1, 2. (α) Σο σχέση τθερέλα η αγάπη με την πίστη; (β) Καλά ερωτήσεις κα ντικχάς;

ΑΜΑΡΟ Ντατ, ο Ιεχωβά, ντινάς πο λάφι τι ευλογίνελ πι πιστέ υπηρετόν. Ανταβά ισί εκ τρόπος σο σικαβέλα αμένγκε ο Ιεχωβά πι αγάπη, ντα αμέν μανγκάσα-λες «επειδή πρώτα βοβ μανγκλάς-αμέν». (1 Ιωάννη 4:​19) Καζόμ πιο μπουτ μανγκάσα ι Ιεχωβάς, αζόμ πιο ζουρανί αβέλα αμαρί πίστη λέστε ντα αζόμ πιο σίγουροι ισινάμ ότι ο Ιεχωβά κα ντελ ευλογίες οντουλέντε σο μανγκέλα.​—Διαβάνεν Εβραίους 11:6.

² Βα, ο Ιεχωβά ντέλα ευλογίες! Ναστί αβέλα-πες μα τι ευλογίνελ πι πιστέ υπηρετόν. Άρα, αμαρί πίστη κο Ντεβέλ νανέ ολοκληρωμέ, άμα τθεράσα αμφιβολίες ότι κα ντελ ευλογίες οντουλέντε σο ρόντενα σαρέ πουμαρέ γκίσαρ τι αρακχέν-λες. Σόσκε βακεράσα-λες ανταβά; Επειδή «πίστη ισί η σιγουριά σο τθεράσα ι πραγματένγκε σο μπεκλεντίνασα τι αβέν». (Εβραίους 11:1) Όταν τθεράσα πίστη, ισινάμ μπουτ σίγουροι ότι ο Ντεβέλ κα ευλογίνελ οντουλέν σο ατσσόνα πιστοί λέστε. Όμως, σαρ κερέλα αμένγκε λατσσιπέ η ελπίδα σο τθεράσα  επειδή μπεκλεντίνασα ο ευλογίες; Σαρ ντινάς ευλογίες ο Ιεχωβά πι υπηρετόντε εμ κο πουρανέ μπρεσά εμ ακανά; Για τι ντικχάς.

3. Καγιά υπόσχεση διαβάνασα κο Μαλαχίας 3:10;

³ Ο Ιεχωβά Ντεβέλ ντινάς πο λάφι τι ντελ ευλογίες πι πιστέ υπηρετόντε. Μανγκέλα αμένταρ τι ντας-λες ο πιο λατσσό σο μπορίνασα ντα τι τθεράς εμπιστοσύνη ότι κα ευλογίνελ-αμέν. Ο Ιεχωβά βακερέλα: «Δοκιμάνεν-μαν, παρακαλώ». Επίσης βακερέλα: «Ντικχέν άμα να κα νταβ σαρ μπρισίμ ευλογίες οπρά-τουμέντε, μέχρι τι τθερέν σαρέ οντουλά σο χρειαζίντιβενα». (Μαλαχίας 3:​10) Αμέν σικαβάσα ότι εκτιμίνασα ι ευκαιρία σο ντέλα-αμέν όταν δεχτίνασα ι πρόσκληση ι Ιεχωβάσκι τι δοκιμάνας-λες.

4. Σόσκε μπορίνασα τι τθεράς εμπιστοσύνη κο λάφια κι Ιησούσκε σο ισί κο Ματθαίος 6:33;

⁴ Ο Ιησούς ντινάς πο λάφι πι μαθητέντε ότι, άμα κα τσσουβένας πρώτα ι Βασιλεία, ο Ντεβέλ κα βοηθίνελας-λεν. (Διαβάνεν Ματθαίος 6:​33) Ο Ιησούς μπορίνελας τι βακερέλ-λες ανταβά επειδή τζανέλας ότι ο υποσχέσεις ι Ντεβλέσκε πάντα νικιόνα μπαγιά. (Ησαΐας 55:​11) Αντικάς αμέν-ντα μπορίνασα τι αβάς σίγουροι ότι, άμα σικαβάσα αντράλ αμαρέ γκίσταρ πίστη κο Ιεχωβά, βοβ κα ατσσικιαρέλ πο λάφι: «Να κα μουκχάβ-τουτ ούτε κα παρατίναβ-τουτ». (Εβραίους 13:5) Ανταγιά υπόσχεση ι Ιεχωβάσκι βοηθίνελα-αμέν τι τθεράς εμπιστοσύνη κο λάφια κι Ιησούσκε σο ισί κο Ματθαίος 6:33.

5. Σόσκε η απάντηση σο ντινάς ο Ιησούς κο Πέτρος ντέλα-αμέν σαριλέν θάρρος;

⁵ Ο απόστολος Πέτρος πουτσλάας ι Ιησούς:  «Αμέν μουκχλάμ-λεν σαρέ ντα αβιλάμ παλά-τούτε. Ακανά, σο κα αβέλ-πες αμέντζαρ;» (Ματθαίος 19:​27) Ο Ιησούς να διορθωντάς ι Πετρός ανταλέ ερωτησιάκε, αλλά βακερντάς πι μαθητένγκε ότι κα λένας ευλογίες επειδή κερντέ θυσίες. Ο απόστολοι ντα γιαβερά πιστοί κα κυβερνίνεν κο μέλλον γιεκ ι Ιησούσαρ κο ουρανός. Όμως, ο Ιησούς βακερντάς ότι ατζέ-ντα ακανά μπορίνελα κάποιος τι τθερέλ ευλογίες: «Κον μουκχλάς κχερά ή πφραλέν ή πφενίν ή νταντές ή νταγιά ή τσσαβέν ή τθανά μι ναβέσκε κα λελ εκατό φαρ πιο μπουτ ντα κα λελ ζωή για πάντα». (Ματθαίος 19:​29) Σαρέ ο μαθητές ι Ιησούσκε μπορίνενα τι αρακχέν κι εκκλησία αντιβές νταντέν, νταΐν, πφραλέν, πφενίν ντα τσσαβέν. Ανταβά σίγουρα ισί μπουτ πιο σημαντικός σαρέ οντουλέ πραγματένταρ σο μουκχλάμ για τη Βασιλεία ι Ντεβλέσκι.

6. Σόσκε ντέλα πο λάφι ο Ιεχωβά ότι κα ευλογίνελ πι υπηρετόν;

⁶ Ακανά τθεράσα μπουτ σουκάρ ευλογίες, αλλά μπεσάσα σαρ σαρ τι ντικχάς ατζέ πιο μπαρέ ευλογίες ανγκλ’ αμέντε. (1 Τιμόθεο 4:8) Επειδή τζανάσα ότι ο Ιεχωβά ντέλα πο λάφι ότι κα ευλογίνελ πι πιστέ υπηρετόν, ανταβά βοηθίνελα-αμέν τι νταϊντίνας ο δυσκολίες σο αβένα. Όταν ισινάμ μπουτ σίγουροι ότι ο Ιεχωβά ντέλα «ευλογίες οντουλέντε σο ρόντενα σαρέ πουμαρέ γκίσαρ τι αρακχέν-λες», μπορίνασα τι ατσσάς πιστοί.​—Εβραίους 11:6.

7. Σόσκε βακεράσα ότι η ελπίδα ισί σαρ άγκυρα;

⁷ Κι Επί του Όρους Ομιλία, ο Ιησούς βακερντάς: «Τι χαιρίνεν ντα τι χουτέν από χαρά, επειδή η ευλογία σο κα τθερέν κο ουρανός ισί μπαρί, σόσκε αντικάς παλντιντέ ι προφητέν πιο τζανγκλέ τουμένταρ». (Ματθαίος 5:​12) Μερικοί υπηρέτες ι Ντεβλέσκε κα τθερέν ι ευλογία τι τζουβντιόν κο ουρανός. Ντα ο γιαβερά κα τθερέν ι ευλογιά τι τζουβντιόν κο παράδεισος κι πφουβ. Ανταβά ισί ατζέκ εκ λόγος “τι χαιρίνεν ντα τι χουτέν από χαρά”. (Ψαλμός 37:​11· Λουκάς 18:​30) Αλλά σαρέ αμένγκε, αμαρί ελπίδα μπορεί τι αβέλ σαρ «άγκυρα ι γκίσκε, σίγουρη ντα σταθερή». (Εβραίους 6:​17-20) Σαρ εκ άγκυρα ατσσικιαρέλα εκ καράβι σταθερός σε εκ φουρτούνα, αντικάς-ντα αμαρί ζουρανί ελπίδα μπορίνελα τι βοηθίνελ-αμέν τι ατσσάς σταθεροί. Μπορεί τι ντελ-αμέν ι δύναμη τι νταϊντίνας ο δυσκολίες.

8. Σαρ βοηθίνελα-αμέν η ελπίδα μα τι ανησυχίνας μπουτ;

⁸ Αμαρί ελπίδα μπορίνελα τι βοηθίνελ-αμέν μα τι ανησυχίνας μπουτ. Σαρ ο λάδι κοβλιαρέλα ο δέρμας, αντικάς ο Λάφι ι Ντεβλέσκο-ντα μπορίνελα τι κοβλιαρέλ αμαρό γκι κάνα ανησυχίνασα. Λάσα κουράγιος επειδή τζανάσα ότι ο Ιεχωβά κα φροντίνελ-αμέν όταν μουκχάσα οπρά-λέστε ο βάρος σο βάντασα. (Ψαλμός 55:​22) Μπορίνασα τι αβάς μπουτ σίγουροι ότι ο Ντεβέλ μπορίνελα τι κερέλ «πιο μπουτ οντουλένταρ σο σκεφτίνασα ντα σαρέ οντουλένταρ σο μανγκάσα λέσταρ». (Εφεσίους 3:​20) Ο Ιεχωβά κα βοηθίνελ-αμέν,  όχι απλά μπερεκέτι ή μπουτ, αλλά «πιο μπουτ οντουλένταρ σο σκεφτίνασα»!

9. Σαρ μπορίνασα τι αβάς σίγουροι ότι μπορίνασα τι λας ι Ιεχωβάσκι ευλογία;

⁹ Για τι λας ευλογίες, πρέπει τι τθεράς μπαρί πίστη κο Ιεχωβά ντα τι ντας καν λέσκε οδηγιέντε. Ο Μωυσής βακερντάς κο λαός Ισραήλ: «Ο Ιεχωβά το Ντεβέλ σίγουρα κα ευλογίνελ-τουτ κι πφουβ σο ντέλα-τουτ σαρ κληρονομιά για τι λες-λα τούκε, αλλά σάντε άμα ασουνέσα πάντα ι φωνή ι Ιεχωβάσκι τι Ντεβλέσκι ντα κερέσα ακριβώς ανταγιά εντολή σο ντάβα-τουτ αντιβές. Επειδή ο Ιεχωβά το Ντεβέλ κα ευλογίνελ-τουτ, αντικάς σαρ βακερντάς». (Δευτερονόμιο 15:​4-6) Τουμέν ισινέν σίγουροι ότι ο Ιεχωβά κα ευλογίνελ-τουμέν άμα κα συνεχίνεν τι υπηρετίνεν-λες πιστά; Τθερένα σημαντικούς λόγους για τι αβέν σίγουροι.

10, 11. Σαρ ντινάς ευλογίες ο Ιεχωβά κο Ιωσήφ;

¹⁰ Η Αγία Γραφή γραφισάλι αμαρέ λατσσιμάσκε. Οτθέ αρακχάσα μπουτ παραδείγματα σο σικαβένα σαρ ντινάς ο Ντεβέλ ευλογίες πι πιστέ υπηρετόντε κο πουρανέ μπρεσά. (Ρωμαίους 15:4) Ο Ιωσήφ ισινέ εκ μπουτ λατσσό παράδειγμας σο σικαβέλα-λες ανταβά. Πρώτα, λέσκε πφραλά μπικιντέ-λες σαρ δούλος. Σοράν, η ρομνί λέσκε κυριόσκι κατηγοριντάς-λες σινανέ ντα τσσουντέ-λες σε εκ φυλακή κι Αίγυπτος. Όταν ισινέ κι φυλακή, μήπως ο Ιεχωβά ταρτιντάς-πες ντουρ κατά Ιωσήφ; Σίγουρα όχι! Η Γραφή βακερέλα: «Ο Ιεχωβά συνεχίνελας τι αβέλ με τον Ιωσήφ ντα σικαβέλας λέσκε λατσσιπέ αντράλ πι γκίσταρ», ντα «ο Ιεχωβά ισινέ με τον Ιωσήφ ντα ο Ιεχωβά βοηθίνελας-λες τι τθερέλ επιτυχία σαρέ κο πράγματα σο κερέλας». (Γένεση 39:​21, 23) Παρόλο σο τθερέλας δυσκολίες, ο Ιωσήφ μπεσέλας πι Ντεβλέσκε με υπομονή.

¹¹ Μπουτ μπρεσά μετά, ο Φαραώ νικαντάς τον Ιωσήφ κατά φυλακή ντα οντουβά ταπεινός δούλος αβιλό ο δεύτερος πιο ζουρανό άρχοντας κι Αίγυπτος. (Γένεση 41:1, 37-43) Όταν ο Ιωσήφ ντα λέσκι ρομνί κερντέ ντουέ τσσαβέν, «ο Ιωσήφ τσσουντάς πι πρώτε τσσαβέσκε Μανασσή, επειδή, σαρ βακερντάς: “Ο Ντεβέλ κερντάς-μαν τι μπιστράβ σαρέ μο προβλήματα ντα σαρί μι νταντέσκι φαμιλί”. Ντα πι δεύτερε τσσαβέσκε τσσουντάς Εφραΐμ, επειδή, σαρ βακερντάς: “Ο Ντεβέλ κερντάς-μαν τι τθεράβ τσσαβέν κι πφουβ μι ντουκχένγκι”». (Γένεση 41:​51, 52) Ο Ιεχωβά ντινάς ευλογίες κο Ιωσήφ επειδή ισινέ πιστός, ντα μπορισάλο τι σώνελ εμ ι Ισραηλιτέν εμ ι Αιγυπτιόν κατά μποκχ. Ο Ιωσήφ τζανέλας ότι ο Ιεχωβά ισινέ οντουβά σο ευλογιντάας-λες.​—Γένεση 45:​5-9.

12. Σαρ ατσσιλό πιστός ο Ιησούς όταν δοκιμάντιβελας;

¹² Ο Ιησούς Χριστός-ντα συνεχίνελας τι ντελ καν ι Ντεβλές παρόλο σο τθερέλας μπουτ δυσκολίες, ντα ο Ιεχωβά ντινάς-λες ευλογίες. Σο βοηθιντάς ι Ιησούς τι ατσσόλ πιστός; Ο Λάφι ι Ντεβλέσκο εξηγίνελα: «Για τη χαρά σο τθερέλας ανγκλά-πέστε νταϊντιντάς ο κας σο βασανιντέ-λες, ντα να χάλας-λες ανάγκη η λατζ». (Εβραίους 12:2) Ο Ιησούς σίγουρα χαιρίνελας σο μπορίνελας τι αγιάνελ ι Ντεβλέσκο ναβ. Ντα ευλογισάλο επειδή λέσκο Ντατ μανγκλάς-λες ντα ντινάς-λες μπουτ λατσσέ προνόμια.  Η Γραφή βακερέλα ότι «μπεσλό κο δεξιά κατά θρόνος ι Ντεβλέσκο». Επίσης, διαβάνασα: «Ο Ντεβέλ τσσουντάς-λες σε πιο μπαρί θέση ντα ντινάς-λες λατσσιμάσαρ ο ναβ σο ισί πιο οπρέ σαρέ κατά γιαβερά ναβά».​—Φιλιππησίους 2:9.

13, 14. Σαρ νιωθίνελα ο Ιεχωβά σαρέ οντουλένγκε σο κεράσα λέσκε;

¹³ Μπορίνασα τι αβάς σίγουροι ότι ο Ιεχωβά εκτιμίνελα σαρέ οντουλά σο κεράσα για τι υπηρετίνας-λες. Αγαβέλα-αμέν όταν να ισινάμ σίγουροι αμαρέ νεαυτόσκε ή όταν αμντίνασα ότι ναστί κεράσα μερικά πράγματα. Πφαμπόλα αμένγκε όταν ανησυχίνασα αμαρέ μπουτιάκε ή ι πραγματένγκε σο ισί αναγκαία αμαρέ φαμιλιάκε. Ντα αγαβέλα-αμέν όταν να μπορίνασα τι κεράς ο πράγματα σο κεράας πριν για τι υπηρετίνας-λες επειδή ακανά ισινάμ νασφαλέ ή τθεράσα κατάθλιψη. Μπορίνασα τι αβάς σίγουροι ότι ο Ιεχωβά εκτιμίνελα σο ατσσάσα πιστοί παρόλο σο τθεράσα προβλήματα.​—Διαβάνεν Εβραίους 6:​10, 11.

¹⁴ Επίσης, ντεν-τουμέν γκοντί ότι ο Ιεχωβά ισί “Οντουβά σο ασουνέλα προσευχή”. Μπορίνασα τι αβάς σίγουροι ότι, όταν προσευχίντιβασα λέστε, κα ασουνέλ-αμέν. (Ψαλμός 65:2) «Ο Ντατ σο σικαβέλα έλεος αντράλ πι γκίσταρ ντα ο Ντεβέλ σο ντέλα κάθε παρηγοριά» κα ντελ-αμέν σαρέ οντουλά σο χρειαζίντιβασα για τι ατσσάς πασέ λέστε. Μερικές φορές, μπορεί τι χρησιμοποιήνελ αμαρέ πφραλέν ντα αμαρέ πφενίν για τι κερέλ-λες ανταβά. (2 Κορινθίους 1:3) Ο Ιεχωβά χαιρίνελα όταν νιωθίνασα ι γιαβερένγκι ντουκχ. «Οντουβά σο σικαβέλα λατσσιπέ οντουλέσκε σο νανέ σημαντικός ντέλα δανεικά κο Ιεχωβά, ντα Βοβ κα ευλογίνελ-λες οντουλένγκε σο κερντάς». (Παροιμίες 19:​17· Ματθαίος 6:​3, 4) Άρα, όταν ντάσα αντράλ αμαρέ γκίσταρ ντα βοηθίνασα αμαρέ πφραλέν, ο Ιεχωβά ντικχέλα ο λατσσιπέ σο κεράσα σαρ δάνειος σο ντάσα λέστε. Ντα ντέλα-αμέν πο λάφι ότι κα λας ευλογίες οντουλέ λατσσιμάσκε.

15. Τουμέν σο ευλογίες μπεκλεντίνενα τι τθερέν; (Ντικχ ι φωτογραφία σο ισί κι αρχή.)

¹⁵ Ο χρισμέ Χριστιανοί τθερένα ι ελπίδα τι λεν «ο στεφάνι της δικαιοσύνης», εκ ευλογία κατά Ιησούς. (2 Τιμόθεο 4:​7, 8) Όμως, να τθερένα πιο χουρντί αξία κι Ντεβλέσκε γιακχά άμα τθερένα εκ γιαβέρ ελπίδα. Εκατομμύρια “γιαβερά μπρακέ” ι Ιησούσκε μπεκλεντίνενα σαρ σαρ ι ευλογία σο κα ντιντιόλ κο μέλλον, τι τζουβντιόν για πάντα κο παράδεισος κι πφουβ. Οτθέ «κα αβέν ευτυχισμέ επειδή κα τθερέν μπουτ ειρήνη».​—Ιωάννης 10:​16· Ψαλμός 37:11.

16. Καγιά παρηγοριά αρακχάσα κο εδάφια 1 Ιωάννη 3:​19, 20;

¹⁶ Μερικές φορές μπορεί τι νιωθίνασα ότι να κεράσα μπουτ πράγματα κι υπηρεσία κι Ιεχωβάσκι ή μπορεί μα τι αβάς σίγουροι ότι ο Ιεχωβά χαιρίνελα οντουλέντζαρ σο κεράσα. Επίσης, μπορεί τι νιωθίνασα ότι να ισινάμ άξιοι τι λας καέκ ευλογία. Όμως, μα τι μπιστράς ποτές ότι «ο Ντεβέλ ισί πιο μπαρό αμαρέ γκίσταρ ντα τζανέλα σαρέ ο πράγματα». (Διαβάνεν 1 Ιωάννη 3:​19, 20) Όταν υπηρετίνασα ι Ιεχωβάς από πίστη ντα αγάπη, μπορίνασα τι αβάς σίγουροι ότι κα ντελ-αμέν ευλογίες, ατζέ-ντα άμα οντουλά σο κεράσα μπορεί τι ντικχίντιβενα αμένγκε ότι να τθερένα μπαρί αξία.​—Μάρκος 12:​41-44.

17. Καλά ισί μερικές ευλογίες σο τθεράσα ακανά;

¹⁷ Ατζέ-ντα κο τελευταία ντιβεσά ανταλέ πφιρνέ ντουνιάσκε σο κερέλα-λες κουμάντος ο Μπενγκ, ο Ιεχωβά ευλογίνελα πι λαός. Βοβ φροντίνελα τι σικλιαρέλ  ντα τι ντελ ειρήνη σαρέ ι πφραλέν σο ισί οπράλ κι πφουβ. (Ησαΐας 54:​13) Βα, σαρ ντινάς πο λάφι ο Ιησούς, ο Ιεχωβά ντέλα-αμέν ι ευλογία ακανά τι τθεράς εκ αγαπημέ φαμιλί πφραλέντζαρ ντα πφενίντζαρ σαρό κατά ντουνιάς. (Μάρκος 10:​29, 30) Επίσης, οντουλά σο ρόντενα σαρέ πουμαρέ γκίσαρ τι αρακχέν ι Ντεβλές λένα ι ευλογία τι τθερέν ειρήνη αντρέ πουμέντε ντα τι αβέν ικανοποιημέ ντα ευτυχισμέ.​—Φιλιππησίους 4:​4-7.

18, 19. Σαρ νιωθίνενα ο υπηρέτες ι Ιεχωβάσκε όταν σκεφτίνενα ο ευλογίες σο λένα;

¹⁸ Ο υπηρέτες ι Ιεχωβάσκε σαρό κο ντουνιάς λένα μπουτ σουκάρ ευλογίες αμαρέ Νταντέσταρ. Για παράδειγμας, η Μπιάνκα κατά Γερμανία βακερέλα: «Να αρακχάβα λάφια τι ευχαριστίναβ ι Ιεχωβάς σο βοηθίνελα-μαν κο ανησυχίες σο τθεράβα ντα σο ισί πάντα πασέ μάντε κάθε ντιβές. Αβρί κο ντουνιάς, αβέλα-πες χαμός ντα ισί πφερντό σουρντέ τζενέντζαρ. Αλλά επειδή τθεράβα εκ λατσσί φιλία ι Ιεχωβάσαρ, νιωθίναβα ασφάλεια λέσκε αγκαλιάτε. Κάθε φορά σο κεράβα εκ θυσία λέσκε, ντέλα-μαν εκατό φαρ πιο μπουτ ευλογίες».

¹⁹ Ή ντικχέν ο παράδειγμας της Πόλα κατά Καναδάς. Βόι ισί 70 μπρεσένγκι ντα τθερέλα εκ νασφαλιπέ σο βακέρντιβελα δισχιδή ράχη, εκ μπουτ σοβαρή αρρώστια κι σπονδυλική στήλη, σο ανέλα λάκε μπαρέ δυσκολίες. Βόι βακερέλα ότι να τσσιναντάς ο έργος επειδή ναστί πφιρέλα λατσσές. Επίσης, βακερέλα: «Χρησιμοποιήναβα μπουτ τρόπους για τι κεράβ λάφι ι Ντεβλέσκε, σαρ ισί η μαρτυρία κατά τηλέφωνος ντα η ανεπίσημη μαρτυρία. Κάτι σο ντέλα-μαν μπουτ κουράγιος ισί ότι γραφίναβα σε εκ τετράδιος εδάφια ντα σκέψεις κατά έντυπα σο τθεράσα. Μπουτ φαρ, διαβάναβα-λεν ντα λάβα νεβί ζορ για τι συνεχίναβ τι τζουβντιάβ. Άμα ντάσα μπαρί προσοχή κο υποσχέσεις κι Ιεχωβάσκε, αρακχάσα πάλι αμαρό κουράγιος. Ο Ιεχωβά ισί πάντα οτθέ για τι βοηθίνελ-αμέν, σο-ντα τι τθεράσα». Οντουλά σο νακχένα μπορεί τι αβέν μπουτ διαφορετικά οντουλένταρ σο νακχέλα η Μπιάνκα ή η Πόλα. Αλλά μπορίνενα τι σκεφτίνεν σαρ ο Ιεχωβά ευλογιντάς εμ τουμέν εμ οντουλέν σο ισί πασέ τουμέντε. Καζόμ λατσσό ισί τι ανέν τουμαρέ γκοντιάτε σαρ ευλογιντάς-τουμέν ο Ιεχωβά ακανά, αλλά σαρ κα ευλογίνελ-τουμέν κο μέλλον-ντα!

20. Σο μπορίνασα τι μπεκλεντίνας άμα κα συνεχίνας τι κεράς ο πιο λατσσό σο μπορίνασα για τι υπηρετίνας ι Ιεχωβάς;

²⁰ Ποτές μα τι μπιστρέν-τουμέν ότι ο προσευχές σο κερένα αντράλ τουμαρέ γκίσταρ κα ευλογίντιβεν. Τι αβέν σίγουροι ότι, «αφού κερένα ι Ντεβλέσκο θέλημας», κα «λεν οντουλά σο βακερντάας ο Ντεβέλ ότι κα ντελ-τουμέν». (Εβραίους 10:​35, 36) Οτθάρ, τι συνεχίνας τι μπαριαράς αμαρί πίστη ντα τι κεράς ο πιο λατσσό σο μπορίνασα για τι υπηρετίνας ι Ιεχωβάς. Ισινάμ σίγουροι ότι ο Ιεχωβά κα ντελ-αμέν ευλογίες!​—Διαβάνεν Κολοσσαείς 3:​23, 24.