ΚΟ ΠΟΥΡΑΝΟ Ισραήλ, ο τζαμουτρό ή λέσκι φαμιλί ποκινέλας ι μποριάκι φαμιλί για τι αβέλας-πες ο μπιαβ. Ανταβά ποκινιπέ μπέκιμ τι αβέλας πααλίς πραγματέντζαρ, ζωόντζαρ ή λοβέντζαρ. Ισινέ φαρ σο ο τζαμουτρό ποκινέλας ι μπουτιάσαρ σο κερέλας, σαρ ο Ιακώβ σο κερντάς μπουτί ι Ραχηλιάκε νταντέσκε εφτά μπρεσά για τι μπορίνελ τι παντρίνελ λάσαρ. (Γέν. 29:​17, 18, 20) Σόσκε ποκινένας ο Ισραηλίτες για τι λεν εκχέ μποριά;

Η Κάρολ Μάιγερς, εκ σπουδαγμέ τζενί σο ασχολίντιβελα ι Γραφιάσαρ, βακερέλα ότι “σαρ ντικχίντιβελα ι μποριάκι φαμιλί ποκίντιβελας σόσκε κα νασέλας λάταρ η τσσάι σο κερέλας μπουτιά, ντα ανταβά ισινέ μπουτ σημαντικός ι φαμιλίνγκε [σο κερένας μπουτί κο χωράφια]”. Ο ποκινιπέ μπέκιμ τι βοηθίνελας για τι αβένας λατσσέ αμαλά ο χαναμικά. Αντικάς, κα βοηθίνενας ο εκ ι γιαβερές κο δυσκολίες. Ντα κάνα ποκίντιβελας ι μποριάκι φαμιλί, σικάντιβελας ότι λένγκι τσσάι νισανλισάλιας ντα ότι ακανά οντουβά σο αρακχαβέλας-λα να ισινέ λάκο ντατ αλλά λάκο ρομ.

Ανταβά σο κερένας ο Ισραηλίτες να σικαβέλας ότι εκ ρομνί ισινέ σαρ εκ πράγμας σο κιντιόλας ή μπικίντιβελας. Ο βιβλίος Αρχαίος Ισραήλ​—Η Ζωή και οι Θεσμοί Του (Ancient Israel​—Its Life and Institutions) βακερέλα ότι “η υποχρέωση σο τθερένας ο Ισραηλίτες τι ποκινέν ι μποριάκι φαμιλί μπέκιμ τι κερέλ εκχέ τζενές τι αμντίνελ ότι κινένας ντα μπικινένας πουμαρέ τσσαΐν. Αλλά ντικχίντιβελα ότι ανταβά αβέλας-πες, όχι αζόμ μπουτ για τι κινέν ι τσσαγιά, αλλά για τι ποκίντιβελ η φαμιλί σο κα χασαρέλας ι τσσαγιά”.

Αντιβές, μερικέ τθεμέντε, ο τζενέ ατζέκ ατζέκ τθερένα έθιμος τι ποκινέν για τι λεν εκχέ μποριά. Κάνα ο Χριστιανοί νταντά ντα νταγιά μανγκένα κατά τζαμουτρέσκι φαμιλί τι ποκινέλ ι μποριάκε, κερένα ο πο λατσσό για “τι ντικχίντιβελ σαρέ κο τζενέ ότι ισί λογικοί” κάνα να μανγκένα πο μπουτ λοβέ οντουλένταρ σο ισί λογικός τι λεν. (Φιλιπ. 4:5· 1 Κορ. 10:​32, 33) Αντικάς, σικαβένα ότι να “μανγκένα μπουτ ο λοβέ” ντα ότι νανέ μπίτσαλε γιακχάκε. (2 Τιμ. 3:2) Κάνα ο Χριστιανοί να μανγκένα κατά τζαμουτρέσκι φαμιλί τι ντελ μπουτ λοβέ ι τσσαγιάκε, ο τζαμουτρό να κα χρειαζίντιβελ τι καθυστερίνελ ο μπιαβ μέχρι τι νικαβέλ ο λοβέ σο μανγκένα λέσταρ. Ή, άμα ο τζαμουτρό ισί σκαπανέας, να κα σκεφτίνελ ότι πρέπει τι τσσιναβέλ ο σκαπανικός για τι κερέλ μπουτί μπουτ σαάτια ντα αντικάς τι γκίντελ ο λοβέ σο μανγκένα λέσταρ.

Μερικέ τθεμέντε κο ντουνιάς, ισί νόμοι σο βακερένα ανταλέ ποκινιμάσκε. Κο τθεμά σο ισί αντικάς ο πράγματα, ο Χριστιανοί νταντά ντα νταγιά ντένα καν κο νόμοι ανταλά. Σόσκε; Ο Λάφι ι Ντεβλέσκο βακερέλα κο Χριστιανοί «τι ντεν καν οντουλέντε σο τθερένα ι ζορ τι κερέν κουμάντος» ντα τι κερέν ο νόμοι σο να τζάνα κόντρα κο νόμοι κι Ντεβλέσκε.​—Ρωμ. 13:1· Πράξ. 5:29.