1, 2. Σαρ μπορίνελα τι βοηθίνελ-αμέν ο εδάφιος Ρωμαίους 5:12;

Ο ΕΔΑΦΙΟΣ Ρωμαίους 5:​12 βακερέλα: «Εκχέ τζενέσταρ αβιλί η αμαρτία κο ντουνιάς ντα κατά αμαρτία ο μεριπέ, ντα αντικάς ο μεριπέ γκιλό σαρέ κο τζενέ, επειδή σαρέ αμαρτιντέας». Ανταβά ισί εκ εδάφιος σο τζανάσα-λες λατσσές ντα χρησιμοποιήνασα-λες μπουτ φαρ όταν σικλιαράσα ι τζενέν κατά Γραφή.

² Ανταβά εδάφιος αρακχάσα-λες μπουτ φαρ κο βιβλίος Σο Μπορίνελα τι Σικλιαρέλ-αμέν η Αγία Γραφή; Όταν κεράσα μελέτη κατά κεφάλαια 3, 5 ντα 6 αμαρέ τσσαβέντζαρ ντα γιαβερέ τζενέντζαρ, συνήθως διαβάνασα ο εδάφιος Ρωμαίους 5:​12. Μπουτ φαρ χρησιμοποιήνασα ανταβά εδάφιος για τι βοηθίνας-λεν τι αγαβέν σόσκε η πφουβ νανέ παράδεισος, σόσκε χρειαζίντιβασα ο λύτρος ντα σόσκε μεράσα. Αλλά επίσης ανταβά εδάφιος μπορίνελα τι βοηθίνελ-αμέν σαριλέν τι μπαριαράς αμαρί εκτίμηση για τη σχέση σο τθεράσα ι Ιεχωβάσαρ. Μπορίνελα τι βοηθίνελ-αμέν τι αβάς πιο αποφασισμέ τι κεράς-Λες χαρούμενος ντα τι συνεχίνας τι μπεκλεντίνας ι πραγματένγκε σο ντινάς-αμέν πο λάφι.

3. Καβά πράγμας δεν πρέπει τι μπιστράς αμαρέ νεαυτόσκε;

 ³ Δυστυχώς, σαρέ ισινάμ αμαρτωλοί. Κεράσα λάθη κάθε ντιβές. Όμως ο Ιεχωβά σικαβέλα έλεος. Τζανέλα ότι ισινάμ ατελείς ντα μανγκέλα τι συγχωρίνελ-αμέν. (Ψαλμός 103:​13, 14) Ο Ιησούς βακερντάς αμένγκε ότι πρέπει τι μανγκάς κατά Ντεβέλ τι συγχωρίνελ αμαρέ αμαρτίες. (Λουκάς 11:​2-4) Όταν ο Ιεχωβά συγχωρίνελα ο λάθη σο κερντάμ, νανέ ανάγκη τι συνεχίνας τι σκεφτίνας-λεν. Για τι ντικχάς σαρ μπορίνελα ο Ιεχωβά τι συγχωρίνελ-αμέν.

4, 5. (α) Σο βοηθίνελα-αμέν τι αγαβάς ο εδάφιος Ρωμαίους 5:​12; (β) Σο μανγκέλα τι βακερέλ η φράση «λατσσιπέ σο να αξίνενα-λες»;

⁴ Ο βιβλίος Ρωμαίους, ντα πιο μπουτ ο κεφάλαιος 6, βοηθίνελα-αμέν τι αγαβάς σαρ μπορίνελα ο Ιεχωβά τι συγχωρίνελ αμαρέ αμαρτίες. Κο κεφάλαιος 3, σικλιάσα ότι “σαρέ αμαρτιντάμ”. Σοράν ο Παύλος εξηγίνελα: «Ισί λένγκε εκ δώρος σο βακέρντιλε δίκαιοι ι Ντεβλέσκε λατσσιμάσαρ σο να αξίνενα-λες, ντα ελευθερωσάλε αντράλ κατά λύτρος σο ποκιντάς ο Χριστός Ιησούς». (Ρωμαίους 3:​23, 24) Η μπαλαμανί λέξη σο μεταφρασάλι κο ρομανές «λατσσιπέ σο να αξίνενα-λες» σικαβέλα ότι κάποιος κερέλα κάτι μπουτ λατσσό εκχέ γιαβερέσκε χωρίς τι μανγκέλ παλάλ τίποτα λέσταρ, κάτι σο ο γιαβέρ τζενό να τθερέλας ο δικαίωμας τι λελ-λες ή να αξίνελας-λες.

⁵ Εκ μορφωμέ τζενό εξηγιντάς ότι ανταγιά μπαλαμανί λέξη μπουτ φαρ σικαβέλα οντουλά σο κερντάς ο Ντεβέλ ντα ο Χριστός για τι σώνεν ι τζενέν κατά αμαρτία ντα κατά μεριπέ. Για τι ντικχάς σο κερντάς αμένγκε ο Ντεβέλ ντα σαρ ο λατσσιπέ σο σικαβέλα αμένγκε χωρίς τι αξίνας-λες βοηθίνελα-αμέν ακανά ντα ντέλα-αμέν ελπίδα για το μέλλον.

6. Κον κα βοηθίντιβελ κατά λατσσιπέ σο σικαβέλα ο Ντεβέλ χωρίς τι αξίνας-λες, ντα σαρ κα αβέλ-πες ανταβά;

⁶ Επειδή ο Αδάμ αμαρτιντάς, η αμαρτία ντα ο μεριπέ επηρεαντέ σαρέ ι τζενέν οπράλ κι πφουβ. Οτθάρ η Αγία Γραφή βακερέλα ότι «με το λάθος σο κερντάς εκ τζενό, κυβερνιντάς ο μεριπέ». Αλλά ο Ιεχωβά σικαντάς μπαρό λατσσιπέ σο να αξίνασα-λες ντα αρακχλάς εκ τρόπος για τι σώνελ σαρέ ι τζενέν αντράλ «εκχέ τζενέσταρ, κατά Ιησούς Χριστός». (Ρωμαίους 5:​12, 15, 17) «Κα αβέν μπουτ τζενέ δίκαιοι επειδή εκ τζενό ασουντάς». Ντα μπορίνενα τι μπεκλεντίνεν ότι κα λεν ζωή για πάντα επειδή ο Ιησούς Χριστός μουλό αμένγκε.​—Ρωμαίους 5:​19, 21.

7. Σόσκε βακεράσα ότι ο λύτρος, σο ισί δώρος κατά Ντεβέλ, ισί εμ κάτι λατσσό εμ κάτι σο να αξίνασα-λες;

⁷ Σκεφτίνεν: Ο Ιεχωβά να ισινέ υποχρεωμέ τι ντελ πι Τσσαβές σαρ λύτρος. Αλλά σικαντάς μπαρό λατσσιπέ όταν ντινάς-αμέν ο λύτρος για τι σώνελ-αμέν κατά αμαρτία ντα κατά μεριπέ. Καέκ αμένταρ να αξίνελα οντουλά σο κερντάς αμένγκε ο Ντεβέλ ντα ο Ιησούς. Καζόμ μπουτ εκτιμίνασα σο ντινέ-αμέν ι ευκαιρία τι συγχωρίντιβεν αμαρέ αμαρτίες ντα τι τζουβντιάς για πάντα! Οτθάρ, ισί λατσσό τι σικαβάς αμαρί  εκτίμηση κο Ντεβέλ με το τρόπος σο τζουβντιάσα.

8. Καβά τρόπος σκέψης δεν πρέπει τι τθεράς;

⁸ Τζανάσα ότι ο Ντεβέλ μανγκέλα τι συγχωρίνελ ο αμαρτίες, ατζέ-ντα άμα ισί μπαρέ. Αλλά δεν πρέπει ποτές τι χρησιμοποιήνας ο λατσσιπέ σο σικαβέλα αμένγκε ο Ιεχωβά χωρίς τι αξίνας-λες σαρ εκ δικαιολογία για τι κεράς κάτι σο νανέ σωστός ντα τι σκεφτίνας ότι “ο Ιεχωβά κα συγχωρίνελ-μαν”. Κο πρώτος αιώνας, ατζέ-ντα όταν τζουβντιόνας μερικοί απόστολοι, υπαρχίντιβενας μερικοί Χριστιανοί σο σκεφτίνενας αντικάς. (Διαβάνεν Ιούδα 4) Αντιβές, πρέπει τι αβάς προσεκτικοί για μα τι επηρεάνεν-αμέν ο γιαβερά ντα σιγά σιγά τι αρχίνας τι σκεφτίνας αμέν-ντα αντικάς.

9, 10. Σαρ ελευθερωσάλε ο Παύλος ντα γιαβερά τζενέ κατά αμαρτία ντα κατά μεριπέ;

⁹ Ο Παύλος βακερντάς κο Χριστιανοί ότι κα αβέλας λάθος τι σκεφτίνεν ότι, άμα κα συνεχίνενας τι αμαρτίνεν, ο Ντεβέλ κα συγχωρίνελας-λεν πάλι. Ο Παύλος βακερντάς λένγκε ότι δεν πρέπει τι σκεφτίνεν αντικάς επειδή “μουλέας σαρέ κο πράγματα σο τθερένα τι κερέν με την αμαρτία”. (Διαβάνεν Ρωμαίους 6:​1, 2) Όμως, σο μανγκέλας τι βακερέλ;

¹⁰ Ο Ντεβέλ, αντράλ κατά λύτρος, συγχωριντάς ο αμαρτίες ι Παυλόσκε ντα γιαβερέ Χριστιανόνγκε κο πρώτος αιώνας. Ο Ιεχωβά ντινάς-λεν πο άγιος πνεύμας για τι αβέν λέσκε τσσαβέ. Άμα κα ατσσόνας πιστοί, κα τζουβντιόνας κο ουρανός ντα κα κυβερνίνενας ι Χριστόσαρ. Αλλά αφού τζουβντιόνας ατζέ κι πφουβ, σαρ ισινέ “μουλέ σαρέ κο πράγματα σο τθερένα τι κερέν με την αμαρτία”; Ο Παύλος κερντάς εκ σύγκριση για τι σικαβέλ ότι ο τρόπος σο τζουβντιόνας αλλαξάλοας ντιπ. Βοβ βακερντάς ότι, αφού μουλό ο Ιησούς, αναστισάλο σαρ εκ πνεύμας σο να κα μπορίνελας τι μερέλ ποτές. Οντουλέσκε ο μεριπέ “να κερέλας-λες κουμάντος”. Αντικάς ο Χριστιανοί-ντα αβιλέ σαρ μουλέ. Λένγκε ζωές αλλαξάλε ντιπ επειδή να μουκχένας τι κερέν-λεν κουμάντος ο αμαρτωλά πράγματα σο μανγκένας. Από αζομάν, κερένας ο πιο λατσσό σο μπορίνενας για τι τζουβντιόν με εκ τρόπος σο μπεϊντίνελας ο Ντεβέλ. Ισινέ «μουλέ σαρέ κο πράγματα σο τθερένα τι κερέν με την αμαρτία αλλά τζουβντιόνας σαρέ κο πράγματα σο τθερένα τι κερέν ι Ντεβλέσαρ μέσω του Ιησού Χριστού».​—Ρωμαίους 6:9, 11.

11. Σαρ ο Χριστιανοί αμαρέ ντιβεσέντε “μουλέ σαρέ κο πράγματα σο τθερένα τι κερέν με την αμαρτία”;

¹¹ Σο κα βακεράς αμένγκε; Σαρ “μουλάμ σαρέ κο πράγματα σο τθερένα τι κερέν με την αμαρτία”; Πριν τι αβάς Χριστιανοί, μπορεί τι κερντάμας μπουτ φαρ λάθος πράγματα χωρίς τι τζανάς σαρ ντικχέλας-λεν ο Ιεχωβά. Ισινάμας σαρ «δούλοι κο μαγαριπέ ντα κι παρανομία», δηλαδή «δούλοι κι αμαρτία». (Ρωμαίους 6:​19, 20) Αλλά όταν σικλιλάμ κατά Γραφή σαρ μανγκέλα τι τζουβντιάς ο Ντεβέλ, κερντάμ αλλαγές αμαρέ ζωγιάτε, αφιερωσάλαμ λέστε ντα μπολντιλάμ. Μανγκάας αντράλ αμαρέ γκίσταρ τι ντας καν κο Ιεχωβά ντα τι τζουβντιάς αντικάς σαρ μπεϊντίνελα. “Ελευθερωσάλαμ κατά αμαρτία” ντα “αβιλάμ δούλοι κι δικαιοσύνη”.​—Ρωμαίους 6:​17, 18.

12. Σο μπορίνελα τι τραμπίνελ ο κάθε εκ αμένταρ;

¹² Πάλι όμως, τθεράσα ανάγκη τι τραμπίνας σο κα κεράς. Ο Παύλος βακερντάς: «Μα μουκχέν ι αμαρτία τι κερέλ κουμάντος τουμαρέ σώματα, σο ισί τι μερέν, ντα μα τι κερέν οντουλά σο μανγκένα τουμαρέ σώματα». (Ρωμαίους 6:​12) Κα μπορίναας  είτε τι μουκχάς ο λάθος πράγματα σο σκεφτίνασα ντα μανγκάσα τι κερέν-αμέν κουμάντος είτε τι κεράς-λεν κουμάντος αμέν. Πουτσέν τουμαρό νεαυτός: “Μήπως κεράβα κάτι σο νανέ λατσσό επειδή μουκχάβα μο νεαυτός τι μανγκέλ αζόμ μπουτ ο λάθος πράγματα; Ή μήπως νασκιαράβα ασακέ σκέψεις αμέσως;” Άμα εκτιμίνασα αντράλ αμαρέ γκίσταρ ο λατσσιπέ ι Ντεβλέσκο σο να αξίνασα-λες, κα κεράς ο πιο λατσσό σο μπορίνασα για τι κεράς-λες τι χαιρίνελ.

13. Σόσκε μπορίνασα τι αβάς σίγουροι ότι μπορίνασα τι κεράς ο σωστός;

¹³ Κο πρώτος αιώνας, μερικά τζενέ κι Κόρινθος ισινέ τσορά, τζάνας μουρσά μουρσέντζαρ, σοβένας γιαβερέντζαρ ενώ ισινέ παντριμέ, πακιάνας κο είδωλα ντα κο εικόνες ντα ματιόνας. Παρ’ όλα αυτά, γνωριντέ ι Ιεχωβάς, μανγκλέ-λες ντα αλλαξάλε. Λατζασάλε οντουλένγκε σο κερντέας. (Ρωμαίους 6:​21· 1 Κορινθίους 6:​9-11) Ο Χριστιανοί-ντα κι Ρώμη έπρεπε τι κερέν ασακέ αλλαγές. Ο Παύλος βακερντάς λένγκε: «Ούτε τι ντεν τουμαρέ σώματα κι αμαρτία σαρ εργαλεία σο κερένα ι αδικία, αλλά τι ντεν τουμαρό νεαυτός κο Ντεβέλ σαρ οντουλά σο τζουβντιόνα κατά μουλέ, ντα τουμαρέ σώματα κο Ντεβέλ σαρ εργαλεία σο κερένα δίκαια πράγματα». (Ρωμαίους 6:​13) Ο Παύλος ισινέ σίγουρος ότι μπορίνενας τι κερέν ο σωστός ντα τι συνεχίνεν τι βοηθίντιβεν κατά λατσσιπέ σο σικαβέλα ο Ντεβέλ χωρίς τι αξίνεν-λες.

14, 15. Σο πρέπει τι πουτσάς αμαρό νεαυτός;

¹⁴ Ανταβά αβέλα-πες αντιβές-ντα. Μερικά πφραλά ντα πφενιά μπορεί τι τζουβντιλέας σαρ τζουβντιόνας οντουλά τζενέ κι Κόρινθος. Αλλά αφού σικλιλέ ι Ιεχωβάς, αλλαξάλε. Ισινέ σαρ τι τθοντέ-πες ντα τι καθαρισάλε. Για τι κεράς χαρούμενος ι Ιεχωβάς, σαρέ κερντάμ αλλαγές αμαρέ ζωγιάτε. Ντα συνεχίνασα τι μανγκάς τι σικαβάς κο Ντεβέλ καζόμ μπουτ εκτιμίνασα ο λατσσιπέ σο σικαβέλα αμένγκε χωρίς τι αξίνας-λες. Οτθάρ, ισινάμ αποφασισμέ τι τζας κόντρα κο λάθος πράγματα σο μανγκάσα ντα τι χρησιμοποιήνας αμαρί ζωή για τι υπηρετίνας ι Ιεχωβάς.

¹⁵ Όμως, αμέν δεν πρέπει τι κεράς ο σοβαρές αμαρτίες σο κερντέας οντουλά τζενέ κι Κόρινθος. Ναστί αβέλα-πες τι κεράς ασακέ πράγματα ντα τι μπεσάς κατά Ντεβέλ τι σικαβέλ αμένγκε λατσσιπέ σο να αξίνασα ντα τι συγχωρίνελ-αμέν. Αλλά σο κα βακεράς ι αμαρτιένγκε σο μερικοί πακιάνα ότι νανέ αζόμ σημαντικές; Ισινάμ αποφασισμέ τι κεράς σο-ντα νακχέλα αμαρέ βαστέσταρ για τι ντας καν ι Ιεχωβάς σαρέ κο πράγματα;​—Ρωμαίους 6:​14, 17.

16. Σαρ τζανάσα ότι δεν πρέπει τι κεράς ατζέ-ντα οντουλά αμαρτίες σο νανέ γραμμέ κο εδάφια 1 Κορινθίους 6:​9-11;

¹⁶ Σκεφτίνεν τον απόστολο Παύλο. Βοβ γραφιντάς: «Ισινόμ τζενό, μπικιντό κι αμαρτία. Επειδή να αγαβάβα σο κεράβα. Να κεράβα ο πράγματα σο μανγκάβα, αλλά κεράβα οντουβά σο μισίναβα». (Ρωμαίους 7:​14, 15) Παρόλο σο να κερέλας ο πράγματα σο ισί κο εδάφια 1 Κορινθίους 6:​9-11, ο Παύλος βακερντάς ότι συνεχίνελας τι αμαρτίνελ.  Μανγκέλας τι κερέλ χαρούμενος ι Ιεχωβάς, οτθάρ κερέλας αγώνας για μα τι κερέλ λάθος πράγματα. (Διαβάνεν Ρωμαίους 7:​21-23) Μακάρι τι ακολουθίνας λέσκο παράδειγμας ντα τι κεράς σο νακχέλα αμαρέ βαστέσταρ για τι ντας καν ι Ιεχωβάς.

17. Σόσκε μανγκένα τι αβέν τίμιοι;

¹⁷ Για παράδειγμας, τζανάσα ότι για τι υπηρετίνας ι Ιεχωβάς πρέπει τι αβάς τίμιοι. (Διαβάνεν Παροιμίες 14:5· Εφεσίους 4:​25) Να μανγκάσα τι μοιάζας κο Σατανάς, σο ισί «ο ντατ ι ψεμάσκο». Ντα ντάσα-αμέν γκοντί ότι ο Ανανίας ντα λέσκι ρομνί μουλέ επειδή βακερντέ ψέματα. Οτθάρ, να βακεράσα ψέματα. (Ιωάννης 8:​44· Πράξεις 5:​1-11) Όμως, για τι αβάς τίμιοι, να ερεσέλα σάντε μα τι βακεράς ψέματα. Άμα εκτιμίνασα μπαγιά ο λατσσιπέ ι Ντεβλέσκο σο να αξίνασα-λες, κα αβάς τίμιοι με γιαβερά-ντα τρόπους.

18, 19. Σο μανγκέλα τι βακερέλ ότι πρέπει τι αβάς τίμιοι;

¹⁸ Κάποιος κα μπορίνελας, ατζέ-ντα άμα να κα βακερέλας ψέματα μα τι αβέλ τίμιος. Για παράδειγμας, ο Ιεχωβά βακερντάς κο Ισραηλίτες: «Δεν πρέπει τι τσορέν, δεν πρέπει τι χουχαβέν, δεν πρέπει τι συμπεριφερίντιβεν πφιρνιμάσαρ ο εκ κο γιαβέρ». Σόσκε έπρεπε τι κερέν-λες ανταβά; Ο Ιεχωβά βακερντάς: «Πρέπει τι αβέν άγιοι, επειδή με,  ο Ιεχωβά τουμαρό Ντεβέλ, ισινόμ άγιος». (Λευιτικό 19:2, 11) Παρόλο σο μπορεί μα τι βακεράς ψέματα, άμα κα κεράς ι γιαβερέν τι πακιάν κάτι σο νανέ μπαγιά, να ισινάμ τίμιοι.

¹⁹ Για παράδειγμας, εκ τζενό βακερέλα πι αφεντικόσκε ή οντουλένγκε σο κερένα λέσαρ μπουτί ότι πρέπει τι νασέλ κατά μπουτί πιο τζανγκλέ επειδή πρέπει τι τζαλ κο γιατρός. Αλλά νανέ ανταβά ο πραγματικός λόγος. Μανγκέλα τι νασέλ πιο τζανγκλέ για διακοπές. Όταν βακερντάς ότι πρέπει τι τζαλ κο «γιατρός», μανγκέλας τι βακερέλ ότι κα σταματίνελ χάνικ κο φαρμακείος ή κο γιατρός για τι ποκινέλ-λες. Ισί τίμιος ανταβά τζενό ή χουχαβέλα ι γιαβερέν; Κερντάς ι γιαβερέν τι πακιάν κάτι σο νανέ μπαγιά. Μερικές φορές, ο τζενέ χουχαβένα ι γιαβερέν για τι λεν κάτι σο μανγκένα ή για μα τι τιμωρίντιβεν. Όμως αμέν ντάσα καν ι Ιεχωβάς, σο βακερντάς: «Δεν πρέπει τι χουχαβέν». Μανγκάσα τι κεράς οντουβά σο βακερέλα ότι ισί σωστός ντα άγιος.​—Ρωμαίους 6:19.

20, 21. Άμα εκτιμίνασα ο λατσσιπέ ι Ντεβλέσκο σο να αξίνασα-λες, σο γιαβέρ δεν πρέπει τι κεράς;

²⁰ Αμέν σίγουρα να τζάσα γιαβερέντζαρ, να ματιάσα ντα να κεράσα γιαβερά μπαρέ αμαρτίες. Όμως ανταβά σο μανγκάσα πιο μπουτ ισί μα τι κεράς τίποτα σο κα στεναχωρίνελας ι Ιεχωβάς. Για παράδειγμας, αμέν να τζάσα γιαβερέντζαρ, αλλά ούτε μανγκάσα τι διασκεδάνας μπέτι πραγματέντζαρ. Να ματιάσα, αλλά ούτε αβάσα κο κέφια. Μπορεί τι χρειαζίντιβελ μπαρί προσπάθεια για τι τζας κόντρα ασακέ πραγματέντζαρ, αλλά μπορίνασα τι καταφερίνας-λεν.

²¹ Αμαρό στόχος ισί τι κεράς οντουβά σο βακερντάς ο Παύλος: «Μα μουκχέν ι αμαρτία τι κερέλ κουμάντος τουμαρέ σώματα, σο ισί τι μερέν, ντα μα τι κερέν οντουλά σο μανγκένα τουμαρέ σώματα». (Ρωμαίους 6:​12· 7:​18-20) Ισί μπαγιά ότι κα κεράς μερικές αμαρτίες. Αλλά όταν προσπαθίνασα μπουτ τι τζας κόντρα κι αμαρτία, σικαβάσα ότι εκτιμίνασα μπαγιά ο λατσσιπέ σο σικαντάς αμένγκε ο Ντεβέλ ντα ο Χριστός χωρίς τι αξίνας-λες.

22. Σο ευλογίες μπεκλεντίνασα τι τθεράς άμα εκτιμίνασα μπαγιά ο λατσσιπέ ι Ντεβλέσκο σο να αξίνασα-λες;

²² Ο Ιεχωβά συγχωριντάς αμαρέ αμαρτίες ντα μπορίνελα τι συνεχίνελ τι συγχωρίνελ-λεν. Καζόμ μπουτ εκτιμίνασα ο λατσσιπέ ι Ντεβλέσκο σο να αξίνασα-λες! Οτθάρ, ισί λατσσό τι κεράς μπαρί προσπάθεια για μα τι κεράς πράγματα σο βακερέλα ότι νανέ σωστά, ατζέ-ντα άμα ο γιαβερά τζενέ βακερένα ότι νανέ αμαρτίες. Σο ευλογίες μπεκλεντίνασα άμα κα κεράς-λες ανταβά; Ο Παύλος βακερντάς: «Ακανά σο ελευθερωσάλεν κατά αμαρτία ντα αβιλέν δούλοι ι Ντεβλέσκε, τουμαρό καρπός ισί η αγιότητα, ντα γκερέλα-τουμέν εκχέ ζωγιάτε σο κα τζουβντιόν για πάντα».​—Ρωμαίους 6:22.