1. Σαρ τζανάσα ότι ο λαός ι Ντεβλέσκο κα ελευθερώντιβελας κατά Μπαρί Βαβυλώνα, ντα καλέ ερωτησιέντε κα λας απάντηση;

ΚΟ ΓΙΑΒΕΡ μάθημας, σικλιλάμ ότι ο πιστοί Χριστιανοί ισινέ αιχμάλωτοι κι Μπαρί Βαβυλώνα. Όμως, ο λατσσέ αμπέρια ισί ότι να κα αβένας για πάντα αιχμάλωτοι. Τζανάσα-λες ανταβά επειδή κι Αγία Γραφή ο Ντεβέλ ντέλα ι εντολή πι λαόστε τι “νικιόλ” κατά ψεύτικες θρησκείες σο ισί σαρό κο ντουνιάς. (Διαβάνεν Αποκάλυψη 18:4) Ανταβά σικαβέλα ότι ο Χριστιανοί κα ελευθερώντιβενας κατά Μπαρί Βαβυλώνα. Μπεκλεντίνασα σαρ σαρ τι σικλιάς κάνα κα ελευθερώντιβενας! Αλλά πρώτα, πρέπει τι απαντίνας ακαλέ ερωτησιέντε: Σο ισινέ αποφασισμέ τι κερέν ο Σπουδαστές της Γραφής ι Μπαρέ Βαβυλωνάσαρ ατζέ-ντα πριν κατά 1914; Καζόμ πράγματα κερένας αμαρέ πφραλά για το έργος ι Ντεβλέσκο κο Πρώτος Παγκόσμιος Πόλεμος; Ισινέ οντουλά μπρεσά ο λαός ι Ντεβλέσκο αιχμάλωτος κι Βαβυλώνα επειδή έπρεπε τι διορθώντιβελ;

2. Σο αποφασιντέ τι κερέν ο πρώτοι Σπουδαστές της Γραφής ατζέ-ντα πριν κατά Πρώτος Παγκόσμιος Πόλεμος;

² Μπουτ μπρεσά πριν κατά Πρώτος Παγκόσμιος Πόλεμος (1914-1918), ο Κάρολος Τέηζ Ρώσσελ ντα γιαβερά Σπουδαστές της Γραφής αγαντέ ότι ο Χριστιανικός ντουνιάς να σικλιαρέλας  ι αλήθεια σο ισί κι Γραφή. Οτθάρ να μανγκένας τι τθερέν καέκ σχέση με την ψεύτικη θρησκεία. Κο 1879, η Σκοπιά της Σιών βακερντάς ότι κάθε κχανγκιρί σο πακιάλα ότι ισί η πιστή μπορί ι Ιησού Χριστόσκι, αλλά υποστηρίνελα ο κυβερνήσεις, κι πραγματικότητα υποστηρίνελα ι Μπαρί Βαβυλώνα, σο κι Γραφή βακέρντιβελα λουμνί.​—Διαβάνεν Αποκάλυψη 17:​1, 2.

3. Σο κερντέ ο Σπουδαστές της Γραφής για τι σικαβέν ότι τσσιναντέ τι υποστηρίνεν ι ψεύτικη θρησκεία; (Ντικχ ι φωτογραφία σο ισί κι αρχή.)

³ Ο μουρσά ντα ο τζουβλιά σο ισινέ πιστά κο Ντεβέλ τζανένας ότι, άμα κα συνεχίνενας τι υποστηρίνεν ι ψεύτικη θρησκεία, ο Ντεβέλ να κα ευλογίνελας-λεν. Οτθάρ, ο πιο μπουτ οντουλέ τζενένταρ μπουτσσαντέ γράμματα πουμαρέ κχανγκιρίντε ντα γραφιντέ ότι να μανγκένας τι ακολουθίνεν-λεν. Μερικοί διαβαντέ πουμαρό γράμμας ανγκλάλ σαρέ κο τζενέ σο ισινέ κι κχανγκιρί. Οτθέ όμως σο να μουκχένας-λεν τι κερέν-λες ανταβά, μπουτσσαντέ εκ γράμμας ι κάθε τζενέσκε σο ισινέ κι κχανγκιρί. Ο Σπουδαστές της Γραφής σικαντέ ξεκάθαρα ότι να μανγκένας τι τθερέν καέκ σχέση ι ψεύτικε θρησκειάσαρ! Μπουτ μπρεσά πιο τζανγκλέ, κα μπορίνενας τι χασαρέν πουμαρί ζωή άμα κα κερένας-λες ανταβά. Αλλά κο 1870, ο κυβερνήσεις μπουτέ τθεμέντε να υποστηρίνενας αζόμ μπουτ ι κχανγκιρίν. Ακανά ο τζενέ μπορίνενας ελεύθερα τι κερέν λάφι ι Γραφιάκε ντα τι βακερέν ότι να συμφωνίνενας ι κχανγκιρίντζαρ.

4. Όταν αβέλας-πες ο Πρώτος Παγκόσμιος Πόλεμος, καγιά άποψη τθερένας ο Σπουδαστές της Γραφής ι Μπαρέ Βαβυλωνάκε; Εξηγίνεν.

⁴ Ο Σπουδαστές της Γραφής αγαντέας ότι να ερεσέλας τι βακερέν σάντε πουμαρέ τζενέντε, πουμαρέ αμαλέντε ντα κο τζενέ σο ισινέ λένγκε κχανγκιρίντε ότι να υποστηρίνενα ι ψεύτικη θρησκεία. Μανγκένας τι σικλιόλ σαρό ο ντουνιάς ότι η Μπαρί Βαβυλώνα ισί εκ λουμνί! Οτθάρ, κατά Δεκέμβριος του 1917 μέχρι κο αρχές του 1918, οντουλά χάνικ χιλιάδες Σπουδαστές της Γραφής ντινέ 10.000.000 φυλλάδια σο τθερένας ο θέμας «Περέλα η Βαβυλώνα» («Η Πτώσις της Βαβυλώνος»). Οντουβά φυλλάδιος μουτθαντάς ι αλήθεια ι Χριστιανικέ ντουνιάσκε. Σαρ αγαβένα, ο παπάζια νευριασάλε μπουτ! Αλλά ο Σπουδαστές της Γραφής να σταματιντέ. Ισινέ αποφασισμέ τι συνεχίνεν ο έργος ι Ντεβλέσκο ντα τι ντεν καν «ι Ντεβλές σαρ άρχοντας παρά ι τζενέν». (Πράξεις 5:​29) Σο σικαβέλα αμένγκε ανταβά; Ότι όταν αβέλας-πες ο Πρώτος Παγκόσμιος Πόλεμος, οντουλά μουρσά ντα τζουβλιά σο ισινέ Χριστιανοί να αβένας αιχμάλωτοι, αλλά αρχισάλε τι ελευθερώντιβεν κατά ψεύτικη θρησκεία ντα τι βοηθίνεν γιαβερέν-ντα τι κερέν ο ίδιος.

5. Σόσκε βακεράσα ότι ο πφραλά πφαμπόνας μπουτ για το έργος ι Ντεβλέσκο κο Πρώτος Παγκόσμιος Πόλεμος;

⁵ Πριν, πακιάας ότι ο Ντεβέλ να υποστηρίνελας πι λαός κο Πρώτος Παγκόσμιος  Πόλεμος επειδή βον να πφαμπόνας αζόμ μπουτ για το έργος ι Ντεβλέσκο. Οτθάρ, αμντίναας ότι ο Ιεχωβά μουκχλάας ι Μπαρί Βαβυλώνα τι λελ-λεν για αιχμάλωτους για χάνικ καιρός. Αλλά ο πιστά πφραλά ντα πφενιά σο υπηρετίνενας ι Ντεβλές κατά 1914 μέχρι κο 1918 εξηγιντέ πιο σοράν ότι, σαρ ομάδα, κερντέ ο πιο λατσσό σο μπορίνενας για τι συνεχίνεν τι κερέν ο έργος ι Ντεβλέσκο. Άμα κα σικλιάς πιο λατσσές σο αβιλό-πες με τους Σπουδαστές της Γραφής οντουλά μπρεσά, κα μπορίνας τι αγαβάς κάποια πράγματα σο ισί κι Γραφή.

6, 7. (α) Σο δυσκολίες τθερένας ο Σπουδαστές της Γραφής κο Πρώτος Παγκόσμιος Πόλεμος; (β) Σο σικαβέλα ότι ο Σπουδαστές της Γραφής πφαμπόνας για το έργος ι Ντεβλέσκο;

⁶ Κι πραγματικότητα, κο Πρώτος Παγκόσμιος Πόλεμος, ο Σπουδαστές της Γραφής κερένας μπουτ έργος. Αλλά επίσης τθερένας κάποιες δυσκολίες. Κα ντικχάς ντούι ντανέ. Πρώτα από όλα, ο Σπουδαστές της Γραφής να σικλιλέας τι χρησιμοποιήνεν σάντε ι Γραφή όταν κερένας ο έργος ι Ντεβλέσκο. Συνηθίνενας τι ντεν ο βιβλία ντα τι μουκχέν-λεν τι κερέν λάφι αντί λένγκε. Οτθάρ, κο αρχές του 1918, όταν η κυβέρνηση να μουκχέλας-λεν τι ντεν ο βιβλίος Το Τετελεσμένον Μυστήριον, ο έργος ισινέ δύσκολος μπουτέ πφραλένγκε. Εκ δεύτερη δυσκολία κο ίδιος μπρες ισινέ η ισπανική γρίπη. Οντιά μπουτ μπέτι αρρώστια ισινέ κολλητική ντα ατσσόνας παλάλ ο ταξίδια ντα ο έργος σο έπρεπε τι κερέν ο πφραλά. Παρόλο σο τθερένας ανταλά δυσκολίες, ο Σπουδαστές της Γραφής κερντέ ο πιο λατσσό σο μπορίνενας για τι συνεχίνεν ο έργος.

⁷ Κο 1914, οντουλά χάνικ Σπουδαστές της Γραφής νικαντέ ο «Φωτόδραμα της Δημιουργίας». Οντουβά βίντεος, σο συνδυάνελας φωτογραφίες ντα σινεμάς με ήχος, ισινέ κάτι νεβό οντουλέ μπρεσέντε. Ο Δράμας, σαρ βακέρντιβελας, σικαβέλας ι ιστορία κατά δημιουργία του Αδάμ μέχρι σο κα σταματίνελας τι κυβερνίνελ ο Χριστός. Κο 1914, ο πρώτος μπρες σο  σικαντέ-λες, ντικχλέ-λες περίπου 9.000.000 τζενέ. Σκεφτίνεν-λες χάνικ ανταβά. Ο τζενέ σο ντικχλέας-λες ισινέ πιο μπουτ κατά τζενέ σο ισί Μάρτυρες του Ιεχωβά αντιβές σαρό κο ντουνιάς! Γιαβερά εκθέσεις σικαβένα ότι κο 1916 πιο μπουτ από 809.000 τζενέ γκιλέ κο συναθροίσεις σο αβένας-πες κο Ηνωμένες Πολιτείες, ντα κο 1918 γκιλέ 950.000. Οντουλά Σπουδαστές της Γραφής πφαμπόνας μπουτ για το έργος ι Ντεβλέσκο!

8. Κο Πρώτος Παγκόσμιος Πόλεμος, σαρ ντινέ δύναμη κο Σπουδαστές της Γραφής ο πφραλά σο τθερένας ι ευθύνη;

⁸ Κο Πρώτος Παγκόσμιος Πόλεμος, ο πφραλά σο τθερένας ι ευθύνη μαρένας-πες για τι ντεν έντυπα βασισμέ κι Γραφή ντα κουράγιος σαρέ κο Σπουδαστές της Γραφής. Ανταγιά βοήθεια ντα αγάπη ντινάς κο πφραλά δύναμη τι συνεχίνεν ο έργος. Ο πφραλ Ρίτσαρντ Χ. Μπάρμπερ, σο κερέλας μπουτ πράγματα για το έργος αζομάν, βακερντάς: «Μπορισάλαμ τι συνεχίνας τι τθεράς μερικέ επισκοπόν σο τζάνας κο εκκλησίες. Επίσης, συνεχιντάμ τι νικαβάς ι Σκοπιά ντα μπουτσσαβάας-λα κο Καναδάς-ντα σο ισινέ απαγορευμέ». Επίσης, βακερντάς: «Με τθεράβας ο προνόμιος τι μπουτσσαβάβ με το ταχυδρομείος χουρντέ αντίγραφα κατά βιβλίος Το Τετελεσμένον Μυστήριον κο πφραλά σο ο ασκέρια λιντέας λένταρ ζορίσαρ ο βιβλίος. Ο πφραλ Ρόδερφορντ μανγκλάς αμένταρ τι κεράς συνελεύσεις σε διάφορες πόλεις κο δυτικές Ηνωμένες Πολιτείες ντα τι μπουτσσαβάς ομιλητές για τι ντεν κο πφραλά καζόμ πιο μπουτ κουράγιος μπορίνενας».

9. (α) Κατά 1914 μέχρι κο 1919, σόσκε έπρεπε ο λαός ι Ντεβλέσκο τι διορθώντιβελ; (β) Παρόλο σο χρειαζίντιβενας διόρθωση, καβά πράγμας κα αβέλας λάθος τι αμντίνας;

⁹ Έπρεπε όμως κάτι τι διορθώνεν ο Σπουδαστές της Γραφής. Να αγαβένας ακριβώς ι σημασία σο τθερένας οντουλά σο βακερέλας ο Ιεχωβά, τι ντεν καν κο κυβερνήσεις. (Ρωμαίους 13:1) Οτθάρ, σαρ ομάδα συμμετεχιντέ μερικές φορές σε ζητήματα σο τθερένας τι κερέν ι τζενγκίσαρ. Για παράδειγμας, όταν ο πρόεδρος κο Ηνωμένες Πολιτείες μανγκλάς κατά τζενέ τι κερέν προσευχή 30 Μαΐου 1918 για τι αβέλ ειρήνη, η Σκοπιά βακερντάς κο Σπουδαστές της Γραφής τι προσευχίντιβεν βον-ντα. Μερικά πφραλά ντινέ πουμαρέ λοβένταρ για τι βοηθίνεν κο τζένγκι, ενώ κάποια γιαβερά αβιλέ στρατιώτες ντα γκιλέ κο τζένγκι. Αλλά παρόλο σο χρειαζίντιβενας διόρθωση, κα αβέλας λάθος τι αμντίνας ότι ανταλέ πραγμάσκε αβιλέ αιχμάλωτοι κι Μπαρί Βαβυλώνα. Ο σημαντικός ισινέ ότι, κο Πρώτος Παγκόσμιος Πόλεμος, σχεδόν νασλέας κατά ψεύτικες θρησκείες σο ισινέ σαρό κο ντουνιάς.​—Διαβάνεν Λουκάς 12:​47, 48.

10. Σαρ σικαντέ ο Σπουδαστές της Γραφής ότι σεβάνενας ι ζωή;

¹⁰ Ισί αλήθεια ότι ο Σπουδαστές της Γραφής να αγαντέας ακριβώς σο μανγκέλας  τι βακερέλ ότι ο Χριστιανοί δεν πρέπει τι συμμετεχίνεν κο τζένγκι. Αλλά τζανένας ότι ισινέ λάθος τι μουνταρέν εκχέ τζενές. Οτθάρ, ατζέ-ντα οντουλά χάνικ πφραλά σο αβιλέ στρατιώτες ντα λιντέ όπλος κο Πρώτος Παγκόσμιος Πόλεμος να χρησιμοποιηντέ-λες για τι μουνταρέν εκχέ γιαβερέ τζενές. Κάποιοι σο να μανγκλέ τι μουνταρέν τσσουντέ-λεν κι πρώτη γραμμή κο τζένγκι, για τι χασαρέν πουμαρί ζωή.

11. Σο κερντέ ο κυβερνήσεις όταν ο Σπουδαστές της Γραφής να μανγκλέ τι τζαν κο τζένγκι;

¹¹ Ο Διάβολος ισινέ μπουτ νευριασμέ επειδή ο πφραλά ισινέ πιστοί κο Ντεβέλ. Οτθάρ, αντάς λένγκε «προβλήματα αντράλ κατά νόμοι». (Ψαλμός 94:​20) Ο Τζέιμς Φράνκλιν Μπελ, στρατηγός κο στρατός κι Αμερική, βακερντάς κο πφραλά Ρόδερφορντ ντα Βαν Άμπουργκ ότι η κυβέρνηση προσπαθιντάας τι νικαβέλ εκ νεβό νόμος σο βακερέλας ότι οντουλά σο να κα μανγκένας τι τζαν κο τζένγκι κα μερένας. Ανταβά πρώτα από όλα βακερέλας-λες για το Σπουδαστές της Γραφής. Ο στρατηγός χολιάσαρ βακερντάς κο πφραλ Ρόδερφορντ ότι οντουβά νόμος να νικίστιλο επειδή να μανγκλάς-λες ο πρόεδρος κι Αμερική. Σοράν, ο στρατηγός βακερντάς: «Αλλά αμέν τζανάσα σο τι κεράς για τι ασταράς-τουμέν ντα σίγουρα κα κεράς-λες!»

12, 13. (α) Σόσκε οχτώ πφραλά δικάντιλε τι πφαντιόν μπουτ μπρεσά κι φυλακή; (β) Μήπως η φυλακή κερντάς ι πφραλέν μα τι αβέν αποφασισμέ τι ντεν καν ι Ιεχωβάς; Εξηγίνεν.

¹² Η κυβέρνηση αρακχλάς εκ τρόπος για τι τιμωρίνελ τους Σπουδαστές της Γραφής. Ασταρντέ για τι δικάνεν ι πφραλέν Ρόδερφορντ, Βαν Άμπουργκ ντα ατζέ σιοβ πφραλέν σο ισινέ εκπρόσωποι της Εταιρίας Σκοπιά. Ο δικαστής σο λιντάς πι βαστέντε οντιά υπόθεση βακερντάς ότι οντουλά πφραλά ισινέ πιο επικίνδυνοι από εκ στρατός Γερμανών. Βοβ βακερντάς επίσης ότι προσβαλιντέας ι κυβέρνηση, ο στρατός ντα σαρέ ι κχανγκιρίν ντα  ότι έπρεπε λένγκι τιμωρία τι αβέλ μπουτ μπαρί. ^[1] (Ντικχ ι σημείωση.) Οτθάρ ο οχτώ Σπουδαστές της Γραφής δικάντιλε τι πφαντιόν μπουτ μπρεσά κι φυλακή κι Ατλάντα. Αλλά όταν τελειωσάλο ο τζένγκι, νικίστιλε κατά φυλακή ντα σβηντέ σαρέ λένγκε κατηγορίες.

¹³ Ατζέ-ντα κι φυλακή, οντουλά οχτώ μουρσά ισινέ αποφασισμέ τι ντεν καν κι Ντεβλέσκε νόμοι. Σαρ τζανάσα-λες ανταβά; Βον γραφιντέ κο πρόεδρος της Αμερικής ντα μανγκλέ λέσταρ τι ελευθερώνελ-λεν κατά φυλακή. Κο γράμμας, γραφιντέ ότι η Γραφή βακερέλα ότι δεν πρέπει τι μουνταράς, οτθάρ οντουλά σο ισί αφιερωμέ κο Ντεβέλ ντα να ντένα-λες καν κα χασαρέν λέσκι ευλογία ντα κα καταστραφίντιβεν. Εξηγιντέ ότι οντουλέσκε να μπορίνενας ντα να μανγκένας τι μουνταρέν καεκχέ τζενές. Να νταρασάλε ιτς τι γραφίνεν-λες ανταβά κο πρόεδρος! Σίγουρα ο πφραλά ισινέ αποφασισμέ τι ντεν καν ι Ιεχωβάς.

14. Εξηγίνεν αντράλ κατά Γραφή σο αβιλό-πες κατά 1914 μέχρι κο 1919.

¹⁴ Ο εδάφια Μαλαχίας 3:​1-3 σικαβένα σο αβιλό-πες με τους Σπουδαστές της Γραφής κατά 1914 μέχρι κο 1919. (Διαβάνεν) Ο Ιεχωβά Ντεβέλ, «ο αληθινός Κύριος», ντα ο Ιησούς Χριστός, «ο αγγελιοφόρος της διαθήκης», δηλαδή οντουβά σε γκερντάς ι συμφωνία, αβιλέ τι ντικχέν σο κερένα ο “τσσαβέ του Λευί”, δηλαδή ο χρισμέ. Αφού ο Ιεχωβά διορθωντάς-λεν ντα καθαριντάς-λεν, ισινέ έτοιμοι τι λεν εκ νεβό διορισμός. Κο 1919, ο Ιησούς διοριντάς τον “πιστό ντα φρόνιμο δούλο” σο κα οδηγίνελας ντα κα ντέλας συμβουλές σαρέ κο υπηρέτες κι Ντεβλέσκε. (Ματθαίος 24:​45) Ο υπηρέτες ι Ντεβλέσκε ισινέ επιτέλους ελεύθεροι κατά Μπαρί Βαβυλώνα. Οτθάρ μπερί, σικλιόνα πιο μπουτ πράγματα για το θέλημας ι Ντεβλέσκο, ντα λένγκι αγάπη λέσκε αβέλα ατζέ πιο μπαρί. Καζόμ εκτίμηση τθερένα σο ευλογιντάς-λες! ^[2]​—Ντικχ ι σημείωση.

15. Σαρ μπορίνασα τι σικαβάς αμαρί εκτίμηση σο ελευθερωσάλαμ κατά Μπαρί Βαβυλώνα;

¹⁵ Εκτιμίνασα μπουτ σο ελευθερωσάλαμ κατά Μπαρί Βαβυλώνα. Ο Μπενγκ να μπορισάλο τι εξαφανίνελ ι αληθινή λατρεία. Να νακχλό λέσκο! Αλλά πρέπει τι ντας-αμέν γκοντί σόσκε ελευθερωντάς-αμέν ο Ιεχωβά. Μανγκέλα τι σώντιβεν σαρέ ο τζενέ. (2 Κορινθίους 6:1) Αλλά η ψεύτικη θρησκεία συνεχίνελα τι κερέλ κουμάντος εκατομμύρια τζενέν σο μανγκένα τι σικλιόν ι αλήθεια. Βον τθερένα ανάγκη αμαρί βοήθεια! Οτθάρ, τι κεράς ο πιο λατσσό σο μπορίνασα, σαρ κερντέ αμαρέ πιστά πφραλά-ντα, για τι βοηθίνας τζενέν τι ελευθερώντιβεν!