Η Μαίρη ντα λάκο ρομ, ο Τζον, a τζουβντιόνα εκχέ τθεμέστε σο αβιλέ μπουτ τζενέ κατά Φιλιππίνες για τι κερέν μπουτί, ντα χαιρίνενα τι κερέν έργος ασακέ τζενέντε. Κο Κορωνοϊός, η Μαίρη να αρχιντάς μελέτες σάντε τζενέντζαρ σο τζουβντιόνα λάκε τθεμέστε αλλά τζενέντζαρ-ντα σο τζουβντιόνα γιαβερτθέ. Σαρ;

Η Μαίρη πουτσέλας ι τζενέν σο κερέλας-λεν μελέτη: «Τζανέσα καέκ τζενές σο κα μανγκέλας τι κερέλ μελέτη κατά Γραφή;» Άμα βακερένας βα, πουτσέλας: «Μπορίνεσα τι γνωρίνες-αμέν λέντζαρ;» Ανταγιά απλή ερώτηση μπάζιμα ανέλα λατσσέ αποτελέσματα. Σόσκε; Επειδή ο πο μπουτ φαρ, ο τζενέ σο εκτιμίνενα ο Λάφι ι Ντεβλέσκο μανγκένα τι βακερέν οντουλά σο σικλιόνα πουμαρέ τζενέντε ντα πουμαρέ λατσσέ αμαλέντε. Καλά αποτελέσματα αντάς ανταγιά ερώτηση σο κερντάς η Μαίρη;

Εκ τζενί σο κερέλας μελέτη με τη Μαίρη, η Τζάσμιν, γνωριντάς-λα σταρέ γιαβερέ-ντα τζενέντε σο μανγκένας τι κερέν μελέτη. Εκ οντουλέ τζενένταρ, η Κριστίν, μπεϊντίνελας πι μελέτη αζόμ μπουτ σο μανγκλάς κατά Μαίρη τι κερέν μελέτη ντούι φαρ κι εβδομάδα. Κάνα η Μαίρη πουτσλάς-λα άμα τζανέλας γιαβερέ-ντα τζενέν σο κα μανγκένας μελέτη, η Κριστίν βακερντάς: «Βα, κα γνωρίναβ-τουτ μι αμαλινέντε». Αντρέ σε χάνικ εβδομάδες, η Κριστίν γνωριντάς ι Μαιριά σταρέ αμαλινέντε σο μανγκένας τι κερέν μελέτη. Πο σοράν, η Κριστίν σικαντάς λάκε γιαβερέ-ντα τζουβλίν σο ισινέ λάσαρ αμαλινά. Ανταλά τζουβλιά γνωριντέ-λα γιαβερέντε-ντα.

Η Κριστίν μανγκέλας τι σικλιόν λάκε τζενέ-ντα κο Φιλιππίνες ι Γραφιάκε. Οτθάρ, κερντάς λάφι πι τσσαγιάτε, κι Άντρεα. Κι αρχή, η Άντρεα σκεφτιντάς: “Ο Μάρτυρες ισί εκ παράξενη θρησκεία, να πακιάνα κο Ιησούς ντα χρησιμοποιήνενα σάντε ο Εβραϊκές Γραφές”. Αλλά αφού κερντάς εκ φαρ μελέτη, αγαντάς ότι οντουλά σο πακιάλας ι Μαρτυρένγκε ισινέ λάθος. Από αζομάν, κάνα σικλιόλας κάτι νεβό πι μελετιάτε, βακερέλας πφερντί χαρά: «Αφού βακερέλα-λες η Αγία Γραφή, ισί μπαγιά!»

Πο σοράν, η Άντρεα γνωριντάς ι Μαιριά ντουέ αμαλινέντε σο τθερέλας ντα εκχέ τζενιάτε σο κερέλας μπουτί λάσαρ ντα αρχισάλε μελέτη. Επίσης, χωρίς τι τζανέλ-λες η Μαίρη, η κορορί μπίμπι της Άντρεα, η Άντζελα, ασουνέλας κάνα κερένας μελέτη. Εκ ντιβές, η Άντζελα μανγκλάς κατά Άντρεα τι γνωρίνελ-λα κι Μαίρη ντα μανγκλάς βόι-ντα τι κερέλ μελέτη. Μπεϊντίνελας μπουτ οντουλά σο σικλιόλας. Εκχέ μασικέστε, σικλιλί αβριάλ μπουτ εδάφια ντα μανγκέλας τι κερέλ μελέτη σταρ φαρ αντρέ κι εβδομάδα!  Με τη βοήθεια της Άντρεα, αρχισάλι τι ντικχέλ ο συναθροίσεις μπουτ φαρ αντράλ κατά Zoom.

Κάνα η Μαίρη σικλιλί ότι ο ρομ της Κριστίν, ο Τζόσουα, μπεσέλας οτθέ πασέ ντα ασουνέλας κάνα κερένας μελέτη, πουτσλάς-λες άμα μανγκέλας βοβ-ντα τι αβέλ κι μελέτη. Ο Τζόσουα βακερντάς: «Σάντε τι ασουνάβ μανγκάβα. Αλλά καέκ να κα κερέλ μάνγκε ερωτήσεις. Άμα κάποιος κα κερέλ μάνγκε ερωτήσεις, κα νασάβ». Κο πρώτα παντς λεπτά κι μελέτη, κερέλας πο μπουτ ερωτήσεις κατά Κριστίν ντα δεχτιντάς τι κερέλ μελέτη.

Η απλή ερώτηση σο κερντάς η Μαίρη βοηθιντάς τι αρχίνεν μπουτ μελέτες. Μπουτ κατά μελέτες ανταλά ντινάς-λεν γιαβερέ Μαρτυρέντε. Αρχιντάς 28 μελέτες, σταρέ διαφορετικέ τθεμέντε.

Η Τζάσμιν, η πρώτη τζενί κι εμπειρία ανταγιά σο βακερντάμ ότι αρχισάλι μελέτη, μπολντιλί κο Απρίλιος 2021. Η Κριστίν μπολντιλί κο Μάιος 2022 ντα βουρτισάλι κο Φιλιππίνες για τι αβέλ γιεκ πι φαμιλιάσαρ. Ντούι γιαβερά τζενιά σο κερένας μελέτη ντα γνωριντάας-λεν η Κριστίν κι Μαίρη, βον-ντα μπολντιλέ. Η Άντζελα μπολντιλί χάνικ μασεκά πο σοράν ντα ακανά ισί τακτική σκαπάνισσα. Ο ρομ της Κριστίν, ο Τζόσουα, ντα λένγκι τσσάι, η Άντρεα, αλλά εμ γιαβερά-ντα τζενέ σο κερένα μελέτη συνεχίνενα πουμαρί πρόοδος.

Κο ντιβεσά σο τζουβντιόλας ο Ιησούς ντα ο απόστολοι, μπουτ πφραλά βακερένας πουμαρέ τζενέντε ντα αμαλέντε οντουλά σο σικλιόνας ι Ιησούσκε. (Ιωάν. 1:41, 42α· Πράξ. 10:24, 27, 48· 16:25-33) Μπορίνενα τι πουτσέν ι τζενέν σο κερένα λέντζαρ μελέτη ντα γιαβερέν σο σικαβένα ενδιαφέρον για την αλήθεια: «Τζανέσα καέκ τζενές σο κα μανγκέλας τι κερέλ μελέτη κατά Αγία Γραφή;» Κον τζανέλα καζόμ μελέτες κα μπορίνενας τι αρχίνεν άμα κα κερέν ανταγιά απλή ερώτηση σο μπορίνενα τι κερέν-λα σαρέ;