1, 2. (α) Σόσκε μπουτ φορές ανησυχίνασα; (Ντικχ ι φωτογραφία σο ισί κι αρχή.) (β) Σο κα ντικχάς ανταλέ μαθημάστε;

ΑΝΤΙΒΕΣ, ο Σατανάς ισί σαρ εκ «λιοντάρι σο ρόντελα τι χαλ εκχέ τζενές». (1 Πέτρου 5:8· Αποκάλυψη 12:​17) Οτθάρ, η ζωή ισί πφερντί άγχος, ντα μπουτ φορές ατζέ-ντα ο υπηρέτες ι Ντεβλέσκε ανησυχίνενα. Ο υπηρέτες ι Ντεβλέσκε κο παρελθόν-ντα ανησυχίνενας. Για παράδειγμας, η Αγία Γραφή βακερέλα ότι ο Βασιλιάς Δαβίδ μερικές φορές ανησυχίνελας. (Ψαλμός 13:2) Επίσης ο απόστολος Παύλος “ανησυχίνελας σαρέ ι εκκλησιένγκε”. (2 Κορινθίους 11:​28) Αλλά σο μπορίνασα τι κεράς όταν τασαβένα-αμέν ο ανησυχίες;

² Αμαρό λατσσό Ντατ βοηθίνελας πι υπηρετόν κο παρελθόν μα τι ανησυχίνεν μπουτ, ντα μανγκέλα τι κερέλ ο ίδιος αμέντζαρ-ντα αντιβές. Η Γραφή βακερέλα αμένγκε: “Μουκχέν οπρά-λέστε σο-ντα πρόβλημας κερέλα-τουμέν τι ανησυχίνεν, σόσκε βοβ πφαμπόλα τουμένγκε”. (1 Πέτρου 5:7) Σαρ μπορίνενα, όμως, τι κερέν-λες ανταβά; Κα ντικχάς σταρ τρόπους. Μπορίνενα (1) τι κερέν προσευχή, (2) τι διαβάνεν ο Λάφι ι Ντεβλέσκο ντα τι σκεφτίνεν-λες, (3) τι μουκχέν ο άγιος πνεύμας ι Ιεχωβάσκο τι βοηθίνελ-τουμέν  ντα (4) τι κερέν λάφι εκχέ τζενέσαρ σο ντένα λέσκε μπέσα. Ακανά σο κα ντικχάς ανταλά σταρ πράγματα, προσπαθίνεν τι αρακχέν κατέ μανγκένα βελτίωση.

3. Σαρ μπορίνενα τι “μουκχέν κο Ιεχωβά ο βάρος σο βάντενα”;

³ Ο πρώτος τρόπος σο μπορίνασα τι μουκχάς αμαρέ ανησυχίες κο Ιεχωβά ισί με την προσευχή σο κεράσα αντράλ αμαρέ γκίσταρ. Όταν ανησυχίνενα, τουμαρό λατσσό Ντατ, σο ισί κο ουρανός, μανγκέλα τι πουτρέν τουμαρό γκι λέστε σαρέ οντουλένγκε σο αισθάνενα. Ο ψαλμωδός Δαβίδ μολιντάς ι Ιεχωβάς: «Ασούν, Ντέβλα, μι προσευχή». Κο ίδιος ψαλμός, ο Δαβίδ βακερντάς: «Μουκχ κο Ιεχωβά ο βάρος σο βάντεσα, ντα βοβ κα στηρίνελ-τουτ». (Ψαλμός 55:1, 22) Αφού κερντέν σο νακχέλα τουμαρέ βαστέσταρ για τι λύνεν εκ πρόβλημας, κα βοηθίντιβεν πιο μπουτ άμα κα κερέν προσευχή κο Ιεχωβά ντα όχι άμα ανησυχίνενα. Αλλά σο λατσσιπέ κερέλα αμένγκε η προσευχή; Σαρ μπορίνελα τι βοηθίνελ-αμέν μα τι χασαράς αμαρό κουράγιος επειδή ανησυχίνασα;​—Ψαλμός 94:​18, 19.

4. Όταν ανησυχίνασα, σόσκε ισί μπουτ σημαντική η προσευχή;

⁴ Διαβάνεν Φιλιππησίους 4:​6, 7. Σαρ απαντίνελα ο Ιεχωβά όταν συνεχίνασα τι κεράς προσευχές αντράλ αμαρέ γκίσταρ; Μπορίνελα τι βοηθίνελ-αμέν τι νιωθίνας ήρεμοι ντα μα τι τθεράς μπέτι σκέψεις ντα αισθήματα. Αντί τι ανησυχίνας ντα τι νταράς, ο Ντεβέλ βοηθίνελα-αμέν τι τθεράς ι πιο μπαρί ειρήνη σο κα μπορίναας ποτές τι τθεράς αντρ’ αμέντε. Μπουτ πφραλά ντα πφενιά νιωσάλε ανταγιά ηρεμία. Ανταβά μπορεί τι νιωθιντέν-λες τουμέν-ντα. «Η ειρήνη ι Ντεβλέσκι» μπορίνελα τι βοηθίνελ-τουμέν τι νακχαβέν σο-ντα δυσκολία τθερένα! Μπορίνενα τι τθερέν σαρί τουμαρί εμπιστοσύνη κο λάφι σο ντινάς ο Ιεχωβά: «Μα ανησυχίνεν, σόσκε με ισινόμ το Ντεβέλ. Κα νταβ-τουτ ζορ. Βα, κα βοηθίναβ-τουτ».​—Ησαΐας 41:10.

5. Σαρ μπορίνελα ο Λάφι ι Ντεβλέσκο τι βοηθίνελ-τουμέν τι τθερέν ειρήνη αντρέ τουμέντε;

⁵ Εκ δεύτερος τρόπος για τι τθεράς ειρήνη αντρ’ αμέντε ισί τι διαβάνας ντα τι σκεφτίνας εδάφια κατά Γραφή. Σόσκε ισί σημαντικός ανταβά; Η Γραφή ισί ο Λάφι ι Ντεβλέσκο. Οντουβά σο κερντάς-αμέν γραφιντάς αντρέ κι Γραφή συμβουλές σο ισί σοφές ντα βοηθίνενα-αμέν. Κάθε φαρ σο ανησυχίνενα, μπορίνενα τι ανέν τουμαρέ γκοντιάτε ο βαθιές σκέψεις ι Ντεβλέσκε ντα τι σκεφτίνεν σαρ μπορίνενα τι ντεν-τουμέν δύναμη λέσκε συμβουλές. Ανταβά μπορίνελα τι βοηθίνελ-τουμέν τι νακχαβέν ι ανησυχία, μα τι ανησυχίνεν μπουτ ή ατζέ-ντα μα τι ανησυχίνεν ιτς. Ο Ιεχωβά βακερέλα αμένγκε ότι, όταν διαβάνασα λέσκο Λάφι, βοηθίντιβασα “τι τθεράς θάρρος ντα τι αβάς ζουρανέ” ντα μα τι “νταράς ούτε τι χασαράς αμαρό κουράγιος”.​—Ιησούς του Ναυή 1:​7-9.

6. Σαρ μπορίνενα τι βοηθίνεν-τουμέν ο λάφια ι Ιησούσκε;

⁶ Κο Λάφι κι Ντεβλέσκο, διαβάνασα σαρ κερέλας λάφι ο Ιησούς κο τζενέ. Βον μπεϊντίνενας μπουτ τι ασουνέν-λες επειδή λέσκε  λάφια ντένας παρηγοριά ντα κουράγιος, ντα πιο μπουτ οντουλέντε σο να τθερένας ζορ ντα ισινέ μπουτ στεναχωριμέ. (Διαβάνεν Ματθαίος 11:​28-30) Ο Ιησούς ενδιαφερίντιβελας μπουτ για το αισθήματα ι γιαβερένγκε. (Μάρκος 6:​30-32) Σαρ ντινάς πο λάφι ο Ιησούς κο απόστολοι σο ισινέ λέσαρ ότι κα βοηθίνελας-λεν, αντικάς κα βοηθίνελ αμέν-ντα αντιβές. Νανέ ανάγκη τι αβέλ ατθέ ο Ιησούς για τι βοηθίντιβας. Ο Ιησούς, αμαρό Βασιλιάς κο ουρανός, συνεχίνελα τι σικαβέλ αμένγκε αγάπη. Οτθάρ, όταν ανησυχίνενα, μπορίνενα τι αβέν σίγουροι ότι κα αβέλ πασέ τουμέντε ντα κα βοηθίνελ-τουμέν όταν τθερένα ανάγκη. Ο Ιησούς ντέλα-αμέν ελπίδα ντα θάρρος, σο βοηθίνενα-αμέν τι ντας-λεν πέρα με την ανησυχία.​—Εβραίους 2:​17, 18· 4:16.

7. Σαρ βοηθίντιβασα κατά άγιος πνεύμας ι Ντεβλέσκο;

⁷ Ο Ιησούς ντινάς πο λάφι ότι αμαρό Ντατ κα ντελ-αμέν ο άγιος πνεύμας όταν κα μανγκάς-λες λέσταρ. (Λουκάς 11:​10-13) Σαρ κα βοηθίνελ-αμέν ανταβά τρίτος τρόπος μα τι ανησυχίνας μπουτ; Ο άγιος πνεύμας ι Ντεβλέσκο, ή γιαβέρτουλους η μπαρί ζορ λέσκι, βοηθίνελα-αμέν τι τθεράς ο λατσσέ ιδιότητες σο τθερέλα αμαρό ζουρανό Ντεβέλ. (Κολοσσαείς 3:​10) Κι Γραφή, ανταλά ιδιότητες βακέρντιβενα «καρπός του πνεύματος». (Διαβάνεν Γαλάτες 5:​22, 23) Όταν προσπαθίνασα τι τθεράς ανταλά λατσσέ ιδιότητες, αμαρί σχέση ι γιαβερέντζαρ κα αβέλ πιο λατσσί, ντα κα νασάς κατά πράγματα σο κα μπορίνενας τι κερέν-αμέν τι ανησυχίνας. Για τι ντικχάς σαρ κα βοηθίνελ-αμέν ο καρπός του πνεύματος συγκεκριμέ πραγματέντε.

8-12. Σαρ μπορίνελα τι βοηθίνελ-τουμέν ο καρπός του πνεύματος ι Ντεβλέσκο;

⁸ «Αγάπη, χαρά, ειρήνη». Όταν συμπεριφερίντιβενα κο γιαβερά με σεβασμός, κα ντικχέν ότι να ανησυχίνενα μπουτ. Σόσκε; Όταν μανγκένα ι γιαβερέν σαρ πφραλά, πφαμπόνα λένγκε ντα εκτιμίνενα-λεν, κα μπορίνεν τι νασέν πραγματένταρ σο ανένα μπέτι αισθήματα σαρ ισί η χολί, η απογοήτευση ντα ο άγχος. Ανταβά κα βοηθίνελ-τουμέν τι τθερέν ειρήνη ι γιαβερέντζαρ.​—Ρωμαίους 12:10.

⁹ «Υπομονή, λατσσιπέ, αγαθότητα [τι αβάς μπουτ λατσσέ αντρέ αμαρέ γκίστε]». Η Γραφή βακερέλα: «Τι σικαβέν λατσσιπέ ντα τι βοηθίνεν ο εκ ι γιαβερές με αγάπη, ντα τι συγχωρίνεν ο εκ ι γιαβερές αντράλ τουμαρέ γκίσταρ». (Εφεσίους 4:​32) Όταν κεράσα αμαρέ ζωγιάτε ανταγιά συμβουλή, κα τθεράς ειρήνη ι γιαβερέντζαρ, ντα κα νασάς πραγματένταρ σο μπορεί τι κερέν-αμέν τι ανησυχίνας. Επίσης, κα αβέλ πιο εύκολος τι αντιμετωπίνας ο προβλήματα σο αβένα επειδή ισινάμ ατελείς.

¹⁰ «Πίστη». Αντιβές μπουτ φαρ ανησυχίνασα ι λοβένγκε ντα γιαβερέ πραγματένγκε. (Παροιμίες 18:​11) Σαρ μπορίνασα τι νασκιαράς ανταγιά ανησυχία; Πρέπει τι κεράς ι συμβουλή σο ντινάς ο απόστολος Παύλος τι αβάς “ικανοποιημέ οντουλέντζαρ σο τθεράσα”. Η ζουρανί πίστη κο Ιεχωβά κα βοηθίνελ-αμέν τι τθεράς εμπιστοσύνη ότι κα ντελ-αμέν αντράλ πι γκίσταρ ο πράγματα σο χρειαζίντιβασα. Βοβ ντινάς πο λάφι: «Να κα μουκχάβ-τουτ ούτε κα παρατίναβ-τουτ». Οτθάρ, αμέν-ντα σαρ ο απόστολος Παύλος μπορίνασα τι βακεράς: «Ο Ιεχωβά ισί  μο βοηθός· να κα νταράβ. Σο μπορίνενα τι κερέν-μαν ο τζενέ;»​—Εβραίους 13:​5, 6.

¹¹ «Πραότητα [τι ατσσάς ήρεμοι], εγκράτεια [τι ατσσικιαράς αμαρό νεαυτός]». Σκεφτίνεν καζόμ μπουτ βοηθίντιβενα όταν ατσσόνα ήρεμοι ντα ατσσικιαρένα τουμαρό νεαυτός. Ανταλά ιδιότητες κα βοηθίνεν-τουμέν μα τι κερέν πράγματα ή τι βακερέν λάφια σο κα κερένας-τουμέν τι ανησυχίνεν, ντα κα βοηθίντιβεν τι πάλντεν “ι χολί, ι κακία, ο νεύρα, ο βίκος ντα ο λάφια σο προσβαλίνενα”.​—Εφεσίους 4:31.

¹² Χρειαζίντιβενα ταπεινοφροσύνη για τι τθερέν εμπιστοσύνη κο “ζουρανό βας κι Ντεβλέσκο” ντα για τι “μουκχέν οπρά-λέστε σο-ντα πρόβλημας κερέλα-τουμέν τι ανησυχίνεν”. (1 Πέτρου 5:​6, 7) Άμα ισινέν ταπεινοί, ο Ιεχωβά κα στηρίνελ-τουμέν ντα κα αρακχαβέλ-τουμέν. Όταν αγαβένα σο μπορίνενα ντα σο να μπορίνενα τι κερέν, να κα στηρίντιβεν τουμαρέ νεαυτόστε. Να κα ανησυχίνεν μπουτ, επειδή κα στηρίντιβεν κο Ντεβέλ.​—Μιχαίας 6:8.

13. Σο μανγκέλας τι βακερέλ ο Ιησούς όταν βακερντάς: «Ποτές μα τι ανησυχίνεν»;

¹³ Κο εδάφιος Ματθαίος 6:​34 (διαβάνεν), αρακχάσα ι σοφή συμβουλή ι Ιησούσκι: «Ποτές μα τι ανησυχίνεν». Μπορεί τι αμντίνασα ότι ναστί κεράσα ανταγιά συμβουλή. Όμως σο μανγκέλας τι βακερέλ ο Ιησούς; Σικλιλάμ ότι εμ ο Δαβίδ εμ ο Παύλος ανησυχίνενας κάποιες φορές. Ο Ιησούς να μανγκέλας τι βακερέλ ότι εκ τζενό σο υπηρετίνελα ι Ντεβλές να κα τθερέλας ποτές ανησυχίες. Αντίθετα, ο Ιησούς βοηθιντάς πι μαθητέν τι αγαβέν ότι ο προβλήματα να λύντιβενα όταν ανησυχίνασα μπουτ ή σινανέ. Ο κάθε ντιβές τθερέλα πο δυσκολίες, οτθάρ ο Χριστιανοί νανέ ανάγκη τι σκεφτίνεν ο προβλήματα σο τθερένας κο παρελθόν ή οντουλά σο κα αβέν λένγκε κο μέλλον ντα αντικάς τι τσσουβέν οπρά-πουμέντε γιαβερά-ντα ανησυχίες. Σαρ μπορίνελα η συμβουλή ι Ιησούσκι τι βοηθίνελ-τουμέν μα τι ανησυχίνεν μπουτ;

14. Σαρ ο Δαβίδ, σαρ μπορίνενα τουμέν-ντα μα τι ανησυχίνεν μπουτ;

¹⁴ Μερικές φορές ο τζενέ ανησυχίνενα μπουτ επειδή κερντέ λάθη κο παρελθόν. Μπορεί τι τθερένα μπαρέ τύψεις για εκ λάθος, ατζέ-ντα άμα κερντέ-λες πριν μπουτ μπρεσά. Ισινέ φορές σο ο Βασιλιάς Δαβίδ νιωθίνελας ότι τασαβένας-λες ο λάθη σο κερντάας. Βακερντάς: «Μο γκι ανησυχίνελα ντα κερέλα-μαν τι νταβ βίκος ντουκχάσαρ». (Ψαλμός 38:3, 4, 8, 18) Οντουλέ περιπτωσιάτε, ο Δαβίδ κερντάς κάτι μπουτ σοφός. Τθερέλας εμπιστοσύνη κο Ιεχωβά ότι κα σικαβέλας λέσκε έλεος ντα κα συγχωρίνελας-λες. Ντα μετά ο Δαβίδ ισινέ ευτυχισμέ  επειδή τζανέλας ότι ο Ντεβέλ συγχωριντάας-λες.​—Διαβάνεν Ψαλμός 32:​1-3, 5.

15. (α) Σο γιαβέρ σικλιάσα κατά Δαβίδ; (β) Σο μπορίνενα τι κερέν για μα τι ανησυχίνεν μπουτ; (Ντικχ ο πλαίσιος « Μερικά Πράγματα σο Μπορίνενα τι Κερέν για μα τι Ανησυχίνεν Μπουτ».)

¹⁵ Γιαβερά φορές, μπορεί τι ανησυχίνεν ι πραγματένγκε σο αβένα-πες ακανά. Για παράδειγμας, όταν ο Δαβίδ γραφιντάς ο Ψαλμός 55, νταρέλας ότι μπορεί τι μουνταρένας-λες. (Ψαλμός 55:​2-5) Όμως, να μουκχλάς κο ανησυχίες τι κερέν-λες μα τι αβέλ σίγουρος ι Ιεχωβάσκε. Ο Δαβίδ μολιντάς ι Ιεχωβάς τι βοηθίνελ-λες κο προβλήματα σο τθερέλας, αλλά επίσης αγαβέλας ότι ισινέ μπουτ σημαντικός τι κερέλ κάτι βοβ-ντα. (2 Σαμουήλ 15:​30-34) Τουμέν μπορίνενα τι λεν εκ μάθημας κατά Δαβίδ. Αντί τι μουκχέν τι τασαβέν-τουμέν ο ανησυχίες, κερέν σο νακχέλα τουμαρέ βαστέσταρ για τι λύνεν ο πρόβλημας, ντα τθερέν εμπιστοσύνη κο Ιεχωβά ότι κα φροντίνελ-τουμέν.

16. Σαρ μπορίνελα η σημασία σο τθερέλα ι Ντεβλέσκο ναβ τι κερέλ τουμαρί πίστη πιο ζουρανί;

¹⁶ Μερικές φορές εκ Χριστιανός μπορεί τι ανησυχίνελα για προβλήματα σο μπορεί τι αβέν κο μέλλον. Όμως, νανέ ανάγκη τι ανησυχίνεν για πράγματα σο να αβιλέ-πες ατζέκ. Σόσκε; Επειδή μπουτ φαρ, ο πράγματα να αβένα αζόμ μπέτι καζόμ σκεφτίναας-λεν. Επίσης, τι ντεν-τουμέν γκοντί ότι ο Ντεβέλ μπορίνελα τι κερέλ κουμάντος σαρέ ο πράγματα σο αβένα-πες. Ο ίδιος ο ναβ ι Ντεβλέσκο μανγκέλα τι βακερέλ «Βοβ Κερέλα τι Αβέλ-πες». (Έξοδος 3:​14) Οτθάρ, να χρειαζίντιβελα τι ανησυχίνας για το μέλλον, επειδή ο ναβ ι Ντεβλέσκο σικαβέλα αμένγκε ότι σαρέ οντουλά σο τθερέλα πι γκοντιάτε ι τζενένγκε κα αβέν-πες μπαγιά. Μπορίνενα τι αβέν σίγουροι ότι ο Ντεβέλ κα ευλογίνελ πι πιστέ υπηρετόν ντα κα βοηθίνελ-λεν μα τι ανησυχίνεν μπουτ ι πραγματένγκε σο αβιλέ-πες κο παρελθόν, σο αβένα-πες ακανά ντα σο κα αβέν-πες κο μέλλον.

17, 18. Σαρ μπορίνενα τι βοηθίντιβεν τι νακχαβέν ο ανησυχίες όταν πουτρένα τουμαρό γκι εκχέ τζενέσκε;

¹⁷ Εκ τέταρτος τρόπος σο μπορίνελα τι βοηθίνελ-τουμέν όταν ανησυχίνενα ισί τι πουτρέν τουμαρό γκι ντα τι κερέν λάφι ξεκάθαρα εκχέ τζενέσαρ σο ντένα λέσκε μπέσα. Τουμαρό ρομ ή τουμαρί ρομνί, εκ λατσσό αμάλ ή εκ πρεσβύτερος κι εκκλησία μπορεί τι βοηθίνελ-τουμέν τι αγαβέν πιο λατσσές σο τι κερέν. Η Γραφή βακερέλα αμένγκε: «Ο γκι εκχέ τζενέσκο σο ανησυχίνελα μπουτ κα πφανγκιόλ, αλλά ο λατσσό λάφι κα κερέλ-λες τι χαιρίνελ». (Παροιμίες 12:​25) Η Γραφή  επίσης βακερέλα: «Ο σχέδια να τθερένα επιτυχία όταν να συζητίντιβενα, αλλά τθερένα επιτυχία όταν μπουτ τζενέ σο τθερένα σοφία βακερένα πουμαρέ απόψεις ο εκ κο γιαβέρ».​—Παροιμίες 15:22.

¹⁸ Ο συναθροίσεις επίσης βοηθίνενα-αμέν μα τι ανησυχίνας μπουτ. Κάθε εβδομάδα κο συναθροίσεις, νακχένα χρόνος ι πφραλέντζαρ ντα ι πφενίντζαρ, σο πφαμπόνα τουμένγκε ντα μανγκένα τι ντεν-τουμέν κουράγιος. (Εβραίους 10:​24, 25) Όταν “λένα ντα ντένα κουράγιος ο εκ κο γιαβέρ”, κα τθερέν δύναμη ντα κα αβέλ τουμένγκε πιο εύκολος τι ντεν πέρα σαβέ τι μανγκέν ανησυχίες.​—Ρωμαίους 1:12.

19. Σόσκε μπορίνενα τι αβέν σίγουροι ότι τουμαρί σχέση ι Ντεβλέσαρ κα ντελ-τουμέν δύναμη;

¹⁹ Εκ πρεσβύτερος κο Καναδάς σικλιλό καζόμ σημαντικός ισί τι μουκχέλ σαρέ πο ανησυχίες κο Ιεχωβά. Τθερέλα μπουτ ανησυχία πι μπουτιάτε επειδή ισί δάσκαλος ντα ντέλα συμβουλές γιαβερέ δασκαλόντε. Επίσης, τθερέλα εκ πρόβλημας υγείας ντα σαρέ ανταλά ανένας λέσκε μπαρί ανησυχία. Σο βοηθιντάς-λες τι τθερέλ δύναμη; Ο πιο σημαντικός πράγμας ισί ότι μαρντάς-πες για τι κερέλ πιο ζουρανί πι φιλία ι Ιεχωβάσαρ. Επίσης, ο αμαλά σο μανγκένας-λες μπαγιά βοηθιντέ-λες μπουτ όταν νακχέλας δυσκολίες, ντα πουτρέλας πο γκι ντα κερέλας λάφι ξεκάθαρα πι ρομνιάσαρ. Ο γιαβερά πρεσβύτεροι ντα ο επίσκοπος περιοχής βοηθιντέ-λες τι ντικχέλ ο πράγματα σο αβένα-πες λέσκε ζωγιάτε σαρ ντικχέλα-λεν ο Ιεχωβά. Εκ γιατρός-ντα βοηθιντάς οντουλέ πφραλές τι αγαβέλ πο πρόβλημας υγείας, ντα αντικάς μπορισάλο τι κερέλ αλλαγές κο πρόγραμμας σο τθερέλας ντα τι αρακχέλ χρόνος για τι ξεκουράντιβελ ντα τι κερέλ γυμναστική. Σιγά σιγά, σικλιλό σαρ τι κερέλ κουμάντος πο αισθήματα ντα ο πράγματα σο αβένα-πες λέσκε ζωγιάτε. Όταν αβένα πράγματα σο να τζανέλα σο τι κερέλ, στηρίντιβελα κο Ιεχωβά για βοήθεια.

20. (α) Σαρ μπορίνασα τι μουκχάς κο Ντεβέλ σο-ντα πρόβλημας κερέλα-αμέν τι ανησυχίνας; (β) Σο κα ντικχάς κο γιαβέρ μάθημας;

²⁰ Ανταλέ μαθημάστε, σικλιλάμ ότι, για τι μουκχάς κο Ντεβέλ σο-ντα πρόβλημας κερέλα-αμέν τι ανησυχίνας, ισί μπουτ σημαντικός τι κεράς προσευχή ντα τι διαβάνας ο Λάφι ι Ντεβλέσκο ντα τι σκεφτίνας-λες. Επίσης, σικλιλάμ καζόμ σημαντικός ισί τι μουκχάς ο άγιος πνεύμας ι Ιεχωβάσκο τι βοηθίνελ-αμέν, τι κεράς λάφι εκχέ τζενέσαρ σο ντάσα λέσκε μπέσα ντα τι τζας κο Χριστιανικές συναθροίσεις. Κο γιαβέρ μάθημας, κα σικλιάς σαρ ο Ιεχωβά βοηθίνελα-αμέν επειδή ντέλα ι ελπίδα ότι κα ευλογίνελ-αμέν.​—Εβραίους 11:6.