ΠΡΙΝ τι αβέλ-πες ανταβά, με μανγκάβας τι σικλιάβ ι αλήθεια. Μι ντάι λιντάας μερικά έντυπα ι Γραφιάκε σο μπεϊντιντόμας μπουτ. Πιο μπουτ μπεϊντίναβας ο φωτογραφίες σο τθερένας. Μο ντατ να μουκχέλας μι νταγιά τι βακερέλ μάνγκε οντουλένγκε σο σικλιόλας. Αλλά με μανγκάβας τι σικλιάβ ντα πουτσάβας-λα. Οτθάρ, βόι κερέλας μάντζαρ μελέτη κάνα μο ντατ να ισινέ κχερέ. Ανταβά βοηθιντάς-μαν τι λαβ ι απόφαση τι αφιερώναβ μι ζωή κο Ιεχωβά. Μπολντιλόμ κο Μπλάκπουλ της Αγγλίας κο 1943, όταν ισινόμας ντεσέ μπρεσένγκο.

Μετά ανταλέσταρ, μι ντάι ντα με τζάας συνέχεια κο έργος μαζί. Αζομάν, για τι κεράς ο έργος χρησιμοποιήναας ο φωνόγραφος. Ισινέ μπουτ μπαρό ντα πφαρό ντα ζυγίνελας περίπου σταρ επκάς κιλά. Σκεφτίνεν ότι με, εκ χουρντό τσσαβό, βάνταβας εκ ασακό πράγμας!

Όταν ισινόμας 14 μπρεσένγκο, λιντόμας ήδη ι απόφαση τι κεράβ σκαπανικός. Μι ντάι βακερντάς μάνγκε ότι πρώτα έπρεπε τι βακεράβ-λες κο υπηρέτης κι πφραλένγκο (ακανά βακέρντιβελα επίσκοπος περιοχής).  Βοβ βακερντάς μάνγκε τι σικλιάβ εκ μπουτί για τι νικαβάβ μο έξοδα ντα αντικάς τι μπορίναβ τι κεράβ ο σκαπανικός. Ντα ασουντόμ-λες. Αφού κερντόμ μπουτί ντούι μπρες, πουτσλόμ εκχέ γιαβερέ επισκοπός για το σκαπανικός. Βοβ βακερντάς: «Κερ-λες!»

Οτθάρ, κο 1949, τον Απρίλιο, μι ντάι ντα με ντινάμ σαρέ αμαρέ έπιπλα ντα γκιλάμ τι μπεσάς γιαβερτθέ, κο Μίντλετον, πασέ κο Μάντσεστερ, σο οτθέ αρχισάλαμ ο σκαπανικός. Μετά από σταρ μάσεκ, τραμπιντόμ εκχέ πφραλές για τι κεράς μαζί ο σκαπανικός. Ο γραφείος τμήματος μανγκλάς αμένταρ τι τζας εκχέ νεβέ εκκλησιάτε σο ισινέ κο Έρλεμ. Μι ντάι κερέλας σκαπανικός εκχέ πφενιάσαρ σε εκ γιαβέρ εκκλησία.

Ισινόμας σάντε 17 μπρεσένγκο, αλλά με ντα ο πφραλ σο κεράας γιεκ σκαπανικός τθεράας ι ευθύνη τι κεράς ο συναθροίσεις κι νεβί εκκλησία, επειδή ισινέ χάνικ πφραλά σο μπορίνενας τι κερέν-λες ανταβά. Σοράν, γκιλόμ κι Εκκλησία Μπάξτον, σο τθερέλας χάνικ ευαγγελιζομενόν ντα χρειαζίντιβελας βοήθεια. Οντουλά σο ντικχλόμ ντα οντουλά σο σικλιλόμ ετοιμαντέ-μαν για το διορισμοί σο κα λάβας κο μέλλον.

Κο 1951, κερντόμ εκ αίτηση για τι παρακολουθίναβ ι Βιβλική Σχολή Γαλαάδ της Σκοπιάς. Αζομάν, κο 1952, τον Δεκέμβριο, καλιντέ-μαν τι παρουσιάντιβαβ κο στρατός. Μανγκλόμ απαλλαγή επειδή υπηρετίναβας ι Ντεβλές σαρό ο μπρες, αλλά ο δικαστήριος να δεχτιντάς-λες ανταβά ντα τσσουντέ-μαν κι φυλακή για σιοβ μάσεκ. Όταν ισινόμας οτθέ, λιντόμ ι πρόσκληση για τι νακχάβ ι τάξη 22 της Γαλαάδ. Κο 1953, τον Ιούλιο, χάνικ καιρός αφού νικίστιλομ κατά φυλακή, τσσουντόμ-μαν εκχέ καραβίστε σο βακέρντιβελας Τζόρτζικ ντα γκιλόμ κι Νέα Υόρκη.

Μόλις ερεσλόμ, παρακολουθιντόμ ι Συνέλευση της Κοινωνίας του Νέου Κόσμου. Σοράν, γκιλόμ τρενόσαρ κο Σάουθ Λάνσινγκ της Νέας Υόρκης, οτθέ σο ισινέ η σχολή. Επειδή νικίστιλομας κατά φυλακή πριν χάνικ καιρός, τθεράβας χάνικ λοβέ. Όταν γουλίστιλομ κατά τρένος, λιντόμ ο λεωφορείος για τι τζαβ κο Σάουθ Λάνσινγκ, αλλά να ισινέ-μαν λοβέ ούτε για τι νικαβάβ ο εισιτήριος, σο ισινέ  μπουτ φτηνός, οτθάρ έπρεπε τι μανγκάβ λοβέ εκχέ τζενέσταρ σο ισινέ βοβ-ντα κο λεωφορείος.

Η Σχολή Γαλαάδ σικλιαρντάς-αμέν μπουτ λατσσέ πράγματα για τι μπορίνας τι “αβάς τα πάντα σαβέ τι μανγκές τζενένγκε”. (1 Κορινθίους 9:​22) Ο Πολ Μπρουν, ο Ρέιμοντ Λιτς ντα με διορισάλαμ κο Φιλιππίνες αλλά έπρεπε τι μπεσάς μερικά μασεκά για τι λας βίζα. Σοράν λιντάμ ο καράβι για τι τζας κο Ρότερνταμ της Ολλανδίας. Μετά νακχλάμ ι Μεσόγειος Θάλασσα, ι Διώρυγα του Σουέζ, ντα ο Ινδικός Ωκεανός για τι ερεσάς κι Μαλαισία ντα σοράν κο Χονγκ Κονγκ. Τελικά, αφού ισινάμας 47 ντιβεσά κι ντεριάβ, ερεσλάμ κι Μανίλα στις 19 Νοεμβρίου κο 1954.

Οτθέ, επειδή ισινάμας γιαβερέ τθεμέστε, έπρεπε τι σικλιάς ο συνήθειες ι τζενένγκε ντα ι τσσιπ σο κερένας. Όμως κι αρχή, ο τριν-ντα διορισάλαμ εκχέ εκκλησιάτε κο Κεσόν Σίτι, σο οτθέ μπουτ τζενέ κερένας λάφι αγγλικά. Οτθάρ, μετά από σιοβ μάσεκ, τζανάας σάντε χάνικ λέξεις κι τσσιπ ταγκαλόγκ. Ανταβά κα αλλάνελας κο γιαβέρ διορισμός σο κα λάας.

Εκ ντιβές, τον Μάιο του 1955, όταν βουρτισάλαμ κο κχερ μετά κατά έργος, ο πφραλ Λιτς ντα με αρακχλάμ μερικά γράμματα σο βακερένας ότι διορίντιλαμ επίσκοποι περιοχής. Με ισινόμας σάντε 22 μπρεσένγκο, αλλά οτθέ σο κα τζάβας κα σικλιάβας νεβέ τρόπους για τι μπορίναβ τι “αβάβ τα πάντα σαβέ τι μανγκές τζενένγκε”.

Για παράδειγμας, κερντόμ μι πρώτη δημόσια ομιλία σαρ επίσκοπος περιοχής εκχέ γκαβέστε, αβριάλ εκχέ μπακαλίσταρ. Αζομάν κο Φιλιππίνες, ο δημόσιες ομιλίες αβένας, όχι κχερέντε, αλλά αβρί, ανγκλάλ μπουτέ τζενέντε! Ενώ τζάβας διάφορε εκκλησιέντε κι περιοχή, κεράβας ομιλίες σε κιόσκια, σε αγορές, ανγκλάλ κατά δημαρχίες, σε γήπεδα, σε πάρκα ντα μπουτ φαρ κο ντρομά. Εκ φαρ κο Σαν Πάμπλο Σίτι, να μπορίναβας τι κεράβ μι ομιλία κι αγορά επειδή ντέλας μπουτ μπρισίμ. Οτθάρ, βακερντόμ κο πφραλά σο ισινέ υπεύθυνοι τι κεράβ-λα αντρέ κι Αίθουσα Βασιλείας. Κο τέλος, ο πφραλά πουτσλέ-μαν άμα  οντιά ομιλία κα μπορίνελας τι βακέρντιβελ δημόσια, αφού να αβιλίας σε εκ πουταρντό τθαν σο γκιντίντιβενα μπουτ τζενέ!

Μπεσάβας πάντα κι πφραλένγκε κχερά. Παρόλο σο ο κχερά ισινέ απλά, ισινέ πάκι. Μπουτ φαρ σοβάβας τελέ, εκχέ σανέ χαλίστε σε εκ καστικανό πάτωμας. Ο μόνος τθαν σο μπορίναβας τι τθοβάβ-μαν ισινέ αβρί κατά κχερ, οτθέ σο μπορίνενας τι ντικχέν-μαν σαρέ. Οτθάρ, σικλιλόμ τι κεράβ μπάνιος μι σεΐντζαρ. Τζάβας ταξίδια λεωφορειόσαρ, ντα μερικές φορές βαρκάσαρ για τι τζαβ γιαβερέ νησίντε. Σαρέ οντουλά μπρεσά σο υπηρετίναβας, να τθεράβας ποτές αυτοκίνητος μιρό.

Σικλιλόμ ταγκαλόγκ παρόλο σο να κερντόμ ποτές μαθήματα. Κερντόμ-λες ανταβά καζόμ ασουνάβας ι πφραλέν σο κερένας λάφι κο έργος ντα κο συναθροίσεις. Ο πφραλά μανγκένας τι βοηθίνεν-μαν τι σικλιάβ ντα με εκτιμίναβας λένγκι υπομονή ντα οντουλά σο βακερένας για τι διορθώνεν-μαν.

Καζόμ νακχέλας ο καιρός, λάβας νεβέ διορισμούς ντα οτθάρ έπρεπε τι αλλάναβ πιο μπουτ πράγματα μι νεαυτόστε. Κο 1956, όταν αβιλό τι ντικχέλ-αμέν ο πφραλ Νάθαν Νορ, κερντάμ εκ διεθνής συνέλευση. Διορισάλομ τι κεράβ λάφι με το δημοσιογράφοι. Να τζανάβας ιτς σαρ τι κεράβ ανταγιά μπουτί, αλλά γιαβερά πφραλά βοηθιντέ-μαν τι σικλιάβ-λα. Πριν τι νακχέλ εκ μπρες, κερντάμ εκ γιαβέρ-ντα διεθνής συνέλευση ντα με υπηρετίναβας σαρ επίσκοπος συνέλευσης. Ο πφραλ Φρέντερικ Φρανς αβιλό κατά κεντρικά γραφεία ντα με σικλιλόμ μπουτ πράγματα λέσταρ. Όταν κερντάς ι δημόσια ομιλία, ιρίλας ο σέα σο ιρίνα ο Φιλιππινέζοι. Ανταβά κερντάς ι πφραλέν σο ισινέ κατά Φιλιππίνες τι χαιρίνεν μπουτ, ντα σικλιαρντάς-μαν τι μανγκάβ τι συμπεριφερίντιβαβ  με τρόπος σο μπεϊντίνενα-λες ο τζενέ καλέ-ντα τθεμέσταρ τι αβέν.

Όταν αβιλόμ επίσκοπος περιφερείας, έπρεπε τι αλλάναβ γιαβερά-ντα πράγματα. Οντουλά μπρεσά, σικαβάας κο τζενέ ι ταινία Η Ευτυχία της Κοινωνίας του Νέου Κόσμου. Ο πιο μπουτ φαρ τσσουβάας τι κχελέλ ι ταινία κι εξοχή, οτθέ σο γκιντίντιβενας μπουτ τζενέ, οτθάρ μερικές φορές αβένας μπουτ μουσίτσες. Ταρτίνελας-λεν ο φως κατά προβολέας ντα κολλίνενας οτθέ. Έπρεπε τι κερές μπουτ μπουτί σοράν για τι καθαρίνες-λες! Να ισινέ εύκολος τι τσσουβάς οντουλά ταινίες, αλλά ισινάμας μπουτ ευχαριστιμέ όταν ντικχάας ι τζενέν τι αβέν ντα τι σικλιόν για την οργάνωση σο τθερέλα ο Ιεχωβά σαρί κι πφουβ.

Ο Καθολικοί παπάζια βακερένας οντουλένγκε σο κερένας κουμάντος κο τθεμ μα τι ντεν-αμέν άδεια για τι κεράς ο συνελεύσεις. Επίσης, για μα τι μπορίνελ τι ασουνέλ καέκ ι πφραλές σο κερέλας ι ομιλία, μπασκιαρένας ο καμπάνες όταν εκ συνέλευση αβέλας πασέ λένγκε κχανγκιριέντε. Παρόλο σο κερένας-λεν ανταλά, ο τζενέ συνεχίνενας τι σικλιόν ι αλήθεια, ντα μπουτ τζενέ οντουλέ τθανέντε ντένα ακανά λατρεία ι Ιεχωβάς.

Κο 1959, διορισάλομ τι υπηρετίναβ κο γραφείος τμήματος. Σικλιλόμ μπουτ πράγματα οτθέ. Μετά από χάνικ καιρός, βακερντέ μάνγκε τι τζαβ γιαβερέ τθεμέντε για τι υπηρετίναβ σαρ επίσκοπος ζώνης. Σε εκ οντουλέ ταξιδίνταρ, γνωριντόμ την Τζάνετ Ντούμαντ σο ισινέ ιεραπόστολος κι Ταϋλάνδη. Επικοινωνίναας με γράμματα για χάνικ καιρός, ντα σοράν παντρισάλαμ. Μέχρι ακανά, τθεράσα 51 μπρεσά σο υπηρετίνασα μαζί ι Ιεχωβάς με χαρά.

Χαιρισάλομ σο τθεράβας ι ευκαιρία τι τζαβ σε 33 τθεμά για τι ντικχάβ σαρ τζάνας ο πφραλά ντα ο πφενιά. Επίσης, χαιρισάλομ μπουτ σόσκε ο διορισμοί σο τθεράβας σικλιαρντέ-μαν σαρ τι κεράβ ο έργος ι Ντεβλέσκο τζενέντε σο  τθερένα γιαβέρ πολιτισμός ντα τζουβντιόνα διαφορετικά! Ανταλά ταξίδια βοηθιντέ-μαν τι αγαβάβ λατσσές ότι ο Ιεχωβά μανγκέλα σαρέ ι τζενέν.​—Πράξεις 10:​34, 35.

Η Τζάνετ ντα με χαιρίνασα μπουτ σο υπηρετίνασα ι πφραλέντζαρ κο Φιλιππίνες, ντα συνεχίνασα τι υπηρετίνας μαζί κο γραφείος τμήματος κο Κεσόν Σίτι. Υπαρχίντιβενα ντες φαρ πιο μπουτ ευαγγελιζόμενοι ακανά από ό,τι ισινέ αζομάν σο αρχισάλομ τι υπηρετίναβ ατθέ πριν 60 μπρεσά. Παρόλο σο νακχλέ σαρέ ανταλά μπρεσά, πρέπει τι συνεχίναβ τι αβάβ έτοιμος για τι δεχτίναβ ο αλλαγές σο μανγκέλα ο Ιεχωβά. Για παράδειγμας, επειδή ακανά τελευταία αβιλέ-πες κάποιες αλλαγές κι οργάνωση, έπρεπε τι δεχτίνας αντράλ αμαρέ γκίσταρ τι κεράς αμέν-ντα μπουτ αλλαγές.

Κεράας ο πιο λατσσό σο μπορίναας για τι ακολουθίνας ι κατεύθυνση ι Ιεχωβάσκι, ντα ανταβά ισινέ ο πιο λατσσό πράγμας σο κα μπορίναας τι κεράς αμαρέ ζωγιάτε. Επίσης, προσπαθιντάμ τι κεράς σο-ντα αλλαγές χρειαζίντιβενας για τι υπηρετίνας αμαρέ πφραλέν λατσσές. Βα, καζόμ-ντα καιρός κα μανγκέλ ο Ιεχωβά, ισινάμ αποφασισμέ τι “αβάς τα πάντα σαβέ τι μανγκές τζενένγκε”.