O Dewel dell hakenes gole, te wenn le an i mangepen glan leste (1. Johanni 5:14). Hunell lo ap hako mangepen? Naa. Pash kola Israelitarjende his kowa jaake, gai khamas o Dewel gar ap lengro mangepen shunell. Hoske? Jon atchan an o tchilatchepen. O emligo hi, te hi i rom ap peskri romni tchilatcho (1. Petro 3:7). Ninna te kras jek i bari doosh, nai hunell o Dewel ap leskro mangepen, te khaitell les kowa o djiestar. Jaake haiwah mer, gai hunte well o mangepen tchimoni, hoi menge kutch hi. — Dikh pala an Johanni 9:31; Bitchepangre 3:19.

Kate hatseh ninna o Video Shunell o Dewel ap hako mangepen?

I mangepen hi i rakepen o Dewleha. Jaake haiwah mer, gai hunte mangass mer kokeres ap koleste, gai gerdas men: Ap maro Dewleste Jehowah (Mateo 4:10; 6:9). O Jesus das peskro djipen, te nai ginell lo men dran i doosh win. Jaake haiwah mer ninna, gai hunte mangass mer i Dewles dran o Jeseskro lab (Johanni 14:6). O Jehowah khamella, te penass mer an i mangepen kowa hallauter, hoi menge ap maro dji hi. Job ma khamella, te penah mer pale un pale i emlige laba, ninna khamell lo gar, te traberah mer i mangepen, hoi tchindlo hi, tele. — Dikh pala an Mateo 6:7; Filiparja 4:6, 7.

Te penell jek i mangepen tchorchanes an o dji, hunell o Dewel kowa ninna (1. Mose 24:42-45). Mer nai rakerah leha an hake tsire: Sarlakro, ratsiakro, glan o chabpen, ninna te hi men probleme. — Dikh pala an Gilja 16:8; Mateo 15:36.

Trul mende hi sawe, gai patsenn gar ap i Dewleste. Jon san pral i Dewleskre laba, gai anell job bacht un latchepen ap i phub. Doleske hi kowa phares, te atchass maala i Dewlestar  (2. Timoteo 3:1, 4; 2. Petro 3:3, 13). Jaake haiwah mer: Mer hunte wass kolentsa ketene, gai ninna patslo hi. Jaake nai krah mer men sorles. — Dikh pala an Hebrearja 10:24, 25.

Menge hi kowa mishto, te wah mer kolentsa ketene, gai gamenn i Dewles, te nai atchah maala i Dewlestar. Hakeno, gai djala an i Ketenepen i Jehoweskre Rakepangrendar, nai wella dran o patsepen i wawarendar sorleda. — Dikh pala an Remarja 1:11, 12.

I Dewleskro maal mukell kowa an peskro shero trujal te djal, hoi lo dran i bibla haiwas. Kote hatsah mer, hoi job menge kras, hoi job mendar khamella, ninna ap hoi job pes sowel das. Te mukah kowa an i mangepen an maro shero trujal te djal, well maro barkepen ap o Dewleskro gamlepen un gosewepen an maro dji bareda. — Dikh pala an Josua 1:8; Gilja 1:1-3.

Tu nai weh i maal i Dewlestar, tu te patseh ap leste. O patsepen hi ha i rukh. Te nai well i rukh bares, hunte well les pani. Jaake hunte lell tiro patsepen ninna “pani” – tu hunte rikeress tut ko kooma glan tire jakka, hoi tiro patsepen djides krella. — Dikh pala an Mateo 4:4; Hebrearja 11:1, 6.

O Jehowah dikell ap hakeneste, gai les gamella. Job nashte rikerell hallauter pale, hoi maro patsepen nai krella paash; job rikrell maro patsepen ap o djipen hake tsireske djides (Gilja 36:7, 8; 41:2, 3). O Dewel tsikerell menge ninna kola tchilatche droma, gai nai lenn maro sasstepen un maro bachtlepen. O Jehowah sikerell menge o fedestar drom an maro djipen, hoi nai della. — Dikh pala an Jakobo 4:4, 8.