ΠΡΟΣΟΧΙΝΤΕΝ ότι μπουτ τζενέ κο ντουνιάς πακιάνα ότι αξίνενα τι συμπεριφερίντιβεν λένγκε ο γιαβερά με εκ ξεχωριστός τρόπος; Καζόμ-ντα τι τθερέν, πακιάνα ότι αξίνενα τι λεν ατζέ πο μπουτ. Ο τζενέ σο σκεφτίνενα αντικάς ντικχένα σάντε πουμαρό νεαυτός ντα να εκτιμίνενα οντουλά σο τθερένα. Αντικάς βακερέλα η Γραφή ότι κα αβένας ο τζενέ κο τελευταία ντιβεσά.​—2 Τιμ. 3:2.

Υπαρχίντιβενας πάντα τζενέ σο ντικχένας πουμαρό νεαυτός. Ο Αδάμ ντα η Εύα λιντέ ι απόφαση τι τραμπίνεν βον ο ίδιοι σο ισί λατσσό ντα σο ισί γκεραλό, ντα ανταβά αντάς μπουτ μπαρέ προβλήματα. Μπουτ μπρεσά πο σοράν, ο βασιλιάς Οζίας του Ιούδα πακιάλας ότι τθερέλας ο δικαίωμας τι πφαμπαρέλ θυμίαμας κο ναός, αλλά κερντάς μπαρό λάθος. (2 Χρον. 26:18, 19) Ο Φαρισαίοι ντα ο Σαδδουκαίοι πακιάνας ότι ο Ντεβέλ έπρεπε τι συμπεριφερίντιβελ λένγκε πο λατσσές κατά γιαβερά σάντε επειδή αστάρντιβενας κατά Αβραάμ.​—Ματθ. 3:9.

Κάθε ντιβές αβάσα πασέ τζενέντζαρ σο ντικχένα σάντε πουμαρό νεαυτός ντα ισί μπαρικανέ. Ανταλά τζενέ κα μπορίνενας τι επηρεάνεν-αμέν ντα τι αβάς αμέν-ντα σαρ λέντε. (Γαλ. 5:26) Μπορεί τι αρχίνας τι πακιάς ότι αξίνασα τι λας εκ συγκεκριμέ προνόμιος ή τι συμπεριφερίντιβεν αμένγκε ο γιαβερά με εκ ξεχωριστός τρόπος. Σαρ μπορίνασα μα τι σκεφτίνας ανταλέ τροπόσαρ; Πρέπει τι αγαβάς σο άποψη τθερέλα ο Ιεχωβά ανταλέσκε. Ντούι αρχές κατά Γραφή κα βοηθίνεν-αμέν.

Ο Ιεχωβά αποφασίνελα σο αξίνασα τι λας. Σκεφτίνεν μερικά παραδείγματα.

• Αντρέ κι φαμιλί, ο μουρς χρειαζίντιβελα τι  νιωθίνελ ότι λέσκι ρομνί σεβάνελα-λες, ντα η τζουβέλ χρειαζίντιβελα τι νιωθίνελ ότι λάκο ρομ μανγκέλα-λα. (Εφεσ. 5:33) Ο Ιεχωβά βακερέλα ότι ο παντριμέ τζενέ πρέπει τι τθερέν μεράκι σάντε ο εκ ι γιαβερέσκε. (1 Κορ. 7:3) Ο νταντά ντα ο νταγιά ισί λογικός τι μανγκέν λένγκε τσσαβέ τι ασουνέν-λεν. Ντα λένγκε τσσαβέ πρέπει τι λεν μπουτ αγάπη ντα φροντίδα λένταρ.​—2 Κορ. 12:14· Εφεσ. 6:2.

• Ο Ιεχωβά βακερέλα ότι ο πρεσβύτεροι αξίνενα αμαρό σεβασμός για το πράγματα σο κερένα ι κχανγκιριάκε. (1 Θεσ. 5:12) Όμως να τθερένα ο δικαίωμας τι κερέν κουμάντος μπέτι τροπόσαρ πουμαρέ πφραλέν ντα πφενίν.​—1 Πέτρ. 5:2, 3.

• Ο Ντεβέλ ντινάς ο δικαίωμας κο κυβερνήσεις τι μανγκέν αμένταρ τι ντας-λεν φόρους ντα τι σικαβάς λένγκε σεβασμός.​—Ρωμ. 13:1, 6, 7.

Ο Ιεχωβά με αγάπη ντέλα-αμέν πο μπουτ οντουλένταρ σο αξίνασα. Ιτιρί κατά αμαρτία σο τθεράσα, οντουβά σο αξίνασα ισί σάντε τι μεράς. (Ρωμ. 6:23) Όμως, ο Ιεχωβά ντέλα-αμέν μπουτ ευλογίες επειδή μανγκέλα τι σικαβέλ αμένγκε πι αφοσιωμέ αγάπη. (Ψαλμ. 103:10, 11) Σο-ντα ευλογία ή προνόμιος λάσα λέσταρ ισί χάρη κο μπαρό λατσσιπέ λέσκο.​—Ρωμ. 12:6-8· Εφεσ. 2:8.

Τι αρακχαβέν-τουμέν κατά τρόπος σο σκεφτίνελα ο ντουνιάς. Χωρίς τι αγαβάς-λες, μπορεί τι αρχίνας τι πακιάς ότι αξίνασα πο μπουτ κατά γιαβερά. Ο Ιησούς σικαντάς καζόμ εύκολα μπορεί τι αρχίνας τι σκεφτίνας αντικάς αντράλ από εκ παράδειγμας. Βακερντάς ο παράδειγμας με το εργάτες σο ποκίντιλε εκ δηνάριος. Κάποιοι εργάτες αρχισάλε μπουτ πρωί ντα κερντέ μπουτί σαρό ο ντιβές τελάλ κατά κχαμ σο πφαμπαρέλας. Γιαβερά κερντέ μπουτί σάντε εκ σαάτι. Οντουλά εργάτες σο κερντέ μπουτί από το πρωί πακιάνας ότι έπρεπε τι λεν πο μπουτ λοβέ ι μπουτιάκε σο κερντέας. (Ματθ. 20:1-16) Κάνα ο Ιησούς βακερντάς ανταβά παράδειγμας μανγκέλας τι σικαβέλ ότι λέσκε μαθητές έπρεπε τι αβέν ευχαριστιμέ οντουλέ πραγματέντζαρ σο ντέλας-λεν ο Ντεβέλ.

Τι σικαβέν εκτίμηση ντα μα τι πακιάν ότι ο γιαβερά πρέπει συνέχεια τι ντεν-τουμέν κάτι. (1 Θεσ. 5:18) Τι μοιάζεν κο απόστολος Παύλος, σο να μανγκλάς κατά πφραλά κι Κόρινθος τι φροντίνεν-λες υλικά παρόλο σο τθερέλας ο δικαίωμας. (1 Κορ. 9:11-14) Πρέπει τι εκτιμίνας σο-ντα ντένα-αμέν ο γιαβερά ντα μα τι μπεκλεντίνας τι ντεν-αμέν πο μπουτ.

 Τι αβέν ταπεινοί. Κάνα κάποιος τθερέλα μπαρί ιδέα πι νεαυτόσκε, ο πο μπουτ φαρ αρχίνελα τι πακιάλ ότι αξίνελα τι τθερέλ πο μπουτ πράγματα. Άμα ισινάμ ταπεινοί, ανταβά κα βοηθίνελ-αμέν μα τι σκεφτίνας ποτές ανταλέ μπέτι τροπόσαρ.

Ο προφήτης Δανιήλ ισί εκ μπουτ λατσσό παράδειγμας επειδή ισινέ ταπεινός. Λέσκι φαμιλί ισινέ μπουτ σημαντική, βοβ ισινέ σουκάρ, τθερέλας μπουτ γκοντί ντα μπουτ ικανότητες. Σαρέ ανταλά κα μπορίνενας τι κερέν-λες τι πακιάλ ότι αξίνελας τι συμπεριφερίντιβεν λέσκε ο γιαβερά με ξεχωριστός τρόπος. Επίσης μπορεί τι σκεφτίνελας ότι αξίνελας σαρέ ο προνόμια σο τθερέλας. (Δαν. 1:3, 4, 19, 20) Όμως, ο Δανιήλ ατσσιλό ταπεινός ντα επειδή τθερέλας ανταγιά ιδιότητα ισινέ πολύτιμος κο γιακχά κι Ιεχωβάσκε.​—Δαν. 2:30· 10:11, 12.

Κο ντουνιάς ανταβά ο τζενέ σκεφτίνενα σάντε πουμαρό νεαυτός ντα πακιάνα ότι ισί πο σημαντικοί κατά γιαβερά. Μακάρι τι συνεχίνας τι τζας κόντρα κο τρόπος σκέψης ανταβά. Οκιά μπάνταρ, τι συνεχίνας τι αρακχάς χαρά κι κάθε ευλογία σο ντέλα-αμέν ο Ιεχωβά αντράλ κατά μπαρό λατσσιπέ λέσκο.