1-3. (α) Καβά πράγμας πρέπει πάντα τι σκεφτίνας πρώτα; (β) Καλά δυσκολίες τθερένα οντουλά πφραλά σο σικλιόνα εκ νεβί τσσιπ, ντα σο ερωτήσεις κα ντικχάς; (Ντικχ ι φωτογραφία σο ισί κι αρχή.)

ΑΝΤΙΒΕΣ, μπουτ Μάρτυρες του Ιεχωβά ντένα μπουτ πουμαρέ σαατίσταρ για τι βοηθίνεν τι νικιόλ μπαγιά η προφητεία σο βακερέλα ότι ο λατσσέ αμπέρια κα βακέρντιβεν «σαρέ κο τθεμά, κο φυλές, κο τσσιμπά ντα κο λαοί». (Αποκάλυψη 14:6) Μήπως τουμέν-ντα σικλιόνα εκ γιαβέρ τσσιπ; Μερικοί ισί ιεραπόστολοι ή κερένα λάφι ι Ντεβλέσκε εκχέ γιαβερέ τθεμέστε σο τθερέλα πιο μπαρί ανάγκη. Γιαβερά, ενώ μπεσένα πουμαρέ τθεμέστε, αρχισάλε τι τζαν συναθροίσεις εκχέ εκκλησιάτε σο κερένα λάφι γιαβέρ τσσιπ.

² Σαρέ ο υπηρέτες ι Ντεβλέσκε πρέπει πρώτα τι σκεφτίνεν σαρ κα αβέν εμ βον εμ λένγκι φαμιλί πνευματικά ζουρανέ. (Ματθαίος 5:3) Όμως μερικές φορές, επειδή τθεράσα μπουτ υποχρεώσεις, μπορεί τι αβέλ δύσκολος αμένγκε τι αρακχάς χρόνος για προσωπική μελέτη. Αλλά οντουλά πφραλά σο υπηρετίνενα εκχέ εκκλησιάτε σο κερένα λάφι γιαβέρ τσσιπ τθερένα ατζέ πιο μπουτ δυσκολίες.

 ³ Οντουλά σο υπηρετίνενα εκχέ εκκλησιάτε σο κερένα λάφι γιαβέρ τσσιπ πρέπει τι σικλιόν εκ νεβί τσσιπ, αλλά πρέπει επίσης τι κερέν ο πιο λατσσό σο μπορίνενα για τι διαβάνεν ο βαθιά πράγματα ι Ντεβλέσκε. (1 Κορινθίους 2:​10) Σαρ κα μπορίνεν τι κερέν-λες ανταβά άμα να αγαβένα λατσσές σο βακέρντιβελα κο συναθροίσεις; Ντα σόσκε πρέπει ο νταντά ντα ο νταγιά σο υπηρετίνενα εκχέ εκκλησιάτε σο κερένα λάφι γιαβέρ τσσιπ τι αβέν σίγουροι ότι η αλήθεια ερεσέλα κο γκι λένγκε τσσαβένγκο;

4. Σο κα μπορίνελας τι τσσουβέλ σε κίνδυνος αμαρί σχέση ι Ιεχωβάσαρ; Βακερέν εκ παράδειγμας.

⁴ Όταν ναστί αγαβάσα οντουλά σο σικλιάσα κατά Αγία Γραφή εκχέ γιαβερέ τσσιμπάτε, ανταβά μπορεί τι τσσουβέλ σε κίνδυνος αμαρί σχέση ι Ιεχωβάσαρ. Όταν ο Νεεμίας βουρτισάλο κι Ιερουσαλήμ, ντικχλάς ότι μερικά τσσαβέ ναστί κερένας λάφι ι εβραϊκή τσσιπ. (Διαβάνεν Νεεμίας 13:​23, 24) Επειδή οντουλά τσσαβέ ναστί αγαβένας ο Λάφι ι Ντεβλέσκο, λένγκι σχέση ι Ιεχωβάσαρ να ισινέ ζουρανί.​—Νεεμίας 8:​2, 8.

5, 6. Σο ντικχλέ μερικά νταντά ντα νταγιά σο υπηρετίνενα εκχέ εκκλησιάτε σο κερένα λάφι γιαβέρ τσσιπ, ντα καβά ισί ο πρόβλημας;

⁵ Μερικοί Χριστιανοί σο τθερένα τσσαβέν ντα υπηρετίνενα εκχέ εκκλησιάτε σο κερένα λάφι γιαβέρ τσσιπ ντικχλέ ότι η σχέση σο τθερένα λένγκε τσσαβέ ι Ιεχωβάσαρ να ισινέ αζόμ ζουρανί καζόμ ισινέας πριν. Επειδή λένγκε τσσαβέ να αγαβένα λατσσές ι τσσιπ, οντουλά σο ασουνένα κο συναθροίσεις να βοηθίνενα-λεν τι κερέν πιο μπουτ πράγματα. Ο Πέδρο, σο νασλό πι φαμιλιάσαρ κατά Νότια Αμερική ντα γκιλό κι Αυστραλία, βακερέλα: «Όταν κεράσα λάφι για πνευματικά πράγματα, πρέπει τι επηρεάντιβελ αμαρό γκι ντα αμαρέ αισθήματα». ^[1] (Ντικχ ι σημείωση.)​—Λουκάς 24:32.

⁶ Όταν διαβάνασα εκχέ γιαβερέ τσσιμπάτε, μπορεί μα τι επηρεάντιβενα αζόμ μπουτ αμαρέ αισθήματα καζόμ επηρεάντιβενα αμαρέ τσσιμπάτε. Επίσης, επειδή ισί δύσκολος τι κεράς λάφι ι τζενέντζαρ εκχέ γιαβερέ τσσιμπάτε, μπορεί τι κχινιάς-αμέν αζόμ μπουτ σο κα επηρεάντιβελ αμαρί λατρεία κο Ιεχωβά. Οτθάρ, ενώ συνεχίνασα τι μανγκάς μπουτ τι υπηρετίνας ι Ιεχωβάς εκχέ εκκλησιάτε σο κερένα λάφι γιαβέρ τσσιπ, πρέπει επίσης τι αρακχαβάς αμαρί σχέση ι Ιεχωβάσαρ.​—Ματθαίος 4:4.

7. Σαρ προσπαθιντέ ο Βαβυλώνιοι τι αναγκάνεν τον Δανιήλ τι λελ λένγκε συνήθειες ντα λένγκι θρησκεία;

⁷ Όταν παλντιντέ τον Δανιήλ ντα λέσκε αμαλέν λένγκε τθεμέσταρ ντα γκερντέ-λεν κι Βαβυλώνα, ο Βαβυλώνιοι προσπαθιντέ τι αναγκάνεν-λεν τι λεν λένγκε συνήθειες ντα λένγκι θρησκεία. Σαρ κερντέ-λες ανταβά; Σικλιαρντέ-λεν «ι τσσιπ σο κερένας λάφι ο Χαλδαίοι» ντα τσσουντέ λένγκε βαβυλωνιακά ναβά. (Δανιήλ 1:​3-7) Ο νεβό ναβ του Δανιήλ τθερέλας σχέση με τον Βηλ, σο ισινέ ο πιο σημαντικός ντεβέλ κι Βαβυλώνα. Μάλλον ο Βασιλιάς Ναβουχοδονόσορ μανγκέλας τι κερέλ τον Δανιήλ τι πακιάλ ότι ο Ιεχωβά, ο Ντεβέλ του Δανιήλ, να ισινέ αζόμ ζουρανό καζόμ ισινέ ο ντεβέλ της Βαβυλώνας.​—Δανιήλ 4:8.

8. Σαρ ατσσικιαρντάς ο Δανιήλ ζουρανί πι σχέση ι Ιεχωβάσαρ;

⁸ Κι Βαβυλώνα, ντένας κο Δανιήλ κατά σουκάρ χαμπέ σο ντένας κο Βασιλιάς. Αλλά βοβ «ισινέ αποφασισμέ αντρέ πι γκίστε»  μα τι τσσιναβέλ τι ντελ καν κο νόμος κι Ντεβλέσκο. (Δανιήλ 1:8) Επειδή συνεχιντάς τι διαβάνελ ο ιερά βιβλία, σο ισινέ κι εβραϊκή τσσιπ, ατσσικιαρντάς πι σχέση ι Ιεχωβάσαρ ζουρανί ενώ τζουβντιόλας εκχέ γιαβερέ τθεμέστε. (Δανιήλ 9:2) Αντικάς, παρόλο σο ισινέ κι Βαβυλώνα περίπου 70 μπρεσά, ο τζενέ οτθέ συνεχίνενας τι τζανέν-λες λέσκε εβραϊκέ ναβέσαρ, Δανιήλ.​—Δανιήλ 5:13.

9. Καβά αποτέλεσμας τθερέλας ο Λάφι ι Ντεβλέσκο οντουλέστε σο γραφιντάς ο Ψαλμός 119;

⁹ Οντουβά σο γραφιντάς ο Ψαλμός 119 έπρεπε τι κερέλ υπομονή όταν ο τζενέ σο υπηρετίνενας ι Βασιλιάς κατηγορίνενας-λες. Αλλά λιντάς δύναμη κατά Ντεβλέσκο Λάφι, ντα ανταβά βοηθιντάς-λες τι αβέλ διαφορετικός κατά γιαβερά. (Ψαλμός 119:​23, 61) Βοβ μουκχλάς ο λάφι ι Ντεβλέσκο τι επηρεάνελ βαθιά λέσκε αισθήματα.​—Διαβάνεν Ψαλμός 119:​11, 46.

10, 11. (α) Σο στόχος πρέπει τι τθεράς κάνα διαβάνασα ο Λάφι ι Ντεβλέσκο; (β) Σαρ μπορίνασα τι κεράς αμαρέ ζωγιάτε ο στόχος σο τσσουντάμ; Βακερέν εκ παράδειγμας.

¹⁰ Παρόλο σο μπορεί τι τθεράς μπουτ υποχρεώσεις εμ αντρέ κι εκκλησία εμ αμαρέ μπουτιάτε, σαρέ πρέπει τι ξεχωρίνας χρόνος για τι κεράς προσωπική μελέτη ντα φαμιλιάκι λατρεία. (Εφεσίους 5:​15, 16) Αμαρό στόχος δεν πρέπει τι αβέλ σάντε τι διαβάνας μπουτ σελίδες ή τι ετοιμάνας εκ απάντηση για τη συνάθροιση. Αμαρό στόχος πρέπει τι αβέλ τι ερεσέλ ο Λάφι ι Ντεβλέσκο αντρέ αμαρέ γκίστε ντα τι κεράς πιο ζουρανί αμαρί πίστη.

¹¹ Για τι κεράς ο στόχος σο τσσουντάμ, πρέπει τι αβάς ισορροπημέ. Όταν διαβάνασα, δεν πρέπει τι σκεφτίνας σάντε ο ανάγκες σο τθερένα ο γιαβερά αλλά αμαρέ-ντα ανάγκες. (Φιλιππησίους 1:9, 10) Ισί μπαγιά ότι, όταν προετοιμάνασα-αμέν για το έργος, για το συναθροίσεις ή για εκ ομιλία, μπορεί μα τι σκεφτίνας σαρ τι κεράς-λεν αμαρέ ζωγιάτε, αλλά σάντε σαρ μπορίνενα τι κερέν-λεν ο γιαβερά πουμαρέ ζωγιάτε. Αμέν ισινάμ σαρ εκ μάγειρας, σο πρέπει τι δοκιμάνελ ο χαμπέ σο κερντάς πριν τι ντελ-λες κο πελάτες, αλλά ναστί τζουβντιόλα σάντε οντουλέ χαμπέσαρ σο δοκιμάνελα. Άμα μανγκέλα τι ατσσόλ ζουρανό, πρέπει κάθε ντιβές τι ετοιμάνελ χαμπέ πέσκε-ντα. Άρα, άμα μανγκάσα τι κεράς πιο ζουρανί αμαρί σχέση ι Ιεχωβάσαρ, πρέπει τι διαβάνας ι Γραφή κάθε ντιβές. Ανταβά ντέλα-αμέν σαρέ οντουλά σο τθεράσα ανάγκη.

12, 13. Σόσκε μπουτ τζενέ νιωθίνενα ότι βοηθίντιβενα όταν διαβάνενα ι Γραφή πουμαρέ τσσιμπάτε;

¹² Μπουτ τζενέ σο υπηρετίνενα εκχέ εκκλησιάτε σο κερένα λάφι γιαβέρ τσσιπ νιωθίνενα ότι βοηθίντιβενα όταν διαβάνενα ι Γραφή κάθε ντιβές οντουλέ “τσσιμπάτε σο μπιάντιλε”. (Πράξεις 2:8) Ατζέ-ντα ο ιεραπόστολοι τζανένα ότι να μπορίνενα τι ατσσόν ζουρανέ κι πίστη σάντε οντουλέντζαρ σο ασουνένα κο συναθροίσεις.

¹³ Ο Άλαν, σο σικλιόλα ι περσική τσσιπ περίπου οχτώ μπρεσά, βακερέλα: «Όταν  ετοιμάναβα-μαν για τη συνάθροιση κι περσική τσσιπ, σκεφτίναβα ι γραμματική ντα ο λέξεις σο διαβάναβα. Αφού μι γκοντί μαρέλα-πες τι αγαβέλ οντουλά σο διαβάναβα, ο πνευματικές σκέψεις να ερεσένα πάντα μι γκίστε. Οτθάρ, αρακχάβα συχνά χρόνος για τι διαβάναβ ι Γραφή ντα γιαβερά έντυπα μι τσσιμπάτε».

14. Καλέ πραγμάσκε πρέπει τι αβέν σίγουροι οντουλά σο τθερένα τσσαβέν, ντα σόσκε;

¹⁴ Ο νταντά ντα ο νταγιά σο ισί Χριστιανοί πρέπει τι αβέν σίγουροι ότι η αλήθεια ερεσέλα κι γκοντί ντα κο γκι λένγκε τσσαβένγκο. Σκεφτίνεν τον Σερζ ντα λέσκε ρομνιά, τη Μιουριέλ, σο υπηρετίνενας περίπου τριν μπρεσά εκχέ εκκλησιάτε σο κερένα λάφι γιαβέρ τσσιπ. Βον αγαντέ ότι λένγκο τσσαβό, σο ισινέ 17 μπρεσένγκο, να μπεϊντίνελας τι τζαλ κο έργος ή κο συναθροίσεις. «Να μανγκέλας τι κερέλ λάφι ι Ντεβλέσκε εκχέ γιαβερέ τσσιμπάτε, ενώ πριν μπεϊντίνελας μπουτ τι κερέλ έργος πι τσσιμπάτε, κο Γαλλικά», βακερντάς η Μιουριέλ. «Όταν αγαντάμ ότι ανταβά να μουκχέλας αμαρέ τσσαβές τι κερέλ πνευματική πρόοδος», βακερέλα ο Σερζ, «αποφασιντάμ τι βουρτίνας κι εκκλησία σο ισινάμας».

15. (α) Σο μπορίνελα τι βοηθίνελ οντουλέν σο τθερένα τσσαβέν τι αποφασίνεν άμα πρέπει τι αλλάνεν εκκλησία; (β) Καγιά οδηγία ντένα κο νταντά ντα κο νταγιά ο εδάφια Δευτερονόμιο 6:​5-7;

¹⁵ Σο μπορίνελα τι βοηθίνελ οντουλέν σο τθερένα τσσαβέν τι αποφασίνεν άμα πρέπει τι βουρτίνεν εκχέ εκκλησιάτε σο κερένα λάφι ι τσσιπ σο αγαβένα λατσσές λένγκε τσσαβέ; Πρώτον, πρέπει τι σκεφτίνεν άμα μπαγιά τθερένα χρόνος ντα δυνάμεις  εμ τι σικλιαρέν πουμαρέ τσσαβέν τι μανγκέν ι Ιεχωβάς αλλά εμ τι σικλιαρέν-λεν εκ γιαβέρ τσσιπ. Δεύτερον, μπορεί τι αγαβέν ότι λένγκε τσσαβέ να μανγκένα τι τζαν κο έργος, κο συναθροίσεις ή τι υπηρετίνεν εκχέ εκκλησιάτε σο να αγαβένα λατσσές ι τσσιπ. Οτθάρ, ο νταντά ντα ο νταγιά μπορεί τι αποφασίνεν τι βουρτίνεν εκχέ εκκλησιάτε σο κερένα λάφι ι τσσιπ σο αγαβένα λατσσές λένγκε τσσαβέ. Σοράν, όταν ο τσσαβέ κα τθερέν εκ ζουρανί σχέση ι Ιεχωβάσαρ, ο νταντά ντα ο νταγιά μπορεί τι αποφασίνεν τι τζαν πάλι εκχέ εκκλησιάτε σο κερένα λάφι γιαβέρ τσσιπ.​—Διαβάνεν Δευτερονόμιο 6:​5-7.

16, 17. Σο βοηθιντάς μερικέ νταντέν ντα νταΐν τι σικλιαρέν πουμαρέ τσσαβέν ι Ιεχωβάσκε;

¹⁶ Γιαβερά νταντά ντα νταγιά αρακχλέ τρόπους για τι σικλιαρέν πουμαρέ τσσαβέν ι Ιεχωβάσκε πουμαρέ τσσιμπάτε, ενώ τζάνα εκχέ εκκλησιάτε ή εκχέ ομιλόστε σο κερένα λάφι γιαβέρ τσσιπ. Ο Τσαρλς ισί εκ ντατ σο τθερέλα τρινέ τσσαΐν σο ισί 9, 12 ντα 13 μπρεσένγκε. Βον τζάνα εκχέ ομιλόστε σο κερένα λάφι ι τσσιπ λινγκάλα. Ο ίδιος βακερέλα: «Αποφασιντάμ τι κεράς αμαρέ τσσαΐνγκε μελέτες ντα ι φαμιλιάκι λατρεία αμαρέ τσσιμπάτε. Αλλά επίσης κεράσα ασκήσεις ντα κχελάσα παιχνίδια κι τσσιπ λινγκάλα για τι μπορίνεν τι σικλιόν ανταγιά τσσιπ ενώ νακχένα σουκάρ».

¹⁷ Ο Κέβιν ισί εκ ντατ σο τθερέλα ντουέ τσσαΐν σο ισί παντσέ ντα οχτώ μπρεσένγκε. Βοβ μαρέλα-πες για τι σικλιαρέλ-λεν ι αλήθεια, επειδή ο τσσαγιά ατζέ να αγαβένα μπουτ λατσσές ι τσσιπ σο κερένα λάφι κι συνάθροιση σο τζάνα. Ο ίδιος  βακερέλα: «Μι ρομνί ντα με κεράσα ι μελέτη ι ντουέ-ντα τσσαΐνγκι κο γαλλικά, σο ισί λένγκι τσσιπ. Επίσης τσσουντάμ ο στόχος τι τζας εκ φαρ κάθε μάσεκ εκχέ συναθροισιάτε κι γαλλική τσσιπ ντα κανονίνασα τι κεράς αμαρέ διακοπές οτθέ σο αβένα-πες συνελεύσεις αμαρέ τσσιμπάτε για τι παρακολουθίνας-λεν».

18. (α) Σαρ μπορίνενα ο εδάφια Ρωμαίους 15:​1, 2 τι βοηθίνεν-τουμέν τι λεν εκ σωστή απόφαση για τι βοηθίνεν τουμαρέ τσσαβέν; (β) Καλά συμβουλές ντινέ γιαβερά νταντά ντα νταγιά; (Ντικχ ι σημείωση.)

¹⁸ Κάθε φαμιλί πρέπει τι αποφασίνελ καβά ισί ο πιο λατσσό λένγκε τσσαβένγκε ντα για τη σχέση σο τθερένα ο τσσαβέ ι Ιεχωβάσαρ. ^[2] (Ντικχ ι σημείωση) (Γαλάτες 6:5) Η Μιουριέλ βακερέλα ότι, παρόλο σο λάκο ρομ ντα βόι μανγκένας τι συνεχίνεν τι υπηρετίνεν ι Ιεχωβάς οντουλέ εκκλησιάτε σο κερένα λάφι γιαβέρ τσσιπ, αποφασιντέ τι νασέν για τι βοηθίνεν πουμαρέ τσσαβές τι κερέλ πιο ζουρανί πι αγάπη ι Ιεχωβάσκε. (Διαβάνεν Ρωμαίους 15:​1, 2) Αντιβές, ο Σερζ τζανέλα ότι λιντέ ι σωστή απόφαση. Ο Σερζ βακερέλα: «Από αζομάν σο γκιλάμ εκχέ εκκλησιάτε σο κερένα λάφι γαλλικά, αμαρό τσσαβό αβιλό ζουρανό πνευματικά ντα μπολντιλό. Ακανά ισί τακτικός σκαπανέας. Μάλιστα, σκεφτίνελα τι τζαλ πάλι εκχέ ομιλόστε σο κερένα λάφι γιαβέρ τσσιπ!»

19, 20. Σαρ μπορίνασα τι σικαβάς ότι μανγκάσα ο Λάφι ι Ντεβλέσκο;

¹⁹ Ο Ιεχωβά μανγκέλα σαρέ ι τζενέν. Κατευθυντάς ο πράγματα για τι νικιόλ ι Γραφή σε χιλιάδες τσσιμπά επειδή μανγκέλα «σαρέ ο τζενέ» τι σικλιόν λατσσές ι αλήθεια. (1 Τιμόθεο 2:4) Τζανέλα ότι αμαρί σχέση λέσαρ κα αβέλ πιο ζουρανί όταν διαβάνασα ι Γραφή κι τσσιπ σο αγαβάσα πιο λατσσές.

²⁰ Σαρέ πρέπει τι προσπαθίνας μπουτ για τι ατσσικιαράς ζουρανί αμαρί σχέση ι Ιεχωβάσαρ. Μπορίνασα τι κεράς-λες ανταβά όταν διαβάνασα κάθε ντιβές ι Γραφή κι τσσιπ σο αγαβάσα πιο λατσσές. Κα μπορίνας επίσης τι βοηθίνας αμαρί φαμιλί τι συνεχίνελ τι αβέλ ζουρανί πνευματικά ντα κα σικαβάς ότι μανγκάσα μπαγιά ο Λάφι ι Ντεβλέσκο.​—Ψαλμός 119:11.