1. Σόσκε μπέκιμ τι βακερντάς ο Ιησούς ότι οντουλά σο τζάνα παλά-λέστε ισί σαρ μπρακέ;

Ο ΙΗΣΟΥΣ βακερντάς ότι η σχέση σο τθερέλα οντουλέντζαρ σο τζάνα παλά-λέστε ισί σαρ η σχέση σο τθερέλα εκ τσομπάνης πι μπρακέντζαρ. (Ιωάν. 10:​14) Ανταβά σο βακερντάς ισί μπουτ σωστός. Ο μπρακέ τζανένα πουμαρέ τσομπανής ντα ασουνένα-λες. Εκ μουρς ντικχλάς-λες ανταβά πι γιακχίντζαρ. Βοβ βακερέλα: «Μανγκάας τι νικαβάς φωτογραφία μερικέ μπρακέν ντα μαρντάμ-αμέν τι κεράς-λεν τι αβέν πασ’ αμέντε. Αλλά βον να αβιλέ σόσκε να αγαβένας αμαρέ φωνές. Σοράν, αβιλό εκ χουρντό τσομπάνης. Κάνα ντινάς-λεν βίκος, βον γκιλέ παλά-λέστε σουγκό».

2, 3. (α) Σαρ σικαβένα οντουλά σο τζάνα παλάλ κο Ιησούς ότι ασουνένα λέσκι φωνή; (β) Σο κα ντικχάς ανταλέ μαθημάστε ντα κο γιαβέρ;

² Ανταβά σο ντικχλάς οντουβά μουρς ανέλα αμαρέ γκοντιάτε ο λάφια σο βακερντάς ο Ιησούς πι μπρακένγκε, δηλαδή μι μαθητένγκε. Ο Ιησούς βακερντάς: «Κα ασουνέν μι φωνή». (Ιωάν. 10:​16) Αλλά ο Ιησούς ισί κο ουρανός. Σαρ μπορίνασα τι ασουνάς-λες; Ασουνάσα-λες κάνα κεράσα οντουλά σο σικλιαρντάς-αμέν.​—Ματθ. 7:​24, 25.

³ Ανταλέ μαθημάστε ντα κο γιαβέρ, κα ντικχάς χάνικ οντουλένταρ σο σικλιαρντάς ο Ιησούς. Σαρ κα ντικχάς, ο Ιησούς σικλιαρντάς-αμέν σο μα τι κεράς ντα σο τι κεράς. Κα ντικχάς πρώτα ντούι πράγματα σο βακερέλα αμένγκε ο λατσσό τσομπάνης μα τι κεράς.

4. Σο μπέκιμ τι κερέλα-αμέν “τι τσσουβάς αμαρέ γκίστε” σαρ βακερέλα ο εδάφιος Λουκάς 12:29;

⁴ Διαβάνεν Λουκάς 12:​29. Ο Ιησούς βακερντάς οντουλένγκε σο τζάνα παλά-λέστε “μα τι τσσουβέν πουμαρέ γκίστε”  οντουλένγκε σο τθερένα ανάγκη. Τζανάσα ότι οντουλά σο βακερέλα αμένγκε ο Ιησούς τι κεράς ισί πάντα γκοντιαβέρ ντα σωστά. Μανγκάσα τι κεράς-λεν, αλλά μπάζιμα μπέκιμ τι αβέλα αμένγκε δύσκολος τι κεράς-λεν. Σόσκε;

5. Σόσκε μπέκιμ μερικοί τι τσσουβένα πουμαρέ γκίστε οντουλένγκε σο τθερένα ανάγκη;

 ⁵ Ισί τζενέ σο μπέκιμ τι τσσουβένα πουμαρέ γκίστε οντουλένγκε σο τθερένα ανάγκη, σαρ ισί ο χαμπέ, ο σέα ντα ο κχερ. Μπέκιμ τι τζουβντιόνα εκχέ τθεμέστε σο ο πο μπουτ τζενέ ισί τσορορέ ντα ισί δύσκολος τι αρακχέν μπουτί. Μπέκιμ τι ισί δύσκολος τι νικαβέν ο λοβέ σο χρειαζίντιβενα για τι ανέν ο αναγκαία πουμαρέ φαμιλιάτε. Ή μπέκιμ ο σορό ι φαμιλιάκο τι μουλό, ντα αντικάς ο γιαβερά τζενέ κι φαμιλί μα τι τθερένα λοβέ για τι ντεν-λεν πέρα. Γιαβερά μπέκιμ τι χασαρντέ πουμαρί μπουτί κατά νασφαλιπέ ι Κορωνοϊόσκο. (Εκκλ. 9:​11) Άμα νακχλάμ ανταλά ή γιαβερά δυσκολίες, σαρ μπορίνασα μα τι τσσουβάς αμαρέ γκίστε σαρ βακερντάς αμένγκε ο Ιησούς;

6. Βακερέν σο αβιλό-πες κο απόστολος Πέτρος εκ φαρ.

⁶ Εκ φαρ, ο απόστολος Πέτρος ντα ο γιαβερά απόστολοι ισινέ εκχέ καραβίστε κι Ντεριάβ της Γαλιλαίας κάνα αρχισάλι εκ καταιγίδα ντα ντικχλέ ι Ιησούς τι πφιρέλ οπράλ κο πανί. Ο Πέτρος βακερντάς: «Κύριε, άμα ισινάν τούι, βάκερ μάνγκε τι πφιράβ οπράλ κο πανί για τι αβάβ τούτε». Κάνα ο Ιησούς βακερντάς λέσκε: «Έλα!», ο Πέτρος γουλίστιλο κατά καράβι ντα «πφιρντάς οπράλ κο πανί για τι τζαλ κο Ιησούς». Ντικχέν σο αβιλό-πες σοράν: «Καζόμ ντικχέλας ι καταιγίδα, νταρασάλο. Ντα κάνα αρχισάλο τι βουλιάνελ, ντινάς βίκος: “Κύριε, σώνε-μαν!”» Ο Ιησούς ντινάς-λες πο βας ντα σωντάς-λες. Ισί σημαντικός ότι ο Πέτρος μπορίνελας τι πφιρέλ οπράλ κο πανί καζόμ τθερέλας πο γιακχά κο Ιησούς. Κάνα  όμως ντικχλάς ι καταιγίδα, νταρασάλο ντα αρχισάλο τι βουλιάνελ.​—Ματθ. 14:​24-31.

7. Σο σικλιάσα κατά παράδειγμας ι Πετρόσκο;

⁷ Μπορίνασα τι σικλιάς κάτι κατά παράδειγμας ι Πετρόσκο. Κάνα ο Πέτρος γουλίστιλο κατά καράβι κι ντεριάβ, να μπεκλεντίνελας ότι κα λέλας πο γιακχά κατά Ιησούς ντα κα αρχίνελας τι βουλιάνελ. Μανγκέλας τι ατσσόλ οπράλ κο πανί μέχρι τι ερεσέλ πι Κυριόστε. Αλλά αντίς τι τθερέλ πο γιακχά κο Ιησούς, ντικχέλας ι καταιγίδα. Σίγουρα αμέν ναστί πφιράσα οπράλ κο πανί σαρ ο Πέτρος, αλλά πρέπει τι τθεράς πίστη για τι νταϊντίνας ο προβλήματα. Άμα κα τσσιναβάς τι τθεράς αμαρέ γιακχά κο Ιεχωβά ντα οντουλέντε σο ντινάς πο λάφι τι κερέλ, αμαρί πίστη κα αβέλ μπίζουρανι. Οτθάρ, ατζέ-ντα άμα τθεράσα μπουτ μπαρέ προβλήματα πρέπει τι τθεράς αμαρέ γκοντιάτε ι Ιεχωβάς ντα ότι βοβ μπορίνελα τι βοηθίνελ-αμέν. Σαρ κα κεράς-λες ανταβά;

8. Σο κα βοηθίνελ-αμέν μα τι τσσουβάς μπουτ αμαρέ γκίστε οντουλένγκε σο τθεράσα ανάγκη;

⁸ Αντίς τι τσσουβάς αμαρέ γκίστε αμαρέ προβληματένγκε, χρειαζίντιβελα τι ντας μπέσα κο Ιεχωβά. Τι ντεν-τουμέν γκοντί ότι αμαρό λατσσό Ντατ, ο Ιεχωβά, ντέλα πο λάφι ότι κα ντελ-αμέν οντουλά σο τθεράσα ανάγκη άμα αμέν τσσουβάσα πρώτα λες αμαρέ ζωγιάτε. (Ματθ. 6:​32, 33) Βοβ πάντα ατσσικιαρέλα πο λάφι. (Δευτ. 8:4, 15, 16· Ψαλμ. 37:​25) Άμα ο Ιεχωβά ντέλα οντουλά σο χρειαζίντιβελα κο τσιρικλέ ντα κο λουλούδια, σίγουρα να χρειαζίντιβελα αμέν τι τσσουβάς αμαρέ γκίστε ι χαμπέσκε ή σεΐνγκε. (Ματθ. 6:​26-30· Φιλιπ. 4:6, 7) Σαρ η αγάπη τσσίντελα ι νταντέν ντα ι νταΐν τι ντεν πουμαρέ τσσαβέντε οντουλά σο τθερένα ανάγκη, αντικάς τσσίντελα ι Ιεχωβάς-ντα, αμαρέ Νταντές, τι ντελ πι υπηρετόντε οντουλά σο τθερένα ανάγκη. Μπορίνασα τι αβάς σίγουροι ότι ο Ιεχωβά κα ντελ-αμέν οντουλά σο χρειαζίντιβασα!

9. Σο σικλιάσα κατά εμπειρία εκχέ αντρογυνόσκι;

⁹ Ντικχέν εκ εμπειρία σο σικαβέλα μπουτ λατσσές σαρ μπορίνελα ο Ιεχωβά τι ντελ-αμέν οντουλά σο τθεράσα ανάγκη. Εκ αντρόγυνος σο ισί σκαπανείς κερντέ πο μπουτ από εκ σαάτι ντρομ πουμαρέ πουρανέ αυτοκινητόσαρ για τι λεν μερικέ πφενίν εκχέ τθανέσταρ σο μπεσένας ο πρόσφυγες ντα τι τζαν γιεκ κι συνάθροιση. Ο πφραλ βακερντάς: «Σοράν κατά συνάθροιση, βακερντάμ ι πφενίνγκε τι αβέν αμαρέ κχερέστε για τι χας γιεκ, αλλά σοράν ντινάμ-αμέν γκοντί ότι να τθεράας χαμπέ τι ντας-λεν». Σο κα κερένας; Ο πφραλ βακερέλα: «Κάνα ερεσλάμ κχερέ, αρακχλάμ ντούι μπαρέ τσάντες χαμπιματέντζαρ ανγκλάλ αμαρέ πορτάτε. Να τζανάας κον μουκχλάας-λεν οτθέ. Ο Ιεχωβά ντινάς-αμέν οντουβά σο τθεράας ανάγκη». Χάνικ βακίτι σοράν, λένγκο αυτοκίνητος χαλάντιλο. Μανγκένας-λες πουμαρέ εργόσκε, αλλά να τθερένας λοβέ για τι λατσσαρέν-λες. Γκερντέ ο αυτοκίνητος εκχέ συνεργειόστε οτθέ πασέ για τι ντικχέν καζόμ λοβέ κα μανγκέλας για τι λατσσάρντιβελ. Αζομάν, γκιλό εκ μουρς ντα πουτσλάς: «Κάσκο ισί ακαβά αυτοκίνητος;» Ο πφραλ βακερντάς ότι ισινέ λέσκο ντα ότι μανγκέλας λατσσαριπέ. Ο μουρς βακερντάς: «Να πειράνελα. Μι ρομνί μανγκέλα ασακό αυτοκίνητος ντα ντιπ ανταλέ χρωμάστε. Καζόμ μπικινέσα-λες;» Ο πφραλ μπικιντάς πο αυτοκίνητος οντουλέ μουρσέστε ντα αντικάς τθερέλας ο λοβέ σο χρειαζίντιβελας για τι κινέλ εκ γιαβέρ αυτοκίνητος. Βοβ βακερέλα: «Να χρειαζίντιβελα τι βακεράβ σαρ νιωθίναας κο τέλος οντουλέ ντιβεσέσκο. Τζανάας ότι ανταβά να ισινέ τυχαίος. Ισινέ ο βας ι Ιεχωβάσκο».

10. Σαρ σικαβέλα αμένγκε ο εδάφιος Ψαλμός 37:5 μα τι τσσουβάς αμαρέ γκίστε οντουλένγκε σο τθεράσα ανάγκη;

¹⁰ Άμα ασουνάσα ι λατσσέ τσομπανής ντα να τσσουβάσα μπουτ αμαρέ γκίστε οντουλένγκε σο τθεράσα ανάγκη, μπορίνασα  τι αβάς σίγουροι ότι ο Ιεχωβά κα ντελ-αμέν οντουλά σο χρειαζίντιβασα. (Διαβάνεν Ψαλμός 37:5· 1 Πέτρ. 5:7) Σκεφτίνεν ο δυσκολίες σο βακέρντιλε κι  παράγραφος 5. Μέχρι ακανά, ο Ιεχωβά μπέκιμ τι βοηθίνελας-αμέν τι τθεράς οντουλά σο χρειαζίντιβασα αντράλ κατά σορό ι φαμιλιάκο ή εκχέ τζενέσταρ σο κεράας λέσκε μπουτί. Άμα ο σορό ι φαμιλιάκο ναστί κερέλα-λες ακανά ανταβά ή άμα χασαρντάμ αμαρί μπουτί, ο Ιεχωβά κα ντελ-αμέν οντουλά σο τθεράσα ανάγκη εκχέ γιαβερέ τροπόσαρ. Ισινάμ σίγουροι ανταλέσκε. Ακανά κα ντικχάς σο γιαβέρ βακερέλα αμένγκε αμαρό λατσσό τσομπάνης μα τι κεράς.

11. Σο βακερντάς αμένγκε ο Ιησούς μα τι κεράς σαρ βακερένα ο εδάφια Ματθαίος 7:1, 2, ντα σόσκε μπέκιμ τι αβέλ δύσκολος;

¹¹ Διαβάνεν Ματθαίος 7:1, 2. Ο Ιησούς τζανέλας ότι ο ατελείς τζενέ σο ασουνένας-λες μπουτ φαρ κρίνενας ι γιαβερέν. Άκ’ σόσκε βακερντάς: «Μα κρίνεν». Μπέκιμ τι μαράσα-αμέν μπαγιά μα τι κρίνας αμαρέ πφραλέν ντα πφενίν. Αλλά ισινάμ σαρέ ατελείς. Άμα μπάζιμα αγαβάσα ότι κρίνασα ι γιαβερέν, σο πρέπει τι κεράς; Τι ασουνάς ι Ιησούς ντα τι μαράς-αμέν μα τι κρίνας.

12, 13. Σαρ βοηθίνελα-αμέν ο παράδειγμας ι Ιεχωβάσκο τι τσσιναβάς τι κρίνας ι γιαβερέν;

¹² Μπορίνασα τι βοηθίντιβας άμα σκεφτίνασα λατσσές ο παράδειγμας ι Ιεχωβάσκο. Βοβ ντικχέλα ο λατσσιπέ κο τζενέ. Ντικχάσα-λες ανταβά οντουλένταρ σο κερντάς κάνα ο βασιλιάς Δαβίδ κερντάς μπαρέ λάθη. Για παράδειγμας, κερντάς λουμνιπέ ι Βηθ-σαβεάσαρ ντα κανονιντάς ατζέ-ντα τι μερέλ λάκο ρομ. (2 Σαμ. 11:​2-4, 14, 15, 24) Ανταλέσαρ σο κερντάς, ο Δαβίδ να κερντάς ζιάνι σάντε πι νεαυτόσκε αλλά πι φαμιλιάκε-ντα, αντρέ ανταλέντε πι γιαβερέ-ντα ρομνίνγκε. (2 Σαμ. 12:​10, 11) Εκ γιαβέρ φαρ, ο Δαβίδ να σικαντάς μπαρί μπέσα κο Ιεχωβά κάνα γκιντάς ο στρατός κο Ισραήλ, σο να βακερντάας λέσκε ο Ιεχωβά τι κερέλ-λες. Ο Δαβίδ μπέκιμ τι κερντάς-λες ανταβά επειδή ισινέ μπαρικανό ντα ντέλας μπέσα κο μπαρό στρατός σο τθερέλας. Καβά ισινέ ο αποτέλεσμας; Εκ νασφαλιπέ μουνταρντάς 70.000 Ισραηλιτέν!​—2 Σαμ. 24:​1-4, 10-15.

¹³ Άμα αζομάν τζουβντιόνας κο Ισραήλ, σαρ κα ντικχένας ι Δαβιδίς; Κα πακιάνας ότι ο Ιεχωβά δεν έπρεπε τι συγχωρίνελ-λες; Ο Ιεχωβά να πακιάλας-λες ανταβά. Ντικχλάς καζόμ πιστός ισινέ ο Δαβίδ σαρέ ο γιαβερά μπρεσά πι ζωγιάτε ντα ότι μετανιωσάλο μπαγιά. Οτθάρ, συγχωριντάς-λες ανταλέ μπαρέ αμαρτιένγκε σο κερντάς. Ο Ιεχωβά τζανέλας ότι ο Δαβίδ μανγκέλας-λες μπουτ ντα ότι μανγκέλας τι κερέλ ο σωστός. Να ισινέν πφερντέ εκτίμηση σο ντικχέλα αμαρό Ντεβέλ ο λατσσιπέ αμέντε;​—1 Βασ. 9:4· 1 Χρον. 29:​10, 17.

14. Σο βοηθίνελα ι Χριστιανόν μα τι κρίνεν ι γιαβερέν;

¹⁴ Επειδή ο Ιεχωβά να μπεκλεντίνελα αμένταρ τι αβάς τέλειοι, πρέπει αμέν-ντα μα τι μπεκλεντίνας κατά γιαβερά τι αβέν τέλειοι ντα πρέπει τι ντικχάς ο λατσσιπέ κο γιαβερά. Ο πο μπουτ φαρ ισί πο εύκολος τι ντικχάς ο λάθη ι γιαβερένγκε ντα τι κρίνας-λεν. Αλλά εκ τζενό σο μοιάζελα κο Ιεχωβά κερέλα λατσσές μπουτί ι γιαβερέντζαρ ατζέ-ντα άμα τζανέλα λένγκε ατέλειες. Εκ διαμάντι σο να κερντιλό μπουτί νανέ σουκάρ, αλλά εκ γκοντιαβέρ τζενό τζανέλα ότι κα αβέλ μπουτ σουκάρ ντα πολύτιμος αφού κα τσσιντιόλ ντα κα μορντιόλ. Σαρ ο Ιεχωβά ντα ο Ιησούς, δεν πρέπει τι ντικχάς ο ατέλειες ι τζενένγκε αλλά λένγκε σουκάρ ιδιότητες.

15. Σαρ κα βοηθίντιβας μα τι κρίνας ι γιαβερέν άμα κα σκεφτίνας σαρ ισί λένγκι ζωή;

¹⁵ Εκτός κατά λατσσέ ιδιότητες σο πρέπει τι ντικχάς κο γιαβερά, σο κα βοηθίνελ-αμέν μα τι κρίνας-λεν; Τι προσπαθίνας τι ανάς αμαρέ γκοντιάτε σαρ ισί λένγκι ζωή.  Σκεφτίνεν ακαβά παράδειγμας: Εκ ντιβές κο ναός, ο Ιησούς ντικχλάς εκχέ τσορορέ χηρά τι τσσουβέλ ντούι λεπτά σο τθερένας χάνικ αξία εκχέ κουτίστε σο τσσουβένας ο λοβέ. Να πουτσλάς: «Σόσκε να τσσουντάς πο μπουτ;» Αντίς τι ντικχέλ ο λοβέ σο τσσουντάς η χήρα, ο Ιησούς σκεφτιντάς σόσκε κερντάς-λες ανταβά ντα σαρ ισινέ λάκι ζωή ντα ισαρντάς-λα σο κερντάς ο πο λατσσό.​—Λουκ. 21:​1-4.

16. Σο σικλιόνα κατά εμπειρία σο τθερέλας η Βερόνικα;

¹⁶ Η εμπειρία σο τθερέλας εκ πφεν, η Βερόνικα, σικαβέλα αμένγκε σόσκε ισί σημαντικός τι σκεφτίνας σαρ ισί η ζωή ι τζενένγκι. Λάκε κχανγκιριάτε ισινέ εκ ντάι σο μπαριαρέλας κορκορί πι τσσαβές. Η Βερόνικα βακερντάς: «Ντικχίντιβελας μάνγκε ότι να αβένας μπουτ φαρ κο συναθροίσεις ντα κο έργος. Ανταβά κερντάς-μαν τι τθεράβ λένγκε μπέτι άποψη. Αλλά εκ φαρ νικίστιλομ κο έργος ι νταγιάσαρ. Βακερντάς μάνγκε ότι λάκο τσσαβό τθερέλας εκ νασφαλιπέ σο βακέρντιβελα αυτισμός. Κερέλας σο νακχέλας λάκε βαστένταρ για τι ντελ-λες οντουλά σο χρειαζίντιβελας ντα τι αβέλ λατσσό αμάλ ι Ιεχωβάσκο. Κατά πρόβλημας πι τσσαβέσκο έπρεπε μπάζιμα τι τζαλ κο συναθροίσεις σο αβένας-πες γιαβερέ κχανγκιριάτε». Η Βερόνικα βακερντάς: «Να αγαντόμας καζόμ δύσκολη ισινέ λάκι ζωή. Ακανά μανγκάβα ντα σεβάναβα μπουτ ανταλέ πφενιά σαρέ οντουλένγκε σο κερέλα για τι υπηρετίνελ ι Ιεχωβάς».

17. Σο βακερέλα αμένγκε ο εδάφιος Ιακώβου 2:8 τι κεράς, ντα σαρ μπορίνασα τι κεράς-λες;

 ¹⁷ Σο πρέπει τι κεράς άμα αγαντάμ ότι κριντάμ εκχέ πφραλές; Τι ντας-αμέν γκοντί ότι πρέπει τι μανγκάς αμαρέ πφραλέν. (Διαβάνεν Ιακώβου 2:8) Επίσης, πρέπει τι κεράς προσευχή αντράλ αμαρέ γκίσταρ κο Ιεχωβά ντα τι μολίνας-λες τι βοηθίνελ-αμέν μα τι κρίνας. Κα κεράς οντουβά σο βακερντάμ αμαρέ προσευχιέντε άμα ντινάμ αμαρέ σαατίσταρ κο πφραλ σο κριντάμ-λες. Ανταβά μπέκιμ τι βοηθίνελ-αμέν τι σικλιάς-λες. Κα μπορίναας τι μανγκάς λέσταρ τι νικιάς γιεκ κο έργος ή τι βακεράς λέσκε τι χας γιεκ. Καζόμ σικλιάσα πο λατσσές ι πφραλές, μπορίνασα τι κεράς ο πο λατσσό για τι ντικχάς ο λατσσιπέ λέστε σαρ κερέλα ο Ιεχωβά ντα ο Ιησούς. Αντικάς, σικαβάσα ότι ασουνάσα ι λατσσέ τσομπανής σο βακερντάς αμένγκε μα τι κρίνας.

18. Σαρ κα σικαβάς ότι ασουνάσα ι φωνή ι λατσσέ τσομπανίσκι;

¹⁸ Σαρ ο μπρακέ ασουνένα ι φωνή πουμαρέ τσομπανίσκι, αντικάς οντουλά-ντα σο τζάνα παλάλ κο Ιησούς ασουνένα λέσκι φωνή. Άμα μαράσα-αμέν μα τι τσσουβάς αμαρέ γκίστε οντουλένγκε σο τθεράσα ανάγκη ντα μα τι κρίνας ι γιαβερέν, ο Ιεχωβά ντα ο Ιησούς κα ευλογίνεν-αμέν. Είτε ισινάμ κατά «χουρντό κοπάδι» είτε κατά “γιαβερά μπρακέ”, μα τι τσσιναβάς τι ασουνάς ι φωνή ι λατσσέ τσομπανίσκι ντα τι ντας καν. (Λουκ. 12:​32· Ιωάν. 10:​11, 14, 16) Κο γιαβέρ μάθημας, κα ντικχάς ντούι πράγματα σο βακερντάς ο Ιησούς τι κερέν οντουλά σο τζάνα παλά-λέστε.