν κο Ιεχωβά εμ τρυγόνια εμ περιστέρια. Ανταλά ντούι τσιρικλέ βακέρντιβενας πάντα γιεκ κο νόμοι σο τθερένας τι κερέν ι θυσιέντζαρ, ντα εκ τζενό μπορίνελας τι ντελ ο εκ άμα να τθερέλας ο γιαβέρ. (Λευιτ. 1:​14· 12:8· 14:​30) Σόσκε ισινέ λατσσό ανταβά; Εκ λόγος ισί ότι ναστί αρακχένας εύκολα ο τρυγόνια σαρό ο μπρες. Σόσκε;

Ο τρυγόνια τζουβντιόνα σαρό κο τθεμ Ισραήλ κο τατέ μασεκά. Κάθε Οκτώβριος, νασένα ντα τζάνα πο τατέ τθεμέντε κο νότος, ντα βουρτίνενα κο Ισραήλ ο βακίτι πριν κατά νιλάι. (Άσμ. Ασμ. 2:​11, 12· Ιερ. 8:7) Οτθάρ, κο πουρανό Ισραήλ ισινέ δύσκολος τι ντεν ο Ισραηλίτες τρυγόνια σαρ θυσία κο βεν.

Οκιά μπάνταρ, ο περιστέρια ο πο μπουτ φαρ να τζάνα γιαβερέ τθεμέντε, οτθάρ ισινέ κο Ισραήλ σαρό ο μπρες. Ντα ο περιστέρια ισινέ σικλέ τι τζουβντιόν πασέ κο τζενέ. (Ντικχέν Ιωάννης 2:​14, 16) Σαρ βακερέλα ο βιβλίος Φυτά και Ζώα της Αγίας Γραφής (Bible Plants and Animals), «σαρέ κο χουρντέ ντα κο μπαρέ γκαβά κι Παλαιστίνη ισινέ ασακέ περιστέρια. Κάθε τζενό τθερέλας πι κχερέστε εκ τθαν ι περιστερίνγκε, ή εκ γούρνα κο ντουβάρι, για τι τζουβντιόν ο τσιρικλέ». ​—Ντικχέν Ησαΐας 60:8.

Ο Ιεχωβά μουκχέλας ι Ισραηλιτέν τι ντεν τσιρικλέν σο μπορίνενας εύκολα τι αρακχέν-λεν σαρό ο μπρες. Αντικάς, σικαβέλας λένγκε καζόμ μπουτ μανγκέλας-λεν ντα ότι να μπεκλεντίνελας λένταρ πράγματα σο ναστί ντένας.