O latcho lab, gai nashte djiwah mer hake tsireske ap i phub, hi an i bibla tardo (Gilja 37:29). I bibla hi jek baro libro, hoi tchiwell pes dran 66 tikne libre ketene. O Dewel rodas pes budeda ha 40 patsle morsha win, te tchinenn jon leske i bibla. O Moses tchinas glan 3.500 bersha i glanstune pantch libre. O palstuno libro an i bibla was glan 1.900 bersha o Johannestar tchindes. Hoi tchinan kola tsele morsha pre? Dran peskro ducho tchiwas o Dewel lenge kowa an o dji, hoi job khamas, te tchinenn le pre. Jaake haiwah mer, gai o Jehowah ko jek hi, gai tchatchepaha i bibla tchinas. — Dikh pala an 2. Timoteo 3:16; 2. Petro 1:20, 21.

Kate hatseh ninna o Video Koon tchinas i bibla tchatchepaha?

I bibla hunte well o Dewlestar. Hoske? An late hi hallauter tchindes, hoi o tsiro anella. Ko nashte penell menge kek manush (Hebrearja 1:1). Kokeres o Dewel nai dikell an o tsiro glan mende. Ninna hi job kokeres ko jek, gai nashte penell exakt ko kooma, hoi ap i manushende wella. — Dikh pala an Debleskro tsiro 1:1.

I libro o Dewlestar hunte well, ha kek wawar libro. Jaake hi i bibla! Joj della an bud sheel tchipja, ninna was li bud milliarde koppe an i manushengre wasta dino. Ap jek rig hi i bibla phures. Ap i wawar rig haiwah mer, gai hi kowa hallauter tchatcho, hoi an i bibla pral o manushengro gosewepen tardo hi. Hallauter, hoi kola 40 patsle morsha tchinan, hi jaake, ha te wals len jek dji pash o tchinepen. Mer te traberah i bibla, haiwah mer ninna o Dewleskro gamlepen! Ko libro, gai was o budesta bikemen, dell men ninna an mare diwesa i soor, te mukass ko tselo djunglo kooma an maro djipen. Kowa hallauter tsikeras bud manushen: I bibla hi o Dewleskro lab. — Dikh pala an 1. Tessalonikarja 2:13.

Kate hatseh ninna o Video Hoske te well an i bibla o tchatchepen?

I bibla rakerell pral bud latche laba. Jek latcho lab hi, gai khamell o Dewel men i gamlo tsiro te dell. O Dewleskro lab sikerell menge, gai an o glanstuno tsiro ap i phub i paradiso his. Balle djas o djipen an o paradiso nashedo. O latcho lab hi: Ap mari phub well o paradiso papale! — Dikh pala an Debleskro tsiro 21:3-5.

An o Dewleskro lab hi tchindes, (1) ap hoi te shunass, te djal les menge mishto, (2) ap hoi te rikerass men hunte un (3) ha te djiwass maro djipen. Ninna hatsah mer, ha o Dewel i manushentsa trul djas. Jaake dikah mer leskri shinia. Tu dikeh: O Dewel well menge brindjedo, te traberah mer i bibla. Joj sikrella, ha te wass leskro maal. — Dikh pala an Gilja 19:7, 8, 11, 12; Jakobo 2:23; 4:8.

Kaja literatura hi menge mishto, te khamah mer i biblat te haiwell. O Jesus rakeras gar dran peste, job penas kowa, hoi tchindo hi. Balle sikeras lo i manushen, “te haiwenn le o Dewleskro lab”. Jaake krell les kaja literatura ninna. — Dikh pala an Luka 24:27, 45.

Dell gar bud, hoi jaake shukka hi, ha i latche laba i Dewlestar. Denna sawe, gai penenn, lenge hi kowa jek. Wawar wenn chojedo pral o latcho lab. Ma daare: Tiro patsepen ap o djipen hake tsireske atchella djides, te brindjereh tu o Dewles. — Dikh pala an Johanni 17:3.