Μο ντατ ντα μι ντάι πακιάνας μπουτ κι Καθολική θρησκεία. Αλλά κάνα σικλιλέ κατά Γραφή ότι ο ναβ ι Ντεβλέσκο ισί Ιεχωβά, αβιλέ ο ντούι-ντα πιστοί Μάρτυρες ι Ιεχωβάσκε. Μο ντατ τσσιναντάς τι λατσσαρέλ εικόνες ι Ιησούσκε. Αντίς τι κερέλ εικόνες ι Ιησούσκε, χρησιμοποιηντάς οντουλά σο τζανέλας για τι αλλάνελ ο ισόγειος αμαρέ κχερέσκο ντα τι κερέλ-λες ι πρώτη Αίθουσα Βασιλείας κο Σαν Χουάν ντελ Μόντε σο ισί κι Μανίλα, κι πρωτεύουσα σο τθερένα ο Φιλιππίνες.

Μπιάντιλομ κο 1952. Μο ντατ ντα μι ντάι αρχισάλε τι σικλιαρέν-μαν ι Ιεχωβάσκε σαρ κερντέας μι σταρέ πο μπαρέ πφραλέντζαρ ντα μι τρινέ πο μπαρέ πφενίντζαρ. Καζόμ μπαριάβας, μο ντατ βακερέλας μάνγκε ότι ισί λατσσό τι διαβάναβ εκ κεφάλαιος κατά Γραφή κάθε ντιβές. Ντα διαβάνελας βοβ-ντα γιεκ μάντζαρ μπουτ κατά έντυπα αμαρέ. Μπάζιμα μο ντατ ντα μι ντάι καλίνενας επισκοπόν ντα πφραλέν κατά Μπέθελ για τι μπεσέν αμαρέ κχερέστε. Σαρ φαμιλί λάας μπαρί χαρά ντα ζορ κατά εμπειρίες οντουλέ πφραλένγκε ντα πφενίνγκε. Ανταβά τσσιντιντάς-αμέν σαριλέν τι τσσουβάς πρώτα αμαρέ ζωγιάτε ο έργος ι Ιεχωβάσκο.

Σικλιλόμ μπουτ πράγματα κατά παράδειγμας μι νταντέσκο ντα μι νταγιάκο σο ισινέ μπουτ πιστοί κο Ιεχωβά. Αφού μουλί μι αγαπημέ ντάι ιτιρί εκχέ νασφαλιμάσταρ, μο ντατ ντα με αρχισάλαμ γιεκ ο σκαπανικός κο 1971. Αλλά σοράν κο 1973, κάνα ισινόμας 20 μπρεσένγκο, μο ντατ μουλό. Νιωθίναβας τσουτσό ντα κορκορό επειδή χασαρντόμας εμ μι νταντές εμ μι νταγιά. Αλλά η ελπίδα σο ισί κι Γραφή ντα ισί «σίγουρη ντα σταθερή» βοηθιντάς-μαν τι ντικχάβ ο λατσσέ πράγματα μι ζωγιάτε αντίς τι μουκχάβ μο νεαυτός τι περέλ, ντα τι ατσσάβ πασέ κο Ιεχωβά. (Εβρ. 6:19) Χάνικ πο σοράν κατά μεριπέ μι νταντέσκο, λιντόμ ο διορισμός τι αβάβ ειδικός σκαπανέας εκχέ νησίστε σο ισινέ μπουτ ντουρ κο Κορόν, σο ισί κι Παλάουαν.

Κάνα ισινόμας 21 μπρεσένγκο γκιλόμ κο Κορόν. Επειδή μπαριλόμ κι πόλη, σαστισάλομ σο ντικχλόμ  ότι οντουλέ νησίστε ο κχερά σο τθερένας βρυσάκο πανί ντα ρεύμας ισινέ χάνικ. Επίσης να υπαρχίντιβενας μπουτ αμάξια ντα μηχανάκια. Παρόλο σο υπαρχίντιβενας μερικά πφραλά, να τθεράβας εκχέ σκαπανεάς για τι νικιάβ λέσαρ κο έργος ντα μπάζιμα νικιάβας κορκορό. Ο πρώτος μάσεκ σικλιντίναβας μπουτ μι φαμιλιάκε ντα μι αμαλένγκε. Ι ιράτ ντικχάβας οπρέ ο τσεργανιά κο ουρανός ντα τθάβντενας δάκρυα μι γιακχίνταρ. Νιωθίναβας ότι μανγκάβας τι μουκχάβ μο διορισμός ντα τι βουρτίναβ μι κχερέστε.

Οντουλά στιγμές σο νιωθίναβας κορκορό, πουτράβας σαρό μο γκι κο Ιεχωβά. Ντάβα-μαν γκοντί ο σκέψεις σο διαβαντόμας κι Γραφή ντα κο έντυπα αμαρέ ντα ντινέας-μαν ζορ. Ο εδάφιος Ψαλμός 19:14 αβέλας μπουτ φαρ μι γκοντιάτε. Αγαντόμ ότι ο Ιεχωβά κα αβέλας «μο Βράχος ντα Οντουβά σο σώνελα-μαν» άμα κα σκεφτίναβας ο πράγματα σο κερένα λέσκο γκι, σαρ ισί ο πράγματα σο τθερένα τι κερέν λέσκε εργόσαρ ντα λέσκε ιδιότητες. Η Σκοπιά ι θεμάσαρ «Δεν Είσθε Ποτέ Μόνος» a βοηθιντάς-μαν μπουτ. Διαβάναβας-λα μπουτ φαρ. Ισινέ σαρ τι αβάβας κορκορό ι Ιεχωβάσαρ οντουλά στιγμές ντα ανταβά ντινάς-μαν μπουτ σουκάρ ευκαιρίες τι προσευχίντιβαβ, τι διαβάναβ ντα τι ρόνταβ, ντα τι κεράβ αχόρτ σκέψεις.

Χάνικ πο σοράν αφού ερεσλόμ κο Κορόν, αβιλόμ πρεσβύτερος. Ισινόμας σάντε με πρεσβύτερος. Οτθάρ αρχισάλομ κάθε εβδομάδα τι κεράβ ι συνάθροιση Σχολή Θεοκρατικής Διακονίας σο ισινέ γιεκ με τη Συνάθροιση Υπηρεσίας, ι συνάθροιση σο τθερέλας ο βιβλίος ντα ι συνάθροιση σο τθερέλας ι Σκοπιά. Επίσης κεράβας κάθε εβδομάδα εκ ομιλία. Σαρ αγαβένα, να τθεράβας χρόνος τι νιωθίναβ κορκορό!

Ο έργος κο Κορόν τζάλας μπουτ λατσσές ντα απολαμβάναβας-λες. Μερικές κατά μελέτες σο κεράβας μπολντιλέ. Αλλά υπαρχίντιβενας δυσκολίες-ντα. Μπάζιμα έπρεπε τι πφιράβ μισός ντιβές για τι ερεσάβ κο τομέας, χωρίς τι τζανάβ κατέ κα σοβάβας κάνα κα ερεσάβας οτθέ. Ο τομέας ι κχανγκιριάκο τθερέλας μπουτ γιαβερά-ντα πο χουρντέ νησιά. Οτθάρ, μπουτ φαρ τζάβας κο τομέας βαρκάσαρ ατζέ-ντα κάνα τθερέλας φουρτούνα παρόλο σο να τζανάβας τι κεράβ μπάνιος! Αν-ντα τθεράβας σαρέ ανταλά δυσκολίες, ο Ιεχωβά αρακχαντάς-μαν. Πο σοράν αγαντόμ ότι ο Ιεχωβά προετοιμάνελας-μαν για πο μπαρέ δυσκολίες κο γιαβέρ διορισμός σο κα τθεράβας.

Κο 1978, διορισάλομ κι Παπούα Νέα Γουινέα σο ισί βόρεια κι Αυστραλία. Η Παπούα Νέα Γουινέα τθερέλα μπουτ βεσά ντα ισί αζόμ μπαρί καζόμ ισί η Ισπανία. Σαστισάλομ κάνα σικλιλόμ ότι ο τριν εκατομμύρια τζενέ σο τζουβντιόνα οτθέ κερένας λάφι 800 ντα πο μπουτ τσσιμπά. Πάλι λατσσές, ο πο μπουτ τζενέ μπορίνενας τι κερέν λάφι κι μελανησιακή πίτζιν σο βακέρντιβελα επίσης τοκ πίσιν.

Διορισάλομ για χάνικ εκχέ κχανγκιριάτε σο κερένας λάφι αγγλικά κι πρωτεύουσα Πορτ Μόρεσ­μπι. Αλλά σοράν μετακομιντόμ εκχέ κχανγκιριάτε σο κερένας λάφι τοκ πίσιν ντα νακχλόμ εκ σχολή για τι σικλιάβ ι τσσιπ. Χρησιμοποιήναβας κο έργος οντουλά σο σικλιάβας κι σχολή. Ανταβά βοηθιντάς-μαν τι σικλιάβ ι τσσιπ πο σουγκό. Μετά από χάνικ βακίτι, μπορίναβας τι κεράβ εκ ομιλία κι τοκ πίσιν. Σε πο χάνικ από εκ μπρες από αζομάν σο ερεσλόμ κι Παπούα Νέα Γουινέα διορισάλομ επίσκοπος περιοχής ι κχανγκιρίνγκε σο κερένας λάφι τοκ πίσιν μπουτέ μπαρέ τθεμέντε.

Επειδή ο κχανγκιριά ισινέ ντουρ η εκ κατά γιαβέρ, έπρεπε τι κανονίναβ μπερεκέτι διαφορετικές συνελεύσεις ντα τι κεράβ μπουτ ταξίδια. Κι αρχή  νιωθίναβας μπουτ κορκορό επειδή ισινόμας εκχέ νεβέ τθεμέστε. Έπρεπε τι σικλιάβ εκ γιαβέρ τσσιπ ντα εκ γιαβέρ κουλτούρα σο ισινέ διαφορετική οντουλάταρ σο σικλιλόμας. Επειδή υπαρχίντιβενας μπουτ βεσά ντα μπέτι ντρομά, ο μόνος τρόπος για τι τζαβ κο κχανγκιριά ισινέ αεροπλανόσαρ. Οτθάρ, έπρεπε τι κεράβ ταξίδι αεροπλανόσαρ σχεδόν κάθε εβδομάδα. Μπάζιμα ισινόμας ο μόνος τζενό εκχέ πουρανέ αεροπλανόστε. Οντουλά ταξίδια ανένας μάνγκε αζόμ ανησυχία καζόμ ανένας μάνγκε ο ταξίδια-ντα σο κεράβας ι βαρκάσαρ!

Χάνικ τζενέ τθερένας τηλέφωνα, οτθάρ κάνα μανγκάβας τι κεράβ λάφι ι κχανγκιρίντζαρ μπουτσσαβάβας γράμματα. Μπουτ φαρ ερεσάβας κο κχανγκιριά πριν τι ερεσέν μο γράμματα. Ντα έπρεπε τι πουτσάβ ι τζενέν οτθέ κατέ ισινέ ο πφραλά. Όμως κάθε φαρ σο αρακχάβας ι πφραλέν καλωσορίνενας-μαν αντράλ πουμαρέ γκίσταρ ντα σικαβένας μάνγκε αζόμ μπαρί εκτίμηση σο ανταβά ανέλας μι γκοντιάτε σόσκε κερντόμας σαρέ ανταλά προσπάθειες. Ντικχλόμ ι Ιεχωβάσκι βοήθεια μπουτέ τροπόντζαρ ντα μι φιλία λέσαρ αβιλί μπουτ πο ζουρανί.

Ι πρώτη φαρ σο γκιλόμ κι συνάθροιση κο νησίς Μπουγκενβίλ, εκ ζευγάρι πφερντό χαράσαρ αβιλό πασέ μάντε ντα πουτσλάς-μαν: «Ντέσα-αμέν γκοντί;» Ντινόμ-μαν γκοντί σο κερντόμας έργος οντουλέ ζευγαρίστε κάνα αβιλόμ πρώτη φαρ κο Πορτ Μόρεσ­μπι. Αρχισάλομ μελέτη λέντζαρ ντα σοράν μανγκλόμ εκχέ πφραλέσταρ σο μπεσέλας οτθέ πασέ τι συνεχίνελ ι μελέτη. Ακανά ο ντούι-ντα ισί μπολντέ. Ανταγιά ισινέ εκ κατά μπουτ ευλογίες σο τζουβντιλόμ κο τριν μπρεσά σο ισινόμας κι Παπούα Νέα Γουινέα.

Πριν τι νασάβ κατά Κορόν κο 1978, γνωριντόμ εκχέ μπουτ σουκάρ πφενιά σο ντέλας μπουτ πι νεαυτόσταρ ντα βακέρντιβελας Αντέλ. Κερέλας τακτικός σκαπανικός καζόμ μπαριαρέλας πι ντουέ τσσαβέν, τον Σαμουέλ ντα τη Σίρλεϊ. Επίσης φροντίνελας πι πφουρέ νταγιά. Κο Μάιος κο 1981, βουρτισάλομ κο Φιλιππίνες ντα παντρισάλομ με την Αντέλ. Σοράν αμαρέ μπιαβέσταρ, κεράας τακτικός σκαπανικός ντα φροντίναας ι φαμιλί γιεκ.

Παρόλο σο τθεράβας φαμιλί, κο 1983, διορισάλομ πάλι ειδικός σκαπανέας ντα μπουτσσαντέ-μαν κο νησίς Λινάπακαν σο ισί κι Παλάουαν. Σαρί η φαμιλί μετακομισάλι οντουλέ νησίστε σο ισινέ μπουτ ντουρ ντα να υπαρχίντιβενας Μάρτυρες. Η ντάι της Αντέλ μουλί εκ μπρες πο σοράν. Όμως συνεχίναας τι κεράς μπουτ πράγματα κο έργος ντα ανταβά βοηθιντάς-αμέν τι νταϊντίνας αμαρί ντουκχ. Οτθέ αρχισάλαμ μπουτ μελέτες σο τζάνας λατσσές ντα αντικάς χρειασάλαμ εκ χουρντί Αίθουσα Βασιλείας. Οτθάρ λατσσαρντάμ-λα κορκορέ. Τριν μπρεσά πο σοράν από αζομάν σο αβιλάμ, τθεράας ι χαρά τι ντικχάς 110 τζενέν τι αβέν κι Ανάμνηση, ντα μπουτ λένταρ πο σοράν μπολντιλέ.

Κο 1986, διορισάλαμ κο Κουλιόν, εκχέ νησίστε σο τζουβντιόνας λεπροί-ντα. Σοράν ανταλέσταρ, η Αντέλ-ντα διορισάλι ειδική σκαπάνισσα. Κι αρχή ισινάμας αγχωμέ σο κα κεράας έργος τζενέντε σο τθερένας λέπρα. Όμως ο πφραλά οτθέ βακερντέ αμένγκε ότι ο τζενέ σο τθερένας ανταβά νασφαλιπέ λιντέας θεραπεία ντα να ισινέ αζόμ επικίνδυνος τι κολλίνας αμέν-ντα λέπρα. Μερικοί οντουλέ λεπρόνταρ αβένας κο συναθροίσεις κο κχερ εκχέ πφενιάκο. Μπουτ σουγκό νιωσάλαμ άνετα τι κεράς  έργος ασακέ τζενέντε ντα μπεϊντίναας μπουτ τι βακεράς ι ελπίδα ι Γραφιάκι τζενέντε σο νιωθίνενας ότι ούτε ο Ντεβέλ ούτε ο τζενέ μανγκένας-λεν. Ισινέ μπουτ σουκάρ τι ντικχές τζενέν σο τθερένας εκ ασακό σοβαρός νασφαλιπέ τι αρακχέν αζόμ μπαρί χαρά κι ελπίδα ότι κα τθερέν εκ ντιβές τέλεια υγεία.​—Λουκ. 5:12, 13.

Σαρ αβιλί αμαρέ τσσαβένγκε η αλλαγή κο Κουλιόν; Η Αντέλ ντα με καλιντάμ ντουέ τερνέ πφενίν κατά Κορόν τι αβέν αμέντζαρ, για τι τθερέν αμαρέ τσσαβέ λατσσί παρέα. Ο Σαμουέλ, η Σίρλεϊ, ντα οντουλά ντούι τερνέ πφενιά, απολαμβάνενας μπουτ ο έργος. Κερένας μελέτη μπουτέ τσσαβέντζαρ, καζόμ η Αντέλ ντα με κεράας μελέτη λένγκε νταντέσαρ ντα νταγιάσαρ. Κεράας μελέτη 11 φαμιλίντζαρ. Μπουτ σουγκό, κεράας μπουτ μελέτες τζενέντζαρ σο πλησιάνενας ι Ιεχωβάς ντα αντικάς μπορίναας τι κεράς εκ νεβί κχανγκιρί!

Κι αρχή ισινόμας σάντε με πρεσβύτερος οντουλέ περιοχιάτε. Οτθάρ ο Μπέθελ μανγκλάς μάνταρ τι κεράβ ο συναθροίσεις κάθε εβδομάδα οχτώ πφραλένγκε κο Κουλιόν ντα σοράν τι κεράβ-λες ανταβά εννιά πφραλένγκε σο ισινέ κο γκαβ Μαριλί σο ισινέ τριν σαάτια ντουρ ι βαρκάσαρ. Σοράν κατά συναθροίσεις οτθέ, σαρ φαμιλί, πφιράας αντράλ κατά βεσά μπουτ σαάτια για τι κεράς μελέτες εκχέ γκαβέστε σο βακέρντιβελας Χάλσι.

Χάνικ χάνικ, ντικχλάμ μπουτ μπαρέ αποτελέσματα κο Μαριλί ντα κο Χάλσι. Οτθάρ κερντάμ Αίθουσες Βασιλείας κο ντούι-ντα τθανά. Σαρ αβιλό-πες κο Λινάπακαν-ντα, ο πφραλά ντα ο τζενέ σο κερένας μελέτη ντινέ ο πο μπουτ υλικά για τι χτίνας ντα κερντέ μπουτ μπουτί. Η αίθουσα κο Μαριλί λέλας 200 τζενέν ντα μπορίνελας εύκολα τι αβέλ ατζέκ πο μπαρί. Οτθάρ μπορίναας οτθέ τι κεράς συνελεύσεις-ντα.

Κο 1993 κάνα ο τσσαβέ μπαριλέ, αβιλόμ επίσκοπος περιοχής γιεκ μι ρομνιάσαρ κο Φιλιππίνες. Σοράν κο 2000 γκιλόμ κι Σχολή Διακονικής Εκπαίδευσης για τι μπορίναβ με-ντα τι σικλιαράβ κο σχολές ανταλά. Νιωθίναβας ότι να τθεράβας ο ικανότητες ανταλέσκε αλλά η Αντέλ πάντα ντέλας-μαν ζορ. Ανέλας μι γκοντιάτε ότι ο Ιεχωβά κα ντέλας-μαν ι ζορ τι κεράβ ανταβά νεβό διορισμός. (Φιλιπ. 4:13) Η Αντέλ τζανέλας ότι ανταβά ισινέ μπαγιά επειδή  βόι-ντα κερντάας λατσσές πο διορισμός καζόμ τθερέλας προβλήματα υγείας.

Κο 2006 καζόμ σικλιαράβας σε εκ σχολή, η Αντέλ σικλιλί ότι τθερέλας Πάρκινσον. Στεναχωρισάλαμ μπουτ! Κάνα βακερντόμ τι μουκχάς αμαρό διορισμός για τι φροντίναβ-λα, η Αντέλ βακερντάς: «Μολίναβα-τουτ αράκχ εκχέ γιατρός σο μπορίνελα τι βοηθίνελ-μαν μι νασφαλιμάσαρ ντα τζανάβα ότι ο Ιεχωβά κα βοηθίνελ-αμέν τι συνεχίνας αμαρό διορισμός». Ο γιαβερά σιοβ μπρεσά, η Αντέλ συνεχιντάς πι υπηρεσία κο Ιεχωβά τι χωρίς τι κερέλ παράπονα. Κάνα να μπορίνελας γιαβέρ τι πφιρέλ, κερέλας έργος με καροτσάκι. Κάνα δυσκολίντιβελας τι κερέλ λάφι, ντέλας απαντήσεις κο συναθροίσεις εκχέ ή ντουέ λαφίντζαρ. Μέχρι κο 2013 σο μουλί, η Αντέλ μπουτ φαρ λέλας μηνύματα κατά πφραλά ντα κατά πφενιά σο βακερένας λάκε καζόμ εκτιμίνενα λάκο σουκάρ παράδειγμας ντα λάκι υπομονή. Νακχλόμ πο μπουτ από 30 μπρεσά με την Αντέλ, μι λατσσέ ντα πιστέ ρομνιάσαρ. Ακανά όμως σο σοτάς ο σοϊπέ ι μεριμάσκο, νιωθίναβα ατζέκ εκ φαρ μπουτ στεναχωριμέ ντα κορκορό.

Η Αντέλ μανγκλάας μάνταρ τι συνεχίναβ μο διορισμός, οτθάρ κερντόμ-λες. Κεράβας μπουτ πράγματα ι Ιεχωβάσκε ντα ανταβά βοηθιντάς-μαν μα τι νιωθίναβ αζόμ κορκορό. Κατά 2014 μέχρι κο 2017, ισινόμας διορισμέ τι τζαβ κο κχανγκιριά σο κερένας λάφι ταγκαλόγκ, τθεμέντε σο να μουκχένας-αμέν τι κεράς ελεύθερα έργος. Σοράν ανταλέσταρ, γκιλόμ κο κχανγκιριά σο κερένας λάφι ταγκαλόγκ κι Ταϊβάν, κι Αμερική ντα κο Καναδάς. Κο 2019, κερντόμ μαθήματα κι αγγλική τσσιπ για τη σχολή Ευαγγελιστών κι Ινδία ντα κι Ταϊλάνδη. Αρακχλόμ μπαρί χαρά ανταλέ διορισμόντε. Ισινόμ μπουτ πο χαρούμενος κάνα ντάβα σαρό μο νεαυτός κι υπηρεσία κι Ιεχωβάσκι.

Σε κάθε νεβό διορισμός, μανγκάβα ι πφραλέν ντα ι πφενίν σο αρακχάβα. Οτθάρ ισί μπουτ δύσκολος τι μουκχάβ-λεν. Σε ασακέ στιγμές σικλιλόμ τι νταβ σαρί μι μπέσα κο Ιεχωβά. Μπουτ φαρ ντικχλόμ λέσκι βοήθεια ντα ανταβά βοηθιντάς-μαν τι δεχτίναβ σαρέ μι γκίσαρ ο αλλαγές σο αβένα. Αντιβές ισινόμ ειδικός σκαπανέας κο Φιλιππίνες. Νιωθίναβα άνετα μι νεβέ κχανγκιριάτε σο αβιλί σαρ μι φαμιλί ντα αρακχαβέλα-μαν. Επίσης ισινόμ περήφανος για τον Σαμουέλ ντα τη Σίρλεϊ σο σικαβένα πίστη σαρ σικαβέλας λένγκι ντάι.​—3 Ιωάν. 4.

Ισί μπαγιά ότι νακχλόμ μπουτ δοκιμασίες μι ζωγιάτε. Εκ ανταλένταρ ισινέ τι ντικχάβ μι αγαπημέ ρομνιά τι τσσίντελ μπουτ ντα τι μερέλ εκχέ μπουτ μπέτι νασφαλιμάσταρ. Επίσης έπρεπε τι συνηθίναβ κο αλλαγές. Ντικχλόμ ότι ο Ιεχωβά «νανέ ντουρ κατά κάθε εκ αμένταρ». (Πράξ. 17:27) Ο βας ι Ιεχωβάσκο «να χουρντιλό αζόμ μπουτ» σο να μπορίνελα τι βοηθίνελ ντα τι ντελ ζορ πι υπηρετόν, ατζέ-ντα άμα ισί τθανέντε σο ισί μπουτ ντουρ. (Ησ. 59:1) Ο Ιεχωβά, μο Βράχος, ισινέ μάντζαρ σαρί μι ζωή ντα εκτιμίναβα-λες μπουτ ανταβά. Ποτές να ισινόμας κορκορό!