LEKTIONA 34

Har nai sikrah mer i Jehoweske maro kamlepen?

PLAY

Kras tiro Biblakro Kurso tiro kamlepen ap i Jehoweste bareder? Kamals tu, te well tiro malepen leha gomme sorleder? Te hi kowa jaake, nai haiweh tu: Jaake bareder tiro kamlepen ap i Jehoweste wella, jaake budeder kamell lo tut un hi lo tuke koi. Har nai sikreh tu leske, kai kameh les?

1. Har sikrah mer, kai kamah mer i Jehowes?

Mer sikrah i Jehoweske maro kamlepen, te shunah ap leste (Dik pal an 1. Johanni 5:3). O Jehowah penell ap kekeste, kai hunte shunell lo ap peskre laba. Na-a, job mukell hakenes peske kowa kokres win te rodell. Hoske? O Jehowah kamell, te shunas “o tselo djieha” (Remarja 6:17). Wawar labentsa: Job kamell, te shunas ap leste dran kamlepen, un gar doleske, kai hunte kras kowa. An kola Kotja 3 un 4 haiweh tu, hoi i Jehowes bachteles krella, un hoi les dukella. Te nai sikress tiro kamlepen ap i Jehoweste, hunte djiness tu kowa.

2. Hoske nai well menge kowa phares, te sikras i Jehoweske maro kamlepen?

“Bud duka wenna ap koleste, kai an o tchatchepen tardo hi” (Gilja 34:19, 20). Mari doosh, lowengre probleme, tchilatchepen, un ninna wawar probleme nai krenn menge o djipen phares. Sawo pharo koowa nai tchorell menge mari soor, te kras kowa, hoi o Jehowah mendar kamella. Te rikrah mer men an sawi momenta ap kowa, hoi o Jehowah menge penella, sikrah mer leske, kai kamah mer les maro tselo djiestar. Mer te ham leske loyal, hi job ninna menge loyal. Job mukell men an kek tsiro kokres (Dik pal an Gilja 18:25, 26).

RODAS DUREDER

Kanna dikeh hoske o Jehowah bachteles hi, te shuneh ap leste, un har te atchess nai loyaltikes.

3. I tchingepen kai hakeno mank hi

An ko biblakro liil Hiob well penlo, kai o beng gar kokres i chochepen ap ko morsheste Hiob anas, na-a, job anas chochepen ap i tsele menshende, kai kamenn i Jehoweske te djiwell. Dikenn pal an Hiob 1:1, 6 djin te 2:10, un rakrenn khetne pral:

Hoi penas o beng pral i Hiobeste (Dik pal an Hiob 1:9-11)?
Hoi penell o beng pral i tsele menshende — ninna pral tute (Dik pal an Hiob 2:4)?

Dikenn pal an Hiob 27:5b, un rakrenn khetne pral:

Har sikras o Hiob, kai kamas lo i Jehowes tchatchepah peskro tselo djieha?

Doleske, kai rikras o Hiob loyal ap i Jehoweste, sikras job peskro kamlepen ap leste

Te rikrah mer loyaltikes ap i Jehoweste, nai sikrah mer ninna maro kamlepen ap leste

4. Kre o Jehoweskro dji bachteles

Dikenn pal an Gosewe Laba 27:11, un rakrenn khetne pral:

Har hi i Jehoweske kowa, te ham gosewo un te shunah ap leste? Hoske peneh tu kowa jaake?

5. Tu nai atcheh i Jehoweske loyal

Maro kamlepen ap i Jehoweste motivierell men, te rakras wawarentsa pral leste. Un maro loyalepen motivierell men, te kras kowa ninna, te hi menge kowa phares. Te dikan o VIDEO, rakrenn khetne pral:

VIDEO: Ma dare, te rakress pral tiro patsepen, ninna te lenn le tut pala (5:09)

Hi tuke kowa phares, te rakress wawarentsa pral i Jehoweste?
Hoi his ko phraleske an o video mishto, te nai djal lo pral peskri traash?

Te kamah, hoi o Jehowah kamella, un te dikah tchilatches ap kowa, ap hoi job tchilatches dikella, hi menge kowa mishto, te nai atchas loyaltikes ap i Jehoweskri rig. Dikenn pal an Amos 5:15, un rakrenn khetne pral:

Hoi penals tu: Hoi kamell o Jehowah? Un ap hoi dikell lo tchilatches?
Har nai kamah kowa, hoi latcho hi, un har nai dikah mer tchilatches ap kowa, hoi tchilatcho hi?

6. Te shunah ap i Jehoweste, hi menge kowa mishto

Te shunah ap i Jehoweste, hi menge kowa an hako tsiro o fetester. Dikenn pal an Jesaja 48:17, 18, un rakrenn khetne pral:

Patseh tu, kai djinell o Jehowah an hako tsiro, hoi tuke o fetester hi? Hoske peneh tu kowa jaake?
Hoi anas tuke kowa, hoi tu pral o tchatcho Debleste Jehowah un dran i bibla haiwal?

BUD PENENNA: “Kowa, hoi me krau, hi i Jehoweske jek.”