Jaake bud shukar un bachtelo koowa nai haiwah mer doleske, kai ham djido. Ninna te hi men phare tsire, denn kote momente an o djipen, hoi bachteles nai krenna. Har nai sikrah mer i Jehoweske, kai ham parkedo o djipaske? Un hoske hunte kras kowa ninna?

1. Hoske hunte was mer parkedo o djipaske?

Mer lam o djipen maro kamlo dadestar Jehowah. I bibla penella, kai well o djipen lestar (Gilja 36:9, 10). “Job das lauteren o djipen,” un job dell menge kowa halauter, hoi men hunte well djipaske (Bitchepangre 17:25, 28). His kowa halauter? Na-a. Job krell ninna, kai well men i djipen, hoi menge shukar hi, un hoi bachteles krella (Dik pal an Bitchepangre 14:17).

2. Har nai sikrah i Jehoweske, kai ham parkedo o djipaske?

An ko tsiro, kai tiri dai gomme gar djinas, kai hal tu djido, dikas o Jehowah ap tute. An i mangepen, hoi mukas o Jehowah an i bibla te tchinell, penas o David ap leste: “Tu dikal man, har gar kerdo hums” (Gilja 139:16). Tiro djipen hi an i Jehoweskre jakka tchatchepah bud moldo (Dik pal an Mateo 10:29-31). Doleske dukals leske kowa ninna jaake bud, te lals jek peskro oder i wareskro djipen a (2. Mose 20:13). I Jehoweske dukals kowa ninna, te tchiwams mer maro djipen tchitcheske an i risiko, oder te dams gar garda ap o djipen wawarendar, te hin le pash mende. Mer te dah garda ap maro djipen, un ninna te respektierah mer o djipen wawarendar, palle sikrah mer maro parkepen ap ko kutch koowa, hoi o Jehowah menge das.

 RODAS DUREDER

3. Dik, te atchess sassto

Kola, kai dan sowel, kai krenn le kowa, hoi o Jehowah kamella, djiwenn kokres leske. Lengro djipen un lengro trupo dan le o Debleske. Dikenn pal an Remarja 12:1, 2, un rakrenn khetne pral:

• Hoske hunte dikas mer pal kowa, te atchas sassto?

• Har nai kreh tu kowa?

 5. Ma duke o djipen i tchawendar, kai gar boldo hin

An poetikte laba penas o David, kai dikell o Jehowah o kamlepah ap tikne tchawende, kai gomme gar boldo hin. Dikenn pal an Gilja 139:13-17, un rakrenn khetne pral:

• Kaana hi o djipen an i Jehoweskre jakka i djipen: Te well i djuwel wawartchandes, oder te well o ternepen boldo?

O Jehoweskro lab, hoi lo i Israelenge das, das garda ap daja un pengre tchawende, kai gomme gar boldo hins: “Te kurenn pen mursha, un jon dukrenn i phari djuwjat jaake, kai wenn lakre tchawe glan pengro tsiro boldo un kek merella, palle hunte plaissrell kowa, koles doosh hi, jaake bud lowe, har o rom lestar kamella. … Te merell jek, palle hunte dess djipen o djipaske” (2. Mose 21:22, 23, NWT). Rakrenn khetne pral:

• Har dikell o Jehowah ap koleste, kai kras, te merell i ternepen, hoi gar boldo hi, ninna te his kowa gar bisemake?

• Har hunte well i Jehoweske kowa, te krell jek kowa bisemake? b

• Dikeh tu kowa ninna jaake, har o Dewel? Hoske peneh tu kowa jaake?

Dikenn o VIDEO.

Ninna te hi i djuwjake o djipen bud moldo, nai well lake kowa an shero, kai della kek wawar drom lake, har te mukell li o ternepen krik te krell. Dikenn pal an Jesaja 41:10, un rakrenn khetne pral:

• Koneha hunte rakrell i djuwel, te well ap late penlo, te mukell li peskro ternepen krik te krell, un hoske?

 HOI KATE PENLO WAS

I bibla penell menge, te kamas, te respektieras un te das garda ap maro djipen, un ninna ap o djipen wawarendar.

Hoi penals tu?

• Hoske hi o mensheskro djipen an i Jehoweskre jakka jaake bud moldo?

• Har hi i Jehoweske kowa, te lell jek o djipen i menshestar?

• Hoske hi o djipen an tire jakka jaake bud moldo?