Μπιάντιλομ ντα μπαριλόμ αβρί κατά Ρώμη, σε εκ τσορορό τθεμ. Η ζωή ισινέ δύσκολη. Να γνωριντόμ ποτές μι νταγιά σο μπιαντάς-μαν ντα να τζάβας-λεν λατσσές μι νταντέσαρ. Καζόμ μπαριάβας σικλιλόμ σαρ τι τζουβντιάβ κο ντρομά.

Κάνα ισινόμας ντεσέ μπρεσένγκο, αρχινισάλομας ήδη τι τσοράβ. Κο 12, νασλόμ αποτσοράλ πρώτη φορά κατά κχερ. Μπάζιμα, μο ντατ έπρεπε τι αβέλ τι λελ-μαν κατά ασκέρια. Κεράβας καβγκάδες συνέχεια​—χάβας-μαν ντα ισινόμας χολιαμέ σαρέ ι τζενέντζαρ. Κο 14, νασλόμ ντιπ κατά κχερ. Αρχισάλομ τι πιαβ ναρκωτικά ντα τζουβντιάβας κο ντρομά. Επειδή να τθεράβας κάι τι σοβάβ, πουτράβας αμάξια ντα μπεσάβας οτθέ μέχρι τι ντισιόλ. Σοράν ρόνταβας καέκ συντριβάνι για τι τθοβάβ-μαν.

Αβιλόμ μπουτ λατσσό κο τσορίματα​—μπορίναβας εμ τι καπτίναβ τσάντες αλλά εμ τι νταβ αρατί χουλανέ κχερέντε για τι τσοράβ-λεν. Κερντόμ μπέτι ναβ ντα χάνικ πο σοράν εκ μπαρί συμμορία μανγκέλας τι αβάβ γιεκ λέντζαρ. Ανταβά ντινάς-μαν ι «ευκαιρία» τι τσοράβ τράπεζες-ντα. Επειδή ισινόμας καβγκατζής, κερδιντόμ σουγκό ο σεβασμός ι γιαβερένγκο κατά συμμορία. Να τζάβας πουθενά χωρίς τι τθεράβ μο πιστόλι​—αφού κάνα σοβάβας τθεράβας-λες τελάλ μι γιαστικίσταρ. Η νταπ, ο ναρκωτικά, ο τσοριπέ, ο μπίλατζανε λάφια ντα ο λουμνιπέ ισινέ αντρέ μι ζωγιάτε. Ρόντενας-μαν συνέχεια ο ασκέρια. Ασταρντέ-μαν μπουτ φαρ, ντα για μπουτ μπρεσά ντάβας ντα νικλιάβας κατά φυλακή.

Εκ φαρ σο νικίστιλομ κατά φυλακή, βακερντόμ τι τζαβ τι ντικχάβ μι μπιμπιά. Χωρίς τι τζανάβ-λες βόι ντα ντούι ξαδέλφια μιρέ αβιλέας Μάρτυρες ι Ιεχωβάσκε. Βακερντέ μάνγκε τι τζαβ λέντζαρ σε εκ συνάθροιση σο κερένα ο Μάρτυρες. Μανγκλόμ τι τζαβ για τι ντικχάβ σαρ ισί. Κάνα ερεσλάμ κι Αίθουσα Βασιλείας, επιμίναβας τι μπεσάβ πασέ κι πόρτα για τι ντικχάβ κον αβέλα ντα κον νασέλα. Ντα τθεράβας μάντζαρ μο πιστόλι.

Ανταγιά συνάθροιση αλλαντάς μι ζωή. Αμντίναβας ότι ισινόμας σε εκ γιαβέρ ντουνιάς. Καλωσοριντέ-μαν τζενέ σο ισινέ τατέ, γκουλντέ ντα ασάνας. Τθεράβα ατζέ μι γκοντιάτε καζόμ λατσσέ τροπόσαρ ντικχλέ-μαν ο Μάρτυρες. Σίγουρα, ανταβά να τθερέλας καέκ σχέση ι ντουνιάσαρ σο τζουβντιάβας με!

Αρχισάλομ τι κεράβ μελέτη κατά Γραφή ι Μαρτυρέντζαρ. Καζόμ πο μπουτ σικλιάβας αζόμ πο ξεκάθαρος αβέλας μάνγκε ότι έπρεπε τι αλλάναβ ντιπ ο τρόπος σο τζουβντιάβας. Μανγκλόμ τι κεράβ μι ζωγιάτε ο λάφια ι εδαφιόσκε κο Παροιμίες 13:20: «Οντουβά σο πφιρέλα γκοντιαβέρ τζενέντζαρ κα αβέλ γκοντιαβέρ, αλλά οντουβά σο κερέλα παρέα τζενέντζαρ σο νανέ-λεν γκοντί κα τθερέλ μπέτι αποτέλεσμας». Αγαντόμ ότι έπρεπε τι νασάβ κατά συμμορία. Να ισινέ εύκολος, αλλά ι Ιεχωβάσκε βοηθειάσαρ κερντόμ-λες.

Επίσης, λατσσαρντόμ μι εμφάνιση. Μαρντόμ-μαν μπουτ ντα τσσιναντόμ ι τσιγάρα ντα ο ναρκωτικά. Τσσιντόμ μο μπαλά, νικαντόμ ο τσενιά ντα τσσιναντόμ τι κουσάβ. Πρώτη φαρ μι ζωγιάτε αγαβάβας ντιπ σο κεράβας.

Επειδή ποτές να μπεϊντίναβας ο διάβασμας ντα η μελέτη, ισινέ πφαρό μάνγκε τι κεράβ μελέτη κατά Γραφή. Όμως, καζόμ μαράβας-μαν, μπαριλί μι αγάπη ι Ιεχωβάσκε, ντα κάτι αλλαξάλο αντρέ μάντε​—μι συνείδηση αρχισάλι τι χαλ-μαν. Μπουτ φαρ τθεράβας μπέτι αισθήματα μι νεαυτόσκε, ντα να ισινόμας σίγουρος άμα ο Ιεχωβά κα συγχωρίνελας-μαν ι μπέτι πραγματένγκε σο κερντόμας. Κάνα σκεφτίναβας αντικάς, ντέλας-μαν παρηγοριά ο τρόπος σο συγχωριντάς ο Ιεχωβά ι Βασιλιάς Δαβιδίς κάνα κερντάς μπαρέ αμαρτίες.​—2 Σαμουήλ 11:1–12:13.

Ατζέκ, ισινέ πφαρό μάνγκε τι βακεράβ οντουλά σο πακιάβα κο γιαβερά κο έργος κχερ κχερέστε. (Ματθαίος 28:19, 20) Ιζράβας κατά νταρ μα τι ντικχάβ καεκχές σο κερντόμ λέσκε κακός ή αδικιντόμ-λες κο πουρανέ μπρεσά! Όμως σιγά σιγά νασκιαρντόμ ανταγιά νταρ. Αβέλας μπαγιά μο γκι κάνα βοηθίναβας ι γιαβερέν τι σικλιόν αμαρέ ρουπανέ Νταντέσκε σο ισί κο ουρανός ντα συγχωρίνελα μπουτ.

Σικλιλόμ ι Ιεχωβάσκε ντα ανταβά σωντάς μι ζωή! Ο πο μπουτ τζενέ σο κεράβας λέντζαρ παρέα είτε ισί μουλέ είτε κι φυλακή. Με, όμως, τθεράβα εκ σουκάρ ζωή ντα ελπίδα για το μέλλον. Σικλιλόμ τι αβάβ ταπεινός ντα τι νταβ καν ντα τι κεράβ κουμάντος μο νεαυτός σο μπουτ φαρ τσσίντελα-μαν τι χαβ-μαν. Οτθάρ, τθεράβα πο λατσσέ σχέσεις ι γιαβερέντζαρ. Τθεράβα εκ ευτυχισμέ μπιαβ μι σουκάρ ρομνιάσαρ, σο βακερένα λάκε Κάρμεν. Γιεκ, μπεϊντίνασα μπουτ τι βοηθίνας ι γιαβερέν τι σικλιόν ι Γραφιάκε.

Α, ντα μι μπουτί ακανά ισί τίμια. Μπάζιμα ατζέ τζάβα κο τράπεζες, αλλά αντίς τι τσοράβ-λεν, ακανά καθαρίναβα-λεν!