LEKTIONA 22
Har nai rakreh tu wawarentsa pral o latcho lab?
Was tuke an tiro Biblakro Kurso an o shero, kai hunte djinenn wawar kowa ninna? Awa, hakeno hunte djinell o tchatchepen dran i bibla. Rakras doleske kanna pral kowa, har te rakras nai pral o latcho lab, ninna te hi men i tikni daar an o dji.
1. Har nai rakreh tu wawarentsa pral kowa, hoi tu sikedo wal?
I Jeseskre bitchepangre penan: “Mer nai rikrah gar maro mui pral kowa, hoi dikam un shunam” (Bitchepangre 4:20). O tchatchepen his lenge jaake bud moldo, kai kaman jon pral kowa jaake bud menshentsa te rakrell, har djala. Hi tuke kowa ninna jaake? Palle dik, te hatsess situatione, kai nai rakreh latche un kamle labentsa tiri familjah un tire malentsa pral kowa, hoi tu sikedo wal (Dik pal an Kolossarja 4:6).
Jaake nai kreh kowa
-
Te rakreh jekeha, nai peneh tu: “Kawa kurko was mange tchomone shukar dran i bibla sikedo.”
-
Te hi jek nasslo oder te hi jekes i problema, sike leske i biblakro verso, hoi sorles krella.
-
Te putchell jek, hoi pash tute newes della, nai peneh tu, hawo lab tuke an tiro Biblakro Kurso oder an o Khetnepen shukar his.
-
Tu nai sikreh jekeske mari rig jw.org an o internet.
-
Tu nai peneh wawarenge, te nai wenn le pash tiro Biblakro Kurso pashel; oder tu sikreh len, har te putchenn le pal i Biblakro Kurso.
2. Hoske hi kowa mishto, te aneh o latcho lab khetne i phralentsa un phenjentsa dran i Versammlunga?
I Jeseskre nashepangre rakran gar kokres i menshentsa, kolen jon prindjran. O Jesus bitchras hako kopo dujen khetne “ap o drom glan peste, te djan le an i forja un gaba,” te anenn le o latcho lab (Luka 10:1). Doleske, kai kowa organisieremen was, nai was o latcho lab pash budeder menshende anlo. Jaake wan jon an i Debleskri Budi ninna bachtleder (Luka 10:17). Wals tuke kowa mishto, te krals tu kowa ninna jaake?
RODAS DUREDER
Kanna dikeh, har te nai djas tu pral tiri daar, te nai aness o latcho lab, un har shukar kowa hi, te rakreh wawarentsa pral o tchatchepen.
3. O Jehowah hi tuke koi
Bud kamans pral i bibla te rakrell. Lengri daar hi, kai djinenn le gar, har wawar ap kowa reagierenna.
-
Har wals tuke kowa, te rakrals wawarentsa pral kowa, hoi tu sikedo wal? Hoske peneh tu kowa jaake?
Te dikan o VIDEO, rakrenn khetne pral:
-
Har nai rakran kola terne pral pengro patsepen?
Dikenn pal an Jesaja 41:10, un rakrenn khetne pral:
-
Hoske hi o mangepen mishto, te dareh, te rakress pral i Jehoweste?
Djinal tu kowa?
Bud kolendar, kai kanna Jehoweskre Rakepangre hin, penan glanstunes, jon nai anenn gar o latcho lab pash wawarende. Jaake his ninna pash i Sergejeste. An leskre jaka his lo tchi moldo, un leske his kowa pharo, te rakrell lo wawarentsa. Palle kras lo i Biblakro Kurso. Job penella: “Ninna, kai his man daar, penum wawarenge, hoi me dran i bibla haiwum. Me krum bare jaka, har haiwum, kai kras man kowa sorleder. Un jaake was ninna kowa sorleder, ap hoi me patsum.”
4. Ab latcho un kamlo
Tu te rakreh wawarentsa pral o latcho lab, palle hunte djiness tu gar kokres hoi te peness, tu hunte djiness ninna har te peness lenge kowa. Dikenn pal an 2. Timoteo 2:24 un 1. Petro 3:15, un rakrenn khetne pral:
-
Har nai rikreh tu tut ap kola laba, tu te rakreh wawarentsa pral i bibla?
-
Hoi te kress, te patsenn wawar kowa gar, hoi tu lenge peneh? Un hoi te mukess, te rakreh lentsa pral o patsepen?
-
Hoske hi kowa feteder, te rakress latche labentsa un gar labentsa, hoi dukrenna?
5. Te rakrah pral o latcho lab, wah mer bachteles
O Jehowah das i Jeses koi budi, te anell lo o latcho lab pash i menshende. Har dikas o Jesus ap koi budi? Dikenn pal an Johanni 4:33, 34, un rakrenn khetne pral:
-
Latcho chapen rikrell men djides un krella bachteles. Hoske penas o Jesus, kai leskro chapen kowa hi, te krell lo, hoi o Dewel lestar kamella un te anell lo o latcho lab?
-
Hawo shukar koowa well menge, te rakrah wawarentsa pral o latcho lab?
Tipps
-
Dik an o Khetnepen tel o kurko, hawe labentsa tu wawarentsa an i rakepen nai weh.
-
Tu nai kreh ninna ko training, hoi an o Khetnepen tel o kurko della. Kote well menge sikedo, har te rakras wawarentsa pral i bibla.
-
Pash “BUD PENENNA” un “JEK NAI PUTCHELLA” nai dikeh ninna, har tu reagierals, te wals kowa ap tute penlo.
JEK NAI PUTCHELLA: “Hoi della newes pash tute?”
-
Har nai rakreh tu kanna pral kowa, hoi tu dran i bibla sikedo wal?
HOI KATE PENLO WAS
Te rakrah wawarentsa pral o latcho lab, krell men kowa bachteles. Kowa hi gar jaake phares, har bud patsenn.
Hoi penals tu?
-
Hoske rakrah mer wawarentsa pral o latcho lab?
-
Har nai rakrah latche labentsa un gar labentsa, hoi dukrenna?
-
Hoi nai kreh, te hi tuke kowa phares, te rakress wawarentsa pral o latcho lab?
BUDEDER
Kate nai dikeh, har nai weh an i rakepen, te deh i jw.org kontaktkarta tele.
Kate drawereh, har dran i Biblakro Studento i Biblakro Sikepaskro wella.
“Hal tu jaake dur, te wess har i matchepaskro ap i menshende?” (O Gardeskro Kher, September 2020)
Kate dikeh, har i tchai dran i bibla ninna terne tchawenge soor della, te nai rakrenn le pral i Jehoweste.
Kate hatseh, har te rakress nai jekeha dran tiri familja pral tiro patsepen.
“Jaake nai taprah ap o dji kolendar, kai hin gar an maro patsepen” (O Gardeskro Kher, März 15, 2014)
