Ando Marzo katar o 2022 anklisto ando JW kako suato: “Sam veselime ke le Phral kai Ningeren amen alosarde ke shai chidas amen pale o 1 anda o abril, te avela ke le amperetsii kai tumen beshen mekela te chiden tumen”. Le marturia le Jehovaske pe sa e lumia samas defial veselime kana ashundiam kako suato, numa e pandemia chi gelisastar.⁠ a Te arakhas le manushen kai chidenpe amentsa trobusas te parhuvas uni prame ai te khosas le Riga kai chidas amen. Sar sas te aven gata le Riga kai chidas amen polme kai nakhle dui borsh?

 Amare phral azhukerenas zurales te chidenpe pale.

 O shon polme kai mekliam te chidas amen ando 2020, le phral kai vazden ai lasharen le Riga ando Warwick (Nueva York) astarde te dikhen sar shai kerasas te avas arakhade ai te chidas amen pale.

 Ande uni riga la lumiake trobula len uni prame ai ande aver riga trobulas len aver prame. O Mathew De Sanctis, kai kerel buki le phralentsa kai vazden ai lasharen le riga ande lumia, mothol: “Nas vushoro te arakhas iek rig te jalaven le vast. Te avela kai chidenpe nas pai, trobulas te kinen les vai te anen les katar iek reko vai aver than kai si pai”. Ande aver riga le amperetsii thode zakonuria te meken le feliestri puterde te del e barval, ai aver prame te vuzharas ai te avas saste.

 So kerde amare phral te lasharen kakala bedi? O Mathew phenel amenge ke ande but riga kai chidas amen shai keren vareso mai vushoro ai mai lezni. Iek ejemplo si, ke amare phral katar Papúa Nueva Guinea arakhle vareso te jalaven le vast, line uni kore kai shai pherdion 20 litruria pai ai thode vareso te anklel o pai. Ai gadia, te avel arakhado iek Rig kai chidas amen kai sas dur katar o foro anklisto numa 40 dolaria. Ai vi, kindian katar iek manush katar e Asia mai katar 6.000 prame te jalaven le vast kai shai ningerenpe pe suako rig te tradas len kai chidas amen ando África.

 Ai vi, trobusas te thas vai te lasharas prame te avel mai barval kai chidas amen. Ande uni riga trobusas te kinas sastria te ninkeren o microfono te na zhan vast vastestar. Vi khosliam le prame kai azbanpe butivar sar la vudara ai le feliestri te ningeras sa vuzho te na nasuavol khonik. Ande uni Riga kai chidas amen thode uni prame te avel mai vushoro te jalaven le vast ai te na azban khanchi. Ando Chile, te lasharas suako Rig kai chidas amen anklisto uni 1.400 dolaria.

 Makar amare phralenge sas iek bari prama te aven le phral arakhade ande le Riga kai chidas amen, kerde iek bari buki te dikhen mishto so kerelpe le loventsa kai den tumendar. Ande uni thema amare phral mekle te azhutin len le amperetsii te pokinen le prame te jalaven le vast ai le sastria kai ninkeren le microfonuria. Le khera Betel kerde buki kidine te kinen but prame ai chi anklisto lenge but love. Le khera Betel ai le phral kai kinen le prame kai trobunpe ande lumia kinenas le prame andel riga kai kerenaspe, ai gadia chi anklenas lenge but love ai chi jasarenas vriama.

 Sa so kerdilo te arakhen le Riga kai chidas amen azhutisardias kal phral te aliarenpe arakhade kana chidenaspe. Iek phei anda o Perú kai bushelpe Dulcine phendias ke kana zhanglias ke sas te chidas amen pale aliardias ke sas lake tsirha dar. Voi phendias: “Sas man COVID-19 kana aresli e pandemia, pala godia te gindiu ke te chidau man shai nasuavau pale, daravelas man. Numa kana areslem kai chidas amen dem po gor ke le phure kerde iek bari buki te arakhen amen. Sas prame te thonpe andel vast te aven mai vuzhe ai sastria kai ninkerenas le microfonuria. Mai anglal te chidas amen ai kana getol amaro chidimos khosas ai mekas sa vuzho. Pala sa so kerde, aliarde man arakhadi”. b

 Amari phei e Sara, katar e Zambia, nakhlias aver beda. Voi mothol: “Uni shon palpale, murho rhom mulo pala o COVID-19. Me gindivas ke sas te avel mange pharo te zhau kai chidas amen e pervo data bi lesko”. Sar aliarelpe akana kai amboldias pale kai chidas amen? Voi mothol: “Te zhau kai chidas amen sikavel man ke o Jehova si pasha amende. Kana chidau man aliarau sar le phure ai le kolaver phral sikaven mange kamlimos ai den man zor”.

 Ande sa e lumia amare phral aliarenpe defial naisime ai arakhade te chidenpe pale ande amare Riga. Naisis le love kai den tumendar but anda godola aresle anda donate.pr418.com.