1, 2. (α) Σαρ ο πράγματα σο μπεκλεντίνασα αμέν ισί διαφορετικά οντουλένταρ σο μπεκλεντίνενα ο γιαβερά τζενέ; (β) Σο κα συζητίνας ανταλέ μαθημάστε;

Ο ΙΕΧΩΒΑ κερντάς λάφι μπουτέ σουκαρέ πραγματένγκε σο μπεκλεντίνασα τι αβέν. Ντινάς πο λάφι τι αγιάνελ πο ναβ ντα τι κερέλ πο θέλημας κο ουρανός ντα κι πφουβ. (Ματθαίος 6:9, 10) Ανταλά ισί ο πιο σημαντικά πράγματα σο μπεκλεντίνασα τι αβέν. Ο Ιεχωβά επίσης ντινάς πο λάφι ότι κα ντελ-αμέν ζωή για πάντα, είτε κο ουρανός είτε κι πφουβ. Καζόμ σουκάρ κα αβέλ ανταβά! (Ιωάννης 10:​16· 2 Πέτρου 3:​13) Ντα μπεκλεντίνασα τι ντικχάς σαρ κα συνεχίνελ ο Ιεχωβά τι οδηγίνελ ντα τι βοηθίνελ πι λαός ανταλέ τελευταίε ντιβεσέντε.

² Η Αγία Γραφή βακερέλα ότι «πίστη ισί η σιγουριά σο τθεράσα» οντουλένγκε σο μπεκλεντίνασα. Ανταβά μανγκέλα τι βακερέλ ότι ο τζενέ σο τθερένα πίστη ισί σίγουροι ότι ο υποσχέσεις ι Ιεχωβάσκε κα νικιόν μπαγιά. (Εβραίους 11:1) Οκιά μπάνταρ όμως, μπουτ τζενέ αντιβές μπεκλεντίνενα ντα μανγκένα κάποια πράγματα, αλλά να μπορίνενα τι αβέν σίγουροι ότι κα νικιόν μπαγιά. Για παράδειγμας, κάποιος μπορεί  τι μπεκλεντίνελα τι κερδίνελ ο λαχείος, αλλά να μπορίνελα τι αβέλ ιτς σίγουρος ότι κα κερδίνελ-λες. Ανταλέ μαθημάστε, κα ντικχάς σο μπορίνασα τι κεράς για τι μπαριαράς αμαρί πίστη κο υποσχέσεις κι Ντεβλέσκε. Επίσης, κα συζητίνας σαρ μπορίνελα τι βοηθίνελ-αμέν η ζουρανί πίστη ακανά.

3. Σόσκε πακιάσα ότι κα αβέν-πες μπαγιά ο υποσχέσεις ι Ντεβλέσκε;

³ Καέκ τζενό αμένταρ να μπιάντιλο με πίστη. Για τι τθεράς πίστη, πρέπει τι μουκχάς ο άγιος πνεύμας ι Ντεβλέσκο τι επηρεάνελ αμαρό γκι. (Γαλάτες 5:​22) Ο άγιος πνεύμας μπορίνελα τι βοηθίνελ-αμέν τι γνωρίνας ι Ιεχωβάς. Όταν αγαβάσα ότι τθερέλα μπουτ δύναμη ντα σοφία, ισινάμ σίγουροι ότι μπορίνελα τι κερέλ σαρέ ο υποσχέσεις σο ντέλα. Ο ίδιος ο Ιεχωβά, πριν τι αβέν-πες λέσκε υποσχέσεις, βακερέλα: «Αβιλέ-πες μπαγιά!» (Διαβάνεν Αποκάλυψη 21:​3-6) Αμέν τζανάσα ότι ο Ιεχωβά πάντα ατσσικιαρέλα πο λάφι. Βοβ ισί «ο πιστός Ντεβέλ». Οτθάρ πακιάσα σαρέ οντουλά σο βακερέλα ότι κα αβέν.​—Δευτερονόμιο 7:9.

4. Καλέ πραγματέντε τθερένας πίστη ο υπηρέτες ι Ντεβλέσκε κο πουρανέ μπρεσά;

⁴ Κο Εβραίους κεφάλαιος 11 κερέλα λάφι 16 μουρσένγκε ντα τζουβλίνγκε σο τθερένας ζουρανί πίστη κο υποσχέσεις κι Ιεχωβάσκε. Επίσης, κερέλα λάφι γιαβερέ τζενένγκε-ντα σο κερένας ι Ιεχωβάς τι χαιρίνελ επειδή «τθερένας πίστη». (Εβραίους 11:​39) Σαρέ ανταλά μπεκλεντίνενας ι «προσαγγονίσκε» σο βακερντάας ο Ιεχωβά. Τζανένας ότι ανταβά προσάγγονος κα καταστραφίνελας σαρέ ι Ντεβλέσκε ντουσμανίν ντα κα κερέλας ι πφουβ πάλι παράδεισος. (Γένεση 3:​15) Ντα ανταλά υπηρέτες ι Ντεβλέσκε πακιάνας ότι ο Ιεχωβά κα ανέλ-λεν πάλι κι ζωή. Σίγουρα βον να μπεκλεντίνενας τι αναστίντιβεν κο ουρανός, αφού ατζέ να ντινάας ο Ιησούς πι ζωή ι τζενένγκε για τι μπορίνελ τι αβέλ-πες ανταβά. (Γαλάτες 3:​16) Όμως, μπεκλεντίνενας τι τζουβντιόν για πάντα κι πφουβ, σο κα αβέλας εκ σουκάρ παράδεισος.​—Ψαλμός 37:​11· Ησαΐας 26:​19· Ωσηέ 13:14.

5, 6. Καβά πράγμας μπεκλεντίνελας ο Αβραάμ ντα λέσκι φαμιλί; Σαρ ατσσικιαρντέ ζουρανί πουμαρί πίστη; (Ντικχ ι φωτογραφία σο ισί κι αρχή.)

⁵ Ο εδάφιος Εβραίους 11:​13 βακερέλα ανταλέ πιστέ τζενένγκε σο υπηρετίνενας ι Ιεχωβάς: «Σαρέ ανταλά τζενέ μουλέ πιστοί, παρόλο σο να λιντέ οντουλά σο βακερντάας ο Ντεβέλ ότι κα ντέλας-λεν, αλλά ντικχλέ-λεν ντουράλ ντα δεχτιντέ-λεν γκίσαρ». Μπεκλεντίνενας ι νεβέ ντουνιάσκε ντα σκεφτίνενας πουμαρό νεαυτός οτθέ. Εκ ανταλέ τζενένταρ ισινέ ο Αβραάμ. Ο Ιησούς βακερντάς ότι ο Αβραάμ «χαιρισάλο σο κα ντικχέλας» οντουβά ντιβές. (Ιωάννης 8:​56) Επίσης η Σάρρα, ο Ισαάκ, ο Ιακώβ ντα μπουτ γιαβερά τζενέ μπεκλεντίνενας τι αβέλ ο ντιβές σο κα κυβερνίνελας σαρί κι πφουβ η Βασιλεία, «σο σχεδιαντάς-λα ντα κερντάς-λα ο Ντεβέλ».​—Εβραίους 11:​8-11.

⁶ Σαρ ατσσικιαρντέ ζουρανί πουμαρί πίστη ο Αβραάμ ντα λέσκι φαμιλί; Συνεχίνενας τι σικλιόν ι Ιεχωβάσκε. Μερικές φορές ο Ντεβέλ, για τι κερέλ λέντζαρ λάφι, μπουτσσαβέλας αγγελόν ή κερέλας-λεν τι ντικχέν φαντασίες ή σουνέ. Επίσης, μπορεί τι σικλιλέ πφουρέ τζενένταρ σο ισινέ πιστοί ή κατά πουρανέ βιβλία σο υπαρχίντιβενας αζομάν. Ο Αβραάμ ντα λέσκι φαμιλί ποτές να μπισταρντέ ο υποσχέσεις ι Ντεβλέσκε, ντα μπεϊντίνενας μπουτ τι σκεφτίνεν-λεν. Οτθάρ, να τθερένας καέκ αμφιβολία ότι ο Ιεχωβά κα ατσσικιαρέλας πο λάφι. Ατσσιλέ πιστοί λέστε ατζέ-ντα όταν τθερένας δυσκολίες ή διωγμός.

7. Σο ντινάς-αμέν ο Ιεχωβά για τι μπαριαράς αμαρί πίστη, ντα αμέν σο πρέπει τι κεράς;

 ⁷ Σο κα βοηθίνελ-αμέν τι ατσσικιαράς ζουρανί αμαρί πίστη; Ο Ιεχωβά ντινάς-αμέν ι Γραφή για τι σικλιαρέλ-αμέν οντουλά σο κα κερέλ ανγκλ’ αμέντε. Βοβ, οτθάρ αντράλ, σικαβέλα αμένγκε σο πρέπει τι κεράς για τι αβάς ευτυχισμέ. Οτθάρ ισί λατσσό αμένγκε τι διαβάνας ι Γραφή κάθε ντιβές ντα τι κεράς οντουλά σο βακερέλα αμένγκε. (Ψαλμός 1:​1-3· διαβάνεν Πράξεις 17:​11) Ο Ιεχωβά επίσης ντέλα-αμέν “χαμπέ αζομάν σο πρέπει τι ντελ-λες” μέσω “του πιστού ντα φρόνιμου δούλου”. (Ματθαίος 24:​45) Σαρ κερένας ο υπηρέτες ι Ντεβλέσκε κο πουρανέ μπρεσά, αντικάς αμέν-ντα πρέπει τι συνεχίνας τι διαβάνας ο υποσχέσεις ι Ντεβλέσκε ντα τι σκεφτίνας-λεν λατσσές. Ανταβά κα βοηθίνελ-αμέν τι ατσσάς πιστοί κο Ντεβέλ ντα τι συνεχίνας τι μπεκλεντίνας ο ντιβές σο κα κυβερνίνελ λέσκι Βασιλεία σαρί κι πφουβ.

8. Σαρ μπορίνελα η προσευχή τι μπαριαρέλ αμαρί πίστη;

⁸ Σο γιαβέρ βοηθιντάς ι Ιεχωβάσκε υπηρετόν, κο πουρανέ μπρεσά, τι ατσσικιαρέν ζουρανί πουμαρί πίστη; Προσευχίντιβενας κο Ιεχωβά τι βοηθίνελ-λεν ντα, όταν ντικχένας ότι απαντίνελας λένγκε προσευχιέντε, λένγκι πίστη αβέλας πιο ζουρανί. (Νεεμίας 1:4, 11· Ψαλμός 34:4, 15, 17· Δανιήλ 9:​19-21) Αντικάς αμέν-ντα, όταν ντικχάσα ότι ο Ιεχωβά ασουνέλα αμαρέ προσευχές ντα ντέλα-αμέν οντουβά σο χρειαζίντιβασα αζομάν σο τθεράσα-λες ανάγκη, αμαρί πίστη λέστε μπαριόλα πιο μπουτ. (Διαβάνεν 1 Ιωάννη 5:​14, 15) Επίσης, πρέπει τι “συνεχίνας τι μανγκάς” κατά Ιεχωβά τι ντελ-αμέν πο άγιος πνεύμας για τι μπορίνας τι τθεράς πιο μπουτ πίστη.​—Λουκάς 11:9, 13.

9. Καλά ισί μερικά πράγματα σο πρέπει τι προσευχίντιβας;

⁹ Όταν κεράσα προσευχή κο Ιεχωβά, να ερεσέλα σάντε τι μανγκάς λέσταρ ο πράγματα σο χρειαζίντιβασα. Πρέπει τι ευχαριστίνας-λες ντα τι δοξάνας-λες κάθε ντιβές, αφού κερντάς αζόμ μπουτ σουκάρ πράγματα! (Ψαλμός 40:5) Ο υπηρέτες ι Ιεχωβάσκε κερένα επίσης προσευχές πουμαρέ πφραλένγκε σαρί κι πφουβ. Για παράδειγμας, “τθεράσα αμαρέ γκοντιάτε οντουλέν σο ισί κι φυλακή”. Επίσης, προσευχίντιβασα “οντουλένγκε σο τθερένα ι ευθύνη κι εκκλησία”. Όταν ντικχάσα σαρ ο Ιεχωβά απαντίνελα αμαρέ προσευχιέντε, αμαρί πίστη λέστε αβέλα πιο ζουρανί ντα αβάσα πιο πασέ λέστε.​—Εβραίους 13:3, 7.

10. Καβά πράγμας βοηθιντάς μπουτέ τζενέν τι τθερέν θάρρος ντα τι ατσσόν πιστοί κο Ντεβέλ;

¹⁰ Κο Εβραίους κεφάλαιος 11, ο απόστολος Παύλος βακερντάς: «Τζουβλιά λιντέ παλάλ πουμαρέ μουλέν με ανάσταση, αλλά γιαβερέ τζενέν βασανιντέ-λεν επειδή να δεχτιντέ τι ελευθερώντιβεν με εκ λύτρος, για τι τθερέν εκ πιο λατσσί ανάσταση». (Εβραίους 11:​35) Μπουτ τζενέ νταϊντιντέ δοκιμασίες ντα ατσσιλέ πιστοί κο Ντεβέλ επειδή τθερένας ζουρανί πίστη κι υπόσχεση σο ντινάς ο Ντεβέλ για την ανάσταση. Τζανένας ότι κο μέλλον ο Ιεχωβά κα ανέλας-λεν πάλι κι ζωή ντα ότι κα τζουβντιόνας για πάντα κι πφουβ. Σκεφτίνεν τον Ναβουθέ ντα τον Ζαχαρία. Επειδή ντένας καν κο Ντεβέλ, φουρτιντέ λένγκε μπαρά μέχρι σο μουλέ.  (1 Βασιλέων 21:3, 15· 2 Χρονικών 24:​20, 21) Τον Δανιήλ τσσουντέ-λες εκχέ μπαρέ γουρνάτε μποκχαλέ λιονταρίντζαρ ντα λέσκε αμαλέν τσσουντέ-λεν κι γιακ. Για τι ατσσόν πιστοί κο Ιεχωβά, ισινέ έτοιμοι τι ερεσέν κο μεριπέ. Ανταλά μουρσά πακιάνας ότι ο Ιεχωβά σίγουρα κα ντέλας-λεν πο άγιος πνεύμας ντα ότι κα βοηθίνελας-λεν τι νταϊντίνεν ανταλά δοκιμασίες.​—Δανιήλ 3:​16-18, 20, 28· 6:​13, 16, 21-23· Εβραίους 11:​33, 34.

11. Σο δοκιμασίες νταϊντιντέ μερικοί προφήτες επειδή ισινέ πιστοί;

¹¹ Μπουτέ προφητέν, σαρ τον Μιχαΐα ντα τον Ιερεμία, πρασαντέ-λεν ντα πφαντέ-λεν κι φυλακή. Γιαβερά, σαρ ο Ηλίας, «γκεραβένας-πες κο έρημοι, κο βεσά, κο σπηλιές ντα κο γούρνες σο ισί αντρέ κι πφουβ». Σαρέ ανταλά νταϊντιντέ δοκιμασίες ντα ατσσιλέ πιστοί κο Ντεβέλ επειδή “τθερένας σιγουριά ι πραγματένγκε σο μπεκλεντίνενας τι αβέν”.​—Εβραίους 11:1, 36-38· 1 Βασιλέων 18:​13· 22:​24-27· Ιερεμίας 20:1, 2· 28:​10, 11· 32:2.

12. Καβά ισί ο πιο λατσσό παράδειγμας σο μπορίνασα τι μοιάζας λέστε; Σο βοηθιντάς-λες τι νταϊντίνελ δοκιμασίες;

¹² Ο Ιησούς Χριστός νταϊντιντάς ι πιο μπαρί δοκιμασία σαριλένταρ ντα ατσσιλό πιστός κο Ιεχωβά. Σο βοηθιντάς-λες τι νταϊντίνελ; Ο Παύλος βακερντάς: «Για τη χαρά σο τθερέλας ανγκλά-πέστε νταϊντιντάς ο κας σο βασανιντέ-λες, ντα να χάλας-λες ανάγκη η λατζ, ντα μπεσλό κο δεξιά κατά θρόνος ι Ντεβλέσκο». (Εβραίους 12:2) Σοράν, ο Παύλος βακερντάς κο Χριστιανοί τι “σκεφτίνεν λατσσές” ο παράδειγμας σο ντινάς ο Ιησούς. (Διαβάνεν Εβραίους 12:3) Σαρ ο Ιησούς, μπουτ Χριστιανοί-ντα κο πρώτος αιώνας μουλέ επειδή ισινέ πιστοί κο Ιεχωβά. Εκ ανταλένταρ ισινέ ο μαθητής Αντίπας. (Αποκάλυψη 2:​13) Ενώ γιαβερά υπηρέτες ι Ντεβλέσκε σο τζουβντιλέ πιο πριν λένταρ τθερένας γιαβέρ ελπίδα, δηλαδή μπεκλεντίνενας τι αναστίντιβεν κι πφουβ, ασακέ Χριστιανοί ήδη αναστισάλε κο ουρανός. (Εβραίους 11:​35) Κάποια στιγμή αφού ο Ιησούς αβιλό Βασιλιάς κο ουρανός το 1914, ο χρισμέ Χριστιανοί σο μουλέας αναστισάλε για τι τζουβντιόν κο ουρανός χωρίς τι μπορίνεν τι μερέν ποτές, ντα κα κυβερνίνεν λέσαρ σαρέ ι τζενέν.​—Αποκάλυψη 20:4.

13, 14. Σο δοκιμασίες νταϊντιντάς ο Ρούντολφ Γκράιχεν, ντα σο βοηθιντάς-λες τι ατσσόλ πιστός κο Ντεβέλ;

¹³ Εκατομμύρια υπηρέτες ι Ντεβλέσκε ακολουθίνενα ι Ιησούσκο παράδειγμας. Τθερένα πουμαρέ γκοντιάτε ο υποσχέσεις ι Ντεβλέσκε ντα ατσσόνα πιστοί όταν νακχένα δοκιμασίες. Σκεφτίνεν τον Ρούντολφ Γκράιχεν, σο μπιάντιλο κι Γερμανία κο 1925. Κάνα ισινέ τερνό, λέσκο ντατ ντα λέσκι ντάι τθερένας πουμαρέ κχερέστε πίνακες σο σικαβένας μερικά πράγματα κατά Γραφή. Ο Ρούντολφ βακερντάς: «Σε εκ πίνακας ισινέ εκ λύκος εκχέ μπρακέσαρ, εκ χουρντί μπουσνί με εκ λεοπάρδαλη, ντα εκ μοσχάρι εκχέ λιονταρίσαρ. Σαρέ τζουβντιόνας μαζί με ειρήνη ντα εκ χουρντό οδηγίνελας-λεν». (Ησαΐας  11:​6-9) Ανταβά βοηθιντάς τον Ρούντολφ τι τθερέλ πι γκοντιάτε ο παράδεισος κι πφουβ ντα τι πακιάλ ατζέ πιο μπουτ ότι κα αβέλ. Ο αποτέλεσμας ισινέ τι ατσσόλ πιστός κο Ιεχωβά παρόλο σο τθερέλας μπαρό διωγμός για μπουτ μπρεσά κατά ναζιστική Γκεστάπο ντα σοράν κατά κομμουνιστική Στάζι κι Ανατολική Γερμανία.

¹⁴ Ο Ρούντολφ νταϊντιντάς μπουτ γιαβερά-ντα δοκιμασίες. Λέσκι ντάι μουλί από τύφος κο στρατόπεδος συγκέντρωσης κο Ράβενσμπρικ. Λέσκο ντατ υπογραφιντάς εκ χαρτίς σο βακερέλας ότι να ισινέ πια Μάρτυρας του Ιεχωβά. Αλλά ο Ρούντολφ ατσσικιαρντάς ζουρανί πι πίστη. Αφού ελευθερωσάλο κατά φυλακή, αβιλό επίσκοπος περιοχής. Σοράν, καλιντέ-λες κι Σχολή Γαλαάδ ντα βακερντέ λέσκε τι τζαλ κι Χιλή, σο αβιλό πάλι επίσκοπος περιοχής. Οτθέ παντρισάλο εκχέ πφενιάσαρ σο ισινέ ιεραπόστολος ντα βακερένας λάκε Πάτσι. Αλλά δυστυχώς, μετά από εκ μπρες, λένγκι χουρντί τσσάι μουλί. Μετά από χάνικ καιρός, μουλί η Πάτσι-ντα. Ισινέ σάντε 43 μπρεσένγκι. Παρόλο σο νακχλάς σαρέ ανταλά δοκιμασίες, ο Ρούντολφ συνεχιντάς  τι υπηρετίνελ ι Ιεχωβάς. Ατζέ-ντα όταν μπαριλό ντα να τθερέλας λατσσί υγεία, υπηρετίνελας σαρ τακτικός σκαπανέας ντα πρεσβύτερος. Μπορίνασα τι διαβάνας λέσκι ιστορία κι Σκοπιά 1 Αυγούστου 1997, σελίδες 20-25. ^[1] (Ντικχ ι σημείωση.)

15. Ντεν μερικά παραδείγματα πφραλένγκε ντα πφενίνγκε αμαρέ ντιβεσένταρ σο υπηρετίνενα ι Ιεχωβάς με χαρά παρόλο σο τθερένα διωγμός.

¹⁵ Αμαρέ ντιβεσέντε, μπουτ πφραλά ντα πφενιά υπηρετίνενα ι Ιεχωβάς με χαρά παρόλο σο τθερένα μπαρό διωγμός. Μπουτ ανταλένταρ ισί φυλακισμέ κι Ερυθραία, κι Σιγκαπούρη ντα κι Νότια Κορέα επειδή να μανγκένα τι “λεν σπαθί”. (Ματθαίος 26:​52) Για παράδειγμας, ο Ισάκ, ο Νέγκεντε ντα ο Παύλος, ισί σε εκ φυλακή κι Ερυθραία πιο μπουτ από 20 μπρεσά! Οτθέ βασανιντέ-λεν μπουτ. Ντα σαρέ ανταλά μπρεσά, να μπορίνενα τι παντρίνεν ούτε τι βοηθίνεν πουμαρέ νταντέν ντα πουμαρέ νταΐν. Όμως ισί πιστοί κο Ιεχωβά ντα συνεχίνενα τι τθερέν ζουρανί πίστη. Ακανά ατζέ-ντα ο δεσμοφύλακες σεβάνενα-λεν. Εκ φωτογραφία κο ιστότοπος jw.org σικαβέλα ανταλέ πφραλέν. Ασάνα, παρόλο σο νακχένα δοκιμασίες.

16. Σο κα βοηθίνελ-τουμέν τι κερέν η ζουρανί πίστη;

¹⁶ Ο πιο μπουτ υπηρέτες ι Ιεχωβάσκε να γκιλέ κι φυλακή ούτε νακχλέ διωγμός σαρ ανταλά πφραλά σο βακερντάμ. Όμως μπουτ πφραλά νακχένα δοκιμασίες επειδή ισί τσορορέ ή επειδή λένγκε τθεμέστε αβένα-πες φυσικές καταστροφές ή τζένγκια. Γιαβερά ακολουθιντέ ο παράδειγμας του Αβραάμ, του Ισαάκ, του Ιακώβ ντα του Μωυσή ντα μουκχλέ εκ λατσσί ζωή ή εκ μπαρό ναβ για τι υπηρετίνεν ι Ιεχωβάς. Σο βοηθίνελα αμαρέ πφραλέν τι ατσσόν χαρούμενοι ενώ υπηρετίνενα ι Ιεχωβάς; Η αγάπη σο τθερένα λέσκε ντα η ζουρανί πίστη κο υποσχέσεις σο ντινάς. Τζανένα ότι κα ανέλ εκ νεβό ντουνιάς, με δικαιοσύνη ντα ζωή για πάντα, οντουλένγκε σο υπηρετίνενα-λες πιστά.​—Διαβάνεν Ψαλμός 37:5, 7, 9, 29.

17. Σο κα βοηθίνελ-τουμέν τι ατσσικιαρέν ζουρανί τουμαρί πίστη, ντα σο κα ντικχάς κο γιαβέρ μάθημας;

¹⁷ Ανταλέ μαθημάστε ντικχλάμ σαρ η πίστη ισί «η σιγουριά σο τθεράσα ι πραγματένγκε σο μπεκλεντίνασα τι αβέν». Για τι τθεράς ασακί πίστη, πρέπει τι προσευχίντιβας κο Ιεχωβά ντα τι σκεφτίνας συνέχεια λέσκε υποσχέσεις. Αντικάς κα μπορίνας τι νταϊντίνας σαρέ ο δοκιμασίες σο κα αβέν. Κο γιαβέρ μάθημας κα ντικχάς πιο μπουτ πράγματα για τη σημασία σο τθερέλα η πίστη.