ΜΠΙΑΝΤΙΛΟΜ κι Γουίτσιτα του Κάνσας, κι Αμερική, στις 10 Δεκεμβρίου 1936, ντα ισινόμας ο πιο μπαρό μι τρινέ πφραλένταρ. Μο ντατ ντα μι ντάι, ο Γουίλιαμ ντα η Τζιν, ισινέ πιστοί υπηρέτες ι Ιεχωβάσκε. Μο ντατ ισινέ υπηρέτης ομάδας, σο ακανά βακέρντιβελα συντονιστής του πρεσβυτερίου. Μι ντάι σικλιλί ι αλήθεια πι νταγιάταρ, κατά Έμα Γουάγκνερ. Η Έμα σικλιαρντάς ι αλήθεια μπουτέ τζενέντε, σαρ για παράδειγμας κι Γκέρτρουντ Στιλ, σο αβιλί ιεραπόστολος κο Πόρτο Ρίκος. * (Ντικχ ι υποσημείωση.) Αντικάς, τζανάβας μπουτέ τζενέν σο ισινέ λατσσέ παραδείγματα ντα σο μπορίναβας τι μοιάζαβ λέντε.

Εκ ιράτ σο ισινέ Σάββατος, κάνα ισινόμας παντζέ μπρεσένγκο, μο ντατ ντα με ντάας οντουλέντε σο νακχένας κατά ντρομ ο περιοδικά Σκοπιά ντα Παρηγορία (ακανά βακέρντιβελα Ξύπνα!). Οντουλά μπρεσά, αμαρό τθεμ συμμετεχίνελας κο Δεύτερος Παγκόσμιος Πόλεμος. Μο ντατ, όμως, να γκιλό κο τζένγκι επειδή ατσσιλό πιστός. Εκ γιατρός σο ισινέ ματό αβιλό πασέ αμέντε ντα αρχισάλο τι κατηγορίνελ μι νταντές ότι νταρέλας ντα ότι ρόντελας δικαιολογίες για μα τι τζαλ κο στρατός. Ο γιατρός γκιλό ντιπ πασέ μι νταντέστε ντα βακερντάς λέσκε: «Ντε-μαν άμα ισινάν μουρς, νταρανέα!» Νταρασάλομ μπουτ αλλά ισινόμας υπερήφανος-ντα μι νταντέσκε.  Να σταματιντάς τι ντελ ο περιοδικά κο τζενέ σο ντικχένας. Αζομάν αβιλό εκ στρατιώτης, ντα ο γιατρός αρχισάλο τι ντελ βίκος ζουρανές: «Κερ κάτι ακαλέ νταρανέσκε!» Ο στρατιώτης αγαντάς ότι ισινέ ματό, ντα βακερντάς λέσκε: «Τζα τι κχερέστε τι νερνιός!» Νασλέ ο ντούι-ντα. Ευχαριστίναβα ι Ιεχωβάς για το θάρρος σο ντινάς μι νταντέστε. Μο ντατ τθερέλας ντούι κουρεία κι Γουίτσιτα, ντα ο γιατρός ισινέ λέσκο πελάτης!

Όταν ισινόμας οχτώ μπρεσένγκο, μο ντατ ντα μι ντάι μπικιντέ ο κχερ ντα πουμαρέ μαγαζιά ντα λατσσαρντέ εκ χουρντό τροχόσπιτος. Αζομάν γκιλάμ τι μπεσάς κο Κολοράντος, πασέ εκχέ τθανέστε σο βακέρντιβελας Γκραντ Τζάνκσιον, για τι υπηρετίνας οτθέ σο η ανάγκη ισινέ πιο μπαρί. Μο ντατ ντα μι ντάι κερένας σκαπανικός. Επίσης, για χάνικ σαάτια κερένας μπουτί κο χωράφια ντα κο ζώα. Επειδή ο Ιεχωβά ευλογίνελας-λεν ντα επειδή κερένας ο έργος αντράλ πουμαρέ γκίσταρ, αβιλί εκ νεβί εκκλησία. Στις 20 Ιουνίου 1948, μο ντατ μπολντάς-μαν εκχέ λενιάτε κο βες, μαζί γιαβερέντζαρ σο δεχτιντέας ι αλήθεια, σαρ για παράδειγμας με τον Μπίλι Νίκολς ντα λέσκε ρομνιάσαρ. Εμ βον αλλά εμ λένγκο τσσαβό ντα λένγκι μπορί λιντέ πιο σοράν διορισμός κο έργος περιοχής.

Ισινάμας λατσσέ αμαλά μπουτέ πφραλέντζαρ ντα πφενίντζαρ σο κερένας μπουτ πράγματα κι Ιεχωβάσκο έργος, ντα πιο μπουτ με τη φαμιλί Στιλ​—τον Ντον ντα την Ερλίν, τον Ντέιβ ντα την Τζούλια, ντα τον Σάι με τη Μάρθα. Μπεϊντίναας μπουτ τι κεράς λάφι λέντζαρ ι Γραφιάκε, ντα λένγκο παράδειγμας βοηθιντάς-μαν μπουτ. Σικαντέ μάνγκε ότι, όταν τσσουβάσα πρώτα ι Βασιλεία, αμαρί ζωή ισί πφερντί νόημας ντα χαρά.

Κάνα ισινόμας 19 μπρεσένγκο, εκ αμάλ αμαρέ φαμιλιάκο, ο Μπαντ Χάστι, βακερντάς μάνγκε τι κεράς σκαπανικός γιεκ κο νότιες Ηνωμένες Πολιτείες. Ο επίσκοπος περιοχής μανγκλάς αμένταρ τι τζας τι μπεσάς κο Ράστον της Λουιζιάνας, σο οτθέ μπουτ Μάρτυρες αβιλέας αδρανείς. Βακερντάς αμένγκε τι κεράς σαρέ ο συναθροίσεις κάθε εβδομάδα ατζέ-ντα άμα να αβέλας ίτζεκ γιαβέρ. Αρακχλάμ εκ λατσσό τθαν για τι κεράς ο συναθροίσεις ντα ετοιμαντάμ-λες. Κεράας σαρέ ο συναθροίσεις, αλλά για χάνικ καιρός σάντε αμέν ο ντούι τζάας. Κεράας ι συνάθροιση εκ φαρ με εκ φαρ βοβ, ντα ο γιαβέρ ντέλας σαρέ ο απαντήσεις. Άμα ο θέμας τθερέλας επίδειξη, αζομάν νικλιάας ο ντούι-ντα κο βήμας ενώ τελέ να ισινέ ούτε εκ τζενό! Τελικά, εκ πφεν σο ισινέ πφουρί αρχισάλι τι αβέλ κο συναθροίσεις. Σιγά σιγά, μερικά τζενέ σο κερένας μελέτη κατά Γραφή ντα κάποια πφραλά σο ισινέ αδρανείς αρχισάλε τι αβέν κο συναθροίσεις, ντα μετά από χάνικ καιρός αβιλάμ εκκλησία.

Εκ ντιβές, ο Μπαντ ντα με αρακχλάμ εκχέ παπαζίς της Εκκλησίας του Χριστού σο βακερντάς κάποια εδάφια σο να τζανάβας-λεν. Ανταβά κερντάς-μαν τι σκεφτίναβ πιο προσεκτικά οντουλά σο πακιάβας. Εκ σαστί εβδομάδα, κάθε ιράτ ντισαράβας για τι αρακχάβ ο απαντήσεις κο ερωτήσεις σο κερντάας αμένγκε. Ανταβά βοηθιντάς-μαν μπαγιά τι κεράβ μι φιλία ι Ιεχωβάσαρ πιο ζουρανί, ντα μπεσάβας σαρ σαρ τι αρακχάβ ξανά εκχέ παπαζίς.

Χάνικ πιο σοράν, ο επίσκοπος περιοχής μανγκλάς μάνταρ τι τζαβ τι μπεσάβ κο Ελ Ντοράντος του Αρκάνσας για τι βοηθίναβ ι εκκλησία σο ισινέ οτθέ. Όταν μπεσάβας οτθέ, έπρεπε τι τζαβ μπουτ φαρ κο Κολοράντος για τι παρουσιάντιβαβ κι στρατολογία. Εκ φαρ σο τζάβας οτθέ μερικέ γιαβερέ σκαπανίντζαρ, ντινάμ τρακάρα κο Τέξας ντα μο αυτοκίνητος πφανγκιλό ντιπ σαρό. Λιντάμ τηλέφωνος εκχέ πφραλές, ντα αβιλό, λιντάς-αμέν πι κχερέστε ντα σοράν γκερντάς-αμέν κι συνάθροιση. Οτθέ, κερντέ ανακοίνωση ότι ντινάμας τρακάρα, ντα ο πφραλά ντινέ-αμέν λοβέ για τι βοηθίνεν-αμέν. Επίσης, οντουβά πφραλ μπικιντάς μο αυτοκίνητος 25 δολάρια.

Μπορισάλαμ τι ερεσάς κι Γουίτσιτα. Οτθέ, εκ λατσσό αμάλ αμαρέ φαμιλιάκο, ο «Ντοκ» Μακ Κάρτνεϊ, κερέλας σκαπανικός. Λέσκε τσσαβέ σο ισί δίδυμα, ο Φρανκ ντα ο Φράνσις, ισί μέχρι αντιβές ντούι κατά πιο λατσσέ αμαλά σο  τθεράβα. Τθερένας εκ πουρανό αυτοκίνητος σο μπικιντέ-λες μάντε 25 δολάρια, ακριβώς ο λοβέ σο νικαντόμας μιρέσταρ. Ανταγιά ισινέ η πρώτη φαρ σο ντικχλόμ καθαρά ότι, επειδή τσσουβάβας πρώτα ι Βασιλεία μι ζωγιάτε, ο Ιεχωβά ντινάς-μαν κάτι σο τθεράβας ανάγκη. Όταν ισινόμας οτθέ, η φαμιλί Μακ Κάρτνεϊ γνωριντάς μάνγκε εκχέ μπουτ λατσσέ πφενιά, την Μπέθελ Κρέιν. Λάκι ντάι, η Ρουθ, σο ισινέ εκ πιστή Μάρτυρας κο Γουέλινγκτον του Κάνσας, συνεχιντάς ο σκαπανικός ατζέ-ντα όταν ισινέ 90 μπρεσένγκι. Με την Μπέθελ παντρισάλαμ αντρέ εκχέ μπρεσέστε, κο 1958, ντα ξεκινισάλαμ γιεκ ο σκαπανικός κο Ελ Ντοράντος.

Σαρ κερντέας ο πιστά πφραλά ντα πφενιά σο τζανάας-λεν χουρντιαρέλα, αντικάς αμέν-ντα λιντάμ ι απόφαση τι δεχτίνας σο-ντα πρόσκληση κα ντέλας-αμέν η οργάνωση ι Ιεχωβάσκι. Μπουτσσαντέ-αμέν τι υπηρετίνας σαρ ειδικοί σκαπανείς κο Γουόλνατ Ριτζ του Αρκάνσας. Σοράν, κο 1962, χαιρισάλαμ μπουτ όταν λιντάμ ι πρόσκληση τι νακχάς ι 37η τάξη της Γαλαάδ. Χαιρισάλαμ μπουτ επίσης, όταν σικλιλάμ ότι κι ίδια τάξη ισινέ ο Ντον Στιλ-ντα. Όταν τελειωντάμ ι σχολή, η Μπέθελ ντα με μπουτσσάντιλαμ κο Ναϊρόμπι της Κένυας. Ισινάμας στεναχωριμέ σο νασάας κατά Νέα Υόρκη, αλλά χαιρισάλαμ μπουτ κάνα ερεσλάμ κο αεροδρόμιος του Ναϊρόμπι ντα ντικχλάμ ότι ο πφραλά ισινέ οτθέ ντα μπεσένας αμένγκε!

Μπουτ σουγκό μπεϊντιντάμ ι Κένυα ντα ο έργος σο κεράας οτθέ. Ο πρώτα τζενέ σο κερντάμ-λεν μελέτη ντα σο σικλιλέ ι αλήθεια ισινέ ο Κρις ντα η Μαίρη Κανίγια. Μέχρι αντιβές, συνεχίνενα τι υπηρετίνεν σαρό ο μπρες ι Ιεχωβάς κι Κένυα. Ο γιαβέρ μπρες, βακερντέ αμένγκε τι τζας κι Καμπάλα της Ουγκάντας. Ισινάμας ο πρώτοι ιεραπόστολοι οντουλέ τθεμέστε. Οντουλά μπρεσά ισινέ μπουτ σουκάρ επειδή μπουτ τζενέ μανγκένας σαρέ πουμαρέ γκίσαρ τι σικλιόν ο λάφια ι Γραφιάκε ντα αβένας πφραλά ντα πφενιά. Όμως, μετά από τριν επκάς μπρεσά κι Αφρική, βουρτισάλαμ κο Ηνωμένες Πολιτείες για τι πουτράς φαμιλί. Ισινάμας πιο στεναχωριμέ ακανά σο νασάας κατά Αφρική, παρά αζομάν σο νασλάμας κατά Νέα Υόρκη. Μανγκλάμας  μπουτ ι τζενέν κι Αφρική ντα μανγκάας τι αβέλ εκ ντιβές σο κα βουρτίναας οτθέ.

Γκιλάμ τι μπεσάς κι δυτική πλευρά του Κολοράντο, οτθέ σο μπεσένας μο ντατ ντα μι ντάι. Χάνικ πιο σοράν, μπιάντιλι αμαρί πρώτη τσσάι, η Κίμπερλι, ντα 17 μάσεκ πιο σοράν μπιάντιλι η Στέφανι. Ακανά σο πουταρντάμας φαμιλί ισινέ μπουτ σημαντικός αμένγκε τι βοηθίνας αμαρέ λατσσέ τσσαΐν. Κερντάμ ο πιο λατσσό σο μπορίναας για τι σικλιαράς-λεν ι αλήθεια. Μανγκάας τι μοιάζας οντουλέ τζενέντε σο ισινέ λατσσέ παραδείγματα αμένγκε. Τζανάας ότι εκ λατσσό παράδειγμας μπορίνελα τι βοηθίνελ μπουτ ι τσσαβέν ντα ι τσσαΐν, άλλα σάντε ο παράδειγμας να κα κερέλ-λεν τι υπηρετίνεν ι Ιεχωβάς όταν κα μπαριόν. Δυστυχώς, μο πιο χουρντό πφραλ ντα μι πφεν νασλέ κατά αλήθεια. Πακιάβα, όμως, ότι πιο σοράν κα μανγκέν τι μοιάζεν πάλι κο πιστά τζενέ σο μουκχλέ λένγκε-ντα λατσσό παράδειγμας.

Μπεϊντίναας μπουτ τι μπαριαράς αμαρέ τσσαΐν, ντα πάντα προσπαθίναας τι κεράς πράγματα σαρ φαμιλί. Αφού μπεσάας πασέ κο Άσπεν του Κολοράντο, σικλιλάμ τι κεράς σκι για τι μπορίνας κάπου κάπου τι κεράς σκι σαρέ μαζί. Ανταβά ντέλας-αμέν ευκαιρίες τι κεράς λάφι αμαρέ τσσαΐντζαρ καμπόρ σαάτι κεράας σκι. Επίσης, τζάας για κατασκήνωση λέντζαρ, ντα κεράας μπουτ σουκάρ συζητήσεις ενώ μπεσάας ντονταλάι κατά γιακ. Παρόλο σο ισινέ χουρντέ, πουτσένας πράγματα σαρ: «Σο κα κεράβ όταν κα μπαριάβ;» ντα «Σο τζενές μανγκάβα τι παντρίναβ;» Κεράας ο πιο λατσσό σο μπορίναας για τι σικλιαράς αμαρέ τσσαΐν τι μανγκέν ι Ιεχωβάς. Βακεράας λένγκε πάντα ότι ισί λατσσό τι τσσουβέν στόχος τι υπηρετίνεν ι Ιεχωβάς σαρό ο μπρες ντα τι παντρίνεν σάντε εκχέ τζενές σο κα τθερέλας ο ίδιος στόχος. Προσπαθίναας επίσης τι βοηθίνας-λεν τι αγαβέν ότι ισινέ λατσσό μα τι παντρίνεν μπουτ χουρντέ. Μπουτ φαρ βακεράας: «Μα τι λες ρομές μέχρι τι αβές τουλάχιστον 23».

Σαρ κερέλας μο ντατ ντα μι ντάι, αντικάς αμέν-ντα μανγκάας τι κεράς ο πιο λατσσό σο μπορίναας για μα τι χασαράς ο συναθροίσεις ντα τι νικιάς συνέχεια κο έργος σαρ φαμιλί. Κανονίναας τι μπεσέν αμαρέ κχερέστε τζενέ σο υπηρετίνενας ι Ιεχωβάς σαρό ο μπρες. Ντα μπουτ φαρ βακεράας καμπόρ μανγκάας ο ιεραποστολικός έργος. Μανγκάας τι αβέλ εκ ντιβές σο κα τζάας ο σταρ-ντα κι Αφρική. Αμαρέ τσσαγιά μανγκένας μπουτ τι τζας.

Πάντα διαβάναας ι Γραφή σαρ φαμιλί. Κεράας πρόβες για πράγματα σο μπορεί τι αβένας-πες κο σχολείος ντα βακεράας αμαρέ τσσαΐνγκε τι κερέν-πες ο Μάρτυρας σο απαντίνελα κο ερωτήσεις. Νακχένας μπουτ σουκάρ ντα σικλιόνας σαρ τι αβέν σίγουρες οντουλένγκε σο πακιάνας. Καμπόρ μπαριόνας, όμως, κερένας παράπονα κάνα αβέλας ο σαάτι για τι διαβάνας σαρέ μαζί σαρ φαμιλί. Εκ φαρ αισθάντιλομ αζόμ μπέτι, σο βακερντόμ λένγκε τι τζαν πουμαρέ δωματιόντε ντα ότι να κα διαβάναας. Στεναχωρισάλε μπουτ, αρχισάλε τι ροβέν ντα βακερντέ ότι μανγκένας τι διαβάνας. Αζομάν αγαντάμ ότι βοηθίναας-λεν τι μανγκέν τι σικλιόν ι Ιεχωβάσκε. Καζόμ νακχένας ο μπρεσά, μπεϊντίνενας τι διαβάνεν ι Γραφή, ντα αισθάντιβενας άνετα τι  βακερέν αμένγκε οντουλά σο τθερένας πουμαρέ γκοντιάτε ντα οντουλά σο νιωθίνενας. Μερικές φορές, ισινέ μπουτ δύσκολος τι ασουνάς-λεν τι βακερέν ότι να συμφωνίνενας με κάτι σο βακερέλας η Γραφή. Αλλά αντικάς αγαβάας σο τθερένας μπαγιά πουμαρέ γκίστε. Αφού συζητίναας λογικά λέντζαρ, αγαβένας ότι ο κανόνες ι Ιεχωβάσκε ισινέ λένγκε λατσσιμάσκε.

Ο μπρεσά σο μπαριαράας αμαρέ τσσαΐν νακχλέ μπουτ σουγκό. Επειδή βοηθίνελας-αμέν η οργάνωση ι Ντεβλέσκι, κεράας ο πιο λατσσό σο μπορίναας για τι μπαριαράς-λεν σωστά ντα τι μανγκέν ι Ιεχωβάς. Πφερντιλάμ εκτίμηση ντα χαρά όταν αμαρέ ντούι τσσαγιά αρχισάλε ο σκαπανικός μετά κατά λύκειος, ντα σικλιλέ τι κερέν κάποια μπουτιά για τι νικαβέν πουμαρέ έξοδα. Γκιλέ κο Κλίβελαντ του Τενεσί μαζί γιαβερέ ντουέ πφενίντζαρ για τι υπηρετίνεν οτθέ σο η ανάγκη ισινέ πιο μπαρί. Σικλιντίναας λένγκε μπουτ, αλλά ισινάμας ευχαριστιμέ σόσκε τζανάας ότι χρησιμοποιήνενας πουμαρί ζωή για τι υπηρετίνεν ι Ιεχωβάς σαρό ο μπρες. Η Μπέθελ ντα με ξαναρχισάλαμ ο σκαπανικός, ντα οτθάρ πιο σοράν τθεράας ι ευκαιρία τι υπηρετίνας σαρ αναπληρωτές κο έργος περιοχής ντα τι κεράς διάφορα μπουτιά σο τθερένας τι κερέν με το συνελεύσεις.

Πριν τι τζαν κο Τενεσί, αμαρέ τσσαγιά κερντέ ταξίδι κο Λονδίνος της Αγγλίας ντα γκιλέ τι ντικχέν ο γραφείος τμήματος. Οτθέ, η Στέφανι σο ισινέ αζομάν 19 μπρεσένγκι γνωριντάς εκχέ τερνέ Μπεθελιτής, τον Πολ Νόρτον. Σε εκ γιαβέρ ταξίδι, η Κίμπερλι γνωριντάς τον Μπράιαν Λουέλιν σο κερέλας μπουτί με τον Πολ. Ο Πολ ντα η Στέφανι παντρισάλε αλλά ανταβά αβιλό-πες όταν η Στέφανι πφαντάας ο 23. Ο Μπράιαν ντα η Κίμπερλι παντρισάλε ο γιαβέρ μπρες, όταν η Κίμπερλι ισινέ 25 μπρεσένγκι. Άρα, ατσσιλέ ο ντούι-ντα εργένια τουλάχιστον μέχρι κο 23. Αμέν χαιρισάλαμ μπουτ σο τραμπιντέ αζόμ λατσσέ ρομέν.

Αμαρέ τσσαγιά βακερντέ αμένγκε ότι εμ αμαρό παράδειγμας αλλά εμ ο παράδειγμας λένγκε παππουδένγκο βοηθιντάς-λεν τι “μανγκέν πρώτα ι βασιλεία ι Ντεβλέσκι”, ατζέ-ντα όταν νακχένας δύσκολα επειδή να τθερένας λοβέ. (Ματθαίος 6:​33) Κο 1998, τον Απρίλιο, ο Πολ ντα η Στέφανι λιντέ πρόσκληση για τι παρακολουθίνεν ι 105η τάξη της Γαλαάδ, ντα μπουτσσαντέ-λεν τι υπηρετίνεν κι Μαλάουι, κι Αφρική. Μετά από χάνικ καιρός, ο Μπράιαν ντα η Κίμπερλι λιντέ πρόσκληση τι τζαν κο Μπέθελ του Λονδίνου, ντα πιο σοράν λιντέ διορισμός τι τζαν κο Μπέθελ της Μαλάουι. Ισινάμας μπουτ χαρούμενοι, επειδή αμαρέ τσσαγιά χρησιμοποιήνενας πουμαρί ζωή με το πιο λατσσό τρόπος.

Κο 2001, τον Ιανουάριο, λιντέ-μαν εκ τηλέφωνος, σαρ βακερντόμ κι αρχή. Ο πφραλ Μαρέι, ο επίσκοπος κο Μεταφραστικές Υπηρεσίες, εξηγιντάς μάνγκε ότι ο πφραλά ετοιμάνενας κάποια μαθήματα σο κα βοηθίνενας τζενέν σο μεταφράνενας σαρό κο ντουνιάς τι αγαβέν πιο λατσσές ο αγγλικός κείμενος. Παρόλο σο ισινόμας 64 μπρεσένγκο, μανγκένας τι σικλιαρέν-μαν για τι μπορίναβ τι σικλιαράβ με-ντα ι μεταφραστέν. Η Μπέθελ ντα με προσευχίντιλαμ ανταλέσκε ντα κερντάμ λάφι αμαρέ νταΐντζαρ για τι βακερέν αμένγκε πουμαρί άποψη. Παρόλο σο ισινέ πφουρέ ντα κα ατσσόνας χωρίς βοήθεια, ο ντούι-ντα βακερένας αμένγκε τι τζας. Λιντόμ τηλέφωνος ντα βακερντόμ ότι κα δεχτίναας ανταβά μπουτ σουκάρ διορισμός με χαρά.

Αζομάν μι ντάι σικλιλί ότι τθερέλας καρκίνος. Βακερντόμ λάκε ότι κα μπεσάας για τι βοηθίνας μι πφενιά, τη Λίντα, σο φροντίνελας-λα. Αλλά μι ντάι βακερντάς: «Κα νιωθίναβ πιο μπέτι άμα να κα τζαν». Η Λίντα συμφωνιντάς βόι-ντα. Εκτιμιντάμ μπουτ σο ισινέ πρόθυμες τι κερέν-λες ανταβά ντα επίσης εκτιμιντάμ ι βοήθεια σο ντινέ-αμέν ο πφραλά σο μπεσένας πασέ λέντε. Ο γιαβέρ ντιβές αφού νασλάμας για τι τζας κο Εκπαιδευτικός Κέντρος της Σκοπιάς κο Πάτερσον, λιντάς τηλέφωνος η Λίντα για τι βακερέλ αμένγκε ότι αμαρί ντάι μουλίας. Κερντάμ οντουβά σο κα βακερέλας αμένγκε τι κεράς μι ντάι​—ντινάμ σαρί αμαρί ζορ για τι κεράς αμαρό νεβό διορισμός.

 Χαιρισάλαμ μπουτ κάνα σικλιλάμ ότι κα τθεράας ο πρώτος διορισμός κο γραφείος τμήματος της Μαλάουι, οτθέ σο υπηρετίνενας αμαρέ τσσαγιά πουμαρέ ρομέντζαρ. Ισινέ μπουτ σουκάρ τι αβάς πάλι μαζί. Σοράν, κερντάμ ο μαθήματα κι Ζιμπάμπουε ντα πιο σοράν κι Ζάμπια. Αφού κερντάμας ο μαθήματα για τριν επκάς μπρεσά, βουρτισάλαμ κι Μαλάουι για τι γραφίνας ο εμπειρίες ι Μαρτυρένγκε σο τθερένας διωγμός οτθέ επειδή ατσσιλέας πιστοί ντα να γκιλέας κο τζένγκι. *​—Ντικχ ι υποσημείωση.

Κο 2005, ισινάμας πάλι μπουτ στεναχωριμέ σο νασάας κατά Αφρική. Βουρτισάλαμ αμαρέ κχερέστε κο Μπάσαλτ του Κολοράντο, ντα ατθέ η Μπέθελ ντα με συνεχίνασα τι κεράς σκαπανικός. Κο 2006, ο Μπράιαν ντα η Κίμπερλι αβιλέ τι μπεσέν δίπλα αμαρέ κχερέσταρ για τι μπαριαρέν πουμαρέ ντουέ τσσαΐν, τη Μακένζι ντα την Ελίζαμπεθ. Η Στέφανι πι ρομέσαρ ισί ατζέκ κι Μαλάουι, ντα οτθέ ο Πολ υπηρετίνελα κι Επιτροπή του Τμήματος. Ακανά ισινόμ περίπου 80 μπρεσένγκο, ντα χαιρίναβα μπουτ σο ντικχάβα πιο τερνέ μουρσέν, σο τθεράβα κερντό μπουτί λέντζαρ κο έργος κι Ντεβλέσκο, τι τθερέν ευθύνες σο τθεράβας με-ντα. Επειδή μανγκάας ο λατσσιπέ αμαρέ τσσαΐνγκο ντα αμαρέ αγγονίνγκο, προσπαθιντάμ τι μοιάζας οντουλέντε σο ισινέ λατσσέ παραδείγματα αμένγκε. Ανταβά ντινάς-αμέν μπαρί χαρά ντα νόημας.