1. Σο πρέπει τι κερέλ εκ τζενό πριν τι αρχίνελ τι κερέλ εκ κχερ;

ΑΝΕΝ τουμαρέ γκοντιάτε ότι εκ τζενό μανγκέλα τι κερέλ εκ κχερ. Τζανέλα σο κχερ μανγκέλα τι κερέλ. Κα αβέλας λατσσό τι τζαλ αμέσως τι κινέλ ο υλικά ντα τι αρχίνελ τι κερέλ-λες; Νάα. Πριν τι αρχίνελ, πρέπει τι κερέλ κάτι μπουτ σημαντικός: τι ντικχέλ καζόμ λοβέ κα χαλαβέλ. Σόσκε; Επειδή πρέπει τι τζανέλ άμα κα ερεσέν-λες ο λοβέ για μα τι μουκχέλ-λες κο μασκάρ. Άμα κα ντικχέλ πιο τζανγκλέ καζόμ κα χαλαβέλ, μάλλον κα μπορίνελ τι κερέλ πο νεβό κχερ.

2. Σο πρέπει τι σκεφτίνεν μπουτ λατσσές πριν τι μπολντιόν σαρ βακερένα ο εδάφια Λουκάς 14:​27-30;

² Κερντάς-τουμέν η αγάπη ντα η εκτίμηση ι Ιεχωβάσκε τι σκεφτίνεν ο μπολντιπέ; Άμα βα, χρειαζίντιβελα τουμέν-ντα τι λεν εκ απόφαση σαρ οντουβά τζενό. Σόσκε βακεράσα-λες ανταβά; Ντικχέν ο λάφια ι Ιησούσκε κο εδάφια Λουκάς 14:​27-30. (Διαβάνεν) Ο Ιησούς ατθέ σικαβέλα σο μανγκέλα τι βακερέλ τι αβέλ εκ τζενό λέσκο μαθητής. Για τι αβάς λέσκε μαθητές, πρέπει τι αβάς έτοιμοι τι νακχάς δυσκολίες ντα τι μουκχάς μερικά πράγματα. (Λουκ. 9:​23-26· 12:​51-53) Οτθάρ, πριν τι μπολντιόν, πρέπει τι σκεφτίνεν μπουτ λατσσές οντουλά σο μπορεί τι αβέν-πες. Αντικάς, κα τζανέν σο πρέπει τι κερέν για τι συνεχίνεν τι υπηρετίνεν πιστά ι Ντεβλές σοράν τουμαρέ μπολντιμάσταρ.

3. Σο κα ντικχάς ανταλέ μαθημάστε;

³ Αξίνελα τι μπολντιόλ εκ τζενό για τι αβέλ μαθητής ι Χριστόσκο παρόλο σο κα νακχέλ δυσκολίες ή κα μουκχέλ μερικά πράγματα; Βα! Ο μπολντιπέ πουτρέλα ο ντρομ μπουτέ ευλογιένγκε, σο κα τθεράς εμ ακανά εμ κο ντιβεσά σο μπεκλεντίνασα τι αβέν. Κα ντικχάς μερικές σημαντικές ερωτήσεις σο τθερένα τι κερέν ι μπολντιμάσαρ. Ανταβά κα βοηθίνελ-τουμέν τι απαντίνεν ακαλέ ερωτησιάτε: «Ισινόμ έτοιμος τι μπολντιάβ;»

4. (α) Σο ισί η αφιέρωση; (β) Σο μανγκέλα τι βακερέλ τι «μπιστρέλ» εκ τζενό πο νεαυτός σαρ βακερέλα ο εδάφιος Ματθαίος 16:24;

⁴ Σο ισί η αφιέρωση; Πριν τι μπολντιόν, πρέπει τι κερέν αφιέρωση. Ανταβά μανγκέλα τι βακερέλ ότι κα κερέν εκ προσευχή κο Ιεχωβά σο κα νικιόλ ντιπ αντράλ τουμαρέ γκίσταρ ντα κα βακερέν λέσκε ότι κα τζουβντιόν λέσκε για τι υπηρετίνεν-λες για πάντα. Κάνα κερένα-λες ανταβά, “μπιστρένα” τουμαρό νεαυτός. (Διαβάνεν Ματθαίος 16:​24) Ακανά ισινέν ι Ιεχωβάσκε ντα ανταβά ισί μπαρό προνόμιος. (Ρωμ. 14:8) Κάνα ντένα τουμαρό λάφι ότι κα τζουβντιόν ι Ντεβλέσκε, βακερένα λέσκε ότι οντουλέ ντιβεσέσταρ ο πιο σημαντικός πράγμας τουμένγκε κα αβέλ λέσκι υπηρεσία ντα όχι οντουβά σο μανγκένα-τουμέν. Ο Ιεχωβά να ζορισκιαρέλα-αμέν τι κεράς-λες ανταβά. Αλλά άμα κα ντας αμαρό λάφι, μπεκλεντίνελα αμένταρ τι ατσσικιαράς-λες.​—Ψαλμ. 116:​12, 14.

5. Σο σχέση τθερέλα η αφιέρωση ι μπολντιμάσαρ;

⁵ Σο σχέση τθερέλα η αφιέρωση ι μπολντιμάσαρ; Η αφιέρωση ισί κάτι σο κερένα κορκορέ, ισινέν σάντε τουμέν ντα ο Ιεχωβά. Καέκ γιαβέρ νανέ ανγκλάλ. Ο μπολντιπέ ισί κάτι σο αβέλα ανγκλάλ γιαβερέ τζενέντε, ο πιο μπουτ φαρ εκχέ συνελευσιάτε. Κάνα μπολντιόνα, σικαβένα κο γιαβερά ότι κερντέν αφιέρωση κο Ιεχωβά. * Άρα, τουμαρό μπολντιπέ σικαβέλα κο γιαβερά ότι μανγκένα τουμαρέ Ντεβλές ι Ιεχωβάς σαρέ τουμαρέ γκίσαρ, σαρέ τουμαρέ ψυχιάσαρ, σαρέ τουμαρέ γκοντιάσαρ ντα σαρέ τουμαρέ ζοριάσαρ, ντα ότι λιντέν ι απόφαση τι υπηρετίνεν-λες για πάντα.​—Μάρκ. 12:30.

6, 7. Καλά ντούι πράγματα σικαβένα ότι πρέπει τι μπολντιάς σαρ βακερένα ο εδάφια 1 Πέτρου 3:​18-22;

⁶ Ισί μπαγιά ανάγκη τι μπολντιόν; Ντικχέν σο βακερένα ο εδάφια 1 Πέτρου 3:​18-22. (Διαβάνεν) Σαρ η κιβωτός σικαβέλας κο τζενέ ότι ο Νώε τθερέλας πίστη, αντικάς τουμαρό μπολντιπέ-ντα σικαβέλα κο τζενέ ότι κερντέν αφιέρωση κο Ιεχωβά. Αλλά ισί μπαγιά ανάγκη τι μπολντιόν; Βα. Ο Πέτρος βακερντάς σόσκε. Πρώτον, “σώνελα-τουμέν”. Ο μπολντιπέ μπορεί τι σώνελ-αμέν άμα σικαβάσα οντουλέντζαρ σο κεράσα ότι τθεράσα πίστη κο Ιησούς ντα ισινάμ σίγουροι ότι μουλό αμένγκε, αναστισάλο, γκιλό κο ουρανός ντα ακανά ισί «κο δεξιά κι Ντεβλέσκε».

⁷ Δεύτερον, ο μπολντιπέ ντέλα-αμέν «λατσσί συνείδηση». Κάνα κεράσα αφιέρωση κο Ντεβέλ ντα μπολντιάσα, αβάσα μπουτ πασέ λέστε. Επειδή μετανιωσάλαμ μπαγιά ντα πακιάσα κο λύτρος, ο Ντεβέλ συγχωρίνελα αμαρέ αμαρτίες. Αντικάς μπορίνασα τι τθεράς λατσσί συνείδηση λέσκε γιακχίντε.

8. Καβά πρέπει τι αβέλ ο πιο σημαντικός λόγος σο μανγκένα τι μπολντιόν;

⁸ Καβά πρέπει τι αβέλ ο πιο σημαντικός λόγος σο μανγκένα τι μπολντιόν; Σικλιλέν μπουτ πράγματα ι Ιεχωβάσκε ντα λέσκε ντρομέσκε επειδή σικλιαρένα-τουμέν λατσσές κατά Γραφή. Σαρέ οντουλά σο σικλιλέν λέσκε ερεσλέ ντιπ αντρέ τουμαρέ γκίστε ντα κερντέ-τουμέν τι μανγκέν-λες μπουτ. Η αγάπη ι Ιεχωβάσκε πρέπει τι αβέλ ο πιο σημαντικός λόγος σο μανγκένα τι μπολντιόν.

9. Σο μανγκέλα τι βακερέλ τι μπολντιόλ εκ τζενό κο ναβ κι Νταντέσκο ντα κι Τσσαβέσκο ντα κι άγιε πνευμάσκο σαρ βακερένα ο εδάφια Ματθαίος 28:​19, 20;

⁹ Εκ γιαβέρ λόγος σο κα μανγκέν τι μπολντιόν ισί ότι σικλιλέν ντα πακιαντέν οντουλά σο σικλιαρέλα η Γραφή. Σκεφτίνεν σο βακερντάς ο Ιησούς κάνα ντινάς εντολή τι κερέν μαθητέν. (Διαβάνεν Ματθαίος 28:​19, 20) Σαρ βακερέλα ο Ιησούς, ο τζενέ πρέπει τι μπολντιόν «κο ναβ κι Νταντέσκο ντα  κι Τσσαβέσκο ντα κι άγιε πνευμάσκο». Σο μανγκέλα τι βακερέλ ανταβά; Πρέπει τι πακιάν σαρέ τουμαρέ γκίσαρ ο αλήθειες σο σικλιαρέλα η Γραφή ι Ιεχωβάσκε, λέσκε Τσσαβέσκε, ι Ιησούσκε, ντα ι άγιε πνευμάσκε. Ανταλά αλήθειες τθερένα μπαρί ζορ ντα μπορίνενα τι ερεσέν ντιπ αντρέ τουμαρέ γκίστε. (Εβρ. 4:​12) Ακανά κα ντικχάς χάνικ λένταρ.

10, 11. Καλά αλήθειες ι Νταντέσκε σικλιλέν ντα πακιαντέν;

¹⁰ Ντεν-τουμέν γκοντί κάνα σικλιλέν ακαλά αλήθειες ι Νταντέσκε: “Βακερένα λέσκε Ιεχωβά”, ισί «ο πιο Μπαρό σαρί κι πφουβ» ντα σάντε βοβ ισί «ο αληθινός Ντεβέλ». (Ψαλμ. 83:​18· Ησ. 37:​16) Ο Ιεχωβά ισί Οντουβά σο κερντάς-αμέν ντα «οντουβά σο σώνελα-αμέν». (Ψαλμ. 3:8· 36:9) Κανονιντάς τι σώνελ-αμέν κατά αμαρτία ντα κατά μεριπέ ντα πουταρντάς αμένγκε ο ντρομ τι τζουβντιάς για πάντα. (Ιωάν. 17:3) Τουμαρί αφιέρωση ντα τουμαρό μπολντιπέ κα σικαβέν ότι ισινέν Μάρτυρες ι Ιεχωβάσκε. (Ησ. 43:​10-12) Κα αβέν αντρέ εκχέ φαμιλιάτε σο ισί σαρό κο ντουνιάς ντα ντέλα λατρεία ι Ντεβλές. Ο τζενέ οντουλέ φαμιλιάκε ισαρένα-πες σο τθερένα οπρά-πέστε λέσκο ναβ ντα βακερένα-λες γιαβερένγκε-ντα.​—Ψαλμ. 86:12.

¹¹ Σο σουκάρ ισί σο αγαβάσα οντουλά σο σικλιαρέλα η Γραφή ι Νταντέσκε! Κάνα πακιάνα ανταλά σημαντικές αλήθειες, τουμαρό γκι τσσίντελα-τουμέν τι ντεν τουμαρό λάφι κο Ιεχωβά ότι κα τζουβντιόν λέσκε ντα τι μπολντιόν.

12, 13. Καλά αλήθειες ι Τσσαβέσκε σικλιλέν ντα πακιαντέν;

¹² Σο κερντέν κάνα σικλιλέν ακαλά αλήθειες ι Τσσαβέσκε; Ο Ιησούς ισί ο δεύτερος πιο σημαντικός σαρό κο σύμπαν. Ντινάς αντράλ πι γκίσταρ πι ζωή σαρ λύτρος αμένγκε. Κάνα σικαβάσα οντουλέντζαρ σο κεράσα ότι πακιάσα κο λύτρος, συγχωρίντιβενα αμαρέ αμαρτίες, αβάσα αμαλά ι Ντεβλέσαρ ντα πουτάρντιβελα αμένγκε ο ντρομ τι τζουβντιάς για πάντα. (Ιωάν. 3:​16) Ο Ιησούς ισί αμαρό Αρχιερέας. Μανγκέλα τι βοηθίνελ-αμέν τι κερέλ αμένγκε λατσσιπέ ο λύτρος ντα τι αβάς μπουτ λατσσέ αμαλά ι Ντεβλέσαρ. (Εβρ. 4:​15· 7:​24, 25) Ο Ιεχωβά, αντράλ κατά Ιησούς, σο ισί ο Βασιλιάς κι Βασιλεία, κα αγιάνελ πο ναβ, κα νασκιαρέλ ο πφιρνιπέ ντα κα ανέλ κο Παράδεισος ευλογίες σο κα ατσσικιαρέν για πάντα. (Ματθ. 6:9, 10· Αποκ. 11:​15) Ο Ιησούς ισί αμαρό παράδειγμας. (1 Πέτρ. 2:​21) Κερντάς σαρέ πι ζωγιάτε οντουβά σο μανγκλάς λέσταρ ο Ντεβέλ ντα αντικάς σικαντάς σο πρέπει τι κεράς αμέν-ντα.​—Ιωάν. 4:34.

¹³ Κάνα πακιάνα οντουλά σο σικλιαρέλα η Γραφή ι Ιησούσκε, αρχίνενα τι μανγκέν αντρέ τουμέντε ι Ντεβλέσκε Τσσαβές. Ανταβά κερέλα-τουμέν τι ντεν τουμαρί ζωή κο Ντεβέλ για τι κερέν οντουβά σο μανγκέλα, σαρ κερντάς ο Ιησούς-ντα. Οτθάρ, νικιόλα τουμένταρ τι ντεν τουμαρό λάφι τι τζουβντιόν ι Ιεχωβάσκε ντα τι μπολντιόν.

14, 15. Καλά αλήθειες ι άγιε πνευμάσκε σικλιλέν ντα πακιαντέν;

¹⁴ Σο κερντέν κάνα σικλιλέν ακαλά αλήθειες ι άγιε πνευμάσκε; Ο άγιος πνεύμας νανέ ντεβέλ, ισί η ζορ ι Ντεβλέσκι. Ο Ιεχωβά ντινάς πο πνεύμας τζενέντε για τι γραφίνεν ι Αγία Γραφή, ντα ο πνεύμας βοηθίνελα-αμέν τι αγαβάς ντα τι κεράς οντουλά σο διαβάνασα λάτε. (Ιωάν. 14:​26· 2 Πέτρ. 1:​21) Αντράλ πι πνευμάσταρ, ο Ιεχωβά ντέλα-αμέν «ζορ σο ισί πιο μπαρί αμαρέ ζοριάταρ». (2 Κορ. 4:7) Ο πνεύμας ντέλα-αμέν ι ζορ τι βακεράς ο λατσσέ αμπέρια, μα τι περάς κο πειρασμός, τι αρακχάς πάλι αμαρί ζορ ντα τι νταϊντίνας ο δοκιμασίες. Βοηθίνελα-αμέν τι σικαβάς ο σουκάρ ιδιότητες σο ισί αντρέ κο “καρπός κι πνευμάσκο”. (Γαλ. 5:​22) Ο Ντεβέλ ισί έτοιμος τι ντελ πο άγιος πνεύμας οντουλέντε σο ντένα λέσκε μπέσα ντα  μανγκένα-λες λέσταρ αντράλ πουμαρέ γκίσταρ.​—Λουκ. 11:13.

¹⁵ Καζόμ λοκχιόλα ντα κοβλιόλα αμαρό γκι σο τζανάσα ότι ο τζενέ σο ντένα λατρεία ι Ιεχωβάς τθερένα ο άγιος πνεύμας για τι βοηθίνελ-λεν τι υπηρετίνεν ι Ντεβλές! Ο αλήθειες σο σικλιλέν ντα πακιαντέν ι άγιε πνευμάσκε, τσσίντενα-τουμέν τι ντεν τουμαρό λάφι κο Ντεβέλ τι τζουβντιόν λέσκε ντα τι μπολντιόν.

16. Σο σικλιλάμ μέχρι ακανά;

¹⁶ Η απόφαση τι κερέν αφιέρωση κο Ντεβέλ ντα τι μπολντιόν ισί μπουτ σημαντική. Σαρ σικλιλάμ, πρέπει τι αβέν έτοιμοι τι νακχέν δυσκολίες ντα τι μουκχέν μερικά πράγματα. Σαρέ ανταλά ισί μπουτ χουρντέ ανγκλάλ κο ευλογίες σο κα λεν. Ο μπολντιπέ σώνελα-τουμέν ντα ντέλα-τουμέν λατσσί συνείδηση. Η αγάπη ι Ιεχωβάσκε πρέπει τι αβέλ ο πιο σημαντικός λόγος σο μανγκένα τι μπολντιόν. Πρέπει τι πακιάν σαρέ τουμαρέ γκίσαρ ο αλήθειες σο σικλιλέν ι Νταντέσκε, ι Τσσαβέσκε ντα ι άγιε πνευμάσκε. Αφού κα σκεφτίνεν ανταλά σο ντικχλάμ μέχρι ακανά, σαρ κα απαντίνενας κι ερώτηση: «Ισινόμ έτοιμος τι μπολντιάβ;»

17. Καλά ισί μερικά πράγματα σο πρέπει τι κερέν πριν τι μπολντιόν;

¹⁷ Άμα πακιάνα ότι ισινέν έτοιμοι τι μπολντιόν, σίγουρα κερντέν μπουτ πράγματα για τι αβέν λατσσέ αμαλά ι Ιεχωβάσαρ. * Αντράλ κατά Γραφή σικλιλέν μπουτ πράγματα ι Ιεχωβάσκε ντα ι Ιησούσκε. Τθερένα πίστη. (Εβρ. 11:6) Ισινέν ντιπ σίγουροι ότι ο Ιεχωβά κα κερέλ τι νικιόν μπαγιά οντουλά σο βακερντάς ντα ότι τουμαρί πίστη κι Ιησούσκι θυσία κα σώνελ-τουμέν κατά αμαρτία ντα κατά μεριπέ. Μετανιωσάλεν τουμαρέ αμαρτιένγκε, δηλαδή ισινέν μπουτ στεναχωριμέ για το λάθη σο κερντέν ντα μανγκλέν κατά Ιεχωβά τι συγχωρίνελ-τουμέν. Αλλαξάλεν, δηλαδή τσσιναντέν τι κερέν ο γκεραλέ πράγματα σο κερένας ντα ακανά τζουβντιόνα αντικάς σαρ μανγκέλα ο Ντεβέλ. (Πράξ. 3:​19) Μανγκένα αντράλ τουμαρέ γκίσταρ τι βακερέν κο γιαβερά οντουλένγκε σο πακιάνα. Αβιλέν μπίμπολντε ευαγγελιζόμενοι ντα κερένα έργος γιεκ ι κχανγκιριάσαρ. (Ματθ. 24:​14) Ο Ιεχωβά καμαρώνελα-τουμέν σαρέ ανταλέ σημαντικέ πραγματένγκε σο κερντέν. Κερντέν λέσκο γκι τι χαιρίνελ.​—Παρ. 27:11.

18. Σο γιαβέρ πρέπει τι κερέν πριν τι μπολντιόν;

¹⁸ Πριν τι μπολντιόν, πρέπει τι κερέν χάνικ πράγματα ατζέκ. Σαρ σικλιλάμ πιο οπρέ, πρέπει τι αφιερώντιβεν κο Ντεβέλ. Κερέν προσευχή αντράλ τουμαρέ γκίσταρ κάνα κα αβέν κορκορέ ντα ντεν-λες τουμαρό λάφι ότι κα τζουβντιόν λέσκε για τι κερέν οντουβά σο μανγκέλα. (1 Πέτρ. 4:2) Σοράν, βακερέν κο πφραλ σο ισί συντονιστής κο πρεσβυτέριος ότι μανγκένα τι μπολντιόν. Βοβ κα βακερέλ χάνικ πρεσβυτερόνγκε τι κερέν τουμέντζαρ λάφι. Μα τι αγχώνελ-τουμέν ανταβά. Ανταλά πφραλά τζανένα-τουμέν ντα μανγκένα-τουμέν. Κα ντικχέν τουμέντζαρ ο  βασικά πράγματα σο σικλιλέν κατά Γραφή. Ο πφραλά μανγκένα τι αβέν σίγουροι ότι αγαβένα ανταλά πράγματα ντα ότι τζανένα καζόμ σημαντική ισί η αφιέρωση ντα ο μπολντιπέ. Άμα κα ντικχέν ότι ισινέν έτοιμοι, κα βακερέν τουμένγκε ότι μπορίνενα τι μπολντιόν κι γιαβέρ συνέλευση.

19, 20. Σο κα χρειαζίντιβελ τι κερέν σοράν τουμαρέ μπολντιμάσταρ, ντα σαρ μπορίνενα τι κερέν-λες ανταβά;

¹⁹ Σο κα χρειαζίντιβελ τι κερέν σοράν τουμαρέ μπολντιμάσταρ; * Τι ντεν-τουμέν γκοντί ότι ντινέν τουμαρό λάφι κο Ιεχωβά ντα βοβ μανγκέλα τουμένταρ τι ατσσικιαρέν-λες. Οτθάρ, σοράν τουμαρέ μπολντιμάσταρ, πρέπει τι σικαβέν τουμαρέ ζωγιάσαρ ότι ατσσικιαρένα ανταβά λάφι. Σαρ κα κερέν-λες ανταβά;

²⁰ Τι ατσσόν πασέ κι κχανγκιρί. Σαρ μπολντέ Χριστιανοί, ακανά ισινέν γιεκ “ι πφραλέντζαρ”. (1 Πέτρ. 2:​17) Ο πφραλά ντα ο πφενιά κι κχανγκιρί ισί σαρ φαμιλί τουμένγκε. Κάνα κα τζαν κο συναθροίσεις, κα αβέν πιο λατσσέ αμαλά λέντζαρ. Τι διαβάνεν κάθε ντιβές ο Λάφι ι Ντεβλέσκο ντα τι σκεφτίνεν-λες λατσσές. (Ψαλμ. 1:1, 2) Κάνα διαβάνενα εδάφια κατά Γραφή, τι μπεσέν χάνικ για τι σκεφτίνεν-λεν μπουτ λατσσές. Αντικάς ο λάφια κα ερεσέν τουμαρέ γκίστε. Επίσης, «μα τσσιναβέν τι προσευχίντιβεν». (Ματθ. 26:​41) Ο προσευχές σο κα κερέν αντράλ τουμαρέ γκίσταρ κα ανέν-τουμέν πιο πασέ κο Ιεχωβά. Ντα «συνεχίνεν τι μανγκέν πρώτα ι Βασιλεία». (Ματθ. 6:​33) Κα κερέν-λες ανταβά άμα ο έργος ισί εκ κατά πιο σημαντικά πράγματα τουμαρέ ζωγιάτε. Κάνα κα τζαν τι κερέν έργος, κα ατσσικιαρέν τουμαρί πίστη ζουρανί ντα μπορεί τι βοηθίνεν γιαβερέν-ντα τι λεν ο ντρομ σο κα ντελ-λεν ζωή για πάντα.​—1 Τιμ. 4:16.

21. Καλέ πραγματένγκε κα πουτρέλ τουμένγκε ο ντρομ ο μπολντιπέ;

²¹ Η αφιέρωση κο Ιεχωβά ντα ο μπολντιπέ ισί η πιο σημαντική απόφαση σο κα λεν ποτές. Ισί μπαγιά ότι κα νακχέν δυσκολίες ντα κα μουκχέν μερικά πράγματα. Αξίνελα όμως; Σίγουρα! Σο-ντα δυσκολία τι νακχέν ανταλέ πουρανέ ντουνιάστε «ατσσικιαρέλα χάνικ ντα ισί λοκχί». (2 Κορ. 4:​17) Οκιά μπάνταρ, τουμαρό μπολντιπέ κα πουτρέλ τουμένγκε ο ντρομ για τι τζουβντιόν πιο λατσσές ακανά ντα για τι τθερέν «ι πραγματική ζωή» σο κα αβέλ. (1 Τιμ. 6:​19) Οτθάρ, σκεφτίνεν μπουτ λατσσές ντα με προσευχή τουμαρί απάντηση κι ερώτηση: «Ισινόμ έτοιμος τι μπολντιάβ;»