Κατέ Μπορίνενα τι Αρακχέν Αληθινή Ελπίδα;

ΒΑΒΕΚΕΡΝ ότι τουμαρό σαάτι σταματισάλο ντα ντικχίντιβελα ότι χαλάντιλο. Καζόμ ντικχένα σαρ κα λατσσαρέν-λες, ισί-τουμέν μπουτ πράγματα σο μπορίνενα τι τραμπίνεν τι κερέν. Για παράδειγμας, ντικχένα μπερεκέτι διαφημίσεις σο σικαβένα μπακάλια σο λατσσαρένα σαάτια ντα σαρέ ανταλά ντένα πουμαρό λάφι ότι λατσσαρένα-λεν, όμως μερικές διαφημίσεις να συμφωνίνενα η εκ ι γιαβεράσαρ. Σο κα κερένας όμως άμα ασουνένας ότι ο γκοντιαβέρ τζενό σο κερντάς ανταβά σαάτι πριν μπρεσά ισί τουμαρό γείτονας; Ντα όχι σάντε ανταβά, αλλά σικλιόνα επίσης ότι μανγκέλα τι βοηθίνελ-τουμέν χωρίς τι μανγκέλ τουμένταρ λοβέ. Σίγουρα κα τραμπίνενας ανταλέ τζενές, αντικάς νανέ;

Σκεφτίνεν ακανά ότι η ζορ σο κερέλα-τουμέν τι τθερέν ελπίδα μοιάζελα ανταλέ σαατίσαρ. Άμα αγαβένα ότι χασαρένα τουμαρί ελπίδα—σαρ αβέλα-πες μπουτέ τζενέντε ανταλέ δύσκολε ντιβεσέντε—κατέ κα τζαν για τι βοηθίντιβεν; Μπουτ τζενέ βακερένα ότι μπορίνενα τι λύνεν ο πρόβλημας, αλλά ο μπουτ συμβουλές σο ντένα μπέκιμ ισί μπερδεμέ ντα να συμφωνίνενα η εκ ι γιαβεράσαρ. Σόσκε μα τι τζαν Οντουλέστε σο κερντάς ι τζενέν ντα τσσουντάς αντρά-λέντε ι ζορ τι τθερέν ελπίδα; Η Γραφή βακερέλα ότι «βοβ νανέ ντουρ αμένταρ» ντα ότι μανγκέλα τι βοηθίνελ αντράλ πι γκίσταρ.​—Πράξεις 17:27· 1 Πέτρου 5:7.

Σο Ισί Μπαγιά η Ελπίδα

Η Αγία Γραφή σικαβέλα ότι η ελπίδα τθερέλα τι κερέλ πο μπουτ πραγματέντζαρ οντουλένταρ σο βακερένα ο γιατροί, ο επιστήμονες ντα ο ψυχολόγοι αμαρέ ντιβεσέντε. Κο πουρανέ τσσιμπά σο γραφισάλι η Γραφή, η λέξη ελπίδα μανγκέλα τι βακερέλ κάνα μπεκλεντίνασα σαρ σαρ τι αβέλ εκ λατσσό πράγμας. Η ελπίδα τθερέλα ντούι σημαντικά πράγματα. Ι επιθυμία εκχέ λατσσέ πραγμάσκε, ντα ι σιγουριά ότι ανταβά πράγμας κα αβέλ-πες μπαγιά. Η ελπίδα σο ντέλα η Γραφή νανέ σάντε εκ πράγμας σο μπεκλεντίνασα τι νικιόλ μπαγιά. Βασίντιβελα πραγματέντε σο αβιλέ-πες μπαγιά ντα κο αποδείξεις.

Οτθάρ, η ελπίδα μοιάζελα κι πίστη σο τθεράσα κάνα ισί αμέν αποδείξεις ντα όχι κάνα πακιάσα σο-ντα ασουνάσα. (Εβραίους 11:1). Όμως η Γραφή σικαβέλα ότι η πίστη ντα η ελπίδα τθερένα διαφορά.​—1 Κορινθίους 13:13.

Για παράδειγμας: Κάνα μανγκένα τουμαρέ λατσσέ αμαλέσταρ τι κερέλ τουμένγκε εκ χάρη, τθερένα ελπίδα ότι κα βοηθίνελ-τουμέν. Τθερένα ανταγιά ελπίδα σόσκε πακιάνα τουμαρέ αμαλές—τζανένα-λες λατσσές ντα τθερένα-λες ντικχλό τι σικαβέλ λατσσιπέ ντα τι ντελ πι βαστένταρ πο ανγκλέ. Η πίστη ντα η ελπίδα τθερένα σχέση ντα επηρεάντιβελα η εκ κατά γιαβέρ, αλλά ισί ντούι διαφορετικά πράγματα. Σαρ μπορίνενα τι τθερέν ασακί ελπίδα κο Ντεβέλ;

Κατέ Στηρίντιβελα η Ελπίδα

Η αληθινή ελπίδα αβέλα κατά Ντεβέλ. Κο πουρανέ μπρεσά, ο Ιεχωβά βακέρντιβελας «η ελπίδα ι Ισραηλιτένγκι». (Ιερεμίας 14:8) Καγιά-ντα σίγουρη ελπίδα τθερέλας ο λαός λέσκο, ισινέ ντα αβέλας λέσταρ. Αντικάς, βοβ ισινέ η ελπίδα λένγκι. Εκ ασακί ελπίδα να ισινέ σάντε εκ επιθυμία. Ο Ντεβέλ κερέλας ι Ισραηλιτέν τι αβέν σίγουροι ι ελπιδάκε. Σαρέ οντουλά μπρεσά σο νακχλέ, Βοβ ισινέ πασέ λέντε ντα ντινάς-λεν μπουτ υποσχέσεις σο ατσσικιαρντάς-λεν σαρέ. Λένγκο αρχηγός, ο Ιησούς του Ναυή, βακερντάς ι Ισραηλιτένγκε: «Τζανένα λατσσές . . . ότι ούτε εκ λάφι να πελό τελέ σαρέ κατά λατσσέ υποσχέσεις σο βακερντάς τουμένγκε ο Ιεχωβά τουμαρό Ντεβέλ».​—Ιησούς του Ναυή 23:14.

Χιλιάδες μπρεσά πο σοράν, σαρέ ανταλά υποσχέσεις υπαρχίντιβενα ατζέκ. Η Γραφή τθερέλα μπουτ υποσχέσεις ι Ντεβλέσκε ντα σικαβέλα ακριβώς σαρ νικίστιλε μπαγιά. Ο υποσχέσεις σο βακερέλας ο Ντεβέλ ισινέ αζόμ σίγουρες σο, μπουτ φαρ, ο τρόπος σο γραφισάλε ισινέ σαρ τι αβιλέας-πες ήδη.

Ανταλέσκε μπορίνασα τι βακεράς ότι η Γραφή ισί ο βιβλίος σο ντέλα ελπίδα. Κάνα διαβάνενα ι Αγία Γραφή ντα οντουλά σο κερντάς ο Ντεβέλ ι τζενέντζαρ, τουμαρί ελπίδα λέστε αβέλα πο ζουρανί. Ο απόστολος Παύλος γραφιντάς: «Σαρέ οντουλά σο γραφισάλε κο πουρανέ μπρεσά γραφισάλε αμαρέ σικλιαριμάσκε, για τι τθεράς ελπίδα αντράλ κατά υπομονή σο κεράσα ντα αντράλ κατά παρηγοριά σο ντέλα η Γραφή».​—Ρωμαίους 15:4.

Καγιά Ελπίδα Ντέλα-αμέν ο Ντεβέλ;

Κάνα χρειαζίντιβασα πο μπουτ ι ελπίδα; Κάνα τθεράσα τι αντιμετωπίνας ο μεριπέ, αντικάς νανέ; Μπουτέ τζενένγκε όμως, εκ ασακό σαάτι, δηλαδή κάνα μερέλα εκ τζενό αμαρό, η ελπίδα ντικχιόλα μπουτ ντουρ. Σο κα μπορίνελας τι ανέλ πο μπαρί ντουκχ κατά μεριπέ; Ο μεριπέ κουλαντίνελα ι κάθε εκχές αμένταρ. Για εκ βακίτι μπορίνασα τι νασάς λέσταρ, αλλά ναστί νικίνασα-λες. Οτθάρ-ντα μπουτ σωστά η Γραφή βακερέλα ότι ισί «o τελευταίος ντουσμάνι».​—1 Κορινθίους 15:26.

Σαρ μπορίνασα τι αρακχάς ελπίδα κάνα αβέλα ανγκλ’ αμέντε ο μεριπέ; Ο εδάφιος ι Γραφιάκο σο βακερέλα ότι ο μεριπέ ισί ο τελευταίος ντουσμάνι, βακερέλα επίσης ότι οντουβά ντουσμάνι κα «χασάρντιβελ». Ο Ιεχωβά Ντεβέλ ισί πο ζουρανό κατά μεριπέ. Σικαντάς-λες μπουτέ περιπτωσιέντε. Κάνα τζουβντιαρντάς μουλέν. Η Γραφή βακερέλα 9 περιπτώσεις σο ο Ντεβέλ χρησιμοποιηντάς πι ζορ για τι ανέλ κι ζωή ι μουλέν.

Σε εκ περίπτωση, ο Ιεχωβά ντινάς πι Τσσαβέστε, κο Ιησούς, ι ζορ τι τζουβντιαρέλ πι αγαπημέ αμαλές ι Λαζαρός, σο ισινέ μουλό σταρ ντιβεσά. Ο Ιησούς κερντάς-λες ανταβά όχι αποτσοράλ, αλλά ανγκλάλ μπουτέ τζενέντε σο ντικχένας-λες.​—Ιωάννης 11:38-48, 53· 12:9, 10.

Μπέκιμ σκεφτίνενα: “Σόσκε αναστισάλε μερικά τζενέ; Να πφουρίλιλε ντα σοράν να μουλέ πάλι;” Βα, αντικάς αβιλό-πες. Όμως, χάρη κο ιστορίες κι Γραφιάκε σο κερένα λάφι ι τζενένγκε σο αναστισάλε, σαρ ανταγιά σο βακερντάμ, αμέν μπορίνασα τι τθεράς εμ ι επιθυμία ότι κα τζουβντιόν πάλι αμαρέ τζενέ σο μουλέ, εμ ι σιγουριά ότι ανταβά κα αβέλ-πες μπαγιά. Γιαβερέ λαφίντζαρ, τθεράσα αληθινή ελπίδα.

Ο Ιησούς βακερντάς: «Με ισινόμ η ανάσταση ντα η ζωή». (Ιωάννης 11:25) Ισί Οντουβά σο ο Ιεχωβά κα ντελ-λες ι ζορ τι αναστίνελ σαρέ ι μουλέν κατά πφουβ. Ο ίδιος βακερντάς: «Αβέλα ο σαάτι σο κα ασουνέν λέσκι φωνή [ι Χριστόσκι] σαρέ οντουλά σο ισί κο μεζάρια ντα κα ιστίν». (Ιωάννης 5:28, 29) Βα, σαρέ οντουλά σο σοβένα κο μεζάρια τθερένα ι ελπίδα τι ιστίν ντα τι τζουβντιόν κο παράδεισος κι πφουβ.

Ο προφήτης Ησαΐας αντάς αμαρέ γκοντιάτε εκ μπουτ σουκάρ εικόνα σο κα ιστίν ο μουλέ: «Τιρέ μουλέ κα τζουβντιόν. Ο μουλέ σώματα μι λαόσκε κα ιστίν. Τζανγκάντιβεν ντα ντεν βίκος χαράσαρ, τουμέν σο μπεσένα κι τσικ! Σόσκε τι δροσιά ισί σαρ ι ντισαράκι δροσιά, ντα η πφουβ κα μουκχέλ τι αβέν κι ζωή οντουλά σο ναστί νασένα κατά μεριπέ».​—Ησαΐας 26:19.

Να λοκχιαρέλα αμαρό γκι ανταβά; Ο μουλέ ισί αμπόρ αρακχαντέ σο να τζάλα αμαρί γκοντί, σαρ εκ χουρντό σο ισί αρακχαντό αντρέ πι νταγιάκε περέστε. Μπαγιά, ο μουλέ ισί αρακχαντέ αντρέ κι γκοντί κι Ντεβλέσκι σο ισί ο πο Ζουρανό. (Λουκάς 20:37, 38) Χάνικ ατζέκ, κα αβέν πάλι κι ζωή, σε εκ ευτυχισμέ ντουνιάς σο κα καλωσορίνελ-λεν σαρ εκ φαμιλί σο καλωσορίνελα πι χουρντές σο μπιαντιόλα! Άρα, τθεράσα ελπίδα ατζέ-ντα κάνα αβέλα ανγκλ’ αμέντε ο μεριπέ.

Σαρ Μπορίνελα τι Βοηθίνελ-τουμέν η Ελπίδα

Ο Παύλος σικλιαρέλα-αμέν μπουτ πράγματα σο σικαβένα καζόμ σημαντική ισί η ελπίδα. Βακερντάς ότι η ελπίδα ισί εκ μπουτ σημαντικός κομμάτι αντρέ κι πνευματική πανοπλία, βακερντάς ότι ισί η περικεφαλαία. (1 Θεσσαλονικείς 5:8) Σο μανγκέλας τι βακερέλ ανταλέσαρ; Κο πουρανέ μπρεσά ο στρατιώτης σο τζάλας κο τζένγκι, ιρίλας εκ μεταλλική περικεφαλαία ντα, τελάλ κατά περικεφαλαία, τσσουβέλας εκ κοτόρ ύφασμας ή δέρμας. Κάνα ο ντουσμάνια κα ντένας-λες κο σορό, η περικεφαλαία κα αρακχαβέλας-λες για μα τι μερέλ. Σο μανγκέλας τι σικαβέλ ο Παύλος; Σαρ η περικεφαλαία αρακχαβέλας ο σορό ι στρατιωτίσκο, αντικάς η ελπίδα-ντα αρακχαβέλα ι γκοντί, δηλαδή ο τρόπος σο σκεφτίνασα. Άμα τουμαρί ελπίδα ισί ζουρανί επειδή πακιάνα ο υποσχέσεις ι Ντεβλέσκε, αζομάν κα τθερέν ηρεμία τουμαρέ γκοντιάτε ντα να κα ιζράν κατά νταρ κάνα κα νακχέν μπαρέ δυσκολίες. Κον αμένταρ να χρειαζίντιβελα εκ ασακί περικεφαλαία;

Ο Παύλος βακερντάς εκ γιαβέρ-ντα παράδειγμας για τι σικαβέλ σαρ αμαρί ελπίδα μπορίνελα τι επηρεάντιβελ οντουλένταρ σο μανγκέλα τι κερέλ ο Ντεβέλ: «Τθεράσα ανταγιά ελπίδα σαρ άγκυρα ι γκίσκε, σίγουρη ντα σταθερή». (Εβραίους 6:19) Επειδή σωσάλο κατά φουρτούνες, ο Παύλος τζανέλας καζόμ σημαντική ισί η άγκυρα. Κάνα αβέλας εκ φουρτούνα, ο ναύτες κο καράβι γουλιαρένας ι άγκυρα κι ντεριάβ. Άμα η άγκυρα αστάρντιβελας κάπου σικίς ντιπ τελέ αντρέ κι ντεριάβ, αζομάν ο καράβι κα μπορίνελας τι νακχέλ ι φουρτούνα πο λατσσές αντίς τι οδηγίντιβελ κατά μπαρμπάλ κάρινγκ κο μπαρέ μπαρά ντα τι πφανγκιόλ.

Αντικάς, άμα ο υποσχέσεις ι Ντεβλέσκε ισί αμένγκε εκ «σίγουρη ντα σταθερή» ελπίδα, ανταγιά ελπίδα κα βοηθίνελ-αμέν τι ντας-λεν πέρα ι μπουτ δύσκολε ντιβεσέντζαρ σο τζουβντιάσα. Ο Ιεχωβά ντέλα πο λάφι ότι ατζέ-χάνικ κα αβέλ εκ βακίτι σο να κα υπαρχίντιβεν τζένγκια, μουνταρίματα, ντουκχ, ατζέ-ντα μεριπέ. (Ντικχέν ο πλαίσιος κι σελίδα 10) Άμα ανταγιά ελπίδα ασταράσα-λα σικίς, κα ντελ-αμέν ι ζορ σο χρειαζίντιβασα για τι τζουβντιάς σαρ μανγκέλα ο Ντεβέλ αντίς τι επηρεάντιβας κατά μπέτι τρόπος σο σκεφτίνενα ντα συμπεριφερίντιβενα ο τζενέ αντιβές.

Η ελπίδα σο ντέλα ο Ιεχωβά ισί ι κάθε εκχέσκε τουμένταρ. Βοβ μανγκέλα τι τζουβντιόν σαρ τθερέλας πι γκοντιάτε κι αρχή τι τζουβντιόν. Οντουβά σο μανγκέλα ισί «τι σώντιβεν σαρέ ο τζενέ». Σαρ; Πρώτον, κάθε τζενό πρέπει «τι σικλιόν ντιπ ι αλήθεια». (1 Τιμόθεο 2:4) Ο τζενέ σο νικαντέ ανταβά περιοδικός βακερένα τουμένγκε τι σικλιόν ανταγιά αλήθεια σο ντέλα ζωή ντα ισί αντρέ κο Λάφι κι Ντεβλέσκο. Η ελπίδα σο κα ντελ-τουμέν ο Ντεβέλ ισί μπουτ πο μπαρί σαρέ κατά γιαβερά σο μπορίνενα τι αρακχέν ανταλέ ντουνιάστε.

Άμα κα τθερέν εκ ασακί ελπίδα, ποτές να κα νιωθίνεν ότι χασαρντέν σαρό τουμαρό κουράγιος, σόσκε ο Ντεβέλ μπορίνελα τι ντελ-τουμέν ι ζορ σο χρειαζίντιβενα για τι πετυχίνεν σο-ντα στόχους τσσουβένα ντα συμφωνίνενα οντουλέντζαρ σο μανγκέλα βοβ. (2 Κορινθίους 4:7· Φιλιππησίους 4:13) Ανταγιά νανέ η ελπίδα σο χρειαζίντιβενα; Άρα, άμα τθερένα ανάγκη ι ελπίδα ντα άμα ρόντενα λάκε, λεν θάρρος. Η ελπίδα ισί πασέ τουμέντε. Μπορίνενα τι αρακχέν-λα!

[Πλαίσιος/Φωτογραφία]

Λάφια σο Ντένα Ελπίδα

Ο λάφια ι Γραφιάκε σο κα ντικχέν πο τελέ μπορίνενα τι μπαριαρέν τουμαρί ελπίδα:

◼ Ο Ντεβέλ ντέλα πο λάφι ότι κα τθερέν εκ ευτυχισμέ μέλλον.

Λέσκο Λάφι βακερέλα ότι σαρί η πφουβ κα αβέλ παράδεισος ντα ότι κα μπεσέν οτθέ ενωμέ ντα ευτυχισμέ τζενέ.​—Ψαλμός 37:11, 29· Ησαΐας 25:8· Αποκάλυψη 21:3, 4.

◼ Ο Ντεβέλ ναστί βακερέλα ψέματα.

Βοβ να μανγκέλα ιτς ο ψέματα. Ο Ιεχωβά ισί μπουτ άγιος, δηλαδή πάκι, οντουλέσκε ναστί βακερέλα ψέματα.​—Παροιμίες 6:16-​19· Ησαΐας 6:2, 3· Τίτο 1:2· Εβραίους 6:18.

◼ Ο Ντεβέλ τθερέλα ι πο μπαρί ζορ.

Σάντε ο Ιεχωβά ισί ο πο ζουρανό. Καέκ πράγμας κο σύμπαν να μπορίνελα τι τσσιναβέλ-λες τι κερέλ πο υποσχέσεις.​—Έξοδος 15:11· Ησαΐας 40:25, 26.

◼ Ο Ντεβέλ μανγκέλα τι τζουβντιόν για πάντα.

—Ιωάννης 3:16· 1 Τιμόθεο 2:3, 4.

◼ Ο Ντεβέλ τθερέλα ελπίδα αμένγκε καζόμ ντικχέλα-αμέν.

Βοβ να μανγκέλα τι ατσσόλ κο λάθη σο κεράσα ή κο πράγματα σο ναστί κεράσα λατσσές, αλλά ντικχέλα αμαρέ λατσσέ ιδιότητες ντα προσπάθειες. (Ψαλμός 103:12-​14· 130:3· Εβραίους 6:10) Βοβ τθερέλα ελπίδα ότι κα κεράς ο λατσσό ντα αβέλα λέσκο γκι κάνα κεράσα-λες ανταβά.​—Παροιμίες 27:11.

◼ Ο Ντεβέλ ντέλα πο λάφι ότι κα βοηθίνελ-τουμέν τι πετυχίνεν ο πνευματικούς στόχους σο τσσουντέν.

Λέσκε υπηρέτες να χρειαζίντιβελα τι νιωθίνεν ότι χασαρντέ σαρό πουμαρό κουράγιος. Ο Ντεβέλ ντέλα αντράλ πι γκίσταρ πο άγιος πνεύμας, σο ισί η πο μπαρί ζορ, για τι βοηθίνελ-αμέν.​—Φιλιππησίους 4:13.

◼ Η ελπίδα σο τθεράσα κο Ντεβέλ ισί πάντα σίγουρη.

Αφού ο Ντεβέλ ισί δίκαιος ντα μπορίνενα τι ντεν λέσκε μπέσα πφαντέ γιακχίντζαρ, να κα πφανγκέλ τουμαρό γκι ποτές.​—Ψαλμός 25:3.

[Φωτογραφία]

Σαρ η περικεφαλαία αρακχαβέλα ο σορό, αντικάς η ελπίδα-ντα αρακχαβέλα ι γκοντί

[Φωτογραφία]

Σαρ η άγκυρα, αντικάς η ελπίδα-ντα σο ασταράσα-λα σικίς κερέλα-αμέν τι ατσσάς σταθεροί

[Ευχαριστίνασα]

Ευγενής παραχώρηση από René Seindal/Su concessione del Museo Archeologico Regionale A. Salinas di Palermo